‘Mou Hanganaki Leʻo’

ʻI HE kuonga muʻá, naʻe ngāue ai ʻa e kau leʻo matapaá ʻi he ngaahi hūʻanga ʻo e koló mo e temipalé, pea ʻi he taimi ʻe niʻihi, ʻi he ngaahi matapā ʻo e ngaahi ʻapi fakatāutahá. Tuku kehe ʻa hono fakapapauʻi ʻoku tāpuniʻi ʻa e ngaahi matapaá ʻi he poʻulí, naʻe toe ngāue ʻa e kau leʻo matapaá ko e kau tangata leʻo. Ko ha ngāue alafalalaʻanga ʻaupito ʻeni, he ko e malu ʻa e koló naʻe fakatuʻunga ia ʻi heʻenau kaila ke fakatokanga ki he kakaí ʻo fekauʻaki mo ha faʻahinga fakatuʻutāmaki pē naʻe tuʻunuku mai.

Naʻe maheni ʻa Sīsū Kalaisi mo e ngafa ʻo e kau leʻo matapaá, naʻe toe ui ko e kau tauhi matapā. ʻI he taimi ʻe taha, naʻá ne fakatatau ai ʻene kau ākongá ki ha kau tauhi matapā pea fakalototoʻaʻi kinautolu ke nau hanganaki leʻo ʻi he fekauʻaki mo e fakaʻosiʻosi ʻo e ngaahi meʻa ʻo e fokotuʻutuʻu faka-Siú. Naʻá ne pehē: “Mou tokanga, mou ʻā pē: he ʻoku ʻikai te mou ʻilo pe fakakū hono taimi. ʻO hange ko ha tangata ʻoku teu ʻalu ki muli, hili ʻene tukuange hono ʻapi, . . . ʻoku ne naʻinaʻi foki ki he tauhi matapā ke leʻo. Ko ia mou [hanganaki] leʻo: he ʻoku ʻikai te mou ʻilo pe hoko fakakū mai ʻa e ʻEiki ʻo e ʻapi.”—Maake 13:​33-35.

Pehē foki, ko e pepa ko ʻení, ʻa e Taua Leʻo, kuo laka hake ʻeni ʻi he taʻu ʻe 125 ʻa ʻene fakahaaʻi ʻa e fakalototoʻa ʻa Sīsū ke “[hanganaki] leʻo.” Anga-fēfē? Hangē ko ia ʻoku fakahaaʻi ʻi he peesi 2 ʻo e makasini ko ʻení, “ʻOkú ne hanganaki leʻo ki he ngaahi meʻa ʻoku hoko ʻi he māmaní ʻi heʻenau fakahoko ʻa e kikite ʻa e Tohi Tapú. ʻOkú ne fakafiemālieʻi ʻa e kakai kotoa pē ʻaki ʻa e ongoongo lelei ʻa ia ko e Puleʻanga ʻo e ʻOtuá kuo vavé ni ke ne fakaʻauha ʻa e faʻahinga ʻoku nau ngaohikoviʻi honau faʻahingá pea te ne liliu ʻa e māmaní ko ha palataisi.” ʻI hono tufaki ʻi māmani lahi ʻa e ngaahi tatau laka hake ʻi he 26,000,000 ʻi he ngaahi lea ʻe 150, ʻoku hoko ai ʻa e Taua Leʻo ko e makasini fakalotu tufaki lahi taha ia ʻi he māmaní. Fakafou ai, ko e Kau Fakamoʻoni ʻa Sihová, ʻi he hangē ko e kau leʻo matapā ʻo e kuonga muʻá, ʻoku nau naʻinaʻi ki he kakai ʻo e feituʻu kotoa pē ke nau “ʻā pē” fakalaumālie koeʻuhi ko e ʻEikí, ʻa Sīsū Kalaisi, ʻoku teu ke ne foki mai ʻo fakahoko ʻa e fakamaau ki he ngaahi meʻa ʻo e fokotuʻutuʻu ko ʻení.—Maake 13:​26, 37.