Maʻu ʻAonga mei he Ako Lelei Taha ʻOku Ala Maʻú!

ʻOKU fakahaaʻi ʻe he Tohi Tapú ʻa Sihova ko e ʻOtuá ko e Tokotaha-Fakatupu ia ʻo e meʻa kotoa pē, ʻo kau ai ʻa e faʻahinga ʻo e tangatá. (Senesi 1:​27; Fakahā 4:​11) ʻI hono tuʻunga ko e Faiako Maʻongoʻongá, naʻá ne akoʻi ʻa e ʻuluaki ongo meʻa fakaetangatá, ʻa ʻĀtama mo ʻIvi, pea teuʻi kinaua ki he moʻui ʻi he ngoue fakaʻofoʻofa ʻi ʻĪtení. Ko ʻene taumuʻá ia ke hokohoko atu ʻa hono akoʻi mo tokangaʻi kinauá ʻo taʻengata. (Senesi 1:​28, 29; 2:​15-​17; Aisea 30:​20, 21) Fakakaukau ange pē ki he ʻamanaki ko iá!

Kae kehe, ko e meʻa fakamamahí he naʻe liʻaki ʻe he ʻuluaki ongo meʻá ʻa e meʻa kotoa. Ko hona ʻalunga talangataʻá naʻe fakatupunga ai ʻa e tōlalo fakaeʻulungāanga mo fakaesino ʻa e matakali ʻo e faʻahinga ʻo e tangatá. (Senesi 3:​17-​19; Loma 5:​12) ʻI he lave ki he faʻahinga naʻa nau moʻui ʻi ha ngaahi toʻutangata siʻi pē hili hono fakatupu ʻa e faʻahinga ʻo e tangatá, ʻoku pehē ʻe he Tohi Tapú: “Naʻe ʻafioʻi ʻe Sihova kuo fakautuutu ʻa e kovi ʻa e tangata ʻi mamani, pea ʻoku kovi ʻatā ʻa e filioʻi kotoa pe ʻo e ngaahi fakakaukau ʻa hono loto maʻuaipe.”​—Senesi 6:5.

Kuo mahili atu eni ʻa e meimei taʻu ʻe 4,500 talu mei hono fakaʻosiʻaki ʻe Sihova ʻo pehē ʻoku hehema maʻu pē ʻa e tangatá ki he koví, pea ko e tuʻunga ʻo e faʻahinga ʻo e tangatá ʻoku toe kovi ange ia he taimí ni ʻi ha toe taimi. ʻOku loi ʻi he tuʻunga taʻemā ʻa e tokolahi, kaihaʻa, pe ʻohofi ʻa e niʻihi kehé. ʻOku fakautuutu ʻa e ngaahi palopalemá ʻi he ʻaho kotoa pē, lolotonga ia ʻoku hōloa ʻa e tokanga ki hoto kaungā faʻahinga ʻo e tangatá. ʻIkai ko e lahi taha ʻo e ngaahi vahaʻangatae fakafoʻituituí, ʻo kau ai ʻa e ngaahi vahaʻangatae ʻi he ngaahi lotoʻi fāmilí, ʻoku ʻi he tuʻunga faingataʻa moʻoni? Neongo ia, ʻoku ʻikai totonu ke tukuakiʻi ʻa e ʻOtuá ki he ngaahi tuʻunga lolotongá, pea kuo ʻikai ke tuku ʻene tokanga fekauʻaki mo e ngaahi palopalema he ʻaho ní. Kuo mahuʻingaʻia maʻu pē ʻa Sihova ʻi he lelei ʻa e faʻahinga ʻo e tangatá, pea ʻokú ne mateuteu ke akoʻi ʻa e faʻahinga ʻoku hanga kiate ia ki ha tataki ke maʻu ai ha moʻui fiefiá. ʻI he taʻu nai ʻe 2,000 kuo maliu atú naʻá ne fekauʻi mai ai ʻa hono ʻAló, ʻa Sīsū Kalaisi, ki he māmaní, pea fakahāhaaʻi ʻa ʻEne mahuʻingaʻia ʻi hono akoʻi ʻa e kakai ʻoku nau loto ke ʻai ke lavameʻa ʻenau moʻuí. Naʻe tuku mai ʻe Sīsū ha sīpinga ki he akó ʻa ia naʻe haohaoa koeʻuhí he naʻe akoʻi ia ʻe he Faiako Maʻongoʻongá ʻi he taimi fuoloa ʻaupito taʻealaʻiloʻi.

Lotu Faka-Kalisitiane Moʻoní​—Ko ha Ako

Naʻe fokotuʻu ʻe Sīsū Kalaisi ʻa e lotu faka-Kalisitiane moʻoní, ko ha founga moʻui ia ʻoku makatuʻunga ʻi he ʻofá. ʻI he lotu faka-Kalisitiane moʻoní, ʻoku fiemaʻu ai ke fehoanaki ʻa e fakakaukau mo e tōʻonga kotoa pē mo e finangalo ʻo e ʻOtuá, ki he taumuʻa ko hono ʻoatu ʻa e lāngilangi mo e kolōlia ki hono huafá. (Mātiu 22:​37-​39; Hepelu 10:7) Ko e ngaahi akonaki ʻa Sīsū ki he founga ʻo e moʻui ko ení naʻe tataki ia ʻe heʻene Tamaí, ʻa Sihova. ʻOku tau lau ʻi he Sione 8:​29 ʻo fekauʻaki mo e poupou naʻe maʻu ʻe Sīsū mei he ʻOtuá: “Ko ia naʻa ne fekau mai au ʻoku ne ʻiate au: naʻe ʻikai te ne tuku au ke tuēnoa; koeʻuhi ʻoku ou fai maʻuaipē ʻa e ngaahi meʻa ʻoku ne hōhōʻia ai.” (Fakaʻītali ʻamautolu.) ʻIo, naʻe maʻu ʻe Sīsū ʻa e poupou mo e tataki ʻa ʻene Tamaí ʻi he kotoa ʻo ʻene ngāue fakafaifekaú. Ko e muʻaki kau muimui ʻo Sīsuú naʻe ʻikai fiemaʻu ke nau fehangahangai mo e ngaahi pole ʻi he moʻuí ʻo taʻeʻiai ha tataki. Naʻe akoʻi kinautolu ʻe Sihova fakafou ʻi hono ʻAló. Ko ʻenau muimui ʻi he ngaahi akonaki mo e faʻifaʻitakiʻanga ʻa Sīsuú naʻe ʻai ai kinautolu ke nau hoko ko e kakai lelei ange. ʻOku hoko eni ʻi heʻene kau ākonga he ʻaho ní.​—Sio ki he puha “Ko e Tākiekina ʻa Sīsuú mo ʻEne Ngaahi Akonakí,” ʻi he peesi 6.

Ko ha tafaʻaki makehe ʻo e lotu faka-Kalisitiane moʻoní ko e kau ai ʻa e ako ʻokú ne laveʻi ʻa e ʻatamaí  mo e lotó koeʻuhi ke liliuʻi ai ʻi loto ʻa e kakaí. (Efeso 4:​23, 24) Ke lave ki ha faʻifaʻitakiʻanga pē ʻe taha, vakai angé ki he meʻa naʻe akoʻi ʻe Sīsū fekauʻaki mo e faitōnunga ki hoto hoa malí: “Kuo mou fanongo naʻe folofolaʻaki, ʻOua naʻa ke tono fefine: ka ʻoku ou tala kiate kimoutolu ʻe au, ʻIlonga ʻa ia te ne fakasio ki ha fefine ke tafunaki ʻene holi ki ai, kuo ne tonoʻi ia ʻi hono loto.” (Mātiu 5:​27, 28) ʻI he ngaahi leá ni, naʻe akoʻi ai ʻe Sīsū ki heʻene kau ākongá ko e lotó ʻoku totonu ke tauhi ke maʻa pea ko e ngaahi fakakaukau mo e ngaahi holi taʻetotonú, neongo ʻoku teʻeki ai ke fakahoko, ʻe lava ke ʻi ai hono ngaahi nunuʻa mafatukituki. ʻIkai ʻoku moʻoni ko e ngaahi fakakaukau koví ʻe lava ke taki atu ia ki he ngaahi tōʻonga ʻoku fakahouhauʻi ai ʻa e ʻOtuá mo fakalotomamahiʻi ʻa e niʻihi kehé?

Ko ia ai, ʻoku ʻomai ʻe he Tohi Tapú ʻa e akonaki ko ení: “Ke ʻoua naʻa mou tuku ke fakaangatatau kimoutolu ki he maama ko eni: kae tuku ke fai ai pe homou liliu, he fakafoʻou ʻo homou ʻatamai, ke mou sivi ʻo ʻilo pe ko e ha ʻa e finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai, ʻa e meʻa ʻoku haohaoa.” (Loma 12:2) ‘ʻOku malava moʻoni ke fakafoʻou ʻa e ʻatamaí fakafou ʻi he akó?’ ko haʻo ʻeke nai ia. Ko e fakafoʻou ʻo e ʻatamaí ʻoku kau ki ai ʻa hono ueʻi ia ki ha tafaʻaki kehe ʻi hono fakafonuʻaki ʻa e ngaahi tefitoʻi moʻoni mo e fakahinohino ʻoku ʻomai ʻi he Folofola ʻa e ʻOtuá. ʻE lava ke fakahoko eni ʻaki hono tali ʻa e ako ʻoku tokonaki mai ʻe he ʻOtuá fakafou ʻi heʻene Folofolá.

Ueʻi ke Liliu

“Ko e folofola ʻa e ʻOtua, ko e koto moʻui mo e koto malohi.” (Hepelu 4:​12) ʻOku kei hoko ia ko ha tākiekina mālohi ki he faʻahinga tāutaha, ʻo fakamoʻoniʻi ai ʻoku ʻikai ke hoko ʻo ʻosi ʻa hono taimí. ʻE lava ke ne ʻoange ki ha taha ʻa e fakaueʻiloto ke liliu ʻa hono ʻalungá, maʻu ʻa e lotu faka-Kalisitiane moʻoní, pea hoko ai ko ha tokotaha lelei ange. Ko e ngaahi fakatātā hokó ʻoku fakatātaaʻi ai ʻa e mahuʻinga ʻo e ako Fakatohitapú.

Ko ʻAmelia, ʻa ia naʻe lave ki ai ʻi he kupu ki muʻá, ʻokú ne fakamatala: “Ko hono fai pē ʻo ha feinga ʻiate aú naʻe ʻikai feʻunga ia ke fakaleleiʻi ai ʻa e tuʻunga ʻi hoku ʻapí. ʻI he taimi naʻá ku kamata ai ke ako Tohi Tapu mo e Kau Fakamoʻoni ʻa Sihová, naʻá ku ʻiloʻi naʻe ʻi ai ʻa e ʻamanaki pea naʻe kamata ai ke liliu ʻa ʻeku fakakaukaú. Naʻá ku ako ke kātaki lahi ange pea ʻikai hoko ʻo ʻita vave. Naʻe faifai atu pē ʻo kau fakataha mo au ʻa hoku husepānití ʻi he akó. Naʻe ʻikai faingofua kiate ia ke tuku ʻa ʻene inú, ka naʻá ne malava ʻo tuku. Naʻe ʻomai ʻe he meʻá ni ha kamata foʻou ki heʻema nofo malí. ʻI he taimi ní ko e ongo Kalisitiane fiefia kimaua pea ʻokú ma uhuʻi ki heʻema fānaú ʻa e ngaahi tefitoʻi moʻoni lelei ʻo e Tohi Tapú.”​—Teutalonome 6:7.

Ko e ako ʻoku tokonaki mai ʻe he lotu faka-Kalisitiane moʻoní ʻe lava ke ne fakatauʻatāinaʻi ha tokotaha mei he ngaahi ʻulungāanga koví mo ha tōʻonga moʻui taʻetaau. Naʻe fakamoʻoniʻi eni ʻe Manuele. a ʻI hono taʻu 13, naʻá ne hola ai mei ʻapi pea kamata ke ne ngāueʻaki ʻa e maliuaná. Naʻe faifai atu pē ʻo ne ngāueʻaki ʻa e heloiní. Naʻá ne fehokotaki fakasino mo e kakai tangatá pea mo e kakai fefiné ʻo fakafetongiʻaki ki ha nofoʻanga mo ha paʻanga. Naʻe faifai atu pē ʻo toe kaihaʻa ʻa Manuele mei he kakaí ke maʻu ai ʻene moʻuí.  Naʻá ne meimei ʻi he malumalu maʻu pē ʻo e tākiekina ʻa e faitoʻo kona tapú. Ko hono ʻulungāanga fakamālohí naʻá ne toutou iku ai ki pilīsone. Naʻá ne fakamoleki ʻi he taimi ʻe taha ʻa e taʻu ʻe fā ʻi he pilīsoné, pea naʻá ne hoko ai ʻo kau ʻi he fefakatauʻaki ʻo e ngaahi meʻataú. Hili ʻene malí, naʻe hokohoko atu ai hono utu ʻe he ʻalunga moʻui ʻa Manuelé ʻa hono ngaahi nunuʻá. ʻOkú ne pehē: “Naʻá ma iku ʻo nofo ʻi ha nofoʻanga ʻa ia ko ha fale-moa ia ki muʻa. ʻOku ou kei manatuʻi pē ʻa e feimeʻakai ʻa hoku uaifí ʻi ha tofunanga. Naʻe mātuʻaki ʻikai ke malu ʻa homa ngaahi tuʻungá ʻo fakaʻaiʻai ai ʻe hoku fāmilí tonu ʻa hoku uaifí ke ne liʻaki au.”

Ko e hā naʻá ne liliuʻi ʻa ʻene moʻuí? ʻOku tali ʻe Manuele: “Naʻe haʻu ʻa hoku maheni ki homa falé ʻo talanoa fekauʻaki mo e Tohi Tapú. Naʻá ku tali ʻa ʻene ngaahi ʻaʻahi maí koeʻuhi pē ke fakahaaʻi ange kiate ia ʻoku ʻikai ke ʻi ai ha ʻOtua ʻa ia ʻoku mahuʻingaʻia ʻi he kakaí. Naʻá ku fakakaukau kiate au ko e fakamoʻoni moʻui ia ʻo e meʻa ko iá. Naʻá ku ʻohovale ʻi he kātaki mo e anga-fakaʻapaʻapa ʻa e tokotaha Fakamoʻoní, ko ia naʻá ku loto ai ke maʻu ʻa e ngaahi fakataha ʻi he Fale Fakatahaʻangá. Neongo naʻe ʻiloʻi ʻa hoku puipuituʻá ʻe ha niʻihi ʻi ai, naʻa nau fakafeʻiloaki mai kiate au ʻi ha tōʻonga anga-fakakaumeʻa. Naʻa nau ʻai au ke u ongoʻi ʻo hangē ko ha taha ʻo kinautolú. Ko ha fakafiemālie lahi ia. Naʻe ueʻi au ki ha tuʻunga ʻo e fili ke liʻaki ʻa e māmani ʻo e faitoʻo kona tapú ke maʻu ha ngāue ʻi he tuʻunga faitotonu. ʻI he māhina ʻe fā hili ʻeku kamata ako Tohi Tapú, naʻá ku taau ai ke kau ʻi he ngāue fakamalangá, pea ʻi he māhina ʻe fā hili iá, naʻá ku papitaiso ai ʻo hoko ko e taha ʻo e Kau Fakamoʻoni ʻa Sihová.”

Ko e hā ʻa e ʻuhinga ʻo e lotu faka-Kalisitiane moʻoní kia Manuele mo hono fāmilí? “Ka ne taʻeʻoua ʻa e ako Tohi Tapú ʻoku pau ne u mei ʻosi mate pē au ia ʻi he ngaahi taʻu kuohilí. Ko e founga moʻui naʻe akoʻi ʻe Sīsuú naʻá ne fakafoki mai kiate au ʻa hoku fāmilí. ʻOku ʻikai pau ai ke fou ʻa ʻeku ongo tamaikí ʻi he meʻa naʻá ku fou ai ʻi he tuʻunga talavoú. ʻOku ou ongoʻi laukau mo houngaʻia ʻaupito ʻia Sihova ʻi he vahaʻangatae lelei ʻoku ou maʻu he taimí ni mo hoku uaifí. Kuo talamonū mai ʻa e niʻihi ʻo hoku ngaahi maheni ki muʻá mo tala mai ʻoku nau fakakaukau ko e ʻalunga moʻui ʻoku ou fou ai he taimi ní ʻa e ʻalunga moʻui lelei tahá.”

 ʻI he founga moʻui faka-Kalisitiané, ko e maʻa fakaeʻulungāangá ʻoku ʻalu fakataha ia mo e maʻa fakaesinó. Ko Sione, ʻa ia ʻoku nofo ʻi ha feituʻu masiva ʻangoʻango ʻi ʻAfilika Tonga, naʻá ne hoko ʻo mahinoʻi ʻa e meʻa ko iá. ʻOkú ne fakamatala: “Naʻe ʻikai ke kaukauʻi ʻa homa ʻofefiné ʻi he taimi ʻe niʻihi ʻi ha uike, pea naʻe halaʻatā ha taha ʻia kimaua ne hā ngali tokanga ki ai.” ʻOku fakahaaʻi ʻe hono uaifí ko hona ʻapí naʻe hā ʻuli fakaʻulia. Ka ʻi he ako faka-Kalisitiané, naʻe liliu ai ʻa e ngaahi meʻá. Naʻe tuku ʻa e feohi ʻa Sione mo ha kau kengi kaihaʻa kā peá ne kamata ke tokanga lahi ange ki hono fāmilí. “Naʻá ma ʻiloʻi ai ʻi he hoko ko e ongo Kalisitiané, ʻoku totonu ke tauhi ʻa homa sinó mo e valá ke maʻa. ʻOku ou saiʻia he ngaahi lea ʻi he 1 Pita 1:​16, ʻa ia ʻoku ekinaki mai ai ke tau māʻoniʻoni koeʻuhi he ko Sihova ko e ʻOtuá ʻoku māʻoniʻoni. ʻOkú ma toe feinga he taimí ni ke ʻai ʻa homa kiʻi ʻapi masivá ke hā fakaʻofoʻofa.”

ʻE Lava Ke Ke Maʻu ʻa e Ako Lelei Tahá

Ko e ngaahi hokosia naʻe lave ki ai ʻi ʻolungá ʻoku ʻikai ko e ngaahi tuʻunga mavahe ia. Tupu mei he ako makatuʻunga ʻi he Tohi Tapú, kuo ako ai ʻa e kakai ʻe laui afe ke nau moʻui ʻi ha ngaahi moʻui lelei ange. ʻI he hoko ʻo faitotonu mo faʻa ngāué, ʻoku fakamahuʻingaʻi ai kinautolu ʻe honau kau pule ngāué. Kuo nau hoko ko e ngaahi kaungāʻapi mo e ngaahi kaumeʻa lelei, ʻo mahuʻingaʻia ʻi he tuʻunga lelei ʻa honau kaungā faʻahinga ʻo e tangatá. ʻOku nau fakapapauʻi ke fakaʻehiʻehi mei he ngaahi ʻulungāanga koví mo e ngaahi hehema fakakakanó, ko ia ʻoku nau tokangaʻi lelei ange ai ʻa honau tuʻunga fakaesinó, fakaʻatamaí mo e fakaeongó tonu. ʻI he ʻikai fakamoleki ʻa ʻenau koloá ʻi he ngaahi ʻulungāanga koví, ʻoku nau ngāueʻaki ia ki heʻenau lelei pē ʻanautolú pea ki he lelei ʻa honau fāmilí. (1 Kolinito 6:​9-​11; Kolose 3:​18-​23) ʻOku ʻikai ha veiveiua, ko e ngaahi ola ʻo hono ngāueʻaki ʻa e meʻa ʻoku fokotuʻu mai ʻe Sihova ʻi he Tohi Tapú ʻoku fakahāhā ai ko e moʻui ʻo fakatatau ki he lotu faka-Kalisitiane moʻoní ʻa e ʻalunga lelei taha ʻi he moʻuí, ʻi hono ʻomai ai ʻa e ako lelei taha ʻoku ala maʻú. ʻI he fekauʻaki mo ha tokotaha ʻoku moʻui ʻo fehoanaki mo e ngaahi lao ʻa e ʻOtuá, ʻoku fakahaaʻi ʻe he Tohi Tapú: “Ko e meʻa kotoa ʻokú ne faí ʻe lavameʻa.”​—Sāme 1:​3, NW.

ʻOku fakalototoʻa ke ʻiloʻi ko e ʻOtua Māfimafi-Aoniu ko Sihová, ʻoku loto-lelei ke ne akoʻi kitautolu. ʻOkú ne folofola ʻo fekauʻaki mo ia tonu: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai.” (Aisea 48:17) ʻIo, kuo fakahaaʻi mai ʻe Sihova ʻa e halá fakafou he faʻifaʻitakiʻanga mo e ngaahi akonaki ʻa hono ʻAló, ʻa Sīsū Kalaisi. Naʻe ʻai ʻe heʻene ngaahi akonakí ke ʻi ai ha liliu ʻi he moʻui ʻa e tokolahi naʻa nau ʻiloʻi ia ʻi he taimi naʻá ne ʻi māmani aí, pea ʻoku hoko ʻa e meʻa tatau ʻi he moʻui ʻa e tokolahi kehe ʻa ia ʻoku nau moʻui ʻo fakatatau ki heʻene ngaahi akonakí he ʻaho ní. Ko e hā ʻoku ʻikai vaheʻi ai ha taimi ke ako lahi ange ai ʻo fekauʻaki mo e ngaahi akonaki ko ení? Ko e Kau Fakamoʻoni ʻa Sihova ʻi ho feituʻu kaungāʻapí te nau fiefia ke tokoniʻi koe ke ke maʻu ʻa e ako mahuʻinga peheé.

[Fakamatala ʻi lalo]

[Puha/Fakatātā ʻi he peesi 6]

Ko e Tākiekina ʻa Sīsuú mo ʻEne Ngaahi Akonakí

ʻI hono ngāueʻaki ʻa hono tuʻunga ko e pule tānaki tukuhaú, naʻe hoko ai ʻa Sākeasi ʻo koloaʻia ʻi hono maʻu taʻetotonu ʻa e paʻangá mo e kaihaʻa mei he kakai lāuvalé. Ka naʻá ne liliu ʻa ʻene founga moʻuí ʻi hono ngāueʻaki ʻa e ngaahi akonaki ʻa Sīsuú.—Luke 19:​1-​10.

Ko Saula ʻo Tāsusí naʻe tuku ʻene fakatangaʻi ʻa e kau Kalisitiané peá ne tafoki ki he lotu faka-Kalisitiané, ʻo hoko ko e ʻapositolo ko Paulá.​—Ngāue 22:​6-​21; Filipai 3:​4-9.

Ko e niʻihi ʻo e kau Kalisitiane ʻi Kolinitoó ko e ‘kau feʻauaki, lotu ki he aitoli, tono ʻunoho, fai faka-Sotoma, kaihaʻa, manumanu, faʻa konā, kapekape, mo e fai fakamalohi.’ Neongo ia, ʻi he ako ki he lotu faka-Kalisitiane moʻoní, naʻa nau ‘fufulu kinautolu, fakaului kinautolu ki he faʻahinga tapú, pea ngaohi kinautolu ko e kau angatonu ʻi he huafa ʻo honau ʻEiki ko Sisu Kalaisí.’​—1 Kolinito 6:​9-​11.

[Fakatātā ʻi he peesi 7]

ʻE lava ke fakahaaʻi atu ʻe he Tohi Tapú ʻa e founga ke ke lavameʻa aí