“Koe Manavahe kia Jihova, koe Boto Ia”

“KE TAU fanogo ki he fakaoji oe gaahi mea kotoabe: Ke ke manavahe ki he Otua [moʻoní], bea ke fai ki he ene gaahi fekau: he oku katoa i he mea ni ae gaue totonu ae tagata.” (Koheleti 12:​13, PM) He fakamulituku loloto moʻoni ē naʻe maʻu ʻe Tuʻi Solomone ʻo ʻIsileli ʻo e kuonga muʻá ʻi he malumalu ʻo e fakamānavaʻi fakaʻotuá! Naʻe toe mahinoʻi ʻe he pēteliake ko Siopé ʻa e mahuʻinga ʻo e manavahē ki he ʻOtuá, he naʻá ne pehē: “Vakai, koe manavahe kia Jihova, koe boto ia; bea koe afe mei he kovi koe ilo ia.”—Siope 28:​28, PM.

ʻOku fakamahuʻingaʻi lahi ʻe he Tohi Tapú ʻa e manavahē kia Sihová. Ko e hā ko e ʻalunga ai ʻo e potó ʻa ʻetau fakatupulekina ʻa e manavahē anga-ʻapasia ki he ʻOtuá? ʻI he founga fē ʻoku ʻaonga ai kiate kitautolu ʻa hono maʻu ʻo e manavahē fakaʻotuá—fakatāutaha pea ʻi he tuʻunga ko ha kulupu ʻo e kau lotu moʻoní? Ko e veesi 26 ki he 35 ʻo e Palovepi vahe 14 ʻokú ne tali ʻa e ngaahi fehuʻi ko ení. a

Matavai ʻo e “Falala Malohi”

“Oku ai ae falala malohi i he manavahe kia Jihova,” ko e fakamatala ia ʻa Solomoné, “bea e maʻu e he ene fānau ae botu hufaga.” (Palovepi 14:​26, PM) Ko e matavai ʻo e falala ʻa ha tangata manavahē-ʻOtuá ʻoku ʻikai ko ha toe taha kehe ka ko e ʻOtua mateaki mo māfimafi-aoniu ko Sihová. ʻOku ʻikai ha ofo he ko ha tangata pehē ʻokú ne fehangahangai mo e meʻa ʻoku toka mei muʻá fakataha mo e falala mālohi! Ko hono kahaʻú ʻoku fuoloa mo faitāpuekina.

Ko ia ai, ko e hā ʻe lava ke leaʻaki fekauʻaki mo e kahaʻu ʻo e faʻahinga ʻoku nau tuku ʻenau falalá ki he māmaní—ʻa ʻene ngaahi palaní, ko ʻene ngaahi kautahá, ko ʻene ngaahi fakakaukaú mo ʻene ngaahi koloá? Ko e hā pē ʻa e kahaʻu ʻoku nau fakatuʻamelie ke maʻú ʻoku nounou ia, he ʻoku pehē ʻe he Tohi Tapú: “ʻOku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:17) ʻOku ʻi ai leva ha ʻuhinga kiate kitautolu ke tau “ʻofa ki mamani, ʻumaʻā ʻa e ngaahi meʻa ʻoku ʻi he mamani”?—1 Sione 2:15.

Ko e hā ʻa e ngaahi tuʻunga ʻe lava ke fai ʻe he ngaahi mātuʻa manavahē-ʻOtuá ke fakapapauʻi ai ʻe ʻi ai ʻa e “botu hufaga” maʻa ʻenau fānaú? “Haʻu, akimoutolu koe fānau, o fanogo kiate au,” ko e hiva ia ʻa e tokotaha-tohi-sāmé, “teu ako kiate kimoutolu ae manavahe kia Jihova.” (Sāme 34:​11, PM) ʻI he taimi ʻoku akoʻi ai ʻa e fānaú ʻaki ʻa e faʻifaʻitakiʻanga mo e fakahinohino ʻa e mātuʻá ke nau manavahē ki he ʻOtuá, ʻoku ngalingali te nau tupu hake ai ʻo hoko ko e kau tangata mo e kau fefine ʻoku nau maʻu ʻa e falala mālohi kia Sihova.—Palovepi 22:6.

“Koe manavahe kia Jihova koe matavai ia oe moui,” ko e hoko atu ia ʻa Solomoné, “ke tau hao ai mei he gaahi tauhele oe mate.” (Palovepi 14:​27, PM) Ko e manavahē kia Sihová ko ha “matavai ia oe moui” koeʻuhi ko e ʻOtua moʻoní ʻa e “matavai moui.” (Selemaia 2:​13, PM) Ko hono maʻu ʻo e ʻilo kia Sihova mo Sīsū Kalaisí ʻe lava ke ʻuhinga iá ko e moʻui taʻengata kiate kitautolu. (Sione 17:3) Ko e manavahē fakaʻotuá ʻokú ne toe fakatafokiʻi kitautolu mei he ngaahi tauhele ʻo e maté. Anga-fēfē? ʻOku pehē ʻe he Palovepi 13:14 (PM): “Koe fono [pe lao] ae boto koe matavai ia oe moui, ke tau hao ai mei he gaahi tauhele oe mate.” ʻI he taimi ʻoku tau manavahē ai kia Sihova, talangofua ki heʻene laó, pea fakaʻatā ʻa ʻene Folofolá ke ne tataki ʻetau laká, ʻikai ʻoku maluʻi ai kitautolu mei he ngaahi tōʻonga fakatupu maumau mo e ngaahi ongoʻi ʻa ia ʻe lava ke taki atu ki he mate mutukiá?

 “ʻOgoogo Lahi ha Tuʻi”

Lolotonga ʻa e taimi lahi taha ʻo ʻene pulé, ko Solomoné ko ha tuʻi manavahē-ʻOtua ia naʻe talangofua kia Sihova. Naʻe iku eni ki ha tuʻunga-pule lavameʻa. Ko e hā ʻokú ne fakapapauʻi ʻoku lelei ha pule ʻa ha tuʻi? ʻOku tali ia ʻe he Palovepi 14:28 (PM): “Oku ogoogo lahi ha tuʻi i he toko lahi o hono kakai: ka koe majiva kakai koe vaivaiaga ia oe houeiki [ pe ʻōfisa māʻolunga].” Ko e lavameʻa ʻa ha tuʻi ʻoku fakapapauʻi ia ʻi he lelei ʻa e faʻahinga ʻoku pule ki aí. Kapau ʻoku holi ha fuʻu kakai tokolahi ke nofo ai pē ʻi he malumalu ʻo ʻene pulé, ʻoku fakaongoongoleleiʻi ʻe he meʻa ko iá ko ha tokotaha pule lelei ia. Naʻe maʻu ʻe Solomone ʻa e “pule foki mei he tahi [Kulokulá] ki he tahi [Metiteleniané], pea mei he vaitafe [ʻIufaletesí] ki he ngataʻanga ʻo mamani.” (Sāme 72:​6-8) Ko ʻene tuʻunga-pulé naʻe fakaʻilongaʻiʻaki ia ʻa e melino mo e lakalakaimonū taʻehanotatau. (1 Tuʻi 4:​24, 25) Ko e pule ʻa Solomoné naʻe lavameʻa. ʻI he tafaʻaki ʻe tahá, ko e ʻikai leleiʻia ai ʻa e kakaí ʻokú ne ʻomai ʻa e fakamā ki ha ʻōfisa māʻolunga.

ʻI he fekauʻaki mo e meʻá ni, ko e hā ʻe lava ke leaʻaki fekauʻaki mo e lāngilangi ʻo Solomone Lahi Angé, ʻa e Tuʻi faka-Mīsaiá, ʻa Sīsū Kalaisi? Fakakaukau atu ki he kakai ʻokú ne pule ki aí naʻa mo e ʻi he ʻahó ni. Mei he ngataʻanga ʻe taha ʻo e māmaní ki he ngataʻanga ʻe tahá, kuo ʻosi fili ai ʻe he kakai tangata mo e kakai fefine manavahē-ʻOtua laka hake he toko ono milioná ke nau moʻui ʻi he malumalu ʻo e tuʻunga-pule ʻa Kalaisí. ʻOku nau ngāueʻi ʻa e tui kia Sīsū pea ʻoku fakafāʻūtahaʻi kinautolu ʻi he lotu moʻoni ʻa e ʻOtua moʻuí. (Sione 14:1) ʻI he aʻu ki he ngataʻanga ʻo e Pule Taʻu ʻe Taha Afé, ko e faʻahinga kotoa ʻi he manatu ʻa e ʻOtuá ʻe ʻosi fokotuʻu hake kinautolu. ʻE fonu ha māmani palataisi ʻi he taimi ko iá ʻi he kakai fiefia mo māʻoniʻoni, kuo nau fakahāhā ʻa e houngaʻia ki honau Tuʻí. Ko ha fakamoʻoni papau ē ki he lavameʻa ʻo e tuʻunga-pule ʻa Kalaisí! Tau piki maʻu ki heʻetau ʻamanaki fisifisimuʻa ki he Puleʻangá.

Ngaahi ʻAonga Fakalaumālie mo Fakaesino

Ko e manavahē anga-ʻapasia ki he ʻOtuá ʻe lava ke ne ʻomai kiate kitautolu ʻa e loto nonga mo e ʻatamai fiemālie. ʻOku peheé koeʻuhi ko e ngaahi tafaʻaki lahi ʻo e potó ʻoku kau ai ʻa e fakafuofua leleí mo e ʻiloʻiló. ʻOku pehē ʻe he Palovepi 14:29: “Ko ia ʻoku fakatotoka ki he ʻita ko e tama ʻatamai lahi [pe ʻiloʻilo]: ka ko ia ʻoku loto ʻoho, ko hono ʻinasi muʻa ko e vale.” Ko e ʻiloʻiló ʻokú ne tokoniʻi kitautolu ke tau ʻiloʻi ko e ʻita taʻemapuleʻí ʻoku ʻi ai hono ola fakatupu maumau ki hotau tuʻunga fakalaumālié. “Ko e fetāufehiʻaʻaki, ko e fetuʻusi, ko e meheka, ko e feʻiteʻitani, ko e fakafelaulauhi” ʻoku fakahokohoko ia ʻi he lotolotonga ʻo e ngaahi ngāue ʻe lava ke ne taʻofi kitautolu mei he maʻu ‘tofiʻa ʻi he puleʻanga ʻo e ʻOtuá.’ (Kaletia 5:​19-​21) ʻOku fakahinohinoʻi kitautolu ke ʻoua ʻe tukulotoa naʻa mo e ʻita ʻoku ala fakatonuhiaʻí. (Efeso 4:​26, 27) Pea ko e taʻefaʻakātakí ʻe lava ke taki atu ia ki he lea valé pea mo e ngāue te tau fakaʻiseʻisa ai ʻamui ange.

ʻI hono fakahaaʻi ʻa e ngaahi nunuʻa fakaesino ʻikai lelei ʻo e ʻitá, ʻoku pehē ʻe he tuʻi ʻIsilelí: “Ko e loto ʻoku toka ko e moʻuiʻanga ʻo e sino kotoa: ka ko e meheka, ko e popo tofu pe ʻoku totolo ʻi hoku ngaahi hui.” (Palovepi 14:30) Ko e ngaahi tuʻunga mahamahaki ʻoku tupu mei he ʻitá mo e tōlilí ʻoku kau ki ai ʻa e ngaahi faingataʻaʻia ʻi he mānavá, ʻalu hake ʻa e māʻolunga ʻo e totó, ngaahi mahamahaki ʻo e ʻaté pea mo e ngaahi nunuʻa fakatupu maumau ʻi he lama ʻo e keté. ʻOku toe fakahokohoko foki ʻe he kau toketaá ʻa e ʻitá mo e tōlilí ko e ongo ia ʻoku fakatupu maumau, pe ʻokú ne fakatupunga naʻa mo e ngaahi mahaki ʻo hangē ko e palá, kula mo e veli ʻo e kilí, mahaki helá, mahaki kilí pea mo e ngaahi palopalema ʻi he fakamolū-meʻakaí. ʻI he tafaʻaki ʻe tahá, “ko ha loto ʻoku fakamelinó ʻokú ne foaki moʻui ki he sinó.” (Palovepi 14:​30, New International Version) Ko ia ai, ʻoku fakapotopoto ke tau “nofo ki he ngaahi meʻa ʻoku kau ke fakamelino mo e ngaahi meʻa ʻoku kau ki heʻetau fefaiʻaki hotau langa hake.”​—Loma 14:19.

ʻOku Tokoniʻi Kitautolu ʻe he Manavahē ki he ʻOtuá Ke Tau Taʻefilifilimānako

“Ko ia ʻoku ne taʻomi siʻi masiva ʻoku ne talakaaʻi ʻa e ʻAfio naʻe ngaohi ia,” ko e lea ia ʻa Solomoné, “ka ko ia ʻoku fai ʻofa ki he fusimoʻomo ʻoku ne fakaongolelei ʻa ʻEne ʻAfio.” (Palovepi 14:31) Ko ha tangata manavahē-ʻOtua ʻokú ne ʻiloʻi ko e faʻahinga kotoa ʻo e tangatá ʻoku nau maʻu ʻa e Tokotaha-Ngaohi tatau, ko Sihova ko e ʻOtuá. Ko ia ai, ko e taha māʻulaló ko ha kaungā faʻahinga ia ʻo e tangatá, pea ko e anga ʻo e tōʻonga ʻoku fai kiate iá ʻoku tapua atu ai ʻa e Tokotaha-Fakatupu ʻo e faʻahinga ʻo e tangatá. Ke fakalāngilangiʻi ʻa e  ʻOtuá, kuo pau ke tau feangainga totonu mo taʻefilifilimānako ki he niʻihi kehé. Ko e Kalisitiane masivá ʻoku totonu ke ne maʻu ʻa e tokangaʻi fakalaumālie ʻo ʻikai filifilimānako. Kuo pau ke tau aʻu tatau pē ki he masivá pea mo e tuʻumālié mo e ongoongolelei ʻo e Puleʻanga ʻo e ʻOtuá.

ʻI he lave ki ha toe ʻaonga ʻo e manavahē fakaʻotuá, ʻoku pehē ʻe he tuʻi potó: “Koeʻuhi ko ʻene koví ʻe lōmia ai ʻa e fulikivanú, ka ʻe maʻu ʻe he māʻoniʻoní ʻa e hūfangaʻanga ʻi heʻene anga-tonú.” (Palovepi 14:​32, NW) ʻOku anga-fēfē ʻa hono lōmia ʻa e tokotaha fulikivanú? Kuo fokotuʻu mai ʻo pehē ʻoku ʻuhinga ení ʻe ʻikai ha toe malava ke ne fakaakeake ʻi he taimi ʻokú ne hokosia ai ha fakatamakí. ʻI he tafaʻaki ʻe tahá, ʻi he taimi ʻoku patō ai ʻa e faingataʻá, ko e tangata manavahē-ʻOtuá ʻokú ne maʻu ʻa e hūfangaʻanga ʻi heʻene anga-tonu ki he ʻOtuá. ʻI hono maʻu ʻa e falala kakato kia Sihova ʻo aʻu ki he maté, ʻokú ne fakahāhā ʻa e fakapapau tatau ʻo hangē ko Siopé, ʻa ia naʻá ne pehē: “ʻE ʻikai te u tukuange ʻeku maʻoniʻoni [pe anga-tonú] ʻo aʻu ki he mate.”​—Siope 27:5.

Ko hono tauhi maʻu ʻa e anga-tonú ʻoku fiemaʻu ki ai ʻa e manavahē mo e poto fakaʻotua. Pea ko fē ʻe lava ke maʻu ai ʻa e potó? “Oku nofo ae boto i he loto oia oku maʻu ae faa ilo [pe mahinó],” ko e tali mai ia ʻa e Palovepi 14:33 (PM), “ka oku fakaha mai aia oku i he loto[lotonga] oe kakai vale.” ʻIo, ko e potó ʻe lava ʻo maʻu ia ʻi he loto ʻo ha tangata ʻokú ne maʻu ʻa e mahinó. Neongo ia, ʻi he founga fē ʻe hoko ai ʻo ʻiloʻi ʻa e potó ʻi he lotolotonga ʻo e kau valé? Fakatatau ki he maʻuʻanga fakamatala ʻe taha, “ko e valé, ʻa ia ʻoku vēkeveke ke hā ko e potó, ʻokú ne kailangakiʻi ʻa e meʻa ʻokú ne pehē ʻoku fakapotopotó ka ʻi he meʻa ko iá ʻoku hoko ia ʻo fakavalevale.”

‘Hiki Hake ae Buleaga’

ʻI hono hiki ʻetau tokangá mei he founga ʻoku uesia ai ha tokotaha tāutaha ʻe he manavahē ki he ʻOtuá ki he founga ʻokú ne uesia ai ha puleʻanga kakató, ʻoku pehē ʻe he tuʻi ʻo ʻIsilelí: “Oku hiki hake e he maonioni ae buleaga: ka koe mea fakama ae agahala ki he gaahi buleaga.” (Palovepi 14:​34, PM) He mahino ē ko e tefitoʻi moʻoni ko ʻení ʻi hono fakahāhā ʻi he tuʻunga ʻo e puleʻanga ʻo ʻIsilelí! ʻI he pipiki ki he ngaahi tuʻunga māʻolunga ʻa e ʻOtuá naʻe iku ai ki hono hakeakiʻi ʻo ʻIsileli ʻi he ngaahi puleʻanga takatakaí. Kae kehe, ko e ngaahi ngāue hokohoko ʻo e talangataʻá naʻe taki atu ia ki he fakamaaʻi pea faifai atu pē ki hono siʻaki ʻo ʻIsileli ʻe Sihová. Ko e tefitoʻi moʻoni ko ʻení ʻoku ngāueʻaki ia ki he kakai ʻa e ʻOtuá he ʻaho ní. Ko e fakatahaʻanga Kalisitiané ʻoku kehe ia mei he māmaní koeʻuhí he ʻoku pipiki ia ki he ngaahi tefitoʻi moʻoni māʻoniʻoni ʻa e ʻOtuá. Neongo ia, ke tauhi maʻu ʻa e tuʻunga hakeakiʻi ko iá, kuo pau ke tau moʻui tāutaha ʻi ha moʻui anga-maʻa. Ko hono fakahoko ʻo e angahalá ʻokú ne ʻomi ai ʻa e tuʻunga fakamā kiate kitautolu fakafoʻituitui pea pehē ki he lumaʻanga ʻo e fakatahaʻangá pea mo e ʻOtuá.

ʻI he felāveʻi mo e meʻa ʻokú ne ʻomi ʻa e fiefia ki ha tuʻí, ʻoku pehē ʻe Solomone: “ʻOku ʻofeina ʻe he tuʻi ha tamaioʻeiki ʻoku fai fakapotopoto [ pe vavangá]: ka ʻoku to hono houhau kiate ia ʻoku fakatupu ma.” (Palovepi 14:35) Pea ʻoku pehē ʻe he Palovepi 16:13: “Ko e mamana ʻo e ngaahi tuʻi ko e ngutu maʻoniʻoni: pea ʻoku ʻofeina ʻa ia ʻoku lea totonu.” ʻIo, ko hotau Takimuʻá mo e Tuʻí, ʻa Sīsū Kalaisi, ʻokú ne fiefia ʻi he taimi ʻoku tau ngāue ai ʻi he māʻoniʻoní mo e vavangá pea ngāueʻaki hotau loungutú ʻi he ngāue malangaʻi ʻo e Puleʻangá mo e ngaohi-ākongá. Ko ia ko hono moʻoní, tau hanganaki femoʻuekina ʻi he ngāue ko iá ʻi heʻetau maʻu ʻa e ngaahi tāpuaki ʻoku haʻu mei he manavahē ko ia ki he ʻOtua moʻoní.

[Fakamatala ʻi lalo]

[Fakatātā ʻi he peesi 15]

Ko e manavahē fakaʻotuá ʻe lava ʻo akoʻi ia