Hisitōlia Fakatohitapú—ʻOku Tonu Fēfē?

ʻI HEʻENA tohi ko e Battles of the Bible, ko Chaim Herzog, ko e palesiteni ki muʻa ʻo e Vahefonua ʻo ʻIsilelí, pea mo Mordechai Gichon, ko e palōfesa mālōlō ʻo e ʻākeolosiá ʻi he ʻUnivēsiti Tel Aviv, ʻoku hā ai ʻa e poini ko ení:

“Ko e fakamatala ko ia ʻo e founga ʻi he ngaahi tau ʻi he Tohi Tapú . . . ʻoku ʻikai lava ke fakamatalaʻi ia ʻi ha foʻi faʻu pē. Ko e fakatātaá, ko e fakamoʻoni feʻunga ʻānoa pē ia ke fakahoaʻaki ʻa e feingatau ʻa Kitione ke fakafepakiʻi ʻa e kau Mitianí mo ʻenau ngaahi faʻahí, ʻa ia ʻoku lave ki ai ʻi he Fakamaau, 6-8, pea mo e ngaahi tau ʻi he Tau ʻi Tuloí, ʻa ia naʻe fakamatalaʻi ʻe Homer ʻi heʻene Iliad. Fekauʻaki mo e tohi ʻa Homer, naʻe ʻosi feʻunga ʻānoa pē ke hoko ha matāfanga hūʻanga ngofua mo ha kolo mālohi ofi mai, ko e feituʻu fakasiokālafí ia . . . ʻOku ʻikai peheni ʻa e tuʻungá ia ʻi he fakamatala Fakatohitapu ko ia fekauʻaki mo e feingatau ʻa Kitioné. Ko e ngaahi founga fengaʻunuʻaki mo e ngaahi fepaki naʻe makatuʻunga ʻi he felāveʻi he vahaʻa ʻo e ngaahi fōtunga fakasiokālafi pau ʻo e fonuá pea mo e ngaahi ngāue ʻa e kaungāmeʻá pe filí fakatouʻosi—ʻi ha feituʻu faiʻanga tau ʻokú ne kāpui ha kilomita ʻe 60 hono lōloá—ʻo ʻikai moʻoni ke lava ʻo toe faʻu ʻi ha feituʻu kehe . . . Ko ia ʻoku meimei fakamālohiʻi ai kitautolu ke tau tali ʻa e moʻoni ʻo e talanoa ki he founga ʻo e ngaahi taú hangē ko ia ʻoku fakamatalaʻi ʻi he Tohi Tapú.”

Te ke ako nai ʻa e feingatau ʻa Kitioné ʻaki hono ngāueʻaki ʻa e mape ʻi he peesi 18 mo e 19 ʻo e polosiua fakaʻatalasa ko e “See the Good Land.” a Naʻe kamataʻaki ʻa e talanoá ʻi he “fakatahataha ʻa Mitiani katoa mo e kau Amaleki, mo e ngaahi haʻa Alepea, ʻo nau aʻa mai ʻo fokotuʻu teniti mei he potu fonua ʻi lalo ʻo Sisilili.” Naʻe ui tokoni ʻa Kitione ki he ngaahi matakali ofi maí. Naʻe kamata ʻa e ngaahi meʻa naʻe hokó ʻi he vai ko Halotí ʻo aʻu ki he Moʻunga ko Molé, ʻo faai hifo ai ki he Teleʻa Sioataní. Hili ʻa e tulimui ʻi he ngaahi filí ʻo fou ʻi he Vaitafe Sioataní, naʻe ikunaʻi ai kinautolu ʻe Kitione.—Fakamaau 6:​33–8:12.

ʻOku fakahaaʻi ʻe he mape ko ia ʻi he “See the Good Land” ʻa e ngaahi feituʻu tefito ʻoku lave ki aí pea mo e ngaahi fōtunga ʻo e fonuá naʻe kau ki aí. Ko ha toe mape ʻe taha (ʻi he peesi 15) ʻoku fakahaaʻi ai ʻa e ngaahi feituʻu ʻo e ngaahi matakali ʻo ʻIsilelí. ʻE lava ʻe he ongo mapé ke tokoniʻi koe ke ke lāuʻilo ki he tonu moʻoni ʻa e fakamatala ʻi he Tohi Tapú.

ʻOku fakatātaaʻi ʻi he meʻá ni ʻa e anga ʻo e vakai ʻa e Palōfesa kuo mate ko Yohanan Aharoni: “ʻI he fonua ʻo e Tohi Tapú, ko e siokālafí mo e hisitōliá ʻokú na fehokotaki lahi ʻaupito ʻa ia ʻoku ʻikai lava ʻo mahinoʻi lelei ha taha ʻia kinaua ʻo taʻekau ai ʻa e tokoni ʻa e tahá.”

[Fakamatala ʻi lalo]

[Maʻuʻanga ʻo e Tā ʻi he peesi 32]

Mape ʻi muí: Based on maps copyrighted by Pictorial Archive (Near Eastern History) Est. and Survey of Israel