ʻAlu Atu ʻa e Kau Maʻu Tohi Fakamoʻoni Ako Kiliatí ko e Kau Ngāue Utu-Taʻu Faivelenga!

“KUO lahi ʻa e taʻu kuo motuʻu, ka ʻoku kaungatamaki ʻa e kau ngaue; ko ia mou kole ki he ʻEiki ʻoku aʻana ʻa e taʻu, ke ne kouna atu mo ha kau ngaue ke utu ʻene taʻu.” (Mātiu 9:​37, 38) Ko e ngaahi lea ko iá naʻe ʻi ai hono ʻuhinga makehe ki he kau maʻu tohi fakamoʻoni ako ʻo e kalasi hono 116 ʻo e Akoʻanga Tohi Tapu Taua Leʻo ko Kiliatí ʻi he teuteu ke nau ʻalu atu ki honau ngaahi vāhenga-ngāue fakamisinalé.

ʻI he Tokonaki, ʻaho 13 ʻo Maʻasi 2004, naʻe fakatahataha ai ʻa e kakai fakakātoa ʻe toko 6,684 ʻi he Senitā Fakaeako Taua Leʻó ʻi Patterson, Niu ʻIoke pea ʻi he ngaahi feituʻu naʻe fakahoko fakasatelaite ki ai ki he polokalama maʻu tohi fakamoʻoni akó, ʻa ia ʻi he lolotonga iá naʻe maʻu ai ʻe he kalasí ʻa e ekinaki mo e fakalototoʻa fakamāvae. Ko kitautolu kotoa ʻe lava ke tau maʻu ʻaonga mei he faleʻi ʻa ia naʻe tuku maí ʻi heʻetau ngāue faivelenga ʻi he utu-taʻu fakalaumālié.

Ko e lea kamata naʻe fai ʻe Theodore Jaracz, ko ha mēmipa ʻo e Kulupu Pulé pea ko ha tokotaha maʻu tohi fakamoʻoni ako ʻo e kalasi hono fitu ʻo Kiliatí, naʻe fakamamafaʻi ai ʻa e lea ʻa Sīsū: “Mou ō, ʻo ngaohi ʻa e ngāhi kakai kotoa pe ko ʻeku kau ako.” (Mātiu 28:​19, 20) He feʻungamālie ē ko ia, koeʻuhi he ʻoku fekauʻi atu ʻa e kau maʻu tohi fakamoʻoni akó ke nau ngāue ʻi he fonua kehekehe ʻe 20! Naʻá ne fakamanatu ki he kau akó ko e fakahinohino mei he Folofola ʻa e ʻOtuá kuo teuʻi kakato ai kinautolu ke nau hoko ko e kau ngāue faivelenga ʻi he utu-taʻu mahuʻinga taha fakalaumālié ni.​—Mātiu 5:​16.

Founga ke Hoko Ai ko e Kau Ngāue Utu-Taʻu Fua Lahi

Ko e ʻuluaki tokotaha lea ʻi he polokalamá ko Robert Wallen, ʻa ia kuo ʻi ai ʻene fekauʻaki vāofi mo e Akoʻanga Kiliatí ʻi he laui taʻu. ʻI he lea he kaveinga “Ko e Fakaʻofoʻofa ʻo e Manavaʻofá,” naʻá ne tala ai ki he kau akó: “Ko e manavaʻofá ʻa e lea ʻa ia naʻa mo e kau tulí ʻoku lava ke nau fanongoa pea mo e kau kuí ke sio ki ai.” Naʻe mātuʻaki lāuʻilo ʻa Sīsū ki he faingataʻaʻia ʻa e niʻihi kehé pea feinga ke fakasiʻisiʻi ia. (Mātiu 9:​36) ʻE maʻu ʻe he kau akó ʻa e ngaahi faingamālie lahi ke fai ai ʻa e meʻa meimei tatau—ʻi he ngāue fakamalangá, ʻi he fakatahaʻangá, ʻi he ʻapi misinalé pea ʻi heʻenau nofo malí tonu. Naʻe ekinaki kia kinautolu ʻa e tokotaha malangá: “Tuku ʻa e fakaʻofoʻofa ʻo e manavaʻofá ke hā tonu ia ʻi hoʻo moʻuí ʻi hoʻo tauhi ʻa e niʻihi kehé. Ko hoʻo tōʻonga lelei tahá pē ʻoku feʻunga ki he moʻui fakaʻaho ʻi he ʻapi misinalé. Ko ia ai, fakapapauʻi ke ke kofuʻaki ʻa e manavaʻofá.”​—Kolose 3:​12.

Ko hono hokó ko Gerrit Lösch, ko ha mēmipa ʻo e Kulupu Pulé pea ko ha tokotaha maʻu tohi fakamoʻoni ako ʻo e kalasi hono 41 ʻo Kiliatí, naʻá ne fakahoko ʻa e kaveinga “Kau Malanga ʻo e Fakamoʻuí.” (Aisea 52:7) Ke hoko ʻo hao fakaesino ʻa e kakaí ʻi he taimi ʻe fakaʻauha ai ʻa e fokotuʻutuʻu ʻo e ngaahi meʻa lolotongá, kuo pau ke nau maʻu ʻa e ʻilo totonu mei he Folofola ʻa e ʻOtuá, fai ha talaki fakahāhā ʻo ʻenau tuí pea papitaiso. (Loma 10:10; 2 Timote 3:​15; 1 Pita 3:​21) Kae kehe, ko e ʻuhinga tefito ki hono malangaʻi ʻo e fakamoʻuí, ʻoku ʻikai koeʻuhí ke fakamoʻui ʻa e faʻahinga ʻo e tangatá, ka ke ʻoatu ai ʻa e fakahīkihiki ki he ʻOtuá. Ko ia ai, naʻe naʻinaʻi ʻa Tokoua Lösch  ki he kau teu ngāue fakamisinalé: “ʻAve ʻa e pōpoaki ʻo e Puleʻangá ki he ngaahi ngataʻanga ʻo e māmaní pea hoko ko e kau malanga faivelenga ʻo e fakamoʻuí, ʻo fai kotoa ki he fakahīkihikiʻi ʻo Sihová.”​—Loma 10:18.

“ʻOkú Ke Ngingila Fēfē?” ko e foʻi fehuʻi ia naʻe ʻohake ʻe he faiako Kiliati ko Lawrence Bowen. Naʻá ne lave ki he lea ʻa Sīsū ʻoku lēkooti ʻi he Mātiu 6:​22 pea fakalototoʻaʻi ʻa e kau maʻu tohi fakamoʻoni akó ke tauhi honau matá ke “huʻufataha” koeʻuhi ke “tapua atu ai ʻa e fakamaama fakalaumālie ʻa ia ʻoku fakalāngilangiʻi ai ʻa Sihova pea maʻu ʻaonga ai ʻa e kaungā faʻahinga ʻo e tangatá.” Mei he kamata ʻo ʻene ngāue fakafaifekaú, naʻe fokotuʻu ai ʻe Sīsū ha faʻifaʻitakiʻanga haohaoa ʻi he meʻá ni ʻaki hono tauhi maʻu ʻene tokangá ki hono fai ʻa e finangalo ʻo e ʻOtuá. ʻI he fakalaulauloto ki he ngaahi meʻa fakaofo naʻe akoʻi kiate ia ʻe heʻene Tamaí ʻi hēvaní naʻe tokoniʻi ai ʻa Sīsū ke ne kātakiʻi ʻa e ngaahi ʻahiʻahi ʻa Sētane ʻi he toafá. (Mātiu 3:​16; 4:​1-​11) Naʻe fakahāhā ʻe Sīsū ʻa e falala kakato kia Sihova ʻi hono fakahoko ʻa e meʻa naʻe vaheʻi ange ʻe he ʻOtuá ke ne faí. ʻI he founga meimei tatau, koeʻuhi ke fekuki mo e ngaahi ʻahiʻahi ʻoku tuʻu mei muʻá, kuo pau ki he kau misinalé ke hokohoko atu ʻenau tōʻonga ako Tohi Tapu leleí pea falala kakato kia Sihova.

Ko Mark Noumair, ko ha faiako Kiliati pea ko ha tokotaha maʻu tohi fakamoʻoni ako ʻo e kalasi hono 77 ʻo Kiliatí, naʻá ne fakaʻosi ʻa e holongā malanga ko ení ʻi heʻene malanga he kaveinga “Vakai, ʻOku Mau ʻi Ho Nimá.” (Siosiua 9:​25) Naʻá ne fakalototoʻaʻi ʻa e kau akó ke nau faʻifaʻitaki ki he fakakaukau ʻa e kau Kipione he kuonga muʻá. Neongo  ko Kipioné ko ha “kolo lahi . . . pea ko e kau toʻa hono kakai fulipe,” naʻe ʻikai fiemaʻu ʻe he kau Kipioné ke nau ʻiloa pe ʻamanekina ke fai ʻa e ngaahi meʻá ʻo fakatatau ki heʻenau ngaahi fiemaʻú. (Siosiua 10:2) Naʻa nau ngāue loto-lelei ʻi he tuʻunga ko e “kau ta fefie mo ʻutuvai” ʻi he malumalu ʻo e kau Līvaí ʻi he poupou ki he lotu ʻa Sihová. (Siosiua 9:26 [Sios 9:​27, PM]) ʻOku hangē kuo pehē ʻa e kau mēmipa ʻo e kalasi maʻu tohi fakamoʻoni akó kia Siosiua Lahi Ange, ʻa Sīsū Kalaisi, “Vakai ʻoku mau ʻi ho nimá.” ʻI heʻenau kamata ko eni ʻi honau ngaahi vāhenga-ngāue mulí, ʻoku fiemaʻu ke nau tali ha ngāue pē ʻoku ʻoange ʻe Siosiua Lahi Ange ke nau faí.

Ngaahi Hokosia mo e Ngaahi Fakaʻekeʻeke

Ko e “Fakahā Kakato ʻa e Tohi Tapú” ʻa e kaveinga ʻo ha fetalanoaʻaki mo ha kulupu ʻo e kau akó naʻe fai ʻe Wallace Liverance, ko ha tokotaha maʻu tohi fakamoʻoni ako ʻo e kalasi hono 61 ʻo Kiliatí pea ko e taha ia ʻo e kau faiakó. Naʻa nau fakamatala mo fakatātaaʻi ʻa e ngaahi hokosia naʻa nau maʻu ʻi he malaʻe fakafaifekaú lolotonga ʻa e koosi ʻo e teemi akó. Naʻe hā mahino ko ʻenau ako fakamākukanga ʻo e Tohi Tapú ʻi he māhina ʻe nima ʻo honau akoʻí naʻe aʻu ia ki honau lotó pea ueʻi ai kinautolu ke nau vahevahe atu ki he niʻihi kehé ʻa e meʻa naʻa nau akó. (Luke 24:32) Lolotonga ʻa e koosi māhina nimá, naʻe malava ai ha tokotaha ako ʻe taha ke ne vahevahe ki hono tokoua fakakakanó ʻa e meʻa naʻá ne akó. Naʻe fakalototoʻaʻi ʻe he meʻá ni ʻa hono tokouá ke ne kumi ki he fakatahaʻanga fakalotofonuá ʻo kamata ʻa ʻene ako Tohi Tapu. Kuó ne taau he taimí ni ko ha tokotaha malanga teʻeki papitaiso.

Hoko atu ʻi he ngaahi hokosia ko ení, naʻe fai ai ʻe Richard Ashe mo John Gibbard ha ngaahi fakaʻekeʻeke ʻo e kau sevāniti faitōnunga taimi fuoloa ʻa Sihova, ʻo kau ai ʻa e kau ʻovasia fefonongaʻaki naʻa nau maʻu ʻa e ako makehe ʻi he Senitā Fakaeako Taua Leʻó. Ko e kau maʻu tohi fakamoʻoni ako kinautolu ʻo e ngaahi kalasi ki muʻa ange ʻa e Akoʻanga Kiliatí. Naʻe manatuʻi ʻe ha tokotaha naʻe leaʻaki eni ʻe Tokoua Knorr lolotonga ʻa e koosi ʻa e kalasí: “ʻI Kiliatí te mou fai ai ha ako lahi. Ka ʻo kapau te mou ʻalu atu mo ha ʻulu pupula, te mau tō ai. ʻOku mau loto ke mou ʻalu atu mo ha loto ʻofa.” Ko e fanga tokoua fefonongaʻakí naʻa nau faleʻi ki he kalasí ke nau mahuʻingaʻia he kakaí, ke feangainga mo e niʻihi kehé ʻo hangē ko ia naʻe fai ʻe Kalaisí, pea ke tali anga-vaivai ha vāhenga-ngāue pē ʻoku ʻoange kia kinautolu. Ko hono ngāueʻaki ʻa e akonaki ko ení ʻe tokoniʻi taʻetoeveiveiua ai ʻa e kau misinale foʻoú ke nau hoko ʻo fua lahi ʻi honau ngaahi vāhenga-ngāué.

ʻAlu Atu ko e Kau Ngāue Utu-Taʻu Faivelenga!

Naʻe maʻu ʻe he kau fanongó ha faingamālie ke fanongo ai kia Stephen Lett, ko ha toe mēmipa ʻe taha ʻo e Kulupu Pulé. Naʻá ne fakahoko ʻa e malanga tefito ʻo e polokalamá, naʻe fakakaveinga ko e “ʻAlu Atu ko e Kau Ngāue Utu-Taʻu Faivelenga!” (Mātiu 9:​38) ʻI ha utu-taʻu, ko e taimi ki hono utu ha fua ʻoku fakangatangata. ʻOku ʻi ai ha fiemaʻu ki he kau utu-taʻú ke nau ngāue mālohi. Huanoa ʻa e mahuʻinga ange ʻa e meʻa ko iá lolotonga ʻa e fakaʻosiʻosi ʻo e fokotuʻutuʻu ko eni ʻo e ngaahi meʻá! ʻI he utu-taʻu lahi fakalaumālié, ko e ngaahi moʻuí ʻoku ʻi he tuʻunga fakatuʻutāmaki. (Mātiu 13:39) Naʻe fakalototoʻaʻi ʻe Tokoua Lett ʻa e kau maʻu tohi fakamoʻoni akó ke ʻoua ʻe ‘fakabikobiko ʻi heʻenau gaué’ ka ke nau “loto vela” pea ke “tauhi ki he Eiki” ʻi he utu-taʻu ko eni ʻe ʻikai ʻaupito toe faí. (Loma 12:​11, PM) Naʻe lave ʻa e tokotaha malangá ki he lea ʻa Sīsū: “Mou hanga hake muʻa ki he ngaahi ngoue na: vakai, kuo fisi hina ia ki he ututaʻu.” (Sione 4:35) Naʻá ne fakaʻaiʻai leva ʻa e kau maʻu tohi fakamoʻoni akó ke nau fakahāhā ʻenau faivelenga ki he ngāue utu-taʻú ʻaki ha feinga loto-moʻoni ke aʻu ki he kakaí ʻi he taimi mo e feituʻu ʻe lava ke maʻu ai kinautolú pea ʻi he ngāueʻaongaʻaki ʻa e ngaahi faingamālie kotoa pē ke fai ai ha fakamoʻoni ʻi he founga ʻikai anga-mahení. Ko e tokanga ke fakatupunga ha ngaahi faingamālié ʻe lava ke fakafaingofuaʻi ai ʻa hono fai ʻo ha fakamoʻoni ola lelei. Ko Sihová ko ha ʻOtua faivelenga ia, pea ʻokú ne ʻamanekina mai kitautolu hono kotoa ke tau faʻifaʻitaki kiate ia pea ngāue mālohi ʻi he utu-taʻu fakalaumālié.​—2 Tuʻi 19:31; Sione 5:​17.

ʻI hono fakaʻosi ʻo e polokalamá, ko e seá, ʻa Tokoua Jaracz, naʻá ne ʻomai ai ʻa e ngaahi talamonū mei he ngaahi ʻōfisi vaʻa lahi pea foaki ai ki he kau akó ʻa honau ngaahi tipilomá. Ko e taha ʻo e kau maʻu tohi fakamoʻoni akó naʻá ne lau ha tohi mei he kalasí, ʻo fakahaaʻi ai ʻa e houngaʻia loloto ki he ako kuo nau maʻú. ʻOku hā mahino, ko e polokalama maʻu tohi fakamoʻoni ako ʻo e kalasi hono 116 naʻá ne ʻai ʻa e faʻahinga kotoa naʻa nau maʻu iá ke nau toe fakapapauʻi lahi ange ke ʻalu atu ko e kau ngāue utu-taʻu faivelenga.

[Puha ʻi he peesi 25]

ʻŪ FIKA ʻO E KALASÍ

Lahi ʻo e fonua naʻe fakafofongaʻí: 6

Lahi ʻo e fonua naʻe vaheʻi ki aí: 20

Tokolahi ʻo e kau akó: 46

ʻAvalisi ʻo e taʻumotuʻá: 34.2

ʻAvalisi ʻo e taʻu he moʻoní: 17.2

ʻAvalisi ʻo e taʻu he ngāue fakafaifekau taimi-kakató: 13.9

[Fakatātā ʻi he peesi 26]

Kalasi Maʻu Tohi Fakamoʻoni Ako Hono 116 ʻa e Akoʻanga Tohi Tapu Taua Leʻo ko Kiliatí

ʻI he lisi ʻi laló, ko e ngaahi ʻotú ʻoku fakafika ia mei muʻa ki mui, pea ko e ngaahi hingoá ʻoku fakahokohoko ia mei he toʻohemá ki he toʻomataʻú ʻi he ʻotu taki taha.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.