Maluʻi Hotau Tuʻunga ko e Kalisitiané

“Ko kimoutolu ʻa e kau fakamoʻoni aʻaku​—ko Sihova ia.”​—AISEA 43:10.

 1. Ko e hā ʻa e faʻahinga kakai ʻoku tohoakiʻi ʻe Sihova kiate iá?

 ʻI HOʻO ʻi ha Fale Fakatahaʻanga, sio fakalelei takatakai holo ʻiate koe. Ko hai ʻokú ke sio ki ai ʻi he feituʻu faiʻanga lotu ko ʻení? Te ke sio nai ai ki ha toʻutupu loto-moʻoni ʻoku nau puke tokanga ʻa e poto Fakatohitapú. (Sāme 148:​12, 13) Ngalingali, te ke toe fakatokangaʻi ai ha ngaahi ʻuluʻi fāmili ʻoku nau feinga ke fakahōifuaʻi ʻa e ʻOtuá lolotonga ʻa e moʻui ʻi ha māmani ʻokú ne ʻai ke tōlalo ʻa e moʻui fakafāmilí. Mahalo te ke fakatokangaʻi siʻa kau taʻumotuʻa ʻoku tuʻumaʻu ki heʻenau fakatapui kia Sihová, neongo ʻa e ngaahi haʻahaʻa ʻo e taʻumotuʻá. (Palovepi 16:31) Ko e faʻahinga ʻoku nau ʻofa loloto kotoa kia Sihova. Pea naʻá ne vakai ʻoku taau ke tohoakiʻi mai kinautolu ki ha vahaʻangatae mo ia. “ʻOku ʻikai lava ʻe ha taha ke haʻu kiate au,” ko e fakapapauʻi mai ia ʻe he ʻAlo ʻo e ʻOtuá, “ka ʻi he tohoaki ia ʻe he Tamai naʻa ne fekau mai au.”​—Sione 6:​37, 44, 65.

2, 3. Ko e hā ʻoku lava ai ke hoko ʻo faingataʻa ke tauhi maʻu ha ongoʻi mālohi ʻo e tuʻunga ko e Kalisitiané?

² ʻIkai ʻoku tau fiefia ke hoko ko e konga ʻo ha kakai ʻoku nau maʻu ʻa e hōifua mo e tāpuaki ʻa Sihová? Neongo ia, ko hono tauhi maʻu ha ongoʻi mālohi ʻo hotau tuʻunga ko e kau Kalisitiané ʻi he “taimi faingataʻa” ko ʻení ko ha pole ia. (2 Timote 3:1) ʻOku moʻoni ʻeni tautefito ki he fānau ko ia ʻoku tauhi hake ʻi he ngaahi fāmili Kalisitiané. “Neongo naʻá ku maʻu ʻa e ngaahi fakataha faka-Kalisitiané,” ko e lea moʻoni ia ʻa ha talavou pehē ʻe taha, “naʻe ʻikai haʻaku ngaahi taumuʻa fakalaumālie mahino ia ʻaʻaku, pea ke lea hangatonu, naʻe ʻikai ha holi papau ke tauhi ʻa Sihova.”

 ³ Ko e niʻihi, neongo ʻa e holi loto-moʻoni ke tauhi ʻa Sihová, ʻoku afeʻi nai kinautolu ʻe he tenge mālohi ʻa e toʻumeʻá, ngaahi tākiekina fakamāmaní, mo e ngaahi hehema angahalaʻiá. ʻI he taimi ʻoku tenge ai kitautolú, ʻe faai atu pē nai ʻo ne fakatupunga ke mole ʻa hotau tuʻunga ko e Kalisitiané. Ko e fakatātaá, ko e tokolahi ʻi he māmaní he ʻahó ni ʻoku nau vakai ki he ngaahi tuʻunga ʻa e Tohi Tapú ki he ʻulungāanga tāú ko ha ākenga-motuʻa ia pe taʻefeʻunga ʻi hotau māmani ʻi onopōní. (1 Pita 4:4) ʻOku ongoʻi ʻe he faʻahinga ia ʻoku ʻikai mātuʻaki mahuʻinga ke lotu ki he ʻOtuá ʻi he founga ko ia ʻokú ne fakahinohino maí. (Sione 4:24) ʻI heʻene tohi ki he kau ʻEfesoó, ʻoku lea ai ʻa Paula ʻo kau ki he māmaní ʻokú ne maʻu ha “laumalie,” pe ko ha fakakaukau tākiekina mālohi. (Efeso 2:2) Ko e laumālie ko iá ʻokú ne tenge ʻa e kakaí ke nau fakatatau ki he fakakaukau ʻa ha sōsaieti ʻoku ʻikai te nau ʻiloʻi ʻa Sihova.

 4. Naʻe anga-fēfē hono fakamamafaʻi ʻe Sīsū ʻa e fiemaʻu kiate kitautolu ke maluʻi hotau tuʻunga mahino ko e kau Kalisitiané?

⁴ Kae kehe, ʻi he tuʻunga ko e kau sevāniti ʻosi fakatapui ʻa Sihová, ʻoku tau ʻiloʻi ʻe hoko ko e meʻa fakamamahi ki ha taha ʻo kitautolu​—kei siʻi pe taʻumotuʻa—​ke mole hotau tuʻunga ko e Kalisitiané. Ko ha vakai totonu ki he tuʻunga ko e Kalisitiané ʻoku malava ke fakatuʻunga pē ia ʻi he ngaahi tuʻunga ʻa Sihová mo e ngaahi meʻa ʻokú ne ʻamanekina meiate kitautolú. He ko ē, naʻe fakatupu kitautolu ʻi hono ʻīmisí. (Senesi 1:26; Maika 6:8) ʻOku fakatatau ʻe he Tohi Tapú hotau tuʻunga mahino ko e kau Kalisitiané ki he ngaahi kofu tuʻá, ʻa ia ʻoku tui ʻo sio mai ki ai ʻa e tokotaha kotoa. ʻI he fekauʻaki mo hotau taimí, naʻe fakatokanga ʻa Sīsū: “Vakai ʻoku ou ʻalu atu hangē ha kaihaʻa. Monuʻiaā ka ko ia ʻoku ʻā ʻo leʻo, pea ʻoku tauhi hono ngaahi kofu [tuʻá]; telia naʻa ne laka telefua, pea nau mamata ki hono maʻanga.” a (Fakahā 16:15) ʻOku ʻikai te tau loto ke toʻo atu hotau ngaahi ʻulungāanga faka-Kalisitiané mo e ngaahi tuʻunga ʻo e ʻulungāangá pea fakaʻatā ʻa e māmani ʻo Sētané ke ne fakafuo kitautolu. Kapau ʻe hoko ha meʻa pehē, ʻe mole ai hotau “ngaahi kofu [tuʻa]” ko ʻení. Ko ha tuʻunga pehē ʻe hoko ia ko e meʻa pango mo fakamā.

5, 6. Ko e hā ʻoku mātuʻaki mahuʻinga ai ʻa e tuʻu maʻu fakalaumālié?

⁵ Ko ha ongoʻi mālohi ʻo e tuʻunga ko e Kalisitiané ʻoku kaunga lahi ia ki he anga ʻo ʻete moʻuí. ʻO anga-fēfē? Kapau ʻe mole mei ha tokotaha lotu ʻa Sihova ʻene ongoʻi māʻalaʻala hono tuʻungá, te ne iku nai ai ki he ʻalunga pe ngaahi taumuʻa ʻoku ʻikai huʻufataha mo ʻikai mahino. ʻOku toutou fakatokanga mai ʻa e Tohi Tapú ki ha tuʻunga veiveiua pehē. “Ko ia ʻoku talaʻa,” ko e fakatokanga ia ʻa e ākonga ko Sēmisí, “ʻoku ne hange ko e peau ʻo e tahi ʻoku fakateka ʻo fepaleʻekina ʻe he matangi. ʻIo, ke ʻoua naʻa mahalo ʻe he tangata ko ia te ne maʻu ha meʻa mei he ʻEiki. Ko e tangata lotolotoua ia, taʻemāu ʻene anga kotoa pe.”​—Semisi 1:​6-8; Efeso 4:14; Hepelu 13:9.

⁶ ʻE malava fēfē ke tau maluʻi hotau tuʻunga ko e Kalisitiané? Ko e hā ʻe lava ke ne tokoniʻi kitautolu ke tau fakalahi ʻetau tokanga ki hotau monū lahi ʻo e hoko ko e kau lotu ʻa e Fungani Māʻolungá? Kātaki ʻo fakakaukau ange ki he ngaahi founga ko ʻení.

Fokotuʻu Maʻu Ho Tuʻunga ko e Kalisitiané

 7. Ko e hā ʻoku ʻaonga ai ke kole kia Sihova ke ne sivisiviʻi kitautolú?

⁷ Hokohoko fakapapauʻi ho vahaʻangatae mo Sihová. Ko e koloa mahuʻinga taha ʻoku maʻu ʻe ha Kalisitiane ko hono vahaʻangatae fakafoʻituitui mo e ʻOtuá. (Sāme 25:14; Palovepi 3:32) Kapau  ʻoku kamata ke tau maʻu ha ngaahi fehuʻi fakahohaʻa fekauʻaki mo hotau tuʻunga ko e Kalisitiané, kuo taimi leva ke sivisiviʻi lelei ʻa e tuʻunga mo e loloto ʻo e vahaʻangatae ko ʻení. Naʻe kole feʻungamālie ʻa e tokotaha-tohi-sāmé: “Fisifisi au, ʻEiki [Sihova], pea ke fakaʻata au; sivi ʻaki ʻa e afi hoku kofuua, mo hoku mafu.” (Sāme 26:2) Ko e hā ʻoku mātuʻaki mahuʻinga ai ha sivisiviʻi peheé? Koeʻuhi ko kitautolu tonu ʻoku ʻikai malava ke tau hoko ko ha kau fakamaau alafalalaʻanga ki heʻetau ngaahi taumuʻa loloto tahá mo ʻetau ngaahi hehema taupotu ʻi lotó. Ko Sihova pē ʻoku malava ke ne mahinoʻi hotau tangata ʻi lotó​—ʻetau ngaahi fakaueʻilotó, ngaahi fakakaukaú mo e ngaahi ongoʻí.​—Selemaia 17:​9, 10.

 8. (a) ʻOku anga-fēfē malava ke ʻaonga kiate kitautolu ʻa hono ʻahiʻahiʻi ʻe Sihová? (e) Kuo tokoniʻi fēfē koe ke ke fakalakalaka ʻi he tuʻunga ko ha Kalisitiané?

⁸ ʻI he kole kia Sihova ke ne sivisiviʻi kitautolú, ʻoku tau fakaafeʻi ai ia ke ne ʻahiʻahiʻi kitautolu. Te ne fakaʻatā nai ha ngaahi tuʻunga ke tupulekina ke fakahaaʻi ai ʻetau ngaahi fakaueʻiloto moʻoní mo e tuʻunga ʻo hotau lotó. (Hepelu 4:​12, 13; Semisi 1:​22-25) ʻOku totonu ke tau tali lelei ʻa e ngaahi ʻahiʻahi peheé koeʻuhi ʻoku nau ʻomai kiate kitautolu ha faingamālie ke fakahāhaaʻi ai ʻa e loloto ʻo ʻetau mateaki kia Sihová. ʻOku malava ʻi he ngaahi ʻahiʻahi peheé ke fakahāhaaʻi ai pe ʻoku tau “tuʻu kakato, ʻo taʻe masiva ʻi ha meʻa.” (Semisi 1:2-4) Pea ʻi he lolotonga ʻa e ʻahiʻahi ko iá, ʻoku malava ke tau tupu fakalaumālie ai.​—Efeso 4:​22-24.

 9. Ko ha meʻa faʻiteliha pē ʻa hono fakamoʻoniʻi kiate kitautolu tonu ʻa e moʻoni ʻa e Tohi Tapú? Fakamatalaʻi.

⁹ Fakamoʻoniʻi kiate koe ʻa e moʻoni ʻa e Tohi Tapú. ʻE malava ke vaivai ʻa ʻetau ongoʻi hotau tuʻunga ko e kau sevāniti ʻa Sihová kapau ʻoku ʻikai ke makatuʻunga fefeka ia ʻi he ʻilo ki he Tohi Tapú. (Filipai 1:9, 10) Ko e Kalisitiane kotoa pē​—kei siʻi pe taʻumotuʻa—​ʻoku fiemaʻu ke ne fakamoʻoniʻi ki heʻene fiemālie ʻaʻaná tonu ko e meʻa ʻokú ne tui ki aí ʻoku moʻoni, ko e moʻoni ia ʻoku maʻu ʻi he Tohi Tapú. Naʻe enginaki ʻa Paula ki he kaungātuí: “Ahiahiʻi ae gaahi mea kotoabe; buke ke mau aia oku lelei.” (1 Tesalonaika 5:21, PM) Ko e kau Kalisitiane kei iiki ʻoku nau kau ki he ngaahi fāmili manavahē-ʻOtuá kuo pau ke nau ʻiloʻi heʻikai malava ke nau moʻui pē ʻi he tui ʻa ʻenau ngaahi mātuʻá. Ko e tamai tonu ʻa Solomoné, ʻa Tēvita, naʻá ne enginaki kiate ia ke ne “ʻilo ʻa e ʻOtua ʻo ho tupuʻanga; pea ke tauhi ki ai ʻaki ʻa e loto haohaoa.” (Fakaʻītali ʻamautolu; 1 Kalonikali 28:9) Heʻikai feʻunga pē kia Solomone heʻene kei siʻí ke sio ki he anga hono langa hake ʻe heʻene tamaí tonu ʻa e tui kia Sihová. Naʻe pau ke ne feinga ke ʻilo ʻe ia tonu kia Sihova, pea naʻá ne fai ia. Naʻá ne kole fakamātoato ki he ʻOtuá: “Ke ke foaki mai ha poto mo ha mohu fakakaukau, ke u mafai ke ʻalu atu mo hū mai ʻi he ʻao ʻo e kakai ni.”​—2 Kalonikali 1:10.

10. Ko e hā ʻoku ʻikai hala ai ke ʻeke ha ngaahi fehuʻi faitotonu ʻi he fakaueʻiloto totonú?

¹⁰ ʻOku langa ʻa e tui mālohí ʻi he ʻilo. “ʻOku tupu ʻa e tui mei he fanongo,” ko e fakahā ia ʻe Paulá. (Loma 10: 17) Ko e hā naʻá ne ʻuhinga ki aí? Naʻá ne ʻuhingá ʻi he kai mei he Folofola ʻa e ʻOtuá, ʻoku tau langa ai ʻa e tui mo e falala kia Sihova, ki heʻene ngaahi talaʻofá pea mo ʻene kautahá. Ko hono ʻeke ha ngaahi fehuʻi faitotonu fekauʻaki mo e Tohi Tapú ʻoku lava ke taki atu ia ki he ngaahi tali fakafiemālie. ʻIkai ngata aí, ʻi he Loma 12:​2, ʻoku tau maʻu ai ʻa e faleʻi ʻa Paula: “Mou sivi ʻo ʻilo pe ko e ha ʻa e finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai, ʻa e meʻa ʻoku haohaoa.” ʻE lava fēfē ke tau lavaʻi ia? ʻAki hono maʻu ʻa e “ʻilo kanokano ki he moʻoni.” (Taitusi 1:​2, [1:1, PM]) ʻOku malava ʻe he laumālie ʻo Sihová ke ne tokoniʻi kitautolu ke tau mahinoʻi naʻa mo e ngaahi tuʻunga-lea faingataʻá. (1 Kolinito 2:11, 12) ʻOku totonu ke tau lotu ʻo kole ʻa e tokoni ʻa e ʻOtuá ʻi he taimi ʻoku tau palopalemaʻia ai ʻi hono mahinoʻi ha meʻa. (Sāme 119:10, 11, 27) ʻOku fiemaʻu mai ʻe Sihova kitautolu ke tau mahinoʻi ʻene Folofolá, tui ki ai, pea talangofua ki ai. ʻOkú ne tali lelei ʻa e ngaahi fehuʻi faitotonu ʻoku ʻeke ʻi he fakaueʻiloto totonú.

Fakapapauʻi ke Fakahōifuaʻi ʻa e ʻOtuá

11. (a) Ko e hā ʻa e holi fakanatula ʻoku malava ke ne tauheleʻi kitautolú? (e) ʻE lava fēfē ke tau langaʻi ʻa e loto-toʻa ke matuʻuaki ʻa e tenge mei he toʻumeʻá?

¹¹ Feinga ke fakahōifuaʻi ʻa e ʻOtuá, ʻikai ko e tangatá. ʻOku fakaenatula pē ke tala hotau tuʻungá ʻi ha faʻahinga tuʻunga ʻaki ʻetau kau ki ha kulupu. ʻOku fiemaʻu ki he tokotaha kotoa ha ngaahi kaumeʻa, pea ʻi he fakakau atu ki aí ʻoku ʻai ai kitautolu ke tau ongoʻi lelei. ʻI he lolotonga ʻo e kei talavoú​—pea pehē ki he konga ki mui ʻo e moʻuí—​ʻoku malava ke hoko ʻo mālohi ʻa e tenge ʻa e toʻumeʻá, ʻo fakatupunga ai ha holi vavale ke faʻifaʻitaki pe fakafiemālieʻi ʻa e niʻihi kehé. Ka ʻoku ʻikai maʻu pē ke ʻi he loto ʻo hotau ngaahi kaumeʻá mo e ngaahi toʻumeʻá ʻa e ngaahi meʻa ʻoku lelei taha kiate kitautolú. ʻI he taimi ʻe niʻihi ko ʻenau fiemaʻu pē ʻe  kinautolu ha kaungā kau ʻi hono fai ʻa e meʻa ʻoku halá. (Palovepi 1:​11-19) ʻI he tō ʻa ha Kalisitiane ki he tenge kovi mei he toʻumeʻá, ʻokú ne faʻa feinga ke fufū hono tuʻungá. (Sāme 26:4) “ʻOua naʻa mou tuku ke fakaangatatau kimoutolu ki he maama ko eni,” ko e fakatokanga ia ʻa e ʻapositolo ko Paulá. (Loma 12:2) ʻOku tokonaki mai ʻe Sihova ʻa e mālohi ʻi loto ʻoku tau fiemaʻú koeʻuhi ke tau tauʻi ʻaki ha tenge pē mei tuʻa ke fakaangatatau ange ki ai.​—Hepelu 13:6.

12. Ko e hā ʻa e tefitoʻi moʻoni mo e faʻifaʻitakiʻanga ʻe lava ke na fakaivimālohiʻi kitautolu ke tau tuʻu maʻu ʻi he fekauʻaki mo ʻetau falala ki he ʻOtuá?

¹² ʻI he taimi ʻoku fakamanamana mai ai ha tenge mei tuʻa ke ne maumauʻi ʻetau ongoʻi hotau tuʻunga ko e Kalisitiané, ʻoku lelei ke manatuʻi ko ʻetau mateaki ki he ʻOtuá ʻoku mahuʻinga mamaʻo ange ia ʻi he fakakaukau ʻa e kakaí pe ngaahi ngaʻunu ʻa e tokolahí. ʻOku hoko ʻa e ngaahi lea ʻo e Ekisoto 23:2 ko ha tefitoʻi moʻoni malu: “Neongo ko ha tokolahi, ʻoua naʻa ke ō mo kinautolu ke fai ha kovi.” ʻI he taimi naʻe veiveiua ai ʻa e tokolahi taha ʻo e kaungā ʻIsilelí ki he malava ʻa Sihova ke fakahoko ʻEne ngaahi talaʻofá, naʻe fakafisi mālohi ʻa Kēlepi ke ngaʻunu fakataha mo e tokolahí. Naʻá ne fakapapauʻi naʻe ala falalaʻanga ʻa e ngaahi talaʻofa ʻa e ʻOtuá, pea naʻe fakapaleʻi lahi ia ʻi heʻene tuʻu maʻú. (Nomipa 13:30; Siosiua 14:6-11) ʻOkú ke loto-lelei meimei tatau ke talitekeʻi ʻa e tenge ʻa e fakakaukau manakoá koeʻuhi ke maluʻi ho vahaʻangatae mo e ʻOtuá?

13. Ko e hā ko ha ʻalunga fakapotopoto ai ke ʻai ke ʻiloa hotau tuʻunga ko e kau Kalisitiané?

¹³ ʻAi ke ʻiloa ho tuʻunga ko e Kalisitiané. ʻOku moʻoni ʻa e pehē ko ia ko e maluʻi lelei tahá ko e tamuʻomuʻa ke pouaki hotau tuʻunga ko e Kalisitiané. ʻI he fetaulaki mo e fakafepaki ki heʻenau ngaahi feinga ke fai ʻa e finangalo ʻo Sihová ʻi he ngaahi ʻaho ʻo ʻĒselá, naʻe fakahā ʻe he kau ʻIsileli faitōnungá: “Ko kimautolu ko e kau tamaioʻeiki ʻo e ʻOtua ʻo langi mo mamani.” (Esela 5:11) Kapau ʻoku uesia kitautolu ʻe he ngaahi tali mo e fakaanga ʻa e kakai fakafilí, ʻe lava ke hoko ʻo fakavaivaiʻi kitautolu ʻe he ilifiá. Ko e founga ko ia ʻo e feinga ke fakafiemālieʻi ʻa e tokotaha kotoa peé te ne fakavaivaiʻi ʻe ia hotau tuʻunga ola leleí. Ko ia, ʻoua ʻe hoko ʻo loto-siʻí. ʻOku lelei maʻu pē ke ʻai ke ʻiloʻi lelei ʻe he niʻihi kehé ko e taha koe ʻo e Kau Fakamoʻoni ʻa Sihová. ʻI ha founga fakaʻapaʻapa kae tuʻumaʻu, ʻe lava ke ke fakamatalaʻi ki he niʻihi kehé ʻa e ngaahi meʻa ʻokú ke fakamahuʻingaʻí, ʻa hoʻo ngaahi tuí, pea mo ho tuʻunga ko ha Kalisitiané. ʻAi ke ʻilo ʻe he niʻihi kehé kuó ke fakapapau ke tauhi maʻu ʻa e ngaahi tuʻunga māʻolunga ʻa Sihova ʻi he ngaahi ʻīsiu fekauʻaki mo e ʻulungāanga tāú. ʻAi ke mahino ko hoʻo anga-tonu faka-Kalisitiané heʻikai ala fakangaloku. Fakahaaʻi ʻokú ke laukauʻaki ho ngaahi tuʻunga fakaeʻulungāangá. (Sāme 64:10) Ko e tuʻu ʻo hā mahino atu ko ha Kalisitiane tuʻumaʻú ʻe lava ke ne fakaivimālohiʻi koe, maluʻi koe pea aʻu ʻo ueʻi ai ʻa e niʻihi ke nau fehufehuʻi fekauʻaki mo Sihova mo ʻene kakaí.

14. ʻOku totonu ke hanga ʻe he manukí pe fakafepakí ʻo fakalotosiʻiʻi kitautolu? Fakamatalaʻi.

¹⁴ ʻIo, ʻe manukiʻi nai pe fakafepakiʻi koe ʻe he niʻihi. (Siutasi 18) Kapau ʻoku ʻikai fai mai ʻe he niʻihi kehé ha tali lelei ki hoʻo ngaahi feinga ke fakamatalaʻi kiate kinautolu ʻa e ngaahi meʻa ʻokú ke fakamahuʻingaʻí, ʻoua ʻe loto-siʻi. (Isikeli 3:​7, 8) Tatau ai pē pe ʻoku lahi fēfē ʻa hoʻo fakapapauʻí, heʻikai ʻaupito te ke fakatuipauʻi ʻe koe ʻa e kakai ʻoku ʻikai haʻanau holi ke tuipaú. Manatuʻi ʻa Felo. Naʻe ʻikai ha mala pe mana​—naʻa mo e mole ʻa hono ʻuluaki fohá—​naʻe malava ke ne fakalotoʻi  kia Felo ko Mōsesé naʻe lea maʻa Sihova. Ko ia ai, ʻoua ʻe fakaʻatā ʻa e manavahē tangatá ke ne fakavaivaiʻi koé. ʻE malava ʻe he falala mo e tui ki he ʻOtuá ʻo tokoniʻi kitautolu ke tau ikuʻi ʻa e manavaheé.​—Palovepi 3:​5, 6; 29:25.

Ako mei he Kuohilí, Langa Maʻá e Kahaʻú

15, 16. (a) Ko e hā hotau tofiʻa fakalaumālié? (e) ʻE lava fēfē ke tau maʻu ʻaonga mei he fakakaukauloto atu ki hotau tofiʻa fakalaumālié ʻi he fakamaama ʻa e Folofola ʻa e ʻOtuá?

¹⁵ Koloaʻaki ho tofiʻa fakalaumālié. ʻI he fakamaama ʻa e Folofola ʻa e ʻOtuá, ʻe maʻu ʻaonga ai ʻa e kau Kalisitiané mei he fakakaukauloto atu ki honau tofiʻa fakalaumālie fakakoloá. Ko e tofiʻá ni ʻoku kau ki ai ʻa e moʻoni ʻo e Folofola ʻa Sihová, ko e ʻamanaki ʻo e moʻui taʻengatá, pea mo e lāngilangi ke fakafofongaʻi ʻa e ʻOtuá ʻi he tuʻunga ko e kau fanongonongo ʻo e ongoongo leleí. ʻE lava ke ke sio kiate koe tonu ʻi he lotolotonga ʻo ʻene Kau Fakamoʻoní, ʻi he kulupu ʻo e kakai monūʻia ko ia kuo fekauʻi atu mo e ngāue fakahaofi-moʻui ko hono malangaʻi ʻo e Puleʻangá? Manatuʻi, ʻoku ʻikai ko ha toe taha kehe ka ko Sihova ʻokú ne fakapapauʻi mai: “Ko kimoutolu ʻa e kau fakamoʻoni aʻaku.”​—Aisea 43:10.

¹⁶ ʻE lava ke ke ʻeke hifo kiate koe ʻa e ngaahi fehuʻi hangē ko ʻení: ‘ʻOku mahuʻinga fēfē kiate au ʻa e tofiʻa fakalaumālie ko ʻení? ʻOku ou fakamahuʻingaʻi feʻunga ia ke ʻai ʻa hono fai ʻa e finangalo ʻo e ʻOtuá ko e meʻa muʻomuʻa taha ia ʻi heʻeku moʻuí? ʻOku mālohi feʻunga ʻeku houngaʻia aí ke ne fakaivimālohiʻi au ke u talitekeʻi ha faʻahinga fakatauele pē ʻe iku atu nai ki haʻaku fakamoleki ia?’ ʻOku toe malava ke fakahūhū mai ʻe hotau tofiʻa fakalaumālié kiate kitautolu ha ongoʻi loloto ʻo e malu fakalaumālie ʻa ia ʻe lava ke maʻu pē ʻe he  faʻahinga ʻoku ʻi loto ʻi he kautaha ʻa Sihová. (Sāme 91:​1, 2) Ko e toe vakai ki he ngaahi meʻa fakaofo mei he hisitōlia ʻi onopooni ʻo e kautaha ʻa Sihová ʻoku malava ke ne ʻai ke maongo kiate kitautolu heʻikai ha taha pe ko ha meʻa ʻe lava ke ne toʻo ʻosi ʻa e kakai ʻa Sihová mei he funga māmaní.​—Aisea 54:17; Selemaia 1:19.

17. Ko e hā ʻa e meʻa lahi ange ʻoku fiemaʻú ʻo ʻikai ko e fakafalala pē ki hotau tofiʻa fakalaumālié?

¹⁷ Ko hono moʻoní, heʻikai malava ke tau fakafalala ʻataʻatā pē ki hotau tofiʻa fakalaumālié. Ko kitautolu taki taha kuo pau ke tau fakatupulekina ha vahaʻangatae fekoekoeʻi mo e ʻOtuá. ʻI he hili ʻa e ngāue mālohi ʻa Paula ke langa hake ʻa e tui ʻa e kau Kalisitiane ʻi Filipaí, naʻá ne tohi kiate kinautolu: “Pea ko eni, siʻoku ʻofaʻanga, kuo mou fai talangofua ai pe, ko ia ʻoua te mou ngaue ʻo hange ko ha meʻa ia ke fai ʻi hoku ʻao pe, ka ke fakautuutu ʻaupito ʻi heʻeku mamaʻo ni hoʻomou ngaue ke lavaʻi homou fakamoʻui ʻomoutolu, ʻo fai ʻapasia pe mo tailiili.” (Filipai 2:12) ʻOku ʻikai malava ke tau fakafalala ki ha toe taha kehe ki hotau fakamoʻuí.

18. ʻOku lava fēfē ke fakaleleiʻi ʻe he ngaahi ngāue faka-Kalisitiané ʻetau ongoʻi ʻa hotau tuʻunga ko e Kalisitiané?

¹⁸ Fakafemoʻuekinaʻi koe ʻi he ngaahi ngāue faka-Kalisitiané. Kuo fakatokangaʻi ko e “ngāué kuo hoko ko ha tākiekina mālohi ʻo e tuʻunga fakafoʻituituí.” Ko e kau Kalisitiane ʻi he ʻaho ní kuo fekauʻi ke nau fai ʻa e ngāue mātuʻaki mahuʻinga ko hono malangaʻi ʻa e ongoongo lelei ʻo e Puleʻanga ʻo e ʻOtuá kuo fokotuʻú. Naʻe fanongonongo ʻe Paula: “He koe abosetolo au oe kakai Jenitaile, bea oku ou fakaogolelei a eku gaue [fakafaifekaú].” (Loma 11:​13, PM) ʻOku hanga ʻe heʻetau ngāue fakamalangá ʻo fakafaikehekeheʻi kitautolu mei he māmaní, pea ko ʻetau kau ki aí ʻoku fakaleleiʻi ai hotau tuʻunga ko e Kalisitiané. Ko hono fakafemoʻuekinaʻi kitautolu ʻi he ngaahi ngāue fakateokalati kehé, hangē ko e ngaahi fakataha faka-Kalisitiané, ngaahi polokalama ki he langa ʻo e ngaahi feituʻu faiʻanga lotú, ngaahi feinga ke tokoniʻi ʻa e faʻahinga ʻoku faingataʻaʻiá mo e ngaahi alā meʻa peheé, ʻoku malava ke ne fakaloloto ʻetau ongoʻi ʻa hotau tuʻunga ko e kau Kalisitiané.​—Kaletia 6:​9, 10; Hepelu 10:​23, 24.

Tuʻunga Mahino, Ngaahi Tāpuaki Moʻoni

19, 20. (a) Ko e hā ʻa e ngaahi ʻaonga kuó ke maʻu fakafoʻituitui ʻi he hoko ko ha Kalisitiané? (e) Ko e hā ʻokú ne ʻomai kiate kitautolu ʻa e makatuʻunga ki hotau tuʻunga moʻoní?

¹⁹ Fakakaukau ange ʻi ha mōmeniti ki he ngaahi ʻaonga mo e ngaahi lelei lahi ʻoku tau maʻu koeʻuhi ko e kau Kalisitiane moʻoni kitautolú. ʻOku tau maʻu ʻa e monū ʻo e hoko ʻo ʻiloʻi fakafoʻituitui ʻe Sihova. Naʻe pehē ʻe he palōfita ko Malakaí: “Toki fealeleaʻaki ʻa kinautolu naʻe ʻapasia kia Sihova: pea naʻe tokanga ki ai ʻa Sihova, ʻo ne fakafanongo, pea naʻe fai ʻa e tohi fakamanatu ke feʻao mo ia, koeʻuhi ko e kakai ʻoku ʻapasia kia Sihova, mo tokaʻi hono huafa.” (Malakai 3:16) ʻOku malava ke vakai mai ʻa e ʻOtuá kiate kitautolu ko hono ngaahi kaumeʻa. (Semisi 2:23) ʻOku teuʻi ʻetau moʻuí ʻaki ha ongoʻi mahino ʻo e taumuʻa, ʻaki ʻa e ʻuhinga loloto pea ʻaki ʻa e ngaahi taumuʻa lelei mo fua lahi. Pea kuo ʻomai kiate kitautolu ʻa e ʻamanaki ʻo ha kahaʻu taʻengata.​—Sāme 37:9.

²⁰ Manatuʻi ko ho tuʻunga mo ho mahuʻinga moʻoní ʻoku fakatuʻunga ia ʻi hono fakafuofuaʻi ʻe he ʻOtuá ho mahuʻingá, ʻikai ʻi he meʻa ʻoku fakakaukau mai ʻaki nai ʻe he kakai kehé kiate koé. ʻOku fakamāuʻi nai kitautolu ʻe he niʻihi kehé ʻo fakatatau ki he ngaahi tuʻunga taʻefeʻunga fakaetangatá. Ka ʻoku hanga ʻe he ʻofa mo e mahuʻingaʻia fakafoʻituitui ʻa e ʻOtuá ʻo ʻomai kiate kitautolu ʻa e makatuʻunga moʻoni ki hotau mahuʻingá​—ʻoku ʻaʻana kitautolu. (Mātiu 10:​29-31) Ko ia ai, ko ʻetau ʻofa ʻatautolu tonu ki he ʻOtuá ʻoku malava ke ne tokonaki mai kiate kitautolu ʻa e ongoʻi lahi taha ʻo hotau tuʻungá pea mo e tataki māʻalaʻala lahi taha ki heʻetau moʻuí. “ʻOka ʻofa ʻe ha taha ki he ʻOtua, ko e toko taha ia kuo ʻiloa ʻe he ʻOtua.”​—1 Kolinito 8:3.

[Fakamatala ʻi lalo]

ʻOkú Ke Manatuʻi?

• Ko e hā ʻoku mātuʻaki mahuʻinga ai ki he kau Kalisitiané ke nau maluʻi honau tuʻunga fakalaumālié?

• ʻE malava fēfē ke tau fokotuʻu maʻu hotau tuʻunga ko e Kalisitiané?

• ʻI he fehangahangai mo e fehuʻi pe ko hai ke tau fakafiemālieʻí, ko e hā ʻa e ngaahi moʻoniʻi meʻa ʻe lava ke ne tokoniʻi kitautolu ke fai ʻa e fili ʻoku totonú?

• ʻOku malava fēfē ke hanga ʻe ha ongoʻi mālohi hotau tuʻungá ʻo fakafuo hotau kahaʻu ʻi he tuʻunga ko e kau Kalisitiané?

[Fehuʻi ki he Ako]

[Fakatātā ʻi he peesi 21]

Ko hono fakafemoʻuekinaʻi kitautolu ʻi he ngaahi ngāue faka-Kalisitiané ʻoku malava ke ne fakaleleiʻi hotau tuʻunga ko e Kalisitiané