Ngaahi Fehuʻi mei he Kau Lautohí

ʻOku fakahaaʻi ʻi he kalanga ʻa Sitīveni ʻi he Ngāue 7:​59, ʻoku totonu ke fai fakahangatonu ʻa e ngaahi lotú kia Sīsū?

ʻOku pehē ʻe he Ngāue 7:​59: “Pea nau fai ʻa e tolongi ʻo Setiveni ʻoku ne tautapa ange ʻo pehē, ʻEiki Sisū, ke ke maʻu atu hoku laumālie.” Kuo langaʻi ʻe he ngaahi lea ko iá ʻa e ngaahi fehuʻi ʻi he ʻatamai ʻo e niʻihi, koeʻuhi ʻoku pehē ʻe he Tohi Tapú ko Sihova ʻa e “tali lotu.” (Sāme 65:2) Naʻe lotu moʻoni ʻa Sitīveni kia Sīsū? ʻE fakahaaʻi ʻe he meʻá ni ʻoku tatau ʻa Sīsū mo Sihova?

ʻOku pehē ʻe he King James Version ko Sitīvení naʻá ne “ui ki he ʻOtuá.” ʻOku ala mahino leva ʻa e maʻu ʻe he tokolahi ʻa e fakamulituku naʻe aʻu ki ai ʻa e tokotaha fakamatala Tohi Tapu ko Matthew Henry, ʻa ia naʻá ne pehē: “ʻOku lotu heni ʻa Sitīveni kia Kalaisi, pea kuo pau ke tau pehē pē mo kitautolu.” Kae kehe, ʻoku hala ʻa e fakakaukau ko iá. Ko e hā hono ʻuhingá?

ʻOku fai ʻe he Barnes’ Notes on the New Testament ʻa e fakamatala faitotonu ko ení: “Ko e foʻi lea ʻOtuá ʻoku ʻikai ʻi he muʻaki tohí ia, pea naʻe ʻikai totonu ke ʻi he liliú ia. ʻOku halaʻatā ke ʻi he [ngaahi maniusikilipi] pe ngaahi liliu motuʻá ia.” Naʻe anga-fēfē ʻa e hoko ʻa e foʻi lea “ʻOtuá” ʻo fakahū ki he veesi ko iá? Naʻe ui eni ʻe he mataotao ko Abiel Abbot Livermore “ko ha tafaʻaki ʻo e ngaahi tomuʻa fehiʻa fakaelotu mavahe ʻa e kau liliu leá.” Ko ia ai, ko e lahi taha ʻo e ngaahi liliu fakaeonopōní ʻoku tāmateʻi mei ai ʻa e lave hala ko eni ki he ʻOtuá.

Ka neongo ia, ʻoku pehē ʻe he ngaahi liliu lahi naʻe “lotu” ʻa Sitīveni kia Sīsū. Pea ko e fakamatala ʻi lalo ʻi he New World Translation ʻoku fakahaaʻi ai ko e kupuʻi lea “tautapa” ʻe toe lava foki ke ʻuhinga ia ko e “kole tokoni; lotu.” ʻIkai ʻe fakahaaʻi ʻe he meʻa ko iá ko Sīsū ʻa e ʻOtua Māfimafi-Aoniú? ʻIkai. ʻOku fakamatala ʻa e Vine’s Expository Dictionary of Old and New Testament Words ʻi he fokotuʻutuʻu ko ení, ko e muʻaki foʻi lea faka-Kalisi ko e e·pi·ka·leʹo, ʻoku ʻuhinga iá: “Ke ui, kole tokoni; . . . ke tautapa ki ha tuʻunga mafai.” Naʻe ngāueʻaki ʻe Paula ʻa e foʻi lea tatau ʻi heʻene talaki: “Te u unga [pe tautapa] au kia Sisa.” (Ngāue 25:11) ʻOku feʻungamālie leva ʻa e pehē ʻe he New English Bible naʻe “ui” ʻa Sitīveni kia Sīsuú.

Ko e hā naʻá ne ueʻi ʻa Sitīveni ke ne fai ha tautapa peheé? Fakatatau ki he Ngāue 7:​55, 56, ko Sitīvení, naʻe “fonu ia ʻi he Laumālie Maʻoniʻoni; pea ʻi heʻene sio fakamamaʻu ki he langi naʻa ne ʻilo ʻa e Sikaina ʻo e ʻOtua, pea mo Sisū ʻoku ne tuʻu mei he toʻomataʻu ʻo e ʻOtua.” ʻI he anga-mahení, naʻe pau ke fai ʻe Sitīveni ʻa ʻene ngaahi kolé kia Sihova ʻi he huafa ʻo Sīsuú. Ka ʻi heʻene sio ʻi he vīsoné kia Sīsū kuo toetuʻú, ʻoku ngalingali naʻe ongoʻi tauʻatāina ʻa Sitīveni ke tautapa fakahangatonu kiate ia, ʻo pehē: “ʻEiki Sisū, ke ke maʻu atu hoku laumālie.” Naʻe ʻiloʻi ʻe Sitīveni kuo ʻoange kia Sīsū ʻa e mafai ke ne fokotuʻu hake ʻa e maté. (Sione 5:​27-​29) Ko ia naʻá ne kole ai kia Sīsū ke ne maluʻi ʻa hono laumālié, pe ivi moʻuí, kae ʻoua ke aʻu ki he taimi ʻe fokotuʻu hake ai ia ʻe Sīsū ki he moʻui taʻefaʻamate ʻi hēvaní.

ʻOku fokotuʻu ʻi he lea nounou ʻa Sitīvení ha tomuʻa fakatātā ki he lotu kia Sīsuú? ʻIkai ʻaupito. Ko e meʻa ʻe taha, naʻe fakafaikehekeheʻi mahino ʻe Sitīveni ʻa Sīsū meia Sihova, he ʻoku pehē ʻe he fakamatalá naʻá ne mamata kia Sīsū ʻokú ne “tuʻu mei he toʻomataʻu ʻo e ʻOtua.” Pehē foki, naʻe tātātaha ʻa e ngaahi tuʻunga ko ení. Ko e tuʻunga kehe pē ʻe taha ʻo ha lea pehē naʻe fai fakahangatonu kia Sīsū ko e lea ko ia ʻa e ʻapositolo ko Sioné, ʻa ia naʻe lea fakahangatonu meimei tatau kia Sīsū ʻi heʻene mamata kiate Ia ʻi ha vīsone.​—Fakahā 22:​16, 20.

Neongo ko e kau Kalisitiane he ʻaho ní ʻoku nau fakahanga totonu ʻa ʻenau ngaahi lotú kotoa kia Sihova ko e ʻOtuá, ko kinautolu foki ʻoku nau maʻu ʻa e tui taʻeueʻia ko Sīsuú “ko e Toetuʻu, pea mo e Moʻui.” (Sione 11:25) Hangē ko ia naʻe hoko kia Sitīvení, ʻoku pehē pē ʻa e malava ke tokoniʻi mo fakaivia kitautolu ʻe he tui ki he malava ʻa Sīsū ke fokotuʻu hake ʻa hono kau muimuí mei he maté ʻi he ngaahi taimi ʻo e ʻahiʻahí.