ʻOua Naʻa Tuku ha Ava ki he Tēvoló

“ʻOua naʻa ʻoange ha faingamālie ki he Tēvoló.”​—EFESO 4:​27, Byington.

1. Ko e hā kuo fehuʻia ai ʻe he tokolahi ʻa e ʻi ai ko ia ʻa e Tēvoló?

 ʻI HE laui senituli, naʻe fakakaukau ai ʻa e kakai tokolahi ʻo fekauʻaki mo e Tēvoló ko ha meʻamoʻui ʻoku ʻi ai hono meʻatui, veʻe māvahevahe ʻokú ne tui ha teunga kula pea ngāueʻaki ha fuʻu huhu ke lakuʻaki ʻa e faʻahinga fulikivanu ʻo e tangatá ki ha afi ko heli. ʻOku ʻikai poupouʻi ʻe he Tohi Tapú ʻa e fakakaukau ko iá. Kae kehe, ʻoku ʻikai ha veiveiua, ko e ngaahi fakakaukau hala peheé kuo fakatupunga ai ʻa e laui miliona ke nau fehuʻia ʻa e ʻi ai ko ia ʻa e Tēvoló pe fakakaukau ʻoku ngāueʻaki pē ʻa e kupuʻi leá ki ha tupuʻanga tefito ʻo e koví.

 2. Ko e hā ʻa e ngaahi moʻoniʻi meʻa Fakatohitapu ʻe niʻihi ʻo fekauʻaki mo e Tēvoló?

² ʻOku ʻomai ʻe he Tohi Tapú ʻa e fakamoʻoni sio tonu mo e fakamoʻoni māʻalaʻala ʻoku ʻi ai ʻa e Tēvolo. Naʻe mamata ʻa Sīsū Kalaisi kiate ia ʻi he nofoʻanga laumālie fakahēvaní pea naʻá ne lea kiate ia ʻi he māmaní. (Siope 1:6; Mātiu 4:​4-11) Neongo ʻoku ʻikai fakahaaʻi ʻe he Tohi Tapú ʻa e ʻuluaki hingoa ʻo e meʻamoʻui laumālie ko ení, ʻokú ne ui ia ko e Tēvoló (ko hono ʻuhingá ko e “Tokotaha Lauʻikovi Loi”) koeʻuhi kuó ne lauʻikovi loi ʻa e ʻOtuá. ʻOku toe ui ia ko Sētane (ko hono ʻuhingá ko e “Tokotaha Talitekeʻi”), koeʻuhi ʻokú ne talitekeʻi ʻa Sihova. Ko Sētane ko e Tēvoló ʻoku lave ki ai ko e “Ngata ʻo ono ʻaho,” ngalingali koeʻuhí he naʻá ne ngāueʻaki ha ngata ke kākaaʻiʻaki ʻa ʻIvi. (Fakahā 12:9; 1 Timote 2:14) ʻOku toe ʻiloa foki ia ko e “Fili.”—Mātiu 6:13. a

 3. Te tau lāulea ki he fehuʻi ko e hā?

³ ʻI he tuʻunga ko e kau sevāniti ʻa Sihová, ʻoku ʻikai ʻaupito te tau loto ke faʻifaʻitaki kia Sētane, ʻa e fili lahi ʻo e ʻOtua moʻoni pē ʻe tahá. Ko ia kuo pau ai ke tau tokanga ki he akonaki ʻa e ʻapositolo ko Paulá: “ʻOua naʻa ʻoange ha faingamālie ki he Tēvoló.” (Efeso 4:​27, Byington) Ko e hā leva ʻa e niʻihi ʻo e ngaahi anga ʻo Sētane kuo pau ke ʻoua te tau faʻifaʻitaki ki aí?

ʻOua ʻe Faʻifaʻitaki ki he Tokotaha Lauʻikovi Loi Lahí

 4. Naʻe anga-fēfē hono lauʻikovi loi ʻe he “Fili” ʻa e ʻOtuá?

⁴ Ko e “Fili” ʻoku tuha ke ui ia ko e Tēvoló, he ko ha tokotaha lauʻikovi loi ia. Ko e lauʻikovi loí ko ha fakamatala hala, loto-kovi mo fakaongoongokovi ia ʻo fekauʻaki mo ha taha. Naʻe fekau ʻe he ʻOtuá kia ʻĀtama: “Ka ko e ʻAkau ʻo e ʻIlo-ʻo-e-lelei-mo-e-kovi ʻe ʻikai te ke kai mei ai: he ko e ʻaho te ke kai mei ai kuo pau te ke mate.” (Senesi 2:17) Naʻe fakahaaʻi kia ʻIvi ʻa e meʻá ni, kae fakafou ʻi ha ngata, naʻe tala ange ʻe he Tēvoló kiate ia: “ʻE ʻikai ʻaupito te mo mate: kae kehe, ʻoku meaʻi ʻe he ʻOtua ko e ʻaho te mo kai ai ʻe ʻa ai homo mata, pea te mo hoko ke hange ko e ʻOtua, hoʻomo ʻilo ʻa e lelei mo e kovi.” (Senesi 3:​4, 5) Ko ha lauʻikovi loi loto-kovi ia ʻo Sihova ko e ʻOtuá!

 5. Ko e hā naʻe taau ai ke fai ʻe Taiotifi ha fakamatala ki heʻene lauʻikovi loí?

⁵ Naʻe fekauʻi ki he kau ʻIsilelí: “ʻE ʻikai te ke ʻalu fano ʻi he lotolotonga ʻo ho kakai ke fakakovi” pe lauʻikovi loi. (Livitiko 19:16) Naʻe fakamatala ʻa e ʻapositolo ko Sioné ʻo fekauʻaki mo ha tokotaha lauʻikovi loi ʻi hono ʻahó: “Naʻe ʻi ai ha meʻa naʻa ku tohi atu ki he siasi na: ka ko ia ʻoku ne fie  tāfataha ʻiate kinautolu, ʻa Taiotifi, ʻoku ʻikai te ne tali kimautolu. Ko ia kapau te u ʻalu atu te u fakamanatu hake ʻene ngaahi ngaue, ʻa e koto laukovi ʻoku ne fai kiate kimautolu.” (3 Sione 9, 10) Naʻe lauʻikovi loi ʻe Taiotifi ʻa Sione pea naʻe taau ke ne fai ha fakamatala ki he meʻa ko iá. Ko hai ha Kalisitiane mateaki te ne loto ke hangē ko Taiotifí ʻo faʻifaʻitaki kia Sētane, ʻa e tokotaha lauʻikovi loi lahí?

6, 7. Ko e hā te tau loto ai ke fakaʻehiʻehi mei hono lauʻikovi loi ha taha peé?

⁶ Ko e ngaahi fakamatala lauʻikovi loí mo e ngaahi tukuakiʻi loí ʻoku faʻa leaʻaki mālohi ia ki he kau sevāniti ʻa Sihová. “Nae tutuu ae kau taulaeiki lahi moe kau tagata tohi, o nau talatalaaki malohi [ʻa Sīsū].” (Luke 23:​10, PM) Naʻe tukuakiʻi loi ʻa Paula ʻe he Taulaʻeiki Lahi ko ʻAnanaiá pea mo e niʻihi kehe. (Ngāue 24:​1-8) Pea ʻoku lau ʻa e Tohi Tapú ʻo fekauʻaki mo Sētane “ʻa e tukuaki ʻo hotau kainga, ʻa ia ʻoku ne tukuakiʻi kinautolu ʻi he ʻao ʻo hotau ʻOtua, ʻi he ʻaho mo e po.” (Fakahā 12:10) Ko e fanga tokoua ko ia ne tukuakiʻi loí ko e kau Kalisitiane pani kinautolu ʻi he māmaní ʻi he ngaahi ʻaho fakaʻosi ko ení.

⁷ ʻOku ʻikai ha Kalisitiane ʻe loto ke ne lauʻikovi loi ha taha pē pe fai ha ngaahi tukuakiʻi loi. Neongo ia, ʻe lava ke hoko ia kapau naʻe ʻikai ke tau maʻu ʻa e ngaahi moʻoní kotoa ki muʻa ke tau fai ha fakamoʻoni ki ha taha. ʻI he malumalu ʻo e Lao ʻa Mōsesé, ko e fakamoʻoni loi ʻosi fakakaukauʻí naʻe lava ke iku atu ia ki he mate ʻa e tokotaha fai tukuakiʻí. (Ekisoto 20:16; Teutalonome 19:​15-19) ʻIkai ngata aí, ko e ngaahi meʻa ʻoku fakalielia kia Sihová ʻoku kau ai ʻa e “fakamoʻoni kākā ʻoku hoʻaki loi.” (Palovepi 6:​16-​19) Ko ia ai, ko e moʻoni ʻoku tau loto ke fakaʻehiʻehi mei he faʻifaʻitaki ki he tokotaha lauʻikovi loi mo tukuakiʻi loi tefitó.

Siʻaki e Ngaahi Founga ʻa e Muʻaki Tāmate Tangatá

 8. ʻI he founga fē naʻe hoko ai ʻa e Tēvoló “ko e tamate-tangata mei he kamataʻanga”?

⁸ Ko e Tēvoló ko ha tokotaha tāmate tangata. “Ko e toko taha ko ia ko e tamate-tangata mei he kamataʻanga,” ko e lea ia ʻa Sīsuú. (Sione 8:44) Kamata ʻi heʻene ʻuluaki ngāue ʻi hono fakatafokiʻi ʻa ʻĀtama mo ʻIvi mei he ʻOtuá, kuo hoko ʻa Sētane ko ha tāmate tangata. Naʻá ne ʻomai ai ʻa e maté ki he ʻuluaki ongo meʻa fakaetangatá mo ʻena fānaú. (Loma 5:12) Fakatokangaʻi ange ko e ngāué ni ʻe lava ke tuku pē ia ki ha tokotaha, ʻo ʻikai ki ha tuʻunga tefito pē ʻo e koví.

 9. Hangē ko ia ʻoku fakahaaʻi ʻi he 1 Sione 3:​15, ʻe lava fēfē ke tau hoko ko e kau tāmate tangatá?

⁹ “ʻOua naʻa ke fakapo,” ko e fakamatala ia ʻa e taha ʻo e Fekau ʻe Hongofulu naʻe ʻoange ki ʻIsilelí. (Teutalonome 5:17) ʻI he lea ki he kau Kalisitiané, naʻe tohi ʻe he ʻapositolo ko Pitá: “Ke ʻoua naʻa ai hamou toko taha ʻe moʻua ha mamahi ko haʻane fakapo.” (1 Pita 4:15) Ko ia ʻi he tuʻunga ko e kau sevāniti ʻa Sihová, ʻe ʻikai te tau fai ha fakapō. Neongo ia, te tau halaia ʻi he ʻao ʻo e ʻOtuá kapau naʻa tau fehiʻa ʻi ha kaungā Kalisitiane pea fakaʻamu ange naʻá ne mate. “Ko ia ʻoku ne fehiʻa ki hono tokoua ko e tamate-tangata ia [pe, “fakapō”],” ko e tohi ia ʻa e ʻapositolo ko Sioné, “pea ʻoku mou ʻilo, ʻilonga ha tamate-tangata, ʻoku ʻikai te ne maʻu ʻa e nofoʻi ia ʻe he moʻui taʻengata.” (1 Sione 3:15; New International Version) Naʻe fekau ki he kau ʻIsilelí: “ʻE ʻikai te ke tauhi ʻi ho loto ʻa e fehiʻa ki ho tokoua.” (Livitiko 19:17) ʻOfa ke tau fakavave ke fakaleleiʻi ha palopalema pē ʻoku malanga hake ʻi hotau vahaʻá pea mo ha kaungātui, koeʻuhi ke ʻoua ʻe fakaʻauha ʻe he tāmate tangata ko Sētané ʻa ʻetau fāʻūtaha faka-Kalisitiané.—Luke 17:​3, 4.

Tuʻumaʻu ʻo Fakafepakiʻi ʻa e Tokotaha-Loi Tefitó

10, 11. Ko e hā kuo pau ke tau fai koeʻuhi ke tuʻumaʻu ai ʻo fakafepakiʻi ʻa e tokotaha-loi tefitó, ʻa Sētane?

¹⁰ Ko e Tēvoló ko ha tokotaha-loi. “Ka fai haʻane loi,” ko e lea ia ʻa Sīsuú, “ko ʻene fai pē ia hono tefitoʻi ʻulungāangá. He ko e toko taha faʻa loi ia. Pea ko e tamai ia ʻa e loi kotoa pē.” (Sione 8:​44, Kōsipeli ʻe Fā) Naʻe loi ʻa Sētane kia ʻIvi, lolotonga ia naʻe haʻu ʻa Sīsū ia ki he māmaní ke faifakamoʻoni ki he moʻoní. (Sione 18:37) Kapau ʻoku fiemaʻu ke tau tuʻumaʻu ʻo fakafepakiʻi ʻa e Tēvoló ʻi he tuʻunga ko e kau muimui ʻo Kalaisí, heʻikai lava ke tau ngāueʻaki ʻa e loí mo e kākaá. Kuo pau ke tau “lea moʻoni.” (Sakalaia 8:16; Efeso 4:25) Ko “Sihova, ʻa e ʻOtua moʻoniā” ʻokú ne tāpuakiʻi pē ʻa ʻene Kau Fakamoʻoni lea moʻoní. Ko e kau fulikivanú ʻoku ʻikai haʻanau totonu ke nau fakafofongaʻi ia.—Sāme 31:5; 50:16; Aisea 43:10.

¹¹ Kapau ʻoku tau koloaʻaki ʻa ʻetau tauʻatāina fakalaumālie mei he ngaahi loi fakasētané, te tau pipiki ai ki he lotu faka-Kalisitiané, ʻa e “hala ʻo e moʻoni.” (2 Pita 2:2; Sione 8:32) Ko e sino kakato  ʻo e ngaahi akonaki faka-Kalisitiané ʻoku faʻuʻaki ia “ae mooni oe ogoogolelei.” (Kaletia 2:​5, 14, PM) Ko hotau fakamoʻuí tonu ʻoku fakatuʻunga ia ʻi heʻetau “laka ʻi he moʻoni”—ʻo pipiki ki ai pea tuʻu mālohi ʻo fakafepakiʻi ʻa e ‘tamai ʻa e loí.’​—3 Sione 3, 4, 8.

Talitekeʻi ʻa e Tokotaha Tafoki Tuʻu-ki-Muʻa mei he Moʻoní

12, 13. ʻOku totonu ke fēfē ʻetau fakafeangai ki he kau tafoki mei he moʻoní?

¹² Ko e meʻamoʻui laumālie ʻa ia naʻe hoko ko e Tēvoló naʻá ne ʻi he moʻoní ʻi ha taimi. Ka “nae ikai [te ne] nofo mau i he mooni,” ko e lau ia ʻa Sīsuú, he “oku ikai ha mooni iate ia.” (Sione 8:​44, PM) Ko e tokotaha tafoki tuʻu-ki-muʻa ko eni mei he moʻoní kuó ne tuli ki ha ʻalunga ʻosi fakapapauʻi ʻo e fakafepaki ki he “ʻOtua moʻoniā.” Ko e kau Kalisitiane ʻe niʻihi ʻi he ʻuluaki senitulí naʻa nau tō ki he “tauhele ʻa e Tevolo,” ʻo ngalingali naʻa nau hoko ko e kau maʻukovia koeʻuhi ko hono takihalaʻi mo afeʻi mei he moʻoní. Ko ia naʻe ekinaki ai ʻa Paula ki hono kaungāngāue ko Tīmoté ke ne fakahinohinoʻi kinautolu ʻaki ʻa e anga-malū koeʻuhí ke nau lava ʻo fakaakeake fakalaumālie pea hoko ai ʻo ʻatā mei he tauhele ʻa Sētané. (2 Timote 2:​23-26) Ko e moʻoni, ʻoku lelei ʻaupito ange ke pipiki maʻu ki he moʻoní pea ʻoua ʻaupito ʻe hoko ʻo fakataueleʻi ʻe he ngaahi fakakaukau tafoki mei he moʻoní.

¹³ Koeʻuhi ko e fanongo ki he Tēvoló pea ʻikai siʻaki ʻene ngaahi loí, naʻe tafoki ai mei he moʻoní ʻa e ʻuluaki ongo meʻa fakaetangatá. Ko ia ai, ʻoku totonu leva ke tau fanongo ki he kau tafoki mei he moʻoní, lau ʻenau ʻū tohí, pe vakaiʻi ʻenau ngaahi Uepisaití ʻi he ʻInitanetí? Kapau ʻoku tau ʻofa ʻi he ʻOtuá mo e moʻoní, ʻe ʻikai te tau fai pehē. ʻOku ʻikai totonu ke tau fakaʻatā ʻa e kau tafoki mei he moʻoní ki hotau ngaahi ʻapí pe naʻa mo e lea fakafeʻiloaki kiate kinautolu, he ko e ngaahi tōʻonga peheé te ne ʻai ai kitautolu ke tau ‘kau ʻi heʻenau ngaahi ngaue koví.’ (2 Sione 9-11) ʻOfa ke ʻoua ʻaupito te tau tō ʻi he ngaahi kākā ʻa e Tēvoló ʻaki hono liʻaki ʻa e “hala ʻo e moʻoni” faka-Kalisitiané ke muimui ʻi he kau faiako loi ʻoku nau feinga ke “fakahu fufū mai ʻa e ngaahi akonaki he” pea feinga ke kākaaʻi kitautolu “ʻaki ʻa e ngaahi lea momoleʻolunga.”—2 Pita 2:​1-3.

14, 15. Ko e hā ʻa e fakatokanga naʻe ʻoange ʻe Paula ki he kau mātuʻa mei ʻEfesoó mo hono kaungāngāue ko Tīmoté?

¹⁴ Naʻe tala ʻe Paula ki he kau mātuʻa Kalisitiane mei ʻEfesoó: “Mou lamasi kimoutolu, mo e fanga sipi kotoa, ʻa ia kuo fakanofo kimoutolu ʻe he Laumālie Maʻoniʻoni ʻi honau lolotonga ko honau kau leʻo, koeʻuhi ke mou tauhi ʻa e Siasi ʻo e ʻOtua, ʻa ia naʻa ne fakatau ʻaki [ʻa e] taʻataʻa [ʻo hono ʻAló tonu]. He ʻoku ou ʻilo, ʻo ka hili ʻeku hokosi, ʻe hu atu ha fanga ulofi anga malohi, ʻa ia ʻe ʻikai te nau mamae ki he fanga sipi. ʻIo, naʻa mo kimoutolu ʻe tupu mei ai ha kau tangata ʻoku leaʻaki ʻa e ngaahi meʻa ʻoku ʻalu kehe, ke tohoaki ʻaki ʻa e kau ako ke muimui kiate kinautolu.” (Ngāue 20:​28-30) ʻI he faai atu ʻa e taimí, naʻe malanga hake ʻa e kau tafoki pehē mei he moʻoní ʻo nau “leaʻaki ʻa e ngaahi meʻa ʻoku ʻalu kehe.”

¹⁵ ʻI he 65 T.S. nai, naʻe ekinaki ai ʻa e ʻapositoló kia Tīmote ke ne “tofa totonu ʻa e folofola ʻo e moʻoni.” “Ka,” naʻe tohi ʻe Paula, “ke fakaʻehiʻehi mei he ngaahi koto lau [ʻoku maumauʻi ai ʻa e meʻa ʻoku māʻoniʻoní]; he ko e kakai ko ia ʻe fakautuutu ʻenau makehe mo e lotu: pea ko ʻenau lea te ne keina ʻo hange ha kainiloto. ʻOku ʻi he faʻahinga ko ia ʻa Aiminia mo Failito; ko e ongo meʻa ne leʻeia mei he moʻoni, heʻena pehe, ko e  meʻa ki he toetuʻu kuo hoko ia: pea ʻoku nau fakahinga ai ʻa e lotu ʻa e niʻihi.” Naʻe kamata ʻa e tafoki mei he moʻoní! “Ka neongo ia,” ko e tānaki mai ia ʻa Paulá, “ʻoku tuʻu pe ʻa e tuʻunga maʻumaʻuluta ʻa e ʻOtua.”—2 Timote 2:​15-19.

16. Neongo ʻa e ngaahi kākā ʻa e tokotaha tafoki tuʻu-ki-muʻa mei he moʻoní, ko e hā kuo tau mateaki ai ki he ʻOtuá mo ʻene Folofolá?

¹⁶ Kuo faʻa ngāueʻaki ʻe Sētane ʻa e kau tafoki mei he moʻoní ʻi ha feinga ke fakameleʻi ʻa e lotu moʻoní​—kae ʻikai lavameʻa. ʻI he taʻu 1868 nai, naʻe kamata ai ʻe Charles Taze Russell hano sivisiviʻi fakalelei ʻa e ngaahi tokāteline ʻa e ngaahi siasi ʻo e Puleʻanga-Haʻa-Kalisitiané kuo fuoloa hono talí pea ʻiloʻi ai ʻa e ngaahi liliuhalaʻi ʻo e Tohi Tapú. Ko Russell mo ha niʻihi kehe tokosiʻi ʻo e kau fekumi ki he moʻoní naʻa nau fokotuʻu ha kalasi ako Tohi Tapu ʻi Pittsburgh, Pennsylvania, U.S.A. ʻI he meimei taʻu ʻe 140 talu mei ai, kuo tupu ai ʻa e kau sevāniti ʻa Sihová ʻi he ʻilo mo e ʻofa ki he ʻOtuá mo ʻene Folofolá. Neongo ʻa e ngaahi kākā ʻa e tokotaha tafoki tuʻu-ki-muʻa mei he moʻoní, ko e tokanga fakalaumālie ʻa e kalasi tamaioʻeiki anga-tonu mo potó kuo tokoniʻi ai ʻa e kau Kalisitiane moʻoni ko ení ke nau mateaki ai pē kia Sihova mo ʻene Folofolá.​—Mātiu 24:45.

ʻOua ʻAupito ʻe Tuku ke Maʻu Koe ʻe he ʻEiki ʻo e Māmaní

17-19. Ko e hā ʻa e māmani ʻoku ʻi he nima ʻo e Tēvoló, pea ko e hā ʻoku totonu ai ke ʻoua te tau ʻofa aí?

¹⁷ Ko e toe founga ʻe taha ʻoku feinga ai ʻa Sētane ke fakataueleʻi kitautolú ko hono fakaʻaiʻai kitautolu ke tau ʻofa ki he māmani ko ení—ʻa e sōsaieti fakaetangata taʻemāʻoniʻoni kuo mavahe mei he ʻOtuá. Naʻe ui ʻe Sīsū ʻa e Tēvoló ko e “ʻeiki ʻo māmani” peá ne pehē: “Talaʻehai ʻoku ʻi ai haʻane momoʻi meʻa ʻiate au.” (Sione 14:30) ʻOfa ke ʻoua ʻaupito ʻe maʻu kitautolu ʻe Sētane! Ko e moʻoni, ʻoku tau ʻiloʻi, ko e “kotoa ʻo mamani ʻoku ʻi he nima ʻo e Fili” ko iá. (1 Sione 5:19) Ko ia naʻe lava ai ke tuʻuaki ange ʻe he Tēvoló kia Sīsū “ʻa e ngāhi puleʻanga kotoa pe ʻo mamani” ki ha tōʻonga ʻo e lotu tafoki mei he moʻoní tuʻo taha—ko e meʻa naʻe siʻaki mahino ʻe he ʻAlo ʻo e ʻOtuá. (Mātiu 4:​8-10) Ko e māmani ʻoku puleʻi ʻe Sētané ʻoku fehiʻa ia ki he kau muimui ʻo Kalaisí. (Sione 15:​18-21) Tāneʻineʻi ke fakatokanga mai ʻa e ʻapositolo ko Sioné ke ʻoua te tau ʻofa ki he māmaní!

¹⁸ Naʻe tohi ʻe Sione: “ʻOua te mou ʻofa ki mamani, ʻumaʻā ʻa e ngaahi meʻa ʻoku ʻi he mamani. Ka ʻofa ʻe ha taha ki mamani ʻoku ʻikai ʻiate ia ʻa e  ʻofa ki he Tamai. He ko e meʻa katoa ʻoku ʻi mamani, ʻa e holi ʻo e kakano, mo e holi ʻo e mata, mo e ʻafungi ʻo e moʻui, ʻoku ʻikai mei he Tamai ia, ka ʻoku mei mamani. Pea ʻoku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:​15-17) Kuo pau ke ʻoua te tau ʻofa ki he māmaní, he ko ʻene founga moʻuí ʻoku fakamānako ki he kakano angahalaʻiá pea ʻoku fehangahangai fakaʻaufuli ia mo e ngaahi tuʻunga ʻa Sihova ko e ʻOtuá.

¹⁹ Fēfē kapau ʻoku ʻi hotau lotó ʻa e ʻofa ki he māmani ko ení? Tau lotu leva ki he tokoni ʻa e ʻOtuá ke ikuʻiʻaki ʻa e ʻofa ko ení pea mo e ngaahi holi fakakakano ʻoku fekauʻaki mo iá. (Kaletia 5:​16-​21) Ko e moʻoni te tau feinga ke tauhi kitautolu ‘mei mamani ke taʻe hatau ʻila’ kapau ʻoku tau manatuʻi ko e ngaahi kongakau “laumalie kovi” ʻa e “kau bule oe mamani” ki he sōsaieti taʻemāʻoniʻoni ʻo e faʻahinga ʻo e tangatá.—Semisi 1:27; Efeso 6:​11, 12, PM; 2 Kolinito 4:4.

20. Ko e hā ʻoku lava ai ke pehē ʻoku ‘ʻikai ʻo māmāni’ kitautolú?

²⁰ ʻI he fekauʻaki mo ʻene kau ākongá, naʻe pehē ʻe Sīsū: “ʻOku ʻikai te nau ʻo māmāni, hange ko au, ʻoku ʻikai te u ʻo māmāni.” (Sione 17:16) Ko e kau Kalisitiane paní mo honau ngaahi kaungāfeohi fakatapuí ʻoku nau feinga ke maʻa fakaeʻulungāanga mo fakalaumālie ai pē, ʻo mavahe mei he māmani ko ení. (Sione 15:19; 17:​14; Semisi 4:4) Ko e māmani taʻemāʻoniʻoni ko ení ʻoku fehiʻa ʻiate kitautolu koeʻuhi ko ʻetau mavahe ai pē mei ai pea hoko ko e kau “malangaʻaki ʻa e maʻoniʻoni.” (2 Pita 2:5) Ko e moʻoni, ʻoku tau nofo ʻi he lotolotonga ʻo e sōsaieti fakaetangatá, ʻa ia ʻoku kau ki ai ʻa e kau feʻauaki, kau tono, kau fai fakamālohi, kau tauhi ʻaitoli, kau kaihaʻa, kau loi mo e kau faʻa konā. (1 Kolinito 5:​9-​11; 6:​9-​11; Fakahā 21:8) Ka ʻoku ʻikai te tau mānavaʻaki ʻa e “laumalie ʻoku ʻo mamani,” he ʻoku ʻikai puleʻi kitautolu ʻe he mālohi fakaueʻiloto angahalaʻia ko ení.—1 Kolinito 2:12.

ʻOua Naʻa Tuku ha Ava ki he Tēvoló

21, 22. ʻE lava fēfē ke ke ngāueʻaki ʻa e akonaki ʻa Paula ʻoku hiki ʻi he Efeso 4:​26, 27?

²¹ ʻI he ʻikai ueʻi ʻe he “laumalie ʻoku ʻo mamani,” ʻoku tataki kitautolu ʻe he laumālie ʻo e ʻOtuá, ʻa ia ʻokú ne fakatupu ʻiate kitautolu ʻa e ngaahi ʻulungāanga hangē ko e ʻofá mo e mapuleʻi-kitá. (Kaletia 5:​22, 23) ʻOku tokoniʻi kitautolu ʻe he ongo meʻá ni ki hono matuʻuaki ʻa e ngaahi ʻohofi ʻo ʻetau tuí ʻe he Tēvoló. ʻOkú ne loto ke tau hoko ʻo ‘tafunaki koeʻuhi pē ke fai ha kovi,’ ka ʻoku tokoniʻi kitautolu ʻe he laumālie ʻo e ʻOtuá ke “tukuange ʻa e ʻitá, pea liʻaki ʻa e lilí.” (Sāme 37:​8, NW) Ko e moʻoni, ʻoku tau hoko nai ʻi he taimi ʻe niʻihi ʻo ʻita ʻi he ʻuhinga lelei, ka ʻoku akonaki mai ʻa Paula kiate kitautolu: “ʻIta pe, kae ʻoua ʻe angahala ai: ʻoua ʻe tuku ke to ʻa e laʻa ʻoku mou kei mamahi; kaeʻumaʻā, ʻoua naʻa tuku ha ava ki he Tevolo.”—Efeso 4:​26, 27.

²² Ko ʻetau ʻitá ʻe lava ke iku ia ki he angahala kapau ʻoku tau nofo ai pē ʻi ha tuʻunga ʻita. Ko ʻetau maʻu ʻa e founga fakakaukau ko ení ʻe ʻoange ai ki he Tēvoló ha faingamālie ke ne pouaki ʻa e fepaki ʻi he fakatahaʻangá pe fakaʻaiʻai kitautolu ke tau kau ʻi he ngaahi ngāue koví. Ko ia ai, ʻoku fiemaʻu vave ke tau fakaleleiʻi ʻa e ngaahi fetōʻaki mo e niʻihi kehé ʻi ha founga fakaʻotua. (Livitiko 19:​17, 18; Mātiu 5:​23, 24; 18:​15, 16) Ko ia ai, tuku ke tataki kitautolu ʻe he laumālie ʻo e ʻOtuá, ngāueʻi ʻa e mapuleʻi-kitá pea ʻoua ʻaupito ʻe tuku naʻa mo e ʻita ʻi he ʻuhinga leleí ke iku atu ki he fakafili, loto-kovi mo e tāufehiʻa.

23. Ko e hā ʻa e ngaahi fehuʻi te tau lāulea ki ai ʻi he kupu hoko maí?

²³ Kuo tau lāulea ki he ngaahi anga ʻe niʻihi ʻo e Tēvoló ʻa ia ʻoku totonu ke ʻoua te tau faʻifaʻitaki ki ai. Ka ʻe fifili nai ʻa e kau lautohi ʻe niʻihi: ʻOku totonu ke tau manavahē kia Sētane? Ko e hā ʻokú ne pouaki ai ʻa hono fakatangaʻi ʻo e kau Kalisitiané? Pea ʻe lava fēfē ke tau fakaʻehiʻehi mei hono ikunaʻi ʻe he Tēvoló?

[Fakamatala ʻi lalo]

Ko e Hā Hoʻo Talí?

• Ko e hā ʻoku ʻikai ʻaupito totonu ai ke tau lauʻikovi loi ha tahá?

• ʻI he fekauʻaki mo e 1 Sione 3:​15, ʻe lava fēfē ke tau fakaʻehiʻehi mei he hoko ko e kau tāmate tangatá?

• ʻOku totonu ke fēfē ʻetau vakai ki he kau tafoki mei he moʻoní, pea ko e hā hono ʻuhingá?

• Ko e hā ʻoku ʻikai totonu ai ke tau ʻofa ki he māmaní?

[Fehuʻi ki he Ako]

[Fakatātā ʻi he peesi 23]

Heʻikai ʻaupito te tau fakaʻatā ʻa e Tēvoló ke ne fakaʻauha ʻetau fāʻūtaha faka-Kalisitiané

[Fakatātā ʻi he peesi 24]

Ko e hā naʻe ekinaki mai ai ʻa Sione ke ʻoua te tau ʻofa ki he māmaní?