Ngaahi Fehuʻi mei he Kau Lautohí

Ko e hā ʻe lava ke tau ako mei he meʻa ne tapui ʻoku ʻi he Ekisoto 23:19: “ʻE ʻikai te ke haka ha kiʻi kosi i he huhuʻa [huhu] o ʻene faʻe”?

Ko e tuʻutuʻuni ko ʻeni ʻo e Lao ʻa Mōsesé, ʻa ia ʻoku hā tuʻo tolu ʻi he Tohi Tapú, ʻe lava ke ne tokoniʻi kitautolu ke tau mahinoʻi ʻa e vakai ʻa Sihova ʻo fekauʻaki mo e meʻa ʻoku totonú, ko ʻene manavaʻofá pea mo ʻene anga-fakaʻatuʻí. ʻOku toe fakamamafaʻi ai foki ʻa ʻene fakaliliʻa ʻi he lotu loí.—Ekisoto 34:26; Teutalonome 14:21.

Ke haka ha kiʻi kosi pe ha toe manu kehe ʻi he huʻa huhu ʻo ʻene faʻeé ʻe fepaki ia mo e fokotuʻutuʻu fakaenatula ʻa Sihova ki he ngaahi meʻá. Naʻe tokonaki ʻe he ʻOtuá ʻa e huʻa huhu ʻo e faʻeé ke fafangaʻaki ʻa e ʻuhikiʻi kosí ʻo tokoniʻi ai ia ke ne tupu. Ko hono haka ʻa e kiʻi kosí ʻi he huʻa huhu ʻo ʻene faʻeé tonu, ʻi hono fakalea ʻe ha mataotao ʻe taha, ʻe hā ai “ʻa e taʻefakaʻapaʻapa ki he vahaʻangatae ʻa ia kuo ʻosi fokotuʻu ʻe he ʻOtuá pea fakatoputapuʻi ʻi he vā ʻo e mātuʻá pea mo e fānaú.”

Tānaki atu ki ai, ʻoku fakahuʻunga ʻa e niʻihi ʻo pehē ko hono haka ha kiʻi kosi ʻi he huʻa huhu ʻo ʻene faʻeé kuo hoko nai ia ko ha ouau fakapangani naʻe fakahoko ke ʻomai ʻaki ʻa e ʻuhá. Kapau ko e tuʻungá ia, ko e tapuí naʻe ʻai ia ke maluʻiʻaki ʻa e kau ʻIsilelí mei he ngaahi tōʻonga fakalotu taʻefakapotopoto mo taʻeʻofa ʻa e ngaahi puleʻanga takatakai kiate kinautolú. Naʻe tapui fakahangatonu ʻe he Lao ʻa Mōsesé ke ʻaʻeva ʻa e kau ʻIsilelí ʻi he ngaahi tuʻutuʻuni ʻa e ngaahi puleʻanga ko iá.—Livitiko 20:23.

Fakaʻosí, ʻoku tau sio ʻi he lao tonu ko ʻení ki he manavaʻofa ongongofua ʻa Sihová. Ko hono moʻoní, naʻe ʻi he Laó ʻa e ngaahi tuʻutuʻuni meimei tatau ki hono ngaohikoviʻi ʻa e fanga manú pea maluʻi ai mei he ngāue ʻoku fepaki mo e fokotuʻutuʻu fakanatula ʻo e ngaahi meʻá. Hangē ko ʻení, naʻe kau ʻi he Laó ʻa e ngaahi tuʻutuʻuni ʻo tapui ai ʻa hono feilaulauʻi ʻo ha manu kae ʻoua leva kuo ʻosi ʻi heʻene faʻeé he ʻaho ʻe fitu pe laka hake, ko hono tāmateʻi fakatouʻosi ha manu mo hono ʻuhikí ʻi he ʻaho tatau, pea mo hono ʻave fakatouʻosi mei ha pununga ha manupuna mo hono ngaahi fuá pe fāngangá.—Livitiko 22:​27, 28; Teutalonome 22:​6, 7. 

ʻOku hā mahino, ko e Laó naʻe ʻikai ko ha fokotuʻutuʻu fihi pē ʻo e ngaahi tuʻutuʻuni mo e ngaahi fakataputapui. Ko e taha ʻo hono ngaahi ʻaongá, ʻoku tokoni ʻa hono ngaahi tefitoʻi moʻoní ke fakahūhū kiate kitautolu ha tuʻunga māʻolunga ʻo e fakapotopoto fakaeʻulungāanga ʻa ia ʻoku tapua moʻoni atu ai ʻa e ngaahi ʻulungāanga fakaofo ʻo Sihová.—Sāme 19:​7-11.

[Maʻuʻanga ʻo e Tā ʻi he peesi 31]

© Timothy O’Keefe/Index Stock Imagery