Meʻa Fakaofo ʻo e Fakatupú ʻOkú Ne Hakeakiʻi ʻa Sihova

KO Sihova ko e ʻOtuá ʻoku hakeakiʻi lahi ange ia ʻi he malava ke fakaʻuta atu ki ai ʻa e faʻahinga taʻehaohaoa ʻo e tangatá. Ko ʻene ngaahi ngāue fakaefakatupu ʻi he foʻi māmaní mo ia ʻi hēvaní ʻokú ne ʻoange ai kiate ia ʻa e fakahīkihiki pea ʻoku fakafonuʻaki ai kitautolu ʻa e māluʻia.​—Sāme 19:​1-4.

ʻI he tuʻunga ko e Tokotaha-Fakatupu mo e Hau Fakalevelevá ia, ʻoku tuha moʻoni ʻa Sihova ke fanongo ki ai ʻi he taimi ʻokú ne fakataufolofola aí. Ka he ofo ē te tau ʻi aí kapau naʻá ne lea mai kiate kitautolu ko e faʻahinga ʻo e tangata ʻi heni ʻi he māmaní! Tau pehē pē naʻá ne lea atu kiate koe, ʻo fakafou nai ʻi ha ʻāngelo. ʻOku pau te ke tokanga ki ai. Ko e tangata anga-tonu ko Siopé kuo pau pē naʻá ne mātuʻaki fanongo tokanga ʻi he taimi naʻe lea ai ʻa e ʻOtuá kiate ia ʻi he taʻu ʻe 3,500 kuohilí. Ko e hā ʻe lava ke tau ako mei he ngaahi lea ʻa e ʻOtuá kia Siope ʻo fekauʻaki mo e foʻi māmaní mo e ngaahi langi fakamatelié?

Ko Hai Naʻá Ne Tanupou ʻa e Foʻi Māmaní, pea ko Hai ʻOkú Ne Puleʻi ʻa e Tahí?

ʻI ha lotoʻi ʻahiohio, ʻoku ʻeke ai ʻe he ʻOtuá kia Siope ʻo fekauʻaki mo e foʻi māmaní pea mo e tahí. (Siope 38:​1-​11, PM) Naʻe ʻikai fakapapauʻi ʻe ha ʻākiteki fakaetangata ʻa e anga ʻo e lahi ʻoku totonu ke ʻi ai ʻa e foʻi māmaní pea tokoni leva ki hono faʻu iá. ʻI hono fakahoa ʻa e foʻi māmaní ki ha langa, ʻoku ʻeke ai ʻe he ʻOtuá kia Siope: “Kohai naa ne ai a hono makatuliki oia?” ʻOku ʻikai ko e tangatá! Naʻe vakai ki ai ʻa e ngaahi foha fakaeʻāngelo ʻo e ʻOtuá pea nau fiefia ʻi hono fakatupu ʻe Sihova ʻa e foʻi palanite ko ʻení.

Ko e tahí ko ha valevale ia ʻi hono fakahoa atu ki he ʻOtuá, ʻa ia ʻokú ne fakateunga fakaefakatātā ia ʻaki ʻa e ngaahi kofu. Naʻe “ba mai, o hage ko ene buna mei he manāva.” ʻOku fakangatangata ʻe he ʻOtuá ʻa e tahí ʻo hangē ha ngaahi pā mo ha ngaahi matapā loká, pea ko e ngaahi taimi huʻá mo e mamahá ʻoku puleʻi ia ʻe he māhiná mo e ngaahi fusi ʻa e laʻaá.

ʻOku pehē ʻe he World Book Encyclopedia: “ʻOku fakatupunga ʻe he matangí ʻa e lahi taha ʻo e ngaahi peau ʻo e ʻōsení, mei he ngaahi peau īkí ki he ngaahi fuʻu peau afā lalahi ʻi he māʻolunga laka hake ʻi he fute ʻe 100 (mita ʻe 30). . . . ʻI he hili ʻa e tuʻu ʻa e matangí, ʻoku hoko atu ʻa e ngaahi peaú ke ngaʻunu ʻi he fukahi ʻōsení pea ʻe lava ke ʻalu ia ʻi he ngaahi mamaʻo lahi mei he feituʻu naʻe kamata mei aí. ʻOku nau hoko ai ʻo tokalelei mo lōloa ange. Faifai atu pē, ʻo aʻu ʻa e ngaahi peaú ki he ʻuluʻulú, ʻa ia ʻoku nau fasi ai ʻo fakatupunga ai ʻa e ngaahi foʻi peau koa ʻoku fasi ʻi he matātahí.” ʻOku talangofua ʻa e tahí ki he fekau ʻa e ʻOtuá: “Te ke haʻu ki heni, bea gata ai: bea e lolomi i heni hoo gaahi beau laukau.”

Ko Hai ʻOkú Ne Faʻu ʻa e Hengihengi ʻo e ʻAhó?

ʻOku ʻeke hoko ange ʻe he ʻOtuá kia Siope ʻo fekauʻaki mo e ngaahi ngāue ʻo e māmá mo e ngaahi meʻa kehe kuó ne fakatupú. (Siope 38:​12-​18) ʻOku ʻikai ha tangata te ne lava ʻo puleʻi ʻa e hokohoko ʻo e poʻulí mo e ʻahó. ʻOku hanga ʻe he maama ʻo e pongipongí ʻo pukepuke fakaefakatātā ʻa e ngaahi ngatangataʻanga ʻo e foʻi māmaní pea tupetupeʻi  ʻa e fulikivanú. ʻOku fakahoko nai ʻe he kau angahalá ʻa e ngaahi ngāue taʻeangatonú ʻi he “efiafi bouli.” (Siope 24:​15, 16, PM) Ka ʻoku fakamoveteʻi ʻe he hengihengi ʻo e ʻahó ʻa e kau faikoví.

ʻI he toʻukupu ʻo e ʻOtuá, ʻoku hangē ai ʻa e maama ʻo e ʻahó ko ha sila tongi mataʻitohí ʻa ia ʻoku maʻu mei ai ʻe he foʻi māmaní ha fōtunga fakaʻofoʻofa. ʻOku fakaeʻa ʻe he huelo ʻo e laʻaá ʻa e ngaahi lanu lahi, koeʻuhi ke hā ai ʻa e foʻi kolopé ʻo hangē ʻoku fakateunga ʻi ha ngaahi kofu fakaʻofoʻofá. Naʻe ʻikai ha kaunga ʻe taha ʻa Siope ki he meʻá ni pea naʻe ʻikai ke ne ʻaʻeva ʻi he loloto ʻo e moaná ke lisi ʻa hono ngaahi koloá. ʻIo, aʻu mai ki he ʻahó ni ʻoku maʻu ʻe he kau fakatotoló ʻa e ʻilo fakangatangata pē ki he moʻui ʻi he ʻōsení!

Ko Hai ʻOkú Ne Maʻu ha Ngaahi Fale Tukuʻanga Koloa ʻo e Sinoú mo e ʻUha Maká?

Kuo ʻikai ha tangata te ne fakafeʻao ʻa e māmá pe fakapoʻulí ki hono ʻapí pe kuó ne hū ki he ngaahi fale tukuʻanga koloa ʻo e sinou mo e ʻuha maka ʻa ia ʻoku tuku tauhi ʻe he ʻOtuá ki he “ʻaho ʻo e fepaki mo e tau.” (Siope 38:​19-​23) ʻI he taimi naʻe ngāueʻaki ai ʻe Sihova ʻa e ʻuha maká ki hono ngaahi fili ʻi Kipioné, “nae toko lahi hake akinautolu nae mate i he uha maka iate kinautolu nae tamateʻi e he fānau a Isileli aki ae heleta.” (Siosiua 10:​11, PM) Te ne ngāueʻaki nai ʻa e ʻuha maká ʻi he lalahi ʻoku ʻikai fakahaaʻi ke fakaʻauhaʻaki ʻa e faʻahinga ʻo e tangata fulikivanu ʻa ia ʻe taki ʻe Koki, pe Sētané.​—Isikeli 38:​18, 22.

Ko e ngaahi foʻi ʻuha maka fōlalahi tatau mo e fuaʻimoá naʻá ne tāmateʻi ʻa e kakai ʻe toko 25 pea fakalaveaʻi mo e toko 200 kehe ʻi Henan Province lotoloto ʻi Siaina, ʻi Siulai 2002. ʻI he fekauʻaki mo ha afā ʻuha maka ʻi he 1545, naʻe tohi ʻe he tangata tā tongitongi ʻĪtali ko Benvenuto Cellini: “Naʻa mau mamaʻo ʻaho taha mei Falanisē . . . ʻi he taimi naʻe kamata ke manamana ai ʻa e langí ʻi ha ngaahi ʻuʻulu paʻupaʻulu leʻo lahi. . . . ʻI he hili ʻa e maná naʻe mei he langí ha fuʻu longoaʻa fakamanavahē ʻou pehē ai kuo hoko mai ʻa e ʻaho fakamuí; ko ia naʻá ku taʻofi tuʻu ai ʻa e hōsí ʻi ha mōmeniti, lolotonga ia ʻa e kamata ke tō ha mosimosi ʻaisi kae ʻikai ha tulutā vai. . . . Naʻe tupu he taimí ni ʻa e ʻaisí ki he lahi ʻo e ngaahi foʻi lēmani fōlalahí. . . . Naʻe hoko taʻemapuleʻi ʻa e afaá ʻi ha vahaʻa taimi, ka naʻe faifai atu pē ʻo tuʻu . . . Ne mau fefakahāhāʻaki homau ngaahi makohikohí mo e takatakaʻulí; ka ʻi he meimei maile ʻe taha mamaʻo atu ne mau sio ai ʻi ha tuʻunga ʻo e maumaú ʻa ia ne fakalaka atu ia ʻi he meʻa ne mau faingataʻaʻia aí, pea ʻoku mamaʻo atu ia ʻi hono fakamatalaʻí. Ko e ʻuluʻakaú kotoa naʻe toʻo mei ai ʻa honau laú pea veuveuki; naʻe tākoto mate ʻi he vaó ʻa e fanga manú; ko e tokolahi ʻo e kau tangata tauhi manú naʻa nau mate foki mo kinautolu; naʻa mau sio ʻi ha ngaahi foʻi ʻaisi fōlalahi ʻaupito ʻa ia naʻe ʻikai lava ia ʻo pukepuke nima ua.”​—Autobiography (Tohi II, 50), Harvard Classics, Voliume 31, peesi 352-3.

Ko e hā ʻe hoko ʻi he taimi ʻe fakaava ai ʻe Sihova ʻa ʻene fale tukuʻanga koloa ʻo e sinoú mo e ʻuha maká ki hono ngaahi filí? ʻE ʻikai malava ke nau hao ʻi he taimi ʻoku ngāueʻaki ai ʻa e sinoú pe ʻaisí ke fakahokoʻaki ʻa hono finangaló.

Ko e Ngāue ʻa Hai ʻa e ʻUhá, Hahaú, ʻEa Momokó mo e ʻAisí?

ʻOku ʻeke hoko ange ʻe Sihova kia Siope ʻo fekauʻaki mo e ʻuhá, hahaú, ʻea momokó mo e ʻaisí. (Siope 38:​24-​30) Ko e ʻOtuá ʻa e Tokotaha-Faʻu-ʻUha-Lahí, pea naʻa mo e “fonua ʻoku ʻikai ʻi ai ha taha” ʻoku nau maʻu ʻa ʻene tāpuakí. Ko e ʻuhá, ʻaisí mo e ʻea momokó ʻoku ʻikai haʻanau tamai pe tupuʻanga fakaetangata.

ʻOku pehē ʻe he Nature Bulletin: “Ko e tafaʻaki  anga-kehe taha pe mahalo ko e mahuʻinga taha [ʻo e ʻaisí] ko e tupu ko ia ʻa e vaí ʻi heʻene poloká . . . Ko e konga ʻaisi lafalafa ʻoku tupu mo tētē ʻi ha fukahi vai ʻi he faʻahitaʻu momokó ʻokú ne ʻai ke malava ʻo kei moʻui ai ʻi he vai ʻi lalo aí ʻa e fanga manu (ika mo e hā fua) mo e ʻakau ʻoku ʻi he vaí. Kapau . . . naʻe mingi ʻa e vaí pea hoko ʻo māʻopoʻopo ange ʻi heʻene hoko ʻo fefeká, ʻe mamafa ange ai ʻa e ʻaisí ia ʻi he vaí pea ngoto ki lalo. ʻE tupu ʻa e ʻaisi lahi ange ʻi he fukahi vaí kae ʻoua kuo poloka ʻo fefeka ʻa e kiʻi vaí. . . . ʻI he ngaahi feituʻu mokomoko ange ʻo e māmaní ko e ngaahi vaitafé, fanga kiʻi vaí, anovaí pea naʻa mo e ngaahi ʻōsení ʻe poloka taʻengata ia.”

He fakamālōʻia ē ʻoku lava ke tau ʻi aí ʻi he ʻikai poloka ʻo fefeka ʻa e ngaahi vaí! Pea ko e moʻoni ʻoku tau houngaʻia he ko e ngāue ʻa Sihová, ʻa e ʻuhá mo e hahaú ʻokú na fakaivimālohiʻi ʻa e ʻakau ʻo e foʻi māmaní.

Ko Hai ʻOkú Ne Fokotuʻu ʻa e Ngaahi Lao ʻo e Langí?

ʻOku ʻeke hoko ange ʻe he ʻOtuá kia Siope ʻo fekauʻaki mo e langí. (Siope 38:​31-​33, NW) Ko e pupunga fetuʻu Kimá ʻoku faʻa ʻiloʻi ia ko e Peliatisí, ko ha kulupu ʻoku fakatuʻunga ʻi he ngaahi fetuʻu lalahi ʻe fitu mo e fanga kiʻi fetuʻu iiki ange ʻoku ʻi he ngaahi taʻu maama ʻe 380 mei he laʻaá. ʻOku ʻikai lava ʻe he tangatá “ke fakamaʻu ʻa e ngaahi haʻi ʻo e pupunga fetuʻu Kimá,” ʻo haʻi ʻa e kulupu ko iá ʻi ha pupunga. ʻOku ʻikai ha tangata ʻe lava ke ne “vete ʻa e ngaahi afo ko ia ʻo e pupunga fetuʻu Kēsilá,” ʻa ia ʻoku ʻilolahia ʻi he taimí ni ko e pupunga fetuʻu ko ʻOlioní. Neongo ʻoku ʻikai te tau ʻiloʻi pe ko e pupunga fetuʻu fē naʻá ne ui ko e pupunga fetuʻu Masalotí mo ʻĀkitulió, ʻoku ʻikai lava ʻe he tangatá ʻo puleʻi mo tataki kinaua. ʻOku ʻikai lava ʻe he faʻahinga ʻo e tangatá ʻo liliu “ʻa e ngaahi lao ʻo e langi,” ʻa e ngaahi lao ʻokú ne puleʻi ʻa e ʻunivēsí.

Naʻe fokotuʻu ʻe he ʻOtuá ʻa e ngaahi lao ʻokú ne tataki ʻa e ngaahi naunau fakahēvaní, ʻa ia ʻokú ne tākiekina ʻa e ʻeá, huʻa mo e mamaha ʻa e tahí mo e ʻatimosifia ʻo e foʻi māmaní, pea mo e ʻi ai tonu ʻa e moʻuí ʻi he foʻi palanite ko ʻení. Fakakaukau atu ki he laʻaá. ʻI he fekauʻaki mo iá, ʻoku pehē ʻe he Encyclopedia Americana (Pulusinga 1996): “Ko e huelo ʻo e laʻaá ʻokú ne tokonaki ki he foʻi māmaní ʻa e mafana mo e maama, tokoni ki he tupu ʻo e moʻui ʻa e ʻakaú, liliuʻi mao ʻa e vaí mei he tahí mo e ngaahi vai kehé, kaunga ki hono faʻu ʻo e matangí, pea mo fakahoko ʻa e ngaahi ngāue lahi kehe ʻa ia ʻoku mātuʻaki mahuʻinga ki he ʻi ai ko ia ʻo e moʻuí ʻi he foʻi māmaní.” ʻOku pehē ʻe he maʻuʻanga fakamatala tatau: “Ke mahinoʻi ʻa e tuʻunga kāfakafa ʻo e mālohi ʻoku maʻu ʻe he maama ʻo e laʻaá, ʻoku  fiemaʻu pē ki ha taha ke fakakaukauloto ko e mālohi kotoa ʻoku fakafofongaʻi ʻe he matangí mo e ngaahi ʻā-maka tāpuni-vaí mo e vaitafé pea mo e kotoa ʻo e mālohi ʻoku ʻi he ngaahi fefie fakaenatula hangē ko e ʻakaú, malalá pea mo e loló ko e ivi pē ia mei he laʻaá kuo faʻoaki ʻe ha kiʻi foʻi palanite valevale [ko e foʻi māmaní] ʻoku ʻi he mamaʻo ko e kilomita ʻe 150 miliona mei he laʻaá.”

Ko Hai ʻOkú Ne Tuku ʻa e Potó ki he Ngaahi ʻAó?

ʻOku tala ange ʻe Sihova kia Siope ke ne fakakaukau ki he ngaahi ʻaó. (Siope 38:​34-​38) ʻOku ʻikai lava ʻe he tangatá ke ne tuʻutuʻuniʻi ha konga ʻao ʻe taha ke ʻasi hake pea tukuange ʻa e vai ʻi aí. Ka he fakafalala ē ko e faʻahinga ʻo e tangatá ʻi he vilo takai ʻa e vaí ʻa ia kuo fokotuʻu ʻe he Tokotaha-Fakatupú!

Ko e hā ʻa e vilo takai ʻa e vaí? ʻOku pehē ʻe he maʻuʻanga fakamatala ʻe taha: “Ko e vilo takai ʻa e vaí ʻoku fakatuʻunga ia ʻi he ngaahi tuʻunga kehekehe ʻe fā: ko e tuku tauhi, liliu mao, liliu vai, pea hoko ko e ngaahi vaitafe. ʻOku lava ʻo tuku tauhi fakataimi ʻa e vaí ʻi he fonuá; ʻi he ngaahi ʻōsení, vaí mo e vaitafé; mo e ngaahi konga ʻaisi mo e sinou matolu pea mo e ngaahi fuʻu konga ʻaisi lalahí. ʻOku liliu mao ia mei he funga ʻo e foʻi māmaní, liliu tulutā vai ʻi he ngaahi ʻaó, tō ʻo foki ki he foʻi māmaní ʻi he tuʻunga ʻo e liliu vaí (ʻuha pe sinou), pea faifai atu pē ʻo tafe ki he tahí pe toe liliu mao ki he ʻatimosifiá. ʻOku meimei ko e kotoa ʻo e vai ʻi he foʻi māmaní kuo ʻosi feʻaveʻaki ia ʻi he vilo takai ʻa e vaí ʻi he ngaahi taimi taʻefaʻalaua.”​—Microsoft Encarta Reference Library 2005.

ʻOku hangē ʻa e ngaahi ʻao ʻoku fonu ʻi he ʻuhá ko ha ngaahi siā vai ia ʻo hēvaní. ʻI he taimi ʻoku huaʻi ai kinautolu ʻe Sihová, te nau huaʻi hifo nai ʻa e ʻuhá ʻo lahi ʻaupito ʻo hoko ai ʻa e efú ʻo pelepela mo ʻai ai ʻa e ngaahi konga kelekelé ke nau pikipiki fakataha. ʻE lava ʻe he ʻOtuá ʻo ʻomai ʻa e ʻuhá pe toloi ia.​—Semisi 5:​17, 18.

ʻOku faʻa haʻu fakataha ʻa e ʻuhá mo e ʻuhila, ka ʻoku ʻikai lava ʻe he tangatá ke ngāueʻaki ʻa e ʻuhilá ke fakalatoʻaki ʻa ʻene ngaahi fakaʻamú. ʻOku fakafofongaʻi ʻe he ʻuhilá ʻa e tali ui ki he ʻOtuá mo pehē, “Ko kimautolu ʻeni!” ʻOku pehē ʻe he Compton’s Encyclopedia: “ʻOku fakatupunga ʻe he ʻuhilá ʻa e ngaahi feliliuaki fakakemikale lahi ʻi he ʻatimosifiá. ʻI he taimi ʻoku ngaʻunu ai ʻa e ʻuhilá ʻi he ʻeá, ʻokú ne fakatupu ai ʻa e mafana lahi fakaʻulia ʻa ia ʻokú ne fakatahaʻi ʻa e naitolokená mo e ʻosikená ke faʻu ai ʻa e ngaahi naituleití mo e ngaahi komipauni kehe. Ko e ngaahi komipauni ko ʻení ʻoku nau tō fakataha hifo ki he foʻi Māmaní mo e ʻuhá. ʻI he founga ko ʻení, ʻoku malava ai ʻa e ʻatimosifiá ke hokohoko atu ʻa ʻene tokoni ke fakakakato ʻa e tokonaki ʻo e meʻakai ʻoku fiemaʻu ʻe he kelekelé ke fakatupu ai ʻa e ʻakaú.” Ko e ʻilo kakato ʻo e ʻuhilá ʻoku kei hoko ko ha misiteli ia ki he tangatá kae ʻikai ki he ʻOtuá.

Ngaahi Meʻa Fakaofo ʻo e Fakatupú ʻOkú Ne ʻOmi ʻa e Fakahīkihiki ki he ʻOtuá

Ko e ngaahi meʻa fakaofo ʻo e fakatupú ʻoku moʻoni ʻokú ne hakeakiʻi ʻa e Tokotaha-Fakatupu ʻo e meʻa kotoa peé. (Fakahā 4:​11) He maongo ē kuo pau naʻe hoko kia Siopé ʻi he ngaahi lea ʻa Sihova ʻo fekauʻaki mo e foʻi māmaní mo e ngaahi naunau fakalangi ʻi he vavaá!

Ko e ngaahi meʻa fakaofo ʻo e fakatupú kuo tau toki ʻosi lāulea ki aí ʻoku ʻikai ko e ngaahi fehuʻi mo e ngaahi fakamatala pē ia naʻe ʻoange kia Siopé. Neongo ia, naʻa mo e ngaahi meʻa ko ia kuo tau ʻosi lāulea ki aí ʻokú ne ueʻi ai kitautolu ke tau kalanga: “Vakai, oku lahi ae Otua, bea oku ikai te tau faa iloʻi ia.”​—Siope 36:​26, PM.

[Maʻuʻanga ʻo e Tā ʻi he peesi 14]

Kiʻi konga sinou: snowcrystals.net

[Maʻuʻanga ʻo e Tā ʻi he peesi 15]

Peliatisi: NASA, ESA and AURA/Caltech; ika: U.S. Fish & Wildlife Service, Washington, D.C./William W. Hartley