Tuʻumālie Moʻoni ʻi he Māmani Foʻou ʻa e ʻOtuá

KO Tēvitá, a ko ha husepāniti ia mo ha tamai Kalisitiane, ʻa ia naʻá ne hiki ki he ʻIunaite Seteté, ʻi he tuipau naʻá ne fai ʻa e meʻa totonú. Neongo naʻe ʻikai te ne saiʻia ʻi he liʻaki hono uaifí mo e fānaú, naʻá ne ongoʻi fakapapauʻi te ne lava ʻo maʻu ha moʻui lelei ange maʻa kinautolu kotoa ʻo kapau pē naʻá ne maʻu ha paʻanga lahi ange. Ko ia naʻá ne tali ha fakaafe mei he ngaahi kāinga ʻi Niu ʻIoké pea naʻe vave ʻene maʻu ai ha ngāué.

kehe, ʻi he hili mei ai ha ngaahi māhina, naʻe kamata ke mōlia atu ʻa e vakai fakatuʻamelie ʻa Tēvitá. Naʻe tātātaha ke ne maʻu ha taimi ki he ngaahi ngāue fakalaumālié. ʻI he tuʻunga ia ʻe taha, naʻe mei mole meiate ia ʻa e tui ki he ʻOtuá. Ko e taimi ko ē naʻá ne tō ai ki ha ʻahiʻahi fakaeʻulungāangá naʻe iku ʻo ne toki ʻiloʻi ai ʻa e moʻoni ʻo e tuʻunga ʻokú ne ʻi aí. Ko ʻene tokangataha ki he tuʻumālie fakamatelié naʻe faai pē ʻo taki mamaʻo atu ai ia mei he meʻa kotoa naʻe mahuʻinga moʻoni kiate iá. Naʻe pau ke ne fai ha ngaahi liliu.

ʻI he hangē ko Tēvitá, ʻoku hiki ʻa e tokolahi mei he ngaahi fonua tupuʻanga masivá ʻi he taʻu  taki taha, ʻi he ʻamanaki ke fakaleleiʻi ʻa honau tuʻunga fakaʻekonōmiká. Ka neongo ia, ʻoku faʻa hoko ai ʻo nau tofanga ʻi ha mole lahi fakalaumālie. Kuo fifili ʻa e niʻihi, ‘ʻE lava ha Kalisitiane ʻo tuli ki he ngaahi koloa fakamatelié pea toe hoko foki ʻo fakatupu koloa ki he ʻOtuá?’ ʻOku pehē ʻe he kau faʻu-tohi mo e kau malanga ʻiloá ʻoku malava eni. Kae hangē ko ia kuo ako ʻe Tēvita mo e niʻihi kehé, ko hono aʻusia ʻa e taha ʻo ʻikai mole ai ʻa e tahá ʻe lava ke hoko ia ʻo faingataʻa.​—Luke 18:24.

Ko e Paʻangá ʻOku ʻIkai Kovi

Ko hono moʻoní, ko e paʻangá ko ha meʻa ia naʻe ʻiloʻi ʻe he tangatá. ʻI he hangē ko e ngaahi meʻa kehe lahi naʻe ʻiloʻí, ʻoku ʻikai ke hala pe kovi ia ʻiate ia pē. Ko hono moʻoní, ko ha meʻa fakafetongi koloa pē ia. Ko ia ai, ʻi hono ngāueʻaki fakaleleí, ʻe lava ke ne fakahoko ai ha taumuʻa lelei. Hangē ko ení, ʻoku fakahaaʻi ʻe he Tohi Tapú “ko e paʻanga ko e maluʻanga,” tautefito ʻi he ngaahi palopalema ko ia ʻoku felāveʻi mo e masivá. (Koheleti 7:​12) ʻOku hā ngali ki he niʻihi ia, “oku aoga ae baaga ki he mea kotoabe.”​—Koheleti 10:​19, PM.

ʻOku fakahalaiaʻi ʻe he Tohi Tapú ʻa e fakapikopikó pea fakalototoʻaʻi ʻa e ngāue mālohí. Kuo pau ke tau tokonaki maʻa hotau fāmilí tonu, pea kapau ʻoku tau maʻu ʻo kiʻi hulu, ʻoku tau maʻu ai ha “meʻa ke foaki ki he masiva.” (Efeso 4:​28; 1 Timote 5:8) Tānaki atu ki ai, ʻi he ʻikai ke pouaki ʻa e fakaʻikaiʻi-kitá, ʻoku fakaʻaiʻai kitautolu ʻe he Tohi Tapú ke tau fiefia ʻi heʻetau koloá. ʻOku tala mai ai ke tau “tali [hotau] ʻinasi” pea ke tau fiefia ʻi he ngaahi fua ʻo ʻetau ngāué. (Koheleti 5:​18-​20) Ko hono moʻoní, ʻoku ʻi ai ʻa e ngaahi faʻifaʻitakiʻanga lahi ʻi he Tohi Tapú ʻo e kau tangata mo e kau fefine faitōnunga ʻa ia naʻa nau koloaʻia.

Kau Tangata Faitōnunga Naʻa Nau Koloaʻia

Ko ʻĒpalahame, ko ha sevāniti faitōnunga ia ʻa e ʻOtuá, naʻá ne maʻu ha ngaahi tākanga mo e tānekinga ʻo e fanga manu tokolahi, siliva mo e koula lahi ʻaupito pea mo ha kau nofoʻanga tokolahi ʻaupito ʻo e kau sevāniti naʻe lauingeau honau tokolahí. (Senesi 12:5; 13:​2, 6, 7) Naʻe toe koloaʻia lahi ʻaupito foki mo Siope māʻoniʻoni​—ʻi he fanga manú, kau sevānití, koulá mo e silivá. (Siope 1:3; 42:11, 12) Ko e ongo tangatá ni ne na tuʻumālie naʻa mo e ʻi he ngaahi tuʻunga ʻo e ʻaho ní, ka naʻá na toe fakatupu koloa foki ki he ʻOtuá.

ʻOku ui ʻe he ʻapositolo ko Paulá ʻa ʻĒpalahame “ko e tamai ʻanautolu kotoa pe ʻoku tui.” Naʻe ʻikai ke nima-maʻu pe pipiki tōtuʻa ʻa ʻĒpalahame ki he meʻa naʻá ne maʻú. (Loma 4:​11; Senesi 13:9; 18:​1-18) ʻI he tuʻunga meimei tatau, naʻe fakamatalaʻi tonu ʻe he ʻOtuá ʻa Siope naʻá ne “haohaoa mo angatonu.” (Siope 1:8) Naʻá ne mateuteu maʻu pē ke tokoniʻi ʻa e masivá mo e faingataʻaʻiá. (Siope 29:​12-​16) Ko ʻĒpalahame mo Siope fakatouʻosi naʻá na falala ki he ʻOtuá ʻo ʻikai ki heʻena koloá.​—Senesi 14:​22-​24; Siope 1:​21, 22; Loma 4:​9-​12.

Ko Tuʻi Solomone ko ha faʻifaʻitakiʻanga ia ʻe taha. ʻI hono tuʻunga ko e ʻea ki he taloni ʻa e ʻOtuá ʻi Selusalemá, naʻe faitāpuekina ʻa Solomone ʻo ʻikai ʻaki ʻa e poto fakaʻotuá pē kae toe pehē foki ki he koloa mo e lāngilangi lahi. (1 Tuʻi 3:​4-​14) Naʻá ne faitōnunga ʻi he konga lahi taha ʻo ʻene  moʻuí. Kae kehe, ʻi hono ngaahi taʻu ki muí, “naʻe ʻikai haohaoa [ʻa e loto ʻo Solomoné] ʻi heʻene fakafeangai kia Sihova.” (1 Tuʻi 11:​1-8) Ko hono moʻoní, ko ʻene hokosia fakamamahí ʻoku fakatātaaʻi ai ʻa e niʻihi ʻo e ngaahi tōʻanga anga-maheni ʻo e tuʻumālie fakamatelié. Fakakaukau atu ki ha niʻihi.

Ngaahi Tōʻanga ʻo e Tuʻumālié

Ko e fakatuʻutāmaki mafatukituki tahá ʻa e hoko ʻo ʻofa ʻi he paʻangá pea mo e meʻa ʻe lava ke ne fakataú. ʻOku fakatupu ʻe he koloaʻiá ʻi he niʻihi ha holi ʻa ia ʻe ʻikai ʻaupito lava ke fakafiemālieʻi. ʻI he konga ki muʻa ʻo ʻene pulé, naʻe fakatokangaʻi ai ʻe Solomone ʻa e hehema ko ení ʻi he niʻihi kehé. Naʻá ne tohi: “Ko ia oku manako [pe ʻofa] ki he siliva e ikai ke ne fiemalie i he siliva; be ko ia oku manako ki he koloa i he tubulaki o ene mea: koe vaiga foki eni.” (Koheleti 5:​10, PM) Naʻe fakatokanga ki mui mai fakatouʻosi ʻa Sīsū mo Paula ki he kau Kalisitiané ʻo kau ki he ʻofa fakatauele ko ení.​—Maake 4:​18, 19; 2 Timote 3:2.

ʻI he hoko ʻa e paʻangá ko ʻetau mahuʻingaʻia tefitó ia ʻo ʻikai ha meʻangāue pē ia ke fakahoko ʻaki ha meʻá, ʻoku tau hoko ai ʻo tōngofua ki he faʻahinga kotoa pē ʻo e ngaahi ʻahiʻahi fakaeʻulungāangá, ʻo kau ai ʻa e loí, kaihaʻá mo e lavakí. Ko Siutasi ʻIsikaliote, ʻa e taha ʻo e kau ʻapositolo ʻa Kalaisí, naʻá ne lavakiʻi ʻa hono ʻeikí ki he konga siliva pē ʻe 30. (Maake 14:11; Sione 12:6) ʻI heʻene hoko ʻo tōtuʻá, kuo aʻu ʻo hiki ai ʻe he niʻihi ia ʻa ʻenau līʻoa kakató mei he ʻOtuá ki he paʻangá. (1 Timote 6:​10) ʻOku totonu ai ki he kau Kalisitiané ke nau feinga maʻu pē ke hoko ʻo faitotonu ʻi he fekauʻaki mo ʻenau fakaueʻiloto moʻoni ki hono fakatupu ha paʻanga lahi angé.​—Hepelu 13:5.

Ko e tuli ki he koloaʻiá ʻe toe ʻomai ai ʻa e ngaahi fakatuʻutāmaki ʻa ia ʻoku olopoto ange. ʻUluakí, ko ha hulu ʻo e koloá ʻoku faʻa hoko ai ke ne fakaʻaiʻai ʻa e falala kia kitá. Naʻe fakakau ʻe Sīsū ʻa e meʻá ni ʻi heʻene lave ki he “mālohi fakahala ʻo e koloá.” (Mātiu 13:​22, NW) Naʻe fakatokanga meimei tatau ʻa e tokotaha-tohi Tohi Tapu ko Sēmisí ki he kau Kalisitiané ke ʻoua ʻe fakangaloʻi ʻa e ʻOtuá naʻa mo e ʻi he taimi ʻoku nau fai ai ʻa ʻenau ngaahi palani fakapisinisí. (Semisi 4:​13-​16) Koeʻuhi ʻoku hā ngali ke ʻomai kia kitautolu ʻe he paʻangá ha tuʻunga ʻo e tauʻatāiná, ki he faʻahinga ʻoku nau maʻu iá, ʻoku ʻi ai maʻu pē ha fakatuʻutāmaki ʻo e falala ki heʻenau paʻangá kae ʻikai ki he ʻOtuá.​—Palovepi 30:​7-9; Ngāue 8:​18-​24.

Ko hono uá, ʻi he hangē ko Tēvitá, ʻa ia naʻe lave ki ai ki muʻá, naʻá ne ʻiloʻi ko e tuli ki he tuʻumālié ʻoku faʻa keina ai ʻa e taimi mo e ivi ʻo ha tokotaha ʻo tohoakiʻi māmālie atu ai ia mei he ngaahi ngāue fakalaumālié. (Luke 12:​13-​21) Ki he koloaʻiá, ʻoku toe ʻi ai ha ʻahiʻahi hokohoko ke nau ngāueʻaki tefito ʻa e meʻa ʻoku nau maʻú ʻi he ngaahi ngāue fakafiefiá pe ngaahi ngāue fakafoʻituituí.

ʻE lava ke taku nai ʻi ha tuʻunga ʻa e tō fakalaumālie ʻa Solomoné ki heʻene fakaʻatā ko ia ʻa e moʻui tuʻumālié ke ne fakavaivaiʻi ʻene fakakaukau leleí? (Luke 21:34) Naʻá ne ʻiloʻi ʻa hono tapui fakahangatonu ʻe he ʻOtuá ʻa e fehokotaki fakaemali mo e ngaahi puleʻanga mulí. Neongo ia, naʻe faai atu pē ʻo ne fakatahatahaʻi ha kau sinifu ko ha kau fefine nai ʻe toko taha afe. (Teutalonome 7:3) ʻI he loto-vēkeveke ke fakahōhōlotoʻi ʻa hono ngaahi uaifi mulí, naʻá ne feingaʻi ha faʻahinga fokotuʻutuʻu lotu tuifio ke nau maʻu ʻaonga mei ai. Hangē ko ia naʻe fakahaaʻi ki muʻá, naʻe tafoki māmālie ʻa e loto ʻo Solomoné meia Sihova.

ʻOku hā mahino, ko e ongo fakatātā ko ení ʻoku fakahaaʻi ai ʻa e moʻoni ʻo e akonaki ʻa Sīsuú: “ʻOku ʻikai te mou lava ke eikiʻaki ʻa e ʻOtua mo Koloa fakatouʻosi.” (Mātiu 6:​24) Ko ia ai, ʻe lava mo e ngaahi faingataʻa fakaʻekonōmika ʻoku fetaulaki mo e tokolahi he taimi ní? Ko e toe meʻa mahuʻinga angé, ko e hā ʻa e ʻamanaki ʻoku ʻi ai ki ha moʻui lelei ange ʻi he kahaʻú?

Tuʻumālie Moʻoni ʻi he Kahaʻú

ʻI he ʻikai hangē ko e ongo pēteliake ko ʻĒpalahame mo Siopé pea mo e puleʻanga ʻIsilelí, ʻoku maʻu ʻe he kau muimui ʻo Sīsuú ʻa e fekau ke “ngaohi ʻa e ngāhi kakai kotoa pe ko [e] kau ako.” (Mātiu 28:​19, 20) Ko hono fakahoko ʻa e fekau ko iá ʻoku fiemaʻu ki ai ʻa e taimi mo e feinga ʻa ia naʻe mei ngāueʻaki nai ia ʻi he ngaahi ngāue fakamāmaní. Ko ia ai, ko e kī ki he lavameʻá, ko hono fai ʻa e meʻa naʻe tala mai ʻe Sīsū ke tau faí: “Ka mou kumi muʻa ki hono puleʻanga [ʻo e ʻOtuá], mo e maʻoniʻoni aʻana, pea ʻe ʻatu mo ia foki ʻa e ngāhi meʻa ko ia kotoa.”​—Mātiu 6:​33.

Hili ʻa e meimei mole hono fāmilí mo hono tuʻunga fakalaumālié, naʻe faifai atu pē ʻo toe foki ʻa e moʻui ʻa Tēvitá ki he hala totonú. Hangē ko ia naʻe talaʻofaʻaki ʻe Sīsuú, ʻi he toe kamata ke ʻai ʻe Tēvita ʻa e ako Tohi Tapú, lotú mo e ngāue fakafaifekaú ke muʻomuʻa ʻi heʻene moʻuí, naʻe kamata  ke ngaʻunu ʻa e ngaahi meʻa kehé ʻi he tuʻunga totonú. Ko hono vahaʻangatae mo hono uaifí mo e fānaú naʻe toe fakafoʻou māmālie. Naʻe toe foki mai ʻa ʻene fiefiá mo e fiemālié. ʻOkú ne kei ngāue mālohi pē. Naʻe ʻikai ke liliu ʻa ʻene moʻuí mei he masivá ki he koloaʻiá. Ka neongo iá, mei heʻene hokosia fakamamahí, naʻá ne ako ai ha ngaahi lēsoni mahuʻinga.

Kuo toe fakakaukau fakalelei ʻa Tēvita ʻo kau ki he fakapotopoto ʻo e hiki ki he ʻIunaite Seteté, pea kuó ne fakapapau ke ʻoua ʻaupito naʻá ne toe fakaʻatā ʻa e paʻangá ke ne puleʻi ʻa e ngaahi fili ʻokú ne faí. ʻOkú ne ʻiloʻi he taimí ni ko e ngaahi meʻa mahuʻinga taha ʻi he moʻuí​—ko ha fāmili ʻofa, ngaahi kaumeʻa lelei pea mo ha vahaʻangatae mo e ʻOtuá​—ʻe ʻikai lava ke maʻu ia ʻaki ʻa e paʻangá. (Palovepi 17:17; 24:27; Aisea 55:​1, 2) Ko e moʻoni, ʻoku mahuʻinga mamaʻo ange ʻa e anga-tonu fakaeʻulungāangá ia ʻi he koloa fakamatelié. (Palovepi 19:1; 22:1) Fakataha mo hono fāmilí, kuo fakapapauʻi ʻe Tēvita ke ne tauhi ke muʻomuʻa ʻa e ngaahi meʻa ʻoku muʻomuʻá.​—Filipai 1:​10.

Ko e ngaahi feinga ʻa e tangatá ke faʻu ha sōsaieti tuʻumālie moʻoni kae kei ʻulungāanga tāú kuo toutou taʻemalava ia. Kae kehe, kuo talaʻofa ʻe he ʻOtuá ʻe tokonaki ʻe hono Puleʻangá ʻa e ngaahi meʻa fakamatelie mo fakalaumālie hulu fau ʻa ia ʻoku tau fiemaʻú koeʻuhi ke tau lava ʻo moʻui fiefia ai. (Sāme 72:16; Aisea 65:​21-​23) Naʻe akoʻi ʻe Sīsū ko e tuʻumālie moʻoní ʻoku kamata ia ʻi he tuʻunga fakalaumālié. (Mātiu 5:3) Ko ia tatau ai pē pe ʻoku tau tuʻumālie pe masiva fakamatelie, ko hono fakamuʻomuʻa he taimí ni ʻa e ngaahi meʻa fakalaumālié ʻa e founga lelei taha ʻe lava ʻe ha taha pē ʻo kitautolu ʻo teuteu ai ki he māmani foʻou ʻa e ʻOtuá ʻi he kahaʻu vave maí ni. (1 Timote 6:​17-​19) Ko e māmani ko iá ʻe hoko fakatouʻosi ia ko ha sōsaieti tuʻumālie fakamatelie mo fakalaumālie moʻoni.

[Fakamatala ʻi lalo]

[Fakatātā ʻi he peesi 5]

Naʻe falala ʻa Siope ki he ʻOtuá, ʻo ʻikai ki heʻene koloá

[Fakatātā ʻi he peesi 7]

Ko e ngaahi meʻa mahuʻinga taha ʻi he moʻuí ʻe ʻikai lava ke maʻu ia ʻaki ʻa e paʻangá