Ko e Totonu ke ʻi Ai ha Hingoá

KO E tokotaha kotoa pē ʻokú ne maʻu ʻa e totonu ke ʻi ai hano hingoa. ʻI Tahiti, naʻa mo ha kiʻi tama toki fāʻeleʻi kuo liʻaki, ʻa ia ʻoku ʻikai ʻiloʻi ʻene tamaí mo e faʻeé, ʻoku ʻai kiate ia ha hingoa. ʻOku ʻai ʻe he ʻōfisi failēsisitá ha hingoa ʻuluaki mo ha fakaiku ki he kiʻi tama kuo liʻakí.

Neongo ia, ʻoku ʻi ai ha tokotaha ʻe taha ʻa ia ʻoku lava ke pehē kuo toʻo meiate ia ʻa e totonu tefito ia ko ení, ko ha totonu ʻoku foaki ki he meimei faʻahinga kotoa pē ʻo e tangatá. Ko e meʻa fakaofó, he ko ia ʻa e “Tamai, ʻa ia ʻoku tauhingoa ki ai ʻa e ngaahi famili kotoa pe ʻi langi mo mamani”! (Efeso 3:​14, 15) ʻOkú ke fakatokangaʻi, ko e kakai tokolahi ʻoku nau fakafisi moʻoni ke ngāueʻaki ʻa e huafa ʻo e Tokotaha-Fakatupú ʻo hangē ko ia ʻoku hā ʻi he Tohi Tapú. ʻOku nau fili ke fetongi ia ʻaki ʻa e ngaahi hingoa fakalakanga hangē ko e “ʻOtua,” “ko e ʻEiki,” pe “ko e Tokotaha ʻItāniti.” Ko hai leva ʻa hono hingoá? ʻOku tali mai ʻe he tokotaha-tohi-sāmé ʻa e fehuʻi ko iá: “ʻIo, ko ho huafa ko Sihova ʻoku hope atu ʻi mamani katoa.”—Sāme 83:18.

ʻI he muʻaki konga ʻo e senituli hono 19 ʻi he taimi naʻe tūʻuta ai ʻa e kau misinale ʻo e Sōsaieti Misinale ʻo Lonitoní ʻi Tahití, naʻe lotu ʻa e kakai Polinisiá ia ki he ngaahi ʻotua kehekehe. Naʻe taki taha ʻi ai honau hingoa makehe, ʻa ia ko e ongo ʻotua tefitó ko Oro mo Taaroa. ʻI hono fakafaikehekeheʻi ʻa e ʻOtua ʻo e Tohi Tapú mei he ngaahi ʻotua kehé, ko e kau misinale ko iá naʻe ʻikai te nau toumoua ke ngāueʻaki lahi ʻa e huafa fakaʻotuá, ʻa ia naʻe tohi fakamataʻitohi ko e Iehova ʻi he lea faka-Tahití.

Ko e huafa ko iá naʻe hoko ʻo ongoongoa pea naʻe ngāueʻaki lahi ia ʻi he fetalanoaʻaki mo e fetohiʻaki fakaʻahó. Ko Tuʻi Pomare II ʻo Tahití, ʻa ia naʻá ne pule ʻi he konga ki muʻa ʻo e senituli 19, naʻá ne ngāueʻaki lahi ia ʻi heʻene fetohiʻaki fakafoʻituituí. Ko e fakamoʻoni ʻo e foʻi moʻoni ko iá ʻoku hā ia ʻi he faitohi ʻoku ʻoatu hení. ʻI hono hiki ʻi he lea faka-Pilitāniá, ʻoku fakaʻaliʻali ia ʻi he misiume ʻoku ui ko e Misiume ʻo Tahití pea mo Hono ʻOtu Motú. ʻOku fakamoʻoni ʻa e tohi ko ení ki he ʻikai ha tomuʻa fehiʻa ʻi he felāveʻi mo e ngāueʻaki ʻo e huafa fakaʻotuá ʻi he taimi ko iá. Tānaki atu ki ai, ʻoku hā tuʻo laui afe ʻa e huafa fakafoʻituitui ʻo e ʻOtuá ʻi he ʻuluaki pulusinga faka-Tahiti ʻo e Tohi Tapú, ʻa ia naʻe kakato ʻi he 1835.

[Fakatātā ʻi he peesi 32]

Tuʻi Pomare II

[Maʻuʻanga ʻo e Tā ʻi he peesi 32]

Tuʻí mo e tohí: Collection du Musée de Tahiti et de ses Îles, Punaauia, Tahiti