Ko Hai ʻa Sīsū Kalaisi?

FAKAʻUTA atu ki he loto-māfana kuo pau naʻe maʻu ʻe ha talavou Siu ko hono hingoá ko ʻAnitelū ʻi he taimi naʻá ne ʻuluaki fanongo ai ki he ngaahi lea ʻa Sīsū ʻo Nasaletí! ʻOku fakahaaʻi ʻe he Tohi Tapú naʻe fakavave ʻa ʻAnitelū ki hono tokouá ʻo ne pehē: “Kuo ma ʻilo ʻa e Misaia [pe Kalaisi].” (Sione 1:42 [Sio 1:​41, PM]) ʻI he lea faka-Hepeluú mo e faka-Kalisí, ko e ongo foʻi lea naʻe faʻa liliu ko e “Misaia” mo e “Kalaisi” ʻoku ʻuhingá ko e “Tokotaha Pani.” Ko Sīsū ʻa e Tokotaha Paní, pe ko e Tokotaha Fili ʻa e ʻOtuá—ko e Taki ia naʻe talaʻofa maí. (Aisea 55:4) Naʻe ʻi he Tohi Tapú ʻa e ngaahi kikite fekauʻaki mo ia, pea ko e kau Siu ʻi he taimi ko iá naʻa nau ʻamanekina ia.—Luke 3:15.

ʻOku anga-fēfē ʻetau ʻiloʻi naʻe moʻoni ko Sīsū ʻa e Tokotaha Fili ʻa e ʻOtuá? Sai, fakakaukau angé ki he meʻa naʻe hoko ʻi he taʻu 29 T.S. ʻi he taimi naʻe taʻu 30 ai ʻa Sīsuú. Naʻá ne ʻalu kia Sione Papitaiso ke ne papitaiso ia ʻi he vai ʻo e Vaitafe Sioataní. ʻOku fakahaaʻi ʻe he Tohi Tapú: “Pea kuo papitaiso ʻa Sisu, naʻa ne ʻalu hake leva mei he vai; pea vakai, naʻe matangaki ʻa e langi kiate ia, pea ne mamata ki he Laumalie ʻo e ʻOtua ʻoku ʻalu hifo ʻi he tatau ʻo ha lupe, ʻo ne aʻu kiate ia. Pea ʻiloange, naʻe ai ha leʻo mei he langi naʻe pehe mai, Ko Hoku ʻAlo Pele ʻena, ʻa ia kuo u hōifua ai.” (Mātiu 3:​16, 17) Hili ʻa e fanongo ki he ngaahi lea ko ia ʻo e hōifuá, naʻe lava ke maʻu nai ʻe Sione ha toe veiveiua ko Sīsū ʻa e Tokotaha Fili ʻa e ʻOtuá? ʻI hono huaʻi hifo ʻa Hono laumālie māʻoniʻoní kia Sīsuú, naʻe pani ai ia, pe fakanofo ia ʻe Sihova ko e ʻOtuá, ke ne hoko ko e Tuʻi ʻo Hono Puleʻanga ʻoku ene ke hokó. Ko ia naʻe hoko ai ʻa Sīsū ko Sīsū Kalaisi, pe Sīsū ko e Tokotaha Pani. Kae kehe, ʻi he founga fē, naʻe hoko ai ʻa Sīsū ko e ʻAlo ʻo e ʻOtuá? Ko e hā hono tupuʻangá?

Ko Hono Tupuʻangá Naʻe “Talu Mei Muʻa”

Ko e ʻalunga moʻui ʻa Sīsuú ʻe lava ke vahevahe ia ki he tuʻunga ʻe tolu. Ko e ʻuluakí naʻe kamata fuoloa ia ki muʻa ʻi hono fanauʻi mai ia ko e tangatá. Ko hono tupuʻangá naʻe “talu mei muʻa, mei he ngaahi ʻaho ʻo itaniti,” ko e lau ia ʻa e Maika 5:2. Naʻe pehē ʻe Sīsū tonu: “Ko au ʻoku ou mei ʻolunga”—ʻo ʻuhingá, mei hēvani. (Sione 8:23) Naʻá ne ʻi hēvani ko ha tokotaha laumālie māfimafi.

Koeʻuhi ko e ngaahi meʻa fakatupú kotoa naʻe ʻi ai honau kamataʻanga, naʻe ʻi ai ha taimi naʻe tokotaha pē ai ʻa e ʻOtuá. Kae kehe, ʻi he ngaahi taʻu taʻefaʻalaua he kuohilí, naʻe hoko ai ʻa e ʻOtuá ko ha Tokotaha-Fakatupu. Ko hai ʻa ʻene ʻuluaki fakatupú? Ko e tohi fakaʻosi ʻo e Tohi Tapú ʻokú ne fakahaaʻi ʻa Sīsū “ko e Kamataʻanga ʻo e Fakatupu ʻe he ʻOtua.” (Fakahā 3:14) Ko Sīsuú ko e “ʻUluaki ia naʻe fakatupu, ko e Kimuʻa ʻi he meʻa kotoa pe kuo ngaohi.” ʻOku peheé, “koeʻuhi naʻe tefito kiate ia ʻa e ngaohi ʻo e meʻa kotoa pe, ʻa e meʻa ʻi he langi mo e meʻa ʻi mamani, ʻa e meʻa hamai mo e meʻa taʻehamai.” (Kolose 1:​15, 16) ʻIo, ko Sīsuú ko e tokotaha pē ia naʻe fakatupu fakahangatonu ʻe he ʻOtuá tonu. Ko ia ai, ʻoku ui ia ko e “ʻAlo tofu-pe-taha-ne-fakatupu” ʻo e ʻOtuá. (Sione 3:16) Ko e ʻAlo ʻuluaki naʻe fakatupú ʻokú ne toe maʻu ʻa e hingoa fakalakanga ko e “Folofola.” (Sione 1:14) Ko e hā hono ʻuhingá? Koeʻuhi ki muʻa ke fanauʻi mai ia ko ha tangatá, naʻá ne ngāue ʻi hēvani ko e tokotaha naʻe lea maʻá e ʻOtuá.

Ko e “Folofola” naʻá ne ʻia Sihova ko e ʻOtuá “ʻi he kamataʻanga,” ʻi he taimi naʻe fakatupu ai “ʻa e ngaahi langi mo mamani.” Ko e tokotaha ia naʻe folofola ki ai ʻa e ʻOtuá: ‘Ta ngaohi tangata ʻi hota imisí.’ (Sione 1:1; Senesi 1:​1, 26) Ko e ʻAlo ʻuluaki fakatupu ʻo Sihová naʻe ʻi ai ʻi he tafaʻaki ʻo ʻene Tamaí, ʻo ngāue longomoʻui fakataha mo ia. ʻI he Palovepi 8:​22-31 (NW), ʻoku fakahaaʻi ai ʻene pehē: “Naʻá ku hoko ʻo ʻi hono tafaʻakí [ʻo e Tokotaha-Fakatupú] ko ha tokotaha ngāue mataotao, pea naʻá ku hoko ko e tokotaha naʻá ne hōhōʻia  tefito ai ʻi he ʻaho ki he ʻaho, ʻou fiefia ʻi hono ʻaó ʻi he taimi kotoa pē.”

He fekoekoeʻi moʻoni ē ko e feʻilongaki kuo pau naʻe hoko kia Sihova ko e ʻOtuá mo hono ʻAlo tofu-pē-taha-ne-fakatupú ʻi heʻena ngāue fakatahá! Ko e feohi vāofi ko ia mo Sihova ʻi he ngaahi kuonga taʻefaʻalauá naʻe uesia loloto ai ʻa e ʻAlo ʻo e ʻOtuá. Ko e ʻAlo talangofua ko ení naʻá ne hoko ai ʻo hangē tofu pē ko ʻene Tamaí, ʻa Sihova. Ko hono moʻoní, ʻoku ui ʻi he Kolose 1:15 ʻa Sīsū “ko e Imisi ia ʻo e ʻOtua ko e Taʻehamai.” Ko e ʻuhinga eni ʻe taha ʻoku mātuʻaki mahuʻinga ai ʻa e ʻilo fekauʻaki mo Sīsuú ki hono fakalato ʻetau fiemaʻu fakalaumālié mo ʻetau holi fakanatula ke ʻiloʻi ʻa e ʻOtuá. Ko e meʻa kotoa naʻe fai ʻe Sīsū lolotonga ʻene ʻi māmaní ʻa e meʻa tofu pē naʻe ʻamanekina ʻe Sihova meiate ia ke ne faí. Ko ia ai, ko e hoko ʻo ʻiloʻi ʻa Sīsuú ʻoku toe ʻuhinga iá ko hono fakalahi ʻo ʻetau ʻiloʻi ʻo Sihová. (Sione 8:28; 14:​8-10) Ka naʻe anga-fēfē ʻa e hoko ʻa Sīsū ʻo ʻi he māmaní?

Ko ʻEne Moʻui ko ha Tangatá

Ko e tuʻunga hono ua ʻo e ʻalunga moʻui ʻa Sīsuú naʻe kamata ia ʻi he taimi naʻe fekauʻi mai ai ʻe he ʻOtuá ʻa hono ʻAló ki he māmaní. Naʻe fai eni ʻe Sihova ʻaki ʻene hiki fakaemana hifo ʻa e moʻui ʻa Sīsuú mei hēvani ki he manava ʻo ha tāupoʻou Siu faitōnunga ko Mele. Naʻe ʻikai maʻu tukufakaholo ʻe Sīsū ʻa e taʻehaohaoá koeʻuhi naʻe ʻikai te ne maʻu ha tamai fakaetangata. Ko e laumālie māʻoniʻoní, pe ivi-ngāue ʻo Sihová, naʻe hoko mai ia kia Mele, pea ko hono mālohí naʻá ne “fakamalumalu” fakaemana ia, ʻo fakatupunga ai ia ke ne hoko ʻo feitama. (Luke 1:​34, 35) Ko ia naʻe fanauʻi ai ʻe Mele ha tama haohaoa. ʻI he hoko ko e foha ohi ʻo e tufunga ko Siosefá, naʻe ʻohake ai ia ʻi ha ʻapi māʻulalo pea ko e fika ʻuluaki ia ʻi he fānau tokolahi ʻi he fāmilí.—Aisea 7:14; Mātiu 1:​22, 23; Maake 6:3.

ʻOku siʻi ʻa e meʻa ʻoku ʻiloʻi fekauʻaki mo e kei siʻi ʻa Sīsuú, ka ʻoku taau ke fakatokangaʻi ʻa e meʻa ʻe taha naʻe hoko. ʻI he taimi naʻe taʻu 12 ai ʻa Sīsuú, naʻe ʻave ai ia ʻe heʻene ongo mātuʻá ʻi heʻena ʻaʻahi fakataʻu ki Selusalema ki he Pāsová. Lolotonga ʻenau ʻi aí, naʻá ne fakamoleki ai ʻa e taimi lahi ʻi he temipalé, ʻi heʻene “lotolotoi ʻi he kau ʻakonaki, ʻo ne fakafanongo kiate kinautolu mo fakafehuʻi kiate kinautolu.” ʻIkai ngata aí, “ko kinautolu kotoa pē naʻe fanongo kiate ia, naʻa nau fakatumutumu ʻi he anga o ʻene fakakaukau mo ʻene ngaahi tali.” ʻIo, naʻe ʻikai ke ʻeke pē ʻe he kiʻi tama ko Sīsuú ʻa e ngaahi fehuʻi fakatupu fakakaukau fakalotu, ka naʻá ne toe fai foki mo e ngaahi tali pōtoʻi ʻa ia naʻe ofo ai ʻa e niʻihi kehé. (Luke 2:​41-50) ʻI heʻene tupu hake ʻi he kolo ko Nasaletí, naʻá ne ako ai ke hoko ko ha tufunga, ʻo ʻikai ha veiveiua mei heʻene tamai ohí, ʻa Siosefa.—Mātiu 13:55.

Naʻe nofo ʻa Sīsū ʻi Nasaleti ʻo aʻu ki hono taʻu 30. Naʻá ne ʻalu leva kia Sione ke papitaiso. Hoko atu ʻi hono papitaisó, naʻe kamata ai ʻe Sīsū ʻa ʻene ngāue fakafaifekau longomoʻuí. Naʻá ne fononga holo ʻo feʻunga mo e taʻu ʻe tolu mo e konga ʻi hono fonua tupuʻangá ʻi hono talaki ʻa e ongoongo lelei ʻo e Puleʻanga ʻo e ʻOtuá. Naʻá ne ʻoatu ai ʻa e fakamoʻoni naʻe fekauʻi mai ia ʻe he ʻOtuá. ʻO anga-fēfē? ʻAki hono fakahoko ʻa e ngaahi mana lahi—ko e ngaahi ngāue mālohi ʻa ia naʻe mahulu atu ia ʻi he malava fakaetangatá.—Mātiu 4:​17; Luke 19:​37, 38.

Ko Sīsuú ko ha tangata foki ia ʻo e ʻofa māfana mo e ngaahi ongoʻi loloto. Ko ʻene ʻofá naʻe hā mahino tautefito ia ʻi he founga ʻo ʻene vakai mo  ʻene tōʻongafai ki he niʻihi kehé. Koeʻuhi naʻe fotungofua mo anga-lelei ʻa Sīsū, naʻe tohoakiʻi ai ʻa e kakaí kiate ia. Naʻa mo e fānaú naʻa nau ongoʻi fiemālie ʻi heʻene ʻi aí. (Maake 10:​13-16) Naʻe tōʻongafai fakaʻapaʻapa ʻa Sīsū ki he kakai fefiné, neongo naʻe sio lalo ʻa e niʻihi ʻi hono ʻahó kia kinautolu. (Sione 4:​9, 27) Naʻá ne tokoniʻi ʻa e masivá mo e lōmekiná ke nau maʻu ʻa e ‘mālōlō ʻi honau laumalié.’ (Mātiu 11:​28-30) Ko ʻene founga fakafaiakó naʻe mahino, faingofua mo ʻaonga. Pea ko e meʻa naʻá ne akoʻí naʻe tapua atu ai ʻa ʻene holi ongoʻi loloto ke ʻai ke maheni ʻa ʻene kau fanongó mo e ʻOtua moʻoní, ʻa Sihova.—Sione 17:​6-8.

ʻI hono ngāueʻaki ʻa e laumālie māʻoniʻoni ʻo e ʻOtuá ke fakahokoʻaki ʻa e ngaahi maná, naʻe fakamoʻui manavaʻofa ai ʻe Sīsū ʻa e mahakí mo e faingataʻaʻiá. (Mātiu 15:​30, 31) Ko e fakatātaá, naʻe haʻu ha tokotaha kilia kiate ia ʻo ne pehē: “Ka ne ke loto ke fai, te ke lava ke fakamaʻa au.” Ko e hā naʻe fai ʻe Sīsuú? Naʻá ne mafao atu hono nimá ʻo ala ki he tangatá, ʻo ne pehē kiate ia: “ʻOku ou loto pe: ke ke maʻa koe.” Pea naʻe moʻui leva ʻa e tangatá!—Mātiu 8:​2-4.

Toe fakakaukau foki ki ha taimi, ʻa ia naʻe haʻu ai ha fuʻu kakai kia Sīsū ʻo nofo mo ia ʻo feʻunga mo e ʻaho ʻe tolu ʻo hala ha meʻa ke nau kai. Naʻá ne ongoʻi fakaʻofaʻia ʻi he kakaí peá ne fafangaʻi fakaemana ai ʻa e “toko faafe ʻa e tangata, ʻo taʻe lau ai ʻa e fefine mo e tamaiki iki.” (Mātiu 15:​32-38) ʻI he taimi ʻe taha, naʻe fakanonga ai ʻe Sīsū ha matangi ʻa ia naʻá ne fakamanamanaʻi ʻa e tuʻunga malu ʻa hono ngaahi kaumeʻá. (Maake 4:​37-39) Naʻá ne fokotuʻu, pe toe fakamoʻui ʻa e faʻahinga ko ia naʻe maté. a (Luke 7:​22; Sione 11:​43, 44) Naʻe aʻu ʻo foaki loto-lelei ʻe Sīsū ʻa ʻene moʻui fakaetangata haohaoá koeʻuhi ke maʻu ai ʻe he faʻahinga taʻehaohaoa ʻo e tangatá ha ʻamanaki ki he kahaʻú. Ko ha ʻofa loloto ē naʻe maʻu ʻe Sīsū ki he kakaí!

ʻOku ʻi Fē ʻa Sīsū ʻi he ʻAhó Ni?

Naʻe pekia ʻa Sīsū ʻi ha ʻakau fakamamahi ʻi hono taʻu 33 1/2. b Ka ko e pekiá naʻe ʻikai ko e ngataʻanga ia ʻo ʻene ʻalunga moʻuí. Ko e tuʻunga hono tolu ʻo ʻene moʻuí naʻe kamata ia ʻi he ʻaho ʻe tolu nai ki mui ʻi he taimi naʻe fokotuʻu hake ai ʻe Sihova ko e ʻOtuá ʻa hono ʻAló ʻi he tuʻunga ko ha tokotaha laumālié. Hili ʻene toetuʻú, naʻe hā ai ʻa Sīsū ki he kakai ʻe laui teau naʻa nau moʻui he ʻuluaki senituli T.S. (1 Kolinito 15:​3-8) Hili iá, naʻá ne “nofo hifo mei he toʻomataʻu ʻo e ʻOtua” ʻo tatali ai ke maʻu ʻa hono mafai fakatuʻí. (Hepelu 10:​12, 13) ʻI he hoko mai ʻa e taimi ko iá, naʻe kamata pule ai ʻa Sīsū ko e Tuʻi. Ko ia ʻoku totonu ke fēfē ʻetau sioloto atu kia Sīsū he ʻaho ní? ʻOku totonu ke tau fakakaukau kiate ia ko ha tangata faingataʻaʻia ʻoku tāmateʻi? Pe ʻoku totonu ke tau vakai kiate ia ko ha taha ke fai ki ai ʻa e lotú? Ko Sīsū he ʻaho ní ʻoku ʻikai ko ha tangata ia pe ko ha ʻOtua Māfimafi-Aoniu. ʻI hono kehé, ko ha meʻamoʻui laumālie māfimafi ia, ko ha Tuʻi ʻoku pule. Kuo vavé ni ʻaupito, ke ne fakahāhā mai ʻa hono tuʻunga-pulé ki hotau māmani faingataʻaʻiá.

ʻI hono ngāueʻaki ʻa e lea fakaefakatātaá, ʻoku fakamatalaʻi ʻe he Fakahā 19:​11-16 ʻa Sīsū Kalaisi ko ha tuʻi ʻoku heka ʻi ha hoosi hinehina pea ʻoku haʻu ke faifakamaau pea fakahoko ha tau ʻi he māʻoniʻoni. ʻOku ʻi ai ʻene “heleta masila ke ne tāʻi ʻaki ʻa e ngaahi kakai.” ʻIo, ʻe ngāueʻaki ʻe Sīsū ʻa hono fuʻu mālohí ke fakaʻauha ʻa e fulikivanú. Pea fēfē ʻa e faʻahinga ʻoku nau feinga ke muimui ʻi he faʻifaʻitakiʻanga naʻá ne fokotuʻu lolotonga ʻene ʻi māmaní? (1 Pita 2:21) Ko ia mo ʻene Tamaí te na fakahaofi kinautolu ʻi he “tau ʻo e ʻaho lahi ʻo e ʻOtua Aoniu”—ʻoku ʻiloa ko ʻĀmaketoné—koeʻuhi ke lava ʻo nau moʻui taʻengata ʻi he hoko ko e faʻahinga ʻi he māmaní ʻe pule mai ki ai ʻa e Puleʻanga fakahēvani ʻo e ʻOtuá.—Fakahā 7:​9, 14; 16:​14, 16; 21:​3, 4.

Lolotonga ʻene pule melinó, ko ha ngaahi mana moʻoni ē ʻe fakahoko ʻe Sīsū maʻá e faʻahinga kotoa ʻo e tangatá! (Aisea 9:​6, 7 [Ai 9:​5, 6, PM]; Ai 11:​1-​10) Te ne fakamoʻui ʻa e mahakí pea fakangata ʻa e maté. ʻE ngāueʻaki ʻe he ʻOtuá ʻa Sīsū ke ne fokotuʻu hake ʻa e laui miliona, ʻo ʻoange kia kinautolu ha faingamālie ke moʻui taʻengata ʻi he māmaní. (Sione 5:​28, 29) ʻOku ʻikai lava ke aʻu ʻo tau fakaʻuta atu ki he tuʻunga fakaofo ʻe ʻi ai ʻetau moʻuí ʻi he malumalu ʻo e pule ʻa e Puleʻangá. ʻOku mahuʻinga leva ke tau hokohoko atu hono maʻu ʻa e ʻilo Fakatohitapú pea hoko ʻo maheni lelei ange mo Sīsū Kalaisi.

[Fakamatala ʻi lalo]

 [Puha ʻi he peesi 7]

KO SĪSŪ ʻA E ʻOTUA MĀFIMAFI-AONIÚ?

ʻOku pehē ʻe he kakai lotu tokolahi ko Sīsū ʻa e ʻOtuá. ʻOku taukaveʻi ʻe he niʻihi ko e ʻOtuá ko ha Tolu-Tahaʻi-ʻOtua. Fakatatau ki he akonaki ko ení, “ko e Tamaí ʻa e ʻOtuá, ko e ʻAló ʻa e ʻOtuá, pea ko e Laumālie Māʻoniʻoní ʻa e ʻOtuá, pea neongo ia, ʻoku ʻikai ʻi ai ha ʻOtua ʻe tolu ka ko e ʻOtua ʻe taha.” ʻOku pehē tokua ko e toko tolú “ʻoku nau ʻi ai taʻengata mo tatau tofu pē.” (The Catholic Encyclopedia) ʻOku tonu ʻa e ngaahi fakakaukau ko iá?

Ko Sihova ko e ʻOtuá ʻa e Tokotaha-Fakatupú. (Fakahā 4:11) ʻOku ʻikai hano kamataʻanga pe ngataʻanga, pea ʻokú ne māfimafi-aoniu. (Sāme 90:2) Ko Sīsū, ʻi he tafaʻaki ʻe tahá, naʻe ʻi ai hono kamataʻanga. (Kolose 1:​15, 16) ʻI he lave ki he ʻOtuá ko ʻene Tamaí, naʻe pehē ʻe Sīsū: “ʻOku lahi ʻa e Tamai ʻiate au.” (Sione 14:28) Naʻe toe fakamatala ʻa Sīsū ʻo pehē naʻe ʻi ai ʻa e ngaahi meʻa naʻe ʻikai te ne ʻiloʻi naʻa mo e kau ʻāngeló ka naʻe ʻiloʻi pē ia ʻe heʻene Tamaí.—Maake 13:32.

ʻIkai ngata aí, naʻe lotu ʻa Sīsū ki heʻene Tamaí: “Ke ʻoua naʻa fai hoku loto ka ko hoʻou pē.” (Luke 22:42) Ko hai naʻe lotu ki ai ʻa Sīsuú kapau naʻe ʻikai ha Tokotaha māʻolunga ange? ʻIkai ko ia pē, ko e ʻOtuá naʻá ne fokotuʻu hake ʻa Sīsū mei he maté, ʻo ʻikai ko Sīsū tonu. (Ngāue 2:32) ʻOku hā mahino, ko e Tamaí mo e ʻAló naʻe ʻikai te na tatau ki muʻa ke haʻu ʻa Sīsū ki he māmaní pe ʻi he lolotonga ʻene moʻui fakaemāmaní. Fēfē nai e hili ʻa e toetuʻu ʻa Sīsū ki hēvaní? ʻOku fakahaaʻi ʻe he 1 Kolinito 11:3: “Ko e ʻulu ʻo Kalaisi ko e ʻOtua.” Ko hono moʻoní, ko e ʻAló ʻe anganofo maʻu pē ia ki he ʻOtuá. (1 Kolinito 15:28) Ko ia ʻoku fakahaaʻi ai ʻe he Tohi Tapú ko Sīsuú ʻoku ʻikai ko e ʻOtua Māfimafi-Aoniú ia.ʻI hono kehé, ko e ʻAlo ia ʻo e ʻOtuá.

Ko e tokotaha hono tolu ʻoku taku ʻo e Tolu-Tahaʻi-ʻOtuá—ʻa e laumālie māʻoniʻoní—ʻoku ʻikai ko ha tokotaha ia. ʻI he lea ki he ʻOtuá ʻi he lotú, naʻe pehē ʻe he tokotaha-tohi-sāmé: “ʻOku ke fekau atu ho Laumalie—ʻoku nau tupu ai.” (Sāme 104:30) Ko e laumālie ko ení ʻoku ʻikai ko e ʻOtuá tonu ia; ko ha ivi-moʻui ia ʻokú ne fekauʻi atu pe ngāueʻaki ke fakahoko ha meʻa pē ʻokú ne fakaʻamu ki ai. Fakafou ai, naʻe fakatupu ʻe he ʻOtuá ʻa e hēvani matelié, ko e māmaní, pea mo e meʻamoʻui kotoa pē. (Senesi 1:2; Sāme 33:6) Naʻe ngāueʻaki ʻe he ʻOtuá ʻa hono laumālie māʻoniʻoní ke fakamānavaʻi ʻa e kau tangata ko ia naʻa nau tohi ʻa e Tohi Tapú. (2 Pita 1:​20, 21) Ko e Tolu-Tahaʻi-ʻOtuá leva ʻoku ʻikai ko ha akonaki Fakatohitapu ia. c “Ko Sihova ko hotau ʻOtua ko e tahaʻi Sihova ia.”—Teutalonome 6:4.

[Fakamatala ʻi lalo]

[Fakatātā ʻi he peesi 5]

ʻI heʻene papitaisó naʻe hoko ai ʻa Sīsū ko e Tokotaha Pani ʻa e ʻOtuá

[Fakatātā ʻi he peesi 7]

Naʻe līʻoa ʻe Sīsū ʻa hono iví ki heʻene ngāue naʻe vaheʻi ange ʻe he ʻOtuá

[Fakatātā ʻi he peesi 7]

ʻI he ʻaho ní, ko Sīsuú ko ha Tuʻi māfimafi