ʻOku Moʻoni Fēfē ʻa e Tēvoló Kiate Koe?

ʻOKU fakamatalaʻi ʻe he Tohi Tapú ʻa e Tēvoló ko ha tokotaha moʻoni. ʻOkú ne taʻehāmai ki he faʻahinga ʻo e tangatá ʻo ʻuhinga tatau pē mo e taʻehāmai ʻa e ʻOtuá ki he mata fakaetangatá. “Ko e ʻOtua ko e laumālie,” ko e lau ia ʻa e Tohi Tapú. (Sione 4:24) Ko e Tēvoló ko ha meʻamoʻui laumālie ia. Kae kehe, ʻi he ʻikai hangē ko e Tokotaha-Fakatupú, naʻe ʻi ai ʻa e kamataʻanga ia ʻo e Tēvoló.

Ki muʻa fuoloa atu ke fakatupu ʻe Sihova ko e ʻOtuá ʻa e faʻahinga ʻo e tangatá, naʻá ne ngaohi ha ngaahi meʻamoʻui laumālie tokolahi. (Siope 38:​4, 7) ʻOku ui ʻi he Tohi Tapú ʻa e ngaahi laumālié ni ko e kau ʻāngelo. (Hepelu 1:​13, 14) Naʻe fakatupu haohaoa kinautolu kotoa ʻe he ʻOtuá—naʻe ʻikai ha taha ai ko ha tēvolo pe te ne maʻu ha ʻulungāanga kovi ʻe taha. Naʻe anga-fēfē leva ʻa e hoko mai ʻa e Tēvoló? Ko e foʻi lea “tēvolo” ʻoku ʻuhingá ko e “tokotaha lauʻikovi loi” pea ʻoku ʻuhinga foki iá ki ha taha ʻokú ne tala ha ngaahi loi fakalotokovi fekauʻaki mo e niʻihi kehé. Ko e “Sētane” ʻoku ʻuhingá ko e “Tokotaha-Talitekeʻi,” pe tokotaha-fakafepaki. Hangē tofu pē ko hano ʻai ʻe ha tangata naʻe faitotonu ki muʻa ʻa ia tonu ke ne hoko ko ha kaihaʻa ʻi heʻene kaihaʻá, ko e taha ʻo e ngaahi foha fakalaumālie haohaoa ʻo e ʻOtuá naʻá ne ngāue ki ha holi taʻetotonu ʻo ne ʻai ai ʻa ia tonu ko Sētane ko e Tēvoló. ʻOku fakamatalaʻi ʻe he Tohi Tapú ʻa e founga ʻo e hoko ʻo fakameleʻi-kitá ʻo peheni: “ʻOku ʻahiʻahiʻi ʻa e tangata taki taha he tohoaki ia ʻe heʻene holi aʻana, mo taki ʻaki ha mounu. Faifai pea tuʻituʻia ʻa e holi ko ia, ʻo ne fanauʻi ha angahala: pea ko e angahala ko ia, ʻo ka kakato, ʻoku ne faʻeleʻi ʻa e mate.”—Semisi 1:​14, 15.

Ko e meʻa tonu eni naʻe hokó. ʻI he taimi naʻe fakatupu ai ʻe Sihova ko e ʻOtuá ʻa e ʻuluaki ongo meʻa fakaetangatá, ʻa ʻĀtama mo ʻIví, naʻe fakatokangaʻi ia ʻe he ʻāngelo ʻa ia naʻe teu ke angatuʻu ki he ʻOtuá. Naʻá ne ʻiloʻi naʻe fekau ʻe Sihova kia ʻĀtama mo ʻIvi ke na fakafonu ʻa e māmaní ʻaki ʻa e kakai māʻoniʻoni, ʻa ia te nau lotu ki he Tokotaha-Fakatupú. (Senesi 1:28) Naʻe sio ʻa e ʻāngeló ni naʻe ʻi ai ʻa e tuʻunga ʻe ala lava ke ne maʻu ai ʻa e lāngilangí mo e tuʻunga mahuʻingá. ʻI hono ueʻi ʻe he mānumanú, naʻá ne hoholi mālohi ki he meʻa totonu naʻe maʻu ʻe he Tokotaha-Fakatupú pē taha—ko e lotu mei he faʻahinga ʻo e tangatá. ʻI he ʻikai ke siʻaki ʻa e holi taʻetotonu peheé, ko e foha fakalaumālie ko eni ʻo e ʻOtuá naʻá ne ohi ia ʻo aʻu ki heʻene fanauʻi ha loi pea hoko atu leva ai ki he angatuʻu. Fakakaukau angé ki he meʻa naʻá ne faí.

 Naʻe ngāueʻaki ʻe he ʻāngelo angatuʻú ha ngata ke lea ai ki he ʻuluaki fefiné, ʻa ʻIvi. “ʻOku moʻoni koā kuo folofola ʻe he ʻOtua ke ʻoua te mo kai mei he ʻakau kehekehe ʻo e ngouetapu?” ko e ʻeke ange ia ʻe he ngatá kia ʻIví. ʻI he lave ʻa ʻIvi ki he fekau ʻa e ʻOtuá pea mo e tautea ki he talangataʻa ki aí, naʻe fakahaaʻi ai ʻe he ngatá: “ʻE ʻikai ʻaupito te mo mate: kae kehe, ʻoku meaʻi ʻe he ʻOtua ko e ʻaho te mo kai ai [mei he ʻakau ʻa ia ʻoku ʻi he loto ngoué] ʻe ʻa ai homo mata, pea te mo hoko ke hange ko e ʻOtua, hoʻomo ʻilo ʻa e lelei mo e kovi.” (Senesi 3:​1-5) Ko e fakahuʻungá naʻe ʻikai ke tala ʻe he ʻOtuá kia ʻĀtama mo ʻIvi ʻa e moʻoní. ʻI he kai mei he fua ʻo e fuʻu ʻakau ko iá, ʻe hoko tokua ai ʻa ʻIvi ʻo hangē ko e ʻOtuá, ʻi hono maʻu ʻa e mafai ke ne fili ʻa e meʻa naʻe leleí mo e meʻa naʻe koví. Ko e fuofua loi ia naʻe leaʻakí. Ko hono tala iá naʻe ʻai ai ʻa e ʻāngelo ko iá ko ha tokotaha lauʻikovi loi. Naʻá ne toe hoko foki ai ko ha tokotaha-fakafepaki ki he ʻOtuá. ʻOku fakahaaʻi ai ʻe he Tohi Tapú ʻa e fili ko eni ʻo e ʻOtuá “ko e Ngata ʻo ono ʻaho, ʻa e toko taha ʻoku ui ko e Tevolo mo Setane.”—Fakahā 12:9.

“Mou ʻĀ”

Ko e loi naʻe tala ʻe he Tēvoló kia ʻIví naʻe lavameʻa ia ʻo hangē tofu pē ko e meʻa naʻá ne palani ki aí. ʻOku pehē ʻe he Tohi Tapú: “Pea naʻe vakai ʻe he fefine ko e ʻakau ia ʻoku lelei ki he kai, pea matamatalelei ki he mata, kaeʻumaʻa ko e ʻakau ke fai ki ai ha velevele ko ʻene fakapotoʻi, pea ne hanga ʻo toli hono fua, ʻo kai, pea ne ʻange foki ki hono husepaniti naʻe ʻiate ia; pea kai mo ia.” (Senesi 3:6) Naʻe tui ʻa ʻIvi kia Sētane peá ne talangataʻa ai ki he ʻOtuá. Naʻá ne malava ke ʻai ʻa ʻĀtama ke ne maumauʻi ʻe ia foki ʻa e lao ʻa e ʻOtuá. Naʻe lavameʻa ai ʻa e Tēvoló ʻi hono fokotuʻu ʻa e ʻuluaki ongo meʻa fakaetangatá ʻi ha ʻalunga ʻo e angatuʻu ki he ʻOtuá. Talu pē mei ai, kuo ngāueʻaki ai ʻe Sētane ʻa e tākiekina taʻehāmaí ki he ngaahi meʻa fakaetangatá. Ko e hā ʻene taumuʻá? Ke fakatafokiʻi ʻa e kakaí mei he lotu ki he ʻOtua moʻoní pea fai ange kiate ia tonu ʻenau lotú. (Mātiu 4:​8, 9) ʻI he ʻuhinga leleí, ʻoku fakatokanga mai leva ʻa e Tohi Tapú: “Mou laka fakaʻehiʻehi, mou ʻā: ko homou fili ko e Tevolo ʻoku ne ʻalu fano ʻo hange ko ha laione ngungulu, heʻene kumi ha taha ke ne matuʻaki folo.”​—1 Pita 5:8.

He mahino moʻoni ē ko hono fakamatalaʻi ʻe he Tohi Tapú ʻa e Tēvoló ʻi he tuʻunga ko ha tokotaha laumālie moʻoní—ko ha ʻāngelo naʻe hoko ʻo fakameleʻi pea ʻoku fakatuʻutāmaki! Ko e ʻuluaki sitepu ʻoku fiemaʻu ki heʻetau hanganaki leʻó ko hono ʻiloʻi ko ia ʻokú ne ʻi ai moʻoní. Ka ko e laka fakaʻehiʻehi mo hanganaki ʻaá ʻoku kau ki ai ʻa e meʻa lahi ange. ʻOku toe mahuʻinga foki ke ʻoua ʻe tukunoaʻi ʻa e “ngaahi faliunga” ʻa Sētané pea mo ʻene ngaahi founga ke takihalaʻiʻaki ʻa e kakaí. (2 Kolinito 2:11) Ko e hā ʻa ʻene ngaahi palaní? Pea ʻe lava fēfē ke tau tuʻumaʻu ʻo fakafepakiʻi ia?

Ngāueʻaongaʻaki ʻe he Tēvoló ʻa e Fiemaʻu Naʻe Fanauʻi mo e Tangatá

Kuo siofi ʻe he Tēvoló ʻa e tangatá talu pē mei hono fakatupu ʻa e faʻahinga ʻo e tangatá. ʻOkú ne ʻiloʻi ʻa e faʻunga ʻo e tangatá—ʻa ʻene ngaahi fiemaʻú, ngaahi manakó, mo ʻene ngaahi holí. ʻOku ʻilo lelei ʻe Sētane naʻe fakatupu ʻa e tangatá fakataha mo ha fiemaʻu fakalaumālie, pea kuo ngāueʻaongaʻaki pōtoʻi ʻe he Tēvoló ʻa e fiemaʻu ko ení. ʻO anga-fēfē? ʻAki hono fafangaʻaki ʻa e faʻahinga ʻo e tangatá ʻa e ngaahi loi fakalotu. (Sione 8:44) Ko e ngaahi akonaki fakalotu lahi fekauʻaki mo e ʻOtuá ʻoku fepakipaki ia mo fakatupu puputuʻu. Ko e taumuʻa ʻa hai ʻokú ke fakakaukau atu ʻoku fakahoko ʻe he meʻá ni? Ko e ngaahi akonaki fepakipakí heʻikai lava ke moʻoni kotoa. ʻIkai ʻoku malava leva ke pehē ko e ngaahi akonaki fakalotu lahi ʻoku faʻufaʻu tefito ia pea ngāueʻaki ʻe Sētane ke takihalaʻiʻaki ʻa e kakaí? Ko hono moʻoní, ʻoku lave ʻa e Tohi Tapú kiate ia ko e “ʻotua ʻo e tuʻu ko eni,” ʻa ia kuó ne fakakuihi ʻa e ʻatamai ʻo e kakaí.—2 Kolinito 4:4.

ʻOku ʻomai ʻe he moʻoni fakaʻotuá ʻa e maluʻi mei he ngaahi kākā fakalotú. ʻOku fakatatau ʻe he Tohi Tapú ʻa e moʻoni ʻo e Folofola ʻa e ʻOtuá ki he noʻo naʻe tui ʻe ha sōtia ʻo e kuonga muʻá ke tokoni ki hono maluʻi ʻa hono kongalotó. (Efeso 6:14) Kapau ʻokú ke maʻu ʻa e ʻilo ʻo e Tohi Tapú pea  moʻui ʻo fakatatau ki heʻene pōpoakí, ʻo hangē ʻokú ke tui ia ko ha noʻó, ʻe maluʻi ai koe ʻe he Folofola ʻa e ʻOtuá mei hono takihalaʻi ʻe he ngaahi loi mo e ngaahi hala fakalotú.

Ko e hehema fakalaumālie ʻa e tangatá kuo taki ai ia ke ne fekumi ki he taʻeʻiloá. Kuo fakaeʻa ai ia ʻe he meʻá ni ki ha ngaahi toe filioʻi kākā kehe ʻa Sētane. Ko hono ngāueʻaongaʻaki ʻa e fieʻilo ʻa e tangatá fekauʻaki mo e meʻa ʻoku ngalikehe mo misitelí, kuo ngāueʻaki ai ʻe Sētane ʻa e fakahaʻele faʻahikehé ke puleʻiʻaki ʻa e tokolahi. Hangē pē ko hono ngāueʻaki ʻe ha tulimanu ʻa e mounú ke tohoakiʻi mai ʻaki ʻa e manu ke ne poó, ʻoku ngāueʻaki ʻe Sētane ʻa e ngaahi founga hangē ko e vavaló, ʻasitalolosiá, fakamoheʻi fakaʻatamaí, tōʻonga fakafaimaná, ko hono lau ʻa e ʻaofinimá, mo e mēsikí, ke tohoakiʻi mo tauheleʻiʻaki ʻa e kakai takatakai ʻi he māmaní.—Livitiko 19:31; Sāme 119:110.

ʻE lava fēfē ke ke maluʻi koe mei hono fakataueleʻi ʻe he fakahaʻele faʻahikehé? ʻOku pehē ʻe he Teutalonome 18:​10-12: “ʻE ʻikai ʻilo ʻiate koe ha taha ʻoku tuku hono foha pe ʻofefine ke ʻasi ʻi he afi ha taha ʻoku fai meʻa tongafisi, ha taha ʻoku fai ʻa e talotalo kovi, pe ha fai tuki, pe fiemana, pe ha fai sausau, pe ha fakahaʻele faʻahikehe, pe ha maki, pe ha fakahaʻele mate. He ko e meʻa fakalielia kia Sihova ʻa ia fua pē ʻoku fai meʻa pehe: pea ko e meʻa ʻi he ngaahi fakalielia pehe, ko ia ʻoku kapusi ai kinautolu mei ho ʻao ʻe Sihova ko ho ʻOtua.”

Ko e faleʻi Fakatohitapú ʻoku fakahangatonu: ʻOua ʻe ʻi ai ha kaunga ʻe taha ki he fakahaʻele faʻahikehé. Fēfē kapau kuó ke kau ʻi ha tōʻonga ʻo e fakahaʻele faʻahikehé pea ʻokú ke loto he taimí ni ke ʻatā mei ai? ʻE lava ke ke muimui ʻi he faʻifaʻitakiʻanga ʻa e muʻaki kau Kalisitiane ʻi he kolo ko ʻEfesoó. ʻI heʻenau tali e “folofola ʻa e ʻEiki [Sihova],” ʻoku pehē ʻe he Tohi Tapú, “ko e niʻihi ʻi he faʻahinga naʻe ngaue fie mana naʻa nau haʻu mo kinautolu ʻenau ngaahi tohi, ʻo tutu ʻi he ʻao ʻo e kakai.” Ko e ngaahi tohi ko iá naʻe mamafa hono totongí. Ko honau mahuʻingá ko e konga siliva ʻe 50,000. (Ngāue 19:​19, 20) Neongo ia, ko e kau Kalisitiane ʻi ʻEfesoó naʻe ʻikai te nau toumoua ke fakaʻauha ia.

ʻOhofi ʻe Sētane ʻa e Ngaahi Vaivaiʻanga Fakaetangatá

Naʻe hoko ha ʻāngelo haohaoa ko Sētane ko e Tēvoló koeʻuhi naʻá ne tō ki he holi ke hakeakiʻi-kitá. Naʻá ne toe langaʻi ʻia ʻIvi ha fakaʻamu pōlepole mo siokita ke hoko ʻo hangē ko e ʻOtuá. ʻI he ʻahó ni, ʻoku puleʻi ʻe Sētane ʻa e tokolahi ʻaki hono langaʻi ʻia kinautolu ʻa e ongoʻi pōlepolé. Ko e fakatātaá, ʻoku ongoʻi ʻe he niʻihi ko honau matakalí, kulupu fakafaʻahingá, pe tuʻunga fakafonuá, ʻoku lelei ange ia ʻi he niʻihi kehé. He kehe moʻoni ē ko e meʻá ni mei he meʻa ʻoku akoʻi ʻe he Tohi Tapú! (Ngāue 10:​34, 35) ʻOku fakahaaʻi mahino ʻe he Tohi Tapú: “[Ko e ʻOtuá] naʻa ne oʻi foki ʻa e ngaahi faʻahinga kakai ʻa ia ʻoku nau tupunga taha kotoa pe.”—Ngāue 17:26.

Ko ha maluʻanga ola lelei mei he feinga ʻa Sētane ke langaʻi ʻa e pōlepolé ko e anga-fakatōkilaló. ʻOku naʻinaʻi mai ʻa e Tohi Tapú kiate kitautolu “ke ʻoua naʻa hulu atu [ʻetau] fakakaukau kiate [kitautolu] ʻi he meʻa ʻoku totonu.” (Loma 12:3) “ʻOku talitekeʻi ʻe he ʻOtua ʻa e ʻafungi,” ko ʻene fakamatalá ia “ka ʻoku ne foaki kelesi ki he angavaivai.” (Semisi 4:6) Ko e founga papau ʻe taha ke talitekeʻiʻaki  ʻa e ngaahi feinga ʻa Sētané ko hono fakahāhā ʻi hoʻo moʻui fakafoʻituituí ʻa e anga-fakatōkilaló mo e ngaahi ʻulungāanga kehe ʻoku hōifua ki ai ʻa e ʻOtuá.

ʻOku toe vēkeveke ʻa e Tēvoló ke ngāueʻaongaʻaki ʻa e vaivaiʻanga fakaetangata ʻo e tō ki he ngaahi holi fakakakano taʻetotonú. Naʻe fakataumuʻa ʻe Sihova ko e ʻOtuá ki he faʻahinga ʻo e tangatá ke nau fiefia ʻi he moʻuí. ʻI hono fakahoko ʻa e ngaahi holí ʻi loto ʻi he ngaahi ngataʻanga ʻo e finangalo ʻo e ʻOtuá, ko e olá ko e fiefia moʻoni. Ka ʻoku fakataueleʻi ʻe Sētane ʻa e faʻahinga ʻo e tangatá ke fakalato ʻenau ngaahi holí ʻi ha ngaahi founga taʻetaau. (1 Kolinito 6:​9, 10) ʻOku lelei lahi ange ke tauhi ʻa e ʻatamaí ke tokangataha ki he ngaahi meʻa ʻa ia ʻoku maʻá mo e ʻulungāanga leleí. (Filipai 4:8) ʻE tokoniʻi koe ʻe he meʻá ni ke ngāueʻaki ʻa e mapuleʻi fefeka ki hoʻo fakakaukaú mo e ngaahi ongoʻí.

Hanganaki Talitekeʻi ʻa e Tēvoló

ʻE lava ke ke lavameʻa ʻi hono talitekeʻi ʻa e Tēvoló? ʻIo, te ke malava. ʻOku fakapapauʻi mai ʻe he Tohi Tapú kiate kitautolu: “Tali tekeʻi ʻa e Tevolo, pea te ne hola meiate kimoutolu.” (Semisi 4:7) Neongo kapau ʻokú ke fakafepakiʻi ʻa Sētane, ʻe ʻikai te ne foʻi pea tuku leva ʻa hono fakatupunga ha toe fakahohaʻa kiate koe ʻi hoʻo maʻu ko ia ʻa e ʻiloʻi ʻo e ʻOtuá. ʻIkai, ʻe toe feinga ʻa e Tēvoló “ʻo tali faingamālie.” (Luke 4:13) Kae kehe, ʻoku fiemaʻu ke ʻoua te ke ilifia ʻi he Tēvoló. Kapau ʻokú ke hokohoko atu ke talitekeʻi ia, ʻe ʻikai leva te ne malava ke fakatafokiʻi koe mei he ʻOtua moʻoní.

Kae kehe, ko hono talitekeʻi ʻa e Tēvoló, ʻoku fiemaʻu ki ai ʻa e ʻilo pe ko hai ia pea ʻoku anga-fēfē ʻene takihalaʻi ʻa e kakaí pea pehē ki he ngaahi founga fakaemaluʻi ʻe lava ke ke fakafepakiʻiʻaki ʻene ngaahi palaní. ʻOku ʻi ai ʻa e matavai totonu pē taha ʻo e ʻilo ko iá—ko e Folofola ʻa e ʻOtuá, ʻa e Tohi Tapú. Ko ia, tuʻumaʻu ʻi hoʻo fakapapau ke ako ʻa e Tohi Tapu fakamānavaʻí, pea ngāueʻaki ʻi hoʻo moʻuí ʻa e meʻa ʻokú ke ako mei aí. Ko e Kau Fakamoʻoni ʻa Sihova ʻi ho feituʻú te nau fiefia ke tokoniʻi taʻetotongi koe ʻaki ha ako pehē ʻi ha taimi ʻoku feʻungamālie kiate koé. Kātaki ʻoua ʻe toumoua ke fetuʻutaki kiate kinautolu pe te ke tohi ki he kau faipulusi ʻo e makasini ko ení.

ʻI hoʻo fai hano ako ʻo e Tohi Tapú, ʻoku fiemaʻu ke ke ʻiloʻi ʻe ngāueʻaki nai ʻe Sētane ʻa e fakafepakí pe fakatangá ke ʻai ai koe ke tuku ʻa hoʻo ako ʻa e moʻoni mei he Folofola ʻa e ʻOtuá. Ko e niʻihi ʻo e faʻahinga ʻokú ke ʻofa aí te nau hoko nai ʻo ʻita ʻiate koe koeʻuhi ko hoʻo ako ʻa e Tohi Tapú. ʻE hoko nai eni koeʻuhí ʻoku ʻikai te nau ʻiloʻi ʻa e ngaahi moʻoni fakaofo ʻoku maʻu ʻi aí. ʻE fakakataʻaki nai koe ʻe he niʻihi kehé. Ka ʻe hanga ʻe he tukulolo ki he ngaahi tenge ko iá ʻo fakahōifuaʻi moʻoni ʻa e ʻOtuá? ʻOku loto ʻa e Tēvoló ke ʻai koe ke ke loto-siʻi koeʻuhi ke tuku ai ʻa hoʻo ako ʻo fekauʻaki mo e ʻOtua moʻoní. Ko e hā ka ke ka tuku ai ke ikuna ʻa Sētane? (Mātiu 10:​34-39) ʻOku ʻikai te ke moʻuaʻaki kiate ia ha meʻa ʻe taha. ʻOkú ke moʻuaʻaki kia Sihova ʻa hoʻo moʻuí tonu. Ko ia ai, fakapapauʻi leva ke talitekeʻi ʻa e Tēvoló pea ‘ʻai ke fiefia ʻa e loto ʻo Sihová.’—Palovepi 27:11.

[Fakatātā ʻi he peesi 6]

Ko e faʻahinga naʻa nau hoko ko e kau Kalisitiané naʻa nau tutu ʻenau ʻū tohi fakahaʻele faʻahikehé

[Fakatātā ʻi he peesi 7]

Fai ha fili papau ke ako ʻa e Tohi Tapú