Fakafiefia Lelei ʻOku Fakaivifoʻoú
Fakafiefia Lelei ʻOku Fakaivifoʻoú
“Pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pe ke ongoongolelei ai ʻa e ʻOtua.”—1 KOLINITO 10:31.
1, 2. Ko e hā ke vakai nai ai ki he ngaahi fakafiefiá ko ha “meʻa foaki ia ʻa e ʻOtua,” ka ko e hā ʻa e fakatokanga fakahangatonu ʻoku ʻomai ʻe he Tohi Tapú?
ʻOKU fakanatula pē ke tau loto ke kau ʻi ha ngaahi meʻa ʻokú ne ʻomai kiate kitautolu ha fiefia. Ko hotau ʻOtua fiefiá, ʻa Sihova, ʻokú ne fiemaʻu kitautolu ke tau fiefia ʻi he moʻuí, pea ʻokú ne tokonaki mai ʻa e ngaahi tokonaki lahi fau ke ʻai ke malava ia. (1 Timote 1:11; 6:17) Naʻe tohi ʻe Tuʻi Solomone poto: “Kuo u ʻilo ʻoku ʻikai ha lelei . . . ka ke te fiefia . . . ko e kai mo inu ʻa e tangata kotoa pe, mo ʻene ʻilo lelei ʻi heʻene ngaahi ngaue kehekehe, ko e meʻa foaki ia ʻa e ʻOtua.”—Koheleti 3:12, 13.
2 Ko e fiefia pehē ʻa ha taha ʻi haʻane kiʻi tuʻu hifo ʻo fakakaukauloto atu ki he ngāue lelei kuo lavá ko e meʻa fakaivifoʻou moʻoni, tautefito ʻi he feohi fiefia mo e fāmilí pe ngaahi kaumeʻá. ʻOku ʻi ai ʻa e vakai totonu nai ki he fiefia peheé ko ha “meʻa foaki ia ʻa e ʻOtua.” Ko e moʻoni, ko e tokonaki lahi fau ko ia ʻa e Tokotaha-Fakatupú ʻoku ʻikai ke fakaʻatā ai kitautolu ia ke tau kau ʻi ha paati taʻemapuleʻi. ʻOku fakahalaʻi ʻe he Tohi Tapú ʻa e konaá, kai fakaputá mo e ʻulungāanga taʻetāú, ʻo fakatokanga mai ko e faʻahinga ʻoku nau fai ʻa e ngaahi meʻa peheé “ʻe ʻikai hanau tofiʻa ʻi he Puleʻanga ʻo e ʻOtua.”—1 Kolinito 6:9, 10; Palovepi 23:20, 21; 1 Pita 4:1-4.
3. Ko e hā te ne tokoniʻi kitautolu ke tau nofoʻaki ʻāʻā fakalaumālie pea ke manatuʻi maʻu pē ʻa e ʻaho lahi ʻo Sihová?
3 ʻI he ngaahi ʻaho fakaʻosi faingataʻá ni, ʻa ia naʻe ʻikai ʻaupito pehē ki muʻá, ʻoku fehangahangai ʻa e kau Kalisitiané mo e pole ʻo e moʻui fakapotopoto ʻi ha māmani fakameleʻi ʻo ʻikai ohi ʻa hono ngaahi tōʻongá. (Sione 17:15, 16) Hangē ko ia naʻe tomuʻa talá, kuo hoko e kakai ʻo e toʻutangata he ʻaho ní ko e “kau ʻofa ki he malie ʻo ʻikai ʻofa ki he ʻOtua” ʻo aʻu ki he tuʻunga ko e “ʻikai te nau ʻalo ʻiloa” ʻa e fakamoʻoni ko e “mamahi lahi” ʻoku ofí ni ʻaupito. (2 Timote 3:4, 5; Mātiu 24:21, 37-39) Naʻe fakatokanga ʻa Sīsū ki hono kau muimuí: “Mou lamasi kimoutolu, naʻa ʻiloange ʻe mafatukituki homou loto, ko e meʻa ʻi he faʻa kai, mo e faʻa inu, mo e faʻa lotomoʻua ki he moʻui ni, pea lapasi kimoutolu ʻe he ʻaho ko ia ʻo hangē ko ha hele puna.” (Luke 21:34, 35) ʻI he tuʻunga ko e kau sevāniti ʻa e ʻOtuá, ʻoku tau fakapapauʻi ke tokanga ki he fakatokanga ʻa Sīsuú. ʻI he ʻikai ke hangē ko e faʻahinga ʻi he māmani anga-taʻefakaʻotua ʻoku takatakai ʻiate kitautolú, ʻoku tau feinga ke tau nofoʻaki ʻāʻā fakalaumālie pea ke manatuʻi maʻu pē ʻa e ʻaho lahi ʻo Sihová.—Sefanaia 3:8; Luke 21:36.
4. (a) Ko e hā ʻoku faingataʻa ai ke maʻu ʻa e fakafiefia ʻoku ala talí? (e) Ko e hā ʻa e akonaki ʻoku maʻu ʻi he Efeso 5:15, 16 ʻa ia ʻoku tau fiemaʻu ke ngāueʻakí?
4 ʻOku ʻikai faingofua ʻa e fakamamaʻo mei he ngaahi tōʻonga fakameleʻi ʻa e māmaní, koeʻuhi kuo ʻai kinautolu ʻe he Tēvoló ke mātuʻaki manakoa mo maʻungofua. ʻOku faingataʻa tautefito ʻi he taimi ʻoku tau kumi ai ki he fakafiefiá. Ko e lahi taha ʻo e meʻa ʻoku ʻomai ʻe he māmaní ʻoku faʻufaʻu ia ke fakamānako ki he “holi fakakakano.” (1 Pita 2:11) ʻOku ala maʻu ʻa e fakafiefia fakatupu maumaú ia ʻi he ngaahi feituʻu kakaí, ka ʻoku malava ke toe hūhū mai ia ki he tuʻunga fakapulipuli ʻo e ʻapí fakafou ʻi he pepa, TV, ko e ʻInitanetí mo e ngaahi vitioó. Ko ia ai, ʻoku akonaki fakapotopoto mai ʻa e Folofola ʻa e ʻOtuá ki he kau Kalisitiané: “Mou hanganaki tokanga lahi ki he anga hoʻomou ʻaʻevá ke ʻoua te mou taʻefakapotopoto ai ka ke mou hoko ko e faʻahinga ʻoku fakapotopoto ʻo fakatau mai ʻa e taimi faingamālié maʻa moutolu, koeʻuhi ʻoku kovi ʻa e ngaahi ʻahó.” (Efeso 5:15, 16, NW) Ko ʻetau muimui ofi pē ki he akonakí ni ʻe toki malava ai ke tau fakapapauʻi heʻikai ke hanga ʻe he fakafiefia taʻetāú ʻo fakataueleʻi kitautolu, keina kitautolu, ʻio, naʻa mo fakaʻauha hotau vahaʻangatae mo Sihová, ʻo iku ai ki hotau fakaʻauha!—Semisi 1:14, 15.
5. Ko e hā te tau maʻu mei ai hotau fakaivifoʻou lahi tahá?
5 Koeʻuhi ʻoku moʻui ʻa e kau Kalisitiané ʻi he ngaahi moʻui femoʻumoʻuekina, ʻoku nau ongoʻi lelei ʻa e fiemaʻu ko ia ha taimi ke fiefia ai ʻi ha ngaahi fakafiefia. Ko hono moʻoní, ʻoku pehē ʻe he Koheleti 3:4 ʻoku ʻi ai “e ʻaho ke kata” mo e “ʻaho ke meʻe.” Ko ia ʻoku ʻikai ke lau ʻe he Tohi Tapú ia ʻa e fakafiefiá ko ha maumau taimi. Ka ʻoku totonu ke fakaivifoʻou kitautolu ʻe he fakafiefiá, ʻo ʻikai ko haʻane maumauʻi hotau tuʻunga fakalaumālié pe halalotoʻapi ia ʻi he ngaahi ngāue fakalaumālié. ʻOku ʻiloʻi ʻe he kau Kalisitiane matuʻotuʻá mei heʻenau taukeí ʻoku lahi ange ʻa e fiefia ʻoku maʻu mei he foaki atú. ʻOku nau ʻai ʻa hono fai ʻa e finangalo ʻo Sihová ko e muʻomuʻa taha ia ʻi heʻenau moʻuí pea maʻu ʻa e ‘fakaivifoʻou [moʻoni] ki honau soulú’ ʻi hono tali ʻa e ʻioke anga-ʻofa ʻa Sīsuú.—Mātiu 11:29, 30, NW; Ngāue 20:35.
Ko Hono Fili ʻa e Fakafiefia Totonú
6, 7. Ko e hā ʻoku malava ke ne tokoniʻi koe ke ke fili pe ko fē ʻa e fakafiefia ʻoku totonú pe taʻetotonú?
6 ʻE lava fēfē ke tau fakapapauʻi ha faʻahinga pau ʻo e fakafiefiá ʻoku totonu ki ha Kalisitiané? ʻOku tokonaki ʻe he ngaahi mātuʻá ʻa e tataki ki heʻenau fānaú, pea ʻoku tokoni ʻa e kau mātuʻá ʻi hono fiemaʻú. Ka ko hono moʻoní, ʻoku ʻikai totonu ki he niʻihi kehé ke nau tala mai kiate kitautolu ʻo pehē ko ha faʻahinga pau ʻo e tohí, faivá, keimí, hulá pe hivá ʻoku ʻikai totonu ia. Naʻe pehē ʻe Paula ko e “kakai matuʻotuʻá, . . . fakafou ʻi hono ngāueʻakí ko ʻenau ngaahi mafai fakaefakakaukaú kuo akoʻi ai ke nau fakafaikehekeheʻi fakatouʻosi ʻa e tonú mo e halá.” (Hepelu 5:14, NW; 1 Kolinito 14:20) ʻOku fokotuʻu mai ʻe he Tohi Tapú ʻa e ngaahi tefitoʻi moʻoni tataki. Ko ho konisēnisí, ʻi hono akoʻi ʻe he Folofola ʻa e ʻOtuá, te ne tokoniʻi koe kapau te ke fakafanongo ki ai.—1 Timote 1:19.
7 Naʻe pehē ʻe Sīsū “ko hono fua ʻoku ʻilonga ai ʻa e ʻakau.” (Mātiu 12:33) Kapau ʻoku ʻomai ʻe ha tuli ki he fakafiefiá ʻa e fua kovi ko ha hehema ki he fakamālohí, ʻulungāanga taʻetāú pe fakahaʻele faʻahikehé, ʻoku totonu ke siʻaki ia. ʻOku toe taʻetotonu ia kapau ʻoku fakatuʻutāmaki ki heʻete moʻuí pe tuʻunga moʻuileleí, kapau ʻokú ne fakatupunga ha ngaahi faingataʻa fakaʻekonōmika pe fakalotosiʻi, pe kapau ʻokú ne fakatupunga ʻa e niʻihi kehé ke tūkia. Naʻe fakatokanga mai ʻa e ʻapositolo ko Paulá kapau ʻoku tau fakalaveaʻi ʻa e konisēnisi ʻo hotau tokouá, ʻoku tau faiangahala. Naʻe tohi ʻe Paula: “Ko hoʻomou fai angahala pehe ki homou ngaahi tokoua lotu, mo hoʻomou ʻai ke lavea honau ngaahi konisenisi ʻoku vaivai, ko hoʻomou fai angahala ia kia Kalaisi. ʻAua, pea kapau ko e meʻakai pe ia ʻa ia ʻoku fakahingaki siʻoku tokoua, ʻa, ʻe ʻikai ʻaupito te u toe kai kakano ʻo lauikuonga, ke ʻoua naʻa ku fakahingaki siʻoku tokoua.”—1 Kolinito 8:12, 13.
8. Ko e hā ʻa e ngaahi fakatuʻutāmaki ʻoku ʻi ai ʻi hono ngāueʻaki ʻa e ngaahi keimi mo e ngaahi vitiō fakaʻilekitulōniká?
8 ʻOku fonu ngutungutu ʻa e ngaahi falekoloá ʻi he ngaahi keimi mo e ngaahi vitiō fakaʻilekitulōniká. ʻOku ʻomai nai ʻe he niʻihi ha ngaahi keimi fakaoli mo e vaʻinga ʻoku ʻikai fakatupu maumau, ka ko e fakafiefia peheé ʻokú ne fakaeʻa fakautuutu mai ʻe ia ʻa e meʻa ʻoku fakahalaʻi ʻe he Tohi Tapú. Ko hono moʻoní ʻoku ʻikai pē ko ha meʻa fakaoli totonu ia kapau ʻoku fiemaʻu mai ʻe ha keimi ʻa hono kau vaʻingá ke nau fakalavea mo tāmate pe tōʻonga ʻi ha founga mātuʻaki taʻetaau! ʻOku fehiʻa ʻa Sihova ʻi he faʻahinga ʻoku nau “ʻofa ki he fakamalohi.” (Sāme 11:5; Palovepi 3:31; Kolose 3:5, 6) Pea kapau ʻoku hanga ʻe ha vaʻinga ʻi ha keimí ʻo pouaki ʻiate koe ʻa e mānumanú pe fakaaoaó, ʻo ʻai koe ke ke hōloa fakaeongo, pe fakamoleki ai ʻa e taimi mahuʻingá, fakatokangaʻi leva ʻa e maumau fakalaumālie ʻokú ne fakatupungá pea fai fakavavevave ha ngaahi fakatonutonu.—Mātiu 18:8, 9.
Ko Hono Fakahoko ʻa e Ngaahi Fiemaʻu Fakaefakafiefiá ʻi he Ngaahi Founga Lelei
9, 10. Ko e hā ʻoku malava ke fai ʻe he faʻahinga ʻiloʻiló ke fakahoko ai ʻenau ngaahi fiemaʻu fakaefakafiefiá?
9 ʻI he taimi ʻe niʻihi, ʻoku ʻeke ʻe he kau Kalisitiané: “Ko e hā ʻa e fakafiefia totonu? Ko e konga lahi ʻoku tuʻuaki mai ʻe he māmaní ʻoku fepaki ia mo e ngaahi tuʻunga ʻa e Tohi Tapú.” Fakapapauʻi ko e fakafiefia ʻoku fakafiemālié ʻoku malava ke maʻu ia, ka ʻoku fiemaʻu ki ai ʻa e feinga. ʻOku fiemaʻu ʻa e tomuʻa fakakaukau mo e palani, tautefito ki he tafaʻaki ʻa e ngaahi mātuʻá. ʻOku maʻu ʻe he tokolahi ʻa e taimi fakafiemālie lahi ʻi he siakale ʻo e fāmilí pea ʻi he fakatahaʻangá. Ko hono maʻu fiemālie ha houa kai lolotonga ʻo e fetalanoaʻaki ki he ngaahi meʻa ʻoku hoko ʻi he ʻahó pe ko ha tuʻunga-lea ʻi he Tohi Tapú ʻoku fakafiefia ia mo fakatupu langa hake. ʻOku malava ke fokotuʻutuʻu ha ngaahi kaitunu, ngaahi vaʻinga feʻungamālie, ko ha ngaahi nofo kemi pe luelue ʻo ʻeveʻeva. Ko e fakafiefia lelei peheé ʻoku malava ke fakafiefia mo fakaivifoʻou.
10 ʻOku pehē ʻe ha tokotaha mātuʻa mo hano uaifi kuó na tauhi hake ʻa e fānau ʻe toko tolu: “Mei ha taʻu kei siʻi, naʻe kau ai ʻema fānaú ki hono fili ʻa e feituʻu te mau ʻeveʻeva mālōlō ki aí. ʻI he taimi ʻe niʻihi, naʻá ma fakaʻatā ʻa e kiʻi tama taki taha ke ne fakaafeʻi hano kaumeʻa lelei, ʻa ia naʻá ne ʻai ai ʻa e taimi mālōloó ke toe fakafiefia ange. Naʻe ʻiloʻi ʻa e ngaahi meʻa mahuʻinga pau ʻi he moʻui ʻema fānaú. ʻI he taimi ki he taimi, ʻoku mau fakaafeʻi ai ha fāmili mo ha ngaahi kaumeʻa ʻi he fakatahaʻangá ki homau ʻapí. Naʻa mau feimeʻatokoni pē ai ʻi tuʻa mo fai ha ngaahi vaʻinga. Naʻa mau faʻa ō meʻalele pea luelue ʻi he ngaahi moʻungá, ʻo ngāueʻaki ʻa e ngaahi taimi peheé ke ako ai fekauʻaki mo e fakatupu ʻa Sihová.”
11, 12. (a) Ko e hā ʻe lava ke ke fai ke fakakau mai ai ʻa e niʻihi kehé ʻi hoʻo ngaahi palani ki ha fakafiefia ʻi he taimi ki he taimi? (e) Ko e hā ʻa e faʻahinga fakatahataha kuo fakamoʻoniʻi ʻene fakangalongataʻa ki he tokolahi?
11 ʻE lava ke ke fano atu fakafoʻituitui pe ʻi he tuʻunga ko ha fāmilí ke fakakau mai ha niʻihi kehe ʻi he taimi ʻoku fai ai ha ngaahi palani ki ha fakafiefia ʻi he taimi ki he taimi? Ko e niʻihi, hangē ko ha uitou, ko ha tokotaha teʻeki mali pe ko ha fāmili mātuʻa-taʻehoa, ʻoku fiemaʻu nai ki ai ha fakalototoʻa. (Luke 14:12-14) ʻE toe lava nai ke ke fakakau ha tokosiʻi ʻa ia ko e toki feohi foʻou mai, ka ko hono moʻoní ke tokanga ke ʻoua naʻa tuku atu ai ʻa e niʻihi kehé ki ha tākiekina fakatupu maumau. (2 Timote 2:20, 21) Kapau ʻoku faingataʻa ki he kau vaivaí ke mavahe mei ʻapi, mahalo ʻe lava ke fai ha ngaahi fokotuʻutuʻu ke ʻave ha meʻakai ke maʻu fakataha mo kinautolu ʻi honau ʻapí.—Hepelu 13:1, 2.
12 Ko e ngaahi fakatahataha ko ia ʻoku maʻu ai ʻe he kau fakaafé ha kai maʻamaʻa, fanongo ki he founga naʻe hoko ai ʻa e niʻihi kehé ko e kau Kalisitiané, pea ako ai ki he meʻa kuó ne tokoniʻi kinautolu ke nofoʻaki faitōnunga ai ki he ʻOtuá kuo fakamoʻoniʻi ʻene fakangalongataʻá ki he tokolahi. ʻOku malava ke ʻohake ha ngaahi tuʻunga-lea ʻi he Tohi Tapú ke fetalanoaʻaki ai mo e faʻahinga kotoa ʻi aí, ʻo kau ai ʻa e fānaú, ʻo fakaafeʻi ke nau kau mai ki ai. ʻOku malava ke hoko ʻa e ngaahi fetalanoaʻaki peheé ko ha ngaahi felīngiaki ʻaonga ia ʻo e fakalototoʻá ʻo ʻikai ha taha ai te ne ongoʻi mā pe taʻefeʻunga.
13. Naʻe anga-fēfē hono fokotuʻu ʻe Sīsū mo Paula ʻa e faʻifaʻitakiʻanga ʻi hono fakahāhā mo hono tali ʻa e anga-talitali kakaí?
13 Naʻe fokotuʻu ʻe Sīsū ʻa e faʻifaʻitakiʻanga totonu ʻi hono fakahāhā mo hono tali ʻa e anga-talitali kakaí. Naʻá ne ngāueʻaki maʻu pē ʻa e ngaahi taimi peheé ke ʻoatu ai ha ngaahi tāpuaki fakalaumālie. (Luke 5:27-39; 10:42; 19:1-10; 24:28-32) Naʻe faʻifaʻitaki ʻene muʻaki kau ākongá ki heʻene faʻifaʻitakiʻangá. (Ngāue 2:46, 47) Naʻe tohi ʻe he ʻapositolo ko Paulá: “Oku ou holi lahi ke mamata kiate kimoutolu, koeuhi keu atu kiate kimoutolu ha foaki fakalaumalie, koe mea ke fakatuu mau ai be akimoutolu; Koeuhi ke tau fiemalie fakataha mo kimoutolu, i he tui be taha a moutolu mo au.” (Loma 1:11, 12, PM) ʻI he tuʻunga meimei tatau, ko ʻetau ngaahi fakatahatahá ʻoku totonu ke ne ʻomai ʻa e ʻatimosifia ki ha felīngiaki ʻo e fakalototoʻa.—Loma 12:13; 15:1, 2.
Niʻihi ʻo e Ngaahi Fakamanatu mo e Ngaahi Fakatokanga
14. Ko e hā ʻoku ʻikai ke fakapotopoto ai ʻa e ngaahi fakatahataha fakasōsiale lalahí?
14 Ko hono fai ha ngaahi fakatahataha fakasōsiale lalahí ʻoku ʻikai ke fakapotopoto, koeʻuhi ko hono tokangaʻi ʻo e fakatahataha lalahi peheé ʻoku faʻa faingataʻa. ʻI ha taimi ʻoku ʻikai ke uesia ai ʻa e ngaahi ngāue fakalaumālié, ʻe fili nai ha ngaahi fāmili siʻi ke nau kaitunu fakataha pe vaʻinga ʻi ha vaʻinga ʻoku ʻikai ke fuʻu feʻauʻauhí. ʻI he taimi ʻoku ʻi ha fakatahataha fakasōsiale ai ha kau mātuʻa, kau sevāniti fakafaifekau pe ko ha faʻahinga matuʻotuʻa kehe, ʻoku nau ʻomai ai ha tākiekina ki he leleí pea ʻe malava foki ke hoko ʻo toe fakaivifoʻou ange ai ʻa e taimi ko iá.
15. Ko e hā ʻoku totonu ai ke fakakau ʻa e tokangaʻi totonú ʻi hono talitali ha fakatahataha fakasōsiale?
15 ʻI he ngaahi fakatahataha fakasōsialé, ko e faʻahinga ko ia ʻoku nau fai ʻa e ngaahi fokotuʻutuʻú ʻoku totonu ke ʻoua naʻa nau tukunoaʻi ʻa e fiemaʻu ke tokangaʻi leleí. Neongo hoʻo fiefia ʻi hono fakahāhā ʻa e anga-talitali kakaí, ʻikai te ke ongoʻi halaia ʻaupito kapau te ke ʻilo koeʻuhi ko ha taʻetokanga ʻi hoʻo tafaʻakí, naʻe tūkia ai ha tokotaha fakaafe ia ʻi he meʻa naʻe hoko ʻi ho ʻapí? Fakakaukau atu ki he tefitoʻi moʻoni ʻoku lāulea ki ai ʻi he Teutalonome 22:8. Ko e ʻIsileli ko ia naʻá ne langa ha fale foʻou naʻe fiemaʻu ke ne langa ha kiʻi ʻā takatakai ʻi he ʻato lafalafá, ʻa ia naʻe faʻa ngāueʻaki ki hono talitali ai ha kau fakaafe. Ko e hā hono ʻuhingá? “Ke ʻoua naʻa ke fakapiki ha toto ki ho fale ʻi he to ha tangata mei ai.” ʻI he tuʻunga meimei tatau, ko e meʻa ʻokú ke fai—ʻo ʻikai fokotuʻutuʻu ha ngaahi fakangatangata taʻefakaʻatuʻi—ke maluʻi ʻa hoʻo kau fakaafé ʻi ha fakatahataha fakasōsiale ʻoku totonu ke hā mei ai ʻa hono fakakaukauʻi ʻenau lelei fakasinó mo e fakalaumālié.
16. Ko e hā ʻa e fakapotopoto ʻoku totonu ke ngāueʻaki kapau ʻoku tufaki atu ha ʻolokaholo ʻi ha fakatahataha fakasōsiale?
16 Kapau ʻoku tufaki ha ʻolokaholo ʻi ha fakatahataha fakasōsiale, ʻoku totonu ke fai ʻeni ʻi he fakapotopoto lahi. ʻOku tokolahi ʻa e kau Kalisitiane talitali kakai ʻoku nau fili ke tufaki ha ngaahi inu ʻolokaholo ʻo kapau pē ʻe malava ke nau tokangaʻi fakafoʻituitui ʻa e meʻa ʻoku tufa pe inu ʻe heʻenau kau fakaafé. ʻOku ʻikai totonu ke fakangofua ha meʻa ʻe tūkia nai ai ʻa e niʻihi kehé pe fakataueleʻi ai ha taha ke inu ʻo tōtuʻa. (Efeso 5:18, 19) ʻI he ngaahi ʻuhinga kehekehe, ʻe fili nai ha kau fakaafe ke fakamamaʻo mei he ʻolokaholó. ʻI he ngaahi feituʻu lahi ʻoku ʻi ai ha taʻu fakalao ai ki he inú, pea ʻe talangofua ʻa e kau Kalisitiané ki he ngaahi lao ʻa Sisá ʻo aʻu kapau ko e ngaahi tuʻutuʻuni ko ʻení ʻoku hā ngali fuʻu fakangatangata.—Loma 13:5.
17. (a) Kapau ʻoku tā ha fasi ʻi ha fakatahataha fakasōsiale, ko e hā ʻoku mahuʻinga ai ke mātuʻaki filifili lelei ia ʻe he tokotaha-talitalí? (e) Kapau ʻoku ʻi ai ha hula ʻi ha fakatahataha, ʻoku totonu ke tapua fēfē mei ai ʻa e fakanānaá?
17 ʻOku totonu ke fakapapauʻi ʻe he tokotaha-talitalí ko ha faʻahinga fasi, hula, pe fakafiefia kehe ʻoku fehoanaki ia mo e ngaahi tefitoʻi moʻoni faka-Kalisitiané. ʻOku kehekehe ʻa e manako ʻi he ngaahi fasí, pea ʻoku ala maʻu ha tuʻunga kehekehe lahi ʻo e ngaahi fasí. Kae kehe, ko e konga lahi ʻo e ngaahi fasi ʻi he ʻaho ní ʻoku pouaki ai ha laumālie ʻo e angatuʻu, ʻulungāanga taʻetaau mo e fakamālohi. ʻOku ʻi ai ha fiemaʻu ke filifili lelei. ʻOku ʻikai fiemaʻu pau ia ki he fasi leleí ke nonga, ka ʻoku ʻikai totonu ia ke ongo fakakakano pe taʻetaau, ʻo fakamamafa ki he leʻo-lahí mo e haʻuhaʻulú. Tokanga ke ʻoua naʻá ke tuku ʻa e fili fasí ki ha taha ʻoku teʻeki ai ke ne mahinoʻi ʻa e fiemaʻu ki hono tauhi ʻo e leʻo-lahí ke feʻunga peé. Ko ha hula ʻoku kau ai ʻa e tōʻonga taʻefakanānaá, ʻo fakamamafa ki he ngaahi mio fakatupu holi ʻaki ʻa e foʻi moluú mo e huhú, ʻoku hā mahino ʻene ʻikai totonu ia ki ha Kalisitiané.—1 Timote 2:8-10.
18. ʻE malava fēfē ʻe he ngaahi mātuʻá ke maluʻi ʻenau fānaú ʻaki hono tokangaʻi ʻenau feohi fakasōsialé?
18 ʻOku totonu ki he ngaahi mātuʻa Kalisitiané ke nau ʻuluaki ʻilo ki he meʻa ʻoku palani ki ha faʻahinga fakatahataha fakasōsiale pē ʻoku fakaafeʻi ki ai ʻenau fānaú, pea ʻe fakapotopoto ke ʻalu fakataha mo kinautolu ʻi he lahi taha ʻo e ngaahi meʻa peheé. Ko hono pangó, kuo fakaʻatā ʻe he ngaahi mātuʻa ʻe niʻihi ʻenau fānaú ke kau ki he ngaahi paati ʻoku ʻikai tokangaʻi ʻa ia kuo fakataueleʻi ai ʻa e niʻihi ʻoku ʻi aí ki he ʻulungāanga taʻetāú pe tōʻonga kehe ʻoku taʻengali moʻoni. (Efeso 6:1-4) Neongo kapau ko e kau talavoú ʻoku nau ʻi honau taʻu hongofulu tupu lahí pea kuo nau fakahāhā ʻoku malava ke nau hoko ʻo falalaʻanga, ʻoku kei ʻi ai pē ʻa e fiemaʻu ke tokoniʻi kinautolu ke ‘hola mei he ngaahi holi fakatalavoú.’—2 Timote 2:22.
19. Ko e hā ʻa e meʻa moʻoni ʻoku malava ke ne tokoniʻi kitautolu ke tau tokangataha ki he meʻa ʻoku totonu ke tau “fuofua kumi”?
19 Ko e fakafiefia ʻi he taimi ki he taimi ʻa ia ʻoku lelei mo fakaivifoʻoú ʻoku lava ke ne ʻai ʻa e moʻuí ke fakafiefia ange. ʻOku ʻikai taʻefinangalo ʻa Sihova ke tau maʻu e fiefia ko ʻení, ka ko hono moʻoní ʻoku tau ʻilo ko e ngaahi meʻa peheé ʻoku ʻikai te nau tokoniʻi kitautolu ke tau faʻoaki ha faʻahinga koloa fakalaumālie pē ʻi hēvani. (Mātiu 6:19-21) Naʻe tokoniʻi ʻe Sīsū ʻene kau ākongá ke nau mahinoʻi ko e “fuofua kumi ae buleaga oe Otua, mo ene maonioni” ʻa e meʻa mahuʻinga ʻi he moʻuí, ʻo ʻikai ko e meʻa ʻoku tau kaí nai pe inú pe tuí, ʻa ia “oku kumi e he Jenitaile ki he gaahi mea ni.”—Mātiu 6:31-34, PM.
20. Ko e hā ʻa e ngaahi meʻa lelei mei he Tokotaha-Tokonaki Maʻongoʻongá ʻoku malava ke ʻamanaki atu ki ai ʻa e kau sevāniti faitōnunga ʻa Sihová?
20 ʻIo, pe ʻoku tau ‘kai, pe inu, pe fai ha meʻa,’ ʻoku lava ke tau fai ʻa e meʻa “kotoa pe ke ongoongolelei ai ʻa e ʻOtua,” ʻi he fakamālō ki he Tokotaha-Tokonaki Maʻongoʻongá ki he ngaahi meʻa lelei ʻoku tau fiefia fakanānā aí. (1 Kolinito 10:31) ʻI heʻene māmani Palataisi ʻoku tuʻu mai pē mei muʻá, ʻe ʻi ai ha ngaahi taimi taʻefakangatangata ke fiefia ai ki he kakato ʻa e nima-homo ʻa Sihová, fakataha mo e feohi lelei ʻa e faʻahinga kotoa ʻoku nau aʻusia ʻa ʻene ngaahi fiemaʻu māʻoniʻoní.—Sāme 145:16; Aisea 25:6; 2 Kolinito 6:19 (2Ko 7:1, PM).
ʻOkú Ke Manatuʻi?
• Ko e hā ʻoku faingataʻa ai ki he kau Kalisitiane ʻi he ʻaho ní ke maʻu ʻa e fakafiefia ʻoku leleí?
• Ko e hā ʻa e ngaahi faʻahinga ʻe niʻihi ʻo e fakafiefiá kuo fakamoʻoniʻi ʻoku fakafiemālie ki he ngaahi fāmili Kalisitiané?
• ʻI hono maʻu ha fakafiefia lelei, ko e hā ʻa e ngaahi fakamanatu mo e ngaahi fakatokanga ʻoku totonu ke te manatuʻí?
[Fehuʻi ki he Ako]
[Fakatātā ʻi he peesi 18]
Fili ʻa e fakafiefia ʻokú ne ʻomai ʻa e fua leleí
[Fakatātā ʻi he peesi 19]
Ko e hā ʻa e ngaahi faʻahinga fakafiefia ʻoku siʻaki ʻe he kau Kalisitiané?