Tokoni ki Heʻetau Ngaahi Ongoʻí

ʻOKU hā ngali puleʻi nai ʻi ha taimi ʻe he ngaahi ongoʻi taʻepaú ʻa hoʻo moʻuí? ʻOkú ke hoko ʻo loto-mamahi, ʻita pe feifeitamaki ngofua? ʻOku hanga ʻe he ngaahi loto-moʻua ʻo e moʻuí ʻo lōmekina koe? Ko e hā ʻa e meʻa ʻe tokoní?

Ko e ngaahi feangai fakaeongó ko ha konga fakanatula ia ʻo e hokosia ʻa e tangatá. ʻI hono puleʻi leleí, ʻoku nau ʻai ai ʻa e moʻuí ke toe fakalata ange. Neongo ia, ʻoku fakahaaʻi ʻe he Tohi Tapú, ko e “fakamalohia ʻoku meʻa mo sesele ai ʻa e tangata poto.” (Koheleti 7:7) ʻI ha māmani ʻa ia ʻoku mātuʻaki anga-maheni ai ʻa e fakamālohí mo e ngaahi fakatuʻutāmakí, ko hai ia ʻoku taʻeuesia fakaeongo ʻe he ngaahi meʻa ʻoku hoko takatakai ʻiate iá? Kae kehe, ʻoku toe pehē ʻe he Tohi Tapú: “ʻOku ʻikai ha meʻa ʻoku lelei hake, ka ko e fiefia ʻa e tangata ʻi he ngaahi meʻa ʻoku ne fai.” (Koheleti 3:​22) Ke ʻai ʻa e moʻuí ke fakafiefia angé, ʻoku fiemaʻu ai ke tau ako ke fiefia ʻaki hono fakatupulekina ʻa e ngaahi ongo ʻoku leleí. ʻE lava fēfē ke tau fakatupulekina ʻa e ngaahi ongo ʻoku ʻaongá pea taʻofi ʻa e ngaahi ongo ʻoku fakatupu maumaú?

Ko hono fai ʻa e ngaahi ngāue ʻaongá ʻoku faʻa fakasiʻisiʻi ai ʻa e lahi ʻo ʻetau ngaahi ongoʻi taʻepaú. Ko e fakatātaá, ʻi he taimi ʻoku tau ongoʻi loto-moʻua ai ʻi he ngaahi meʻa ʻa ia ʻoku ʻikai ke tau lava ʻo puleʻí, ʻikai ʻoku lelei ange ke liliu ʻetau founga-tuʻumaʻú pe ʻātakaí kae ʻikai ko hono fakafonu hotau ʻatamaí ʻaki ʻa e hohaʻá? Ko hono fai ha luelue ʻeveʻeva, fanongo ki ha fasi fakanonga, kau ʻi ha fakamālohisino longomoʻui, pe ko hono fai ha ngāue anga-ʻofa ki ha tokotaha ʻoku fiemaʻu tokoní ʻe tokonaki mai nai ai ha nonga pea ʻomi ai kia kitautolu ha fiefia.​—Ngāue 20:35.

Kae kehe, ko e founga lelei taha ke toʻo atu ai ʻa e ngaahi fakakaukau taʻepaú, ko hono tuku ʻetau falalá ʻi he Tokotaha-Fakatupú. ʻI he taimi ʻoku kei hokohoko atu ai ʻa e ngaahi fakakaukau taʻepaú, ʻoku fiemaʻu ke tau ‘li atu ā hono kotoa ʻo ʻetau lotomoʻuá ki he ʻEne ʻAfió’ fakafou ʻi he lotu. (1 Pita 5:​6, 7) ʻOku fakapapauʻi mai ʻe he Tohi Tapú kia kitautolu: “Ko e loto lavea ʻoku ofi ki ai ʻa e ʻEiki . . . Ko e angatonu ʻoku lahi ʻene ngaahi mamahi: ka ʻoku hamusi ia mei ai kotoa ʻe he ʻEiki.” (Sāme 34:​18, 19) ʻE lava fēfē ke tau falala-pau ʻe lava ke hoko ʻa e ʻOtuá ko hotau “tokoni mo [hotau] fakamoui”? (Sāme 40:​17, PM) ʻE lava ke tau fai pehē ʻaki hono ako ʻa e Tohi Tapú pea fakakaukauloto ki he ngaahi fakatātā moʻoni ʻo e mahuʻingaʻia fakafoʻituitui ʻa e ʻOtuá ʻi he lelei ʻa ʻene kau sevānití.