“Hanganaki Fakamoʻoniʻi pe ʻOku Mou Fēfē”

“Hanganaki sivisiviʻi pe ʻoku mou ʻi he tuí, hanganaki fakamoʻoniʻi pe ʻoku mou fēfē.”​—2 KOLINITO 13:​5, NW.

1, 2. (a) ʻE anga-fēfē hono uesia kitautolu ʻe he veiveiua fekauʻaki mo ʻetau ngaahi tuí? (e) Ko e hā ʻa e tuʻunga ʻi Kolinitō ʻi he ʻuluaki senitulí naʻá ne fakatupunga nai ai ʻa e niʻihi ke veiveiua pe ko fē ʻa e hala ke fou aí?

 KO HA tangata ʻoku fāifononga ʻi he feituʻu ʻutá ʻokú ne aʻu mai ki ha ngaahi afenga ʻi he halá. ʻI he veiveiua fekauʻaki mo e hala te ne taki atu ia ki he feituʻu ʻokú ne taumuʻa ki aí, ʻokú ne ʻeke ki he kau fefonongaʻakí ki ha ngaahi fakahinohino ka ʻokú ne maʻu ha ngaahi fakamatala fepakipaki. ʻI he puputuʻú, ʻoku ʻikai malava ke ne toe hoko atu. Ko hono maʻu ʻa e veiveiua fekauʻaki mo ʻetau ngaahi tuí ʻe lava ke ne ʻomai ʻa e ola meimei tatau kiate kitautolu. Ko e faʻahinga veiveiua peheé ʻe lava ke ne uesia ʻa ʻetau malava ke fai ha ngaahi filí, ʻo ne fakatupunga ai kitautolu ke tau veiveiua pe ko fē ʻa e hala ke fou aí.

² Naʻe malanga hake ha tuʻunga ne mei lava ke hoko ai ha uesia pehē ʻi he kakai ʻe niʻihi ʻi he fakatahaʻanga Kalisitiane he ʻuluaki senitulí ʻi Kolinitō, Kalisi. Naʻe fehuʻia ai ʻe he “haʻa ʻaposetolo makehe” ʻa e mafai ʻo e ʻapositolo ko Paulá, ʻo nau pehē: “Ko ʻene ngaahi ipiseli ʻoku mamafa mo kaukaua; ka ko e fotu mai ʻo hono sino ʻoku masivesiva, pea ko ene lea ʻoku pasī pe.” (2 Kolinito 10:​7-​12; 11:​5, 6) Ko e faʻahinga fakakaukau peheé naʻá ne fakatupunga nai ai ʻa e niʻihi ʻi he fakatahaʻanga Kolinitoó ke veiveiua pe ko fē ʻa e hala ke fou aí.

3, 4. Ko e hā ʻoku totonu ai ke mahuʻinga kiate kitautolu ʻa e ekinaki ʻa Paula ki he kau Kolinitoó?

³ Naʻe fokotuʻu ʻe Paula ʻa e fakatahaʻanga ʻi Kolinitoó lolotonga ʻene ʻaʻahi ki ai ʻi he 50 T.S. Naʻá ne nofo ʻi Kolinitō ʻi he “taʻu kātoa mo e māhina ʻe ono, ʻo ne fai ʻi honau lotolotonga ʻene ako ʻaki ʻa e folofola ʻa e ʻOtua.” Ko e moʻoni, “naʻe hokohoko tuʻu ʻa e tafoki mai mo e papitaiso ʻa e niʻihi Kolinito ʻi heʻenau fanongo.” (Ngāue 18:​5-​11) Naʻe mahuʻingaʻia lahi ʻa Paula ʻi he lelei fakalaumālie ʻa hono ngaahi kaungātui ʻi Kolinitoó. ʻIkai ngata aí, naʻe tohi ʻa e kau Kolinitoó kia Paula ki ha faleʻi ʻi ha ngaahi meʻa tefito. (1 Kolinito 7:1) Ko ia naʻá ne ʻoange ai kiate kinautolu ha ekinaki feʻungamālie moʻoni.

⁴ “Hanganaki sivisiviʻi pe ʻoku mou ʻi he tuí,” ko e tohi ia ʻa Paulá, “hanganaki fakamoʻoniʻi pe ʻoku mou fēfē.” (2 Kolinito 13:​5, NW) Ko hono ngāueʻaki ʻa e akonaki ko ʻení naʻe pau pē naʻá ne maluʻi ai ʻa e fanga tokoua ʻi Kolinitoó mei he hoko ʻo veiveiua fekauʻaki mo e hala ke fou aí. ʻE lava ke ne fai ʻa e meʻa tatau kiate kitautolu he ʻahó ni. Ko ia ai, ʻe lava fēfē ke tau muimui ʻi he faleʻi ʻa Paulá? ʻE lava fēfē ke tau sivisiviʻi pe ʻoku tau ʻi he tuí? Pea ko e hā ʻoku kau ki hono fakamoʻoniʻi pe ʻoku tau fēfeé?

“Hanganaki Sivisiviʻi pe ʻOku Mou ʻi he Tuí”

5, 6. Ko e hā ʻa e tuʻunga ʻoku tau maʻu ke siviʻaki pe ʻoku tau ʻi he tuí, pea ko e hā ʻoku hoko ai ia ko e tuʻunga leleí?

⁵ ʻI ha sivi, ʻoku anga-maheniʻaki ke ʻi ai ha meʻa ʻoku siviʻi, pea ʻoku ʻi ai ha makatuʻunga pe tuʻunga ʻa ia ʻoku fakahoko ʻo fakatatau ki ai ʻa e siví. ʻI he tuʻungá ni, ko e meʻa ʻoku siviʻí ʻoku ʻikai ko e tuí​—ʻa e ngaahi tefitoʻi tui kuo tau maʻú. Ko kitautolu ia ʻi he tuʻunga ko e faʻahinga tāutahá ʻa e meʻá. Ke fakahoko ʻa e siví, ʻoku tau maʻu ha tuʻunga haohaoa. Ko ha hiva naʻe faʻu ʻe he tokotaha-tohi-saame ko Tēvitá ʻoku pehē ai: “Ko e lao ʻa Sihova ʻoku haohaoa, ʻoku fakafoki ai ʻa e laumalie; ko e fakamoʻoni ʻa Sihova ʻoku pau, ʻoku fakapoto ai siʻi taʻe fie vale. Ko e ngaahi enginaki ʻa Sihova ʻoku totonu, ʻoku fakatupu loto fiefia: ko e tuʻutuʻuni ʻa Sihova  ʻoku tafesinoʻivai [pe maʻa], ʻoku fakamaama ai ʻa e mata.” (Sāme 19:​7, 8) ʻOku ʻi he Tohi Tapú ʻa e ngaahi lao haohaoa mo e ngaahi enginaki totonu ʻa Sihová, mo ʻene ngaahi fakamoʻoni falalaʻangá mo e ngaahi tuʻutuʻuni maʻá. Ko e pōpoaki ʻoku maʻu ʻi aí ko e tuʻunga lelei ia ki he siví.

⁶ ʻI he fekauʻaki mo e pōpoaki ko ia kuo fakamānavaʻi ʻe he ʻOtuá, ʻoku pehē ʻe he ʻapositolo ko Paulá: “Ko e folofola ʻa e ʻOtua, ko e koto moʻui mo e koto malohi, pea masila ange ʻi he heleta fakatoumata fuape; ʻo ne ʻasi atu ʻo māioioʻi ʻa e loto mo e laumalie, ʻio, hono ngaahi hokonga mo e uho; pea ʻoku ne vavangaʻi ʻa e ngaahi holi mo e fakakaukau ʻo e loto.” (Hepelu 4:​12) ʻIo, ko e folofola ʻa e ʻOtuá ʻe lava ke ne siviʻi hotau lotó​—pe ʻoku tau fēfē moʻoni ʻi loto. ʻE lava fēfē ke tau ngāueʻaki ʻi heʻetau moʻuí ʻa e pōpoaki mafatukituki mo mālohi ko ení? ʻOku ʻikai ha veiveiua ʻa e tangata-tohi-sāmé ki he meʻa ʻoku fekauʻaki mo ení. Naʻá ne hivaʻaki: “Monuʻiaa ka ko e tangata [ko ē] . . . ko e Lao ʻo Sihova ʻa ʻene manako, ʻio ʻi he lao oʻona ʻoku ne fakalaulauloto ʻaho mo e po.” (Sāme 1:​1, 2) “Ko e Lao ʻo Sihova” ʻoku maʻu ia ʻi he Folofola tohi ʻa e ʻOtuá, ʻa e Tohi Tapú. Kuo pau ke tau maʻu ʻa e fiefia ʻi hono lau ʻa e Folofola ʻa Sihová. Ko e moʻoni, kuo pau ke tau vaheʻi ha taimi ke lau ia ʻi ha tuʻunga leʻo-siʻi, pe ke fakalaulauloto ki ai. ʻI heʻetau fai ení, ʻoku fiemaʻu ke tau fakaʻatā ʻa kitautolu​—ʻa e ngaahi meʻa naʻe siviʻí—ki he meʻa ʻoku hiki ʻi aí.

 7. Ko e hā ʻa e founga tuʻu-ki-muʻa ki hono sivi pe ʻoku tau ʻi he tuí?

⁷ Ko ia ai, ko e founga tuʻu-ki-muʻa ʻo hono siviʻi kitautolu pe ʻoku tau ʻi he tuí, ko hono lau pea mo fakalaulauloto ki he Folofola ʻa e ʻOtuá pea sivisiviʻi ʻa e anga ʻo e fehoanaki ʻa hotau ʻulungāangá mo e meʻa ʻoku tau akó. ʻE lava ke tau fiefia ʻi heʻetau maʻu ai ʻa e tokoni lahi ke mahinoʻi ʻa e Folofola ʻa e ʻOtuá.

 8. ʻE anga-fēfē hono tokoniʻi kitautolu ʻe he ʻū tohi “ae tamaioeiki agatonu mo boto” ke tau sivi pe ʻoku tau ʻi he tuí?

⁸ Kuo tokonaki mai ʻe Sihova ʻa e ngaahi akonaki mo e fakahinohino fakafou ʻi he ʻū tohi “ae tamaioeiki agatonu mo boto,” ʻa ia ʻoku fakamatalaʻi ai ʻa e Tohi Tapú. (Mātiu 24:​45, PM) Ko e fakatātaá, fakakaukau angé ki he puha kuo fakakaveinga ko e “Ngaahi Fehuʻi ki he Fakalaulauloto” ʻi he fakaʻosinga ʻo e ngaahi vahe lahi taha ʻi he tohi ʻUnuʻunu Ofi kia Sihova. a He ngaahi faingamālie lelei ē ki ha fakalaulauloto fakafoʻituitui ʻoku ʻomai ʻe he tafaʻaki ko ʻeni ʻo e tohí! Ko e ngaahi tuʻunga-lea lahi kuo fai ʻa e lāulea ki ai ʻi heʻetau ongo pepá, ʻa e Taua Leʻo mo e ʻĀ Hake!, ʻoku toe tokoniʻi ai kitautolu ke sivi pe ʻoku tau ʻi he tuí. ʻI he fekauʻaki mo e ngaahi kupu ʻo e tohi Palovepí ʻi he ngaahi ʻīsiu ki muí ni mai ʻo e Taua Leʻo, naʻe pehē ai ʻe ha fefine Kalisitiane ʻe taha: “ʻOku ou ʻilo ʻoku mātuʻaki ʻaonga ʻa e ngaahi kupu ko ʻení. ʻOku nau tokoniʻi au ke sivisiviʻi pe ʻoku fehoanaki moʻoni ʻa ʻeku leá, ʻulungāangá mo e fakakaukaú pea mo e ngaahi tuʻunga māʻoniʻoni ʻa Sihová.”

9, 10. Ko e hā ʻa e ngaahi tokonaki kuo ʻomi ʻe Sihova ke tokoniʻi ai kitautolu ke hanganaki sivi pe ʻoku tau ʻi he tuí?

⁹ ʻOku tau toe maʻu foki ha tataki mo ha fakalototoʻa lahi ʻi he ngaahi fakataha ʻa e fakatahaʻangá, ngaahi ʻasemipilií pea mo e ngaahi fakataha-lahí. ʻOku kau ʻa e ngaahi meʻá ni ʻi he lotolotonga ʻo e ngaahi tokonaki fakalaumālie kuo fai ʻe he ʻOtuá maʻá e faʻahinga ʻa ia naʻe kikite ʻa ʻAisea fekauʻaki mo iá: “ʻE hoko ʻo pehe ʻi he kuonga ʻamui, ʻe fokotuʻu ʻa e moʻunga ʻo e fale ʻo Sihova ko e ʻulu ʻo e ngaahi moʻunga, pea ʻe mahiki hake ʻi he ngaahi foʻi maʻolunga; pea ʻe tafe ki ai ʻa e ngaahi kakai kotoa pe. ʻIo ʻe ōange ʻa e ngaahi kakai lahi, pea te nau pehe, Haʻuā, ke tau ʻalu hake ki he moʻunga ʻo Sihova, . . . pea te ne ako kiate kitautolu hano ngaahi ʻalunga, pea te tau fou ʻi hono ngaahi founga.” (Aisea 2:​2, 3) Ko ha tāpuaki moʻoni ia ke maʻu ha fakahinohino pehē fekauʻaki mo e ngaahi founga ʻa Sihová.

¹⁰ ʻOua naʻa ngalo ʻa e faleʻi mei he faʻahinga ʻoku nau maʻu ʻa e tuʻunga taau fakalaumālié, ʻo kau ai ʻa e kau mātuʻa Kalisitiané. ʻI he fekauʻaki mo kinautolú, ʻoku pehē ʻe he Tohi Tapú: “Kainga, neongo pe ʻe puke nima ha taha lolotonga ʻene fai ha kovi; ka ko kimoutolu, ʻa e kau fakalaumalie, mou faitoʻo ki he taha pehe ʻo  angafakaalaala; pea ke vakai kiate koe naʻa ʻiloange ʻe ʻahiʻahiʻi mo koe foki.” (Kaletia 6:1) He houngaʻia lahi ē ko kitautolu ʻi he tokonaki ko ʻeni ki hotau fakatonutonú!

11. ʻI hono sivi pe ʻoku tau ʻi he tuí ʻoku fiemaʻu ki ai ʻa e hā?

¹¹ Ko ʻetau ʻū tohí, ngaahi fakataha ʻa e fakatahaʻangá, kau tangata kuo ʻosi fakanofó​—ko e ngaahi tokonaki fakaofo eni meia Sihova. Kae kehe, ko hono siviʻi pe ʻoku tau ʻi he tuí, ʻoku fiemaʻu ki ai ʻa e sivisiviʻi-kita. Ko ia ʻi he taimi ʻoku tau lau ai ʻa ʻetau ʻū tohí pe fanongo ki he ngaahi ekinaki Fakatohitapú, ʻoku fiemaʻu ke tau ʻeke hifo kiate kitautolu: ‘ʻOku fakamatalaʻi nai au ʻe he meʻá ni? ʻOku ou fai eni? ʻOku ou pipiki nai ki he tefito ʻo e ngaahi tui faka-Kalisitiané?’ Ko ʻetau fakakaukau fekauʻaki mo e fakahinohino ʻoku tau maʻu fakafou ʻi he ngaahi tokonakí ni ʻoku toe ʻi ai foki ʻa ʻene kaunga ki hotau tuʻunga fakalaumālié. “Oku ikai maʻu e he tagata fakakakano ae gaahi mea oe Laumalie oe Otua: he koe vale ia kiate ia,” ko e lau ia ʻa e Tohi Tapú. “Ka ko ia oku fakalaumalie oku ne iloʻi [pe sivisiviʻi] ae mea kotoabe.” (1 Kolinito 2:​14, 15, PM) ʻIkai ʻoku totonu ke tau feinga ke tauhi maʻu ha vakai lelei mo fakalaumālie ki he meʻa ʻoku tau lau ʻi heʻetau ʻū tohí, makasiní mo e ʻū tohi kehé, pea mo e meʻa ʻoku tau fanongo ki ai ʻi heʻetau ngaahi fakatahá mo e kau mātuʻá?

“Hanganaki Fakamoʻoniʻi pe ʻOku Mou Fēfē”

12. Ko e hā ʻoku kau ki hono fakamoʻoniʻi pe ʻoku tau fēfeé?

¹² ʻI he fakamoʻoniʻi pe ʻoku tau fēfeé ʻoku kau ki ai ʻa e fakafuofuaʻi-kita. ʻIo, ʻe lava ke tau ʻi he moʻoní, ka ko e hā ʻa e tuʻunga fakalaumālie ʻoku tau aʻu ki aí? Ko hono fakamoʻoniʻi pe ʻoku tau fēfeé ʻoku kau ki ai ʻa hono ʻoatu ʻo ha fakamoʻoni ʻo e matuʻotuʻa pea mo e houngaʻia moʻoni ki he ngaahi tokonaki fakalaumālié.

13. Fakatatau ki he Hepelu 5:​14, ko e hā ʻoku hoko ko e fakamoʻoni ia ki heʻetau matuʻotuʻá?

¹³ Ko e hā ʻa e fakamoʻoni ʻo e matuʻotuʻa faka-Kalisitiané ʻe lava ke tau kumi ki ai ʻiate kitautolú? Naʻe tohi ʻe he ʻapositolo ko Paulá: “Ko e meʻakai malohi ʻoku ʻanautolu ʻoku matuʻotuʻa, ʻa kinautolu ʻa ia ko e meʻa ʻi heʻenau faʻa fai, kuo ako honau ngaahi ongoʻanga ke sivi ʻa e lelei mo e kovi.” (Hepelu 5:​14) ʻOku tau ʻoatu ʻa e fakamoʻoni ʻo e matuʻotuʻá ʻaki hono akoʻi ʻetau mafai fakaefakakaukaú. Hangē tofu pē ko e fiemaʻu ki he ngaahi uoua tefito ʻi he sino ʻo ha tokotaha sipoti ke akoʻi ʻaki hono toutou ngāueʻi ia ki muʻa ke ne lava ʻo ʻi he tuʻunga māʻolunga ʻi heʻene sipotí, ko ʻetau mafai fakaefakakaukaú ʻoku fiemaʻu ke akoʻi ia ʻaki hono ngāueʻaki ʻa e ngaahi tefitoʻi moʻoni Fakatohitapú.

14, 15. Ko e hā ʻoku totonu ai ke tau fai ha feinga tōtōivi ke ako ki he ngaahi meʻa loloto ange ʻo e Folofola ʻa e ʻOtuá?

¹⁴ Kae kehe, ki muʻa ke tau akoʻi ʻetau mafai fakaefakakaukaú, kuo pau ke tau maʻu ʻa e ʻiló. Ke maʻu ʻení, ʻoku fiemaʻu tefito ki ai ʻa e ako fakafoʻituitui tōtōivi. ʻI he taimi ʻoku tau fakahoko tuʻumaʻu ai ʻa e ako fakafoʻituituí​—ʻo tautautefito ki he ngaahi meʻa loloto ange ʻo e Folofola ʻa e ʻOtuá—ʻoku hoko ʻo lelei ange ai ʻa ʻetau mafai fakaefakakaukaú. ʻI he faai mai ʻa e ngaahi taʻú, kuo lahi ʻa e ngaahi tuʻunga-lea loloto kuo fai ʻa e lāulea ki ai ʻi he Taua Leʻo. ʻOku anga-fēfē ʻetau talí ʻi he taimi ʻoku tau fetaulaki ai mo e ngaahi kupu ʻoku lāulea ai ki he ngaahi moʻoni loloto angé? ʻOku tau feinga nai ke fakamamaʻo mei ai koeʻuhí pē ʻoku ʻi ai “ʻa e ngaahi meʻa ʻoku ʻilongataʻa?” (2 Pita 3:​16) ʻI hono kehé,  ʻoku tau fai ha feinga lahi ange ke mahinoʻi ʻa e meʻa ʻoku lau fekauʻaki mo iá.​—Efeso 3:​18.

¹⁵ Fēfē kapau ʻoku faingataʻa kiate kitautolu ʻa hono fai ʻo ha ako fakafoʻituituí? ʻOku mātuʻaki mahuʻinga ke tau feinga ke maʻu pe fakatupulekina ha saiʻia ʻi hono fai iá. b (1 Pita 2:2) Ko e tupu ʻo matuʻotuʻá ʻoku fiemaʻu ai ke tau ako ke maʻu ha meʻakai mei he meʻakai mālohí, ʻa e ngaahi moʻoni loloto ange ʻo e Folofola ʻa e ʻOtuá. He ka ʻikai ia, ʻe fakangatangata moʻoni ai pē ʻa ʻetau mafai fakaefakakaukaú. Kae kehe, ʻi hono ʻoatu ha fakamoʻoni ki he matuʻotuʻá, ʻoku kau ki ai ʻa e meʻa lahi ange ia ʻi hono maʻu pē ʻa e mafai fakaefakakaukaú. ʻI he moʻui fakaʻahó kuo pau ke tau ngāueʻaki ai ʻa e ʻilo ʻoku tau maʻu mei he ako fakafoʻituitui tōtōiví.

16, 17. Ko e hā ʻa e ekinaki ʻoku ʻomai ʻe he ākonga ko Sēmisí ʻo fekauʻaki mo e hoko “ko e kau fai ki he folofola”?

¹⁶ Ko e fakamoʻoni pe ʻoku tau fēfeé ʻoku toe ʻiloʻi ia ʻi heʻetau ngaahi fakahāhā ʻa e houngaʻia ʻi he moʻoní​—ʻa ʻetau ngaahi ngāue ʻo e tuí. ʻI hono ngāueʻaki ha fakatātā mālohi ke fakamatalaʻiʻaki ʻa e tafaʻaki ko ʻeni ʻo e fakafuofuaʻi-kitá, ʻoku pehē ʻe he ākonga ko Sēmisí: “Mou hoko ko e kau fai ki he folofola, ʻo ʻikai ko e kau fanongo pe, ʻo mou kākāʻi kimoutolu. He ka ai ha taha, ʻa ia ko ha fanongo pe ki he folofola, ka ko ha taʻe fai ki ai, ʻoku tatau ia mo ha siana ʻoku ne fakasio ki he fōtunga naʻe tupu mo ia ʻi ha sioʻata: he kuo ne fakasio leva kiate ia, pea ne ʻalu, pea ngalo leva pe ko e ha hono anga. Ka ko ia ʻoku ne fakasio hifo ki he lao haohaoa, ʻa e lao tauʻataina, ʻo ne taʻut[u] ai, kaeʻūmaʻā ʻoku ʻikai te ne hoko ko ha taha fanongo kae ngalo, ka ko ha taha fai ngaue, ʻe, ʻe monuʻia ʻa e toko taha ko ia ʻi heʻene fai.”​—Semisi 1:​22-​25.

¹⁷ ʻOku pehē ʻe Sēmisi: ‘Sio ki he sioʻata ʻo e folofola ʻa e ʻOtuá, pea fakafuofuaʻi ʻa koe tonu. Kīvoi ʻi hono fai ʻení pea sivisiviʻi ʻa koe tonu ʻaki ʻa e fakamaama ʻokú ke maʻu ʻi he folofola ʻa e ʻOtuá. Pea ʻoua ʻe ngalo vave ʻa e meʻa kuó ke sio ki aí. Fai ʻa e ngaahi fakatonutonu ʻoku fiemaʻú.’ Ko e muimui ki he akonakí ni ʻe hoko nai ia ʻi ha ngaahi taimi ko ha pole.

18. Ko e hā ʻoku ʻomi ai ʻe he muimui ki he akonaki ʻa Sēmisí ha polé?

¹⁸ Ko e fakatātaá, fakakaukau angé ki he fiemaʻu ko ia ke kau ʻi he ngāue malangaʻi ʻo e Puleʻangá. “He ʻoku fai ʻa e tui ʻaki ʻa e loto ke maʻu ʻa e fakatonuhia,” ko e tohi ia ʻe Paulá, “ka ʻoku fai ʻa e fakaha ʻaki ʻa e ngutu ke maʻu ʻa e fakamoʻui.” (Loma 10:10) Ko hono fai ʻo ha talaki fakahāhā ʻo e fakamoʻuí ʻaki hotau ngutú ʻoku fiemaʻu ki ai ʻa e ngaahi fengaʻunuʻaki lahi. Ko e kau ki he ngāue fakamalangá ʻoku ʻikai ke hoko ia ko ha meʻa fakaenatula ki he tokolahi taha ʻo kitautolú. ʻI he faivelenga ʻi hono fai iá mo hono ʻoange ki he ngāué ʻa e mahuʻinga ʻoku tuha mo ia ʻi heʻetau moʻuí, ʻoku fiemaʻu ki ai foki ha toe ngaahi liliu mo e feilaulau lahi ange. (Mātiu 6:​33) Ka ʻi heʻetau hoko pē ko ia ko e kau fai ʻo e ngāue ko eni kuo ʻomai ʻe he ʻOtuá, ʻoku tau fiefia koeʻuhí ko e fakahīkihiki ʻoku ʻomi ai kia Sihová. Ko ia ai, ʻoku tau hoko ko e kau fanongonongo faivelenga ʻo e Puleʻangá?

19. Ko e hā ʻoku totonu ke fakakau ʻi heʻetau ngaahi ngāue ʻo e tuí?

¹⁹ ʻOku totonu ke lahi fēfē ʻa ʻetau ngaahi  ngāue ʻi he tuí? ʻOku pehē ʻe Paula: “Ko e ngaahi meʻa naʻa mou ako, mo maʻu, mo fanongoa, mo mamata, ʻiate au, ko e ngaahi meʻa ko ia ke mou fai; pea ʻe toki ʻiate kimoutolu ʻa e ʻOtua ʻoku aʻana ʻa e nonga.” (Filipai 4:9) Ko e fakamoʻoni pe ʻoku tau fēfeé ʻoku ʻoatu ia ʻi heʻetau ngāueʻaki ʻa e meʻa kuo tau ako, tali, fanongo mo sio ki aí​—ʻa e ʻalunga kakato ʻo e fakatapui mo e tuʻunga ākonga faka-Kalisitiané. “Ko eni ʻa e hala, fou ai,” ko e fakahinohino ia ʻa Sihova fakafou ʻi he palōfita ko ʻAiseá.​—Aisea 30:21.

20. Ko e faʻahinga tāutaha fēfē ʻoku nau hoko ko ha tāpuaki ki he fakatahaʻangá?

²⁰ Ko e kau tangata mo e kau fefine ʻa ia ko e kau ako tōtōivi ʻo e Folofola ʻo e ʻOtuá, ʻa ia ko e kau malanga faivelenga ʻo e ongoongo leleí, ʻa ia ʻoku nau taʻemele ʻi heʻenau anga-tonú, pea ko e kau poupou mateaki kinautolu ʻo e Puleʻangá ʻoku nau hoko ko ha tāpuaki lahi ki he fakatahaʻangá. Ko ʻenau ʻi aí ʻoku tānaki atu ia ki he tuʻumaʻu ʻa e fakatahaʻanga ʻoku nau feohi mo iá. ʻOku nau fakamoʻoniʻi ʻa ʻenau tokoni lahí, tautautefito koeʻuhí ʻoku tokolahi ʻaupito ʻa e faʻahinga foʻou ke fai ha tokanga ki aí. ʻI he taimi ʻoku tau tokanga ai ki he akonaki ʻa Paula ke ‘hanganaki sivisiviʻi kitautolu pe ʻoku tau ʻi he tuí, ke hanganaki fakamoʻoniʻi pe ʻoku tau fēfeé,’ ʻoku tau hoko ai mo kitautolu foki ko ha tākiekina lelei ki he niʻihi kehé.

Fiefia ʻi Hono Fai ʻa e Finangalo ʻo e ʻOtuá

21, 22. ʻE anga-fēfē ke tau maʻu ʻa e fiefiá ʻi hono fai ʻa e finangalo ʻo e ʻOtuá?

²¹ “ʻE hoku ʻOtua, ʻoku ou manako ke u fai hoʻou finangalo,” ko e hiva ia ʻa Tuʻi Tēvita ʻo ʻIsileli ʻo e kuonga muʻá, “pea ʻoku ʻi hoku loto fatu hoʻo lao.” (Sāme 40:8) Naʻe maʻu ʻe Tēvita ʻa e fiefia ʻi hono fai ʻa e finangalo ʻo e ʻOtuá. Ko e hā hono ʻuhingá? Koeʻuhi naʻe ʻi he loto ʻo Tēvitá ʻa e lao ʻa Sihová. Naʻe ʻikai ke veiveiua ʻa Tēvita ia fekauʻaki mo e hala ke fou aí.

²² ʻI he taimi ʻoku ʻi hotau loto fatú ai ʻa e lao ʻa e ʻOtuá, ʻoku ʻikai leva ke tau veiveiua fekauʻaki mo e hala ke fou aí. ʻOku tau maʻu ʻa e fiefiá ʻi hono fai ʻa e finangalo ʻo e ʻOtuá. Ko ia ai, tau “tōtōivi” leva ʻi heʻetau tauhi ʻa Sihova mei he lotó.​—Luke 13:24.

[Fakamatala ʻi lalo]

ʻOkú Ke Manatuʻi?

• ʻE lava fēfē ke tau sivisiviʻi pe ʻoku tau ʻi he tuí?

• Ko e hā ʻoku kau ki hono fakamoʻoniʻi pe ʻoku tau fēfeé?

• Ko e hā ʻa e fakamoʻoni ʻo e matuʻotuʻa faka-Kalisitiané ʻe lava ke tau fakahāhaá?

• ʻOku anga-fēfē hono tokoniʻi kitautolu ʻe heʻetau ngaahi ngāue ʻo e tuí ke fakafuofuaʻi pe ʻoku tau fēfeé?

[Fehuʻi ki he Ako]

[Fakatātā ʻi he peesi 23]

ʻOkú ke ʻiloʻi ʻa e founga tuʻu-ki-muʻa ʻo hono sivisiviʻi pe ʻokú ke ʻi he tuí?

[Fakatātā ʻi he peesi 24]

ʻOku tau ʻoatu ʻa e fakamoʻoni ʻo ʻetau matuʻotuʻa faka-Kalisitiané ʻaki ʻa hono ngāueʻi ʻetau mafai fakaefakakaukaú

[Fakatātā ʻi he peesi 25]

ʻOku tau fakamoʻoniʻi ʻoku tau fēfeé ʻaki ʻa e hoko ‘ʻo ʻikai ko e kau fanongo kae ngalo, ka ko e kau fai ki he folofolá’