Falala ki he Folofola ʻa Sihová

“Ko hoʻo folofola ʻoku ou falala ki ai.”—SĀME 119:42.

1. Ko e hā ʻoku lava ke ke leaʻaki fekauʻaki mo e ʻiloʻanga pea mo e anga ʻo e tokotaha-tohi ʻo e Sāme 119?

 KO E folofola ʻa Sihová naʻe koloaʻaki ia ʻe he tokotaha-faʻu ʻo e Sāme 119. ʻOku mahalo pē ko Pilinisi Hesekaia ia ʻo Siutá. Ko e ngaahi ongoʻi ʻoku fakahaaʻi ʻi he hiva fakamānavaʻi ko ʻení ʻoku feʻungamālie ia mo e anga ʻo Hesekaiá, ʻa ia “naʻa ne pikitai kia Sihova” lolotonga ʻene hoko ko e tuʻi ʻo Siutá. (2 Tuʻi 18:​3-7) Ko e meʻa ʻe taha ʻoku paú: Naʻe lāuʻilo ʻa e tokotaha-faʻú ni ki heʻene fiemaʻu fakalaumālié.—Mātiu 5:3.

 2. Ko e hā ʻa e kaveinga ʻo e Sāme 119, pea ʻoku anga-fēfē hono fokotuʻutuʻu ʻo e hiva ko ʻení?

² Ko ha poini tefito ʻo e Sāme 119 ko e mahuʻinga ʻo e folofola pe pōpoaki ʻa e ʻOtuá. a Mahalo ʻi he tuʻunga ko ha tokoni ke manatuʻí, naʻe faʻu ai ʻeni ʻe he tokotaha-tohí ko ha hiva fakaʻalafapeti. ʻOku fakatefito ʻa hono ngaahi veesi ʻe 176 ʻi he ngaahi mataʻitohi hokohoko ʻo e ʻalafapeti faka-Hepeluú. ʻI he muʻaki tatau faka-Hepeluú, ko e ngaahi veesi fakaehiva taki taha ʻe 22 ʻo e sāmé naʻe ʻi ai ʻa e ngaahi laine ʻe 8 naʻe kamataʻaki ʻa e mataʻitohi tatau pē. ʻOku lave ʻa e sāmé ni ki he folofola, lao, ngaahi fakamanatu, ngaahi founga, ngaahi enginaki, ngaahi tuʻutuʻuni, ngaahi fekau, ngaahi tuʻutuʻuni fakaefakamaau, ngaahi lea pea mo e ngaahi lao. ʻI he kupu ko ʻení pea mo hono hokó, ʻe lāulea ai ki he Sāme 119 ʻo fakatatau ki ha liliu tonu ʻo e konga tohi Tohi Tapu faka-Hepeluú. Ko e fakakaukauloto atu ki he ngaahi meʻa naʻe hokosia ʻe he kau sevāniti ʻa Sihova ʻi he kuohilí mo e lolotongá ʻoku totonu ke ne fakalahi ʻetau mahino ki he hiva fakamānavaʻi fakaʻotuá ni pea fakatupulekina ai ʻetau houngaʻia ki he Folofola tohi ʻa e ʻOtuá, ko e Tohi Tapú.

Talangofua ki he Folofola ʻa e ʻOtuá pea Fiefia

 3. Fakamatalaʻi mo fakatātaaʻi ʻa e meʻa ʻoku ʻuhinga ki ai ʻa e taʻemelé.

³ Ko e fiefia moʻoní ʻoku fakatuʻunga ia ʻi heʻetau ʻaʻeva ʻi he lao ʻa e ʻOtuá. (Sāme 119:​1-8) Kapau te tau fai ʻeni, ʻe lau kitautolu ʻe Sihova ʻoku tau ‘haohaoa [pe taʻemele] ʻi hotau ʻalungá.’ (Sāme 119:1) Ko e hoko ʻo taʻemelé ʻoku ʻikai ke ʻuhinga iá ʻoku tau haohaoa, ka ʻokú ne fakahaaʻi ʻoku tau feinga mālohi ke fai ʻa e finangalo ʻo Sihova ko e ʻOtuá. Ko Noa “naʻa ne haohaoa pe ʻi he ngahi toʻutangata naʻe feʻunga mo ia” ʻi he tuʻunga ko ha tangata naʻe ‘takaua mo e ʻOtua moʻoní.’ Naʻe hao ʻa e pēteliake faitōnunga ko iá mo hono fāmilí ʻi he Lōmakí koeʻuhi naʻá ne tuli ki he ʻalunga moʻui naʻe fakahaaʻi ʻe Sihová. (Senesi 6:9; 1 Pita 3:20) ʻI he tuʻunga meimei tatau, ko ʻetau hao ʻi he ngataʻanga ʻo e māmani ko ʻení ʻoku fakatuʻunga ia ʻi heʻetau ‘tauhi ʻa e ʻu enginaki ʻa e ʻOtuá ke matauhi,’ ʻa ia ko hono fai hono finangaló.—Sāme 119:4.

 4. ʻOku fakatuʻunga ʻi he hā ʻetau fiefiá mo e lavameʻá?

⁴ Heʻikai ʻaupito ke liʻaki kitautolu ʻe Sihova kapau ʻoku tau ‘fakamalo kiate ia i he agatonu oe lotó pea fai ki heʻene gaahi tuutuuní.’ (Sāme 119:​7, 8, PM) Naʻe ʻikai ke liʻaki ʻe he ʻOtuá ʻa e taki ʻIsileli ko Siosiuá, ʻa ia naʻá ne ngāueʻaki ʻa e akonaki ke ‘lau leʻo-siʻi ʻa e tohi laó ʻi he ʻaho mo e pō koeʻuhi ke ne fai ʻa e meʻa kotoa ko ia naʻe tohi aí.’ Naʻe ʻai ia ʻe he meʻa ko iá ke ne lavameʻa pea fakaivia ai  ia ke ne ngāue fakapotopoto. (Siosiua 1:​8, NW) ʻI he ofi ki he ngataʻanga ʻo ʻene moʻuí, naʻe kei fakamālō pē ʻa Siosiua ki he ʻOtuá mo malava ke fakamanatu ki he kau ʻIsilelí: “ʻOku ʻilo ʻe he kotoa ʻo homou loto, mo e kotoa ʻo homou laumalie, kuo ʻikai to kelekele ha momoʻi meʻa ʻe taha ʻi he ngaahi lelei fuape naʻe talaʻofa ʻe Sihova ko homou ʻOtua maʻamoutolu.” (Siosiua 23:14) Hangē ko Siosiua mo e tokotaha-tohi ʻo e Sāme 119, ʻe lava ke tau maʻu ʻa e fiefiá mo e lavameʻá ʻi heʻetau fakahīkihikiʻi ʻa Sihova pea falala ki heʻene folofolá.

ʻOku Tauhi Kitautolu ʻe he Folofola ʻa Sihová Ke Tau Maʻa

 5. (a) Fakahaaʻi ʻa e founga ʻe malava ke hanganaki maʻa fakalaumālie aí. (e) Ko e hā ʻa e tokoni ʻoku ʻi ai ki ha talavou kuó ne faiangahala mamafa?

⁵ ʻE malava ke tau maʻa fakalaumālie kapau te tau hanganaki maluʻi kitautolu ʻo fakatatau ki he folofola ʻa e ʻOtuá. (Sāme 119:​9-16) ʻE hoko pehē ʻeni neongo kapau kuo ʻikai ke fokotuʻu ʻe heʻetau ongo mātuʻá ha faʻifaʻitakiʻanga lelei. Neongo ko e tamai ʻa Hesekaiá ko ha tokotaha tauhi ʻaitoli, naʻe hanga ʻe Hesekaia ʻo ‘fakamaʻa hono halá,’ ngalingali mei he ngaahi tākiekina fakapanganí. Pehē pē ʻoku faiangahala mamafa ha talavou ʻokú ne tauhi ʻa e ʻOtuá he ʻahó ni. Ko e fakatomalá, lotú, tokoni fakaemātuʻá, pea mo e tokoni ʻofa ʻa e kau mātuʻa Kalisitiané ʻe lava ke tokoniʻi ai ia ke ne hangē ko Hesekaiá ʻo ‘fakamaʻa hono halá pea tauhi ia.’—Semisi 5:​13-15.

 6. Ko hai ʻa e ongo fefine ‘naʻá na fakamaʻa hona halá pea tauhi kinaua ke hoa mo e folofola ʻa e ʻOtuá’?

⁶ Neongo naʻe moʻui fuoloa ki muʻa ʻa Lēhapi ia mo Lute ʻi hono faʻu ʻo e Sāme 119, naʻá na ‘fakamaʻa hona halá.’ Ko Lēhapí ko ha paʻumutu Kēnani, ka naʻá ne hoko ʻo ʻiloa ʻi heʻene tuí ʻi he tuʻunga ko ha tokotaha lotu ʻa Sihova. (Hepelu 11:​30, 31) Naʻe liʻaki ʻe he Mōape ko Luté hono ngaahi ʻotuá, ʻo ne tauhi ʻa Sihova pea talangofua ki heʻene Lao ki ʻIsilelí. (Lute 1:​14-17; 4:​9-13) Ko e ongo fefine ʻikai ʻIsileli fakatouʻosi ko ʻení naʻá na ‘tauhi kinaua ke hoa mo e folofola ʻa e ʻOtuá’ peá na maʻu ʻa e monū fakaofo ʻo e hoko ko e ongo kui fefine ʻa Sīsū Kalaisi.—Mātiu 1:​1, 4-6.

 7. Naʻe anga-fēfē hono fokotuʻu ʻe Taniela mo e kau talavou Hepelū kehe ʻe toko tolú ha faʻifaʻitakiʻanga lelei ʻi hono tauhi maʻu ʻa e maʻa fakalaumālié?

⁷ “Ko e filioʻi ʻo e loto ʻo e tangata ʻoku kovi mei heʻene tamasiʻi,” ka ʻoku malava ʻa e kau talavoú ke muimui ʻi ha hala maʻa, naʻa mo e ʻi he māmani fakameleʻi ko ʻeni ʻi he malumalu ʻo e pule ʻa Sētané. (Senesi 8:21; 1 Sione 5:19) ʻI he hoko ko e kau fakaheeʻi ʻi Pāpiloné, naʻe hanga ai ʻe Taniela mo e kau talavou Hepelū kehe ʻe toko tolú ʻo ‘tauhi kinautolu ke hoa mo e folofola ʻa e ʻOtuá.’ Hangē ko ʻení, naʻe ʻikai ke nau ʻuliʻi kinautolu “aki ae tufakaga mea kai [vovo] oe tuʻi.” (Taniela 1:​6-10, PM) Naʻe kai ʻe he kau Pāpiloné ʻa e fanga manu taʻemaʻa naʻe tapui ʻe he Lao ʻa Mōsesé. (Livitiko 11:​1-31; 20:​24-26) Naʻe ʻikai ke nau fakatafe maʻu pē ʻa e fanga manu naʻe tāmateʻí, pea ko ʻenau kai ʻa e kakanoʻi manu taʻefakatafé naʻe maumauʻi ai ʻa e lao ʻa e ʻOtuá ʻi he totó. (Senesi 9:​3, 4) Tā neʻineʻi ke ʻikai maʻu ʻinasi ʻa e kau Hepelū ʻe toko faá ʻi he meʻakai vovo ʻa e tuʻí! Naʻe tauhi maʻu ʻe he kau talavou anga-fakaʻotua ko iá ʻa e maʻa fakalaumālié pea fokotuʻu ai ha faʻifaʻitakiʻanga lelei.

 Folofola ʻa e ʻOtuá ko ha Tokoni ki he Faitōnungá

 8. Ko e hā ʻa e fakakaukau mo e ʻilo ʻoku fiemaʻu kiate kitautolu kapau ʻoku ʻuhingá ke tau mahinoʻi mo ngāueʻaki ʻa e lao ʻa e ʻOtuá?

⁸ Ko e fiefia ʻi he folofola ʻa e ʻOtuá ko ha meʻa mahuʻinga tefito ia ki hono tauhi kitautolu ke faitōnunga kia Sihová. (Sāme 119:​17-24) Kapau ʻoku tau hangē ko e tokotaha-tohi-hiva fakamānavaʻí, te tau holi ke mahinoʻi ʻa e “gaahi mea fakaofo” ʻo e lao ʻa e ʻOtuá. Te tau toutou ‘holi ki he gaahi [tuʻutuʻuni] fakamāu ʻa Sihová’ pea fakahāhā ha ‘fiefia ki heʻene gaahi fakamooní.’ (Sāme 119:​18, 20, 24, PM) Kapau kuo tau fakatapui kia Sihova ʻi ha taimi nounou pē, kuo tau ‘holi lahi ki he hua huhu taekākā oe folofolá’? (1 Pita 2:​1, 2, PM) ʻOku fiemaʻu ke tau mahinoʻi ʻa e ngaahi akonaki tefito ʻa e Tohi Tapú koeʻuhi ke tau malava ʻo ʻi ha tuʻunga lelei ange ke mahinoʻi mo ngāueʻaki ʻa e lao ʻa e ʻOtuá.

 9. ʻOku totonu ke fēfē ʻetau talí ʻi he taimi ʻoku ʻi ai ai ha fepaki ʻi he lao ʻa e ʻOtuá mo e ngaahi tuʻutuʻuni fakaetangatá?

⁹ ʻOku tau fiefia nai ʻi he ngaahi fakamanatu ʻa e ʻOtuá, kae fēfē kapau ʻoku lea fakafepaki mai kiate kitautolu ʻa e “houʻeiki [pe kau pilinisi]” ʻi ha faʻahinga ʻuhinga? (Sāme 119:​23, 24) ʻI he ʻahó ni, ko e kakai ʻoku maʻu mafaí ʻoku nau faʻa feinga ke fakamālohiʻi kitautolu ke ʻai ʻa e ngaahi lao fakaetangatá ke māʻolunga ange ia ʻi he lao ʻa e ʻOtuá. ʻI he taimi ʻoku ʻi ai ai ha fepaki ʻi he ngaahi tuʻutuʻuni ʻa e tangatá mo e finangalo ʻo e ʻOtuá, ko e hā te tau faí? Ko ʻetau fiefia ki he folofola ʻa e ʻOtuá te ne tokoniʻi kitautolu ke tau kei faitōnunga ai pē kia Sihova. ʻI he hangē ko e kau ʻapositolo ʻa Sīsū Kalaisi naʻe fakatangaʻí, te tau pehē: “ʻOku totonu pe ke fai ki he pule ʻa e ʻOtua ʻi he pule ʻa e tangata.”—Ngāue 5:29.

10, 11. Fakatātaaʻi ʻa e founga ʻe malava ai ke tau tauhi maʻu ʻa e anga-tonu kia Sihová ʻi he malumalu ʻo e ngaahi tuʻunga faingataʻa tahá.

¹⁰ ʻOku malava ke tau kei faitōnunga ai pē kia Sihova naʻa mo e ʻi he malumalu ʻo e ngaahi tuʻunga faingataʻa tahá. (Sāme 119:​25-32) Kapau ko e taumuʻá ke tau lavameʻa ʻi hono tauhi maʻu ʻetau anga-tonú ki he ʻOtuá, kuo pau ke tau hoko ʻo akoʻingofua pea lotu tōtōivi ki heʻene fakahinohinó. Kuo pau ke tau toe fili ʻa e “ʻalunga tonunga.”—Sāme 119:​26, 30.

¹¹ Ko Hesekaia, ʻa ē naʻá ne hiki nai ʻa e Sāme 119, naʻá ne fili ʻa e “ʻalunga tonunga.” Naʻá ne fai pehē neongo naʻe takatakaiʻi ia ʻe he kau lotu loí pea manukiʻi nai ʻe he ngaahi mēmipa ʻo e lotoʻā fakatuʻí. ʻOku mātuʻaki hangehangē, ‘naʻe vaivai maha hono laumālié he mafasiá’ koeʻuhi ko e ngaahi tuʻunga peheé. (Sāme 119:28) Ka naʻe falala ʻa Hesekaia ki he ʻOtuá, ko ha tuʻi lelei ia, pea naʻá ne fai “ʻa e meʻa naʻe hoa mo e finangalo ʻo Sihova.” (2 Tuʻi 18:​1-5) ʻI he falala ki he ʻOtuá, te tau malava mo kitautolu foki ke kātakiʻi ʻa e ngaahi ʻahiʻahí ʻi he tuʻunga ko e kau tauhi anga-tonu.—Semisi 1:​5-8.

ʻOku ʻOmai ʻe he Folofola ʻa Sihová ʻa e Loto-Toʻa

12. ʻE lava fēfē ke tau ngāueʻaki fakafoʻituitui ʻa e Sāme 119:​36, 37?

¹² Ko e muimui ki he tataki ʻa e folofola ʻa e ʻOtuá  ʻokú ne ʻomai kiate kitautolu ʻa e loto-toʻa ʻoku fiemaʻu ke fekuki ai mo e ngaahi ʻahiʻahi ʻo e moʻuí. (Sāme 119:​33-40) ʻOku tau fekumi anga-fakatōkilalo ki he fakahinohino ʻa Sihová koeʻuhi ke tau malava ʻo tauhi ʻene laó ‘ʻaki ʻa e kotoa ʻo e lotó.’ (Sāme 119:​33, 34) ʻI he hangē ko e tokotaha-tohi-sāmé, ʻoku tau kole ki he ʻOtuá: “Ofeʻi hoku loto ki hoʻo ʻu fakamoʻoni na [pe ngaahi fakamanatú], ʻo ʻikai ki he paʻanga maʻu kākā,” pe ko e “tupu taʻetotonu.” (Sāme 119:36) ʻI he hangē ko e ʻapositolo ko Paulá, ʻoku tau “moui agatonu i he mea kotoabe.” (Hepelu 13:​18, PM) Kapau ʻoku fiemaʻu ʻe ha pule ngāue ke tau fai ha meʻa taʻetotonu, ʻoku tau fakatupulekina ʻa e loto-toʻa ke pīkitai ki he ngaahi fakahinohino ʻa e ʻOtuá—pea ʻoku tāpuakiʻi maʻu pē ʻe Sihova ha ʻalunga pehē. Ko hono moʻoní, ʻokú ne tokoniʻi kitautolu ke tau mapuleʻi ʻa e ngaahi hehema kovi kotoa pē. Ko ia ai, ke tau lotu: “Leʻei hoku mata ke ʻoua te na sio ki he muna.” (Sāme 119:37) Heʻikai ʻaupito te tau loto ke vakai ʻoku manakoa ha faʻahinga meʻa muna pē ʻoku fehiʻa ai ʻa e ʻOtuá. (Sāme 97:10) ʻI he lotolotonga ʻo e ngaahi meʻa kehé, ʻoku ueʻi ʻe he meʻá ni kitautolu ke tau fakaʻehiʻehi mei he ngaahi meʻa fakalieliá pea mo e ngaahi tōʻonga fakahaʻele faʻahikehé.—1 Kolinito 6:​9, 10; Fakahā 21:8.

13. Naʻe anga-fēfē hono maʻu ʻe he kau ākonga ʻa Sīsū naʻe fakatangaʻí ʻa e loto-toʻa naʻe fiemaʻu ke faifakamoʻoni taʻemāluʻia aí?

¹³ Ko e ʻilo totonu ki he folofola ʻa e ʻOtuá ʻokú ne ʻomai kiate kitautolu ʻa e loto-maʻu ke faifakamoʻoni loto-toʻa. (Sāme 119:​41-48) Pea ʻoku fiemaʻu moʻoni ke tau loto-toʻa ke ‘tali ʻa ia ʻoku manuki mai kiate kitautolú.’ (Sāme 119:42) ʻI he taimi ʻe niʻihi, ʻoku tau hangē nai ai ko e kau ākonga ʻa Sīsū naʻe fakatangaʻí, ʻa ia naʻa nau lotu: “ʻEiki, . . . tuku ki hoʻo kau tamaioʻeiki, ke ʻoua ʻaupito te mau māluʻia ʻi heʻemau malangaʻaki hoʻo folofola.” Ko e hā hono olá? “Naʻe fakafonu ʻa kinautolu katokatoa ʻi he Laumālie Māʻoniʻoni: pea naʻa nau malangaʻaki ʻa e folofola ʻa e ʻOtua ʻo taʻemāluʻia.” Ko e ʻEiki Hau tatau pē ʻokú ne ʻomai kiate kitautolu ʻa e loto-toʻa ke leaʻaki ʻene folofolá ʻo taʻemāluʻia.—Ngāue 4:​24-31.

14. Ko e hā te ne tokoniʻi kitautolu ke tau faifakamoʻoni loto-toʻa, ʻo hangē ko ia naʻe fai ʻe Paulá?

¹⁴ Te tau maʻu ʻa e loto-toʻa ʻoku fiemaʻú ke fai ha fakamoʻoni taʻeʻiai ha ilifia ki ha ongoʻi mā kapau ʻoku tau koloaʻaki “ʻa e lea moʻoni” pea ‘tauhi maʻu pe ʻa e lao ʻa e ʻOtuá.’ (Sāme 119:​43, 44) Ko hono ako tōtōivi ʻa e Folofola tohi ʻa e ʻOtuá ʻoku teuʻi ai kitautolu ke ‘lea ki heʻene ngaahi fakamoʻoní [pe ngaahi fakamanatú] ʻi he ʻao ʻo e ngaahi tuʻí.’ (Sāme 119:46) ʻE toe tokoniʻi kitautolu ʻe he lotú mo e laumālie ʻo Sihová ke tau leaʻaki ʻa e ngaahi meʻa totonú ʻi ha founga feʻungamālie. (Mātiu 10:​16-20; Kolose 4:6) Naʻe loto-toʻa ʻa Paula ʻo lea ki he ngaahi fakamanatu ʻa e ʻOtuá ki he kau pule ʻi he ʻuluaki senitulí. Ko e fakatātaá, naʻá ne faifakamoʻoni ki he kōvana Loma ko Filiké, ʻa ia naʻá ne “fanongo ki heʻene fakamatala ki he lotu kia Kalaisi Sīsū.” (Ngāue 24:​24, 25) Naʻe fai foki ʻe Paula ha fakamoʻoni ʻi he ʻao ʻo Kōvana Fesito mo Tuʻi ʻAkilipá. (Ngāue 25:​22–26:32) ʻI he tokoni ʻa Sihová, te tau malava mo kitautolu foki ke hoko ko e kau faifakamoʻoni loto-toʻa, ʻo ʻikai ʻaupito “māʻi ʻa e Kosipeli.”—Loma 1:16.

ʻOku ʻOmai ʻe he Folofola ʻa e ʻOtuá ʻa e Fakafiemālie Kiate Kitautolu

15. ʻOku malava fēfē ʻe he Folofola ʻa e ʻOtuá ke ne ʻomai ʻa e fakafiemālié ʻi he taimi ʻoku manukiʻi ai kitautolu ʻe he niʻihi kehé?

¹⁵ ʻOku tokonaki mai ʻe he Folofola ʻa Sihová ʻa e fakafiemālie taʻealaliliu. (Sāme 119:​49-56) ʻOku ʻi ai ʻa e ngaahi taimi ʻoku tautefito ki ai ʻetau fiemaʻu ʻa e fakafiemālié. Neongo ʻoku tau lea loto-toʻa atu ʻi he tuʻunga ko e Kau Fakamoʻoni ʻa Sihová, ko e ‘kau fielahí’—ʻa e faʻahinga ʻoku nau ngāue fielahi ki he ʻOtuá—‘kuo nau manukia kitautolu ʻo lahi ʻaupito’ ʻi he taimi ʻe niʻihi. (Sāme 119:51) Kae kehe, ʻi he lolotonga ʻa e lotú, ʻoku tau manatuʻi nai ai ha ngaahi meʻa lelei ʻoku leaʻaki ʻi he Folofola ʻa e ʻOtuá, pea ʻoku ‘fakafiemalieʻi ai kitautolu.’ (Sāme 119:​52, PM) ʻI he lolotonga ʻo ʻetau ngaahi huú, ʻoku tau manatuʻi nai ha lao pe tefitoʻi moʻoni Fakatohitapu ʻokú ne ʻomai kiate kitautolu ʻa e fakafiemālie mo e loto-toʻa ʻoku fiemaʻú ʻi ha tuʻunga fakamamahi.

16. Ko e hā kuo ʻikai ke fai ʻe he kau sevāniti ʻa e ʻOtuá neongo ʻa e fakatangá?

¹⁶ Ko e faʻahinga fielahi ko ia naʻa nau manukiʻi ʻa e tokotaha-tohi-sāmé ko e kau ʻIsilelí—ko e ngaahi mēmipa ʻo ha puleʻanga naʻe fakatapui ki he ʻOtuá. He meʻa fakamā ē! Kae kehe, ʻi he ʻikai hangē ko kinautolú, tau fakapapauʻi ke ʻoua ʻaupito ʻe afe mei he lao ʻa e ʻOtuá. (Sāme 119:51) ʻI he tofanga ʻi he fakatanga faka-Nasí mo e ngaohikovia meimei tatau ʻi he faai mai ʻa e ngaahi taʻú, kuo fakafisi ai ʻa e laui afe ʻo e kau sevāniti ʻa e ʻOtuá ke afe mei he ngaahi lao mo e ngaahi tefitoʻi moʻoni ʻoku maʻu ʻi he Folofola ʻa e ʻOtuá. (Sione 15:​18-21) Pea  ʻoku ʻikai ko ha fakakavenga ʻa e talangofua kia Sihová, he ko ʻene ngaahi tuʻutuʻuní ʻoku hangē ha ngaahi fasi fakafiemālie kiate kitautolú.—Sāme 119:54; 1 Sione 5:3.

Houngaʻia ki he Folofola ʻa Sihová

17. Ko e houngaʻia ki he folofola ʻa e ʻOtuá ʻokú ne ueʻi kitautolu ke fai ʻa e hā?

¹⁷ ʻOku tau fakamoʻoniʻi ʻetau houngaʻia ki he folofola ʻa e ʻOtuá ʻaki hono tauhi ia. (Sāme 119:​57-64, PM ) Ko e tokotaha-tohi-sāmé naʻá ne ‘behe te ne fai ki he gaahi folofola ʻa Jihová,’ pea naʻa mo e ‘tuu hake i he tuaabo malie ke fakafetai ki he ʻOtuá koeuhi ko ʻene gaahi [tuʻutuʻuni] fakamāu maonioní.’ Kapau ʻoku tau ʻā hake ʻi he poʻulí, ko ha faingamālie lelei ē ʻoku tau maʻu ke fakahaaʻi ai ʻetau houngaʻia ki he ʻOtuá ʻi he lotu! (Sāme 119:​57, 62) ʻOku ueʻi kitautolu ʻe heʻetau houngaʻia ki he folofola ʻa e ʻOtuá ke tau kumi ki he akonaki fakaʻotuá pea ʻai ai kitautolu ko e ‘kaumeʻa fiefia ʻo e kakai kotoa ʻoku ʻapasia kia Sihová’—ʻa e faʻahinga tāutaha ʻoku nau maʻu ʻa e manavahē anga-ʻapasia ki he ʻOtuá. (Sāme 119:​63, 64) Ko hai ʻe lava ke ne maʻu ha kaungāmeʻa lelei ange ai ʻi he māmaní?

18. ʻOku anga-fēfē ʻa e tali ʻa Sihova ki heʻetau ngaahi lotú ʻi he taimi ʻoku ‘takai ai kitautolu ʻaki ʻa e kafa ʻa e kau angahalá’?

¹⁸ ʻI he taimi ʻoku tau lotu ai ʻaki ʻa e kotoa ʻo hotau lotó pea kole anga-fakatōkilalo kia Sihova ke ne akoʻi kitautolú, ʻoku tau ‘kole ke ne ʻofa mai’ fakataha mo e fakakaukau ki hono maʻu ʻene hōifuá. ʻOku fiemaʻu tautefito ke tau lotu ʻi he taimi ʻoku ‘takai ai kitautolu ʻaki ʻa e kafa ʻa e kau angahalá.’ (Sāme 119:​58, 61) ʻOku malava ʻe Sihova ke ne tuʻusi ʻa e ngaahi kafa taʻofi ʻa e filí pea fakatauʻatāinaʻi kitautolu ki he ngāue fakamalanga ʻo e Puleʻangá mo e ngaohi-ākongá. (Mātiu 24:14; 28:​19, 20) Kuo toutou fakahāhā ʻeni ʻi he ngaahi fonua ko ia kuo tapui ai ʻetau ngāué.

Tui ki he Folofola ʻa e ʻOtuá

19, 20. ʻOku anga-fēfē ʻa e malava ke hoko ko e monū ʻa e faingataʻaʻiá?

¹⁹ Ko e tui ki he ʻOtuá mo ʻene folofolá ʻoku tokoniʻi ai kitautolu ke tau kātakiʻi ʻa e faingataʻá pea ke fai hono finangaló. (Sāme 119:​65-72) Neongo naʻe hanga ʻe he kau fielahí ʻo ‘faʻu ha loi kiate ia,’ naʻe hiva ʻa e tokotaha-tohi-sāmé: “Ko hoku monu pe ʻa hoku fakamoʻulaloa [pe faingataʻaʻiá].” (Sāme 119:​66, 69, 71) ʻOku malava fēfē ke hoko ko e monū ki ha taha ʻo e kau sevāniti ʻa Sihová ke ne tofanga ʻi he faingataʻá?

²⁰ ʻI heʻetau tofanga ʻi he faingataʻá, ʻoku tau hū tōtōivi taʻetoeveiveiua kia Sihova, pea ʻoku tohoaki ai kitautolu ʻo toe ofi ange kiate ia. ʻOku tau fakamoleki nai ai ʻa e taimi lahi ange ʻi hono ako ʻa e Folofola tohi ʻa e ʻOtuá pea fai nai ha feinga lahi ange ke ngāueʻaki ia. ʻOku iku ʻeni ki ha moʻui fiefia ange. Kae fēfē kapau ʻoku tau tali ki ha faingataʻa ʻi ha founga ʻoku fakahaaʻi ai ha ngaahi anga ʻoku ʻikai sai, hangē ko e taʻefaʻakātakí mo e pōlepolé? ʻI he lotu tōtōivi mo e tokoni ʻa e Folofola ʻa e ʻOtuá pea mo e laumālié, ʻe malava ke tau ikuʻi ai ʻa e ngaahi mele peheé pea hoko ʻo kakato ange ʻi ‘heʻetau ʻai ʻa e tangata foʻoú.’ (Kolose 3:​9-14) ʻIkai ngata aí, ʻoku fakaivimālohiʻi ʻetau tuí ʻi he taimi ʻoku tau kātakiʻi ai ʻa e mamahí. (1 Pita 1:​6, 7) Naʻe maʻu ʻaonga ʻa Paula mei hono ngaahi mamahí koeʻuhi naʻa nau ʻai ia ke ne fakafalala lahi ange ai kia Sihova. (2 Kolinito 1:​8-10) ʻOku tau fakaʻatā ʻa e faingataʻá ke maʻu ai ha ʻaonga kiate kitautolu?

Falala Maʻu Pē kia Sihova

21. Ko e hā ʻe hokó ʻi hono ʻai ʻe he ʻOtuá ʻa e kau fielahí ke nau maá?

²¹ ʻOku ʻomai ʻe he folofola ʻa e ʻOtuá kiate kitautolu ha makatuʻunga mahuʻinga ki he falala kia Sihová. (Sāme 119:​73-80) Kapau ʻoku tau falala moʻoni ki hotau Tokotaha-Fakatupú, heʻikai ha ʻuhinga ke tau mā ai. Kae kehe, koeʻuhi ko e meʻa ʻoku fai ʻe he niʻihi kehé, ʻoku tau fiemaʻu ai ʻa e fakafiemālie pea tau ongoʻi saiʻia nai ke lotu: “Ke ma ʻa e fielahi.” (Sāme 119:​76-78) ʻI he taimi ʻoku ʻai ai ʻe Sihova ʻa e faʻahinga peheé ke maá, ʻoku iku ʻeni ke fakaeʻa ai ʻenau ngaahi founga koví pea ki hono fakamāʻoniʻoniʻi ʻa hono huafa māʻoniʻoní. ʻOku malava ke tau fakapapauʻi ko e kau fakatanga  ʻo e kakai ʻa e ʻOtuá ʻoku ʻikai moʻoni te nau maʻu ha meʻa. Ko e fakatātaá, kuo ʻikai ʻaupito te nau lava—pea ʻe ʻikai ʻaupito lava—ke nau fakaʻauha ʻa e Kau Fakamoʻoni ʻa Sihová, ʻa ia ʻoku nau falala ki he ʻOtuá ʻaki ʻa e kotoa ʻo honau lotó.—Palovepi 3:​5, 6.

22. ʻI he ʻuhinga fē naʻe hoko ai ʻa e tokotaha-tohi-sāmé ʻo “tatau mo ha hina leta ʻoku tautau ʻi he ʻahu”?

²² ʻOku hanga ʻe he folofola ʻa e ʻOtuá ʻo fakaivimālohiʻi ʻetau falala kiate iá ʻi he taimi ʻoku fakatangaʻi ai kitautolú. (Sāme 119:​81-88) Koeʻuhi naʻe fakatangaʻi ia ʻe he kau fielahí, naʻe ongoʻi ʻe he tokotaha-tohi-sāmé ʻokú ne “tatau mo ha hina leta ʻoku tautau ʻi he ʻahu.” (Sāme 119:​83, 86) ʻI he ngaahi taimi ʻo e Tohi Tapú, naʻe ngāueʻaki ai ʻa e ngaahi hina naʻe ngaohi mei he kiliʻi manú ki hono tānaki ai ha vai, uaine mo e ngaahi huhuʻa kehe. ʻI he ʻikai ke ngāueʻakí, naʻe mingi nai ai ʻa e ngaahi hina ko ʻení kapau naʻe tautau ʻo ofi ki ha afi ʻi ha loki ʻoku fonu he ʻahú. Kuo ʻai koe ʻi ha taimi ʻe he faingataʻá pe fakatangá ke ke ongoʻi “tatau mo ha hina leta ʻoku tautau ʻi he ʻahu”? Kapau ʻoku pehē, falala kia Sihova pea lotu: “Fakaakeake au ʻo tāu mo hoʻo ʻofa; pea te u tauhi ʻa e ngaahi fakamoʻoni ʻa ho fofonga.”—Sāme 119:88.

23. Ko e hā kuo tau lāulea mai ai ʻi hono vakaiʻi ʻa e Sāme 119:​1-88, pea ko e hā nai ʻe lava ke tau ʻeke hifo kiate kitautolu ʻi heʻetau fakatuʻotuʻa atu ke ako ʻa e Sāme 119:​89-176?

²³ Ko e meʻa kuo tau lāulea mai ai ʻi he ʻuluaki konga ʻo e Sāme 119 ʻoku fakahaaʻi mai ai ʻoku ngāueʻaki ʻe Sihova ʻa e ʻaloʻofá ki heʻene kau sevānití koeʻuhi ʻoku nau falala ki heʻene folofolá pea ʻoku nau fiefia ki heʻene ngaahi laó, ngaahi fakamanatú, ngaahi fekaú, mo e ngaahi laó. (Sāme 119:​16, 47, 64, 70, 77, 88) ʻOkú ne fiefia he ko e faʻahinga ʻoku nau līʻoa kiate iá ʻoku nau tauhi kinautolu ke hoa mo ʻene folofolá. (Sāme 119:​9, 17, 41, 42) ʻI hoʻo fakatuʻotuʻa atu ki ha ako ʻo e toenga ʻo e saame fakaʻofoʻofá ni, ʻe lava ke ke ʻeke hifo kiate koe, ‘ʻOku ou fakaʻatā moʻoni ʻa e folofola ʻa Sihová ke ne fakamaama hoku halá?’

[Fakamatala ʻi lalo]

ʻE Anga-Fēfē Haʻo Tali?

• ʻOku fakatuʻunga ʻi he hā ʻa e fiefia moʻoní?

• ʻOku anga-fēfē hono tauhi kitautolu ʻe he folofola ʻa Sihová ke tau maʻa fakalaumālié?

• ʻI he ngaahi founga fē ʻoku ʻomai ai ʻe he folofola ʻa e ʻOtuá ʻa e loto-toʻa mo e fakafiemālié?

• Ko e hā ʻoku totonu ai ke tau tui kia Sihova mo ʻene folofolá?

[Fehuʻi ki he Ako]

[Fakatātā ʻi he peesi 11]

Ko Lute, Lēhapi, mo e kau talavou Hepelū naʻe fakaheeʻi ki Pāpiloné naʻa nau ‘tauhi kinautolu ke hoa mo e folofola ʻa e ʻOtuá’

[Fakatātā ʻi he peesi 12]

Naʻe loto-toʻa ʻa Paula ʻo ‘lea ki he ngaahi fakamanatu ʻa e ʻOtuá ʻi he ʻao ʻo e ngaahi tuʻí’