“Ko Kinautolu ʻOku ʻAlu ki Tahi ʻi he Ngaahi Vaká”

ʻI HE hanga ki he tuʻa taulanga ʻo Gloucester, Massachusetts, U.S.A., ʻoku tuʻu ai ha maka-fakamanatu polonise ʻo ha tangata fakaʻuli, ʻokú ne tokangataha ki hono fakaʻuliʻi ʻa hono vaká ʻi ha afā. ʻOku fakamanatu ʻe he maka-fakamanatú ʻa e kau tangata toutai Gloucester ʻe laui afe ʻoku ʻiloa kuo nau mate ʻi tahí. ʻOku ʻi he tefito ʻo e maka-fakamanatú pea mo ha peleti fakamanatu ofi mai ʻa e ngaahi lea ʻo e Sāme 107:​23, 24: “Ko kinautolu ʻoku ʻalu ki tahi ʻi he ngaahi vaká, ʻoku nau pisinisi ʻi he ngaahi vai lahí; ʻOku sio ʻa e faʻahingá ni ki he ngaahi ngāue ʻa e ʻEikí, mo ʻene ngaahi meʻa fakaofo ʻi he lolotó.”​—King James Version.

Ko e ngāue ʻi he feituʻu toutai lahi ʻo e ʻAtalanitikí ko ha pisinisi fakatuʻutāmaki ia. ʻI he faai mai ʻa e ngaahi taʻú, ko e kau tangata ko honau tokolahí ko e toko 5,368 mei Gloucester, ʻa ia ko hono tokolahi he taimi ní ko e toko 30,000 nai, ʻoku ʻiloa naʻe mole ʻenau moʻuí ʻi tahi lolotonga ʻenau toutaí. ʻOku pehē ʻe he fakamanatú: “Naʻe lōmia ʻa e niʻihi ʻe he ngaahi matangi lalahi mo e ngaahi fuʻu peau ʻo ha matangi tokelau-hahake fakatuʻutāmaki. Naʻe fetaulaki tāutaha ʻa e niʻihi mo honau tufakangá ʻi ha kiʻi vaka valevale naʻe hē mei he vaka fanā-ua ʻa ia naʻá ne ʻave kinautolu ki he feituʻu toutaí. Naʻe fepaki ʻa e ngaahi vaka ʻe niʻihi ʻi he ngaahi afaá pea ngoto ai ʻi ha tuʻunga fakamamahi. Ko e ngaahi vaka ʻe niʻihi naʻe tuiʻi kinautolu ʻe he ngaahi fuʻu sitima ʻi he ngaahi halanga vaká.”

ʻOku tuʻu ʻa e fakamanatú ko ha fakamoʻoni fakamamahi ia ki he ngāue mālohi mo e ngaahi fakatuʻutāmaki kuo fehangahangai mo e kau tangata toutaí ʻi he faai mai ʻa e ngaahi senitulí. Fakaʻuta atu ki he ngaahi loʻimata ʻi he siva ʻa e ʻamanakí ʻoku tafe koeʻuhi ko e ngaahi husepāniti, ngaahi tamai, fanga tokoua mo e ngaahi foha kuo molé. Neongo ia, ʻoku ʻikai fakangaloʻi ʻe Sihova ko e ʻOtuá ʻa e kau uitou, kau tamai-mate, pe faʻahinga kuo mole ʻenau moʻuí ʻi tahí. ʻOku fakahaaʻi ʻe he ʻapositolo ko Sioné ʻa e meʻa ko eni ʻe hoko ʻi he kahaʻú: “Naʻe tukuange ʻe he tahi ʻa e pekia naʻe ʻi ai; pea mo Mate foki mo e Hetesi naʻa na tukuange ʻa e pekia naʻe ʻiate kinaua.” (Fakahā 20:13) ʻI he taimi ʻo ʻenau toetuʻú, ko e faʻahinga naʻe “ʻalu ki tahi ʻi he ngaahi vaká” te nau sio ki he fakaofo moʻoni ʻa e “ngaahi ngāue ʻa e ʻEikí.”