‘ʻOku Tubulekina a Hoo Mou Ofá Kotoabe’

NAʻE taaʻi ʻe ha ngaahi fakatamaki fakanatula kehekehe ʻa Siapani ʻi he 2004. Naʻe kau ʻi he ngaahi meʻá ni ʻa e ngaahi ʻahiohio, ngaahi tāfea mo e ngaahi mofuike. Naʻa nau uesia lahi fakaʻulia ʻa e moʻui ʻa e tokolahi, ʻo kau ai ʻa e Kau Fakamoʻoni ʻa Sihová. (Koheleti 9:​11) Neongo ia, ko e ngaahi faingataʻa ko ení naʻe ʻoange ai ʻa e ngaahi faingamālie ki he Kau Fakamoʻoní ke nau fefakahāhāʻaki ʻa e ʻofa fakatokouá.​—1 Pita 1:​22.

Ko e fakatātaá, koeʻuhi ko e ngaahi ʻuha lahi ʻi Siulaí, naʻe tāfea ai ha vaitafe ʻi Siapani lotoloto. Naʻe maumauʻi ʻe he tāfeá ʻa e ngaahi ʻapi ʻo e Kau Fakamoʻoni ʻa Sihova laka hake he toko 20. ʻI he Fale Fakatahaʻanga ʻe taha, naʻe laka hake ai ʻi he mita ʻe tahá ʻa e vaí ʻi he falikí. ʻI he taimi pē ko iá, naʻe kau fakataha mai ʻa e Kau Fakamoʻoni mei he ngaahi fakatahaʻanga kaungāʻapí ke tokoni. Naʻe fakamaʻa ʻe he kau ngāue pole ʻe laui teau ʻa e ngaahi fale naʻe fonu pelepelá. Naʻe fakamaʻa kakato ʻa e Fale Fakatahaʻangá pea monomono ʻi he uike pē ʻe ua.

ʻI ʻOkatopa 23, naʻe taaʻi ai ʻa e feituʻu tatau ʻe ha mofuike naʻe 6.8 hono mālohí ʻi he meʻafua mofuiké. Naʻe mole ai ʻa e moʻui ʻikai toe siʻi hifo he 40, pea ko e kakai laka hake he toko 100,000 naʻe pau ke nau fetukutuku mei honau ngaahi ʻapí. Naʻe ʻikai ke toe ala maʻu ʻa e vaí, kasá mo e ʻuhilá. Neongo ko e uhouhonga ʻo e mofuiké naʻe kilomita pē ʻe 50 ʻa hono mamaʻó, naʻe ʻikai ke maumau ai ʻa e Fale Fakatahaʻanga naʻe fakaleleiʻí. Naʻe hoko vave ia ko ha senitā tokoni fakataimi. Naʻe vakaiʻi vave ʻe he kau ʻovasia Kalisitiané ʻa e tuʻunga malu ʻa honau ngaahi kaungātuí pea naʻa nau fiemālie ʻi he ʻiloʻi naʻe ʻikai ke lavea pe mate ha tahá. Pongipongia ʻi he pongipongi hono hokó, naʻe ngāue pole ai ʻa e Kau Fakamoʻoni ʻe toko ono ʻa ia naʻe maʻukovia kinautolu ʻi he tāfea ʻi Siulaí ʻi hono ʻave ʻa e meʻakai mo e vai ki he feituʻu naʻe uesiá. ʻI ha ngaahi houa siʻi hili ʻa e mofuiké, naʻe ʻai ai ʻo ala maʻu ʻa e ngaahi koloa tokoní.

“Ko e faʻahinga naʻe maʻukovia ʻe he tāfeá naʻa nau fakakaukau ko e ngāue tokoni ki he faʻahinga naʻe uesia ʻe he mofuiké ko ha faingamālie ia ke fakahāhā ai ʻenau houngaʻia ʻi he tokoni ko ia naʻa nau maʻú,” ko e fakamatala ia ʻa ha ʻovasia ʻe taha. “Naʻa nau ngāue mālohi pongipongia ʻo aʻu ki he fuoloa ʻa e poʻulí. Pea he ulo ē ko honau matá ʻi he fiefiá!”

ʻOku ʻikai ko ha fakamanamana ʻa e tāfeá pe ko e mofuiké ki he haʻi ʻo e ʻofá ʻa ia ʻokú ne haʻihaʻi ʻa e fetokouaʻaki faka-Kalisitiane ʻa e Kau Fakamoʻoni ʻa Sihová. ʻI hono kehé, ʻi he hoko ʻa e ngaahi fakatamaki peheé, ʻoku hokosia ai ʻe he kau Kalisitiané ʻa e meʻa naʻe tala ʻe he ʻapositolo ko Paulá ki he ngaahi kaungātui ʻi Tesalonaiká: “Oku tubulekina a hoo mou feofaaki kiate kimoutolu kotoabe.”​—2 Tesalonaika 1:​3, PM.