Ko e Toetuʻú—Ko ha ʻAmanaki Lāngilangiʻia

KO E tui ki ha toetuʻú ʻoku mafolalahia ia. Ko e tohi toputapu ʻa e ʻIsilamí, ʻa e Kōlaní, ʻoku līʻoa ai ha foʻi vahe kakato ki he toetuʻú. ʻOku pehē ʻi he konga ʻo e Sula 75: “ʻOku ou fuakava ʻi he ʻAho Toetuʻú . . . ʻOku fakakaukau ʻa e tangatá heʻikai te Mau malava ke fakatahatahaʻi hono ngaahi huí? . . . ʻOkú Ne fehuʻi: ‘ʻE hoko mai ʻafē ʻa e ʻAho ʻo e Toetuʻú?’ ʻIkai ʻokú Ne, (tatau pē), maʻu ʻa e mālohi ke ʻoange ʻa e moʻuí ki he kau maté?”—Sula 75:​1-6, 40.

“Ko e lotu faka-Soloasitaá,” ʻoku pehē ʻe he New Encyclopædia Britannica, “ʻokú ne fakamatalaʻi ha tui ki ha ikunaʻi fakaʻosi ʻa e Koví, ko ha toetuʻu fakalūkufua, mo ha Fakamaau Fakaʻosi, pea mo e toe fakafoki mai ʻo ha māmani maʻa ki he māʻoniʻoní.”

ʻOku fakamatalaʻi ʻe he Encyclopaedia Judaica ʻa e toetuʻú “ko e tui ʻe faifai atu pē pea toe moʻui mai ʻa e kau maté ʻi honau sinó ʻo toe nofo ʻi he māmaní.” ʻOku toe fakamatala ʻa e tohi tatau pē ʻo pehē ko e tui naʻe ohi mai ki he lotu faka-Siú ʻo pehē ʻoku maʻu ʻe he tangatá ha soulu taʻefaʻamaté ʻokú ne ʻomai ha tuʻunga fakapuputuʻu. ʻOkú ne fakahaaʻi: “Ko hono moʻoní, ko e ongo tui ko ia ʻe ua ko e toetuʻú pea mo e taʻefaʻamate ʻa e soulú ʻokú na fepaki.”

ʻOku akoʻi ʻe he Lotu-Hinituú ʻoku fuesia ʻe he tangatá ha holongā ʻo e ngaahi toe fanauʻi, pe ngaahi toe fanauʻi sino foʻou. Kapau ko e moʻoni ʻeni, kuo pau ʻoku maʻu ʻe he tangatá ha soulu ʻoku hokohoko atu ʻene moʻuí ʻi he hili ʻa e maté. Ko e tohi toputapu ʻa e Hinituú ko e Bhagavad Gita ʻoku pehē ai: “Ko e soulu ko ia ʻoku hū ki he sinó fakakātoa ʻoku taʻealaʻauha ia. ʻOku ʻikai ha taha te ne malava ke fakaʻauha ʻa e soulu taʻefaʻaʻauhá.”

ʻOku kehe ʻa e Lotu-Putá ia mei he lotu Hinituú he ʻokú ne fakaʻikaiʻi ʻe ia ʻa e ʻi ai ha soulu taʻefaʻamaté. Ka neongo ia, ʻoku tui ʻa e tokolahi ia ʻo e kau lotu Puta he ʻahó ni ʻi he Hahake Mamaʻó ki he fehikitaki holo ʻa ha soulu taʻefaʻamaté. a

Puputuʻu Fekauʻaki mo e Akonaki ʻo e Toetuʻú

Ko e ngaahi malanga putu ʻoku fakahoko ʻi he Puleʻanga-Haʻa-Kalisitiané ʻoku faʻa lave ai fakatouʻosi ki he soulu ʻoku moʻui atu ʻi he hili ʻa e maté pea ki he toetuʻú. Ko e fakatātaá, ʻoku māʻunga laulau ʻe he haʻa faifekau ʻIngilaní ʻa e ngaahi foʻi leá ni: “Koeʻuhi ko e finangalo ʻo e ʻOtua Māfimafí ʻi heʻene mohu mēsí ke ʻohake kiate ia ʻa e laumālie ʻo siʻotau tokoua ko ʻeni kuo mavahe atú, ko ia ai, ʻoku tau tuku hono sinó ki he kelekelé; ko e kelekele ki he kelekele, efuefu ki he efuefu, efu ki he efu; ʻi hono maʻu ʻa e ʻamanaki moʻoni mo pau ʻo e Toetuʻu ki he moʻui taʻengatá, fakafou ʻi hotau ʻEiki ko Sīsū Kalaisí.”—The Book of Common Prayer.

ʻOku ʻai nai ʻe he fakamatalá ni ha taha ke ne fifili pe ʻoku akoʻi ʻe he Tohi Tapú ʻa e toetuʻú pe ko e tokāteline ʻo ha soulu taʻefaʻamaté. Kae kehe, fakatokangaʻi ʻa e fakamatala naʻe fai  ʻe he Palōfesa Palotisani Falanisē ko Oscar Cullmann. ʻOkú ne tohi ʻi heʻene tohi ko e Immortality of the Soul or Resurrection of the Dead?: “ʻOku ʻi ai ha fuʻu faikehekehe lahi ʻi he ʻamanaki faka-Kalisitiane ki he toetuʻu ʻa e kau maté pea mo e tui faka-Kalisi ki he taʻefaʻamate ʻa e soulú. . . . Neongo naʻe fokotuʻu ki mui ʻe he lotu faka-Kalisitiané ha fehokotaki ʻi he ongo tui ʻe ua ko ʻení, pea ʻi he ʻahó ni ʻoku fakapuputuʻuʻi fakaʻaufuli ia ʻe he Kalisitiane anga-mahení, ʻoku ʻikai te u sio ki ha ʻuhinga ke fūfuuʻi ai ʻa e meʻa ʻoku ou lau ʻe au mo e tokolahi ʻo e kau mataotaó ko e moʻoní. . . . Ko e taumuʻa mo e ʻuhinga ʻo e Fuakava Foʻoú ʻoku puleʻi fakakātoa ia ʻe he tui ki he toetuʻú. . . . Ko e tangata kakató, ʻa ia ʻoku mate moʻoní, ʻoku fakafoki ia ki he moʻuí ʻi ha ngāue fakaefakatupu foʻou ʻa e ʻOtuá.”

ʻOku mahino mai ko e kakaí fakalūkufua ʻoku nau puputuʻu fekauʻaki mo e maté pea mo e toetuʻú. Ke fakaleleiʻi ʻa e puputuʻú, ʻoku fiemaʻu ke tau sio ki he Tohi Tapú, ʻa ia ʻokú ne ʻomai ʻa e ngaahi moʻoni naʻe fakahaaʻi ʻe he Tokotaha-Fakatupu ʻo e tangatá, ko Sihova ko e ʻOtuá. ʻOku lēkooti mai ʻe he Tohi Tapú ha ngaahi toetuʻu lahi. Tau sivisiviʻi angé ha fā ʻo e ngaahi fakamatalá ni pea fakakaukau atu ki he meʻa ʻoku nau fakahaaʻi maí.

“Nae Maʻu e he Kau Fefine E Nau Mate Kuo Fokotuʻu Moui”

ʻI heʻene tohi ki he kau Siu ko ia naʻe hoko ko e kau Kalisitiané, naʻe pehē ʻe he ʻapositolo ko Paulá ko e kau fefine ʻo e tuí naʻa nau “maʻu . . . e nau mate kuo fokotuu moui.” (Hepelu 11:​35, PM) Ko e taha ʻo e kau fefine ko iá naʻe nofo ʻi Salepita, ko ha kolo Finisia ofi ki Saitoni ʻi he Matāfanga Metiteleniané. Ko ha uitou ia naʻá ne talitali lelei ʻa e palōfita ʻa e ʻOtuá ko ʻIlaisiaá pea ʻoange kiate ia ʻa e meʻakai neongo ko e lolotonga ia ʻo ha taimi honge fakaʻulia. Ko e meʻa fakamamahí, naʻe hoko ʻa e tama ʻa e fefiné ni ʻo puke pea mate. Naʻe fua fakavave hake ia ʻe ʻIlaisiā ki he loki ʻi ʻolunga ʻa ia naʻe nofo ai ʻa e palōfitá pea kole kia Sihova ke toe fakafoki mai ʻa e moʻui ʻa e tamasiʻí. Naʻe hoko ha mana, pea ko e tamasiʻí naʻe “moʻui.” Naʻe fakafoki ia ʻe ʻIlaisiā ki heʻene faʻeé peá ne pehē: “Vakai ʻoku moʻui hoʻo tama.” Naʻe anga-fēfē ʻene talí: Naʻá ne pehē fiefia: “Kuo mahino eni kiate au ko e tangata ʻo e ʻOtua koe, pea ko e folofola ʻa Sihova ʻoku ke aʻau ko e moʻoni ia.”—1 Tuʻi 17:​22-24.

ʻI he meimei kilomita ʻe 100 ki he tonga ʻo Salepitá naʻe nofo ai ha ongo meʻa nima-homo ʻa ia naʻá na tokangaʻi ʻa e tokotaha fetongi ʻo ʻIlaisiaá, ko e palōfita ko ʻIlaisá. Ko e uaifí ko ha fefine tuʻu-ki-muʻa ia ʻi hono kolo tupuʻanga ko Sūnemí. Ko ia mo hono husepānití naʻá na loto-tatau ke ʻoange ha nofoʻanga kia ʻIlaisa ʻi ha loki ʻi ʻolunga ʻi hona ʻapí. Ko ʻena mamahi ʻi he ʻikai maʻu ha fānaú naʻe liliu ia ki he fiefia ʻi he taimi naʻe fāʻeleʻi ai ʻe he fefiné ha tamá. ʻI he tupu hake ʻa e kiʻi tamasiʻí, naʻá ne faʻa ʻalu mo e kau tolí ke kau atu ki heʻene tamaí ʻi he ngoué. ʻI he ʻaho ʻe taha naʻe hoko ai ha meʻa fakamamahi. Naʻe tangi ʻa e kiʻi tamasiʻí ʻokú ne langa-ʻulu. Naʻe ʻave fakavave ia ki ʻapi ʻe ha tokotaha tauhi. Naʻe huki ia ʻe heʻene faʻeé ʻi hono fungá, ka naʻe faai pē ʻo mate ʻa e kiʻi tamá. Naʻe fakakaukau ai ʻa e fefine loto-hohaʻá ni ke ui kia ʻIlaisa ki ha tokoni. Naʻá ne fononga fakatokelau-hihifo mo ha tokotaha tauhi ki Moʻunga Kāmeli, ʻa ia naʻe nofo ai ʻa ʻIlaisá.

ʻI he talí, naʻe fekauʻi muʻomuʻa atu ʻe he palōfitá ʻene tangata tauhí, ʻa Kēhesi, pea naʻá ne ʻilo  naʻe mate moʻoni ʻa e tamasiʻí. Naʻe muimui atu ʻa ʻIlaisa mo e fefiné, ka ko e hā ʻa e meʻa naʻe hoko ʻi he iku ʻo na aʻu ki Sūnemí? ʻOku pehē ʻe he fakamatala ʻi he 2 Tuʻi 4:​32-37: “Pea ʻi he aʻu ʻa Ilaisa ki he fale, pea ta kuo pekia ʻa e tamasiʻi, ʻo tokoto ki hono mohenga. Pea ne hu, ʻo ne tapuni ʻa e matapa ko kinaua pe, pea ne lotu kia Sihova. Pea ne heka ʻo tokoto ʻi he funga ʻo e tamasiʻi, ʻo ne ʻai hono ngutu ki he ngutu o é, mo hono mata ki he mata o é, mo hono nima ki he ongo nima o é: ʻo ne ʻoʻofaki ia, pea naʻe mafana mai ʻa e kakano ʻo e tamasiʻi. Pea ne hiki; ʻo ne ʻalu mo foki tuʻo taha ʻi he fale; toe heka mo ʻoʻofaki ki ai: pea mafatua ʻa e tamasiʻi ʻo tuʻo fitu, ʻo ne toki ʻa. Pea ne ui kia Kehesi, ʻo ne pehe, Ui mai ʻa e fefine Sunemi na. Pea ne ui ia. Pea ʻi heʻene hu mai, naʻa ne pehe, Toʻo hoʻo tama. Pea ne hu, ʻo to atu ki hono vaʻe, ʻo ne foʻohifo ki he kelekele, ʻo ne toʻo ʻene tama, ʻo hu ki tuʻa.”

ʻI he hangē ko e uitou ʻo Salepitá, naʻe ʻilo ʻe he fefine mei Sūnemí ko e meʻa naʻe hokó ko e tupu ia mei he mālohi ʻo e ʻOtuá. Naʻe maʻu ʻe he ongo fefiné ni fakatouʻosi ʻa e fiefia lahi ʻi hono toe fakafoki mai ʻe he ʻOtuá ʻena tama ʻofeiná ki he moʻuí.

Ongo Toetuʻu he Lolotonga ʻa e Ngāue Fakafaifekau ʻa Sīsuú

ʻI he taʻu ʻe 900 nai ki mui ai, naʻe hoko ai ha toetuʻu ʻo kiʻi mamaʻo siʻi pē ki he fakatokelau ʻo Sūnemí ʻi tuʻa ʻi he kolo ko Neini. ʻI he fononga ʻa Sīsū Kalaisi mo ʻene kau ākongá mei Kāpaneume ʻo ofi ki he matapā ʻo e kolo ko Neiní, naʻa nau fetaulaki ai mo ha fakahaʻele putu, pea naʻe fakatokangaʻi ʻe Sīsū ha uitou ʻa ia ne mole meiate ia ʻa ʻene tama pē ē toko tahá. Naʻe tala ange ʻe Sīsū kiate ia ke tuku ʻene tangí. Ko Luke, ko ha toketā, naʻá ne fakamatala ki he meʻa hono hoko naʻe hokó: “Pea ne ʻalu atu [ʻa Sīsū] ʻo ala ki he fata; pea tuʻu pe ʻa e kau fata. Pea ne pehē, Tama, ʻoku ou tala atu, Ke ke tuʻu. Pea nofo hake ʻa e ʻangaʻanga, ʻo kamata lea. Pea ne tuku ia ki heʻene faʻe.” (Luke 7:​14, 15) Ko e faʻahinga naʻa nau sio tonu ʻi he mana ko ʻení naʻa nau fakalāngilangiʻi ʻa e ʻOtuá. Naʻe mafola fakatonga atu ʻa e ongoongo ʻo e toetuʻú ki Siutea pea ki he vahefonua takatakaí. Ko e meʻa fakatupu tokangá, he naʻe fanongo ai ʻa e ongo ākonga ʻa Sione Papitaiso peá na fakahā ʻa e maná kia Sione. Ko ia ai, naʻá ne fekauʻi atu kinaua ke na kumi kia Sīsū pea ʻeke kiate ia pe ko Ia ʻa e Mīsaia naʻe ʻamanekiná. Naʻe tala ange ʻe Sīsū kiate kinaua: “Mo ō, ʻo fakahā kia Sione ʻa e ngaahi meʻa ʻoku mo mamata mo fanongo ki ai; ʻoku ʻa ʻa e kui, ʻeveʻeva ʻa e heke, fakamaʻa ʻa e kilia, ongo ʻa e tuli, fokotuʻu ʻa e pekia, pea ʻoku malangaʻaki ʻa e ongoongolelei ki he masiva.”—Luke 7:22.

Ko e ʻiloa lahi taha ʻi he ngaahi mana toetuʻu ʻa Sīsuú ko e meʻa ko ia naʻe fakahoko ki hono kaumeʻa ofi ko Lāsalosí. ʻI he meʻá ni, naʻe ʻi ai ha matolo ʻi he vahaʻa ʻo e mate ʻa Lāsalosí  mo e aʻu ʻa Sīsū ki he ʻapi fakafāmilí. ʻI he iku ʻo aʻu ʻa Sīsū ki Pētaní, ne ʻosi ʻa e ʻaho ia ʻe fā mei he mate ʻa Lāsalosí. ʻI he fekau atu ʻa Sīsū ke leʻei ʻa e maka tāpuni ʻo e hūʻanga ki he fonualotó, naʻe fakafepaki ki ai ʻa Māʻata, ʻo ne pehē: “ʻEiki, kuo namuhāhā; he ko hono ʻaho fā mālō ʻeni.” (Sione 11:39) Neongo ia, naʻe ʻikai ke taʻofi ʻa e toetuʻú ʻe ha faʻahinga ʻaunga pē ʻo e sino ʻo Lāsalosí. ʻI he fekau ʻa Sīsuú, naʻe “hū kituʻa ʻa e pekia, kuo haʻi hono ongo vaʻe mo ono ongo nima ʻaki ʻa e ngaahi noʻo; pea ko hono fofonga naʻe takai aki ha holoholo.” Ko e ngaahi ngāue ki mui ai ʻa e ngaahi fili ʻo Sīsuú ʻoku fakamoʻoniʻi ai ko e moʻoni ko Lāsalosí naʻe toe foki ki he moʻuí.—Sione 11:​43, 44; 12:​1, 9-11.

Ko e hā te tau fakaʻosiʻaki mei he ngaahi fakamatala toetuʻu ko ʻeni ʻe faá? Ko e tokotaha toetuʻu taki taha naʻe toe foki ki he moʻuí ʻi he tuʻunga ko e tokotaha tatau pē. Naʻe ʻiloʻi kotoa kinautolu, ʻo aʻu ki honau ngaahi kāinga ofi tahá. ʻOku ʻikai ha taha ʻo e kau toetuʻú ne lea ʻo kau ki ha meʻa naʻe hoko he lolotonga ʻo e taimi nounou naʻa nau mate aí. ʻIkai ha taha ne lea ʻo kau ki ha fononga ki ha toe māmani ʻe taha. ʻOku hā mahino naʻa nau toe foki kotoa mai ʻi he moʻui lelei. Kiate kinautolu, ne hangē pē ia haʻanau mohe ʻi ha kiʻi taimi siʻi pea nau ʻā hake leva, ʻo hangē pē ko ia naʻe fakahaaʻi ʻe Sīsuú. (Sione 11:11) Ka neongo ia, ʻi he hili atu ha taimi naʻe toe mate ʻa e faʻahingá ni.

Toe Fakataha mo e Faʻahinga ʻOfeiná —Ko ha ʻAmanaki Lāngilangiʻia

ʻI ha kiʻi taimi siʻi hili ʻa e mate fakamamahi ʻa Owen, naʻe lave ki ai ʻi he kupu ki muʻá, naʻe ʻaʻahi ai ʻene tamaí ki ha ʻapi he kaungāʻapí. ʻI he funga tēpile ʻi aí, naʻá ne sio ai ʻi ha lauʻipepa-tuʻuaki ʻoku fanongonongo ai ha malanga maʻá e kakaí kuo fokotuʻutuʻu ʻe he Kau Fakamoʻoni ʻa Sihová. Ko hono kaveingá, “ʻOku ʻI Fē ʻa e Kau Maté?,” naʻe fakamānako kiate ia. Ko e fehuʻi tofu pē ia naʻe ʻi heʻene fakakaukaú. Naʻá ne ʻalu ki he malangá pea maʻu ai ʻa e fakafiemālie moʻoni mei he Tohi Tapú. Naʻá ne ʻiloʻi ai ʻoku ʻikai ke faingataʻaʻia ʻa e kau maté. ʻI he ʻikai ko hano hokosia ha fakamamahi ʻi ha afi ʻo helí pe ʻoku ʻave ʻe he ʻOtuá ke nau hoko ko ha kau ʻāngelo ʻi hēvaní, ko e kau maté, kau ai ʻa Owen, ʻoku nau tatali ʻi he faʻitoká kae ʻoua kuo taimi ke fakaʻaaki hake kinautolu ʻi he toetuʻú.—Koheleti 9:​5, 10; Isikeli 18:4.

Kuo hoko ha meʻa fakamamahi ki ho fāmilí? ʻOkú ke hangē ko e tamai ʻa Owen, ʻo ke fifili pe ʻoku ʻi fē he taimí ni ʻa e faʻahinga ʻofeina kuo nau maté pea ko e hā ʻa e malava ʻoku ʻi ai ki ha toe sio kiate kinautolú? Kapau ko ia, ʻoku mau fakaafeʻi atu ke ke vakai ki he meʻa ʻoku toe akoʻi mai ʻe he Tohi Tapú ʻo fekauʻaki mo e toetuʻú. Mahalo pē ʻokú ke fifili: ‘ʻE hoko ʻafē ʻa e toetuʻú? Ko hai tonu ʻe maʻu ʻaonga mei aí?’ Kātaki ʻo lau ʻa e ngaahi kupu hoko maí ki ha lāulea lahi ange ki he ngaahi meʻá ni mo e ngaahi fehuʻi kehe.

[Fakamatala ʻi lalo]

[Fakatātā ʻi he peesi 5]

Naʻe kole ʻa ʻIlaisiā kia Sihova ke toe fakafoki mai ʻa e moʻui ʻa ha kiʻi tamasiʻi

[Fakatātā ʻi he peesi 5]

Naʻe ngāueʻaki ʻe Sihova ʻa ʻIlaisa ke fokotuʻu hake ʻa e tama ʻa e fefine Sūnemí

[Fakatātā ʻi he peesi 6]

Naʻe fokotuʻu hake ʻe Sīsū ʻa e tama ʻa e uitou Neiní

[Fakatātā ʻi he peesi 7]

ʻE toe fakataha ʻi he toetuʻú ʻa e ngaahi kāingá mo e faʻahinga naʻa nau ʻofa aí