Ko ha Tohi kia Noa

“SIʻI Noa, kuó u lautohi ʻi he taimi lahi ʻi he Tohi Tapú ʻo fekauʻaki mo koe pea mo e anga hoʻo langa ha ʻaʻake ʻa ia naʻe fakahaofi ai koe mo ho fāmilí ʻi he Lōmakí.”

Ko e kamata ia ʻo ha tohi naʻe fai ʻe he kiʻi taʻahine taʻu 15 ko Minnamaria naʻe ʻave ki ha feʻauhi faitohi ʻa e kau ako taʻu 14 ki he 21. Naʻe fokotuʻutuʻu ʻa e feʻauhí ʻe he ngaahi potungāue tufa meili ʻa Finilaní, ko e Kautaha ki he Kau Faiakó ʻi he Lea Tuʻufonua ʻa Finilaní, pea mo e Sōsaieti Tohi ʻa Finilaní. Ko e kau feʻauhí naʻe fiemaʻu ke nau fai ha tohi makatuʻunga ʻi ha tohi. ʻE lava ke fakatuʻasila ia ki he faʻu-tohi ʻo e tohí pe ki ha tokotaha ʻi he tohí. Naʻe fili ʻe he kau faiakó ʻa e tohi laka hake he 1,400 mei he tohi ʻa ʻenau kau akó ʻo ʻave ia ki he kau fakamaau ʻo e feʻauhí. Naʻe fili leva mei ai ʻe he kau fakamāú ʻa e ʻēsei lelei tahá, ko e ʻēsei ʻe hongofulu hoko hake he lelei tahá mo e ʻēsei ʻe hongofulu fika tolu ki he lelei tahá. Naʻe fiefia ʻa Minnamaria ʻi he maʻu pale fika tolu ʻa ʻene tohí.

Ko e hā naʻe hanga ai ʻe Minnamaria, ko ha tokotaha ako taʻu hongofulu tupu, ʻo fai ʻene tohí kia Noa, ko ha tangata ʻa ia naʻe moʻui ʻi he taʻu nai ʻe 5,000 kuohilí? ʻOkú ne fakamatala: “Ko e Tohi Tapú ʻa e ʻuluaki meʻa naʻe haʻu ki heʻeku fakakaukaú. Ko e kakai ʻi he Tohi Tapú kuó u hoko ʻo alāanga ʻaupito mo ia. Kuó u lautohi lahi ʻo fekauʻaki mo kinautolu ʻo nau meimei hā ngali moʻui mai kiate au. Ko Noa ʻa ʻeku filí koeʻuhi ko ʻene moʻuí naʻe mātuʻaki fakalotomāfana pea mo kehe ia mei heʻeku moʻuí.”

Ko e tohi ʻa Minnamaria kia Noá ʻoku fakaʻosiʻaki ʻa e ngaahi foʻi leá ni: “ʻOkú ke kei hoko pē ko ha faʻifaʻitakiʻanga ʻi he tuí mo e talangofuá. Ko hoʻo moʻuí ʻokú ne fakalototoʻaʻi ʻa e faʻahinga kotoa ʻoku nau lau ʻa e Tohi Tapú ke nau ngāueʻi ʻa ʻenau tuí.”

Ko e tohi ko eni ʻa ha tokotaha lau Tohi Tapu kei siʻi ʻoku fakatātaaʻi lelei ai ko e moʻoni ko e Tohi Tapú “ko e koto moʻui mo e koto malohi” ki he kakaí, ʻa e taʻumotuʻa mo e kei siʻi fakatouʻosi.—Hepelu 4:12.