Fakamahuʻingaʻi Totonu ʻa e Meʻaʻofa ko Hoʻo Moʻuí
Fakamahuʻingaʻi Totonu ʻa e Meʻaʻofa ko Hoʻo Moʻuí
“[Ko e] taʻataʻa ʻo Kalaisi [ʻe] fakamaʻa ʻe he taʻataʻa ko ia hotau konisenisi mei he ngaahi ngaue mate, ke tau tauhi [pe fai ʻa e ngāue toputapu] ʻa e ʻOtua ʻoku Moʻui.”—HEPELU 9:14.
1. Ko e hā ʻa e fakamoʻoni ʻoku tau fakamahuʻingaʻi lahi ʻa e moʻuí?
KAPAU naʻe kole atu kiate koe ke ke ʻai ha mahuʻinga ki hoʻo moʻuí, ko e hā hoʻo talí? ʻOku tau fakamahuʻingaʻi lahi ʻa e moʻuí—ʻa ʻetau moʻuí tonu pea mo e moʻui ʻa e niʻihi kehé. Ko e fakamoʻoni ʻo e meʻa ko iá, ʻoku tau ʻalu nai ki ha toketā ke tokangaʻi ʻi heʻetau puké pe fai ha ngaahi sivi tuʻumaʻu. ʻOku tau fiemaʻu ke tau kei moʻui atu ai pē mo moʻui lelei. Naʻa mo e tokolahi taha ko ia ʻoku nau motuʻa pe faingataʻaʻia fakasinó ʻoku ʻikai te nau fie mate; ʻoku nau loto ke nau moʻui atu ai pē.
2, 3. (a) ʻOku fakamamafaʻi mai ʻe he Palovepi 23:22 ʻa e ngafa ko e hā? (e) ʻOku anga-fēfē ʻa e kau ʻa e ʻOtuá ʻi he ngafa ʻoku lave ki ai ʻi he Palovepi 23:22?
2 Ko hoʻo fakamahuʻingaʻi ʻa e moʻuí ʻoku ʻi ai hono kaunga ki ho ngaahi vahaʻangatae mo e niʻihi kehé. Ko e fakatātaá, ʻoku fakahinohino mai ʻe he Folofola ʻa e ʻOtuá: “Fakaogo ki hoo tamai naa ke tubu ai, bea oua naa ke tae ofa ki hoo faʻe oka motua ia.” (Palovepi 23:22, PM) Ke “fakaogo” pe fanongó ʻoku ʻuhinga ia ki he meʻa lahi ange ʻo ʻikai ko e fanongo pē ki he ngaahi foʻi leá; ʻoku ʻuhinga ʻa e palōveepi ia ko ʻení ki he fanongo pea talangofua leva. (Ekisoto 15:26; Teutalonome 7:12; 13:18; 15:5; Siosiua 22:2; Sāme 81:13) Ko e hā ʻa e ʻuhinga ʻoku ʻomai ʻe he Folofola ʻa e ʻOtuá ki he fanongó? ʻOku ʻikai koeʻuhi pē ʻoku motuʻa ange hoʻo tamaí mo hoʻo faʻeé ʻiate koe pe maʻu ʻa e taukei lahi angé. Ko e ʻuhinga ʻoku ʻomaí he ko kinaua “naa ke tubu ai.” ʻOku fakalea ʻe he ngaahi liliu ia ʻe niʻihi ʻa e foʻi vēsí ni: “Fanongo ki hoʻo tamaí ʻa ia naʻá ne ʻoatu ʻa e moʻuí kiate koé.” Ko e meʻa ʻoku mahinó, kapau ʻokú ke fakamahuʻingaʻi hoʻo moʻuí, ʻokú ke ongoʻi ha ngafa ki he matavai ʻo e moʻui ko iá.
3 Ko e moʻoni, kapau ko ha Kalisitiane moʻoni koe, ʻokú ke ʻiloʻi ko Sihová ko e Matavai tefito ia ʻo hoʻo moʻuí. ʻIate ia ʻokú ke maʻu ai ʻa e “moʻui” tonu; ʻoku malava ke ke “ngaúe,” ʻo tōʻongafai ko ha tokotaha ʻokú ne maʻu ʻa e ongoʻi; pea ʻokú ke “ʻi ai” ni ʻo malava ke fakakaukau pe palani ki he kahaʻú, ʻo kau ai ʻa e moʻui taʻengatá. (Ngāue 17:28; Sāme 36:9; Koheleti 3:11) ʻI he fehoanaki mo e Palovepi 23:22 (PM), ʻoku totonu ke “fakaogo” talangofua ki he ʻOtuá, ʻo holi ke mahinoʻi mo ngāue ʻo fehoanaki mo ʻene vakai ki he moʻuí kae ʻikai ko e saiʻia ange ʻi ha fakamahuʻingaʻi kehe ʻo e moʻuí.
Fakahāhā ʻa e Tokaʻi ki he Moʻuí
4. ʻI ha tuʻunga ʻi he kamata ʻo e hisitōlia ʻo e tangatá, naʻe anga-fēfē ʻa e hoko ʻa e tokaʻi ʻo e moʻuí ko ha meʻa mahuʻingá?
4 ʻI he kamata ʻo e hisitōlia ʻo e tangatá, naʻe fakamahinoʻi ai ʻe Sihova naʻe ʻikai te ne tuku ki he faʻahinga ʻo e tangatá ke nau ngāueʻaki (pe ngāuekoviʻaki) ʻa e moʻuí ki ha faʻahinga ʻuhinga pē. ʻI hono maʻunimā ʻe he ʻita tōlilí, naʻe fakangata ai ʻe Keini ha moʻui taʻehalaia, ʻa hono tehina ko ʻĒpelí. ʻOkú ke fakakaukau atu naʻe maʻu ʻe Keini ha totonu ke ne fai ha fili pehē fekauʻaki mo e moʻuí? Naʻe ʻikai ke fakakaukau pehē ʻa e ʻOtuá ia. Naʻá ne ui ʻa Keini ke fai ha fakamatala: “Ko e ha eni kuo ke fai? Si, ko e leʻo ena! ko e ngaahi tuluta toto ʻo ho tehina ʻoku tangi mai kiate au mei he kelekele.” (Senesi 4:10) Fakatokangaʻi ko e toto ʻo ʻĒpelí ʻi he kelekelé naʻá ne fakafofongaʻi ʻene moʻuí, ʻa ia naʻe tuʻusi mutukia anga-fakamamahí pea naʻe tangi ia ki he ʻOtuá ki ha sāuni.—Hepelu 12:24.
5. (a) Ko e hā ʻa e tapui naʻe fokotuʻu ʻe he ʻOtuá ʻi he ʻaho ʻo Noá, pea naʻe ngāueʻaki ia kia hai? (e) ʻI he ʻuhinga fē ko ha foʻi sitepu mahuʻinga ai ʻa e tapui ko ʻení?
5 ʻI he hili ʻa e Lōmakí, naʻe kamata foʻou ai ʻa e faʻahinga ʻo e tangatá ʻaki ha toko valu pē. ʻI ha tala fakahāhā naʻe ngāueʻaki ki he kotoa ʻo e faʻahinga ʻo e tangatá, naʻe fakahā ai ʻe he ʻOtuá ʻa e meʻa lahi ange fekauʻaki mo ʻene fakamahuʻingaʻi ʻa e moʻuí pea mo e totó. Naʻá ne pehē ʻe malava ʻa e faʻahinga ʻo e tangatá ke kai kakanoʻi manu, ka naʻá ne fokotuʻu ʻa e fakangatangata ko ʻení: “Ko e meʻa kotoa pe ʻoku ngaue, ʻa ia ko e pehe ʻoku moʻui, ko hoʻomou meʻakai ia; hange ko e mohuku kuo u ʻatu kotoa pe ia kiate kimoutolu. Ka ko e kakano ʻa ia ʻoku kei ʻi ai ʻene moʻui, ʻa ia ko hono toto, ʻe, ʻikai te mou kai ia.” (Senesi 9:3, 4) ʻOku fakaʻuhingaʻi ia ʻe he kau Siu ʻe niʻihi ʻo pehē naʻe ʻikai ke fakaʻatā ʻa e faʻahinga ʻo e tangatá ke nau kai ʻa e kakano pe toto ʻo ha manu ʻa ia naʻe kei moʻui. Ka ki mui mai naʻe fakahaaʻi mahino ai ko e meʻa naʻe tapui heni ʻe he ʻOtuá ko hono kai ʻo e totó ke fakatolonga ʻa e moʻuí. ʻIkai ngata aí, ko e tuʻutuʻuni ʻa e ʻOtuá fakafou ʻia Noá ko ha foʻi sitepu mahuʻinga ia ki hono fakahoko ʻEne taumuʻa māʻolunga fekauʻaki mo e totó—ko ha taumuʻa ʻe fakaʻatā ai ʻa e faʻahinga ʻo e tangatá ke nau maʻu ʻa e moʻui taʻengatá.
6. Fakafou ʻia Noa, naʻe anga-fēfē hono fakamamafaʻi ʻe he ʻOtuá ʻEne vakai ki he mahuʻinga ʻo e moʻuí?
6 Naʻe hoko atu ʻe he ʻOtuá: “Te u ʻeke homou toto, hoʻomou moʻui; te u ʻeke ia ki he manu kotoa pe pea ki he tangata kotoa pe: ko e moʻui ʻa e tangata te u ʻeke ki he tangata ko hono tokoua. Ko ia ʻoku ne lilingi ʻa e toto ʻo ha tangata, ʻe lilingi hono toto ʻe ha tangata: he ko e imisi ʻo e ʻOtua naʻa ne ngaohi ai ʻa e tangata.” (Senesi 9:5, 6) ʻOku malava ke ke mahinoʻi mei he tala fakahāhā ko ʻeni ki he fāmili fakaetangatá fakakātoa ʻoku vakai ʻa e ʻOtuá ki he toto ʻo ha tangata ʻokú ne fakafofongaʻi ʻene moʻuí. ʻOku foaki ʻe he Tokotaha-Fakatupú ʻa e moʻuí ki ha taha, pea ʻoku ʻikai ha taha ʻe totonu ke ne toʻo ʻa e moʻui ko iá, ʻoku fakafofongaʻi ʻe he totó. Kapau ʻe hangē ha taha ko Keiní, ʻo ne fai ha fakapō, ʻoku maʻu ʻe he Tokotaha-Fakatupú ʻa e totonu ke ‘ʻekeʻi’ ʻa e moʻui ʻa e tokotaha fakapoó.
7. Ko e hā ʻoku totonu ai ke tau mahuʻingaʻia ʻi he tala fakahāhā ʻa e ʻOtuá kia Noa ʻo fekauʻaki mo e totó?
7 ʻI heʻene tala fakahāhaá, naʻe tuʻutuʻuni ai ʻe he ʻOtuá ki he faʻahinga ʻo e tangatá ke ʻoua te nau ngāuehalaʻaki ʻa e totó. Kuó ke fifili ʻi ha taimi pe ko e hā hono ʻuhingá? ʻIo, ko e hā naʻe tuʻu mei mui ʻi he vakai ʻa e ʻOtuá ki he totó? Ko hono moʻoní, ko e talí ʻoku kaunga ki ai ʻa e taha ʻo e ngaahi akonaki mahuʻinga taha ʻi he Tohi Tapú. ʻOku ʻi he uho ia ʻo e pōpoaki faka-Kalisitiané, neongo ʻoku fili ʻa e ngaahi siasi lahi ia ke tukunoaʻi. Ko e hā ʻa e akonaki ko iá, pea ʻoku anga-fēfē ʻa e kaunga ki ai ʻa hoʻo moʻuí, ngaahi fili ʻoku faí pea mo e ngaahi ngāué?
Totó—ʻE Malava Fēfē ke Ngāueʻaki Ia?
8. ʻI he Laó, ko e hā ʻa e fakangatangata naʻe ʻai ʻe Sihova ki hono ngāueʻaki ʻo e totó?
8 Naʻe tokonaki mai ʻe Sihova ʻa e ngaahi fakaikiiki lahi ange fekauʻaki mo e moʻuí pea mo e totó ʻi he taimi naʻá ne ʻoange ai ki ʻIsileli ʻa e Laó. ʻI hono fai iá, naʻá ne toe laka ai ʻi ha sitepu ʻi hono fakahoko ʻa ʻene taumuʻá. Ngalingali ʻokú ke ʻiloʻi naʻe fiemaʻu ʻi he Laó ʻa e ngaahi foaki ki he ʻOtuá, hangē ko e uité, loló, mo e uainé. (Livitiko 2:1-4; 23:13; Nomipa 15:1-5) Naʻe toe ʻi ai mo e ngaahi feilaulau monumanu. Naʻe folofola ʻa e ʻOtuá fekauʻaki mo e meʻá ni: “Ko e moʻui ʻa e kakano ʻoku ʻi he toto: pea kuo u tuku ia maʻamoutolu ki he olita, ke faiʻaki ʻa e fakalelei maʻa hoʻomou moʻui: he ko e toto ia ʻoku ne fakalelei, koeʻuhi ko e moʻui ia. Ko hono ʻuhinga ia naʻa ku pehe ai ki haʻa Isileli, Tapu ke kai toto ʻe ha toko taha ʻiate kimoutolu.” Naʻe tānaki atu ʻe Sihova ʻo pehē kapau ʻe ʻi ai ha taha, hangē ko ha tangata tulimanu pe ko ha tokotaha ngoue, te ne tāmateʻi ha manu ke ne kai, naʻe pau ke ne fakatafe ʻa e totó pea ʻufiʻufi ʻaki ʻa e efu. Ko e māmaní ko e tuʻunga-vaʻe ia ʻo e ʻOtuá, pea ʻi hono huaʻi ʻa e totó ki he māmaní, ʻoku lāuʻilo ai ʻa e tokotahá ʻoku toe fakafoki ʻa e moʻuí ki he Tokotaha Foaki-Moʻuí.—Livitiko 17:11-13; Aisea 66:1.
9. Ko e hā ʻa e ngāueʻaki pē ʻe taha ʻo e totó naʻe fakahaaʻi ʻi he Laó, pea ko e hā ʻa e taumuʻa ʻo e meʻá ni?
9 Naʻe ʻikai ko ha ouau fakalotu pē ʻa e laó ia ʻo ʻikai hano mahuʻinga kiate kitautolu. Naʻá ke fakatokangaʻi ʻa e ʻuhinga naʻe ʻikai fiemaʻu ai ki he kau ʻIsilelí ke nau kai ʻa e totó? Naʻe pehē ʻe he ʻOtuá: “Ko hono ʻuhinga ia naʻa ku pehe ai ki haʻa Isileli, Tapu ke kai toto ʻe ha toko taha ʻiate kimoutolu.” Ko e hā e ʻuhingá? “Kuo u tuku [ʻa e totó] maʻamoutolu ki he olita, ke faiʻaki ʻa e fakalelei maʻa hoʻomou moʻui.” ʻOkú ke sio ki hono ʻomai ʻe he meʻá ni ʻa e fakamaama ki he ʻuhinga naʻe tala ai ʻe he ʻOtuá kia Noa heʻikai ke kai ʻe he faʻahinga ʻo e tangatá ʻa e totó? Naʻe fili ʻa e Tokotaha-Fakatupú ke vakai ki he totó ko ha meʻa ʻoku māʻolunga hono mahuʻingá, ʻo taʻofi ia ki hono ngāueʻaki makehe pē ʻe taha ʻa ia ʻe malava ke fakahaofi ai ʻa e moʻui ʻa ha tokolahi. Te ne fakahoko ha ngafa mātuʻaki mahuʻinga ʻi hono ʻufiʻufi ʻa e ngaahi angahalá (fakalelei). Ko ia, ʻi he malumalu ʻo e Laó, ko e ngāueʻaki pē ʻe taha ʻo e totó naʻe fakamafaiʻi ʻe he ʻOtuá ko hono tuku ki he ʻōlitá ke fai ʻaki ʻa e fakalelei maʻá e moʻui ʻa e kau ʻIsilelí, ʻa ia naʻa nau kumi ki he fakamolemole ʻa Sihová.
10. Ko e hā naʻe ʻikai iku atu ai ʻa e toto ʻo e fanga manú ki he fakamolemole fakaʻaufulí, ka ko e hā ʻa e fakamanatu naʻe tokonaki mai ʻe he ngaahi feilaulau ʻi he malumalu ʻo e Laó?
10 ʻOku ʻikai ke kehe ʻa e foʻi fakakaukaú ni ia mei he lotu faka-Kalisitiané. ʻI he lave ki he fokotuʻutuʻu fakaʻotua ko ʻeni ʻi he tafaʻaki ʻo e Laó, naʻe tohi ʻe he ʻapositolo Kalisitiane ko Paulá: “ʻI he tuʻutuʻuni ʻa e Lao ʻoku ʻikai mei ai ha meʻa ka ʻoku fakamaʻa ʻaki ʻa e toto: pea ka ʻikai ha lilingi toto, ʻoku ʻikai ha fakamolemole.” (Hepelu 9:22) Naʻe fakamahinoʻi ʻe Paula ko e ngaahi feilaulau naʻe fiemaʻú naʻe ʻikai te ne liliu ai ʻe ia ʻa e kau ʻIsilelí ko ha faʻahinga haohaoa, taʻeangahalaʻia ʻo e tangatá. Naʻá ne tohi: “ʻI he fai ʻo e ngaahi feilaulau ko ia, ʻoku ʻi ai ha fakamanatu angahala ʻi he taʻu kotoa pe. Seuke, he ʻoku ʻikai malava ke ʻave angahala ʻe he toto ʻo e fanga pulu mo e fanga kosi.” (Hepelu 10:1-4) Ka neongo ia, naʻe ʻaonga ʻa e ngaahi feilaulau peheé. Naʻa nau fakamanatu ki he kau ʻIsilelí naʻa nau angahalaʻia pea naʻe fiemaʻu ʻa e meʻa lahi ange kae lava ke maʻu ai ʻa e fakamolemoleʻi fakaʻaufuli. Ka ʻo kapau naʻe ʻikai malava ʻe he toto ko ia naʻá ne fakafofongaʻi ʻa e moʻui ʻa e fanga manú ʻo ʻufiʻufi fakaʻaufuli ʻa e ngaahi angahala ʻa e faʻahinga ʻo e tangatá, ʻe lava ʻe ha faʻahinga toto pē ke fai ia?
Ko e Fakaleleiʻanga ʻa e Tokotaha Foaki-Moʻuí
11. ʻOku tau ʻilo fēfē ko e ngaahi feilaulau toto ʻo e fanga manú naʻe tuhu ia ki ha meʻá?
11 Ko hono moʻoní, naʻe tuhu ʻa e Laó ki ha meʻa ola lelei lahi mamaʻo ange ia ki hono fakahoko ʻa e finangalo ʻo e ʻOtuá. Naʻe ʻeke ʻe Paula: “Ko e ha ai ʻa e Lao?” Naʻá ne tali: “Naʻe kanoni ʻaki ia koeʻuhi ko e ngaahi fai hala, kaeʻoua ke hoko mai ʻa e hako ne fai ki ai ʻa e talaʻofa; pea naʻe talafono ʻaki ʻe ha kau angelo, ʻo fakafai ʻi ha fakalaloa [ko Mōsese].” (Kaletia 3:19) ʻI he tuʻunga meimei tatau, naʻe tohi ʻe Paula: “[ʻOku] maʻu ʻe he Lao ʻa e ʻata pe ʻo e ngaahi lelei ka hoko, ʻo ʻikai ko e imisi [pe uho] totonu ʻo e ngaahi meʻa.”—Hepelu 10:1.
12. ʻI he fekauʻaki mo e totó, ʻe malava fēfē ke tau ʻiloʻi ʻa hono fakahā mai ʻo e taumuʻa ʻa e ʻOtuá?
12 ʻI hono fakanounoú, manatuʻi ʻi he ʻaho ʻo Noá naʻe tuʻutuʻuni ai ʻe he ʻOtuá ʻo pehē ʻe malava ʻa e faʻahinga ʻo e tangatá ke kai kakanoʻimanu ke fakatolonga ʻa ʻene moʻuí, ka heʻikai malava ke nau kai ʻa e totó. Ki mui mai ai, naʻe fakahā ʻe he ʻOtuá “ko e moʻui ʻa e kakano ʻoku ʻi hono toto.” ʻIo, naʻá ne fili ke vakai ki he totó ʻokú ne fakafofongaʻi ʻa e moʻuí peá ne folofola: “Kuo u tuku [ʻa e totó] maʻamoutolu ki he olita, ke faiʻaki ʻa e fakalelei maʻa hoʻomou moʻui.” Kae kehe, ʻe ʻi ai hano toe fakahā fakaofo mai ʻo e taumuʻa ʻa e ʻOtuá. Naʻe tomuʻa fakatātaaʻi ʻe he Laó ʻa e ngaahi meʻa lelei ka hoko mai. Ko e hā ia?
13. Ko e hā naʻe mahuʻinga ai ʻa e pekia ʻa Sīsuú?
13 Ko hono uhó naʻe fakatefito ia ʻi he pekia ʻa Sīsū Kalaisí. ʻOkú ke ʻiloʻi ko Sīsuú naʻe fakamamahiʻi pea tutuki. Naʻá ne pekia hangē ha tokotaha faihiá. Naʻe tohi ʻe Paula: “Ne pekia ʻa Kalaisi maʻa e fakaʻotuamate, ʻi he hoko ʻa e kuonga totonu, neongo naʻe kei vaivai kitautolu. . . . Ko e ʻOtua ʻoku ne fakaha ʻa e moʻoni o ʻene ʻofa aʻana kiate kitautolu ʻi he pekia ʻa Kalaisi maʻatautolu, lolotonga ʻoku tau kei angahala.” (Loma 5:6, 8) ʻI he pekia maʻatautolú, naʻe tokonaki mai ai ʻe Kalaisi ha huhuʻi ke ʻufiʻufi ʻaki ʻetau ngaahi angahalá. Ko e huhuʻi ko iá ko e tefito ia ʻo e pōpoaki faka-Kalisitiané. (Mātiu 20:28; Sione 3:16; 1 Kolinito 15:3; 1 Timote 2:6) Ko e hā ʻa e fehokotaki ʻa e meʻá ni mo e totó pea mo e moʻuí, pea ʻoku anga-fēfē ʻa e kaunga ki ai hoʻo moʻuí?
14, 15. (a) ʻOku anga-fēfē hono fakamamafaʻi ʻe he ngaahi liliu ʻe niʻihi ʻo e Efeso 1:7 ʻa e pekia ʻa Sīsuú? (e) Ko e hā ʻa e moʻoniʻi meʻa fekauʻaki mo e Efeso 1:7 ʻoku taʻetokangaʻi naí?
14 ʻOku fakamamafaʻi ʻe he ngaahi siasi ʻe niʻihi ʻa e pekia ʻa Sīsuú, ʻoku leaʻaki ʻe honau kau muimuí ʻa e ngaahi meʻa hangē ko ení “naʻe pekia ʻa Sīsū maʻaku.” Fakakaukau atu ki he anga hono fakalea ʻe he ngaahi liliu Tohi Tapu ʻe niʻihi ʻa e Efeso 1:7: “ʻOku ʻiate ia pea fakafou ʻi heʻene pekiá ʻoku tau maʻu ai ʻa e fakahaofí, ʻa ia ko hono toʻo atu ʻetau ngaahi hiá.” (The American Bible, fai ʻe Frank Scheil Ballentine, 1902) “ʻI he pekia ʻa Kalaisí ʻoku fakatauʻatāinaʻi ai kitautolu, pea ʻoku fakamolemoleʻi ai ʻetau ngaahi angahalá.” (Today’s English Version, 1966) “ʻOku ʻiate ia pea fakafou ʻia Kalaisi pea mo e feilaulauʻi ʻo ʻene moʻuí kuo fakatauʻatāinaʻi ai kitautolu, ko ha fakatauʻatāina ʻa ia ʻoku ʻuhingá ko e fakamolemoleʻi ʻo e ngaahi angahalá.” (The New Testament, fai ʻe William Barclay, 1969) “ʻOku fakafou ʻi he pekia ʻa Kalaisí ʻa hono fakamolemoleʻi ʻo ʻetau ngaahi angahalá pea ʻoku fakatauʻatāinaʻi ai kitautolu.” (The Translator’s New Testament, 1973) ʻOku malava ke ke sio ʻi he ngaahi liliu peheé ki ha fakamamafa ʻi he pekia ʻa Sīsuú. ‘Ka,’ ʻe pehē nai ʻe ha niʻihi, ‘ʻoku mahuʻinga moʻoni ʻa e pekia ʻa Sīsuú. Ko ia, ko e hā ʻoku tōnounou ʻi he ngaahi liliu ko ʻení?’
15 Ko hono moʻoní, kapau naʻá ke ala maʻu ʻa e ngaahi liliu pē ko ʻení, te ke taʻetokangaʻi nai ha poini mahuʻinga ʻaupito, pea ʻe malava ʻe he meʻá ni ke ne fakangatangata hoʻo mahino fekauʻaki mo e pōpoaki ʻa e Tohi Tapú. Ko e ngaahi liliu ko ʻení ʻoku nau fakaʻuliʻulilātaiʻi ʻa e moʻoniʻi meʻa ko ia ko e muʻaki konga tohi ʻo e Efeso 1:7 ʻoku ʻi ai ha foʻi lea faka-Kalisi ʻa ia ʻoku ʻuhingá ko e “taʻataʻa.” Ko ia ai, ʻoku lahi ʻa e ngaahi Tohi Tapu hangē ko e New World Translation, ʻoku nau ofi ange ki he muʻaki konga tohí: “Tuʻunga ʻiate ia kuo fakatauʻatāinaʻi ai kitautolu ʻe he huhuʻí fakafou ʻi he taʻataʻa ʻo e tokotaha ko iá, ʻio, ko e fakamolemoleʻi ʻo ʻetau ngaahi faihalá, ʻo fakatatau ki he mohumeʻa ʻo ʻene ʻofa maʻataʻataá.”
16. Ko e hā ʻoku totonu ke fakamanatu ki heʻetau fakakaukaú ʻe he liliu “ʻi he taʻataʻa ʻo e tokotaha ko iá”?
16 Ko e liliu ko ia “ʻi he taʻataʻa ʻo e tokotaha ko iá” ʻoku mohu ʻuhinga ia pea ʻoku totonu ke ne fakamanatu ʻa e meʻa lahi ki heʻetau fakakaukaú. Ko e maté naʻe ʻikai ke feʻunga pē ia, naʻa mo e pekia ʻa e tangata haohaoa ko Sīsuú. Naʻá ne fakahoko ʻa e meʻa naʻe tomuʻa fakatātaaʻi mai ʻi he Laó, tautefito ʻi he ʻAho ʻo e Fakaleleí. ʻI he ʻaho makehe ko iá, naʻe feilaulauʻi ai ʻa e fanga manu naʻe ʻosi vaheʻi. Naʻe hanga ai ʻe he taulaʻeiki lahí ʻo ʻave ʻa e niʻihi ʻo honau totó ki he feituʻu Toputapu ʻo e tāpanekalé pe temipalé, ʻo ne foaki atu ai ia ki he ʻOtuá, ʻo hangē pē ʻokú ne ʻi ai tonu ʻi hono ʻaó.—Ekisoto 25:22; Livitiko 16:2-19.
17. Naʻe anga-fēfē hono fakahoko ʻe Sīsū ʻa e meʻa naʻe tomuʻa fakatātaaʻi ʻe he ʻAho ʻo e Fakaleleí?
17 Naʻe fakahoko ʻe Sīsū ʻa e meʻa naʻe tomuʻa fakatātaaʻi ʻe he ʻAho ʻo e Fakaleleí, ʻo hangē ko ia naʻe fakamatalaʻi ʻe Paulá. ʻUluakí, naʻá ne lave ʻo pehē ko e taulaʻeiki lahi ʻi ʻIsilelí naʻá ne hū ki he Potu Toputapú ʻo tuʻo taha he taʻu mo e toto ʻo foaki atu “koeʻuhi ko ia, pea koeʻuhi ko e ngaahi faivale ʻa e kakai.” (Hepelu 9:6, 7) ʻI he fehoanaki mo e sīpinga ko iá, ʻi he hili hono fokotuʻu hake ko ha laumālié, naʻe ʻalu ʻa Sīsū ki hēvani tonu. ʻI he tuʻunga ko ha laumālié, ʻo ʻikai maʻu ha sino kakano-mo e-totó, naʻe malava ai ke ne hā ʻi he ʻao ʻo e “fofonga ʻo e ʻOtua maʻatautolu.” Ko e hā naʻá ne ʻoatu ki he ʻOtuá? ʻIkai ko ha meʻa fakakakano ka ko ha meʻa mātuʻaki mohu ʻuhinga. Naʻe hoko atu ʻe Paula: “ʻI he aʻu mai ʻa Kalaisi, ko e Taulaʻeiki-lahi . . . , [naʻe ʻikai] haʻane ʻalu ʻaki ʻa e toto ʻo e kosi mo e kafi, ka ʻaki hono taʻataʻa oʻona pe, ʻo ne hu ta tuʻo taha ki he Potu Toputapu na, ʻo ne lavaʻi ai ha huhuʻi taʻengata. He kapauā naʻe lava ʻe he toto ʻo e fanga kosi mo e fanga pulu . . . ʻi hono luluku ʻaki ʻa e kakai kuo taʻemaʻa—kapau naʻe lava ʻe ia ke fakamaʻa ʻa e kakano; huanoa ʻa e taʻataʻa ʻo Kalaisi, ʻa ia naʻa ne ʻoatu ʻe ia ia taʻe hano mele ki he ʻOtua, fai ʻe ha laumalie laui itaniti—huanoa ʻene fakamaʻa ʻe he taʻataʻa ko ia hotau konisenisi mei he ngaahi ngaue mate, ke tauhi ʻa e ʻOtua ʻoku Moʻui.” ʻIo, naʻe ʻoatu ʻe Sīsū ki he ʻOtuá ʻa e mahuʻinga ʻo hono taʻataʻá.—Hepelu 9:11-14, 24, 28; 10:11-14; 1 Pita 3:18.
18. Ko e hā ʻoku totonu ai ke mahuʻinga ki he kau Kalisitiane ʻi he ʻaho ní ʻa e fakamatala ʻa e Tohi Tapú fekauʻaki mo e totó?
18 ʻOku fakaʻatā kitautolu ʻe he moʻoni fakaʻotua ko ʻení ke tau makupusi ʻa e tafaʻaki fakaofo ʻo e meʻa ʻoku leaʻaki ʻe he Tohi Tapú ʻo fekauʻaki mo e totó—ʻa e ʻuhinga ʻoku vakai ai ki ai ʻa e ʻOtuá hangē ko ia ʻokú ne lolotonga faí, ʻa e founga ʻoku totonu ke tau vakai ʻaki ki aí, pea mo e ʻuhinga ʻoku totonu ai ke tau tokaʻi ʻa e ngaahi fakangatangata kuo fokotuʻu ʻe he ʻOtuá fekauʻaki mo hono ngāueʻaki ʻo e totó. ʻI hono lau ʻa e ngaahi tohi ʻo e Ngaahi Konga Tohi Tapu Faka-Kalisi Kalisitiané, te ke maʻu ai ʻa e ngaahi lave lahi ʻaupito ki he taʻataʻa ʻo Kalaisí. (Sio ki he puhá.) ʻOku fakahaaʻi mahino mai ʻe he ngaahi tohí ni ko e Kalisitiane taki taha ʻoku totonu ke ne tui “ʻi hono taʻataʻa [ʻo Sīsuú].” (Fakaʻītali ʻamautolu; Loma 3:25) Ko ʻetau maʻu ʻa e fakamolemolé pea mo hono maʻu ʻa e melino mo e ʻOtuá ʻoku toki malava pē ia “fakafou ʻi he taʻataʻa [ʻo Sīsū] naʻá ne lilingí.” (Kolose 1:20, NW) ʻOku moʻoni ʻaupito ʻeni ʻi he faʻahinga ko ia naʻe fai ʻe Sīsū ha fuakava makehe mo kinautolu ke pule fakataha mo ia ʻi hēvaní. (Luke 22:20, 28-30; 1 Kolinito 11:25; Hepelu 13:20) ʻOku toe moʻoni ia fekauʻaki mo e “fuʻu kakai lahi” he ʻaho ní, ʻa ia te nau hao atu ʻi he “mamahi lahi” ʻoku teu hoko maí pea maʻu ʻa e moʻui taʻengata ʻi he palataisi fakaemāmaní. ʻI he tuʻunga fakaefakatātaá, ʻoku nau ‘fō honau kofú, ʻi he taʻataʻa ʻo e Lamí.’—Fakahā 7:9, 14.
19, 20. (a) Ko e hā kuo fili ai ʻa e ʻOtuá ke fakangatangata hono ngāueʻaki ʻa e totó, pea ʻoku totonu ke fēfē ʻetau ongoʻí ʻi he fekauʻaki mo e meʻa ko iá? (e) Ko e hā ʻoku totonu ke tau mahuʻingaʻia ʻi hono ʻiloʻí?
19 ʻOku hā mahino, ʻoku maʻu ʻe he totó ha ʻuhinga makehe ʻi he vakai mai ʻa e ʻOtuá. ʻOku totonu ke pehē pē ʻiate kitautolu. Ko e Tokotaha-Fakatupú, ʻa ia ʻokú ne tokanga mai fekauʻaki mo e moʻuí, ʻokú ne maʻu ʻa e totonu ke fakangatangata ʻa e meʻa ʻoku fai ʻaki ʻa e totó ʻe he faʻahinga ʻo e tangatá. ʻI heʻene tokanga lahi naʻa mo e fekauʻaki mo ʻetau moʻuí, naʻá ne fakapapauʻi ai ke fakamavaheʻi ʻa e totó ke ngāueʻaki ʻi ha founga mātuʻaki mahuʻinga ʻe taha, ʻa e founga pē ko ia ʻokú ne ʻai ke malava ʻa e moʻui taʻengatá. Ko e founga ko iá naʻe fekauʻaki ia mo e taʻataʻa maʻongoʻonga ʻo Sīsuú. He fakamālō lahi ē ko kitautolu kia Sihova ko e ʻOtuá heʻene ngāue ki he lelei maʻatautolu ʻaki hono ngāueʻaki ʻa e totó—ʻa e taʻataʻa ʻo Sīsuú—ʻi he founga fakahaofi-moʻui ko ení! Pea he totonu moʻoni ē ke tau houngaʻia kia Sīsū ʻi heʻene lilingi fakaefeilaulau atu hono taʻataʻá maʻatautolú! Ko e moʻoni, ʻoku malava ke tau mahinoʻi ʻa e ngaahi ongo naʻe fakahaaʻi ʻe he ʻapositolo ko Sioné: “Ko ia ʻoku ne ʻofa kiate kitautolu, pea ne fufulu kitautolu mei heʻetau ngaahi angahala ʻaki hono taʻataʻa oʻona, pea ne ngaohi kitautolu ko e puleʻanga, ko e ngaahi taulaʻeiki ki he ʻOtua ko ʻEne Tamai—ke ʻo ʻEne ʻAfio ʻa e kololia mo e aoniu, ʻo taʻengata, Emeni.”—Fakahā 1:5, 6.
20 Naʻe ʻosi fuoloa pē ʻa e ʻi he fakakaukau ia ʻa hotau ʻOtua poto-tāfataha mo e Tokotaha Foaki-Moʻuí ʻa e ngafa fakahaofi-moʻui ko ʻení. Ko ia, te tau ʻeke nai, ‘Ko e hā ʻa e ola ʻoku totonu ke maʻu ʻe he meʻá ni ʻi heʻetau ngaahi filí mo ʻetau ngaahi ngāué?’ Ko e kupu hoko maí ʻe lāulea ai ki he fehuʻí ni.
ʻE Anga-Fēfē Haʻo Tali?
• Ko e hā ʻoku malava ke tau ako fekauʻaki mo e vakai ʻa e ʻOtuá ki he totó mei he ongo fakamatala fekauʻaki mo ʻĒpeli pea mo Noá?
• ʻI he Laó, ko e hā ʻa e fakangatangata naʻe ʻai ʻe he ʻOtuá ki hono ngāueʻaki ʻo e totó, pea ko e hā hono ʻuhingá?
• Naʻe anga-fēfē hono fakahoko ʻe Sīsū ʻa e meʻa naʻe tomuʻa fakatātaaʻi ʻe he ʻAho ʻo e Fakaleleí?
• ʻOku anga-fēfē malava ʻe he taʻataʻa ʻo Sīsuú ʻo fakahaofi ʻa ʻetau moʻuí?
[Fehuʻi ki he Ako]
[Puha ʻi he peesi 18]
KO E TOTO FĒ ʻOKU FAKAHAOFI MOʻUÍ?
“Tokanga kiate kimoutolu pea ki he kotoa ʻo e tākangá, ʻa ia kuo fakanofo kimoutolu ʻe he laumālie māʻoniʻoní ko e kau ʻovasia ʻi honau lotolotongá, ke tauhi ʻa e fakatahaʻanga ʻa e ʻOtuá, ʻa ia naʻá ne fakatau ʻaki ʻa e taʻataʻa ʻo hono ʻAló tonu.”—Ngāue 20:28, NW.
“Pea kapau ko ia, pea ka kuo tau maʻu ʻeni ʻa e fakatonuhia ʻi hono taʻataʻa, pea huanoa hotau fakamoʻui ka fai ʻiate ia mei he houhau.”—Loma 5:9.
“Ko e kau taʻe-ha-ʻamanaki-lelei, mo e kau taka he univēsi taʻe maʻu ʻa e ʻOtua. Ka ʻi onoponi, ʻia Kalaisi Sisu, ko kimoutolu naʻe mamaʻo muʻa ne fakaofi ʻaki ʻa e taʻataʻa ʻo Kalaisi.”—Efeso 2:12, 13.
“Naʻe vakai ʻa e ʻOtuá ʻoku lelei ke nofo ʻa e kakato kotoa pē ʻiate ia, pea fakafou ʻiate ia ke toe fakalelei ai kiate ia ʻa e ngaahi meʻa kehe kotoa pē ʻaki ʻa e fakamelino fakafou ʻi he taʻataʻa naʻá ne lilingi ʻi he ʻakau fakamamahí.”—Kolose 1:19, 20, NW.
“Ko ia, kainga, . . . ʻi heʻetau maʻu ʻa e loto-lahi ʻi he taʻataʻa ʻo Sisu, ke hu ki he Potu Toputapu.”—Hepelu 10:19.
“Naʻe ʻikai fai ʻaki ʻa e ngaahi meʻa ʻauha . . . homou huhuʻi mei he anga taʻeʻaonga ne tuku fakaholo mai mei he matuʻa; ka naʻe fai ʻaki ha taʻataʻa maʻongoʻonga, he ko e toto ʻo ha lami taʻemele mo taʻeʻila, ko e taʻataʻa ʻo Kalaisi.”—1 Pita 1:18, 19.
“Kapau ʻoku tau fou ʻi he maama, ʻo hange ko ʻene ʻafio ʻe ia ʻi he maama, pea ta ʻoku tau feohi, ʻa e taha mo e taha, pea ko e taʻataʻa ʻo Sisu ko hono ʻAlo ʻoku ne fakamaʻa kitautolu mei he angahala kotoa pe.”—1 Sione 1:7.
“Tāu pē koe ke toʻo ʻa e tohi, pea ke vete hono ngaahi sila; he naʻa ke mate tamateʻi pea naʻa ke fakatau kakai maʻa e ʻOtua ʻaki ho taʻataʻa mei he matakali fulipe mo e lea, mo e faʻahinga mo e puleʻanga.”—Fakahā 5:9.
“Kuo kapusi ʻa e tukuaki ʻo hotau kainga . . . Ka naʻa nau ikuna ia ko e meʻa ʻi he taʻataʻa ʻo e Lami, mo e lea ʻo e fakamoʻoni naʻa nau fai.”—Fakahā 12:10, 11.
[Fakatātā ʻi he peesi 16]
Fakafou ʻi he Laó, naʻe fakamahino ai ʻe he ʻOtuá ʻe malava ʻe he totó ke fakahoko ha ngafa ʻi he fakamolemoleʻi ʻo e ngaahi angahalá
[Fakatātā ʻi he peesi 17]
Fakafou ʻi he taʻataʻa ʻo Sīsuú, ʻe malava ke fakahaofi ai ʻa e ngaahi moʻui lahi