Ko e Tēvoló ko ha Taha Moʻoni?

ʻOKU anga-fēfē hoʻo fakakaukau atu ki he Tēvoló? ʻOkú ke fakakaukau kiate ia ko ha tokotaha moʻoni ʻa ia ʻokú ne fakataueleʻi ʻa e kakaí ke nau fai ʻa e ngaahi meʻa fulikivanú, pe ʻokú ne fakafofongaʻi pē ʻa e tefitoʻi fakakaukau ʻo e koví? Ko e Tēvoló ko ha taha ia ke ilifiaʻi, pe ʻoku totonu nai ke tukunoaʻi ia he ko ha foʻi fakakaukau taʻeʻuhinga pē ia pe ko ha foʻi talatupuʻa taʻemoʻoni? ʻOku ʻuhinga ʻa e foʻi lea “tēvoló” ki ha faʻahinga foʻi fakakaukau ko e mālohi fakaefakaʻauha ia ʻi he ʻunivēsí? ʻE lava ke pehē ko e foʻi leá ko ha fakaʻilonga pē ia ʻo e ngaahi anga ʻoku kovi ʻi he faʻahinga ʻo e tangatá, ʻo hangē ko e taukaveʻi ko ia ʻa e kau teolosia tokolahi ʻi onopōní?

ʻOku ʻikai fakaʻohovale ʻa e kehekehe ʻo e fakakaukau ʻa e faʻahinga ʻo e tangatá ʻi he fehuʻi pe ko hai ʻa e Tēvoló. Fakaʻuta atu ki he faingataʻa ʻe lava ke hoko ʻi he ʻiloʻi ʻa e ʻiloʻanga moʻoni ʻo ha taha, ʻa ia ko ha mataotao ia ʻi he fakapulí! ʻOku tautefito ʻa ʻene peheé kapau ʻokú ne fakapapauʻi ke fūfuuʻi ai pē ʻa ia tonu ʻi ha pūloa. ʻOku fakamatalaʻi ʻe he Tohi Tapú ʻa e Tēvoló ko ha tokotaha pehē. ʻI he lave ki ai ko Sētané, ʻoku pehē ai: “Naʻa mo Setane ʻoku ne ʻai ʻa e anga ʻo ha angelo mei he maama.” (2 Kolinito 11:14) Neongo ʻokú ne kovi, ʻoku fakahaaʻi ʻe he Tēvoló ʻa ia tonu ko ha tokotaha lelei koeʻuhi ke ne takihalaʻi ai ʻa e niʻihi kehé. Pea kapau ʻokú ne ʻai ʻa e kakaí ke nau tui ʻoku ʻikai pē te ne ʻi ai, ʻoku toe feʻungamālie lelei ange ai pē ia mo ʻene taumuʻá.

Ko ia ai, ko hai moʻoni ʻa e Tēvoló? ʻAnefē pea naʻe anga-fēfē ʻa ʻene hoko ʻo ʻi aí? ʻOku anga-fēfē ʻa ʻene tākiekina ʻa e faʻahinga ʻo e tangatá ʻi he ʻaho ní? Ko e hā ʻe lava ke tau fai, kapau ʻoku ʻi ai, ke talitekeʻiʻaki ʻa e tākiekina ko iá? ʻOku ʻi he Tohi Tapú ʻa e hisitōlia totonu ʻo e Tēvoló mei hono kamataʻangá tonu pea ʻoku ʻomai ai ʻa e ngaahi tali moʻoni ki he ngaahi fehuʻí ni.

[Fakatātā ʻi he peesi 3]

He faingataʻa moʻoni ē ke lava ʻo ʻiloʻi ha taha ʻa ia ʻokú ne fakapapauʻi ke fūfuuʻi ai pē ʻa ia tonu ʻi ha pūloa!