Talanoa ki he Moʻuí

Naʻe hoko ha Vāhenga-Ngāue Fakamisinale ko Homa ʻApí Ia

FAKAMATALA FAI ʻE DICK WALDRON

Ko ha efiafi Sāpate ia ʻi Sepitema 1953. Ko e kau tūʻuta foʻou kimautolu ki ʻAfilika Tonga-Hihifo (ko Namīpia ia he taimí ni). Ne mau ʻi he fonuá siʻi hifo he uike ʻe tahá pea ko e teu ia ke mau fai ha fakataha maʻá e kakaí ʻi he kolomuʻá, ko Windhoek. Ko e hā naʻá ne ʻomai kimautolu mei ʻAositelēlia ki he fonua ʻAfilika ko ení? Ko hoku uaifí mo au, fakataha mo e kau finemui ʻe toko tolu, ne mau haʻu ko e kau misinale ʻo e ongoongo lelei ʻo e Puleʻanga ʻo e ʻOtuá.​—Mātiu 24:14.

NAʻE kamata ʻeku moʻuí ʻi ha tafaʻaki mamaʻo ʻo e māmaní ʻi ʻAositelēlia, ʻi he taʻu mahuʻinga ʻo e 1914. Naʻe feʻunga tonu hoku taʻu hongofulu tupú mo e Fuʻu Tōlalo Fakaʻekonōmiká, pea naʻe pau ke u fai ʻa ʻeku tafaʻakí ke tokonaki ki hono tauhi ʻo e fāmilí. Naʻe ʻikai ha ngāue, ka naʻá ku ʻiloʻi ha founga ke kumi ʻaki ʻa e fanga lāpisi kaivaó, ʻa ia naʻe lahi ʻaupito ʻi ʻAositelēlia. Ko ia ai, ko e taha ʻo ʻeku ngaahi tokoni tefito ki he meʻakai ʻa e fāmilí ko ha tokonaki pau ʻo e kakanoʻi lāpisí.

ʻI he aʻu ki he taimi naʻe mapuna hake ai ʻa e tau ua ʻa māmaní ʻi he 1939, naʻe lava ai ke maʻu haʻaku ngāue ʻi he ngaahi meʻalele uta pāsesé mo e ʻū pasi ʻi he kolo ko Melipoané. Naʻe ʻi ai ʻa e kau tangata ʻe toko 700 nai naʻa nau ngāue sifi ʻi he ngaahi pasí, pea ʻi he sifi kotoa naʻá ku fetaulaki ai mo ha tokotaha fakaʻuli pe tokotaha tali totongi kehekehe. Naʻá ku faʻa ʻeke ange kia kinautolu, “Ko e hā ʻa e lotu ʻokú ke kau ki aí?” pea ʻai kinautolu ke nau fakamatalaʻi ʻenau ngaahi tuí. Ko e tokotaha pē naʻe lava ke ne ʻomai kiate au ha ngaahi tali fakafiemālié ko e taha ʻo e Kau Fakamoʻoni ʻa Sihová. Naʻá ne fakamatalaʻi mai kiate au ʻa e pōpoaki makatuʻunga ʻi he Tohitapú fekauʻaki mo ha māmani palataisi, ʻa ia ʻe moʻui taʻengata ai ʻa e faʻahinga manavahē-ʻOtua ʻo e tangatá.​—Sāme 37:29.

 Lolotonga iá, naʻe toe fetuʻutaki ʻa ʻeku faʻeé mo e Kau Fakamoʻoni ʻa Sihová. ʻI heʻeku faʻa foki mei he sifi poʻulí, naʻe tuku mai ʻeku meʻakaí kiate au fakataha mo ha tatau ʻo e makasini Consolation (ʻoku ui he taimí ni ko e ʻĀ Hake!). Ko e meʻa naʻá ku laú naʻe ongo lelei kia au. ʻI he faai mai ʻa e taimí, naʻá ku fakamulituku ko e lotu moʻoní eni, pea naʻá ku hoko leva ai ʻo kau longomoʻui ki ai, peá u papitaiso ʻi Mē 1940.

Naʻe ʻi ai ha ʻapi tāimuʻa ʻi Melipoane, ʻa ia naʻe nofo ai ʻa e kau faifekau taimi-kakato nai ʻe toko 25 ʻo e Kau Fakamoʻoni ʻa Sihová. Naʻá ku nofo mo kinautolu. ʻI he ʻaho ki he ʻaho naʻá ku fanongo ai ki he ngaahi meʻa fakafiefia naʻa nau hokosia ʻi he ngāue fakamalangá, pea naʻe tupu ai ha holi ʻi hoku lotó ke kau ʻi honau tuʻungá. Faifai pē, naʻá ku kole ai ki he ngāue tāimuʻá. Naʻe tali au ki ai pea naʻe fiemaʻu ke u ngāue ʻi he ʻōfisi vaʻa ʻo e Kau Fakamoʻoni ʻa Sihová ʻi ʻAositelēliá. Naʻá ku hoko ai ko ha konga ʻo e fāmili Pētelí.

Tuku Pōpulá mo e Tapuí

Ko e taha ʻo ʻeku ngaahi ngāue ʻi Pētelí ko e ngāue ʻi ha mīsini fahi papa. Naʻa mau tutuʻu ai ʻa e papá ke ngaohiʻaki ʻa e malala ki he penisiní. Naʻe ngāueʻaki eni ki he ngaahi meʻalele ʻi he vaʻá koeʻuhi ko e penisini fakakomēsialé naʻe nounou ia tupu mei he taú. Ko e toko 12 ʻo kimautolu naʻe ngāue ʻi he fahiʻanga papá, ʻa ia ʻe ala malava ke ui ki he sōtiá. Naʻe ʻikai fuoloa kuo tautea kimautolu ki he nofo pōpula māhina ʻe ono ʻi heʻemau fakafisingaʻi makatuʻunga faka-Tohitapu ʻa e ngāue fakakautaú. (Aisea 2:4) Naʻe ʻave kimautolu ki ha faama pōpula ke ngāue pōpula ai. Ko e hā naʻa nau ʻomai ke mau faí? Ko e meʻa fakaʻohovalé, naʻe pau ke mau tutuʻu ʻa e ʻakaú, ʻa e meʻa tofu pē ko ia naʻe akoʻi ke mau fai ʻi Pētelí!

Naʻe mātuʻaki lelei ʻaupito ʻemau tutuʻu ʻakaú ʻo ʻomai ai ʻe he pule ʻo e pilīsoné kia kimautolu ha Tohitapu pea mo ʻemau ʻū tohi faka-Tohitapú, neongo ʻa e ngaahi tuʻutuʻuni fefeka ʻoku totonu ke ʻoua ʻe ʻomai kia kimautolu ʻa e ngaahi meʻa ko iá. ʻI he lolotonga ʻa e taimi ko ení naʻá ku ako ai ha lēsoni ʻaonga ʻi he vahaʻangatae fakaetangatá. Lolotonga ʻeku ngāue ʻi Pētelí, naʻe ʻi ai ʻa e tokoua ʻe taha ʻa ia naʻe ʻikai pē lava ia ke ma fetaulaki. Naʻe fuʻu kehekehe pē ʻa homa angaʻitangatá. Sai, ko hai ʻokú ke fakakaukau naʻe tuku fakataha mo au ʻi he kiʻi loki pilīsone tatau? ʻIo, ko e tokoua tofu pē ko iá. Ko ia naʻá ma maʻu moʻoni ai ʻa e taimi ke ma hoko ai ʻo feʻilongaki lelei, pea ko e ikuʻangá naʻá ma fakatupu ai ha kaumeʻa vāofi mo tuʻuloa.

ʻI he faai mai ʻa e taimí, naʻe tapui ai ʻa e ngāue ʻa e Kau Fakamoʻoni ʻa Sihová ʻi ʻAositelēlia. Naʻe faʻao kotoa ʻa e paʻangá, pea naʻe mātuʻaki siʻi ʻa e tuʻunga fakapaʻanga naʻe maʻu ʻe he fanga tokoua ʻi Pētelí. ʻI he taimi ʻe taha, naʻe haʻu ai ha taha ʻo kinautolu kiate au ʻo pehē mai: “Dick, ʻoku ou loto ke ʻalu ʻo faifakamoʻoni ʻi kolo, ka ʻoku ʻikai haku sū, ko e puti ngāué pē.” Naʻá ku fiefia ke tokoniʻi ia, pea naʻá ne tui hoku suú ʻo ʻalu mo ia ki kolo.

Ki mui ai, naʻa mau fanongo naʻe puke ia ʻo tuku pilīsone ko ʻene malangá. Naʻe ʻikai ke u ala mataʻofi hono ʻave kiate ia ha kiʻi nouti: “ʻOku ou fakaʻofaʻia he meʻa ʻoku hoko kiate koé. ʻOku ou fiefia he ʻikai ke ʻi ho tuʻungá.” Ka naʻe vave pē hono puke mo au foki ʻo tuku pilīsone ko hono tuʻo uá ia koeʻuhí ko ʻeku tuʻu-ʻataá. Hili hono tukuange aú, naʻe vaheʻi ai ke u tokangaʻi ʻa e faama naʻá ne tokonaki ʻa e meʻakai ki he fāmili Pētelí. ʻI he taimi ko ení naʻa mau ikuna ai ʻi ha tuʻutuʻuni fakaefakamaau, pea naʻe toʻo ai ʻa e tapui ʻo e ngaahi ngāue ʻa e Kau Fakamoʻoni ʻa Sihová.

Mali mo ha ʻEvangeliō Faivelenga

Lolotonga ʻa e ʻi he fāmá, naʻá ku kamata fakakaukau fakamātoato ai ki he nofo malí pea naʻá ku hoko ʻo manako ʻi ha tuofefine tāimuʻa finemui, ko Coralie Clogan. Ko e kui-fefine ʻa Coralie ʻa e ʻuluaki tokotaha ʻi hono fāmilí naʻá ne fakahaaʻi ʻa e mahuʻingaʻia ʻi he pōpoaki ʻa e Tohitapú. ʻI heʻene lea tukú, naʻá ne pehē ange ai ki he faʻē ʻa Coralie, ko Vera: “Tauhi hake hoʻo fānaú ke nau ʻofa mo tauhi ki he ʻOtuá, pea te tau fetaulaki ai ʻi ha ʻaho ʻi he māmani Palataisí.” Ki mui ai, ʻi he taimi naʻe haʻu ai ha tāimuʻa ki he matapā ʻo Vera mo e tohi ko e Millions Now Living Will Never Die, naʻe kamata ke ʻuhinga ai ʻa e ngaahi lea ko iá. Naʻe fakatuipauʻi ʻe he kiʻi tohí ʻa Vera ko e taumuʻa ia ʻa e ʻOtuá ki he faʻahinga ʻo e tangatá ke nau fiefia ʻi he moʻuí ʻi ha māmani palataisi. (Fakahā 21:4) Naʻe papitaiso ia ʻi he konga ki muʻa ʻo e 1930 tupú, pea hangē pē ko e meʻa naʻe fakalototoʻaʻi ʻe heʻene faʻeé, naʻá ne tokoniʻi ʻa ʻene fānau fefine ʻe toko tolú—ko Lucy, Jean, mo Coralie—ke nau fakatupulekina ha ʻofa ki he ʻOtuá. Kae kehe, ko e tamai ʻa Coralie, naʻe fakafepaki mālohi ia ki he  ngaahi meʻa fakalotu ʻa hono fāmilí, hangē pē ko e meʻa naʻe fakatokanga ʻa Sīsū ʻe hoko nai ʻi he ngaahi lotoʻi fāmilí.​—Mātiu 10:​34-​36.

Ko e kau Clogans ko ha fāmili mūsika; ʻa ia naʻe tā ʻe he fānaú taki taha ha meʻalea. Naʻe tā ʻe Coralie ʻa e vālingí, pea ʻi he 1939, ʻi hono taʻu 15, naʻe foaki ai kiate ia ha tipiloma ʻi he mūsiká. Ko e mapuna hake ʻa e Tau II ʻa Māmaní naʻá ne ʻai ʻa Coralie ke fakakaukau fakamātoato ai fekauʻaki mo hono kahaʻú. Naʻe hoko mai ai ha taimi kiate ia ke ne fai ai ha fili fekauʻaki mo e meʻa te ne fai ʻaki ʻene moʻuí. ʻI he tafaʻaki ʻe tahá, naʻe ʻi ai ha faingamālie ki haʻane ngāue ʻi he mūsiká. Naʻe ʻosi ʻi ai ha fakaafe ke ne tā ʻi he Kau Tā Meʻalea Simifoni ʻa Melipoané. ʻI he tafaʻaki ʻe tahá, naʻe ʻi ai ʻa e faingamālie ki hono līʻoa ʻa hono taimí ki he ngāue maʻongoʻonga ko hono malangaʻi ʻo e pōpoaki ʻa e Puleʻangá. Hili ha fakakaukau fakamātoato, naʻe papitaiso ai ʻa Coralie mo hono ongo tokouá ʻi he 1940 pea fai ʻa e ngaahi teuteu ke hū ʻo kau ʻi he ngāue fakaʻevangeliō taimi-kakató.

Taimi nounou mei he fakapapauʻi ʻe Coralie ʻene fakakaukaú fekauʻaki mo e ngāue fakafaifekau taimi-kakató mo e fakalea ki ai ha tokoua fua fatongia mei he vaʻa ʻi ʻAositelēliá, ko Lloyd Barry, ʻa ia naʻe ngāue ki mui ko ha mēmipa ʻo e Kulupu Pule ʻa e Kau Fakamoʻoni ʻa Sihová. Ko e toki ʻosi ia ʻene fai ha malanga ʻi Melipoane pea naʻá ne tala ange kia Coralie: “Te u foki ki Pēteli. Ko e hā ʻoku ʻikai te ke foki ai mo au ʻi he lēlué ʻo kau ʻi he fāmili Pētelí?” Naʻá ne tali loto-lelei ia.

Ko Coralie mo e fanga tuofāfine kehe ʻo e fāmili Pētelí naʻa nau fakahoko ha ngafa mātuʻaki mahuʻinga ʻi hono tokonaki ʻa e ʻū tohi faka-Tohitapú ki he fanga tokoua ʻi ʻAositelēliá lolotonga ʻa e tapui ʻi he ngaahi taʻu ʻo e taú. Naʻa nau meimei fai kotoa ʻa e pulusí, ʻi he malumalu ʻo hono tokangaʻi ʻe Tokoua Malcolm Vale. Ko e ongo tohi The New World mo e Children naʻe pulusi lahi ia, pea naʻe ʻikai ha ʻīsiu ʻe taha ʻo e makasini Taua Leʻo naʻe hala lolotonga ia ʻa e lele ʻa e tapuí ʻo laka hake ʻi he taʻu ʻe uá.

Naʻe pau ke hiki holo ʻa e ngāue pulusí ʻo tuʻo 15 nai koeʻuhi ke kalofi holo ʻa e kau polisí. ʻI he tuʻunga ʻe taha, naʻe pulusi ai ʻa e ʻū tohi faka-Tohitapú ʻi lalo ʻi ha fale naʻe pulusi ai ha meʻa kehe ko hano fakapuliki. Ko e tuofefine ʻi he feituʻu talitali kakaí naʻe lava ke ne lomiʻi ha meʻa ʻa ia naʻe tatangi ai ha fafangu ʻi lalo fale ʻi ha taimi pē naʻe maluʻaki mai ai ha fakatuʻutāmaki, koeʻuhi ke lava ʻe he fanga tuofāfine aí ʻo fufū ʻa e ʻū tohí ki muʻa ke lava ʻo kamata ʻe ha taha ha hua.

Lolotonga ha hua pehē ʻe taha, naʻe ʻohovale ʻa e niʻihi ʻo e fanga tuofāfiné ʻi heʻenau fakatokangaʻi atu naʻe hili ha tatau ʻo e Taua Leʻo ʻi ha funga tēpile ʻo ʻasi lelei ke sio ki ai ʻa e tokotaha kotoa. Naʻe hū mai ʻa e polisí, ʻo tuku ʻene kató ʻi he funga Taua Leʻo tonu, pea hoko atu ʻene kumí. ʻI he ʻikai ʻiloʻi ha meʻá, naʻá ne toʻo ʻene kató ʻo hū ki tuʻa!

Hili hono toʻo ʻa e tapuí pea toe fakafoki ʻa e koloa ʻa e vaʻá ki he fanga tokouá, naʻe ʻoange ai ki he tokolahi ʻo kinautolu ʻa e faingamālie ke ʻalu ai ʻi he malaʻé ʻi he tuʻunga ko e kau tāimuʻa makehe. Ko e taimi ia naʻe pole ai ʻa Coralie ke ʻalu ki Glen Innes. Naʻá ku kau fakataha mo ia ʻi ai ʻi heʻema mali ʻi Sanuali 1, 1948. ʻI he taimi naʻá ma mavahe ai mei he vāhenga-ngāue ko iá, naʻe fokotuʻu ai ha fakatahaʻanga longomoʻui.

Ko homa vāhenga-ngāue hokó ko Rockhampton, ka naʻe ʻikai lava ke ma maʻu ha nofoʻanga ai. Ko ia ai, naʻá ma fokotuʻu ha tēniti ʻi ha loto ʻataʻatā ʻi he faama ʻa ha tokotaha mahuʻingaʻia. Ko e tēniti ko iá naʻe hoko ia ko homa ʻapi ʻi he māhina ʻe hiva hono hokó. Naʻe mei lōloa ange ai ʻa e nofó, ka ʻi he taimi naʻe hoko mai ai ʻa e faʻahitaʻu ʻuhá, naʻe haehae iiki ʻa e tēnití ʻe ha afā fakatalopiki, pea naʻe tafiʻi ia ʻe he ʻuha lahí. a

 Ko ʻEma Hiki ki ha Vāhenga-Ngāue Mulí

Lolotonga ʻema ʻi Rockhampton, naʻá ma maʻu ai ha fakaafe ke kau ki he kalasi hono 19 ʻa e Akoʻanga Tohitapu Taua Leʻo ko Kiliatí ki ha ako fakamisinale. Pea ko e ʻuhinga ia, hili ʻa e maʻu tohi fakamoʻoni ako ʻi he 1952, naʻe ʻave ai kimaua ki he feituʻu naʻe ʻiloa he taimi ko iá ko ʻAfilika Tonga-Hihifó.

ʻI he ʻikai toe tatalí, naʻe fakahaaʻi ʻe he haʻa faifekau ʻo e Puleʻanga-Haʻa-Kalisitiané ʻa e anga ʻo ʻenau ongoʻi fekauʻaki mo ʻema ngāue fakamisinalé. ʻI he Sāpate taki taha feʻunga mo e uike hokohoko ʻe ono, naʻa nau fakatokanga ai mei he tuʻunga malangá ki heʻenau ngaahi fakatahaʻangá fekauʻaki mo kimaua. Naʻa nau tala ki he kakaí ke ʻoua naʻa fakaava ʻa e matapaá kia kimaua pea ʻoua ʻe fakaʻatā kimaua ke lau ange ʻa e Tohitapú, he te nau puputuʻu ai. ʻI he feituʻu ʻe taha, naʻá ma tufa ai ha ʻū tohi lahi, ka naʻe muimuiʻi kimaua ʻe he faifekaú mei he fale ki he fale ʻo tānaki kinautolu. ʻI he ʻaho ʻe taha naʻá ma fetalanoaʻaki ai ʻi he loki ʻo e faifekaú peá ma sio ai ki he sitoka lahi ʻo ʻema ʻū tohí.

Naʻe ʻikai fuoloa kuo toe kamata ke fakahaaʻi ʻe he kau maʻu mafai fakalotofonuá ʻenau hohaʻa fekauʻaki mo ʻema ngaahi ngāué. ʻOku ʻikai ha veiveiua ʻi he fakaʻaiʻai ʻe he haʻa faifekaú, naʻa nau huʻuhuʻu naʻa ʻoku ʻi ai nai haʻama ngaahi fetuʻutaki faka-Kominiusi. Ko ia ai, naʻe ʻai homa fakaʻilonga nima, pea ko e niʻihi ʻo e kakai naʻá ma ʻaʻahi ki aí naʻe fakaʻekeʻeke kinautolu. Neongo ʻa e fakafepaki kotoa ko ení, ko e maʻu ʻo ʻema ngaahi fakatahá naʻe tupulaki tuʻumaʻu ia.

Mei ha kamata ʻo ʻema nofó, naʻá ma fakatupulekina ai ha holi lahi ke fakamafola ʻa e pōpoaki ʻo e Tohitapú ʻi he lotolotonga ʻo e kakai tuʻufonua ʻo Ovambo, Herero, mo Nama. Kae kehe, naʻe ʻikai ke faingofua eni. ʻI he ngaahi ʻaho ko iá, naʻe tō ai ʻa ʻAfilika Tonga-Hihifo ki he malumalu ʻo e pule ʻa e puleʻanga lau lanu ʻo ʻAfilika Tongá. ʻI he tuʻunga ko e ongo meʻa hinehiná, naʻe ʻikai ke fakaʻatā kimaua ke faifakamoʻoni ʻi he ngaahi feituʻu ʻo e kau ʻuliʻulí taʻeʻiai ha ngofua fakapuleʻanga. ʻI he taimi ki he taimi, naʻá ma tohi ai ʻo kole, ka naʻe fakafisi pē ʻa e kau maʻu mafaí ke ʻomai kia kimaua ha ngofua.

Hili ʻa e taʻu ʻe ua ʻi homa vāhenga-ngāue mulí, naʻá ma ʻohovale. Naʻe feitama ʻa Coralie. ʻI ʻOkatopa 1955, naʻe fāʻeleʻi ai ʻa homa ʻofefiné, ko Charlotte. Neongo naʻe ʻikai kei lava ke ma hokohoko atu ai ko ha ongo misinale, naʻá ku malava ke maʻu ha ngāue konga-taimi pea hokohoko atu ai ʻi ha taimi ʻi he tuʻunga ko ha tāimuʻa.

Ko ha Tali ki Heʻema Ngaahi Lotú

ʻI he 1960 naʻá ma fehangahangai ai mo ha toe pole ʻe taha. Naʻe maʻu ʻe Coralie ha tohi ʻo fakahaaʻi mai ai naʻe puke lahi ʻaupito ʻa ʻene faʻeé ʻa ia kapau ʻe ʻikai foki ki ʻapi ʻa Coralie, ʻe ʻikai ʻaupito nai te ne toe sio ki heʻene faʻeé. Ko ia, naʻá ma palani ai ke mavahe mei ʻAfilika Tonga-Hihifo ʻo foki ki ʻAositelēlia. Naʻe hoko ai ha meʻa—ko e uike tofu pē ko ia naʻe teu ai ke ma mavahé, naʻá ku maʻu ai  mei he kau maʻu mafai fakalotofonuá ʻa e ngofua ke hū ki he kolo ʻo e kau ʻuliʻulí, ko Katutura. Ko e hā te ma fai he taimi ko ení? Ko hono fakafoki ʻa e ngofuá hili ia ʻa e fāinga ʻi he taʻu ʻe fitu ke maʻu iá? Naʻe faingofua ke fakaʻuhinga ʻe lava ʻe ha niʻihi ke hoko atu ʻa e ngāue naʻá ma faí. Kae ʻikai ko ha tāpuaki eni meia Sihova, ko ha tali ki heʻema ngaahi lotú?

Naʻá ku fai vave ha fili. Te u nofo pē au, ʻi he manavahē naʻa maumauʻi ʻi ha tuʻunga ʻemau fāinga ki ha ngofua tuʻumaʻú kapau te mau mavahe kotoa ki ʻAositelēlia. ʻI he ʻaho hoko maí, naʻá ku kaniseli ai ʻeku lēsisita ki he vaká pea tuku atu ʻa Coralie mo Charlotte ki ʻAositelēlia ʻi ha folau ʻeveʻeva lōloa.

Lolotonga ʻena mamaʻó, naʻá ku kamata faifakamoʻoni ai ki he kau nofo ʻi he kolo ʻo e kau ʻuliʻulí. Ko e mahuʻingaʻia naʻe fakahāʻí naʻe lahi fakaʻulia. ʻI he foki mai ʻa Coralie mo Charlotte, naʻe ʻosi maʻu ʻe ha kakai mei he kolo ʻo e kau ʻuliʻulí ʻemau ngaahi fakatahá.

ʻI he aʻu mai ki he taimi ko ení, naʻá ku maʻu ai ha motuʻi kā ʻa ia naʻá ku malava ai ke ʻomai ʻa e faʻahinga mahuʻingaʻiá ki he ngaahi fakatahá. Naʻá ku fai ha fononga ʻe fā pe nima ki he fakataha taki taha, ʻo ʻave ʻa e kakai ʻe toko fitu, valu, pe hiva ʻi he foʻi ʻalu ʻe taha. ʻI he hū ki tuʻa ʻa e tokotaha fakaʻosí, naʻe ʻeke fakakata mai ʻe Coralie: “Ko e toe toko fiha ʻoku ʻi ho lalo seá?”

Ke hoko ʻo ola lelei ange ʻi he ngāue fakamalangá, naʻá ma fiemaʻu ha ʻū tohi ʻi he lea ʻa e kakai tuʻufonuá. Ko ia ai, naʻá ku maʻu ʻa e monū ʻo hono fokotuʻutuʻu ke liliu ʻa e tuleki Life in a New World ki he lea fakafeituʻu ʻe fā: Faka-Hēlelo, Nama, Natonga, mo e Kauaniama. Ko e kau liliú ko e kakai poto ʻa ia naʻa mau ako Tohitapu, ka naʻe pau ke u ngāue mo kinautolu ke fakapapauʻi naʻe liliu totonu ʻa e foʻi sētesi taki taha. Ko e Nama ko ha lea ia ʻoku fakangatangata pē hono ngaahi foʻi leá. Hangē ko ení, naʻá ku feinga ke fakahaaʻi ʻa e foʻi poini: “ʻI he kamataʻangá ko ʻĀtamá ko ha tangata haohaoa.” Naʻe vaku ʻe he tokotaha liliú hono ʻulú peá ne pehē ʻoku ʻikai lava ke ne manatuʻi ʻa e foʻi lea Nama ki he “haohaoá.” Naʻe faifai pē peá ne pehē mai, “Kuó u maʻu ia. ʻI he kamataʻangá naʻe hangē ʻa ʻĀtama ko ha foʻi piisi momohó.”

Fiemālie ʻi he Fonua Naʻe Vaheʻi ki Ai Kimauá

Kuo mahili atu eni ha taʻu nai ʻe 49 talu mei heʻema ʻuluaki tūʻuta ʻi he fonuá ni, ʻoku ui he taimí ni ko Namīpiá. ʻOku ʻikai kei fiemaʻu ke maʻu ha ngofua ke hū ai ki he ngaahi kolo ʻo e kau ʻuliʻulí. ʻOku puleʻi ʻa Namīpia ʻe ha puleʻanga foʻou makatuʻunga ʻi he konisitūtone ʻikai lau fakamatakalí. ʻI he ʻahó ni, ʻi Windhoek ʻoku mau maʻu ai ha fakatahaʻanga lalahi ʻe fā ʻoku nau fakataha ʻi he ngaahi Fale Fakatahaʻanga fakafiemālie.

Naʻá ma faʻa fakakaukau ki he ngaahi lea naʻá ma fanongoa ai ʻi Kiliatí: “ʻAi homou vāhenga-ngāue mulí ko homou ʻapí ia.” Mei he founga ʻo hono tataki ʻe Sihova ʻa e ngaahi meʻá, ʻokú ma tuipau ko hono finangaló ia ke hoko ʻa e fonua muli ko ení ko homa ʻapi. Kuó ma hoko ʻo ʻofa ʻi he fanga tokouá, fakataha mo ʻenau ngaahi tōʻonga kehekehe fakamānakó. Kuó ma kakata mo kinautolu ʻi heʻenau fiefiá pea tangi mo kinautolu ʻi heʻenau mamahí. Ko e niʻihi ʻo e faʻahinga foʻou ko ia naʻa mau faʻa fakaʻefihi heʻema kaá ʻo ʻave ki he ngaahi fakatahá ʻoku nau ngāue he taimí ni ko e ngaahi pou mālohi ʻi heʻenau ngaahi fakatahaʻangá. ʻI heʻema tūʻuta ki he fonua lahi fau ko ení ʻi he 1953, ko e kau malanga fakalotofonua siʻi hifo ʻi he toko hongofulú naʻa nau malangaʻi ʻa e ongoongo leleí. Mei he fanga kiʻi kamataʻanga siʻisiʻi ko iá, kuo tupu homau tokolahí ʻo laka hake he toko 1,200. ʻI he moʻoni ʻa ʻene talaʻofá, kuo ʻomai ʻe Sihova ʻa e tupu ʻo e meʻa naʻá ma “to mo fakaviviku” fakataha mo e niʻihi kehé.—1 Kolinito 3:6.

ʻI heʻema sio atu ki he ngaahi taʻu lahi ʻo e ngāué, ʻuluakí ʻi ʻAositelēlia pea ʻi he taimí ni ʻi Namīpiá, ʻoku ou maʻu mo Coralie ha ongoʻi fiemālie lahi. ʻOkú ma ʻamanaki mo lotu ke hokohoko atu hono ʻomai ʻe Sihova kia kimaua ʻa e mālohi ke fai ai hono finangaló he taimí ni pea taʻengata.

[Fakamatala ʻi lalo]

[Fakatātā ʻi he peesi 26, 27]

Hiki ki homa vāhenga-ngāue ʻi Rockhampton, ʻAositelēlia

[Fakatātā ʻi he peesi 27]

ʻI he uafú ʻi he teu folau ki he Akoʻanga Kiliatí

[Fakatātā ʻi he peesi 28]

Ko e faifakamoʻoni ʻi Namīpiá ʻokú ne ʻomai kia kimaua ʻa e fiefia lahi