“Ko Hoku Tokoni ʻOku Meia Sihova”

Taʻehoa pea Fiemālie ʻi he Ngāue ʻa Sihová

“KO E fuʻu tokolahi ʻo kimautolú ʻoku mau fiefia ʻaupito neongo ʻoku ʻikai ke mau mali,” ko e lea ia ʻa ha fefine Kalisitiane ʻi Sipeini. Ko e hā ʻa e ʻuhinga ki heʻene fiemālié? “ʻOku mau fiefia ʻi heʻemau hoko ʻo tauʻatāina mei he ngaahi loto-moʻua lahi felāveʻi mo e malí koeʻuhí kae lava ke mau tauhi kakato ange ki hotau ʻOtuá, ʻa Sihova.”

Ko e ngaahi ongoʻi peheé ʻoku fehoanakimālie ia mo e lau ʻa e Folofola ʻa e ʻOtuá ʻo fekauʻaki mo e tuʻunga taʻehoá. ʻI he taimi naʻe lāulea ai ʻa e ʻapositolo ko Paulá ki he ngaahi meʻa ʻoku kau ai ʻa e nofo malí, naʻá ne ʻomai ai ʻa e fakamaama fakamānavaʻi ko ení: “Pea ko ʻeku lea e ki he kau taʻemali mo e kau fefine uitou: ʻOku lelei kiate kinautolu ke nau nofo pe ʻo hange ko au.” Ko Paulá tonu naʻe ʻikai te ne mali. Ka ko e hā ʻa e ʻuhinga naʻá ne ʻomai ki heʻene fakaongoongoleleiʻi ʻa e tuʻunga taʻehoá? Naʻá ne pehē ko e tokotaha malí ʻoku vahevahe hono lotó, ka ko e tangata pe fefine taʻemalí “ʻoku moʻua hono loto ʻi he ngaahi meʻa ʻa e ʻEiki.” (1 Kolinito 7:​8, 32-34) Ko e tauhi kia Sihová ʻa e tefitoʻi meʻa ʻokú ne ʻai ai ha tokotaha taʻehoa ke ne fiefia pea fiemālié.

Taʻehoa mo ha Taumuʻa Māʻolunga

Ko e ngaahi fakamatala ʻa Paulá ʻe ngali fakapuputuʻu nai ʻi he ngaahi anga fakafonua ʻoku nau fakamamafaʻi ʻa e mahuʻinga ʻo e malí pea mo hono ʻohake ʻo ha fāmilí. Kae kehe, ko Sīsū Kalaisí tonu—ʻa ia naʻe taʻemali ka naʻá ne fiefia pea fiemālié—naʻá ne lave ki ha taumuʻa māʻolunga maʻá e kau Kalisitiane taʻehoá. Naʻá ne pehē: “ʻOku ʻi ai ʻa e faʻahinga iunoke kuo nau ngaohi kinautolu ke pehe, koeʻuhi ko e Puleʻanga ʻo Hevani. Ko ia ʻoku ne mafai ke tali, ke ne tali.”—Mātiu 19:12.

ʻI he fehoanaki mo e ngaahi lea ko iá, kuo ʻiloʻi ai ʻe he tokolahi ko e tuʻunga taʻehoá ʻoku fakaʻatā ai kinautolu ke nau tauhi ki he ʻOtuá ʻo ʻikai fakaleluʻi ʻe he meʻa anga-maheni ʻi he moʻui fakaemalí. (1 Kolinito 7:35) ʻOku laui afe ʻa e kau Kalisitiane ʻoku nau lotu fiefia kia Sihova ʻo ʻikai ha hoa mali, pea ʻoku nau maʻu ʻa e fiefia ʻi hono tokoniʻi longomoʻui ʻa e niʻihi kehé. a

Ko e tokolahi ʻo e kau Kalisitiane taʻemalí ʻoku nau ʻiloʻi ko e fiefiá ʻoku ʻikai ko e monū pē ia ki he kakai malí pea ko e mamahí ʻoku ʻikai ko e meʻa pē ia ke hokosia ʻe he kakai taʻehoa kotoa pē. ʻI he ongo kulupú fakatouʻosi, ko e niʻihi ʻoku nau hokosia ʻi he taimi ʻe niʻihi ʻa e fiefia pea pehē foki ki he mamahi. Ko hono moʻoní, ʻoku leaʻaki totonu ʻe he Tohi Tapú ko e malí ʻiate ia pē ʻokú ne ʻomai ʻa e ‘mamahi i he jinó.’—1 Kolinito 7:​28, PM.

Taʻehoa Koeʻuhí ko e Tuʻungá

Ko e tokolahi ʻoku nau taʻehoa ʻo ʻikai ko ha fili ki ai ka koeʻuhí ko e ngaahi tuʻungá. Te nau holi nai ki he māfana, feohi mo e ʻofa ʻa ia ʻe lava ke maʻu ʻi loto ʻi he fokotuʻutuʻu fakaemalí. Kae kehe, ki he niʻihi, ʻoku taʻofi nai kinautolu ʻi he lolotongá ni mei he malí ʻe he meʻa fakapaʻangá pe ko e ngaahi fakakaukau kehe. Ko e kau Kalisitiane ʻe niʻihi—ko e tokolahi ʻo kinautolú ko e siʻi fanga tuofāfine fakalaumālie—kuo nau nofoʻaki taʻehoa koeʻuhí ʻoku nau fakapapauʻi ke talangofua ki he akonaki ʻa e Tohi Tapú ke mali “i he Eiki be.” (1 Kolinito 7:​39, PM) ʻOku nau kumi mateaki ki ha hoa mali ʻi he haʻohaʻonga pē ʻo e kau lotu fakatapui ʻosi papitaiso ʻa Sihová.

 ʻI he taimi ʻe niʻihi, ko e niʻihi ʻo e faʻahinga taʻehoa ko ení ʻoku nau taʻelata. Hili ʻene fakahā moʻoni ʻokú ne ongoʻi pehení, ʻoku pehē ʻe ha tuofefine Kalisitiane taʻehoa ʻe taha: “ʻOku mau ʻiloʻi ʻa e lao ʻa Sihová pea ʻoku ʻikai te mau fiemaʻu ke taʻefakahōifuaʻi ʻa Sihova ʻi ha faʻahinga founga pē. ʻOku mau fiemaʻu nai ke feohi mo ha hoa mali, kae tatau ai pē pe ko e hā ʻa e tuʻo lahi ʻo e feinga ʻa e kakai he māmaní ke nau ‘fokotuʻutuʻu ha hoa mali maʻamautolú,’ ʻoku mau tuʻumaʻu mālohi ai pē. ʻOku ʻikai te tau fiemaʻu naʻa mo ha feohi mo ha kau tangata pe kau fefine taʻetui.” Ko e kau Kalisitiane peheé ʻoku taau ke fakaongoongoleleiʻi kinautolu ki heʻenau ngāueʻaki ʻa e akonaki ʻa e Tohi Tapú pea ʻi hono tauhi maʻu honau ngaahi tuʻunga fakaeʻulungāanga māʻolungá koeʻuhi ke fakahōifuaʻi ai ʻa Sihova neongo ha faʻahinga mamahi fakaeongo pē nai te nau hokosia.

Tokoni Fakaʻotua Lahi

ʻOku mateaki ʻa Sihova ki he faʻahinga ʻoku nau fakahāhā ʻenau mateaki kiate iá ʻi he ngaahi meʻa ko ia hangē ko e fakafisi ke mali mo e faʻahinga ʻoku ʻikai te nau tauhi kiate iá. Mei he hokosia fakafoʻituituí, naʻe lava ke fakamoʻoniʻi ʻe Tuʻi Tēvita: “ʻI he tokotaha mateakí te ke [Sihova] ngāue ʻi he mateaki.” (Sāme 18:​25, NW) Pea ki he faʻahinga ʻoku nau talangofua faitōnunga kiate iá, ʻoku talaʻofa ʻe he ʻOtuá: “ʻE ʻikai siʻi te u mahuʻi meiate koe, kaeʻumaʻā haʻaku momoʻi liʻaki koe.” (Hepelu 13:5) Ko e faʻifaʻitaki kia Sihová, ʻe lava ai ke tau ʻoatu ʻa e fakaongoongolelei lahi ki he kau Kalisitiane taʻehoa ʻo e taʻumotuʻa kotoa pē ʻa ia ʻoku nau pipiki faitōnunga ki he Folofola ʻa e ʻOtuá. ʻE lava ke tau toe lotu foki kia Sihova ke ne fakaivimālohiʻi kinautolu ke nau fekuki mo e ngaahi polé.—Fakamaau 11:​30-40.

Ko e tokolahi ʻo e kau Kalisitiane taʻehoá ʻoku nau ʻiloʻi ko e kau kakato ki he ngāue fakaeako Fakatohitapú ʻoku fakafonu mohu ʻuhinga ai ʻenau moʻuí. Ko e fakatātaá, fakakaukau atu kia Patricia, ko ha fefine taʻemali ʻi hono taʻu 30 tupú ʻa ia ko ha tāimuʻa, pe ʻevangeliō taimi-kakato. ʻOkú ne pehē: “Neongo ʻoku ʻomai ʻe he tuʻunga taʻehoá ʻa e ngaahi ʻahiʻahi lahi, kuó ne ʻomai kiate au ʻa e faingamālie ke u hoko ko ha tāimuʻa tuʻumaʻu. Koeʻuhi ko ha tokotaha taʻemaʻu hoa au, ko ʻeku taimi-tēpilé ʻoku ngaofengofua, ʻa ia ʻoku fakaʻatā ai ʻa e taimi lahi ange ki he akó. Kuó u toe ako foki ke u falala lahi ange kia Sihova, tautefito ʻi he ngaahi taimi faingataʻá.”

Ko e ngaahi vakai peheé ʻoku makatuʻunga ia ʻi he palōmesi papau ʻa e Tohi Tapú: “Tekaki kia Sihova ho ʻalunga; ʻio falala ki ai, pea te ne fai ʻe ia.” (Sāme 37:5) Ko e moʻoni, ko e kau lotu faitōnunga kotoa ʻa Sihová, ʻosi mali pe taʻehoa, ʻe lava ke nau maʻu ʻa e fiemālie mo e mālohi ʻi he ngaahi lea fakamānavaʻi: “Ko hoku tokoni ʻoku meia Sihova.”—Sāme 121:2.

[Fakamatala ʻi lalo]

[Fakamatala ʻi he peesi 9]

“ʻOku moʻua ʻa e loto ʻo e tangata taʻe maʻu uafi ʻi he ngaahi meʻa ʻa e ʻEiki, heʻene feinga ke hohóʻia ʻa e finangalo ʻo e ʻEiki.”—1 KOLINITO 7:32

[Puha ʻi he peesi 8]

KO HONO ʻAI KE FAKAFIEMĀLIE ʻA E TUʻUNGA TAʻEHOÁ

Ko Sīsū, ʻa ia naʻe ʻikai ʻaupito te ne malí, naʻá ne pehē: “Ko ʻeku meʻakai e, ko e tuli ke fai ʻa e finangalo ʻo ia naʻa ne fekau mai au, pea ke fakaʻosi haʻána ngaue.”—Sione 4:34.

Ko e ngaahi ʻofefine taʻemali ʻe toko fā ʻo Filipé naʻa nau hanganaki femoʻuekina ʻi he ‘palofisaí.’—Ngāue 21:​8, 9.

Ko e fanga tuofāfine Kalisitiane taʻehoa ʻoku nau talaki ʻa e pōpoaki ʻo e Puleʻangá ko ha konga kinautolu ʻo e ‘fuʻu hosite lahi ʻo e kau fefine tala ongoongo leleí.’—Sāme 68:11.