Ko ha ʻOtua pe ko ha Tangata?

“KO AU pe ko e Maama ʻo Māmani: ko ia ʻoku ne muimui kiate au, ʻe ʻikai ʻaupito te ne fononga ʻi he poʻuli, ka te ne maʻu ʻa e maama ʻo e moʻui.” (Sione 8:12) Ko e ngaahi leá ni naʻe leaʻaki ia ʻe Sīsū Kalaisi. Naʻe tohi ha tangata poto ʻi he ʻuluaki senitulí ʻo fekauʻaki mo Ia: “ʻOku faʻoaki ai hono katokātoa ʻo e koloa poto mo e koloa ʻilo, ʻo fufū pe.” (Kolose 2:3) ʻIkai ngata aí, ʻoku pehē ʻe he Tohi Tapú: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Sione 17:3) Ko e ʻilo totonu fekauʻaki mo Sīsuú ʻoku mātuʻaki fiemaʻu ia koeʻuhi ke fakalato ʻetau fiemaʻu fakalaumālié.

Ko e kakai takatakai ʻi he māmaní kuo nau fanongo ʻia Sīsū Kalaisi. Ko ʻene tākiekina ʻo e hisitōlia ʻa e faʻahinga ʻo e tangatá ʻoku ʻikai toe ala fehuʻia ia. Ko hono moʻoní, ko e tohimāhina ʻoku ngāueʻaki ʻi he ngaahi feituʻu lahi taha ʻo e māmaní ʻoku makatuʻunga ia ʻi he taʻu ʻoku pehē naʻe ʻaloʻi aí. “ʻOku lave ʻa e kakai tokolahi ki he ngaahi ʻaho ki muʻa ʻi he taʻu ko iá ko e K.M., pe ki muʻa ʻia Kalaisi,” ko e fakamatala ia ʻa e World Book Encyclopedia. “ʻOku nau ngāueʻaki ʻa e T.S., pe anno Domini (ʻi he taʻu hotau ʻEikí), ki he ngaahi ʻaho hili ʻa e taʻu ko iá.”

Neongo ia, ʻoku ʻi ai ʻa e ngaahi fakakaukau fepakipaki fekauʻaki mo Sīsū pe ko hai ia. Ki he niʻihi, ko ha tangata ʻiloa pē ia ʻa ia naʻá ne tuku hano fakaʻilonga ʻi he hisitōliá. Kae kehe, ʻoku lotu kiate ia ʻa e niʻihi ʻi he tuʻunga ko e ʻOtua Māfimafi-Aoniu. Ko e kau muimui Hinitū ʻe niʻihi kuo nau fakatatau ʻa Sīsū Kalaisi ki he ʻotua Hinitū ko Kulisinā, ʻa ia ʻoku pehē ʻe he tokolahi ko ha ʻotua ia ʻoku toe fanauʻi sino foʻou. Ko ha tangata pē ʻa Sīsū, pe ko ha taha ia ke lotu ki ai? Ko hai tonu ia? Naʻá ne haʻú mei fē? Naʻá ne ʻulungāanga fēfē nai? Pea ʻokú ne ʻi fē he taimi ní? Hangē ko ia te tau sio ki ai ʻi he kupu hono hokó, ko e tohi ko ia ʻoku ʻi ai ʻene lea lahi ʻo fekauʻaki mo Sīsuú ʻokú ne ʻomai ʻa e ngaahi tali moʻoni ki he ngaahi fehuʻí ni.