Ko Hai ʻa e Kau Kalisitiane Moʻoní?

“ʻOKU ʻuhinga ʻa e lotu faka-Kalisitiané ko e ʻilo fekauʻaki mo Sīsū Kalaisí ʻoku fakahāhā ia ʻi he akonakí mo e meʻa ʻoku faí.” (On Being a Christian) ʻAki ʻa e ngaahi lea ko iá, ʻoku fakahaaʻi ai ʻe he teolosia Suisalani ko Hans Küng ha foʻi moʻoni māʻalaʻala: ʻOku ʻuhinga ʻa e lotu faka-Kalisitiane moʻoní ko e faʻahinga loto-moʻoni tāutaha ʻoku nau ngāueʻaki ʻa e ngaahi akonaki ʻa Sīsuú.

Fēfē leva kapau ʻoku taukaveʻi ʻe ha faʻahinga tāutaha pe ngaahi kulupu ko e kau muimui kinautolu ʻo Kalaisi, ka ko hono moʻoní ʻoku ʻikai te nau fai ʻa e meʻa naʻe akoʻi ʻe Sīsuú? Naʻe pehē ʻe Sīsū tonu ko e tokolahi te nau taukaveʻi ko e kau Kalisitiane kinautolu. Te nau tuhu ki he ngaahi ngāue kehekehe ke fakamoʻoniʻiʻaki naʻa nau tauhi kiate ia, ʻi he pehē: “ʻIkai ko ho huafa naʻa mau palofisai ai? pea ko ho huafa naʻa mau kapusi tevolo ai? pea ko ho huafa naʻa mau feia ai ʻa e ngāhi mana lahi?” Ko ia, naʻe fēfē ʻa e tali ʻa Sīsuú? Ko ʻene ngaahi lea  mālohí naʻe fakahaaʻi ai ʻene fakamāú: “Teʻeki te u ʻiloa kimoutolu: ʻalu meiate au, ʻa e kau maumau lao.”—Mātiu 7:​22, 23.

Ko ha fakatokanga mālohi ē ki he “kau maumau lao” ʻoku nau taukaveʻi ʻoku nau muimui kia Sīsuú! Fakakaukau angé ki he ongo tuʻunga tefito ʻe ua ʻoku fokotuʻu ʻe Sīsū koeʻuhi ke ne ʻiloʻi ai ʻa e kakaí ko e kau Kalisitiane moʻoni kae ʻikai te ne siʻaki kinautolu ko e kau maumau-lao.

“Kapau ʻe Ai Haʻamou Feʻofaʻaki”

Ko e tuʻunga ʻe taha ʻoku fokotuʻu ʻe Sīsuú ʻa eni: “Ko e tuʻutuʻuni foʻou ʻoku ou tuku kiate kimoutolu, Ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki. Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.”—Fakaʻītali ʻamautolu; Sione 13:​34, 35.

ʻOku fiemaʻu ʻe Sīsū ʻa hono kau muimuí ke nau maʻu ʻa e feʻofaʻaki moʻoní ʻia kinautolu pea ki he toenga ʻo e faʻahinga ʻo e tangatá. Kuo fakahoko ʻe he kau Kalisitiane tāutaha tokolahi ʻa e fiemaʻu ko iá lolotonga ʻa e laui senituli talu mei he ʻaʻeva ʻa Sīsū ʻi he māmaní. Kae fēfē ʻa e lahi taha ʻo e ngaahi kautaha lotu kuo nau taukaveʻi ʻoku nau fakafofongaʻi ʻa Kalaisí? Kuo fakaʻilongaʻiʻaki honau hisitōliá ʻa e ʻofá? ʻIkai ʻaupito. ʻI hono kehé, kuo nau takimuʻa ʻi he ngaahi tau mo e ngaahi fepaki taʻefaʻalaua ʻa ia kuo lilingi ai ʻa e toto taʻehalaiá.—Fakahā 18:24.

ʻOku hoko eni ʻo aʻu mai ki onopooni. Ko e ngaahi puleʻanga ʻoku nau taukaveʻi ko e Kalisitiané naʻa nau takimuʻa ʻi he tāmate tavale naʻá ne fakaʻilongaʻi ʻa e ongo tau ʻa e māmaní ʻi he senituli 20. Ki muí ni mai, ko e kau mēmipa ʻo e ngaahi siasi ʻoku taku ko e Kalisitiané naʻa nau takimuʻa ʻi he ngaahi fakamamahi anga-fītaʻá mo e ngaahi fakaʻauha fakafaʻahinga kuo faʻufaʻu, ʻa ia naʻe hoko ʻi Luanitā ʻi he 1994. “Ko e faʻahinga ko ē naʻe fakafaʻafaʻahi ʻi he tōʻonga fakamālohi ko ení,” ko e tohi ia ʻa e pīsope-pule ʻIngilani ki muʻa ko Desmond Tutu, “naʻa nau maʻu ʻa e tui tatau. Ko e tokolahi tahá ko e kau Kalisitiane.”

“Kabau Te Mou Nofo Mau i he Eku Lea”

Ko ha fiemaʻu tefito hono ua ki he lotu faka-Kalisitiane moʻoní naʻe leaʻaki ia ʻe Sīsū ʻi heʻene pehē: “Kabau te mou nofo mau i he eku lea, bea ko eku kau akoga mooni akimoutolu; Bea te mou ilo ae mooni, bea e fakatauatainaʻi akimoutolu e he mooni.”—Fakaʻītali ʻamautolu; Sione 8:​31, 32, PM.

ʻOku ʻamanekina ʻe Sīsū ʻa hono kau muimuí ke nau nofo maʻu ʻi heʻene leá—ʻa ia, ko e pipiki ki heʻene ngaahi akonakí. ʻI hono kehé, ko e kau faiako fakalotu naʻa nau taukaveʻi naʻa nau muimui ʻia Kalaisí kuo nau “ohi fakautuutu ʻa e ngaahi tui faka-Kalisí,” ko e fakamatala ia ʻa e teolosia ko Küng. Kuo nau fetongi ʻa e ngaahi akonaki ʻa Sīsuú, ʻi he lotolotonga ʻo e ngaahi akonaki kehé, ʻaki ʻa e ngaahi fakakaukau hangē ko e taʻefaʻamate ʻa e soulú, ko ha tui ki he pulekatolió, lotu kia Melé, mo ha kalasi ʻo e haʻa faifekaú—ko e ngaahi fakakaukau naʻe maʻu mei he ngaahi lotu mo e kau filōsefa panganí.—1 Kolinito 1:​19-​21; 3:​18-​20.

Ko e kau faiako fakalotú naʻa nau toe ʻomai ʻa e tokāteline taʻealamakupusi ʻo e Tolu-Tahaʻi-ʻOtuá, ʻi hono hakeakiʻi ʻa Sīsū ki ha tuʻunga naʻe ʻikai ʻaupito te ne taukaveʻi maʻana. ʻI he meʻa ko iá, naʻa nau fakaleluʻi ai ʻa e kakaí mei he lotu ki he tokotaha ʻa ia naʻe fakahanga maʻu pē ki ai ʻe Sīsū ʻa e tokangá—ko ʻene Tamaí, ʻa Sihova. (Mātiu 5:​16; 6:9; Sione 14:28; 20:17) “ʻI he taimi ʻoku lea ai ʻa Sīsū fekauʻaki mo e ʻOtuá,” ko e tohi ia ʻa Hans  Küng, “ʻokú ne ʻuhingá ki he ʻOtua motuʻa ʻo e kau pēteliake ko ʻĒpalahame, ʻAisake mo Sēkopé: Ko Iāuē . . . Kiate iá ko e ʻOtua eni ʻe taha pea tāfatahá.” Ko e kakai ʻe toko fiha he ʻahó ni ʻoku nau fakafekauʻaki vave ʻa e ʻOtua mo e Tamai ʻa Sīsuú pea mo Iauē, pe Sihova, hangē ko ia ʻoku tohi anga-maheniʻaki hono huafá ʻi he lea faka-Tongá?

Ko e kau taki lotú kuo nau mavahe fakaʻaufuli mei he fekau ʻa Sīsū ke hanganaki tuʻu-ʻatā ʻi he ngaahi meʻa fakapolitikalé. ʻI he ʻaho ʻo Sīsuú, ko Kāleli “ʻa e uhouhonga ʻo e mamahiʻi-fonua fakafaʻahingá,” ko e fakamatala ia ʻa e faʻu-tohi ko Trevor Morrow. Naʻe kau ʻa e kau Siu mamahiʻi-fonua tokolahi ʻi he taú ke maʻu ʻa e tauʻatāina fakapolitikalé mo fakalotú. Naʻe tala ʻe Sīsū ki heʻene kau ākongá ke nau kau ʻi he ngaahi fefaʻuhi peheé? ʻIkai. ʻI hono kehé, naʻá ne tala ange kia kinautolu: “Oku ikai o mamani akimoutolu.” (Sione 15:​19, PM; Sio 17:14) Kae kehe, ʻi he ʻikai tuʻu-ʻatā ai peé, naʻe fakatupulekina ʻe he kau taki lotú ʻa e meʻa ʻoku fakamatalaʻi ʻe he faʻu-tohi ʻAilani ko Hubert Butler ko e “ngaahi tefitoʻi moʻoni fakakautau mo fakapolitikale.” Ko e “lotu faka-Kalisitiane fakapolitikalé,” ko ʻene tohí ia, “ʻoku toe meimei lotu faka-Kalisitiane fakakautau maʻu pē ia pea ʻi he taimi ʻoku felotoi ai ʻa e kau taki fakapuleʻangá mo e kau taki lotú ʻoku hoko maʻu pē ia ʻi he fakafetongi ki he ngaahi monū ʻe niʻihi, ʻoku ʻoange ʻe he Siasí ʻene tāpuakí ki he ngaahi kongakau fakakautau ʻa e puleʻangá.”

Fakaʻikaiʻi ʻe he Kau Faiako Loí ʻa Sīsū

Naʻe fakatokanga ʻa e ʻapositolo ko Paulá fekauʻaki mo ha tafoki mei he lotu faka-Kalisitiane moʻoní. Naʻá ne pehē ʻi he hili ʻene maté, ko e “fanga ulofi anga malohi” mei he lotolotonga ʻo e kau Kalisitiane lau peé te nau “leaʻaki ʻa e ngaahi meʻa ʻoku ʻalu kehe, ke tohoaki ʻaki ʻa e kau ako ke muimui kiate kinautolu.” (Ngāue 20:​29, 30) Naʻa nau “lau ʻoku nau ʻilo ʻa e ʻOtua,” ka ko hono moʻoní “ʻi heʻenau ngaahi ngaue ʻoku nau fakaʻikaiʻi ia.” (Fakaʻītali ʻamautolu; Taitusi 1:16) Naʻe fakatokanga tatau ʻa e ʻapositolo ko Pitá ʻo pehē ko e kau faiako loí te nau “fakahu fufū mai ʻa e ngaahi akonaki he, ʻa ia ko e meʻa fakaʻauha, ʻo nau fakafisinga ʻa e ʻEiki naʻa ne fakatau kinautolu.” Ko ʻenau ʻulungāanga koví, ko ʻene leá ia, ʻe fakatupunga ai ʻa e kakaí ke nau lea “lauʻikovi” ʻo fekauʻaki mo e “hala ʻo e moʻoni.” (2 Pita 2:​1, 2) Ke fakaʻikaiʻi ʻa Kalaisi ʻi he founga ko ení, ko e lau ia ʻa e mataotao Kalisi ko W. E. Vine, ʻoku ʻuhinga iá ko e “fakafisingaʻi ʻa e Tamaí pea mo e ʻAló, ʻaki ʻa e tafoki mei he moʻoní pea ʻi hono fakamafola ʻa e ngaahi akonaki fakatupu maumaú.”

ʻE fēfē ʻa e tali ʻa Sīsuú kapau naʻe ʻosi fakakaukauʻi pē ʻe he kau ākonga lau peé ke ʻoua te nau “nofo mau i he [ʻene] lea” pea ke aʻusia ʻa e ngaahi fiemaʻu kehe ʻokú ne fokotuʻu maí? Naʻá ne fakatokanga: “Ka ʻilonga ʻa ia te ne fakafisinga au ʻi he ʻao ʻo e kakai, te u fakafisinga foki ʻe au ʻa e tangata ko ia ʻi he ʻao o ʻeku Tamai ʻoku ʻi Hevani.” (Mātiu 10:33) Ko e moʻoni, ʻoku ʻikai fakaʻikaiʻi ʻe Sīsū ha taha ʻokú ne fai ha hala neongo ʻa ʻene holi fakamātoato ke faitōnungá. Ko e fakatātaá, neongo ko e ʻapositolo ko Pitá naʻá ne fakafisingaʻi tuʻo tolu ʻa Sīsū, naʻe fakatomala ʻa Pita pea naʻe fakamolemoleʻi ia. (Mātiu 26:​69-​75) Kae kehe, ʻoku fakaʻikaiʻi ʻe Sīsū ʻa e faʻahinga tāutaha pe ngaahi kulupu ko hono moʻoní ko e fanga ulofi ʻoku kofu hangē ha sipí—ʻo fakangalingali ʻoku nau muimui ʻia Kalaisi ka ʻoku nau siʻaki loto-lelei mo tuʻukāivi ʻa ʻene ngaahi akonakí. Fekauʻaki mo e kau faiako loi peheé, naʻe pehē ʻe Sīsū: “Ko honau ngāhi fua te mou ʻilo lelei ai kinautolu.”—Mātiu 7:​15-20.

Mate ʻa e Kau ʻApositoló, pea Tupu ʻa e Tafoki mei he Moʻoní

Naʻe kamata ʻanefē ʻa e fakaʻikaiʻi ʻa Kalaisi ʻe he kau Kalisitiane loí? Taimi nounou ʻaupito mei he pekia ʻa Sīsuú. Ko ia tonu naʻá ne fakatokanga ʻo pehē ʻe toe tūtuuʻi vave ʻe he Tēvoló ʻa e “tea” pe kau Kalisitiane loí, ʻi he lotolotonga ʻo e “tenga lelei,” pe kau Kalisitiane moʻoní, ʻa ia naʻe tō ʻe Sīsū lolotonga ʻene ngāue fakafaifekaú. (Mātiu 13:​24, 25, 37-39) Naʻe fakatokanga ʻa e ʻapositolo ko Paulá ʻo pehē naʻe ʻosi ngāue ʻa e kau faiako kākaá ʻi hono ʻahó. Ko e ʻuhinga tefito ki heʻenau afe mei he ngaahi akonaki ʻa Sīsū Kalaisí, naʻá ne pehē, ko e ʻikai te nau maʻu moʻoni ha “ʻofa ki he moʻoni.”—2 Tesalonaika 2:10.

Ko e kau ʻapositolo ʻa Sīsū Kalaisí naʻa nau ngāue ko ha taʻotaʻofi ki he tafoki ko eni mei he moʻoní ʻi he lolotonga pē ʻenau moʻuí. Kae kehe, hili e mate ʻa e kau ʻapositoló, ko e kau taki lotú ʻi heʻenau ngāueʻaki ʻa e “ngaahi faʻahinga mana kehekehe, mo e meʻa fakaʻilonga mo e meʻa fakaofo, ka ko e koto loi pe; mo e fai ʻaki ʻa e faʻahinga fakahekeheke kotoa pe . . . ka ko e koto kākā” koeʻuhí ke takihalaʻi ʻa e tokolahí, naʻe fakatafokiʻi ai ʻa e kakai tokolahi ange mei he ngaahi moʻoni  naʻe akoʻi ʻe Sīsū mo ʻene kau ʻapositoló. (2 Tesalonaika 2:​3, 6-12) ʻI he faai mai ʻa e taimí, ʻoku tohi ʻe he filōsefa Pilitānia ko Bertrand Russell, naʻe liliu ai ʻa e muʻaki fakatahaʻanga Kalisitiané ki ha kautaha fakalotu ʻa ia “te ne fakaʻohovaleʻi ʻa Sīsū, pea naʻa mo Paula.”

Fakafoki Mai ʻa e Lotu Faka-Kalisitiane Moʻoní

ʻOku māʻalaʻala ʻa e lēkōtí. Talu mei he mate ʻa e kau ʻapositoló, mo e ʻikai ke tapua mai ʻa Kalaisi ʻi he lahi ʻo e ngaahi meʻa ʻoku fai ʻi he hingoa ʻo e lotu faka-Kalisitiané. Kae kehe, ʻoku ʻikai ʻuhinga ia aí kuo ʻikai lava ke fai ʻa Sīsū ki heʻene talaʻofa ke ne ʻi hono kau muimuí “ʻi he ngaahi ʻaho kotoa pe, ʻo aʻu ki he ngataʻanga ʻo mamani.” (Mātiu 28:20) ʻOku lava ke tau fakapapauʻi talu mei he taimi naʻá ne leaʻaki ai ʻa e ngaahi lea ko iá, kuo ʻi ai ʻa e faʻahinga faitōnunga tāutaha ʻa ia ʻi honau lotolotongá “ko e ʻilo fekauʻaki mo Sīsū Kalaisí [kuo] fakahāhā ia ʻi he akonakí mo e meʻa ʻoku faí.” Kuo fai ʻa Sīsū Kalaisi ki heʻene talaʻofa ke poupouʻi ʻa e faʻahinga peheé ʻi heʻenau feinga ke fakahaaʻi ʻa e ʻofa ʻa ia ʻokú ne fakaʻilongaʻi ʻa e kau Kalisitiane moʻoní pea ke mateaki ai pē ki he ngaahi moʻoni naʻá ne akoʻí.

ʻIkai ko ia pē, naʻe talaʻofa ʻa Sīsū ʻo pehē ʻi he ngaahi ʻaho fakaʻosi ʻo e fokotuʻutuʻu ko eni ʻo e ngaahi meʻá, te ne fakatahatahaʻi ai ʻa ʻene kau ākonga faitōnungá ki ha fakatahaʻanga Kalisitiane ʻoku ala fakapapauʻi māʻalaʻala ʻa ia te ne ngāueʻaki ke ne fakahoko ʻa hono finangaló. (Mātiu 24:​14, 45-​47) ʻOkú ne ngāueʻaki he taimí ni ʻa e fakatahaʻanga ko iá ke fakatahatahaʻi mai ha “fuʻu kakai lahi” ʻo e kakai tangata, kakai fefine, mo e tamaiki “mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea” pea ʻokú ne fakafāʻūtahaʻi kinautolu ʻi he malumalu ʻo hono tuʻunga-ʻulú ki he “takanga pe taha” ʻi he malumalu ʻo e ‘tauhi pe taha.’—Fakahā 7:​9, 14-17; Sione 10:16; Efeso 4:​11-16.

Ko ia ai, tafoki leva mei he ngaahi kulupu pe ngaahi kautaha pē kuó ne fakameleʻi ʻa e hingoa ʻo Kalaisí pea fakamaaʻi ʻa e lotu faka-Kalisitiané ʻi he ngaahi taʻu ʻe ua afe kuohilí. He ka ʻikai, hangē ko ia naʻe tala ʻe Sīsū Kalaisi ki he ʻapositolo ko Sioné, ʻe lava ke ke “ʻinasi ʻi [honau] tautea” ʻi he taimi ʻe fakahoko ai ʻe he ʻOtuá ʻene fakamāú kia kinautolu ʻi he kahaʻu ofi maí. (Fakahā 1:1; 18:​4, 5) ʻAi ko hoʻo fakapapaú ia ke ke ʻi he lotolotonga ʻo e faʻahinga ʻoku lea ʻo kau ki ai ʻa e palōfita ko Maiká ʻi heʻene pehē “ʻi he kuonga ʻamui,” ko e kau lotu moʻoní—ʻa e kau muimui ʻo e lotu faka-Kalisitiane moʻoní—te nau fanongo ai ki he ngaahi fakahinohino ʻa e ʻOtuá pea ‘fou ʻi he ngaahi founga’ ʻo e lotu maʻa kuo fakafoki maí. (Maika 4:​1-4) Ko e kau faipulusi ʻo e makasini ko ení te nau fiefia ke tokoniʻi koe ke ke fakapapauʻi ʻa e kau lotu moʻoni ko iá.

[Fakatātā ʻi he peesi 5]

Ko e hā ʻoku ʻikai kau ai ʻa e kau Kalisitiane moʻoní ʻi he taú?

[Maʻuʻanga]

Toʻohemá, kau sōtia: U.S. National Archives photo; toʻomataʻú, meʻafana afi: U.S. Army Photo

[Fakatātā ʻi he peesi 7]

Ke mou “feʻofaʻaki” pea “nofo mau i he eku lea” ʻa e ongo fiemaʻu tefito ʻoku fokotuʻu ʻe Sīsū ki he kau Kalisitiane moʻoní