ʻOku Nau Fakafaingamālieʻi Kinautolu

“KO HOʻO kakaí te nau foaki loto-lelei atu kinautolu.” (Sāme 110:​3, NW) Ko e ngaahi lea ko iá ʻoku ʻi ai ʻenau ʻuhinga makehe ki he kau ako ʻe toko 46 ʻo e kalasi hono 118 ʻo e Akoʻanga Tohi Tapu Taua Leʻo ko Kiliatí. Naʻe anga-fēfē ʻenau teuʻi kinautolu ke nau kau ki he ako ko ení, ʻa ia ʻoku akoʻi ai ʻa e faʻahinga te nau hoko ko e kau misinale ke nau tokonaki ʻa e ngaahi fiemaʻu fakalaumālie ʻo e kakai ʻi he ngaahi fonua mulí? Ko Mike mo Stacie, ko ha ongo mēmipa ʻo e kalasi hono 118, naʻá na fakamatala: “Ko ʻema fili ke moʻui ʻi ha moʻui faingofuá kuó ne tokoniʻi ai kimaua ke fakasiʻisiʻi ʻa e ngaahi fakahohaʻá pea ke ʻai ʻa e ngaahi meʻa fakalaumālié ke muʻomuʻa ʻi heʻema moʻuí. Naʻá ma fakapapauʻi ke ʻoua ʻe fakaʻatā ʻa ʻema lavameʻa ʻi he māmani fakaepisinisí ke ne kāsia ʻa e ngaahi taumuʻa fakalaumālié.” Hangē ko Mike mo Stacie, ko e kau ako kehe ʻo e kalasi ko ení naʻa nau fakafaingamālieʻi loto-lelei kinautolu pea ʻoku nau hoko he taimí ni ko e kau talaki ʻo e Puleʻangá ʻi he konitinēniti kehekehe ʻe fā.

ʻI he Tokonaki ʻo Maʻasi 12, 2005, ko ha kau fanongo ʻe toko 6,843 naʻe hā mahino naʻa nau fanongo fiefia ki he polokalama maʻu tohi fakamoʻoni akó. Ko Theodore Jaracz, ko ha mēmipa ʻo e Kulupu Pule ʻo e Kau Fakamoʻoni ʻa Sihová, naʻá ne hoko ko e tokotaha seá. Hili hono ʻoange ha talitali lelei māfana ki he kau ʻaʻahí, naʻa nau ʻi ai mei he ngaahi fonua kehekehe ʻe 28, naʻá ne fakahanga ʻa e tokangá ki he mahuʻinga ʻo e ako Fakatohitapú. ʻI heʻene toʻo mei he lea ʻa William Lyon Phelps, ko ha faiako ʻAmelika, naʻe talaki ʻe he tokotaha malangá: “Ko e tokotaha kotoa ʻoku nau maʻu ha ʻiloʻi fakamākukanga ʻo e Tohi Tapú ʻe ui moʻoni nai kinautolu ko e kau ako lelei.” Neongo ʻe ʻaonga nai ʻa e ako fakamāmaní, ʻoku toe māʻolunga ange ʻa e ako Fakatohitapú. ʻOku tokoniʻi ai ʻa e kakaí ke nau maʻu ʻa e ʻilo fekauʻaki mo e ʻOtuá, ʻa ia ʻoku taki atu ai ki he moʻui taʻengatá. (Sione 17:3) Naʻe fakaongoongoleleiʻi ʻe Tokoua Jaracz ʻa e kau maʻu tohi fakamoʻoni akó ki heʻenau loto-lelei ke kau lahi ange ʻi he polokalama ako Fakatohitapu fakaemāmani lahi ʻoku fakahoko ʻo laka hake ʻi he ngaahi fakatahaʻanga ʻe 98,000 ʻo e Kau Fakamoʻoni ʻa Sihová ʻi māmani lahi.

Fakalototoʻa Taimi Tonu ki he Kau Maʻu Tohi Fakamoʻoni Akó

Hili ʻa e ngaahi poupou kamata ʻa e tokotaha seá, naʻe malanga ʻa William Samuelson ʻi he kaveinga ko e “‘Founga ʻe Lava Ai Ke Ke Hoko ʻo Hangē ko ha Fuʻu ʻŌlive Laumata ʻi he Fale ʻo e ʻOtuá,” naʻe makatuʻunga ia ʻi he Sāme 52:8. Naʻá ne fakamatala ko e ʻōlivé ʻoku ngāueʻaki fakaefakatātā ia ʻi he Tohi Tapú ko ha fakaʻilonga ʻo e fua lahi, fakaʻofoʻofa mo e ngeia. (Selemaia 11:16) ʻI hono fakahoa ʻa e kau akó ki he ʻulu ʻōlivé, naʻe pehē ʻe he tokotaha malangá: “ʻE vakai ʻa Sihova kia kimoutolu ʻaki ʻa e fakaʻofoʻofa mo e ngeia ʻi hoʻomou fakahoko faitōnunga ʻa hoʻomou ngāue ko hono malangaʻi ʻo e Puleʻangá ʻi homou ngaahi vāhenga-ngāue fakamisinalé.” Hangē pē ko e fiemaʻu ʻe he ʻōlivé ha ngaahi fuʻu aka lalahi ke moʻui ai ʻi ha vahaʻa  taimi ʻo e pakukaá, ʻoku fiemaʻu ki he kau akó ke fakaivimālohiʻi ʻa honau ngaahi aka fakalaumālié kae lava ke nau kātekina ʻa e taʻemahuʻingaʻiá, fakafepakí pe ngaahi ʻahiʻahi kehe te nau fetaulaki nai mo ia ʻi heʻenau ngāue mulí.—Mātiu 13:21; Kolose 2:​6, 7.

Ko John E. Barr, ko e taha ʻo e kau mēmipa ʻe toko tolu ʻo e Kulupu Pulé ʻa ia naʻa nau kau ʻi he polokalamá, naʻá ne malanga ʻi he kaveinga “Ko Kimoutolu ko e Māsima ʻo e Fonua.” (Mātiu 5:13) Naʻá ne fakamatala ʻoku hangē pē ko e fakatolonga ʻe he māsima moʻoní ʻa e meʻakaí mei heʻene maumaú, ʻoku pehē pē ʻa e malanga ʻa e kau misinalé ʻo fekauʻaki mo e Puleʻanga ʻo e ʻOtuá ʻe ʻi ai hono ola fakaefakahaofi moʻui ki he faʻahinga ʻoku nau fanongó, ʻo maluʻi ai kinautolu mei he maumau fakaeʻulungāanga mo fakalaumālié. Pea ʻi ha kiʻi leʻo anga-ʻofa, naʻe ekinaki ai ʻa Tokoua Barr ki he kau maʻu tohi fakamoʻoni akó ke nau “nofo melino” mo e niʻihi kehé. (Maake 9:​50, KF) “Fakatupulekina ʻa e fua ʻo e laumālié, pea fakapapauʻi ko homou ʻulungāangá mo e leá ʻoku anga-ʻofa mo fakaʻatuʻi maʻu pē,” ko e naʻinaʻi ia ʻa e tokotaha malangá.

Ko e “Nofo Maʻu ʻi Vaka ʻi he Ngaahi Vai Lolotó” ʻa e kaveinga naʻe fakamamafaʻi ʻe Wallace Liverance, ko e taha ʻo e kau faiako Kiliatí. Hangē pē ko ha vaka ʻoku folau ʻi ha ngaahi vai loloto ʻe lava ke ne ngaʻunu ʻi he feituʻu totonú, ʻoku pehē pē hano mahinoʻi ‘“a e ngaahi [meʻa] loloto ʻo e ʻOtua”—ʻa e ngaahi moʻoni fekauʻaki mo e taumuʻa ʻa e ʻOtuá mo e founga ʻe fakahoko ai iá—ʻe lava ke ne tokoniʻi ai ha taha ke ne fai ha fakalakalaka fakalaumālié. (1 Kolinito 2:10) Ko e nofo pē ʻi he ngaahi vai mamaha fakalaumālié ʻaki ʻa e fiemālie ʻi he “motuʻalea ʻo e ngaahi elemeniti ʻo e folofola ʻa e ʻOtua” ʻokú ne taʻofi ai ʻa ʻetau laka ki muʻá pea naʻa mo ʻene tupulaki ai ʻa e hā ngali ke “tukia ʻi he meʻa ʻoku kau ki he[ʻetau] tui.” (Hepelu 5:​12, 13; 1 Timote 1:19) “ʻAi ‘ʻa e koloa mo e poto mo e ʻilomeʻa ʻa e ʻOtuá’ ke ne fakaivimālohiʻi kimoutolu ʻi hoʻomou ngaahi vāhenga-ngāue fakamisinalé,” ko e fakaʻosi ia ʻe Tokoua Liverance.—Loma 11:33.

Ko Mark Noumair, ko ha toe faiako Kiliati ia ʻe taha, naʻá ne malanga ʻi he kaveinga “Te Mou Moʻuiʻaki ʻa Homou Tofiʻá?” Laka hake ʻi he taʻu ʻe 60, kuo maʻu ʻe he Akoʻanga Tohi Tapu Taua Leʻo ko Kiliatí ha ongoongo alafalalaʻanga mo lelei koeʻuhi ko e ‘fokotuuga ʻo e fakamooni [lelei]’ kuo fai ʻe he kau maʻu tohi fakamoʻoni ako ʻo e akoʻangá. (Senesi 31:​48, PM) Ko e tofiʻa Kiliati ko ení kuo ʻoatu ia ki he kau ako ʻi he kalasi hono 118. Naʻe fakalototoʻaʻi ʻe Tokoua Noumair ʻa e kau akó ke nau faʻifaʻitaki ki he kau Tekoa ʻo e kuonga muʻá ʻo e ʻaho ʻo Nehemaiá pea fāitaha anga-fakatōkilalo mo e fakatahaʻanga fakalotofonuá pea mo e ngaahi kaungā misinalé. Naʻe naʻinaʻi kia kinautolu ke nau fakaʻehiʻehi mei he fakakaukau ʻo e “houʻeiki” hīkisia naʻe fakamatala ki ai ʻa Nehemaiá kae loto-lelei ke ʻoua ʻe feinga ke hoko ko e tefito ia ʻo e tokangá.—Nehemaia 3:5.

Ngaahi Hokosia mo e Fakaʻekeʻeke ʻAonga

Ko e konga hono hoko ʻo e polokalamá naʻe fakakaveinga “Naʻe Tupu Maʻu Pē ʻa e Folofola ʻa e ʻOtua.” (Ngāue 6:7) ʻI he malumalu ʻo e tataki ʻa e faiako Kiliati ko Lawrence Bowen, naʻe toe fakahāhaaʻi ai ʻe he kau akó ʻa e ngaahi hokosia naʻa nau fiefia ai ʻi he ngāue fakafaifekaú lolotonga ʻa hono maʻu ʻa e akó. Naʻe fakahāhaaʻi ʻe he ngaahi meʻa naʻe hokosiá kuo talaki ʻe he kau akó ʻa e Folofola ʻa e ʻOtuá ʻaki ʻa e faivelenga pea kuo faitāpuekina lahi ʻe Sihova ʻa ʻenau ngaahi feingá.

Naʻe fakahoko ʻe Richard Ashe ʻa e ngaahi fakaʻekeʻeke mo e ngaahi mēmipa ʻo e fāmili Pētelí ʻa ia ʻoku nau fengāueʻaki vāofi mo e akoʻangá. Naʻe ʻomai ʻe heʻenau ngaahi fakamatalá ha mahino māʻalaʻala ange fekauʻaki mo e poupou naʻe ʻoange ʻe he fāmili Pētelí ke tokoniʻiʻaki ʻa e kau ako Kiliatí ke nau maʻu ʻa e ʻaonga lahi taha mei heʻenau akó. Naʻe toki fetalanoaʻaki leva ʻa Geoffrey Jackson mo e niʻihi ʻo e kau maʻu tohi fakamoʻoni ako ʻo Kiliati ʻi he kuohilí. Naʻa nau fakamamafaʻi ʻa e ngaahi faingamālie lahi ʻoku ʻomai ʻe he moʻui fakamisinalé ki hono fakahīkihikiʻi mo fakalāngilangiʻi ʻo Sihová. Naʻe fakamatala ʻe he toko taha: “ʻOku siofi ʻe he kakaí ʻa e meʻa kotoa ʻokú ke fai ko ha misinalé. ʻOku nau fanongo, ʻoku nau mamata pea ʻoku nau manatuʻi.” Ko ia ai, naʻe fakalototoʻaʻi ʻa e kau akó ke nau tokanga ki hono fokotuʻu ha faʻifaʻitakiʻanga lelei ʻi he taimi kotoa pē. Ko e faleʻi ʻaonga ko ení ʻoku ʻikai ha veiveiua hono fakamoʻoniʻi ʻene mātuʻaki ʻaonga ʻi he ngaahi ʻaho ka hoko maí.

Ko Stephen Lett, ko ha mēmipa ʻo e Kulupu Pulé, naʻá ne fai ʻa e malanga fakaʻosí, naʻe fakakaveinga “Mou ʻAlu Atu ko e Kau Tokonaki ‘Vai Moʻui.’” (Sione 7:38) Naʻá ne fakamatala ʻo pehē ʻi he ngaahi māhina ʻe nima kuo ʻosí, naʻe maʻu ʻaonga taʻehanotatau ai ʻa e kau akó ʻi he inu fakaʻāuliliki mei he Folofola ʻo e moʻoni ʻa e ʻOtuá. Ka ko e hā  ʻa e meʻa ʻe fai ʻe he kau misinale foʻoú ʻaki ʻa e fakamatala kuo nau maʻú? Naʻe ekinaki ʻa Tokoua Lett ki he kau maʻu tohi fakamoʻoni akó ke nau vahevahe taʻesiokita atu ʻa e ngaahi vai fakalaumālie ko ení ke lava ai ʻa e niʻihi kehé ʻo maʻu ʻiate kinautolu ha “matavai mapunopuna hake, ʻo iku ki he moʻui taʻengata.” (Sione 4:14) Naʻe tānaki mai ʻe he tokotaha malangá: “ʻOua ʻaupito naʻa ngalo ke ʻoange kia Sihova, ‘ko e matavai ʻo e vai moʻuí,’ ʻa e fakalāngilangi mo e kolōlia ʻoku taau mo iá. Hoko ʻo kātaki ʻi hono akoʻi ʻa e faʻahinga kuo nau mavahe mai mei Pāpilone ko e Lahi ʻa ia kuo taaʻi ʻaki ʻa e pakukaá.” (Selemaia 2:​13, NW) Naʻe fakaʻosiʻaki ʻe Tokoua Lett hono fakalototoʻaʻi ʻa e kau maʻu tohi fakamoʻoni akó ke nau vēkeveke faʻifaʻitaki ki he laumālié mo e taʻahine malí pea hanganaki pehē: “Haʻu. Bea mo ia oku fieinua, ke haʻu ia. Bea ko ia oku loto ki ai, ke ne too taetotogi eia ae vai oe moui.”—Fakahā 22:​17, PM.

Naʻe fakaʻosi ʻe Tokoua Jaracz ʻa e polokalamá ʻaki ʻene vahevahe atu ʻa e ngaahi talamonū naʻe maʻu mei he ngaahi fonua kehekehe. Naʻe hoko atu heni hano lau ʻo ha tohi ʻo e houngaʻia mei ha mēmipa ʻo e kalasi maʻu tohi fakamoʻoni akó.

ʻE lava ke ke fakafaingamālieʻi koe ke ke ngāue ʻi he feituʻu ʻoku lahi ange ai ʻa e fiemaʻú? Kapau ko ia, tuli leva ki he ngaahi taumuʻa fakalaumālié, ʻo hangē ko ia kuo fai ʻe he kau ako ko ení. Utu ʻa e loto-fiefia mo e fiemālie ʻoku maʻu ʻi he taimi ʻoku ʻoatu loto-lelei ai ʻe ha tokotaha ʻa ia tonu ʻi he loto-fiefia ki he ngāue ʻa e ʻOtuá—tatau ai pē pe ko ha misinale ʻi ha fonua muli pe ko ha faifekau ʻi hoto fonuá.

[Puha ʻi he peesi 13]

ʻŪ FIKA ʻO E KALASÍ

Lahi ʻo e fonua naʻe fakafofongaʻí: 8

Lahi ʻo e ngaahi fonua naʻe vaheʻi ki aí: 19

Tokolahi ʻo e kau akó: 46

ʻAvalisi ʻo e taʻumotuʻá: 33.0

ʻAvalisi ʻo e taʻu he moʻoní: 16.5

ʻAvalisi ʻo e taʻu he ngāue fakafaifekau taimi-kakató: 12.9

[Fakatātā ʻi he peesi 15]

Kalasi Maʻu Tohi Fakamoʻoni Ako Hono 118 ʻa e Akoʻanga Tohi Tapu Taua Leʻo ko Kiliatí

ʻI he lisi ʻi laló, ko e ngaahi ʻotú ʻoku fakafika ia mei muʻa ki mui, pea ko e ngaahi hingoá ʻoku fakahokohoko ia mei he toʻohemá ki he toʻomataʻú ʻi he ʻotu taki taha.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.