Ko e Hā ʻa e Faʻahinga Ako ʻe Lava Ke Ne ʻAi ke Lavameʻa ʻa Hoʻo Moʻuí?

KUO faifai ange peá ke mātuʻaki ongoʻi taulōfuʻu ʻi he ngaahi palopalemá ʻo ke ongoʻi ai ʻo hangē ʻokú ke melemo ʻi ha vai fofoó? Fakaʻuta atu pē ki he lahi ʻo e faingataʻa naʻe mei lava ke hokó kapau naʻá ke fai ha fehālaaki ʻi he fekuki mo e taha, pe lahi ange ʻo e ngaahi palopalema ko iá! ʻOku ʻikai ha taha ʻe fanauʻi mai fakataha mo ha malava ke ne solova ʻi ha tuʻunga lavameʻa ʻa e ngaahi palopalema kotoa pē, ʻo fai ʻa e ngaahi fili lelei ʻi he taimi kotoa pē. Ko e taimi eni ʻoku fiemaʻu ai ʻa e akó. ʻE lava ke ke maʻu mei fē ʻa e ako ke teuʻi ai koe ke ke fekuki mo e ngaahi palopalema ʻi he moʻuí?

Ko e tokolahi, fakatouʻosi ʻa e kei siʻí mo e taʻumotuʻá, ʻoku nau fakahīkihikiʻi ʻa e mahuʻinga ʻo ha ako māʻolunga. ʻOku aʻu ʻo pehē ʻe he kau mataotao ʻe niʻihi ʻoku nau “tui kakato ʻe ʻikai ʻaupito malava ke ke maʻu ʻe koe ha ngāue [taau] ʻi he ʻikai ha mataʻitohi mei ha ʻunivēsití.” Neongo ia ʻoku ʻi ai ʻa e niʻihi ʻo e ngaahi fiemaʻu ʻa e faʻahinga ʻo e tangatá ʻoku ʻikai fakalato ia ʻe he ngaahi lavameʻa fakamatelié. Hangē ko ení, ʻoku tokoniʻi koe ʻe he ako māʻolunga angé ke ke hoko ko ha mātuʻa, hoa mali pe kaumeʻa lelei? Ko e moʻoni, ko e kakai ʻoku fai ʻa e leleiʻia ʻi heʻenau ngaahi lavameʻa fakaʻatamaí ʻoku nau fakatupulekina nai ha ngaahi angaʻitangata ʻikai lelei, ʻikai lavameʻa ʻi heʻenau moʻui fakafāmilí, pe aʻu nai ʻo iku ki heʻenau taonakita.

ʻOku hanga ʻa e niʻihi ki he lotú ki ha tataki, ʻi he hoko ko ha matavai ʻo e akó, ka ʻoku hoko ʻo siva ʻenau ʻamanakí koeʻuhi ko e ʻikai te nau maʻu ha tokoni ʻaonga ke fakafetaulakiʻi ʻaki ʻa e ngaahi tuʻunga faingataʻa ʻi he moʻuí. ʻI hono fakatātaaʻi ení, ko ʻAmelia a mei Mekisikou ʻokú ne pehē: “ʻI he taʻu ʻe 15 kuo maliu atú naʻá ku ongoʻi ai ko au mo hoku husepānití ʻe ʻikai pē lava ke ma kei fakataha. Naʻá ma fakafekiki ʻi he taimi kotoa pē. Naʻe ʻikai lava ke u ʻai ia ke tuku ʻa ʻene inú. Naʻe pau ke u toutou liʻaki ʻema fānau īkí ke nau nofo ʻia kinautolu pē lolotonga ʻeku ʻalu ʻo kumi ʻa hoku husepānití. Naʻá ku mafasia fakaeongo. Naʻá ku ʻalu tuʻo lahi ki he fale lotú ʻo kumi ki ha meʻa ʻe tokoniʻi nai ai au ke u maʻu ha fakaleleiʻanga. Neongo naʻe ngāueʻaki ʻi he taimi ki he taimi ʻa e Tohi Tapú, naʻe ʻikai ʻaupito te u fanongo ki ha akonaki ʻe taha naʻe kaunga hangatonu ki hoku tuʻungá; pea naʻe ʻikai ke fakaofiofi mai ha taha ʻo tala mai ʻa e meʻa ke faí. Ko e tangutu ʻi ha taimi ʻi he fale lotú ʻo toutou fai ha ngaahi lotú naʻe ʻikai te ne fakafiemālieʻi au.” ʻOku hoko nai ʻo mole ʻa e ʻamanaki ʻa e niʻihi ʻi heʻenau sio ki he anga ʻo e mamaʻo ʻa honau kau taki fakalaumālié mei he moʻui ʻi ha moʻui alafaʻifaʻitakiʻangá. Ko hono olá, ʻoku mole ai ʻa e falala ʻa e tokolahi ki he lotú ko ha matavai ia ʻo e founga fakafaiako, pe ko e ako ki ha moʻui lavameá.

Ko ia ai, te ke ʻeke hifo nai kiate koe, ‘Ko e hā ʻa e faʻahinga ako ʻoku totonu ke u maʻu koeʻuhi ke ʻai ai ʻeku moʻuí ke lavameʻá?’ ʻOku maʻu ʻe he lotu faka-Kalisitiane moʻoní ʻa e tali ki he fehuʻi mahuʻinga ko ení? ʻE lāulea ki he meʻá ni ʻi he kupu hoko maí.

[Fakamatala ʻi lalo]