Ko e Tui ki ha ‘Otua ‘Oku ‘Ikai Nai Ke Tau ‘Ilo‘i

KO E toko ua mei he kakai ‘e toko tolu ‘i Siamane ‘oku nau tui ki he ‘Otuá. Neongo ia, ‘i he taimi na‘e ‘eke ai ki ha fa‘ahinga laka hake he toko taha afé ki hano fakamatala‘i ‘o e ‘Otua ‘oku nau tui ki aí, ko e meimei tokotaha kotoa pē na‘á ne ‘omai ha tali kehekehe. “‘Oku ma‘u ‘e he kakai Siamané ‘a e ngaahi tui tāutaha ki he ‘Otuá ‘oku kehekehe ‘o tatau tofu pē mo e kakaí tonu,” ko e līpooti ia ‘a e makasini ongoongo ko e FOCUS. Lolotonga ‘oku fakaongoongolelei‘i ‘a e tui ki he ‘Otuá, ‘ikai ko ha me‘a faka‘ofa ia ke tui kiate ia ‘o ‘ikai ‘ilo‘i pe ko e tokotaha fēfē ia?

Ko e veiveiua ko eni fekau‘aki mo e natula pe ko e tokotaha ko e ‘Otuá ‘oku ma‘u ia ‘o ‘ikai ‘i he ngaahi kau‘āfonua pē ‘o Siamané; ‘oku hoko ia ‘i he ngaahi feitu‘u kehe ‘i ‘Iulope. Ko ha savea na‘e fakahoko ‘i ‘Aositulia, Pilitānia, mo e ‘Otu Netalení na‘e fakahaa‘i ai ‘a e loto-tatau mafolalahia ko e ‘Otuá ko “ha mālohi mā‘olunga ange pe ko ha fakapulipuli ta‘ealafakamatala‘i.” ‘Oku tautefito ‘i he lotolotonga ‘o e to‘utupú, na‘a mo e ‘i he lotolotonga ‘o e fa‘ahinga ‘oku tui kiate iá, ‘a ‘ene hoko ko ha misitelí.

‘Okú Ke ‘Ilo‘i Fakafo‘ituitui ‘a e ‘Otuá?

‘Oku ‘i ai ha fu‘u faikehekehe ‘i hono ‘ilo‘i ‘o ha taha mo hono ‘ilo‘i fakafo‘ituitui iá. Ke ‘ilo‘i ha taha​—ko ha tu‘i ‘i ha feitu‘u mama‘o, ko ha ‘atelita tu‘u-ki-mu‘a, ko ha sitā faiva—​ko e lāu‘ilo pē ia ‘okú ne ‘i ai. Kae kehe, ke ‘ilo‘i fakafo‘ituitui ha taha, ‘oku ‘uhinga iá ki he me‘a lahi ange. ‘Oku kau ki ai ‘a e maheni mo e anga, ‘ulungaanga, ongo‘i, sai‘ia mo e fehi‘a, pea mo e ngaahi palani ki he kaha‘ú ‘a e tokotaha ko iá. Ke ‘ilo‘i fakafo‘ituitui ha taha ‘oku faka‘atā ai ‘a e hala ki hono ma‘u ha vaha‘angatae fekoekoe‘i mo ia.

Ko e laui kilu ‘o e fa‘ahinga tāutaha kuo nau faka‘osi‘aki ko hono ma‘u pē ha fakakaukau faka‘alongaua fekau‘aki mo e ‘Otuá—pe ko hono ‘ilo‘i pē iá—‘oku ‘ikai ke fe‘unga. Kuo nau fakalakalaka lahi ange ‘aki ‘a e hoko ‘o ‘ilo‘i lelei ‘a e ‘Otuá. Kuo nau ‘ilo‘i ‘oku ‘aonga ia? Ko ha tangata ko hono hingoá ko Paul, ‘a ia ‘oku nofo ‘i Siamane Tokelau pea na‘á ne ki‘i tui ‘i ha taimi ki he ‘Otuá, na‘á ne fili ke hoko ‘o maheni fakafo‘ituitui lelei ange mo Ia. ‘Oku fakamatala ‘a Paul: “Ko e hoko ‘o ‘ilo‘i lelei ‘a e ‘Otuá ‘oku fiema‘u ki ai ‘a e taimi mo e feinga, ka ko e ngaahi olá ‘oku mā‘olunga. Ko hono ma‘u ha vaha‘angatae vāofi mo e Tokotaha-Fakatupú ‘okú ne ‘ai ‘a e mo‘ui faka‘ahó ke toe lelei ange.”

‘Oku mahu‘inga ‘a e taimi mo e feinga ‘oku fiema‘u ke hoko ai ‘o ‘ilo‘i lelei ‘a e ‘Otuá? Kātaki ‘o lau ‘a e kupu hoko maí.

[Fakamatala ‘i he peesi 3]

‘Oku ‘i ai ha fu‘u faikehekehe ‘i hono ‘ilo‘i ‘o ha taha mo hono ‘ilo‘i fakafo‘ituitui iá