Ngaahi Fehuʻi mei he Kau Lautohí

ʻOku malava ʻe he vaʻinga ʻi he ngaahi keimi fakakomipiuta fakamālohí ʻo uesia hoto vahaʻangatae mo Sihová?

“ʻOku sivi ʻe Sihova ʻa e maʻoniʻoni: ka ko e angakovi,” ko e tohi ia ʻa Tuʻi Tēvita ʻo ʻIsileli ʻo e kuonga muʻá, “mo e ʻofa ki he fakamalohi, ʻoku fehiʻa [moʻoni] ki ai ʻene moʻui.” (Sāme 11:5) Ko e foʻi lea ʻi he muʻaki leá ki he “fehiʻa” ʻokú ne maʻu ʻa e fakakaukau ki he hoko ko ha “taha ʻa ia ko ha fili.” Ko ia ai, ko ha taha pē ʻoku ʻofa ki he fakamālohí ʻokú ne ʻai ai ia ko ha fili ʻo e ʻOtuá. Ko ia, ko e fehuʻi ʻoku fiemaʻu ke tau lāulea ki aí, ko ʻeni: ʻOku malava ʻe he vaʻinga ʻi ha ngaahi keimi fakakomipiuta pau ʻo fakatupulekina ha ʻofa ki he fakamālohí?

ʻOku fakahīkihikiʻi ʻe he ngaahi keimi fakakomipiuta fakamālohí ʻa hono ngāueʻaki ʻo e ngaahi meʻataú. ʻOku nau faʻa akoʻi ai ʻa e tokotaha-keimí ki he pōtoʻi ʻi he taú. ʻOku pehē ʻe he makasini The Economist: “ʻOku mātuʻaki falala lahi ange ʻa e kau tau ʻAmeliká ki he ngaahi keimi fakakomipiutá ʻi he tuʻunga ko e ngaahi naunau ako tau. Ko e niʻihi ʻo e ngaahi keimi fakakomipiuta ʻoku ngāueʻaki ʻe he kau taú ʻoku lolotonga tuku mai ia ke fakatau ʻe he kakaí.”

Ko e moʻoni, ko e faʻahinga ʻoku nau vaʻinga ʻi he ngaahi keimi fakakomipiuta fakamālohí ʻoku ʻikai te nau fai ai ʻe kinautolu ha maumau ki he kakai moʻoní. Ka ko e hā ʻoku hanga ʻe he fili ko ʻeni fekauʻaki mo e fakafiefiá ʻo fakahaaʻi mai fekauʻaki mo e meʻa ʻoku hoko nai ki honau lotó? (Mātiu 5:​21, 22; Luke 6:45) Ko e hā te ke fakaʻosiʻaki fekauʻaki mo ha taha ʻokú ne fiefia ʻi hono hokaʻi, fanaʻi, fakalaveaʻi mo hono tāmateʻi ʻo e kakai ʻoku fakakaukauloto atu ki aí? Fēfē kapau ʻoku fakamoleki ʻe he tokotaha ko ʻení ha ngaahi houa lahi ʻi he uike taki taha ʻi hono fakalato ʻa e ngaahi manako fakamālohi ko iá, ʻo hoko ʻo meimei maʻunimā ʻe he ngaahi keimi peheé? ʻOku meimei te ke fakaʻosiʻaki ʻo pehē naʻá ne ohi ha ʻofa ki he fakamālohí, ʻo hangē pē ko ha tokotaha ʻokú ne mamata ʻi he meʻa fakalieliá ʻokú ne fakatupulekina ai ʻa e ngaahi holi taʻetaau.—Mātiu 5:​27-29.

ʻOku lahi fēfē ʻa e fehiʻa ʻa Sihova ʻi ha taha ʻoku ʻofa ki he fakamālohí? Naʻe pehē ʻe Tēvita ʻoku “fehiʻa [moʻoni]” ʻa Sihova kiate ia. ʻI he ʻaho ʻo Noá, naʻe fakahāhaaʻi ai ʻe Sihova ʻa hono lahi ʻo ʻene fehiʻa ki he faʻahinga ko ia ʻoku ʻofa ki he fakamālohí. Naʻe pehē ʻe Sihova kia Noa: “Kuo ongo mai kiate au kuo aʻu ʻa e kakano kotoa pe ki hono ngataʻanga; he ko e meʻa ʻiate kinautolu kuo opeope ʻi he fonua ʻa e fakamalohi; pea ko eni, te u fakaʻauha kinautolu fakataha mo e fonua.” (Senesi 6:13) Naʻe fakaʻauha ʻe he ʻOtua moʻoní ha māmani fakakātoa ʻo e faʻahinga ʻo e tangatá koeʻuhi ko ʻenau ngaahi founga fakamālohí. Naʻá ne fakahaofi pē ʻa Noa mo hono fāmilí—ko e toko valu naʻe ʻikai te nau ʻofa ki he fakamālohí.—2 Pita 2:5.

Ko e kakai ko ia ʻoku nau loto ke hoko ko e ngaahi kaumeʻa ʻo Sihová ʻoku nau “tuki huo ʻaki ʻenau ngaahi heleta, mo e ngaahi hele ʻauhani ʻaki honau ngaahi tao.” ʻI he ʻikai ke ako ke ʻofa ki he fakamālohí, ʻoku ʻikai te nau “kei fai ha akotau.” (Aisea 2:4) Ke kei hoko ko e kaumeʻa ʻo e ʻOtuá kae ʻikai ko e hoko ko hono fili, kuo pau ke tau “fakaʻehiʻehi mei he kovi, ka[e] fai ʻa e lelei.” ʻOku fiemaʻu ke tau “kumi ki he melino, ʻio, ʻo tuli ki ai.”—1 Pita 3:11.

Fēfē kapau kuo tau ʻosi kau ʻi he vaʻinga ʻi he ngaahi keimi vitiō fakamālohí? ʻOku fiemaʻu leva ke tau fakapapauʻi mālohi ke fakahōifuaʻi ʻa Sihova ʻaki hono tuku ʻa hono fai ʻa e meʻa ʻokú ne fehiʻa aí. ʻOku totonu moʻoni ke tau lotu ʻo kole ʻa e tokoni ʻa e laumālie māʻoniʻoni ʻo e ʻOtuá ke ne fakangata ʻa e tōʻonga fakatupu-kovi fakalaumālie ko ʻení. ʻE malava ke tau taʻofi ia kapau ʻoku tau fakaʻatā ʻa e ngaahi ʻulungāanga hangē ko e melinó, leleí mo e mapuleʻi-kitá ke nau ngāueʻaki ha tākiekina fakaʻotua ʻi heʻetau moʻuí.—Luke 11:13; Kaletia 5:​22, 23.