Good News for People of All Nations

HANGĒ ko ia ʻoku hā ʻi ʻolungá ko ha kiʻi tohi ia naʻe tukuange mai ʻi he ngaahi Fakataha-Lahi Fakavahe “ʻAʻeva mo e ʻOtua” 2004/05 ʻa e Kau Fakamoʻoni ʻa Sihová. Ko ha pulusinga ʻe taha ʻo ia ko ha kiʻi tohi peesi ʻe 96 ʻa ia ʻoku ʻi ai ha pōpoaki nounou ʻi he ngaahi lea ʻe 92, ʻoku kamata mei he lea faka-ʻAfilikaná ʻo aʻu ki he lea faka-Sulú, pea kuo teuteuʻi ia ke tokoni ki hono fakamafola atu ʻa e ongoongo lelei ʻo e Puleʻangá ki he kakai tokolahi taha ʻe ala lavá. (Mātiu 24:14) Ko hono hokó ko ha fakatātā ia ʻo e ngaahi ola ʻoku maʻu ʻi hono ngāueʻaki ʻa e kiʻi tohí.

• Hili hono maʻu ʻa e kiʻi tohí ʻi he fakataha-lahí, naʻe ʻaʻahi ha fāmili Fakamoʻoni ki he ngaahi paʻake fakapuleʻanga ʻe tolu. Ne nau fetaulaki ai mo e kakai mei Filipaini, Pākisitani, Netaleni mo ʻInitia. Naʻe fakamatala ʻa e husepānití: “Neongo ko e kotoa ʻo e kakai ko ení ʻoku nau lea faka-Pilitānia siʻisiʻi pē, naʻe maongo kia kinautolu ʻemau fakahaaʻi ange ʻa e pōpoakí ʻi heʻenau leá tonu, koeʻuhí ne nau laulaui maile mei ʻapi. Ko e natula fakaemāmani lahi ʻo ʻemau ngāué pea pehē ki heʻemau fāʻūtahá naʻe hoko ʻo hā mahino ia kia kinautolu.”

• Naʻe fakahaaʻi ange ʻe ha Fakamoʻoni ʻa e kiʻi tohí ki ha kaungāngāue mei ʻInitia. Naʻá ne fiefia ʻi he sio ki he kotoa ʻo e ngaahi lea ʻi aí peá ne lau ʻa e pōpoakí ʻi heʻene lea ʻaʻaná. Naʻe taki atu eni ki he fetalanoaʻaki lahi ange ʻo kau ki he Tohi Tapú. Naʻe ofoofo ha kaungāngāue mei he ʻOtu Motu Filipainí ʻi heʻene ʻiloʻi ʻene lea tuʻufonuá ʻi he kiʻi tohí peá ne hoko ʻo mahuʻingaʻia ai ʻi he ako lahi ange ʻo fekauʻaki mo e Kau Fakamoʻoni ʻa Sihová.

• ʻI Kānata, naʻe loto-lelei ai ha fefine mei Nepolo ke ako ʻa e Tohi Tapú mo ha Fakamoʻoni fakafou ʻi he telefoní ka naʻá ne toumoua ke fakaafeʻi ʻa e tuofefiné ki hono ʻapí. Kae kehe, ʻi he taimi naʻe talanoa ange ai ʻa e Fakamoʻoní ki he fefiné ʻo kau ki he kiʻi tohí mo ha pōpoaki ʻi he lea faka-Nepoló, naʻá ne fakaafeʻi fiefia ʻa e tuofefiné ke haʻu ki ai. Naʻá ne fiemaʻu moʻoni ke ne sio tonu ʻi he pōpoakí ʻi heʻene lea tuʻufonuá! Talu mei ai mo hono fakahoko ʻa e ako Tohi Tapú ʻi he ʻapi ʻo e fefiné.