‘Naʻá Ne Akoʻi Kimautolu ke Tokaʻi ʻa ʻEne Lotú’

KO E taha ʻo e Kau Fakamoʻoni ʻa Sihová mei he vahefonua ʻo Rovigo, ʻĪtalí, naʻá ne ʻiloʻi naʻe ʻi ai hono foʻi ngungu pea ko hono tuʻungá naʻe mafatukituki. Hili ha tokoto tuʻo lahi ʻi he falemahakí, ʻa ia ʻi he lolotonga iá naʻá ne kole ai ke faitoʻo ia ʻo taʻekau ai ʻa e huhu totó, naʻe tokoniʻi ai ia ʻi ʻapi ʻe he kau neesi mei he ngāue fakaneesi fakalotofonua ki he kanisaá.

Ko e tui mālohi ʻa e tokotaha fokoutua taʻu 36 ko ení mo ʻene loto-lelei ke ngāue fāitahá naʻe maongo loloto ia ki he kau ngāue fakafaitoʻo naʻa nau faitoʻo iá. Taimi nounou ki muʻa ke fakatupunga ʻe he kanisaá ʻa e mate ʻa e tokotaha fokoutuá, ko e taha ʻo e kau neesi ʻa ia naʻá ne tokoniʻi iá naʻá ne tohi ʻi ha makasini fakaneesi fekauʻaki mo e meʻa naʻe hokosia ʻi he tokotaha fokoutua ʻa ia naʻá ne ui ko Angela.

“ʻOku longomoʻui ʻa Angela peá ne maʻu ʻa e fakapapau ke moʻuí. ʻOkú ne lāuʻilo fekauʻaki mo hono tuʻungá pea mo hono puke lahí, pea hangē ko ia ʻe hoko ki ha taha pē ʻo kitautolú, ʻokú ne fekumi ki ha solovaʻanga, ko ha fakaleleiʻanga, pe ko ha faitoʻo. . . . Ko kimautolu kau nēsí naʻe māmālie ʻemau hoko ʻo maheni mo iá. Naʻe ʻikai te mau fehangahangai mo ha fakafepaki. ʻI hono kehé, ko e tuʻunga faitotonu ʻo Angela naʻá ne ʻai ʻa e meʻa kotoa ke faingofua. Ko ha meʻa fakafiefia ke ʻaʻahi kiate ia, koeʻuhi naʻa mau ʻiloʻi ʻe hoko ia ko ha taimi ʻo e fetuʻutaki moʻoni mo ha tokotaha loto-moʻoni pea mo e taimi ke maʻu ʻaonga kotoa mei ai. . . . Naʻe vave ʻemau ʻiloʻi ko ʻene lotú naʻe pau ke hoko ia ko ha fakafaingataʻaʻiaʻanga ki heʻene fekuki mo hono mahakí.” Ko ʻene fakakaukaú ia koeʻuhi naʻá ne ongoʻi naʻe totonu ke fai ha huhu toto kia Angela, ʻa ia naʻá ne fakafisingaʻi.​—Ngāue 15:​28, 29.

“ʻI he tuʻunga ko e kau palōfesinale ki hono tokangaʻi ʻo e moʻuí, naʻa mau tala ange kia Angela naʻe ʻikai te mau loto-tatau mo ʻene filí, ka ʻi heʻene tokoní, naʻa mau mahinoʻi ai ʻa e mahuʻinga kiate ia ʻa e moʻuí. Naʻa mau toe mahinoʻi ʻa e mahuʻinga ʻo ʻene lotú kiate ia fakatouʻosi mo hono fāmilí. Naʻe ʻikai ke foʻi ʻa Angela. Naʻe ʻikai te ne tukulolo ki he mahakí. ʻOkú ne mālohi. ʻOkú ne loto ke moʻui, ke faitau pea ke hokohoko atu ʻi he moʻuí. Kuó ne fakahāhā ʻene fakapapaú, ʻa ʻene tuí. ʻOkú ne maʻu ha fakapapau ʻoku ʻikai te tau faʻa maʻu, ko ha tui, ʻa ia ʻi hotau tuʻungá ʻoku ʻikai ke fefeka tatau. . . . Kuo akoʻi mai ʻe Angela kia kimautolu ʻa e mahuʻinga ʻo hono tokaʻi ʻa ʻene lotú, ko e meʻa ia ʻoku mātuʻaki kehe mei heʻemau ngaahi ʻēfika fakapalōfesinalé. . . . ʻOku mau tui ko e meʻa kuo akoʻi kia kimautolu ʻe Angela ʻoku mahuʻinga lahi, he ʻoku mau fehangahangai mo e faʻahinga kakai kehekehe, ngaahi tuʻunga kehekehe, mo e ngaahi lotu kehekehe, pea ʻoku lava ke mau ako mei ai pea ʻoatu ha meʻa ki he tokotaha kotoa pē ʻoku mau fetuʻutaki mo iá.”

Naʻe tohoakiʻi leva ʻa e tokangá ʻe he kupu he makasiní ki he Lao ʻo e Ngaahi ʻĒfika Fakapalōfesinale ki he Kau Neesi ʻĪtalí, naʻe tali ʻi he 1999, ʻa ia ʻoku pehē ai: “ʻOku ngāue ʻa e nēsí, ʻo fakakaukauʻi ʻa e ngaahi tuʻunga fakalotu, fakaʻēfika mo fakafonua ʻa e tokotaha tāutaha, pea pehē foki ki he matakalí mo e senitá.” ʻI he taimi ʻe niʻihi, ʻe faingataʻa nai ai ki he kau toketaá mo e kau nēsí ke tokaʻi ha ngaahi tui fakalotu ʻa ha tokotaha fokoutua, pea ʻoku houngaʻia moʻoni ha taha ki he faʻahinga ʻoku nau loto-lelei ke fai iá.

Ko e ngaahi fili ʻoku fai ʻe he Kau Fakamoʻoni ʻa Sihová fekauʻaki mo ʻenau moʻuí mo e tokangaʻi fakafaitoʻó ʻoku ʻosi fakakaukauʻi lelei ia. ʻOku nau vakai fakamātoato ki he meʻa ʻoku leaʻaki ʻe he ngaahi Konga Tohi Tapú, pea hangē ko ia ʻoku fakatātaaʻi ʻi he tuʻunga ʻo Angela, ʻoku ʻikai ko ha kau tui loto-māfana tōtuʻa kinautolu. (Filipai 4:5) Takatakai ʻi he foʻi kolopé, ʻoku loto-lelei ai ha tokolahi fakautuutu ʻo e kau palōfesinale ʻi he tokangaʻi fakafaitoʻó ke tokaʻi ʻa e konisēnisi ʻo ʻenau kau fokoutua Fakamoʻoní.