Ngaahi Maná—Moʻoni pe Loi?

NAʻE vave hono fakatokangaʻi ʻe ha matāpule ha sitika pamupā ʻo ha kā naʻe fakalaka hake, “ʻOku Hoko ʻa e Ngaahi Maná—Kole Pē ki he Kau ʻĀngeló.” Neongo ko ha tangata lotu ia, naʻe ʻikai te ne fakapapauʻi ʻa e ʻuhinga ʻo e leá ni. Naʻe ʻuhinga ʻa e fakaʻilongá naʻe tui ʻa e fakaʻulí ki he ngaahi maná? Pe ʻi hono kehé, ko ha founga fakaoli ia ʻo hono fakahaaʻi ʻa e ʻikai ha tui fakatouʻosi ki he ngaahi maná pea mo e kau ʻāngeló?

Te ke mahuʻingaʻia nai ʻi he meʻa naʻe fakahaaʻi ʻe ha faʻu-tohi Siamane ko Manfred Barthel: “Ko e maná ko ha foʻi lea ia ʻoku vave ʻene vahevaheʻi ʻa e kau lautohí ki he ongo ʻapitanga tau ʻe ua.” Ko e faʻahinga ʻoku nau tui ki he ngaahi maná ʻoku nau tuipau ʻoku hoko ia pea mahalo pē ʻoku toutou hoko. a Ko e fakatātaá, ʻoku līpooti ʻo pehē ʻi Kalisi lolotonga ʻa e ngaahi taʻu siʻi ki mui ní, kuo taukaveʻi ai ʻe he kau tuí ʻoku hoko ʻa e ngaahi maná ʻo tuʻo taha nai ʻi he māhina. Naʻe taki ai heni ha pīsope ʻo e Siasi ʻOfotokisī Kalisí ke ne fakatokanga: “ʻOku hehema ʻa e tokotaha tuí ke ʻai ko ha tangata ʻa e ʻOtuá, Mele pea mo e kau sangató. ʻOku ʻikai totonu ke fakalahiʻi ʻe he kau tuí ʻa e ngaahi meʻá.”

Ko e tui ki he ngaahi maná ʻoku siʻi ʻa ʻene mafolalahiá ʻi he ngaahi fonua kehe ʻe niʻihi. Fakatatau ki he savea ʻi Allensbach naʻe pulusi ʻi Siamane ʻi he 2002, ko e peseti ʻe 71 ʻo hono kau tangataʻifonuá ʻoku nau vakai ki he ngaahi maná ko ha loi, ʻo ʻikai ko ha meʻa moʻoni. Kae kehe, ʻoku ʻi he haʻohaʻonga ʻo e tokosiʻi hifo ʻi he vahe tolu ʻe tahá ʻa ia ʻoku nau tui ki he ngaahi maná ʻa e kakai fefine ʻe toko tolu ʻoku nau taukaveʻi naʻa nau maʻu ha pōpoaki mei he Tāupoʻou ko Melé. ʻI ha ngaahi māhina siʻi hili ʻa e pehē tokua naʻe hā ʻa Mele kia kinautolu​—ʻo fakafeʻao ʻe he kau ʻāngeló mo ha foʻi lupe—naʻe līpooti ai ʻi he nusipepa Siamane ko e Westfalenpost: “Mei he taimi ko iá ʻo aʻu mai ki he taimí ni ko e kau pilikimi ʻe toko 50,000 nai, ko e kakai ʻoku nau kumi ki ha faitoʻo, pea pehē ki he kau fieʻiló kuo nau fakahaaʻi ʻa e mahuʻingaʻia vēkeveke ʻi he ngaahi vīsone naʻe mamata ai ʻa e kau fefiné.” Naʻe ʻamanekina ke holo ki he koló ha toe toko 10,000 ke mamata ʻi ha toe ngaahi hā lahi ange. Ko e ngaahi hā meimei tatau ʻa e Tāupoʻou ko Melé ʻoku pehē tokua naʻe hoko ia ʻi Lourdes, Falanisē, ʻi he 1858, pea ʻi Fátima, Potukali, ʻi he 1917.

Fēfē ʻa e Ngaahi Lotu ʻIkai Faka-Kalisitiané?

Ko e tui ki he ngaahi maná ʻoku maʻu ia ʻi he meimei ngaahi lotú kotoa. ʻOku fakamatala ʻa e Encyclopedia of Religion ʻo pehē ko e kau fokotuʻu ʻo e Lotu Putá, lotu faka-Kalisitiané, mo e ʻIsilamí ʻoku nau maʻu ʻa e ngaahi fakakaukau kehekehe fekauʻaki mo e ngaahi maná, ka ʻoku fakamatala ai: “Ko e hisitōlia hoko atu ai ʻo e ngaahi lotú ni ʻoku fakahāhā taʻetoefehālaaki ai ko e ngaahi maná mo e ngaahi talanoa maná kuo hoko ko ha konga tefito ia ʻo e moʻui fakalotu ʻa e tangatá.” ʻOku pehē ʻe he tohi maʻuʻanga fakamatala ko ení “ko Puta tonu naʻe tataki ia he taimi ʻe niʻihi ke ne fakahoko ha ngaahi mana.” Ki mui ai, ʻi he taimi “naʻe hiki mai ai ʻa e lotu Putá ki Siainá, naʻe faʻa hanga ʻa hono kau misinalé ki he fakahāhā ʻo e ngaahi mālohi fakaemaná.”

Hili ʻa e lave ki he ngaahi meʻa ko ia ʻoku pehē tokua ko e ngaahi maná, ʻoku fakaʻosiʻaki ai ʻe he ʻenisaikolopētiá: “ʻOku ʻikai nai mateuteu ha taha ke ne tali ʻa e ngaahi talanoa mana kotoa ko eni naʻe talanoaʻi ʻe he kau faipiokālafi anga-fakalotú, ka  naʻe faʻu taʻetoeveiveiua kinautolu fakataha mo e taumuʻa lelei ko hono fakalāngilangiʻi ʻo Puta, ʻa ia naʻe malava ke ne foaki ki hono kau muimui faivelengá ʻa e ngaahi mālohi fakaemana peheé.” ʻOku pehē ʻe he maʻuʻanga fakamatala tatau fekauʻaki mo e ʻIsilamí: “Ko e lahi taha ʻo e feohiʻanga faka-ʻIsilamí kuo ʻikai ʻaupito tuku ʻa hono ʻamanekina ai ʻo e ngaahi maná. Ko Mahōmeti ʻoku fakahaaʻi ʻi he ngaahi talatukufakaholó (hadīths) naʻá ne fai ʻa e ngaahi mana ʻi he feituʻu kakaí ʻi he ngaahi taimi lahi. . . . Naʻa mo e hili ʻenau maté, ʻoku ʻi ai ʻa e tui ʻoku fai ʻe he kau sangató ʻa e ngaahi mana ʻi honau ngaahi fonualotó tonu maʻá e kau faitōnungá, pea ʻoku fai ʻa e kole anga-fakaʻapaʻapa ki heʻenau fakalaloá.”

Fēfē ʻa e Ngaahi Mana ʻi he Lotu Faka-Kalisitiané?

Ko e tokolahi ʻo e faʻahinga kuo nau tali ʻa e lotu faka-Kalisitiané ʻoku nau māvahevahe ʻi heʻenau ngaahi fakakaukaú. ʻOku tali ʻe he niʻihi ʻoku moʻoni ʻa e ngaahi fakamatala ʻa e Tohi Tapú fekauʻaki mo e ngaahi mana naʻe fakahoko ʻe Sīsū Kalaisi pe ko e kau sevāniti ʻa e ʻOtuá ʻi he ngaahi kuonga ki muʻa ʻi he Kalisitiané. Neongo ia, ʻoku loto-tatau ʻa e tokolahi mo e Fakalelei-Lotu Palotisani ko Mātini Lūteló. ʻOku pehē ʻe he Encyclopedia of Religion fekauʻaki mo ia: “Ko Lūtelo mo Kalaviní fakatouʻosi naʻá na tohi ʻo pehē naʻe ʻosi ʻa e kuonga ʻo e ngaahi maná pea ʻoku ʻikai totonu ke ʻamanekina ʻenau hokó.” ʻOku piki ʻa e Siasi Katoliká ki heʻene tui ki he ngaahi maná “ʻo ʻikai feinga ke taukapoʻi fakapoto ia,” ko e lau ia ʻa e tohi maʻuʻanga fakamatala ko ení. Kae kehe, “ko e feohiʻanga Palotisani potó naʻa nau hoko ʻo tui ko e tōʻongafai ʻo e lotu faka-Kalisitiané ʻi he tuʻunga lahi tahá ko ha meʻa fakaeʻulungāanga ia pea naʻe ʻikai fetuʻutaki pe tākiekina ʻe he ʻOtuá pe ko e māmani laumālié ʻa e moʻui fakaetangata moʻoní ki ha toe tuʻunga lahi ʻe taha.”

Ko e faʻahinga kehe ʻoku taku ko e kau Kalisitiané, ʻo kau ai ʻa e haʻa faifekau ʻe niʻihi, ʻoku nau veiveiua pe ʻoku moʻoni ʻa e ngaahi mana ʻoku lave ki ai ʻi he Tohi Tapú. Ko e fakatātaá, ko e fakamatala ki he fuʻu ʻakau-vela ʻi he Tohi Tapú ʻi he Ekisoto 3:​1-5. ʻOku fakamatala ʻi he tohi ko e What the Bible  Really Says ʻo pehē ʻoku ʻikai ha vakai ʻa e kau teolosia Siamane tokolahi ki he meʻá ni ko ha fakamatala moʻoni ia ʻo ha mana. ʻI hono kehé, ʻoku nau fakaʻuhingaʻi ia ko “ha fakatātā ʻo e fāinga ʻi loto ʻa Mōsese mo e ngaahi mahuhu mo e ngaahi tā fakamamahi ʻa e konisēnisí.” ʻOku tānaki mai ʻe he tohí: “Ko e uló ʻoku toe lava ke vakai ki ai ko e ngaahi matalaʻiʻakau ʻa ia ʻoku matala fakafokifā hake ʻi he maama ʻo e laʻaá ʻi he ʻi ai ʻa e ʻOtuá.”

Te ke ʻiloʻi nai ʻoku ʻikai loko fakafiemālie ʻa e fakamatala peheé. Ko ia, ko e hā ʻoku totonu ke ke tui ki aí? ʻOku totonu ke tui naʻe hoko ʻi ha taimi ha ngaahi mana? Pea fēfē ʻa e ngaahi mana ʻi onopōní? Koeʻuhi ʻe ʻikai lava ke tau ʻeke ki he kau ʻāngeló, ko hai ʻe lava ke tau ʻeke ki aí?

Ko e Tuʻunga Fakatohitapú

ʻOku ʻikai lava ke fakaʻikaiʻi ʻe ha taha ʻa e fakamatala ʻi he Tohi Tapú ʻo pehē naʻe kau mai ʻa e ʻOtuá ʻi he ngaahi ʻaho kuohilí ke fakahoko ʻa e ngaahi ngāue faingataʻa fakaetangatá. Fekauʻaki mo iá, ʻoku tau lau: “Pea naʻa ke fakahao mai ho kakai mei Isipite, ʻa Isileli, ʻaki ha ngaahi fakaʻilonga, mo e ngaahi mana, pea ʻaki ha ta mamafa mo e nima kuo hikitā, mo e fakangeingei lahi.” (Fakaʻītali ʻamautolu; Selemaia 32:21) Fakaʻuta atu, ki hono peluki ʻa e puleʻanga mālohi taha ʻo e ʻahó fakafou ʻi ha ngaahi mala fakaʻotua ʻe hongofulu naʻe tuku mai, ʻo kau ai ʻa e mate ʻa e ʻuluaki fohá. Ko ha ngaahi mana moʻoni ia!​—Ekisoto, vahe 7 ki he 14.

ʻI ha ngaahi senituli ki mui, naʻe fakamatalaʻi ai ʻe he kau hiki Kōsipeli ʻe toko faá ʻa e ngaahi mana ʻe 35 naʻe fakahoko ʻe Sīsū. Ko hono moʻoní, naʻe fakahaaʻi ʻi heʻenau ngaahi leá naʻá ne fakahoko naʻa mo e toe ngaahi mana mahulu hake ʻi natula lahi ange ʻi he meʻa ko ia naʻa nau līpōtí. ʻOku moʻoni pe loi ʻa e ngaahi līpōtí ni? b​—Mātiu 9:​35; Luke 9:​11.

Kapau ko e Tohi Tapú ʻa ia ʻokú ne taukaveʻi ki aí—ko e Folofola ʻo e moʻoni ʻa e ʻOtuá—tā ʻoku ʻi ai hoʻo ʻuhinga mālohi ke tui ai ki he ngaahi mana ʻa ia ʻoku lau ki aí. ʻOku māʻalaʻala ʻa e Tohi Tapú ʻi hono līpooti ʻo pehē naʻe hoko ʻa e ngaahi mana ʻi he ngaahi ʻaho kuohilí—ko e ngaahi fakamoʻui fakaemana, ngaahi toetuʻu, mo e alā meʻa pehē—neongo ia ʻoku māʻalaʻala tatau pē ia mo hono fakamatalaʻi ʻoku ʻikai kei hoko ʻa e ngaahi mana peheé. (Sio ki he puha “ʻUhinga ʻOku ʻIkai Kei Hoko Ai ʻa e Ngaahi Mana Paú,” ʻi he peesi 4.) Ko ia ai, ʻoku ʻuhinga eni iá naʻa mo e faʻahinga ʻoku nau tali ʻoku moʻoni ʻa e Tohi Tapú ʻoku nau vakai ʻoku ʻikai ha makatuʻunga ʻo e tui ki he ngaahi mana ʻi onopōní? Tuku ke tali ia ʻe he kupu hoko maí.

[Fakamatala ʻi lalo]

[Puha ʻi he peesi 4]

ʻUHINGA ʻOKU ʻIKAI KEI HOKO AI ʻA E NGAAHI MANA PAÚ

ʻOku lave ʻi he Tohi Tapú ki he faʻahinga kehekehe ʻo e ngaahi maná. (Ekisoto 7:​19-​21; 1 Tuʻi 17:​1-7; 18:​22-​38; 2 Tuʻi 5:​1-​14; Mātiu 8:​24-​27; Luke 17:​11-​19; Sione 2:​1-​11; 9:​1-7) Ko e lahi taha ʻo e ngaahi mana ko ení naʻa nau ngāue ke fakahaaʻi ko Sīsū ʻa e Mīsaiá pea naʻa nau fakamoʻoniʻi naʻá ne maʻu ʻa e poupou ʻa e ʻOtuá. Ko e muʻaki kau muimui ʻo Sīsuú naʻa nau fakaʻaliʻali ʻa e ngaahi meʻaʻofa fakaemana, hangē ko e lea kehekehé mo hono ʻiloʻi ʻo e ngaahi lea fakamānavaʻí. (Ngāue 2:​5-​12; 1 Kolinito 12:​28-​31) Ko e ngaahi meʻaʻofa fakaemana peheé naʻe ʻaonga ia ki he fakatahaʻanga Kalisitiané lolotonga ʻa ʻene kei kamakamatá. ʻO anga-fēfē?

Sai, naʻe siʻi ʻa e ngaahi tatau ʻo e Tohi Tapú. Naʻe anga-maheniʻaki, ko e kau koloaʻiá pē naʻa nau faʻa maʻu ʻa e ngaahi takainga tohí pe ha faʻahinga pē ʻo e ngaahi tohí. ʻI he ngaahi fonua panganí, naʻe ʻikai ha ʻiloʻi ai ʻo e Tohi Tapú pe ko hono Faʻu-Tohí, ʻa Sihova. Ko e akonaki faka-Kalisitiané naʻe pau ke fakahaaʻi ia ʻe he lea ʻa e ngutú. Naʻe ʻaonga ʻa e ngaahi meʻaʻofa fakaemaná ʻi hono fakahaaʻi naʻe ngāueʻaki ʻe he ʻOtuá ʻa e fakatahaʻanga Kalisitiané.

Ka naʻe fakamatalaʻi ʻe Paula ko e ngaahi meʻaʻofá ni ʻe mole atu ia ʻi he taimi pē ʻe ʻikai kei fiemaʻu ai iá. “Neongo ko e malanga-palofisai, ka ʻe hoko ʻo taʻeʻaonga; neongo ko e faiʻaki ʻa e ngaahi lea, ka ʻe faifai ʻo tuku ia; neongo ko e ʻilo loloto, ka ʻe hoko ʻo taeʻaonga. He ʻoku fakakonga ʻetau ʻilo, pea fakakonga ʻetau palofisai: ka ʻoka hoko mai ʻa e haohaoa, ʻe toki taeʻaonga ai ʻa e fakakonga.”—1 Kolinito 13:​8-10.

ʻOku lava ke maʻu ʻe he kakaí he ʻahó ni ʻa e ngaahi Tohi Tapu, pea pehē ki he ngaahi konikōtieni mo e ngaahi ʻenisaikolopētia. Laka hake he kau Kalisitiane kuo akoʻi ʻe toko ono miliona ʻoku nau tokoniʻi ʻa e niʻihi kehé ke nau maʻu ʻa e ʻilo fakaʻotua makatuʻunga ʻi he Tohi Tapú. Ko ia ai, ʻoku ʻikai kei fiemaʻu ʻa e ngaahi maná ke fakamoʻoni kia Sīsū Kalaisi ko e Tokotaha-Faifakahaofi ia kuo fakanofo ʻa e ʻOtuá pe ke ʻomai ʻa e fakamoʻoni ʻoku poupouʻi ʻe Sihova ʻa ʻene kau sevānití.