ʻOkú Ke Hangē ha Fuʻu Lagani Auna?
ʻOkú Ke Hangē ha Fuʻu Lagani Auna?
ʻI HA kolo ʻi he tuʻa kolo ʻo Port Moresby, ʻi Pāpua Niu Kiní, naʻe foki mai ai ki ʻapi ha ongo faifekau mei heʻena ngāue fakamalangá. ʻI heʻena luelue maí, naʻá na sio ai ki ha fuʻu ʻakau fakaʻofoʻofa. “ʻOi, ko ha fuʻu lagani auna!” ko e lea ia ʻa e tangata matuʻotuʻá. ʻI he hanga hake ki he tangata naʻe kei siʻi angé, naʻá ne hoko atu: “Ko e hingoa ko iá ʻoku ʻuhingá ko e ‘fuʻu ʻakau fakataʻu.’ ʻI he ʻikai hangē ko e ʻuluʻakau lahi kehe ʻo e talopikí, ʻi he taʻu kotoa pē ʻoku ʻosi ai hono laú pea hangē ʻoku maté. Kae kehe, ʻi he taimi ʻoku hoko mai ai ʻa e ʻuhá, ʻoku moʻui hake ia, ʻo laku matala, pea toe hā ai ʻa hono fakaʻofoʻofá.”
ʻOku lava ke ako ha lēsoni mei he lagani auna, pe ʻōhaí, hangē ko ia ʻoku ui anga-maheniʻakí. Fakatatau ki he kau mataotao ʻe niʻihi, ʻoku kau ia ʻi he ngaahi ʻakau matala fakaʻofoʻofa taha ʻe nima ʻi he māmaní. Neongo ʻoku ʻosi ʻa hono matalá mo e laú lolotonga ʻa e faʻahitaʻu ʻafuá, ʻoku tuku tauhi ʻi he fuʻu ʻakaú ha tokonaki vai. Ko hono aká ʻoku mālohi pea ʻoku lava ke tupu takatakai ia ʻi he ngaahi maka ʻoku nofo loloto ʻi he lalo kelekelé. Fakafou ʻi he ʻuhingá ni, ʻokú ne fokotuʻu maʻu ai ia ʻi he ngaahi matangi mālohí. ʻI hono fakanounoú, ʻoku tupu ʻāfaʻafa ia ʻi heʻene ngāueleleiʻaki ʻa e ngaahi tuʻunga faingataʻá.
ʻOku tau ʻi ha ngaahi tuʻunga nai ʻa ia ʻoku ʻahiʻahiʻi ai ʻa e tuʻunga ʻo ʻetau tuí. Ko e hā te ne tokoniʻi kitautolu ke kātakí? ʻI he hangē ko e lagani auna, ʻe lava ke tau inu pea tuku tauhi ʻa e vai foaki-moʻui ʻo e Folofola ʻa e ʻOtuá. ʻOku totonu foki ke tau toe pipiki maʻu ki ‘hotau Makatuʻú,’ ʻa Sihova, pea pehē ki heʻene kautahá. (2 Samiuela 22:3) Ko e moʻoni, ko e lagani auna ko ha fakamanatu mahuʻinga ia naʻa mo e ʻi ha ʻātakai faingataʻa, ʻe lava ke tau tauhi maʻu ʻetau mālohi fakalaumālié mo e fakaʻofoʻofá kapau ʻoku tau ngāueʻaongaʻaki ʻa e ngaahi tokonaki ʻoku ʻai ʻe Sihova ke ala maʻú. ʻI he fai peheé, te tau “hokosi ʻa e ngaahi talaʻofa” kuó ne faí, ʻo kau ai ʻa e talaʻofa ʻo e moʻui taʻengatá.—Hepelu 6:12; Fakahā 21:4.