“Mou Mātuʻaki Fakakaukau Lelei Maʻu Pē”

“Ko e hehemangofua ʻoku ne tui ki he lea kotoa; ka ko e fakapotopoto ʻoku ne fakakaukau ʻene laka.”​—PALOVEPI 14:15.

1, 2. (a) Ko e hā ʻoku akoʻi mai kiate kitautolu ʻe he meʻa naʻe hokosia ʻe Lote ʻi Sōtomá? (e) Ko e hā ʻoku ʻuhinga ki ai ʻa e kupuʻi lea “mou . . . fakakaukau lelei maʻu pē”?

 ʻI HONO tuku ʻe ʻĒpalahame kia Lote ʻa e ʻuluaki fili fekauʻaki mo e fonuá, naʻe tohoaki ʻa e mata ʻo Loté ki ha vahefonua mohu vai ʻa ia naʻe “hange ko e ngouetapu ʻa Sihova.” Kuo pau pē naʻe hā ngali ko e feituʻu lelei taha ia ke nofo ai hono fāmilí, koeʻuhi naʻe “fili ʻe Lote moʻona ʻa e Seakale ʻo Sioatani” pea fokotuʻu hono nofoʻangá ʻo ofi ki Sōtoma. Kae kehe, naʻe takihalaʻi ʻe he ngaahi fōtunga hā ki tuʻá, he naʻe nofo ofi ai ʻa e “kakai Sotoma ko e faʻahinga naʻe kovi mo fai angahala ʻaupito kia Sihova.” (Senesi 13:​7-13) Hangē ko ia ʻoku fakahaaʻi ʻe he ngaahi meʻa naʻe hokó, naʻe tofanga ʻa Lote mo hono fāmilí ʻi he ngaahi nunuʻa fakatupu maumau ʻaupito. Naʻe faai mai pē, ko ia mo hono ongo ʻofefiné naʻe iku ʻo nau nofo ʻi ha ʻana. (Senesi 19:​17, 23-26, 30) Ko e meʻa ko ia naʻe hā mātuʻaki lelei kiate ia ʻi he kamataʻangá naʻe mafuli ia ʻo tuʻu mātuʻaki fehangahangai.

² Ko e fakamatala ʻo e meʻa naʻe hoko kia Loté ʻokú ne tokonaki mai ha lēsoni ki he kau sevāniti ʻa e ʻOtuá he ʻaho ní. ʻI he taimi ʻoku tau fehangahangai ai mo ha ngaahi fili ke fai, kuo pau ke tau tokanga ki he ngaahi fakatuʻutāmaki ʻoku malava ke hokó pea maluʻi kitautolu mei he hoko ʻo takihalaʻi ʻe he ngaahi ʻuluaki ongoʻí pē. Ko ia, ʻoku feʻungamālie ʻa e naʻinaʻi mai ʻa e Folofola ʻa e ʻOtuá kiate kitautolú: “Mou mātuʻaki fakakaukau lelei maʻu pē.” (1 Pita 1:​13, NW) Ko e foʻi lea faka-Kalisi naʻe liliu heni ko e “mou . . . fakakaukau lelei maʻu pē” ʻoku ʻuhinga fakaelea ia “ke fakakaukau fakamātoato.” Fakatatau ki he mataotao Tohi Tapu ko R.C.H. Lenski, ko e fakakaukau fakamātoató ko “ha tuʻunga nonga mo tuʻumaʻu ʻo e ʻatamaí ʻa ia ʻokú ne fua-tautau mo fakafuofua totonu ʻa e ngaahi meʻá pea fakamafeia ai kitautolu ke fai ʻa e fili ʻoku tonú.” Tau lāulea angé ki ha ngaahi tuʻunga ʻa ia ʻoku fiemaʻu ai kitautolu ke tau fakakaukau fakamātoató.

Ko Hono Fua-Tautau ha Faingamālie Pisinisi

 3. Ko e hā ʻoku ʻi ai ai ʻa e fiemaʻu ke tokanga kapau ʻoku tuʻuaki mai kiate kitautolu ha faingamālie pisinisi?

³ Pehē pē ʻoku tuʻuaki atu kiate koe ha faingamālie pisinisi ʻe ha tokotaha ʻoku fakaʻapaʻapaʻi, ko ha kaungālotu nai kia Sihova. ʻOkú ne loto-māfana fekauʻaki mo e ngaahi ʻamanaki ki he lavameʻá pea mo fakaʻaiʻai koe ke ke ngāue fakavavevave ke ʻoua naʻá ke tō mei ai. ʻOku kamata nai ke ke sioloto atu ki ha moʻui lelei ange kiate koe mo ho fāmilí, mahalo ʻe aʻu ʻo ke fakaʻuhinga ʻe hanga ʻe he meʻá ni ʻo fakamafeia koe ke ke līʻoa ai ʻa e taimi lahi ange ki he ngaahi meʻa fakalaumālié. Kae kehe, ʻoku fakatokanga mai ʻa e Palovepi 14:15: “Ko e hehemangofua ʻoku ne tui ki he lea kotoa; ka ko e fakapotopoto ʻoku ne fakakaukau ʻene laka.” ʻI he fiefia ʻoku faʻa haʻu fakataha mo hono kamata ʻo ha pisinisi foʻou, ʻoku fakafuofuahalaʻi nai ai ha ngaahi mole ʻe hoko, ʻoku tukunoaʻi ai ʻa e ngaahi fakatuʻutāmakí ia, pea ʻoku ʻikai fai ha fakakaukau kakato ia ki he ngaahi tuʻunga taʻepau ʻo e kau ki he pisinisí. (Semisi 4:​13, 14) ʻI ha tuʻunga pehē, he fiemaʻu lahi ē ke mou mātuʻaki fakakaukau lelei maʻu pē!

 4. ʻE malava fēfē ke tau ‘fakakaukauʻi ʻetau laká’ ʻi hono fakakaukauʻi ha fokotuʻu pisinisi?

⁴ Ko ha tokotaha fakapotopoto ʻokú ne sivisiviʻi fakalelei ha fokotuʻu pisinisi ki muʻa ia ke ne fai ha filí. (Palovepi 21:5) ʻOku faʻa fakahaaʻi ʻe ha sivisiviʻi pehē ʻa e ngaahi fakatuʻutāmaki ne ʻikai tomuʻa ʻiloʻí. Fakakaukau angé ki he tuʻunga ko ʻeni ʻe ala lava ke hokó: ʻOku feinga ha taha ke ne nō mai ha paʻanga ʻo fekauʻaki mo ʻene ngaahi palani pisinisí pea tuʻuaki atu kiate koe ha tupu lahi kapau te ke ʻoange kiate ia ha paʻanga. ʻOku ongo fakatauele nai ʻa e foʻi tuʻuakí, ka ko e hā ʻa e ngaahi fakatuʻutāmaki aí? ʻOku loto-lelei ʻa e tokotaha-noó ke totongi fakafoki ʻa e paʻangá ʻo tatau ai pē pe ʻoku lavameʻa fēfē ʻa e pisinisí, pe ʻoku fakatuʻunga ʻa e totongi fakafokí ʻi he lavameʻa ʻa e pisinisí? ʻI  hono fakalea ʻe tahá, te ke malava ʻo fakamoleki hoʻo paʻangá kapau ʻoku tōlalo ʻa e pisinisí? Te ke toe ʻeke nai: “Ko e hā ʻoku fai ai ʻa e nō paʻanga mei he faʻahinga tāutahá? ʻOku vakai ʻa e ngaahi pangikeé ki he kautaha fakapisinisí ʻoku mātuʻaki ʻikai ʻi he tuʻunga lelei?” Ko hono vaheʻi ha taimi ke fakakaukau ai ki he ngaahi tuʻunga fakatuʻutāmakí te ne tokoniʻi koe ke fakakaukauʻi fakalelei ʻa e foʻi fokotuʻú.—Palovepi 13:16; 22:3.

 5. (a) Ko e hā ʻa e foʻi laka fakapotopoto naʻe fai ʻe Selemaia ʻi he taimi naʻá ne fakatau ai ha konga ngoué? (e) Ko e hā ʻoku ʻaonga ai ke fai fakapepa ʻa e ngaahi fokotuʻutuʻu pisinisi kotoa pē ʻi ha aleapau tohinima totonú?

⁵ ʻI he taimi naʻe fakatau ai ʻe Selemaia ha konga ngoue mei hono kāsiní, ʻa ia ko ha kaungālotu kia Sihova, naʻá ne faʻu ha lēkooti tohinima ʻo e fakataú ʻi he ʻao ʻo e kau fakamoʻoni. (Selemaia 32:​9-12) Ko ha tokotaha fakapotopoto he ʻahó ni te ne fakapapauʻi ko e ngaahi fokotuʻutuʻu pisinisi kotoa pē ʻokú ne kau ki ai, ʻo kau ai ʻa e ngaahi pisinisi mo e ngaahi kāingá mo e kaungātuí, ʻoku fakapepa ʻi ha aleapau tohinima. a ʻOku tokoni ha aleapau tohinima ʻosi teuteuʻi lelei ki hono taʻofi ʻo ha ngaahi taʻefemahinoʻaki pea ʻe tauhi maʻu ai ʻa e fāʻūtahá. ʻI he tafaʻaki ʻe tahá, ko e ʻikai ke ʻi ai ha aleapau tohinimá ʻoku faʻa hoko ia ko ha konga ʻo e tupuʻanga ʻo e hoko ha ngaahi palopalema ʻi he vahaʻa ʻo e kau sevāniti ʻa Sihová. Ko e meʻa fakamamahí, ʻoku malava ke iku ʻa e ngaahi palopalema peheé ki he loto-mamahi mo e loto-tāufehiʻa, pea naʻa mo e mole ʻa e tuʻunga fakalaumālié.

 6. Ko e hā ʻoku fiemaʻu ai ke tau maluʻi kitautolu mei he mānumanú?

⁶ Kuo pau foki ke tau toe maluʻi kitautolu mei he mānumanú. (Luke 12:15) Ko e taumuʻa ki ha fuʻu tupu lahí ʻoku malava ke ne fakakuihi kita mei he ngaahi tuʻunga fakatuʻutāmaki ʻo ha ngāue fakapisinisi taʻepau. Naʻa mo e faʻahinga ko ia kuo nau maʻu ha ngaahi monū lelei ʻi he ngāue ʻa Sihová kuo nau hoko ʻo fihia ʻi he tauhele ko ʻení. ʻOku fakatokanga mai ʻa e Folofola ʻa e ʻOtuá kiate kitautolu: “Ke taʻemanumanu hoʻomou toʻonga; pea mou fiemalie ʻi he ngaahi meʻa ʻoku mou maʻu ni.” (Hepelu 13:5) ʻI he fakakaukauloto atu ki ha faingamālie pisinisi, ʻoku totonu ke fakakaukau hifo ha Kalisitiane, ‘ʻOku fiemaʻu moʻoni ke u kau ki ai?’ Ko hono maʻu ha moʻui faingofua ʻo fakatefito ʻi heʻetau lotu kia Sihová te ne maluʻi kitautolu mei he “ngaahi kovi kotoa pe.”—1 Timote 6:​6-10.

Ngaahi Pole ʻOku Fehangahangai mo e Kau Kalisitiane Teʻeki Malí

 7. (a) Ko e hā ʻa e ngaahi pole ʻoku fehangahangai mo e tokolahi ʻo e kau Kalisitiane teʻeki malí? (e) ʻOku anga-fēfē ʻa e kaunga ʻa ʻetau fili ki ha hoa malí ki he mateaki ki he ʻOtuá?

⁷ ʻOku tokolahi ʻa e kau sevāniti ʻa Sihova ʻoku nau fakaʻamu ke nau mali ka ʻoku teʻeki ai ke nau maʻu ha hoa feʻungamālie. ʻI he ngaahi fonua ʻe niʻihi, ʻoku mālohi ai ʻa e tenge fakasōsiale ke malí. Ka, ko e ngaahi faingamālie ke fetaulaki mo ha hoa ki he kahaʻú ʻi he lotolotonga ʻo e kaungātuí ʻoku siʻisiʻi nai. (Palovepi 13:12) Neongo ia, ʻoku ʻiloʻi ʻe he kau Kalisitiané ko e talangofua ki he tuʻutuʻuni Fakatohitapu ke mali “i he Eiki be” ko ha tuʻunga ia ʻo e mateaki kia Sihova. (1 Kolinito 7:​39, PM) Ke tuʻumaʻu ʻo fakafepakiʻi ʻa e ngaahi tenge mo e ngaahi fakatauele ʻoku nau fehangahangai mo iá, kuo pau ai ki he kau Kalisitiane teʻeki malí ke nau mātuʻaki fakakaukau lelei maʻu pē.

 8. Ko e hā ʻa e tenge naʻe hokosia ʻe ha taʻahine Sūlemi, pea ʻoku anga-fēfē nai ʻa e fehangahangai ʻa e kau fefine Kalisitiane ʻi he ʻaho ní mo ha pole meimei tatau?

⁸ ʻI he Hiva ʻo e Hivá, naʻe tohoakiʻi ai ʻa e tokanga ʻa e tuʻí ʻe ha taʻahine tukuʻuta māʻulalo naʻe ui ko e taʻahine Sūlemí. Naʻá ne fakamalinga ki ai ʻaki ʻa e fakahāhā fakamānako ʻo e koloá, ngeiá mo e tōʻongá, neongo kuo ʻosi ʻofa ʻa e taʻahiné ia ʻi ha kiʻi talavou. (Hiva ʻo e Hiva 1:​9-11; 3:​7-10; 6:​8-10, 13) Kapau ko ha fefine Kalisitiane koe, mahalo ʻokú ke  hoko mo koe ko ha fakamaʻungaʻanga ʻo e tokanga ʻa ha taha ʻoku ʻikai te ke loto ki ai. Ko ha taha ʻi ho feituʻu ngāueʻangá, mahalo ko ha taha ʻi ha tuʻunga mafai māʻolunga, ʻoku kamata nai ke ne leaʻaki atu ha ngaahi fakavīkivikiʻi ʻoʻou, fai atu ha ngaahi ngāue lelei maʻau, pea kumi ki ha ngaahi faingamālie ke mo feohi ai. Tokanga fekauʻaki mo e tokanga fakahekeheke peheé. Neongo ko e ngaahi taumuʻa ʻa ha tokotaha pehē ʻoku ʻikai ke fakaemanako pe taʻetaau maʻu pē, ʻi he taimi lahi ʻoku pehē ia. ʻI he hangē ko e taʻahine Sūlemí, ʻai ke ke hangē ha “ʻamaka.” (Hiva ʻo e Hiva 8:​4, 10) Talitekeʻi mālohi ʻa e ngaahi fakaofiofi fakaemanako ʻoku ʻikai fiemaʻú. ʻAi ke ʻilo ʻe ho kaungāngāué mei he kamataʻangá pē ko e taha koe ʻo e Kau Fakamoʻoni ʻa Sihová, pea ngāueʻaki ʻa e faingamālie kotoa pē ke faifakamoʻoni ai kiate kinautolu. ʻE hoko ia ko ha maluʻanga kiate koe.

 9. Ko e hā ʻa e niʻihi ʻo e ngaahi fakatuʻutāmaki ʻo e hū ki ha vahaʻangatae mo ha sola ʻi he ʻInitanetí? (Toe sio ki he puha ʻi he peesi 25.)

⁹ ʻOku hoko ʻo manakoa ʻa e ngaahi Uepisaiti ʻInitaneti kuo faʻufaʻu ke tokoniʻi ʻa e faʻahinga teʻeki malí ke maʻu ha hoa malí. ʻOku vakai ʻa e niʻihi ki he ngaahi meʻá ni ko ha founga ia ke nau ʻiloʻi ai ʻa e kakai ʻa ia naʻe ʻikai te nau mei feʻilongaki mo ia ka ne taʻeʻoua ʻeni. Kae kehe, ko e hū kuikui ki ha vahaʻangatae mo ha solá ʻoku kau ai ha ngaahi tuʻunga fakatuʻutāmaki moʻoni. ʻI he ʻInitanetí, ʻe malava ke faingataʻa ke fakafaikehekeheʻi ai ʻa e moʻoní mei he taʻemoʻoní. (Sāme 26:4) ʻOku ʻikai ko e tokotaha kotoa pē ʻokú ne taku ko ha sevāniti ia ʻa Sihova pea pehē ai ʻoku moʻoni ia. ʻIkai ko ia pē, ʻi he faialea ʻi he ʻInitanetí, ʻoku malava ke tupulaki ai ha vahaʻangatae mālohi, pea ʻoku malava ke mioʻi ai ʻa ʻete ʻiloʻiló. (Palovepi 28:26) Tatau ai pē pe ʻoku fakafou ʻi he ʻInitanetí pe ʻi ha founga kehe ʻe niʻihi, ʻoku taʻefakapotopoto ke fakatupulekina ha vahaʻangatae vāofi mo ha taha ʻoku siʻi ʻaupito ʻete ʻilo ki aí.—1 Kolinito 15:33.

10. ʻE malava fēfē ke fakalototoʻaʻi ʻe he kaungātuí ʻa e kau Kalisitiane teʻeki malí?

¹⁰ Ko Sihová “ʻoku ʻofa uʻuuʻu” ʻi heʻene kau sevānití. (Semisi 5:11) ʻOkú ne ʻafioʻi ko e ngaahi pole ʻoku fehangahangai mo e kau Kalisitiane ko ia ʻoku nau teʻeki mali ʻo ʻikai ko e fili ki aí ʻoku fakalotofoʻi ia ʻi he taimi ʻe niʻihi, pea ʻokú ne koloaʻaki ʻenau mateakí. ʻE malava fēfē ki he niʻihi kehé ke nau fakalototoʻaʻi kinautolú? ʻOku totonu ke tau fakaongoongoleleiʻi maʻu pē kinautolu ʻi heʻenau talangofuá mo e laumālie ʻo e feilaulauʻi-kitá. (Fakamaau 11:​39, 40) ʻE malava foki ke tau fakakau kinautolu ʻi heʻetau ngaahi fokotuʻutuʻu ki ha feohi fakatupu langa haké. Kuó ke fai pehē ki muí ni mai? ʻIkai ko ia pē, ʻoku malava ke tau lotu maʻanautolu, ʻo kole kia Sihova ke tokoniʻi kinautolu ke nau tauhi maʻu ʻenau mafamafatatau fakalaumālié pea maʻu ʻa e fiefia ʻi he tauhi kiate iá. ʻAki ʻetau mahuʻingaʻia loto-moʻoní, ʻofa ke tau fakahāhā ʻoku tau koloaʻaki ʻa e faʻahinga mateakí ni ʻo hangē ko ia ʻoku fai ʻe Sihová.—Sāme 37:28.

 Ko e Feangai mo e Ngaahi Palopalema Fakaemoʻuileleí

11. Ko e hā ʻa e ngaahi pole ʻoku fakahoko mai ʻe he ngaahi palopalema mafatukituki fakaemoʻuileleí?

¹¹ He fakalotomamahi ē ka ko e taimi ʻoku tau fehangahangai ai pe ko ha taha ʻoku tau ʻofa ai mo e ngaahi palopalema fakaemoʻuileleí! (Aisea 38:​1-3) Lolotonga ʻetau feinga ke maʻu ha faitoʻo ola leleí, ʻoku mātuʻaki mahuʻinga ke tau pikimaʻu ki he ngaahi tefitoʻi moʻoni Fakatohitapú. Ko e fakatātaá, ʻoku tokanga ʻa e kau Kalisitiané ke talangofua ki he fekau ʻa e Tohi Tapú ke fakaʻehiʻehi mei he totó, pea ʻoku nau fakamamaʻo mei ha faʻahinga founga sivi pe ngāue fakafaitoʻo ʻoku felāveʻi mo e fakahaʻele faʻahikehé. (Ngāue 15:​28, 29; Kaletia 5:​19-21) Kae kehe, ko e faʻahinga ko ia ʻoku ʻikai ha ʻilo fakafaitoʻó, ko e fakakaukau lahi ki he ngaahi fili fekauʻaki mo e faitoʻó ʻe lava ke fakapuputuʻu mo fakatupu lōmekina. Ko e hā ʻe lava ke ne tokoniʻi kitautolu ke tau mātuʻaki fakakaukau lelei maʻu peé?

12. ʻE malava fēfē ke tauhi maʻu ʻe ha Kalisitiane ʻene mafamafatataú ʻi he fakakaukau atu ki he ngaahi fili ki ha faitoʻó?

¹² “Ko e fakapotopoto ʻoku ne fakakaukau ʻene laka” ʻaki hono fai ha fekumi ʻi he Tohi Tapú mo e ngaahi tohi faka-Kalisitiane ʻoku pulusí. (Palovepi 14:15) ʻI he ngaahi feituʻu ʻo e māmaní ʻa ia ʻoku siʻi ai ʻa e kau toketaá mo e ngaahi falemahakí, ko e faitoʻo pē nai ʻoku ala maʻú ko e faitoʻo tukufakaholó, ʻa ē ʻoku ngāueʻaki ai ʻa e ngaahi ʻakau faitoʻó. Kapau te tau fakakaukau atu ki he faitoʻo peheé, ʻe lava ke tau maʻu ha fakamatala ʻaonga ʻi he tatau ʻo e Taua Leʻo, Nōvema 1, 1987, peesi 21-4. ʻOkú ne fakaʻilo mai kiate kitautolu ʻa e ngaahi fakatuʻutāmaki ʻe malava ke hokó. Ko e fakatātaá, ʻoku fiemaʻu nai ke tau ʻilo ʻa e meʻá ni: ʻOku ʻiloa ʻa e tokotaha faitoʻo tukufakaholó ʻokú ne ngāueʻaki ʻa e fakahaʻele faʻahikehé? ʻOku fakatuʻunga ʻa e faitoʻó ʻi he tui ko e mahamahakí mo e maté ʻoku tupu ia mei he ngaahi ʻotua kuo loto-mamahi (pe ngaahi laumālie ʻo e fanga kuí) pe mei he ngaahi fili ʻoku nau ngāueʻaki ʻa e tōʻonga fakafaimaná? ʻOku ngāueʻaki ʻa e ngaahi feilaulau, ngaahi laulau fakafaimana, pe ngaahi tōʻonga fakahaʻele faʻahikehe ʻi hono teuteu pe ngāueʻaki ʻo e faitoʻó? (Teutalonome 18:​10-12) ʻE tokoniʻi kitautolu ʻe he fekumi peheé ke tau tokanga ki he akonaki fakamānavaʻi: “ʻIlonga pe ʻa e lelei, puke maʻu ia.” b (1 Tesalonaika 5:21) ʻE tokoniʻi ai kitautolu ke tauhi maʻu ʻetau mafamafatataú.

13, 14. (a) ʻE malava fēfē ke tau fakahāhaaʻi ʻa e anga-fakaʻatuʻí ʻi he tokanga ki heʻetau moʻuilelei fakasinó? (e) Ko e hā ʻoku fiemaʻu ai ʻa e anga-fakaʻatuʻí ʻi heʻetau fetalanoaʻaki mo e niʻihi kehé ki he moʻuileleí mo e ngaahi meʻa fakafaitoʻó?

¹³ ʻOku fiemaʻu ʻa e anga-fakaʻatuʻí ʻi he ngaahi tafaʻaki kotoa pē ʻo e moʻuí, ʻo kau ai ʻa e tokanga ki heʻetau moʻuilelei fakasinó. (Filipai 4:​5, NW) Ko hono fai ha tokanga mafamafatatau ki heʻetau moʻuileleí ʻoku fakahaaʻi ai ʻa e houngaʻia ki he meʻaʻofa mātuʻaki mahuʻinga ko e moʻuí. ʻI heʻetau fehangahangai mo ha ngaahi palopalema fakaemoʻuilelei, ʻoku tuha moʻoni ia mo ʻetau tokangá. Kae kehe, ʻe ʻikai ala maʻu ʻa e moʻuilelei haohaoá ia kae ʻoua kuo aʻu ki he taimi ʻa e ʻOtuá ki “he faitoʻo ʻo e ngaahi kakai.” (Fakahā 22:​1, 2) Kuo pau ke tau maluʻi kitautolu ke ʻoua ʻe hoko ʻo mātuʻaki nōfoʻi ʻi he moʻuilelei fakasinó ʻo tekeʻi ai ki tafaʻaki ʻa ʻetau ngaahi fiemaʻu fakalaumālie mahuʻinga angé!—Mātiu 5:3; Filipai 1:10.

¹⁴ ʻOku toe fiemaʻu foki ke tau fakahāhā ʻa e mafamafatataú mo e anga-fakaʻatuʻí ʻi he fetalanoaʻaki mo e niʻihi kehé ki he moʻuileleí mo e ngaahi meʻa fakafaitoʻó. ʻOku ʻikai totonu ke hanga ʻe he ngaahi tuʻunga-leá ni ʻo puleʻi ʻetau ngaahi fetalanoaʻakí ʻi he taimi ʻoku tau fakatahataha ai ki he feohi fakalaumālie ʻi he ngaahi fakataha faka-Kalisitiané mo e ngaahi ʻasemipilií. ʻIkai ngata aí, ʻoku faʻa kau ki he ngaahi fili fakafaitoʻó ʻa e ngaahi tefitoʻi moʻoni Fakatohitapú, ko e konisēnisi ʻo ha taha pea mo hono vahaʻangatae mo Sihová. Ko ia ai, ʻe hoko ko e taʻeʻofa ia ke fiemuaʻi atu ʻetau ngaahi  fakakaukaú ki ha kaungātui pe tenge ia ke tukunoaʻi ʻa e angi ʻa hono konisēnisí. Neongo ʻe fai nai ha kole tokoni ki he faʻahinga matuʻotuʻa ʻi he fakatahaʻangá, ko e Kalisitiane taki taha kuo pau ke ne “fua ʻene kavenga aʻana” fekauʻaki mo e fatongia ki hono fai ha ngaahi filí, pea “te tau taki taha fai ha fakamatala ki he ʻOtua maʻata.”—Kaletia 6:5; Loma 14:​12, 22, 23.

Taimi ʻOku Tau Loto-Mafasia Aí

15. ʻE malava fēfē ke uesia kitautolu ʻe he ngaahi tuʻunga fakamafasiá?

¹⁵ ʻOku malava ʻe he ngaahi tuʻunga fakamafasiá ʻo fakatupunga naʻa mo e kau sevāniti mateaki ʻa Sihová ke nau lea pe ngāue taʻefakapotopoto. (Koheleti 7:7) ʻI he tofanga ʻi ha ʻahiʻahi kakaha, naʻe hoko ʻa Siope ʻo kiʻi taʻemafamafatatau pea naʻe pau ke fakatonutonu ai ʻene fakakaukaú. (Siope 35:​2, 3; 40:​6-8) Neongo “ko Mosese nae agavaivai ia, o lahi hake i he kau tagata kotoabe nae i he fuga o mamani,” ʻi he taimi ʻe taha naʻá ne hoko ai ʻo loto-ʻingo pea lea loto-ʻoho. (Nomipa 12:​3, PM; 20:​7-12; Sāme 106:​32, 33) Naʻe fakahāhaaʻi ʻe Tēvita ʻa e mapuleʻi-kita lelei ʻi he ʻikai ke ne taaʻi ʻa Tuʻi Saulá, ka ʻi hono tuku hifo ia ʻe Nāpale mo teketekelili ki heʻene kau tangatá, naʻe hoko ai ʻa Tēvita ʻo ʻita pea mole meiate ia ʻa ʻene fakakaukau leleí. Naʻá ne toki toe maʻu mai pē ʻene fakakaukau fakapotopotó ʻi he tuʻu vahaʻa ʻa ʻApikale ʻo fai ʻa e fakaleleí, ʻo mālō pē hono fakahaofi ai ia mei ha fehālaaki fakatupu ʻauha.—1 Samiuela 24:​2-7; 25:​9-13, 32, 33.

16. Ko e hā ʻe lava ke ne tokoniʻi kitautolu ke tau fakaʻehiʻehi ai mei he ngāue loto-ʻohó?

¹⁶ Ko kitautolu foki ʻoku tau fehangahangai nai mo ha ngaahi tuʻunga fakamafasia ʻoku malava ke ne toʻo atu ʻetau fakakaukau leleí. Ko hono fua-tautau fakalelei ʻa e vakai ʻa e niʻihi kehé, hangē ko ia naʻe fai ʻe Tēvitá, ʻe lava ke tokoniʻi ai kitautolu ke tau fakaʻehiʻehi mei he ngāue loto-ʻohó mo e fakavave ki he angahalá. (Palovepi 19:2) ʻIkai ngata aí, ʻoku enginaki mai ʻa e Folofola ʻa e ʻOtuá kiate kitautolu: “Mou tetetete [pe hohaʻa tuʻu], ʻo ʻouae faihala. Fakalaulauloto ʻi homou mohenga ʻouae lea.” (Sāme 4:4) ʻO ka malava, ʻoku fakapotopoto ke tatali kae ʻoua leva ke tau nonga hifo ki muʻa ke fai ha meʻa pe ko hono fai ha ngaahi fili. (Palovepi 14:​17, 29) ʻOku malava ke tau hanga kia Sihova ʻi he lotu tōtōivi, “pea ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi [hotau] loto mo [ʻetau] ngaahi fakakaukau ʻia Kalaisi Sisu.” (Filipai 4:​6, 7) ʻE fokotuʻu maʻu kitautolu ʻe he nonga ko ʻeni ʻoku foaki mai ʻe he ʻOtuá pea mo tokoniʻi kitautolu ke tau mātuʻaki fakakaukau lelei maʻu pē.

17. Ko e hā kuo pau ai ke tau falala kia Sihova ka tau mātuʻaki fakakaukau lelei maʻu peé?

¹⁷ Neongo ʻetau ngaahi feinga lelei taha ke fakaʻehiʻehi mei he ngaahi fakatuʻutāmakí pea ngāue fakapotopotó, ko kitautolu kotoa ʻoku tau fai ʻa e ngaahi fehālaaki. (Semisi 3:2) ʻOku malava ke tau fai ha foʻi laka hala fakatupu ʻauha pea mātuʻaki taʻeʻilo ki ai. (Sāme 19:​12, 13) ʻIkai ngata aí, ʻi he tuʻunga ko e ngaahi meʻamoʻui fakaetangatá, kuo ʻikai ke tau maʻu ʻa e malava pe ko e totonu ke tataki ʻetau ngaahi laka ʻatautolú ʻo mavahe meia Sihova. (Selemaia 10:23) He houngaʻia ē ko kitautolu heʻene fakapapauʻi mai: “Ko au teu fakabotoʻi koe mo akonakiʻi koe i he hala aia te ke alu ai: teu fakahinohino koe aki hoku mata.” (Sāme 32:​8, PM) ʻIo, ʻaki ʻa e tokoni ʻa Sihová, ʻe malava ai ke tau mātuʻaki fakakaukau lelei maʻu pē.

[Fakamatala ʻi lalo]

ʻE Anga-Fēfē Haʻo Tali?

ʻE malava fēfē ke tau fakakaukau lelei maʻu pē

• kapau ʻoku tuʻuaki mai ha faingamālie pisinisi?

• ʻi he kumi ki ha hoa mali?

• ʻi he fehangahangai mo e ngaahi palopalema fakaemoʻuileleí?

• ʻi he tofanga mo e loto-mafasiá?

[Fehuʻi ki he Ako]

[Puha ʻi he peesi 25]

ʻE Lava Ke Ke Falala ki Ai?

Ko e ngaahi fakaʻikaiʻi ko ʻení ʻoku hā ia ʻi he ngaahi Uepisaiti ki he kau teʻeki malí:

“Naʻa mo ʻetau ngaahi feinga lelei tahá, ʻoku ʻikai ha fakapapauʻi mai ai ʻa e tuʻunga moʻoni ia ʻo ha taha.”

“ʻOku ʻikai te mau fakapapauʻi ʻa e totonu, kakato pe ʻaonga ʻo ha faʻahinga fakamatala pē ʻi he sēvesi fetuʻutakí.”

“Ko e ngaahi fakakaukau, faleʻi, ngaahi fakamatala, ngaahi fokotuʻu, pe fakamatala kehe pe ngaahi meʻa ʻoku ʻai ʻo ala maʻu fakafou ʻi he sēvesi [ko ʻení] ko e ngaahi meʻa ʻa honau kau faʻú tonu . . . pea ʻoku ʻikai totonu ke falala ki ai.”

[Fakatātā ʻi he peesi 23]

“Ko e fakapotopoto ʻoku ne fakakaukau ʻene laka”

[Fakatātā ʻi he peesi 24, 25]

ʻE malava fēfē ʻa e kau fefine Kalisitiané ʻo faʻifaʻitaki ki he taʻahine Sūlemí?

[Fakatātā ʻi he peesi 26]

“ʻIlonga pe ʻa e meʻa lelei, puke maʻu ia”