Tokanga Fekauʻaki mo e Ngaahi Anga Fakafonua ʻOku Taʻefakahōifua ki he ʻOtuá

ʻI HA kiʻi lotoʻā, ʻoku tuku fakaava ai ha puha mate ʻi he loto laʻā vevela ʻo ʻAfiliká. ʻI he laine atu ki ai ʻa e kau tengihiá ke fakahāhā ʻenau mamahí, ʻoku kiʻi taʻofituʻu ha tangataʻeiki. ʻOkú ne mata mamahi, ʻokú ne punou atu ʻo ofi ki he mata ʻo e pekiá ʻo kamata ke ne lea: “Ko e hā naʻe ʻikai te ke tala mai ai te ke ʻalú? Ko e hā naʻá ke liʻaki peheni ai aú? ʻI hoʻo foki mai he taimi ní, ʻe hokohoko atu hoʻo tokoniʻi aú?”

ʻI ha toe konga ʻe taha ʻo ʻAfilika, ʻoku fanauʻi ai ha pēpē. ʻOku ʻikai fakangofua ke sio ha taha ki he kiʻi tamá. ʻOku toki ʻomai ʻa e pēpeé ʻi he hili atu ha taimi, ke sio ki ai ʻa e kakaí pea fakahingoa fakaeouau ia.

Ki he kakai ʻe niʻihi, ko e talanoa ki ha tokotaha mate pe fūfuuʻi ha kiʻi tama toki fanauʻi mei he mamata ki ai ʻa e niʻihi kehé ʻe hā ngali ko ha tōʻonga faikehe ia. Kae kehe, ʻi he ngaahi anga fakafonua mo e sōsaieti ʻe niʻihi, ko e tōʻonga mo e vakai ʻa e kakaí ki he maté mo e fanauʻí ʻoku tākiekina ia ʻe ha tui mālohi ʻaupito ʻoku ʻikai moʻoni ke mate ʻa e kau maté ka ʻoku nau moʻui pea ʻiloʻi ʻa e meʻa ʻoku hokó.

ʻOku fuʻu mālohi ʻa e tuí ni ʻo hoko ko ha konga mātuʻaki mahuʻinga ia ʻo e ngaahi anga fakafonua mo e ngaahi ouau ʻoku meimei kau ki he tafaʻaki kotoa pē ʻo e moʻuí. Hangē ko ení, ʻoku tui ʻa e laui miliona ko e ngaahi tuʻunga mahuʻinga ʻi he moʻui ʻa ha taha—hangē ko e fanauʻí, hoko ko e tokotaha lahí, nofo malí, maʻu fānaú mo e  maté—ko e ngaahi konga ia ʻo ha ngaʻunu ʻoku iku ki he nofoʻanga laumālie ʻo e fanga kuí. ʻI aí, ʻoku ʻi ai ʻa e tui, ʻoku hokohoko atu ai ʻa e tokotaha maté ke fakahoko ha ngafa longomoʻui ʻi he moʻui ʻa e faʻahinga naʻá ne mavahe mei aí. Pea ʻe lava ke ne hokohoko atu ʻa e vilo ʻo e moʻuí fakafou ʻi hano toe fanauʻi.

Ke fakapapauʻi ʻa e ngaʻunu lele lelei ʻi he vahaʻa ʻo e ngaahi tuʻunga kotoa ʻo e vilo ko ení, ʻoku fakahoko ai ha ngaahi anga fakafonua mo e ouau lahi fau. ʻOku tākiekina ʻa e ngaahi anga fakafonua ko ení ʻe he tui ʻoku ʻi ai ha meʻa ʻi loto ʻia kitautolu ʻoku moʻui atu ʻi he maté. ʻOku fakaʻehiʻehi ʻa e kau Kalisitiane moʻoní mei ha ngaahi anga fakafonua pē ʻoku fekauʻaki mo e tui ko ení. Ko e hā hono ʻuhingá?

Ko e Hā ʻa e Tuʻunga ʻo e Kau Maté?

ʻOku māʻalaʻala ʻa e Tohi Tapú ʻi heʻene fakamatalaʻi ʻa e tuʻunga ʻo e kau maté. ʻOku fakamatala pē ai: “Ko e kau moʻui ʻoku nau ʻilo ai pe te nau pekia; ka ko e kau pekia ʻoku ʻikai te nau ʻilo ha momoʻi meʻa, . . . Ko ʻenau ʻofa foki, mo ʻenau ngaahi fehiʻa, mo ʻenau ngaahi meheka, kuo loa pe ʻenau mole; . . . ʻoku ʻikai ha ngaue, pe ha fakakaukau, pe ha ʻilo, pe ha poto ʻi lolofonua [faʻitoka anga-maheni ʻo e faʻahinga ʻo e tangatá], ʻa e feituʻu ʻoku ke fononga ki ai.” (Koheleti 9:​5, 6, 10) Kuo fuoloa hono koloaʻaki ʻe he kau lotu moʻoni ʻa e ʻOtuá ʻa e moʻoni Fakatohitapu tefito ko ení. Kuo nau mahinoʻi ko e soulú, ʻi he ʻikai ke hoko ʻo taʻefaʻamaté, ʻe lava ke mate ia pea hoko ʻo ʻauha. (Isikeli 18:4) Kuo nau toe ʻiloʻi ʻoku ʻikai ke moʻui ha ngaahi laumālie ʻo e kau maté. (Sāme 146:4) ʻI he kuonga muʻá, naʻe fekauʻi mālohi ai ʻe Sihova ʻa hono kakaí ke nau fakamavaheʻi kakato kinautolu mei ha anga fakafonua pe ouau pē ʻa ia naʻe fekauʻaki mo e tui ʻoku ʻiloʻi ha meʻa ʻe he kau maté pea ʻoku nau malava ke tākiekina ʻa e kau moʻuí.​—Teutalonome 14:1; 18:​9-​13; Aisea 8:​19, 20.

Naʻe fakaʻehiʻehi tatau ʻa e kau Kalisitiane he ʻuluaki senitulí mei ha anga fakafonua pe ouau tukufakaholo pē naʻe fekauʻaki mo e akonaki fakalotu loí. (2 Kolinito 6:​15-​17) ʻI he ʻahó ni, ko e Kau Fakamoʻoni ʻa Sihová, tatau ai pē ʻa e matakali, haʻa, pe ʻātakai, ʻoku nau liʻaki ʻa e ngaahi talatukufakaholo mo e anga fakafonua ʻa ia ʻoku fekauʻaki mo e akonaki loi ʻo pehē ʻoku ʻi ai ʻa e meʻa ʻi he tangatá ʻoku moʻui atu ʻi he maté.

Ko e hā ʻe lava ke ne tataki kitautolu ʻi he tuʻunga ko e kau Kalisitiané ʻi hono fili pe ʻe tauhi ha anga fakafonua pau pe ʻikai? Kuo pau ke tau fakakaukau lelei ki heʻene malava ke fekauʻaki mo ha akonaki taʻefakatohitapu pē, hangē ko e tui ʻoku tākiekina ʻe he ngaahi laumālie ʻo e kau maté ʻa e moʻui ʻa e kau moʻuí. ʻIkai ko ia pē, ʻoku fiemaʻu ke tau fakakaukau pe ʻe fakatūkiaʻi nai ʻe heʻetau kau ʻi ha anga fakafonua pe ouau pehē ʻa e niʻihi kehe ʻoku nau ʻiloʻi ʻa e meʻa ʻoku tui ki ai mo akoʻi ʻe he Kau Fakamoʻoni ʻa Sihová. ʻI he fakakaukau ki he ngaahi poini ko iá, tau sivisiviʻi angé ʻa e tafaʻaki ʻe ua fekauʻaki mo ia—ko e fanauʻí mo e maté.

Ngaahi Ouau ʻo e Fanauʻí mo e Fakahingoa-Tamá

ʻOku feʻungamālie ʻa e ngaahi anga fakafonua lahi ʻoku fekauʻaki mo e fanauʻi ʻo e tamá. Kae kehe, ʻi he ngaahi feituʻu ʻoku vakai ai ki he fanauʻí ko ha ngaʻunu mei he nofoʻanga ʻo e ngaahi laumālie ʻo e fanga kuí ki he feituʻu ʻo e tangatá, kuo pau ke ngāueʻaki ai ʻa e tokangá ʻe he kau Kalisitiane moʻoní. Ko e fakatātaá, ʻi he ngaahi konga ʻe niʻihi ʻo ʻAfilika, ʻoku tauhi ai ʻi fale ha kiʻi tama toki fanauʻi pea ʻoku ʻikai ke fakahingoa ia kae ʻoua kuo mahili atu ai ha vahaʻa taimi. Lolotonga ko e vahaʻa taimi tatalí ʻoku kehekehe nai ʻo fakatatau ki he feituʻú, ʻoku iku ia ki ha ouau fakahingoa-tama, ʻa ia ʻoku ʻomai ai ki tuʻa ʻa e kiʻi tamá pea ʻoatu fakaeouau ia ki he ngaahi kāingá mo e ngaahi kaumeʻá. ʻI he taimi ko iá, ʻoku fanongonongo fakaʻofisiale ai ʻa e hingoa ʻo e kiʻi tamá ki he faʻahinga ʻoku ʻi aí.

ʻI hono fakamatalaʻi ʻa e ʻuhinga ʻo e anga fakafonua ko ení, ʻoku fakahaaʻi ʻi he tohi Ghana​—Understanding the People and Their Culture: “Lolotonga ʻa e ʻuluaki ʻaho ʻe fitu ʻo ʻene moʻuí, ʻoku vakai ai ki ha pēpē ʻokú ne fai ha ‘ʻaʻahi’ pea fou ʻi ha ngaʻunu mei he māmani ʻo e ngaahi laumālié ki he moʻui fakaemāmaní. . . . ʻOku tauhi anga-maheni ai ʻi fale ʻa e pēpeé pea ʻoku ʻikai fakaʻatā ʻa e kakai ʻi tuʻa ʻi he fāmilí ke nau sio ki ai.”

Ko e hā ʻoku ʻi ai ai ha vahaʻa taimi tatali ki muʻa ke fakahingoa fakaeouau ʻa e kiʻi tamá? Ko e tohi Ghana in Retrospect ʻoku fakamatala ai: “Ki muʻa he ʻaho hono valú, ʻoku ʻikai pehē ai ko ha tangata ʻa e kiʻi tamá. ʻOku lahi pe siʻi ange ai ʻene fekauʻaki mo e māmani ʻe taha ʻa ia kuó ne haʻu mei aí.”  ʻOku hoko atu ʻa e tohí: “Koeʻuhi ko e hingoá, hangē ko e laú, ʻokú ne ʻai ʻa e kiʻi tamá ke hoko ko e tangatá, ʻi he taimi ʻoku manavahē ai ha ongo meʻa naʻa mate ʻa ʻena tamá ʻokú na faʻa toloi ai ʻa hono fakahingoá kae ʻoua ke na fakapapauʻi te ne moʻui. . . . Ko ia ai, ko e ouau ko eni ʻo e liliú, ʻoku ui ia he taimi ʻe niʻihi ko e fakahāhā ki tuʻa, ʻoku pehē ʻoku ʻi ai hono ngaahi ola lahi fakaʻulia ki he kiʻi tamá mo ʻene ongo mātuʻá. Ko e kātoanga ia ʻokú ne ʻomai ʻa e kiʻi tamá ki he feohi pe ki he māmani ʻo e faʻahinga ʻo e tangatá.”

Ko ha kāinga taʻumotuʻa ʻo e fāmilí ʻokú ne faʻa fakahoko ha kātoanga lolotonga ʻo ha ouau fakahingoa-tama pehē. Ko e ngaahi tafaʻaki ʻo e kātoangá ʻoku kehekehe ia ʻi he feituʻu ki he feituʻu, ka ʻoku faʻa kau ki he kātoangá ʻa hono lilingi ʻo ha feilaulau, fai ʻo e ngaahi lotu ki he ngaahi laumālie ʻo e fanga kuí ʻo fakahaaʻi ʻa e houngaʻia ki he aʻu ʻo hao mai ʻa e kiʻi tamá, pea mo e ngaahi ouau kehe.

Ko e meʻa mahuʻinga ʻo e kātoangá ʻoku hoko mai ia ʻi he taimi ʻoku fakahaaʻi ai ʻa e hingoa ʻo e kiʻi tamá. Neongo ko e fatongia ia ʻo e ongo mātuʻá ki hono fakahingoa ʻena kiʻi tamá tonu, ʻoku faʻa maʻu ʻe he ngaahi kāinga kehé ʻa e tākiekina mālohi ʻi he hingoa ʻoku filí. ʻOku fakahoko nai ʻe he ngaahi hingoa ʻe niʻihi ha ʻuhinga fakaefakatātā ʻi he lea ʻa e feituʻú, hangē ko e “ʻalu mo e foki,” “kuo hoko tuʻo ua mai ʻa e fineʻeikí,” pe “kuo toe haʻu ʻa e tangataʻeikí.” ʻOku ʻi he ngaahi hingoa kehe ʻa e ngaahi ʻuhinga naʻe faʻu ke fakalotosiʻi ʻaki ʻa e fanga kuí mei hono fakafoki ʻa e kiʻi tama toki fanauʻí ki he māmani ʻo e kau maté.

Ko e moʻoni, ʻoku ʻikai ha meʻa ia ʻe hala ʻi he fiefia ʻi he fanauʻi ʻo ha kiʻi tama. Ko hono fakahingoa ha kiʻi tama ki ha taha kehe mo hono ʻoange ha hingoa ʻoku tapua atu ai ʻa e ngaahi tuʻunga ʻoku fekauʻaki mo hono fanauʻí ko e ngaahi anga fakafonua ia ʻoku ala tali, pea ko hono fili ʻa e taimi ke fakahingoa ai ʻa e kiʻi tamá ko ha fili fakafoʻituitui ia. Kae kehe, ko e kau Kalisitiane ʻoku nau loto ke fakahōifuaʻi ʻa e ʻOtuá ʻoku nau tokanga ke fakaʻehiʻehi mei ha ngaahi anga fakafonua pe ouau pē ʻokú ne ʻoatu ai ʻa e fakakaukau ʻoku nau loto-tatau mo e fakakaukau ko ia ko e kiʻi tama toki fanauʻí ko ha “tokotaha ʻaʻahi” ʻoku haʻu mei he māmani laumālie ʻo e fanga kuí ki he māmani ʻo e feituʻu ʻo e kau moʻuí.

Tānaki atu ki ai, lolotonga ʻoku vakai ʻa e tokolahi ʻi he feituʻú ki he kātoanga fakahingoá ko ha ouau mahuʻinga ia ʻo e liliú, ʻoku totonu ke faʻa fakakaukau ʻa e kau Kalisitiané ki he konisēnisi ʻo e niʻihi kehé pea vakai ai ki he fakakaukau ʻoku ʻoatu ki he kau taʻetuí. Ko e fakatātaá, ko e hā nai ʻa e meʻa ʻe fakaʻosiʻaki ʻe he niʻihi, kapau ʻe taʻofi ʻe ha fāmili Kalisitiane ʻenau kiʻi tama toki fanauʻí mei he vakai ki ai ʻa e niʻihi kehé kae ʻoua ke fakahoko ha kātoanga fakahingoá? Ko e hā ʻa e fakakaukaú kapau naʻe ngāueʻaki ha ngaahi hingoa ʻoku fepaki mo ʻenau taukaveʻi ko e kau faiako kinautolu ʻo e moʻoni Fakatohitapú?

Ko ia ai, ʻi hono fili ʻa e founga mo e taimi ke fakahingoa ai ʻenau fānaú, ʻoku feinga ʻa e kau Kalisitiané ke “fai kotoa pe ke ongoongolelei ai ʻa e ʻOtua” koeʻuhi ke ʻoua ʻe hoko ko ha fakatupunga ki ha tūkia. (1 Kolinito 10:​31-33) ʻOku ʻikai te nau ‘taʻetokaʻi ʻa e tuʻutuʻuni ʻa e ʻOtuá, ka nau mamafa ki he lau fakaeonoʻahó’ ʻa ia ʻoku faʻufaʻu tefito ke fakalāngilangiʻi ai ʻa e kau maté. ʻI hono kehé, ʻoku nau ʻave ʻa e fakaʻapaʻapá mo e lāngilangí ki he ʻOtua moʻuí, ʻa Sihova.—Maake 7:​9, 13.

Mavahe mei he Maté ki he Moʻuí

Ko e maté, hangē ko e fanauʻí, ʻoku vakai ki ai ʻa e tokolahi ko ha liliu: ko e taha ʻoku maté ʻoku ngaʻunu ia mei he māmani hā maí ki he nofoʻanga taʻehāmai ʻo e ngaahi laumālie ʻo e kau maté. ʻOku tui ʻa e tokolahi ʻo ka ʻikai fakahoko ha ngaahi kātoanga mo e ouau putu pau ʻi he mate ʻa ha tokotahá, ko e ngaahi laumālie ʻo e fanga kuí, ʻa ia ʻoku ʻi ai ʻa e tui ʻoku nau maʻu ʻa e mālohi ke tauteaʻi pe fakapaleʻi ʻa e kau moʻuí, te nau ʻita. ʻOku tākiekina lahi ʻe he tui ko ení ʻa e ngaahi founga hono fokotuʻutuʻu mo hono fai ʻo e ngaahi putú.

Ko e ngaahi putu ʻoku fakataumuʻa ke fakafiemālieʻi ai ʻa e kau maté ʻoku faʻa kau ki ai ha ngaahi tuʻunga kehekehe ʻo e ongó—mei he tangilāulau teketekelili mo e kaikaila ʻi he ʻi ai ʻa e ʻangaʻangá ki he ngaahi kātoanga fakafiefia hili hono tanú. Ko e kātoanga kai taʻemapuleʻi, konā, mo e hula ki he fasi longoaʻá ʻoku faʻa fakamatalaʻi ʻaki ia ʻa e ngaahi kātoanga putu peheé. ʻOku faʻa fakahoko ʻa e tuʻunga mahuʻinga lahi ki he ngaahi putú naʻa mo e ngaahi fāmili masiva tahá ʻoku nau faʻa fai ʻa e feinga lahi ke tātānaki ha paʻanga feʻunga ke fai ʻaki ha “tanu feʻungamālie,” neongo ʻe fakahoko mai nai ai ʻa e tuʻunga faingataʻaʻia mo e moʻua.

 ʻI he kotoa ʻo e ngaahi taʻú, kuo fakaeʻa fakaʻāuliliki ai ʻe he Kau Fakamoʻoni ʻa Sihová ʻa e ngaahi anga fakafonua taʻefakatohitapu ʻo e putú. a Ko e ngaahi anga fakafonua peheé ʻoku kau ai ʻa e ʻā-poó, ko e lilingi ʻo e ngaahi feilaulaú, talanoa mo fai ʻa e ngaahi kole ki he kau maté, ngaahi kātoanga fakaeouau ʻo e ngaahi ʻaho fakamanatu putú, mo e ngaahi anga fakafonua kehe makatuʻunga ʻi he tui ʻoku moʻui atu ha meʻa ʻi ha tokotaha hili ʻa e maté. Ko e ngaahi anga fakafonua taʻefakaʻapaʻapaʻi ʻOtua peheé ʻoku “taʻemaʻa,” ko ha “koto muna” makatuʻunga ʻi he “tuʻutuʻuni fakaeonoʻaho ʻa e kakai” ʻo ʻikai ʻi he Folofola ʻa e ʻOtuá ko e moʻoní.—Aisea 52:11; Kolose 2:8.

Tenge ke Fakatatau

Ko e fakaʻehiʻehi mei he anga fakafonua tukufakaholó kuo fakamoʻoniʻi ko ha pole ia ki he niʻihi, tautefito ʻi he ngaahi fonua ʻa ia ʻoku fakakaukau ai ko ha meʻa mahuʻinga lahi ʻa hono fakalāngilangiʻi ʻo e kau maté. Koeʻuhi ko e ʻikai muimui ʻi he ngaahi anga fakafonua peheé, kuo fai ai ʻa e vakai fakataha mo e huʻuhuʻu ki he Kau Fakamoʻoni ʻa Sihová pe kuo tukuakiʻi ai kinautolu ʻoku nau taʻefakasōsiale pe taʻefakaʻapaʻapa ki he kau maté. Ko e fakaangá mo e tenge mālohí kuo fakatupunga ai ʻa e niʻihi, neongo ʻenau mahinoʻi totonu ʻa e moʻoni Fakatohitapú, ke nau ilifia ke tuʻu ʻo hā mahino ʻoku nau kehe. (1 Pita 3:​14) Kuo ongoʻi ʻe he niʻihi ko e ngaahi anga fakafonua ko ení ko e konga ia ʻo ʻenau sivilaisé pea ʻe ʻikai lava ke fakaʻehiʻehi fakaʻaufuli mei ai. Lolotonga iá kuo fakaʻuhinga ʻa e niʻihi ko e fakafisi ke muimui ʻi he anga fakafonuá ʻe lava ke tomuʻa fehiʻa mai ai ʻa e koló ki he kakai ʻa e ʻOtuá.

ʻOku ʻikai te tau loto ke fakaʻitaʻi noaʻia ʻa e niʻihi kehé. Neongo ia, ʻoku fakatokanga mai ʻa e Tohi Tapú ko e tuʻu mālohi maʻá e moʻoní ʻe iku ia ki he ʻikai leleiʻia ʻa ha māmani kuo mavahe mei he ʻOtuá. (Sione 15:​18, 19; 2 Timote 3:​12; 1 Sione 5:​19) ʻOku tau fai ha tuʻu loto-lelei pehē, ʻi he ʻiloʻi kuo pau ke tau kehe mei he faʻahinga ʻoku nau ʻi he fakapoʻuli fakalaumālié. (Malakai 3:​18; Kaletia 6:​12) Hangē ko hono talitekeʻi ʻe Sīsū ʻa e ʻahiʻahi ʻa Sētane ke ne fai ʻa e meʻa ʻoku taʻefakahōifua ki he ʻOtuá, ʻoku pehē pē ʻetau talitekeʻi ʻa e tenge ke ngāue ʻi ha founga ʻoku taʻefakahōifua ki he ʻOtuá. (Mātiu 4:​3-7) ʻI he ʻikai hoko ʻo tākiekina ʻe he manavahē tangatá, ʻoku tokanga muʻomuʻa ʻa e kau Kalisitiane moʻoní ki hono fakahōifuaʻi ʻa Sihova ko e ʻOtuá mo fakalāngilangiʻi ia ʻi he tuʻunga ko e ʻOtua ʻo e moʻoní. ʻOku nau fai ia ʻaki ʻa e ʻikai fakangaloku ʻa e ngaahi tuʻunga Fakatohitapu ʻo e lotu maʻá koeʻuhi ko e tenge mei he niʻihi kehé.​—Palovepi 29:25; Ngāue 5:​29.

Fakaʻapaʻapa ki he Kau Maté—Fakalāngilangiʻi ʻa Sihova

ʻOku fakanatula pē ke ongoʻi ʻa e langa mo e mamahi lahi fakaeongo ʻi he taimi ʻoku mate ai ha taha ʻoku tau ʻofa ai. (Sione 11:​33, 35) Ko e tukulotoa ʻa e manatu ki ha tokotaha ʻofeiná mo hono fai ha tanu ʻi he tuʻunga fakaʻapaʻapá ko e ngaahi fakahāhā feʻungamālie ia mo taau ʻo ʻetau ʻofá. Kae kehe, ʻoku fekuki ʻa e Kau Fakamoʻoni ʻa Sihová mo e mamahi lahi ʻi he maté ʻo ʻikai ke ohi ha ngaahi tōʻongafai tukufakaholo pē ʻoku taʻefakahōifua ki he ʻOtuá. ʻOku ʻikai faingofua eni ki he faʻahinga kuo ʻohake ʻi he ngaahi sivilaise ʻa ia ʻoku ʻi ai ʻa e manavahē lahi ki he kau maté. ʻE lava ke hoko ko ha pole ke tauhi maʻu ʻetau mafamafatataú ʻi he taimi ʻoku tau mamahi fakaeongo ai ʻi he mate ʻa ha tokotaha ʻoku ofi kia kitautolu. Ka neongo ia, ʻoku fakaivimālohiʻi ʻa e kau Kalisitiane faitōnungá ʻe Sihova ko e “Otua oe fiemalie kotoabe,” pea nau maʻu ʻaonga mei he poupou anga-ʻofa ʻa e ngaahi kaungātuí. (2 Kolinito 1:​3, 4, PM) Ko ʻenau tui mālohi ko e kau mate ʻoku ʻikai te nau toe ʻiloʻi ha meʻa, ʻoku ʻi he manatu ʻa e ʻOtuá te nau toe moʻui ʻi ha ʻahó, ʻoku ʻoange ai ki he kau Kalisitiane moʻoní ʻa e ʻuhinga kotoa ke fakamavaheʻi fakaʻaufuli ai kinautolu mei he ngaahi tōʻonga putu taʻefakakalisitiane ʻoku fakaʻikaiʻi ai ʻa e moʻoni ʻo e toetuʻú.

ʻIkai ʻoku tau fiefia ʻi hono ui kitautolu ʻe Sihova “mei he poʻuli ki he maama fakaofo aʻana”? (1 Pita 2:9) ʻI heʻetau hokosia ʻa e fiefia ʻi he fanauʻí pea kātakiʻi ʻa e tuʻunga mamahi ʻi he maté, ʻofa ke ueʻi maʻu pē kitautolu ʻe heʻetau holi mālohi ke fai ʻa e meʻa ʻoku totonú mo ʻetau ʻofa lahi kia Sihova ko e ʻOtuá ke tau “laka ʻo tāu mo e fanau ʻa maama.” ʻOfa ke ʻoua ʻaupito naʻa tau fakaʻatā ke hoko ʻo ʻuliʻi fakalaumālie kitautolu ʻe he ngaahi anga fakafonua ʻoku taʻefakahōifua ki he ʻOtuá.—Efeso 5:8.

[Fakamatala ʻi lalo]