ʻI Hono Ngāueʻaki ʻo e Mafaí, Faʻifaʻitaki kia Kalaisi

ʻI HA ngaahi taʻu ki muʻa, naʻe maʻu ai mei ha tesi ʻo e tōʻonga fakaetangatá ha ngaahi ola fakatupu tokanga. Ko e faʻahinga naʻe kau ki aí naʻe vahe ki he kulupu ʻe ua. Ko e kulupu ʻe taha naʻe vaheʻi ia ke nau leʻohi mo puleʻi ʻa e kulupu ʻe tahá, ʻa ia naʻe vaheʻi ke nau hoko ko e kau pōpula. Ko e hā naʻe hokó?

“ʻI ha ngaahi ʻaho siʻi,” naʻe līpooti ai, “ko e tokolahi taha ʻo e [kau leʻó] ne nau hoko ʻo fakatupu kē mo houtamaki, ʻo toutou tuʻutuʻuni ha tautea, lolotonga ia ko e kau pōpulá ne nau hoko ʻo peʻe mo fakalai.” Ko e fakamulituku ne aʻu ki ai ʻa e kau fakatotoló naʻe peheni: Meimei ko ha taha pē ʻe lava ke tō ʻi he tauhele ʻo hono ngāuehalaʻaki ʻo e mafaí.

Mafai​—Ngāuetotonuʻaki mo e Ngāuehalaʻaki

Ko e ngāuetotonuʻaki ʻo e mafaí, ko e moʻoni, ʻe lava ke hoko ia ko ha tākiekina ki he leleí. ʻE lava ke ne tokonaki ha tataki feʻungamālie ʻo lava ke iku ia ki he ngaahi ʻaonga fakaesino, fakaeongo mo fakalaumālie. (Palovepi 1:5; Aisea 48:​17, 18) Kae kehe, hangē ko ia naʻe fakahā ʻe he tesi ʻoku lave ki ai ʻi ʻolungá, ʻoku ala hoko maʻu pē ʻa e matuʻutāmaki ʻo e fuʻu tōtuʻa mei he tuʻunga totonu ʻo hono ngāueʻaki ʻo e mafaí. ʻOku tuhu ʻa e Tohi Tapú ki he matuʻutāmaki ko ení ʻo pehē: “ʻOka pule ʻa e angahala, ʻoku laungatuʻu ʻa e kakai.”​—Palovepi 29:2; Koheleti 8:9.

Ko hono ngāuekoviʻaki ha mafai ʻo ha taha ʻoku fakatuʻutāmaki, naʻa mo hono fai ia ʻi ha taumuʻa totonú. Ko e fakatātaá, ki muí ni mai, naʻe kole fakamolemole ai ha kulupu ako fakalotu ʻi ʻAilani ki he kakaí ki he founga naʻe ngāuekoviʻaki ai ʻe he kau faiako ʻe niʻihi honau mafaí ki he fānau naʻa nau tokangaʻí. ʻOku ʻikai ha veiveiua, ko e ngaahi taumuʻa ʻo e tokolahi ʻo e kau faiako ko ení naʻe lelei pē, ka ko e ngaahi founga naʻe ngāueʻaki ʻe he niʻihi naʻe fuʻu fakatupu maumau ʻaupito. Naʻe līpooti ʻe ha nusipepa ʻe taha ʻo pehē “ko e fānau tokolahi [naʻa nau] lavea ʻi ha faʻahinga founga ʻi he founga fuʻu fakamālohi mo fefeka ʻa e fanga tokoua faiako tokolahi.” (The Irish Times) ʻE lava fēfē leva, ke ke ngāueʻaki ho mafaí ke ʻai ke fai ai ʻe he niʻihi kehé honau lelei tahá kae ʻikai fakaʻitaʻi mo fakalotomamahiʻi kinautolu ʻi ha lea pe tōʻonga?​—Palovepi 12:18.

Kuo Tuku kia Sīsū ʻa e “Mafai Kotoa Pē”

Fakakaukau ki he faʻifaʻitakiʻanga ʻa Sīsū Kalaisí. Ki muʻa siʻi ke ne ʻalu hake ki hēvaní, naʻá ne tala ange ki heʻene kau ākongá: “Kuo tuku kiate au ʻa e mafai kotoa pē ʻi hēvani pea ʻi he māmaní.” (Mātiu 28:​18, NW) Naʻe tō nai ai ha manavahē ʻi ha faʻahinga founga ki heʻene kau ākongá? Naʻa nau ongoʻi nai ʻe tapua meia Sīsū he taimi ko ení ʻa e laumālie tatau hangē ko e ngaahi Sisa ʻo  Lomá, ʻa ia naʻe ʻiloa ʻi heʻenau laiki ʻa e fakafepakí mo e angatuʻú?

ʻOku tali mālohi mai ʻe he lēkooti ʻo e Tohi Tapú ʻikai! ʻOku fakahoko ʻe Sīsū Kalaisi ʻa e mafaí ʻi he founga tatau hangē ko e fai ʻene Tamaí. Neongo ko Sihova ko e Hau Fakaleveleva māfimafi-aoniu totonú ia, ʻokú ne fiemaʻu ʻa e ngāue loto-fiefai mei hono kakaí, ʻo ʻikai ko e talangofua taʻefakakaukau, manavahē pe fakapōpula. (Mātiu 22:37) ʻOku ʻikai ʻaupito ngāuekoviʻaki ʻe Sihova hono mafaí. ʻOku fakahā ʻa e meʻá ni ʻe ha vīsone fakatoʻoaloto naʻe ʻoange ki he palōfita ko ʻIsikelí.

ʻI he vīsone ko ení, naʻe sio ai ʻa ʻIsikeli ki he ngaahi meʻamoʻui fakaeʻāngelo ʻe fā ʻoku nau pouaki ʻa e tuʻunga-hau ʻo e ʻOtuá. Naʻe taki taha ʻi ai hono mata ʻe fā. “Ko e tatau ʻo honau mata,” ko e tohi ia ʻe ʻIsikelí, “ko e mata ʻo e tangata; pea mei toʻomataʻu naʻe maʻu ʻe he Toko Fa ʻa e mata ʻo e laione; pea maʻu ʻe he Toko Fa ʻi toʻohema ʻa e mata ʻo e pulu; pea maʻu ʻe he Toko Fa ʻa e mata ʻo e ikale.” (Isikeli 1:10) Ko e ngaahi mata ʻe fā ko ení ʻoku nau fakafofongaʻi ʻa e ngaahi anga pe ʻulungāanga tefito mafamafatatau haohaoa ʻe fā ʻo e ʻOtuá. ʻOku fakamahino eni ʻe he Folofola ʻa e ʻOtuá ko e: ʻofa, ʻa ia ʻoku fakafofongaʻi ʻe he mata ʻo e tangatá; fakamaau totonu, ʻa ia ʻoku fakafofongaʻi ʻe he mata ʻo e laioné; mo e poto, ʻa ia ʻoku fakafofongaʻi ʻe he mata ʻo e ʻīkalé. Ko e ngaahi ʻulungāanga ʻe tolu ko ení ʻoku nau ngāue fakataha mo hono faá​​—ko e mālohí, ʻa ia ʻoku fakahaaʻi ʻe he mata ʻo e pulú. ʻOku ʻuhinga kotoa eni ki he hā? ʻOku fakahā ʻe he vīsoné ko Sihová ʻoku ʻikai ʻaupito te ne ngāueʻaki hono mālohi taʻefakangatangatá mo hono mafaí ʻi ha founga ʻoku ʻikai fehoanaki mo hono ngaahi anga tefito kehé.

ʻI he faʻifaʻitaki ki heʻene Tamaí, ʻoku fakahoko maʻu pē ʻe Sīsū Kalaisi hono mafaí ʻi ha founga ʻoku feongoongoi haohaoa mo ʻene ʻofá, potó mo e fakamaau totonú. Naʻe ʻilo maʻu pē ʻe heʻene kau ākongá ha fakaivimālohi lahi ʻi heʻenau ngāue ʻi he malumalu ʻo e mafai ʻo Sīsuú. (Mātiu  11:​28-30) Kapau ʻoku ʻi ai ha ʻulungāanga ʻoku ʻiloʻiʻaki fakatouʻosi ʻa Sihova mo Sīsū Kalaisi, ko e ʻofá, ʻikai ko e mālohí pe mafaí!​—1 Kolinito13:13; 1 Sione 4:8.

ʻOku Fēfē Hoʻo Ngāueʻaki Ho Mafaí?

ʻOku fēfē tuʻunga ʻokú ke aʻu ki ai felāveʻi mo e meʻá ni? Ko e fakatātaá, ʻi he fāmilí, ʻokú ke puleʻi ʻa e ngaahi meʻá koeʻuhi ko ho mafaí naʻa mo e taimi ʻoku ʻuhinga ai eni ko e vilitaki ki he saiʻia mo e manako pē ʻaʻaú? ʻOku tali ʻe he niʻihi kehe ʻi ho fāmilí hoʻo ngaahi filí ʻi he manavahē pe ʻi he ʻofa? Ko hoʻo mālohi angé ʻa e ʻuhinga ʻoku fai aí? Ko e ngaahi fehuʻi eni ʻe lava ke fakakaukau ki ai ʻa e ngaahi ʻuluʻi fāmilí fakataha mo e vakai atu ki hono pouaki ʻa e maau fakateokalati ʻi he fokotuʻutuʻu fakafāmilí.​—1 Kolinito 11:3.

Fēfē kapau ʻokú ke maʻu ha kiʻi mafai ʻi he fakatahaʻanga Kalisitiané? Ke vakaiʻi pe ʻokú ke fai totonu ia, fua koe ki he ngaahi tefitoʻi-moʻoni ko eni naʻe fakamānavaʻi ʻe ʻOtua Sihova pea fakahāhaaʻi ʻe Sīsū Kalaisí.

“Ko e tamaioʻeiki ʻa e ʻEiki . . . ke ne angalelei ki he kakai kotoa pe . . . ke ne makataki ʻa e kovi: ke ne fai angamalū ʻene tautea [pe fakahinohino] ʻa kinautolu ʻoku fakatauʻilea.”​—2 Timote 2:​24, 25.

Ko e niʻihi tāutaha ʻi he muʻaki fakatahaʻanga Kalisitiané naʻa nau ngāueʻaki ʻa e mafai lahi. Ko e fakatātaá, ko Tīmote, naʻe aʻu ʻo malava ke ne “fekau ha niʻihi ke tuku ʻenau akoʻaki ʻa e meʻa kehe.” (Fakaʻītali ʻamautolu; 1 Timote 1:3) Neongo ia, ʻoku pau moʻoni naʻe tapua atu ʻe Tīmote ʻa e ngaahi anga fakaʻotuá ʻi he meʻa kotoa naʻá ne faí, he ʻoku ʻikai ha veiveiua naʻá ne fai ʻo fehoanaki mo e akonaki ʻa Paula ke fakahinohino ʻi he “angamalū” pea ke “angalelei ki he kakai kotoa pe” ʻi hono fakahoko hono fatongia tauhi faka-Kalisitiané. Koeʻuhi ko iá naʻá ne mātuʻaki kei siʻi, naʻe pau ke ne feangainga hangē ko ha foha ʻapasia ki he faʻahinga taʻumotuʻa angé pea ko ha tokoua tokangaekina ʻo e faʻahinga taʻu iiki angé. (1 Timote 5:​1, 2) ʻI he malumalu ʻo e tokanga anga-ʻofa peheé, ʻoku tapua atu ai ʻi he fakatahaʻanga Kalisitiané ʻa e laumālie ʻo ha fāmili māfana mo ʻofa, kae ʻikai ko ia ʻo ha kautaha pisinisi momoko mo anga-kovi.​—1 Kolinito 4:​14; 1 Tesalonaika 2:​7, 8.

“Ko kinautolu ʻoku pule ki he Senitaile ʻoku nau fakafieʻeiki ki he kakai, pea ko honau kau maʻolunga ʻoku nau fakamoʻulaloaʻi ʻa e kakai. Ka ʻe ʻikai pehe ʻiate kimoutolu: ka ko ia ʻoku ne holi ke hoko ko e lahi ʻiate kimoutolu te ne nofo ko homou sevaniti.”​—Mātiu 20:​25, 26.

Ko e kau pule taʻeʻofa fakamāmaní “ʻoku nau fakafieʻeiki” ki he niʻihi kehé ʻaki hono hilifaki ʻa e meʻa ʻoku nau loto ki aí ʻia kinautolu pea vilitaki ke nau fai ʻa e ngaahi meʻá ʻi ha founga pau, ʻo fakamanamanaʻaki ʻa e tautea kapau te nau talangataʻa. Kae kehe, ko Sīsū Kalaisí naʻá ne fakamamafaʻi ʻa e ngāue fakasevāniti ki he niʻihi kehé ʻo ʻikai tenge kinautolu. (Mātiu 20:​27, 28) Naʻá ne feangainga maʻu pē ki heʻene kau ākongá ʻi ha  founga anga-ʻofa mo tokangaekina. ʻI hoʻo muimui ki he faʻifaʻitakiʻanga ʻa Sīsuú, ʻoku faingofua ange ai ki he niʻihi kehé ke ngāue fakataha mo koe. (Hepelu 13:​7, 17) ʻOkú ne toe ʻai foki ke faingofua lahi ange kia kinautolu ke ‘alu maile e ua’ kapau te nau malava, ʻo fai loto-fiefai ia ʻo ʻikai ʻi ha fakamālohiʻi.​—Mātiu 5:​41, PM.

“Tauhi ʻa e fanga sipi ʻa e ʻOtua ʻoku ʻiate kimoutolu, ʻo ʻoua . . . te mou fakafieʻeiki ki he ngaahi potungaue, kae hoko ko e faʻifaʻitakiʻanga ki he fanga sipi.”​—1 Pita 5:​2, 3.

Ko e kau ʻovasia ʻi he ʻaho ní ʻoku nau ʻilo ʻoku nau tali ui ki he ngaahi lelei fakalaumālie ʻa e kotoa ʻi he fakatahaʻangá. ʻOku nau fua fakamātoato ʻa e fatongia ko ení. ʻI hono tokangaʻi ʻa e tākanga ʻa e ʻOtuá, ʻoku nau feinga ke fai loto-fiefai ia, vēkeveke pea ʻi he founga anga-ʻofa. Hangē ko e ʻapositolo ko Paulá, ʻoku nau ngāue mālohi ke langa hake mo fakamālohi hake ʻa e tui ʻa e faʻahinga ko ia ʻoku nau tokangaʻí, ʻo ʻikai fai ko e fakafieʻeiki ki heʻenau tuí.​—2 Kolinito 1:​24.

ʻO ka ʻi ai leva ha fiemaʻu ke fai ha akonaki feʻungamālie, ʻoku fai ia ʻe he kau mātuʻá ʻi ha laumālie ʻo e anga-malū ke fakatonutonu ha taha laka hala, pe ke tokoniʻi ha kaungā Kalisitiane ke fakalakalaka fakalaumālie. ʻOku nau manatuʻi ʻa e fakamanatu ʻa e ʻapositolo ko Paulá: “Kainga, neongo pe ʻe puke nima ha taha lolotonga ʻene fai ha kovi; ka ko kimoutolu, ʻa e kau fakalaumalie, mou faitoʻo ki ha taha pehe ʻo angafakaalaala; pea ke vakai kiate koe naʻa ʻiloange ʻe ʻahiʻahiʻi mo koe foki.”​—Kaletia 6:1; Hepelu 6:​1, 9-​12.

“Ka ai ha taha ʻoku ne koviʻia ʻi ha taha ʻi ha meʻa, ke mou fekatakiʻaki pe mo fefakamolemoleʻaki . . . Mou kofutuʻaʻaki ʻa e ngaahi meʻa ko ia katoa ʻa e ʻofa, ʻa ia ko e fakamaʻu ʻo e haohaoa.”​—Kolose 3:​13, 14.

ʻOku fēfē hoʻo feangainga ki ha taha ʻoku taʻemalava nai ke ne aʻusia haohaoa ʻa e ngaahi tuʻunga ki he Kalisitiané? ʻOkú ke tuku ha kiʻi ʻatā koeʻuhi ko ʻenau taʻehaohaoá, hangē ko ia ʻoku fai ʻe Sihova mo Sīsū Kalaisí? (Aisea 42:​2-4) Pe ʻokú ke vilitaki pē koe ke ngāueʻaki ʻa e kupu ʻo e laó ʻi he tuʻunga kotoa pē? (Sāme 130:3) Manatuʻi, ʻoku feʻungamālie ke fakahāhā ʻa e anga-molū ʻo ka malava pea tuʻumaʻu pē ʻi he taimi ʻoku fiemaʻu aí. Ko e fai ʻi he ʻofá ʻe tokoni ia ke faʻu ai ha haʻi mālohi ʻo e fefalalaʻaki mo e fetuipauʻaki ʻi he vahaʻa ʻoʻou mo e faʻahinga ʻoku ngāueʻaki ki ai ho mafaí.

Kapau kuo tuku atu kia koe ha faʻahinga mafai, ngāue mālohi ke faʻifaʻitaki kia Sihova ʻOtua mo Sīsū Kalaisi ʻi hono ngāueʻaki iá. Manatu ki he fakatātā lelei lahi naʻe tā mai ʻe he tangata-tohi-sāmé ʻi hono fakamatalaʻi ʻa e founga ʻoku ngāueʻaki ai ʻe Sihova hono mafaí ki hono kakaí. Naʻe hiva ʻa Tēvita: “Ko hoku tauhi ʻa Sihova; ʻe ʻikai te u masiva. ʻOku ne fakatokoto au he ngaahi toafa lau mukomuka; ʻoku ne taki au ki he ngaahi vai fakanonga. Ko hoku laumalie ʻoku ne fakafoki: ʻoku ne taki au ʻi he ngaahi hala ʻo e maʻoniʻoni; ko hono ʻuhinga e [ko] hono [huafa] pe.” ʻI he tuʻunga meimei tatau, fekauʻaki mo Sīsū, ʻoku tau lau: “Ko au ko e Tauhi Lelei: pea ʻoku te ʻilo ʻa e ngaahi meʻa aʻata, pea ʻoku ʻilo kita ʻe he ngaahi meʻa aʻata, ʻo hange ʻoku ʻilo au ʻe he Tamai, pea mo ʻeku ʻilo ʻa e Tamai ʻe au. Pea ʻoku ou ʻatu ʻeku moʻui koeʻuhi ko e fanga sipi.” Ko e hā ha toe ongo faʻifaʻitakiʻanga ʻe lava ke tau maʻu ʻo e ngāueʻaki anga-ʻofa ʻo e mafaí?​—Sāme 23:​1-3; Sione 10:​14, 15.

[Fakamatala ʻi he peesi 18]

Ko e ngāueʻaki ko ia ʻe Sihova hono mālohí ʻoku feongoongoi haohaoa maʻu pē mo ʻene fakamaau totonú, potó mo e ʻofá

[Fakatātā ʻi he peesi 18]

ʻI he taimi ʻe niʻihi, kuo pau ki he kau mātuʻá ke nau ʻoatu ʻa e akonaki anga-ʻofa ki he kau faihalá

[Fakatātā ʻi he peesi 19]

Naʻe akonekina ʻe Paula ʻa Tīmote ke feangainga hangē ko ha foha ʻapasia mo ha tokoua tokangaekina

[Fakatātā ʻi he peesi 20]

ʻOku ngāueʻaki ʻe Sīsū hono mafaí ʻi ha founga poto, totonu mo ʻofa