Fakafehokotaki ʻa e Ngaahi Vahaʻa ʻi Panamaá

“PANAMĀ, ko e halafakakavakava ʻo e māmaní.” ʻI he vaeuaʻi senituli kuo maliu atú, naʻe fai ai ha lave ki he moto ko ení ʻi ha polokalama letiō manakoa ʻi he fonua ʻAmelika Lotoloto ko iá. ʻI he ʻahó ni, kuo fakahaaʻi ʻe he motó ni ʻa e ongoʻi ʻoku maʻu ʻe he tokolahi fekauʻaki mo e fonua ko iá.

ʻOku fakafehokotaki ʻe Panamā ʻa ʻAmelika Tokelau mo ʻAmelika Tonga. ʻIkai ngata aí, ko e Halafakakavakava tonu ʻo e ʻOtu ʻAmeliká ʻoku kolosi atu ia ʻi he Kanali Panamā ongoongoá. Ko ha ngāue fakaʻenisinia fakaofo ia, ʻoku lele ʻa e kanalí ʻo kolosi atu ʻi he fonuá, ʻo fakatahaʻi ai ʻa e ʻōseni ʻAtalanitikí mo e ʻōseni Pasifikí. ʻOku fakaʻatā ai heni ʻa e ngaahi vaka tahi takatakai mei he māmaní ke nau kolosi ʻi ha ngaahi houa siʻi pē, ʻa ia ne mei fiemaʻu ai ha fononga tahi ʻi ha ngaahi ʻaho pe uike. ʻIo, ʻoku hoko ai ʻa Panamā ko ha fehokotakiʻanga mahuʻinga ia ki he ngaahi konga lahi ʻo e māmaní.

Ko ha Fehokotakinga mo ha Tuifio

Kuo toe hoko ʻa Panamā ko ha feituʻu ia ʻoku tuifio ai ʻa e kakai mei he ngaahi puipuituʻa fakafonua mo e fakafaʻahinga kehekehe. Ko e kakaí ni, fakataha mo e tokolahi ʻo e ngaahi kulupu tuʻufonuá, kuo faʻuʻaki ha kakai kehekehe ʻa ia ʻoku  nau mafola holo ʻi he kotoa ʻo e fonua fakaʻofoʻofá ni. Kae kehe, ʻoku malava nai ke fakafehokotaki ʻa e ngaahi faikehekehe fakasōsiale, fakafonua, fakalotu mo fakaelea ʻoku tupu mei aí, pea fakatupu ha fāʻūtaha ʻo e fakakaukaú mo e taumuʻá ʻa ia ʻoku makatuʻunga ʻi he ngaahi foʻi moʻoni mahuʻinga taʻehanotatau ʻoku maʻu ʻi he Folofola ʻa e ʻOtuá?

ʻIo ʻoku malava. Ko e ngaahi lea ʻa e ʻapositolo ko Paulá ʻa ia ʻoku hiki ʻi he Efeso 2:​17, 18 ʻoku fakahaaʻi ai ko e kau Kalisitiane ʻo e ʻuluaki senitulí—ʻa e Siú mo e Senitailé fakatouʻosi—naʻa nau lavaʻi ʻa e meʻa tofu pē ko iá ʻo makatuʻunga ʻi he ola fakaefāʻūtaha ʻo e feilaulau ʻa Kalaisí. Naʻe tohi ʻa Paula: “[Naʻá] ne [Sīsū] haʻu ʻo tala melino kiate kimoutolu naʻe mamaʻo, mo tala melino ki he kakai naʻe ofi: he vakai, ko e meʻa ʻiate ia ʻoku ta fakatou apaapangofua ke hoko atu [“ʻunuʻunu,” NW] ki he Tamai, heʻeta Laumalie taha.”

ʻI he tuʻunga tatau he ʻahó ni, ʻoku talaki ʻe he Kau Fakamoʻoni ʻa Sihová ʻa e ongoongo lelei ʻo e “melino” ʻi Panamā ki he faʻahinga tāutaha mo e ngaahi kulupu kuo nau haʻu mei he ngaahi feituʻu mamaʻo pea ʻoku nau maʻu ha ngaahi puipuituʻa fakalotu kehekehe lahi. ʻOku hoko ai ʻa e fāʻūtaha fiefia ʻi he haʻohaʻonga ʻo e faʻahinga ʻoku nau “ʻunuʻunu” kia Sihová. Ko hono olá, kuo fokotuʻu ʻa e ngaahi fakatahaʻanga ʻi Panamā ʻi he ngaahi lea kehekehe ʻe ono—faka-Sipeini, Kenitoni, Lea Fakaʻilonga ʻa Panamaá, faka-Pilitānia mo e lea ʻe ua ʻi he ngaahi lea tuʻufonuá, ʻa ia ko e lea Kuna mo e Ngobere (Kuaimī). ʻOku fakalototoʻa ke ʻiloʻi ʻa e hoko ʻo fāʻūtaha ʻa e ngaahi mēmipa ʻo e ngaahi kulupu lea ko ení ʻi heʻenau lotu kia Sihová.

Fakafehokotakinga Kolosiʻanga ʻi he Comarca

Ko e kulupu Ngobe ʻa e kulupu lahi taha ʻo e kakai tuʻufonua ʻe valu ʻi Panamaá. ʻOku faʻuʻaki ʻa e toko 170,000 nai ʻa e kulupu ko ení, ko e tokolahi taha ʻo kinautolú ʻoku nau nofo ʻi ha feituʻu lahi ʻa ia naʻe vaheʻi ki muí ni mai ko ha comarca, pe nofoʻanga. Ko ha konga lahi ʻo e feituʻu ko ení ʻoku ʻi ai ʻa e ngaahi ʻotu moʻunga vaotātā fetungotungaʻi ʻa ia ʻoku meimei ke ala aʻu ki ai ʻi he lue laló, pea pehē foki ki he ngaahi vahefonua matāfanga fakaʻofoʻofa ʻoku ala aʻu ki ai ʻi he vaka tahí. ʻOku faʻa fokotuʻu ʻa e ngaahi koló ʻo ofi ki he  ngaahi vaitafé, ʻa ia ʻoku hoko ko ha halanga feʻungamālie ia ʻo e fefonongaʻakí, pea pehē foki ki he matāfangá. Ko e tokolahi ʻo e kau nofo ʻi he comarca ʻoku nau maʻu ha maʻuʻanga moʻui siʻisiʻi fau mei he ngaahi ngoue kofi ʻi he ngaahi ʻotu moʻungá, mei he toutaí pe ngoué. Ko e tokolahi ai ko e ngaahi mēmipa kinautolu ʻo e ngaahi siasi ʻo e Puleʻanga-Haʻa-Kalisitiané. Kae kehe, ʻoku ʻi ai ha kau muimui ʻo ha lotu fakalotofonua ʻoku ʻiloa ko e Mama Tata. ʻOku hanga ʻa e niʻihi kehé ia ki he ngaahi sukias (kau taulaʻeiki) fakalotofonuá ki ha faitoʻo ʻi he taimi ʻoku nau puke aí pe ongoʻi ʻoku ngaahi kinautolu ʻe he ngaahi laumālie fulikivanú. Neongo ʻoku lea faka-Sipeini ʻa e tokolahi, ko e lea Ngobere ʻoku mahinoʻi tahá.

ʻAʻalo ke Aʻu ki he Ngaahi Lotó

ʻOku ʻiloʻi ʻe he Kau Fakamoʻoni ʻa Sihová ʻoku mahuʻinga ke tokoniʻi ʻa e kakaí ke nau ako ʻa e moʻoní ʻi ha founga ko ē ʻoku ʻikai ke aʻu pē ai ki honau ʻatamaí ka ki honau lotó foki. ʻOku lava ke tokonaki mai heni ʻa e fakaueʻiloto ʻoku fiemaʻu ke fai ai ʻa e ngaahi liliu ʻoku fiemaʻu pau ʻi heʻenau moʻuí kae lava ke feongoongoi ai mo e ngaahi tefitoʻi moʻoni Fakatohitapú. Ko ia ai, ko e kau faifekau tāimuʻa makehe naʻe vaheʻi ki he ngaahi vāhenga kehekehe ʻe valu ʻo e nofoʻangá kuo nau ako ʻa e lea Ngobere fakataha mo e tokoni ʻa e Kau Fakamoʻoni taau fakalotofonuá.

Ko e ngaahi fakatahaʻanga ʻe 14 kuo fokotuʻu ʻi he feituʻú ʻoku fakahaaʻi ai ʻa e malava fakaofo ki ha tupulekina. Hangē ko ení, ʻi he ngaahi taʻu kuo maliu atú, ko Dimas mo Gisela, ko ha ongo meʻa tāimuʻa makehe, naʻe vaheʻi kinaua ki ha kiʻi fakatahaʻanga ʻo e kau malanga ʻe toko 40 nai ʻi he feituʻu matāfanga ʻo Tobobe. Naʻe ʻikai ke faingofua kia kinaua ke na alāanga mo e toutou fononga ʻi ha pōpao koeʻuhi ke malanga ai ki he kakai anga-fakatōkilalo ʻi he Matāfanga ʻAtalanitikí. Naʻe ʻiloʻi ʻe Dimas mo Gisela ko e ngaahi vai malū ʻo e ʻōsení ʻoku lava ke hoko vave ia ko e ngaahi peau mātuʻaki fakatuʻutāmaki. Ko hona nimá mo e tuʻá naʻe faʻa langa hili ʻa e ʻaʻalo mei he kolo ki he koló. Ko hono ako ʻa e lea fakalotofonuá ko ha toe pole kehe ia. Kae kehe, ko ʻena ngaahi feilaulaú mo e kīvoí naʻe faitāpuekina ia ʻi he 2001 ʻi he taimi naʻe maʻu ai ʻe he kakai ʻe toko 552 nai ʻa e Fakamanatu ʻo e pekia ʻa Kalaisí.

ʻI he fou atu ʻi he fangá mei Tobobe ʻoku tuʻu ai ʻa e kolo ko Punta Escondida. ʻI ha ngaahi taimi, naʻe ʻaʻalo maʻu pē ha kiʻi kulupu ʻo ha kau malanga ʻo fou ʻi he fangá—ʻo fakatuʻunga pē ʻi he tuʻu ʻa e ʻeá—ke maʻu ʻa e ngaahi fakataha ʻi Tobobe pea naʻe fakahaaʻi ʻe he ngaahi līpōtí naʻe ʻi ai ha fakatuʻotuʻa lelei ki hano fokotuʻu ha fakatahaʻanga foʻou ʻi he feituʻú ni. Makatuʻunga he meʻa ko iá, naʻe kole ai kia Dimas mo Gisela ke na hiki ki Punta Escondida. Siʻi hifo he taʻu ʻe ua, ko e kulupu ʻi Punta Escondida naʻe hoko ia ko ha fakatahaʻanga longomoʻui ʻo e toko 28, mo ha ʻavalisi ʻo e maʻu fakatahá ko e toko 114 ʻi he malanga fakauike maʻá e kakaí. ʻI he 2004 naʻe fiefia ai ʻa e fakatahaʻanga foʻoú ʻi he taimi naʻe maʻu ai ʻe ha fakakātoa ʻo e toko 458 ʻa e Fakamanatu ʻo e pekia ʻa Kalaisí.

Ikuʻi ʻa e Pole ʻo e ʻIkai Poto he Lautohí

Ki he tokolahi ʻo e faʻahinga loto-totonú, ko hono ikuʻi ʻa e ʻikai poto he lautohí kuo tokoniʻi ai kinautolu ke nau fakatupulekina ha vahaʻangatae vāofi mo Sihova. Naʻe pehē ʻa e tuʻunga ʻo Fermina, ko ha kiʻi fefine mei he vahefonua moʻungaʻia ʻo e comarca. Ko e kau misinale Fakamoʻoni ʻoku nau ngāue ʻi he feituʻu mamaʻo ʻa ia ʻokú ne nofo aí, naʻa nau ʻiloʻi ia ʻokú ne tokanga ʻaupito ki he pōpoaki ʻo e Puleʻangá. ʻI hono  tuʻuaki ange ha ako Tohi Tapú, naʻá ne tali te ne saiʻia ke ako lahi ange. Kae kehe, naʻe ʻi ai ha palopalema. Naʻá ne lea faka-Sipeini mo Ngobere fakatouʻosi, ka naʻe ʻikai te ne lava ʻo lau pe tohi ʻi he ongo leá. Ko e taha ʻo e kau misinalé naʻá ne loto-lelei ke akoʻi ia, ʻo ngāueʻaki ʻa e polosiua Apply Yourself to Reading and Writing. a

Ko Fermina ko ha tokotaha ako lelei ʻaupito, naʻá ne vēkeveke teuteu ʻene ngaahi lēsoní, fai kotoa ʻene homueká peá ne ʻahiʻahiʻi tōtōivi ʻene founga sipelá. ʻI loto he taʻu ʻe taha, kuó ne fakalakalaka feʻunga ai ke ako ʻa e polosiua ʻE Lava Ke Ke Hoko ko e Kaumeʻa ʻo e ʻOtuá!* ʻI he taimi naʻe fokotuʻutuʻu ai ʻa e ngaahi fakatahá, naʻe kamata ke maʻu ia ʻe Fermina. Kae kehe, koeʻuhi ko e fusimoʻomo ʻa e fāmilí, naʻe fuʻu faingataʻa ai kiate ia ke ne totongi ʻa e fakamole ke ne aʻu ai mo ʻene fānaú ki he ngaahi fakatahá. Ko e taha ʻo e kau tāimuʻá, ʻa ia naʻá ne lāuʻilo ki he ngaahi tuʻunga ʻo Fermina, naʻá ne fokotuʻu ange ke ne fakakaukau ki hano ngaohi mo fakatau atu ʻa e ngaahi kofu Ngobe tukufakaholo ʻa e kakai fefiné. Naʻe fai ia ʻe Fermina, pea neongo ʻa e ngaahi fiemaʻu fakamatelie kehé, naʻá ne fakapapauʻi ke ngāueʻaki ʻataʻatā pē ʻa e paʻanga naʻá ne maʻú ke maʻu ai ʻa e ngaahi fakataha faka-Kalisitiané. Ko ia mo hono fāmilí kuo nau hiki he taimí ni ki ha feituʻu ʻe taha, pea ʻokú ne hokohoko atu ai ke fakalakalaka fakalaumālie. ʻOku nau fiefia ʻi he ʻikai ke nau ikuʻi pē ʻa e ʻikai poto he lautohí, ka ko e toe mahuʻinga angé, kuo nau hoko ʻo ʻiloʻi ʻa Sihova.

Ikuʻi ʻa e Pole ʻo e Malanga ki he Kau Tulí

ʻI Panamā, ko e tokolahi ai ʻo e ngaahi fāmili ʻoku ʻi ai honau ngaahi mēmipa ʻoku ʻikai lelei ʻenau fanongó ʻoku nau hehema ke ongoʻi mā. ʻI he taimi ʻe niʻihi, kuo ʻikai ke maʻu ʻe he faʻahinga peheé ha faʻahinga ako pē. Ko e tokolahi ʻo e kau tulí ʻoku nau ongoʻi taʻelata mo tuēnoa, koeʻuhi ko e fetuʻutaki mo kinautolú ʻoku faingataʻa ʻaupito.

Ko ia ai, naʻe hoko ʻo hā mahino kuo pau ke fai ha meʻa ke aʻu ai mo e ongoongo leleí ki he faʻahinga ʻoku ʻikai lelei ʻenau fanongó. ʻAki ʻa e fakalototoʻa ʻa ha ʻovasia fefonongaʻakí, naʻe fakapapauʻi ai ʻe ha kulupu ʻo ha kau tāimuʻa loto-vēkeveke mo e niʻihi kehe ke nau ako ʻa e Lea Fakaʻilonga Faka-Panamaá. Ko ʻenau mohu fakakaukaú naʻe faitāpuekina.

ʻI he konga ki mui ʻo e 2001, naʻe fokotuʻu ai ha kulupu lea fakaʻilonga ʻi Kolo Panamā. Ko e maʻu fakatahá naʻe toko 20 nai. ʻI he hoko ʻa e fanga tokouá mo e fanga tuofāfiné ʻo pōtoʻi ange ʻi he leá, ne nau malava ai ke aʻu ki he tokolahi ko e fuofua taimi ia ke nau maʻu ai ʻa e pōpoaki ʻo e moʻoni ʻo e Tohi Tapú ʻi heʻenau leá. Ko e tokolahi ʻo e Kau Fakamoʻoni ʻoku ʻi ai ʻenau fānau ʻoku ʻikai lelei ʻenau fanongó naʻa nau toe kamata ke maʻu ʻa e ngaahi fakatahá pea ne nau ʻiloʻi naʻe mahinoʻingofua ange ʻe heʻenau fānaú ʻa e ngaahi akonaki ʻo e Tohi Tapú pea nau hoko ʻo faivelenga ange ki he moʻoní. Naʻe faʻa ako ʻa e ngaahi mātuʻá ke fakaʻilonga pea lava ai ʻo fetuʻutaki lelei ange mo ʻenau fānaú. ʻOku lava ʻa e ngaahi mātuʻá ke tokoniʻi fakalaumālie ʻenau fānaú pea nau ʻiloʻi naʻe fakaivimālohiʻi ai ʻa e  fāmilí. Ko e hokosia ʻa Elsa mo ʻene taʻahiné, ʻa Iraida, ʻoku fakatātaaʻi lelei ai ʻa e meʻá ni.

Ko ha Fakamoʻoni naʻe ngāue mo e kulupu lea fakaʻilongá naʻá ne fanongo ʻo fekauʻaki mo Iraida, naʻá ne ʻaʻahi kiate ia peá ne tuku ai ʻa e polosiua ko e Moʻui Fiefia ʻi he Māmaní ʻo Taʻengata! b Naʻe fiefia lahi ʻa Iraida ʻi he meʻa naʻá ne malava ʻo ako mei he ngaahi fakatātā ʻo kau ki he māmani foʻoú. Naʻe kamata ha ako Tohi Tapu ʻi he polosiuá. ʻI hono fakaʻosi ʻa e ako ʻi he polosiua ko iá, naʻá na ngāueʻaki ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú?* ʻI he tuʻunga ko iá, naʻe kamata ai ke kole ʻa Iraida ki heʻene faʻeé ke ne tokoniʻi ia ke teuteu pea ke fakamatalaʻi ange kiate ia ʻa e fakamatalá.

Naʻe maʻu ʻe Elsa ha ongo palopalema: ʻI he ʻikai ko ha Fakamoʻoni iá, naʻe ʻikai te ne ʻiloʻi ʻa e moʻoni Fakatohitapú, pea naʻe ʻikai te ne mahinoʻi ʻa e lea fakaʻilongá. Naʻe fakahaaʻi ange kiate ia naʻe ʻikai totonu ke ne fakaʻilonga ki heʻene taʻahiné ka naʻe totonu ki heʻene taʻahiné ke ne ako ke lea. Ko hono ikuʻangá, naʻe fakangatangata ai ʻa e fetuʻutaki ʻi he vahaʻa ʻo e faʻeé mo e taʻahiné. ʻI hono ueʻi ʻe he kole ʻa Iraida ki ha tokoní, naʻe kole ange ʻa Elsa ke ako mo ia ha Fakamoʻoni mei he fakatahaʻangá. Naʻá ne pehē: “Naʻá ku fai ʻa e kolé maʻá e lelei ʻa ʻeku taʻahiné, koeʻuhi kuo teʻeki ai ke u sio au ʻi ha fuʻu loto-fiefia ʻa Iraida ki ha faʻahinga meʻa pē.” Naʻe kau ʻa Elsa mo ʻene taʻahiné ʻi heʻene akó peá ne ako ʻa e lea fakaʻilongá. ʻI he tuku kakato ʻe Elsa ʻa e taimi lahi ange ki heʻene taʻahiné, naʻe lelei ange ai ʻa e fetuʻutaki ʻi ʻapí. Naʻe kamata ke filifili lelei ange ʻe Iraida ʻa e ngaahi kaumeʻa naʻá ne maʻú, peá ne feohi mo e fakatahaʻangá. ʻOku kamata ke maʻu tuʻumaʻu fakatouʻosi ʻe he faʻeé mo e taʻahiné he taimí ni ʻa e ngaahi fakataha faka-Kalisitiané. Naʻe toki papitaiso ki muí ni mai ʻa Elsa, pea ʻoku fakalakalaka atu ʻa Iraida ki he taumuʻa ko iá. ʻOku fakamatala ʻa Elsa ko e fuofua taimi eni ke ne hoko ai ʻo ʻiloʻi ʻa ʻene taʻahiné pea ʻokú na lava ʻo talanoa he taimí ni ʻo kau ki he ngaahi meʻa mahuʻinga lahi ʻokú na manako fakatouʻosi aí.

Ko e kulupu lea fakaʻilongá, ʻa ia naʻe hoko ko ha fakatahaʻanga ʻi ʻEpeleli 2003, kuo tupu ia he taimí ni ki ha kau malanga ʻe toko 50 nai ʻo e Puleʻangá, ʻo lahi ange ia ʻi he tokolahi naʻa nau maʻu ʻa e ngaahi fakatahá. Laka hake ʻi he vahe tolu ʻe tahá ʻoku nau tuli. Kuo fokotuʻu ha ngaahi kulupu lea fakaʻilonga kehe ʻi he ngaahi kolo lalahi ʻe tolu ʻi tuʻa ia ʻi he feituʻu kolomuʻa ʻo Kolo Panamaá. Neongo ʻoku kei toe lahi ʻa e meʻa ke fai ʻi he malaʻe ngāué ni, ʻoku ʻikai ha veiveiua kuo lākai ha sitepu tefito ke ikuʻi ai ʻa e ngaahi fakafaingataʻaʻiaʻanga ʻo e “fakalongolongo” ʻi he vahaʻa ʻo e kakai tuli loto-totonú pea mo honau Tokotaha-Fakatupu anga-ʻofá, ʻa Sihova ko e ʻOtuá.

Ko e ngaahi ola peheé ko e tuʻunga anga-maheni ia ʻo e meʻa ʻoku hoko ʻi he kotoa ʻo Panamaá. Neongo ʻoku nau haʻu mei he ngaahi anga fakafonua, lea mo e puipuituʻa kehekehe, kuo hoko ʻa e tokolahi ʻo fāʻūtaha ʻi he lotu ki he ʻOtua moʻoni pē tahá. Ko e moʻoni ʻo e Folofola ʻa Sihová kuo fakahoko lavameʻa atu ia ki he niʻihi kehé neongo ʻa e palopalema ʻi he fetuʻutakí ʻi he fonuá ni, ʻa ia ʻoku fakakaukau ki ai ʻa e tokolahi ʻoku hangē ia “ko e halafakakavakava ʻo e māmaní.”—Efeso 4:4.

[Fakamatala ʻi lalo]

[Mape ʻi he peesi 8]

(Ki he konga tohi kuo fokotuʻu kakato, sio ki he tohi)

ʻŌSENI KALIPIANE

PANAMĀ

Tobobe

ʻŌSENI PASIFIKI

Kanali Panamā

[Fakatātā ʻi he peesi 8]

Ongo fefine Kuna ʻokú na puke ha ongo tupenu teuteu

[Fakatātā ʻi he peesi 9]

Ko ha misinale ʻokú ne malanga ki ha fefine Ngobe

[Fakatātā ʻi he peesi 10]

Kau Fakamoʻoni mei Ngobe ʻoku nau fakahekeheka ki ha pōpao ke maʻu ha polokalama ʻaho ʻasemipilī makehe

[Fakatātā ʻi he peesi 11]

ʻOku fakafehokotaki ʻe he ngaahi moʻoni Fakatohitapú ʻa e faikehekehe ʻi he anga fakafonuá mo e leá ʻi Panamā

[Fakatātā ʻi he peesi 12]

Ako “Taua Leʻo” ʻi he lea fakaʻilongá

[Fakatātā ʻi he peesi 12]

Elsa mo ʻene taʻahiné, ʻa Iraida, ʻokú na fai ha fetuʻutaki mohu ʻuhinga

[Maʻuʻanga ʻo e Tā ʻi he peesi 8]

Vaká mo e ongo fefine Kuna: © William Floyd Holdman/Index Stock Imagery; koló: © Timothy O’Keefe/Index Stock Imagery