Founga ʻE Ikunaʻi Ai ʻe he Leleí ʻa e Koví

Ko Tuʻi Tēvitá ko ha tangata naʻe lelei. Naʻá ne maʻu ha ʻofa loloto ki he ʻOtuá, ko ha holi ki he faitotonú pea mo ha tokanga ʻofa ki he māʻulaló. Neongo ia, ko e tuʻi tatau pē ko ʻení naʻá ne fai ʻa e tono mo e uaifi ʻo e taha ʻo ʻene kau tangata falalaʻangá. Pea hili hono ʻiloʻi ʻe Tēvita naʻe feitama ange kiate ia ʻa e fefiné, ʻa Patisepa, naʻe faifai atu pē ʻo ne fokotuʻutuʻu ki hono tāmateʻi ko ia ʻo hono husepānití. Naʻá ne mali leva mo Patisepa ʻi ha feinga ke fakapuliki ʻa ʻene ngaahi faihalá.​—2 Samiuela 11:​1-​27.

ʻOKU hā mahino ko e faʻahinga ʻo e tangatá ʻoku nau maʻu ʻa e malava ke fai ʻa e lelei lahi. Ko ia ai, ko e hā ʻoku tupu ai meiate kinautolu ʻa e kovi lahi faú? ʻOku fakapapauʻi ʻe he Tohi Tapú ʻa e ngaahi ʻuhinga tefito lahi. ʻOku toe fakahaaʻi foki ai ʻa e founga ʻe toʻo fakaʻaufuli atu ai ʻe he ʻOtuá ʻa e koví ʻo fakafou ʻia Sīsū Kalaisí.

Ko ha Hehema ki he Koví

ʻOku fakapapauʻi mai ʻia Tuʻi Tēvita tonu ʻa e tupuʻanga ʻe taha ʻo e ngaahi tōʻonga koví. Hili ʻa hono fakaeʻa ʻa ʻene ngaahi faihalá, naʻá ne tali halaia kakato ki heʻene ngaahi ngāué. Naʻá ne tohi leva ʻi he ongoʻi halaia: “Vakai naʻe fanauʻi au mo e hia; ʻio naʻe tuʻituʻia ʻeku faʻe ʻiate au ko e meʻa angahala.” (Sāme 51:5) Naʻe ʻikai ʻaupito ko e taumuʻa ia ʻa e ʻOtuá ki he ngaahi faʻeé ke nau tuʻituʻiaʻi ha fānau te nau faiangahala. Kae kehe, ʻi he fili ʻa ʻIvi pea toki hoko kia ʻĀtama ke angatuʻu fakafepaki ki he ʻOtuá, naʻe mole ai meiate kinaua ʻa e malava ko ia ke fanauʻi ha fānau taʻehaangahalá. (Loma 5:​12) ʻI he tupulaki ko ia ʻa e hako taʻehaohaoa ʻo e faʻahinga ʻo e tangatá, naʻe hoko ʻo hā mahino “ko e filioʻi [pe hehema] ʻa e loto ʻo e tangata ʻoku kovi mei heʻene tamasiʻi.”​—Senesi 8:​21.

Kapau ʻe tuku taʻemapuleʻi, ko e hehema ko ʻeni ki he koví ʻe iku ia ki he “feʻauaki, . . . fetāufehiʻaʻaki, ko e fetuʻusi, ko e meheka, ko e feʻiteʻitani,  ko e fakafelaulauhi, ko e fakavahavahaʻa, ko e fakafaʻafaʻahi, ko e femehekaʻaki,” mo e ngaahi tōʻonga fakatupu maumau kehe ʻa ia ʻoku fakamatalaʻi ʻe he Tohi Tapú ko e “ngaahi ngaue ʻa Kakano.” (Kaletia 5:​19-​21) ʻI he meʻa naʻe fai ʻe Tuʻi Tēvitá, naʻá ne tukulolo ki he vaivai fakaekakanó pea fai ai ʻa e feʻauaki, ʻa ia naʻe iku atu ai ki he fetuʻusi. (2 Samiuela 12:​1-​12) Naʻá ne mei lava pē ʻo talitekeʻi ʻa ʻene hehema taʻetāú. ʻI hono kehé, ʻi he nōfoʻi ʻi heʻene holi kia Patisepá, naʻe muimui ai ʻa Tēvita ʻi he sīpinga ʻa ia naʻe fakamatalaʻi ia ki mui ai ʻe he ākonga ko Sēmisí: “ʻOku ʻahiʻahiʻi ʻa e tangata taki taha he tohoaki ia ʻe heʻene holi aʻana, mo taki ʻaki ha mounu. Faifai pea tuʻituʻia ʻa e holi ko ia, ʻo ne fanauʻi ha angahala: pea ko e angahala ko ia, ʻo ka kakato, ʻoku ne faʻeleʻi ʻa e mate.”​—Semisi 1:​14, 15.

Ko e ngaahi tāmate fakatokolahi, tohotoho mo e faʻao fakamālohi naʻe lave ki ai ʻi he kupu ki muʻá ko e ngaahi fakatātā lahi ia ʻo e meʻa ʻoku hoko ʻi he taimi ʻoku fakaʻatā ai ʻe he kakaí ʻa e ngaahi holi halá ke ne tākiekina ʻa ʻenau ngaahi ngāué.

Faʻa Fakatupunga ʻe he Taʻeʻiló ʻa e Koví

ʻOku fakamamafaʻi ʻe he hokosia ʻa e ʻapositolo ko Paulá ʻa e ʻuhinga hono ua ʻoku fai ai ʻe he kakaí ʻa e ngaahi meʻa koví. ʻI he taimi naʻá ne mate aí, naʻe maʻu ai ʻe Paula ʻa e ongoongo ko ha tangata anga-malū mo manavaʻofa. Naʻá ne ngāue tonu taʻesiokita ʻi he ngāue maʻa hono fanga tokoua mo e fanga tuofāfine Kalisitiané. (1 Tesalonaika 2:​7-9) Neongo ia, ki muʻa atu ʻi heʻene moʻuí, ʻi he taimi naʻe ʻiloa ai ʻi he hingoa Saulá, naʻá ne “hōʻaki ʻa e fakamanamana mo e lau fakapō” ki he kulupu tatau tofu pē ko ʻení. (Ngāue 9:​1, 2) Ko e hā naʻe tali ai ʻe Paula pea kau ʻi he ngaahi tōʻonga kovi naʻe fai ki he muʻaki kau Kalisitiané? “Koeʻuhi naʻa ku fai taʻeʻilo pe,” ko ʻene leá ia. (1 Timote 1:​13) ʻIo, naʻe maʻu ki muʻa ʻe Paula ʻa e “mamahiʻi ʻa e [faivelenga ki he] ʻOtua, ka ʻoku ʻikai fou ʻi he ʻilo totonu.”​—Loma 10:2.

Hangē ko Paulá, ko e kakai loto-totonu tokolahi kuo nau kau ʻi he ngaahi tōʻonga kovi koeʻuhí ko e ʻikai maʻu ʻa e ʻilo totonu fekauʻaki mo e finangalo ʻo e ʻOtuá. Ko e fakatātaá, naʻe fakatokanga ʻa Sīsū ki hono kau muimuí: “ʻOku ʻunu mai ha taimi, ʻa ia ʻe ʻilonga ai ha taha te ne tamateʻi kimoutolu, te ne lau kuo ne fai ha [ngāue toputapu] ki he ʻOtua.” (Sione 16:2) Ko e Kau Fakamoʻoni ʻa Sihova he ʻaho ní ʻoku nau aʻusia moʻoni ʻa e lea ʻa Sīsuú. ʻI he ngaahi fonua lahi, kuo fakatangaʻi ai kinautolu pea aʻu ʻo tāmateʻi ʻe he kakai ʻoku nau taukaveʻi ʻoku nau tauhi ʻa e ʻOtuá. ʻOku hā mahino, ko e faʻahinga faivelenga takihalaʻi peheé ʻoku ʻikai fakahōifua ia ki he ʻOtua moʻoní.​—1 Tesalonaika 1:6.

Ko e Tupuʻanga ʻo e Koví

Naʻe fakapapauʻi ʻe Sīsū ʻa e ʻuhinga tefito ki he ʻi ai ko ia ʻa e koví. ʻI he lea ki he kau taki lotu ʻa ia naʻa nau fakapapauʻi ke tāmateʻi iá, naʻá ne pehē: “Ko e tamai kuo mou tupu mei ai ko e Tevolo, pea ko e ngaahi manako ʻo hoʻomou tamai ʻoku mou loto ke fai. Ko e toko taha ko ia ko e tamate-tangata mei he kamataʻanga.” (Sione 8:​44) Ko Sētane naʻá ne fakataueleʻi ʻi he ngaahi ʻuhinga siokita ʻa ʻĀtama mo ʻIvi ʻo na angatuʻu ai ki he ʻOtuá. Naʻe ʻomai ʻe he foʻi angatuʻu ko iá ʻa e angahalá​—pea hoko ai ʻa e maté​—ki he faʻahinga kotoa ʻo e tangatá.

Ko e hehema anga-fakapō ʻa Sētané naʻe toe fakaeʻa ia ʻi he meʻa naʻá ne fai kia Siopé. ʻI he taimi naʻe tuku ai kiate ia ʻe Sihova ʻa e ngofua ke ne ʻahiʻahiʻi ʻa e anga-tonu ʻa Siopé, naʻe ʻikai fiemālie pē ʻa Sētane ia ʻi hono toʻo kotoa ʻa e  ngaahi koloa ʻa Siopé. Naʻá ne toe fakatupunga foki ʻa e mate ʻo ʻene fānau ʻe toko hongofulú. (Siope 1:​9-​19) ʻI he ngaahi hongofuluʻi taʻu ki muí ni maí, kuo aʻusia ai ʻe he faʻahinga ʻo e tangatá ʻa e tupulaki fakautuutu ʻo e koví koeʻuhí ko e taʻehaohaoa fakaetangatá mo e taʻeʻiló pea ko e toe ola foki ia ʻo e kau fakautuutu ʻa Sētane ʻi he ngaahi meʻa ʻa e faʻahinga ʻo e tangatá. ʻOku fakahaaʻi ʻe he Tohi Tapú ko e Tēvoló “naʻe li ia ki mamani, pea li mo ia ʻene kau ʻangelo.” Ko e kikite tatau ko iá naʻe tomuʻa tala totonu ai ko hono fakamavaheʻi hifo ʻo Sētané ʻe hoko ai ʻa e “ʻoiaue ʻa e fonua” ʻo taʻehanotatau. Lolotonga ʻe ʻikai lava ʻe Sētane ʻo fakamālohiʻi ʻa e kakaí ke nau fai ʻa e ngaahi meʻa ʻoku koví, ko e pule ia “ʻoku ne kākāʻi ʻa mamani kātoa.”​—Fakahā 12:​9, 12.

Ko Hono Toʻo Atu ʻa e Hehema ki he Koví

Ke toʻo taʻengata atu ʻa e koví mei he sōsaieti ʻo e faʻahinga ʻo e tangatá, ko e hehema tukufakaholo ʻa e tangatá ki he koví, ko ʻene taʻemaʻu ʻa e ʻilo totonú pea mo e tākiekina ʻa Sētané kuo pau ke toʻo atu ia. ʻUluakí, ʻe lava fēfē ʻa hono toʻo atu ʻa e hehema tukufakaholo ʻa e tangatá ki he angahalá mei hono lotó?

ʻOku ʻikai ha meʻa ia ʻe lava ʻe he tangatá ʻo fai ke lava ʻo toʻo atu ai ʻa e hehema tukufakaholo ki he angahalá. Neongo ia, ko Sihova ko e ʻOtuá, kuó ne teuteu ha faitoʻo ki he angahalá mo e taʻehaohaoa tukufakaholó maʻá e kotoa ʻo e faʻahinga ʻoku nau loto-lelei ke tali iá. Naʻe tohi ʻe he ʻapositolo ko Sioné: “Ko e taʻataʻa ʻo Sisu . . . ʻoku ne fakamaʻa kitautolu mei he angahala kotoa pe.” (1 Sione 1:7) ʻI he taimi naʻe foaki loto-lelei ai ʻe he tangata haohaoa ko Sīsuú ʻa ʻene moʻuí, naʻá ne “fua ʻa e ngaahi angahala ʻatautolu, ʻe ia, ʻi hono sino, ʻi he ʻakau; koeʻuhi ʻi heʻetau mate ki heʻetau ngaahi angahala, ke tau moʻui ki he maʻoniʻoni.” (1 Pita 2:​24) Ko e pekia fakaefeilaulau ʻa Sīsuú te ne toʻo atu ʻe ia ʻa e ngaahi nunuʻa ʻo e ngāue kovi ʻa ʻĀtamá. ʻOku pehē ʻe Paula naʻe hoko ʻa Kalaisi Sīsū “ko ha fetongi huhuʻi fehoanakimālie maʻá e tokotaha kotoa pē.” (1 Timote 2:​6, NW) ʻIo, ko e pekia ʻa Kalaisí naʻe fakaava ai ʻa e hala ki he kotoa ʻo e faʻahinga ʻo e tangatá ke nau toe maʻu ʻa e tuʻunga haohaoa ko ia naʻe fakamoleki ʻe ʻĀtamá.

Neongo ia, te ke ʻeke nai, ‘Kapau naʻe ʻai ʻe he pekia ʻa Sīsū ʻi he taʻu ʻe 2,000 he kuohilí ke malava ai ʻa e faʻahinga ʻo e tangatá ke nau toe maʻu ʻa e haohaoá, ko e hā ʻoku kei ʻi ai ai ʻa e koví mo e maté?’ Ko hono maʻu ha tali ki he fehuʻi ko iá ʻe lava ʻo tokoni ia ki hono toʻo atu ʻa e tupuʻanga hono ua ʻo e koví​—ko e taʻeʻilo ʻa e tangatá ki he ngaahi taumuʻa ʻa e ʻOtuá.

Fakaivia ʻe he ʻIlo Totonú ʻa e Leleí

Ko hono maʻu ʻa e ʻilo totonu ki he meʻa ʻoku lolotonga fai ʻe Sihova mo Sīsū ke toʻo ʻosi atu ai ʻa e koví te ne taʻofi nai ai ha taha loto-moʻoni mei hono fai taʻeʻilo ha ngaahi tōʻonga kovi, pe toe kovi angé, mei haʻane hoko ko ha tokotaha faitau ʻo “tauʻi ʻa e ʻOtua.” (Ngāue 5:​38, 39) ʻOku finangalo ʻa Sihova ko e ʻOtuá ke ne fakangaloʻi ʻa e ngaahi hala ʻa ia naʻe fai taʻeʻilo ʻi he kuohilí. ʻI he lea ʻi ʻAtenisi, naʻe pehē ai ʻe he ʻapositolo ko Paulá: “Neongo ʻene fakataʻetaʻe ʻafioʻi ʻe he ʻOtua ʻa e ngaahi kuonga ʻo e tuʻuvale, ka ʻi onopōni ʻoku ne fekau ki he kakai kotoa pe ʻi he potu kotoa pe ke nau fakatomala: koeʻuhi kuo ne kotofa ha ʻaho, ʻa ia ʻoku ne teu fakamāu ai ʻa māmani, ʻo ʻauʻautotonu, ʻo fakafai ʻi he tangata kuo ne poloʻi; ʻo ne tuku moʻo e kakai kotoa pe ha tuʻunga ki heʻenau tui ʻi heʻene fokotuʻu ʻa e toko taha ko ia mei he pekia.”​—Ngāue 17:​30, 31.

Naʻe ʻiloʻi ʻe Paula mei heʻene aʻusiá naʻe fokotuʻu hake ʻa Sīsū mei he pekiá, he ko Sīsū tonu ne toetuʻú naʻá ne lea kia Paula ʻo ne taʻofi ia mei hono fakatangaʻi ʻa e muʻaki kau Kalisitiané. (Ngāue 9:​3-7) ʻI hono maʻu pē ko ia ʻe Paula ʻa e ʻilo totonu ki he ngaahi taumuʻa ʻa e ʻOtuá, naʻá ne liliu ai ʻo hoko ko ha tokotaha lelei moʻoni ʻi he faʻifaʻitaki kia Kalaisí. (1 Kolinito 11:1; Kolose 3:​9, 10) Tānaki atu ki ai, naʻe malangaʻi faivelenga ʻe Paula ʻa e “ogoogolelei ni oe buleaga.” (Mātiu 24:​14, PM) Lolotonga ʻa e meimei taʻu ʻe 2,000 talu mei he pekia mo e toetuʻu ʻa Sīsuú, kuo ʻosi filifili ai ʻe Kalaisi mei he lotolotonga ʻo e faʻahinga ʻo e tangatá ʻa e faʻahinga hangē ko Paulá, ke nau pule fakataha mo ia ʻi hono Puleʻangá.​—Fakahā 5:​9, 10.

Mei he senituli kuo maliu atú ʻo aʻu mai ki he lolotongá ni, kuo fakahoko faivelenga ʻe he Kau Fakamoʻoni ʻa Sihová ʻa e fekau ʻa Sīsuú: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni, mo e akoʻi kinautolu ke tauhi ʻa e ngāhi meʻa kotoa pe  kuo u tuʻutuʻuni atu.” (Mātiu 28:​19, 20) Ko e faʻahinga ʻoku nau tali ʻa e pōpoaki ko ʻení ʻoku nau maʻu ʻa e ʻamanaki ʻo e moʻui taʻengata ʻi he foʻi māmaní ʻi he malumalu ʻo e puleʻanga fakahēvani ʻo Kalaisí. Naʻe pehē ʻe Sīsū: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Sione 17:3) Ko hono tokoniʻi ha taha ke ne maʻu ʻa e ʻilo ko ʻení ʻa e meʻa lelei taha ʻe lava ʻe ha taha ʻo fai maʻa ha taha kehé.

Ko e faʻahinga ʻoku nau tali ʻa e ongoongo lelei ko ʻeni ʻo e Puleʻangá ʻoku nau fakahāhā ʻa e ngaahi ʻulungāanga hangē ko e “ʻofa, fiefia, melino, kātaki-fuoloa, anga-lelei, lelei, tui, anga-malū mo e mapuleʻi-kita,” neongo ʻa e kotoa ʻo e kovi ʻokú ne ʻātakaiʻi kinautolú. (Kaletia 5:​22, 23, NW) ʻI he faʻifaʻitaki kia Sīsuú, ʻoku ʻikai ai te nau “totogi ae kovi aki ae kovi ki ha taha.” (Loma 12:​17, PM) ʻI ha tuʻunga fakafoʻituitui, ʻoku nau feinga ke hanganaki “ikuna ʻa e kovi ʻaki ʻa e lelei.”​—Loma 12:21; Mātiu 5:​44.

Ko e Ikunaʻi Fakaʻosi ʻo e Koví

ʻIate kinautolu pē, ʻe ʻikai ʻaupito lava ʻe he faʻahinga ʻo e tangatá ke ikunaʻi ʻa e tokotaha tefito ʻokú ne fakatupunga ʻa e koví, ʻa Sētane ko e Tēvoló. Neongo ia, ʻoku vavé ni ke ngāueʻaki ʻe Sihova ʻa Sīsū ke ne laiki ʻa e ʻulu ʻo Sētané. (Senesi 3:​15; Loma 16:20) ʻE toe tataki foki ʻe Sihova ʻa Kalaisi Sīsū ke ne “laiki mo fakaʻauha” ʻa e kotoa ʻo e ngaahi kautaha fakapolitikalé, ʻa ia ko e tokolahi ʻo e faʻahinga ko iá kuo nau fai ʻo fuʻu lahi ʻaupito ʻa e koví ʻi he kotoa ʻo e hisitōliá. (Taniela 2:​44; Koheleti 8:9) Lolotonga ʻa e ʻaho fakamaau ko ʻeni ʻoku ene ke hokó, ko e kotoa ʻo e faʻahinga ʻoku “ikai talagofua ki he ogoogolelei o ho tau Eiki ko Jisu Kalaisi . . . e tautea aki ae fakaauha taegata.”​—2 Tesalonaika 1:​8, 9, PM; Sefanaia 1:​14-​18.

ʻI hono toʻo atu pē ko ia ʻa Sētane mo e faʻahinga ʻoku nau poupou ki aí, ʻe tokoniʻi ʻe Sīsū mei hēvani ʻa e kau hao moʻuí ke nau toe fakafoki ʻa e foʻi māmaní ki hono muʻaki tuʻungá. ʻE toe fokotuʻu hake ʻe Kalaisi ʻa e kotoa ʻo e faʻahinga ʻoku nau taau mo e faingamālie ke moʻui ʻi he foʻi māmani ʻe fakafoʻoú. (Luke 23:​32, 39-​43; Sione 5:​26-​29) ʻI hono fakahoko iá, te ne fakataʻeʻaongaʻi ai ʻa e niʻihi ʻo e ngaahi nunuʻa ʻo e koví ʻa ia naʻe faingataʻaʻia ai ʻa e faʻahinga ʻo e tangatá.

ʻE ʻikai fakamālohiʻi ʻe Sihova ʻa e kakaí ke nau talangofua ki he ongoongo lelei fekauʻaki mo Sīsuú. Kae kehe, ʻokú ne ʻoange ki he kakaí ʻa e faingamālie ke nau maʻu ʻa e ʻilo ʻa ia ʻoku taki atu ki he moʻuí. ʻOku mātuʻaki mahuʻinga ke ke ngāueʻaki lelei ʻa e faingamālie ko ʻení ʻi he taimí ni! (Sefanaia 2:​2, 3) Kapau te ke fai pehē, te ke ako ai ʻa e founga ke fekuki ai mo ha faʻahinga kovi pē ʻokú ne lolotonga maumauʻi ʻa hoʻo moʻuí. Te ke toe sio foki ai ki he founga ʻe taki ai ʻe Kalaisi ʻa hono ikunaʻi fakaʻosi ʻo e koví.​—Fakahā 19:​11-​16; 20:​1-3, 10; 21:​3, 4.

[Fakatātā ʻi he peesi 5]

Naʻe tali ʻe Saula ʻa e ngaahi tōʻonga koví koeʻuhí naʻe ʻikai te ne maʻu ʻa e ʻilo totonú

[Fakatātā ʻi he peesi 7]

Ko hono tokoniʻi ha taha ke ne maʻu ʻa e ʻilo totonu ki he ʻOtuá ʻa e meʻa lelei taha ʻe lava ʻe ha taha ʻo fai maʻa ha taha kehé