Ko Hai Te Ne Fafanga ʻa e Māmaní?

FAKATATAU ki he ngaahi fakafuofua ʻa e Polokalama Meʻakai ʻa e Māmaní, ko ha kautaha ʻa e Ngaahi Puleʻanga Fakatahatahá ki hono tauʻi ʻo e fiekaiá, ko e kakai ʻe toko 800 miliona—ko e tokolahi taha ʻo kinautolú ko e fānau—ʻoku nau ofi ki he tuʻunga hōngeá. Ki muí ni mai, naʻe pehē ai ʻe he kautaha ko iá ko e ngaahi koloa mo e tokanga naʻe mei lava ke ngāueʻaki ʻe he ngaahi fonua fakalakalaka lahi ki he tuʻunga ko ení naʻe puleʻi ia ʻe he ngaahi palopalema kehe, hangē ko e tautoitoí. Ko e mafola ʻo e ngaahi mahaki pipihí kuó ne fakalahiʻi ʻa e palopalemá. Naʻe pehē ʻe he Global School Feeding Report ʻa e kautahá ʻo fekauʻaki mo e ngaahi fonua ʻAfilika ʻoku mafolalahia ai ʻa e ʻeitisí: “Kuo tafiʻi ʻosi atu ha toʻutangata fakakātoa ʻo e ngaahi mātuʻa tauhi fānaú. Ko e fānau ʻoku nau tuku maí ʻoku faʻa liʻaki ke nau tokonaki pē maʻanautolu, ko e tokolahi tahá ʻoku ʻikai te nau maʻu ha ʻilo tefito fekauʻaki mo e fāmá pea mo e ngaahi pōtoʻi ʻi he moʻuí ʻa ia ʻoku tukufakaholo anga-maheni mei he toʻutangata ʻe taha ki he toʻutangata ʻe tahá.”

Ko e Polokalama Meʻakai ʻa e Māmaní ʻoku pouaki ai ha sitepu kamata ʻa ia ʻoku fakataumuʻa ke ʻoatu ai ʻo ʻikai siʻi hifo ʻi ha houa kai ʻe taha ʻi he ʻaho ki he ngaahi ʻapiakó. Ko e foʻi fakakaukaú ʻoku ʻikai ngata pē ke fakasiʻisiʻi ai ʻa e fiekaiá kae pehē foki ke ʻai ke longomoʻui fakafou ʻi he ako tuʻumaʻú ʻa e ngaahi polokalama kehe kuo faʻufaʻu ke taʻofiʻaki ʻa e HIV/ʻeitisí ʻi he haʻohaʻonga ʻo e fānau tupú.

ʻI he ngaahi feituʻu kuo fakahoko ai ʻa e ʻuluaki sitepú, kuo maʻu ai ʻe he fānaú ʻa e meʻakai, akoʻi ki he haisini fakafoʻituituí pea mo e tokoni kehe. Kuo toe fakatokangaʻi foki ko e feituʻu ko ia ʻoku liliu ai ʻa e tōʻongá, ʻoku hōloa ai ʻa e tuʻunga ʻo e mahaki HIV/ʻeitisí.

Ko e meʻa fakamamahí, he ko e ngaahi ola ʻo e ngaahi feinga fakaetangatá ʻoku faʻa filifilimānako pē ia ʻo ʻikai pau. Ka ʻoku ʻomai ʻe he Tohi Tapú ha talaʻofa fakafiemālie fekauʻaki mo ha fakaleleiʻanga tuʻuloa ki he palopalema ʻo e fiekaiá. “Ke mafola mai ʻa e koane ʻi he fonua,” ko e lau ia ʻa e Sāme 72:16. ʻI he malumalu ʻo e Puleʻanga ʻo e ʻOtuá, ʻe malava ai ʻa e kakaí ke nau lea fekauʻaki mo Sihova ko e ʻOtuá: “Kuo ke aʻahi ʻa e fonua, ʻoku ke ʻai ke fonu mahua; . . . ʻoku ke teu ʻenau uite, hoʻo teu pehe ʻa e kelekele.”—Sāme 65:9.

[Maʻuʻanga ʻo e Tā ʻi he peesi 32]

WFP/Y. Yuge