Ngaahi Kī ke Tokoni ki he Fetuʻutaki mo Ho Hoá

‘NAʻE ʻikai totonu ke u leaʻaki ia.’ ‘Naʻe ʻikai te u fakamatalaʻi mahino atu ia.’ Kuó ke ongoʻi pehē ʻi ha taimi hili ʻa e feinga ke fetuʻutaki mo ho hoá? Ko e fetuʻutakí ko ha pōtoʻi ia ʻa ia ʻoku fiemaʻu ke fakatupulekina. Hangē pē ko ia ʻi ha faʻahinga pōtoʻi pē, ko e kakai ʻe niʻihi ʻoku hā ngali ʻoku nau malava ke puleʻi mātuʻaki faingofua ia, lolotonga iá ʻoku maʻu ʻe he niʻihi kehé ha taimi faingataʻa ange. Kae kehe, neongo kapau ʻokú ke kau ki he kulupu ki muí, ʻoku malava ke ke ako ke fakahaaʻi ʻa hoʻo ngaahi fakakaukaú ʻi ha founga lelei, ke fetuʻutaki ola lelei.

ʻI he taimi ʻe niʻihi, ko e ngaahi tenge ʻi he anga fakafonuá ʻoku tākiekina ai ʻa e kakaí ki ha sīpinga pau ʻi heʻene hoko ki he feangainga mo honau ngaahi hoá. ‘Ke anga-fakatangatá,’ kuo fakahinohino nai ki he kakai tangatá, ‘ʻoku ʻikai totonu ke mou faʻa lea kimoutolu.’ Ko e kakai tangata faʻa leá ʻoku sio lalo nai kia kinautolu ko e faʻahinga ʻoku nau fakavaʻivaʻinga mo lea taʻemoʻoni. Ko e moʻoni, ʻoku pehē ʻe he Tohi Tapú: “Ke vave ʻa e tangata fuape he fanongo, kae fakatotoka ki he lea.” (Semisi 1:19) Kae kehe, ko e akonaki ko iá ʻoku ngāueʻaki fakatouʻosi ia ki he kakai tangatá mo e  kakai fefiné pea ʻoku fakahaaʻi ai ko e fetuʻutakí ʻoku kau ki ai ʻa e meʻa lahi ange ia ʻi he leá pē. ʻE fetalanoaʻaki nai ha ongo meʻa ʻi ha taimi lōloa, kae fēfē kapau ʻoku ʻikai te na lava ke fefanongoʻaki ʻia kinaua? Ngalingali, ʻe ʻikai ʻi ai ha fetuʻutaki moʻoni ia. Ko ha konga lahi ʻo e fetuʻutaki lavameʻá, hangē ko ia ʻoku fakahaaʻi ʻe he konga Tohi Tapu ʻi ʻolungá, ko e pōtoʻi ʻi he fanongó.

Fetuʻutaki ʻIkai ʻAki ha Lea

ʻI he ngaahi komiunitī ʻe niʻihi, ʻoku ʻamanekina ai ʻa e ngaahi uaifí ke tauhi pē ʻia kinautolu ʻa ʻenau ngaahi fakakaukaú. Ko e ngaahi husepānití ke nau hanganaki fakamamaʻo mālohi mei he ngaahi meʻa fakafāmilí. ʻI ha ʻātakai pehē, ʻoku tuku pē ai ki he husepānití mo e uaifí ke na fakamahamahalo ki he meʻa ʻoku fiemaʻu ʻe he hoá ʻi ha tuʻunga pē ʻoku hoko. ʻOku hoko ʻa e ngaahi uaifi ʻe niʻihi ʻo lelei ʻaupito ʻi hono ʻiloʻi ʻa e ngaahi fiemaʻu ʻa honau husepānití pea ngāue fakavavevave ke fakahoko ia. ʻI he ngaahi tuʻunga peheé, ʻoku hoko ai pē ʻa e fetuʻutaki ia ʻo ʻikai ʻaki ha lea ʻi he vahaʻa ʻo e husepānití mo e uaifí. Kae kehe, ʻi he anga-mahení, ko e faʻahinga fetuʻutaki ko ení ʻoku fakafaʻahitaha ia. Lolotonga ʻoku ako nai ʻa e uaifí ke ne ʻiloʻi ʻa e meʻa ʻoku fakakaukau ki ai pe ongoʻi ʻe hono husepānití, ʻoku siʻi ʻa e ʻamanekina ke fakatupulekina ʻe he husepānití ʻa e pōtoʻi mo e ʻiloʻilo tatau ki he ngaahi ongoʻi ʻa hono uaifí.

Ko e moʻoni, ʻi he ngaahi anga fakafonua ʻe niʻihi ʻoku vakaiʻi ai ʻe he kakai tangatá ʻa e ngaahi fiemaʻu fakaeongo ʻa e kakai fefiné pea feinga ke fakatōliʻa ia. Kae kehe, naʻa mo e ʻi he ngaahi anga fakafonua peheé, ʻe maʻu ʻaonga ʻa e ngaahi nofo mali lahi mei he fetuʻutaki lelei angé.

Mātuʻaki Mahuʻinga ʻa e Fetuʻutakí

Ko e fetuʻutaki hangatonú ʻe lava ke ne taʻofi ʻa e ngaahi taʻefemahinoʻakí mo e fakaʻuhingahalaʻí. Ki muʻa ʻi he hisitōlia ʻo e kau ʻIsilelí, ko e matakali ʻo Lūpení, Katá mo e vaeua ʻo e matakali ʻo Manase ʻa ia naʻa nau nofo ʻi he hahake ʻo e Vaitafe Sioataní naʻa nau langa ha “olita naʻe fuʻu ʻilonga” ʻi he veʻe Sioataní. Ko e ngaahi matakali kehé naʻe ʻikai te nau mahinoʻi ʻenau ngaahi ngāué. ʻI he fakakaukau ko honau fanga tokoua ʻi he tafaʻaki ʻe taha ʻo e Sioataní kuo nau tafoki mei he moʻoní, ko e ngaahi matakali ʻi he hihifó naʻa nau teuteu ke tau mo e “kau angatuʻú.” Neongo ia, ki muʻa ke nau ʻalu atu ki he taú, naʻa nau fekauʻi atu ha fakafofonga ke fetuʻutaki mo e ngaahi matakali fakahahaké. Ko ha foʻi ngaʻunu fakapotopoto ē! Naʻa nau ʻiloʻi ai ko e ʻōlitá naʻe ʻikai ʻaí ki hano fai ha ngaahi foaki pe feilaulau tutu taʻefakalao. ʻI hono kehé, ko e ngaahi matakali ʻi he hahaké naʻa nau manavahē naʻa tala ange kia kinautolu ʻi he kahaʻú ʻe he ngaahi matakali kehé: “ʻOku ʻikai hamou kaunga kia Sihova.” Ko e ʻōlitá ʻe hoko ia ko ha fakamoʻoni ko kinautolu foki ko e kau lotu kia Sihova. (Siosiua 22:​10-​29) Naʻa nau ui ʻa e ʻōlitá ko e Fakamoʻoni, ngalingali koeʻuhí naʻe hoko ia ko ha fakamoʻoni kia kinautolu ko Sihova ʻa e ʻOtua moʻoní.—Siosiua 22:34.

Ko ʻenau fakamatalá naʻe feʻunga ia ke fakatuipauʻiʻaki ʻa e ngaahi matakali kehé, ʻa ia naʻa nau liʻaki ʻa e fakakaukau ʻo hono fai ha meʻa ki he matakali ʻe uá mo e vaeua ʻo e matakalí. ʻIo, ko e fetuʻutaki ʻatā mo hangatonú naʻá ne afeʻi ʻa e fepaki fakakautaú. Ki mui ai, ʻi he taimi naʻe angatuʻu ai ʻa ʻIsileli ki honau husepāniti fakaefakatātaá, ʻa Sihova ko e ʻOtuá, naʻá ne tala ange ai kia kinautolu te ne ‘lea ki honau lotó’ ʻi he meesi. (Hosea 2:​14, NW) Ko ha sīpinga lelei ē ki he kakai malí! ʻIo, feinga ke aʻu ki he loto ʻo ho hoá koeʻuhi ke lava ʻo ne mahinoʻi ai ʻa hoʻo ngaahi ongoʻí. ʻOku mahuʻinga eni, tautefito ʻi he taimi ʻoku kau ai ki ai ʻa e ngaahi ongoʻi mālohí. “ʻOku pehē ʻe he niʻihi, ko e ngaahi foʻi leá ʻoku maʻamaʻa,” ko ha fakamatala ia ʻa Pattie Mihalik, ko ha fainusipepa ʻi he ʻIunaite Seteté, “ka ko e ngaahi foʻi leá ʻoku toe lava pē ke mahuʻinga taʻehanotatau. Pea lolotonga ʻe ʻiloʻi nai ʻe he niʻihi ʻoku faingataʻa ke fakahaaʻi ʻa e fakakaukaú, ko e olá ʻe lava ke ne ʻomai ʻa e meʻa lahi ʻaupito ange ia ʻi he paʻanga he pangikeé.”

Fakatupulekina ʻa e Pōtoʻi ʻi he Fetuʻutakí

‘Ko ʻema nofo malí naʻe taʻelavameʻa ia mei he kamataʻangá,’ ko e taukaveʻi nai ia ʻe he niʻihi. ‘Ko e nofo malí ni heʻikai lava ia ke fakaleleiʻi,’ ko e fakamulituku nai ia ʻa e niʻihi. ʻOku nau ongoʻi nai ʻoku taʻemalava ke fakaleleiʻi ʻenau ngaahi pōtoʻi ʻi he fetuʻutakí hili ʻa e ʻaho malí. Neongo ia, fakakaukau atu ki he faʻahinga ʻoku nau nofo ʻi he ngaahi sōsaieti ʻa ia ko e ngaahi nofo malí ʻoku  fokotuʻutuʻu ia ʻe he ongo kāingá. Ko e tokolahi ʻi he ngaahi anga fakafonua ko iá kuo iku ʻo nau fokotuʻu ha ngaahi fetuʻutaki lavameʻa ʻi heʻenau moʻui fakaemalí.

Ko ha ongo meʻa ʻi ha fonua he Hahaké naʻe fakatahaʻi kinaua ʻi ha mali naʻe fokotuʻutuʻu. Naʻe kole ki ha fakafofonga ke ne fai ha fononga mamaʻo ke kumi ha fefine mali maʻá e tangatá. Neongo ia, ko e ongo meʻa mali, ʻa ia naʻá na moʻui ʻi he meimei taʻu ʻe 4,000 kuohilí, naʻá na fakahāhā ʻa e poto tuʻu-ki-muʻa ʻi he pōtoʻi he fetuʻutakí. Ko e tangatá, ko ʻAisake, naʻá ne fetaulaki mo e tokotaha fakafofongá mo e fefine ʻe hoko ko hono malí ʻi ha ngoue. Ko e tangata naʻe ngāue ko e fakafofongá naʻá ne “fakamatala . . . kia Aisake ʻa e ngaahi meʻa kotoa pe kuo ne fai.” ʻOku hoko atu ʻa e fakamatala ʻa e Tohi Tapú ʻo fekauʻaki mo e nofo malí ni: “Pea ʻave ʻe Aisake ʻa [Lepeka] ki he teniti oʻene faʻe ko Sela [ko e lākanga ko ení naʻe fakahoko ai ʻa e mali fakalaó]; pea ne hanga ʻo maʻu ʻa Lepeka mōno uaifi: pea ne ʻofa ki ai.”—Senesi 24:​62-67.

Fakatokangaʻi naʻe ʻuluaki fanongo ʻa ʻAisake ki he fakamatalá “pea” ne toki ʻave ʻa Lepeka ke hoko ko hono uaifí. Ko e fakafofongá ko ha sevāniti falalaʻanga ʻa ia naʻe līʻoa kia Sihova ko e ʻOtuá, ʻa ē naʻe lotu ki ai ʻa ʻAisaké. Naʻe ʻi ai ʻa e ʻuhinga lelei kia ʻAisake ke falala ai ki he tangatá ni. Hili iá, naʻe “ʻofa” ʻa ʻAisake ʻia Lepeka, ʻa ia naʻá ne mali mo iá.

Naʻe fakatupulekina ʻe ʻAisake mo Lepeka ha ngaahi pōtoʻi lelei ʻi he fetuʻutakí? Hili ʻa e mali ʻa hona foha ko ʻĪsoá mo e ongo ʻofefine ʻo e kau Hetí, naʻe malanga hake ai ha palopalema fakafāmili mafatukituki. Naʻe toutou “lea” ʻa Lepeka kia ʻAisake: “Kuo kina ʻeku moʻui ko e meʻa ʻi he ongo fafine Heti; kapau ʻe mali a Sekope foki [ʻa hona foha siʻí] mo ha fefine Heti, . . . koeʻumaʻa aipe ʻeku moʻui?” (Senesi 26:34; 27:46) ʻOku hā mahino, naʻá ne fakahaaʻi mahino ʻa ʻene hohaʻá.

Naʻe tala ʻe ʻAisake kia Sēkope ko e tehina māhanga ʻo ʻĪsoá, ke ʻoua te ne maʻu ha uaifi mei he ngaahi ʻofefine ʻo Kēnaní. (Senesi 28:​1, 2) Naʻe fakahaaʻi ʻe Lepeka ʻa ʻene poiní. Ko e ongo meʻá ni naʻá na fetuʻutaki lavameʻa fekauʻaki mo ha kaveinga fakafāmili mātuʻaki fakatupu mamahingofua, ʻo tokonaki mai ai ha faʻifaʻitakiʻanga lelei kia kitautolu he ʻaho ní. Ko ia ai, fēfē kapau ʻoku ʻikai lava ke hoko ʻo feongoongoi ʻa e ngaahi hoa malí? Ko e hā ʻe lava ke faí?

ʻI he fehangahangai mo ha Taʻefelotoí

Kapau ko koe mo ho hoá ʻokú mo taʻefelotoi lahi ki ha meʻa, ʻoua ʻe fakalolongo ki ho hoa malí. ʻE fakahaaʻi ʻe he meʻa ko iá ha pōpoaki mātuʻaki māʻalaʻala: ʻOku ʻikai te ke fiefia, pea ʻokú ke toe fiemaʻu foki ke ʻoua ʻe fiefia mo ho hoá. Neongo ia, ʻoku ʻikai nai ke mahinoʻi kakato ʻe ho hoá ʻa hoʻo ngaahi fakaʻamú mo hoʻo ngaahi ongoʻí.

Ko koe mo ho hoá ʻe fiemaʻu nai ke mo talanoaʻi ʻa e ngaahi meʻá. Kapau ko e ʻīsiú ʻoku fakatupu mamahingofua, ʻe ʻikai nai faingofua ke hanganaki mokomoko. Ko e ongo mātuʻa ʻa ʻAisaké, ʻa ʻĒpalahame mo Sela, naʻá na fehangahangai ʻi he taimi ʻe taha mo ha tuʻunga faingataʻa. Koeʻuhi naʻe paʻa ʻa Sela, naʻá ne muimui ai ʻi he anga fakafonua ʻo e ngaahi ʻaho ko iá ʻo ne foaki ai kia ʻĒpalahame ʻa ʻene taʻahine sevāniti ko Hekaʻaá, ko ha sinifu ke ne fanauʻi ha tama. Naʻe fanauʻi ʻe Hekaʻā kia ʻĒpalahame ha tamasiʻi, ko ʻIsimeʻeli. Kae kehe, ki mui aí naʻe feitama ai ʻa Sela tonu, pea naʻá ne fanauʻi kia ʻĒpalahame ha foha, ko ʻAisake. ʻI he teu ke mavaeʻi ʻa ʻAisaké, naʻe fakatokangaʻi ai ʻe Sela ʻa ʻIsimeʻeli ʻokú ne manukiʻi ʻa ʻene tamá. Ko ia ko Sela, ʻi heʻene ʻiloʻi ʻe ʻi ai ʻa e fakatuʻutāmaki ki heʻene tamá, naʻá ne fakaʻaiʻai ʻa ʻĒpalahame ke ne kapusi ʻa e taʻahine kaunangá pea mo ʻIsimeʻeli. ʻIo, naʻe fakahaaʻi ʻe Sela ʻa e anga ʻo ʻene ongoʻí ʻi ha founga hangatonu. Ka ko e meʻa naʻá ne kolé naʻe ʻikai ʻaupito leleiʻia ai ʻa ʻĒpalahame.

Naʻe anga-fēfē hono fakaleleiʻi ʻa e fefaikehekeheʻakí? ʻOku pehē ʻe he fakamatala Tohi Tapú: “Ka ka folofola ʻa e ʻOtua kia Epalahame, ʻOua naʻa ke koviʻia ai koeʻuhi ko ho foha, pea koeʻuhi ko hoʻo kaunanga; pea ko e meʻa ki he ngahi lau ʻa Sela ʻoku fai atu, tuitala pe ki heʻene lea; koeʻuhi ʻe ngata ʻia Aisake ʻa e lau ko ho hako.” Naʻe fanongo ʻa ʻĒpalahame ki he fakahinohino ʻa Sihova ko e ʻOtuá pea ngāue ʻo fakatatau ki ai.—Senesi 16:​1-4; 21:​1-14.

‘Sai,’ ko haʻo lea nai ia, ‘kapau ʻe folofola hifo ʻa e ʻOtuá kia kitautolu mei he ngaahi langí, ʻe lavangofua ke tau felotoi!’ ʻOku ʻomai ʻe he meʻa ko iá kitautolu ki ha toe kī ʻe taha ki hono solova  ʻa e ngaahi fekīhiaki fakaemalí. Ko e ngaahi hoa malí ʻe lava ke nau fanongo ki he ʻOtuá. Anga-fēfē? ʻAki hono lau fakataha ʻa e Folofola ʻa e ʻOtuá pea tali ʻa e meʻa ʻokú ne leaʻakí ko e fakahinohino ia ʻa e ʻOtuá.—1 Tesalonaika 2:13.

Ko ha uaifi Kalisitiane matuʻotuʻa ʻe taha naʻá ne pehē: “ʻI he taimi lahi, ʻi he haʻu kiate au ha finemui ki ha faleʻi fekauʻaki mo ʻene nofo malí, ʻoku ou ʻeke ange ai kiate ia pe ʻokú ne lau ʻa e Tohi Tapú fakataha mo hono husepānití. Ko e tokolahi taha ʻoku nau palopalemaʻia ʻi heʻenau nofo malí ʻoku ʻikai te nau tōʻongaʻaki ia.” (Taitusi 2:​3-5) ʻOku lava ke tau maʻu ʻaonga kotoa mei heʻene fakamatalá. Lau maʻu pē ʻa e Folofola ʻa e ʻOtuá mo ho hoá. ʻI he founga ko iá, ʻokú ke “fanongo” ai ki he folofola ʻa e ʻOtuá ki he founga ke ke tōʻongaʻaki ʻi he ʻaho ki he ʻahó. (Aisea 30:21) Kae kehe, ko ha kiʻi fakatokanga: ʻOua ʻe ngāueʻaki ʻa e Tohi Tapú ko ha vaʻakau ke haha ʻaki ho hoá, ʻi hono toutou tuhuʻi ange ʻa e ngaahi konga Tohi Tapu ʻokú ke ongoʻi ʻoku ʻikai lava ʻe ho hoá ke ngāueʻakí. ʻI hono kehé, feinga ke sio ki he founga ʻe lava ke mo ngāueʻaki fakatouʻosi ai ʻa e meʻa ʻokú mo laú.

Kapau ʻokú ke feinga ke fakaleleiʻi ha palopalema faingataʻa, ko e hā ʻoku ʻikai vakaiʻi ai ʻa e Watch Tower Publications Index a ʻo fekauʻaki mo hoʻo hohaʻa tefitó? Mahalo pē ʻokú ke tokangaʻi ha ongo mātuʻa taʻumotuʻa, pea ʻoku fakatupunga ʻe he meʻa ko iá ʻa e ngaahi fetēleni ʻi hoʻo nofo malí. ʻI he ʻikai fakakikihi mo ho hoá fekauʻaki mo e meʻa ʻoku totonu pe ʻikai totonu ke ne faí, ko e hā ʻoku ʻikai te mo tangutu hifo ai ʻo vakaiʻi fakataha ʻa e Index? ʻUluakí, sio ki he kaveinga tefito ko e “Parents.” Te mo saiʻia nai ke sio ki he ngaahi maʻuʻanga fakamatala ʻi lalo ʻi he ngaahi kaveinga tokoni, hangē ko e “caring for aged parents.” Lau fakataha ʻa e ngaahi kupu felāveʻi mo iá mei he ʻū tohi ʻa e Kau Fakamoʻoni ʻa Sihová. Te ke ʻohovale nai ai ʻi he lahi ʻo e ʻaonga te ke maʻu pea mo ho hoá mei he fakamatala makatuʻunga Fakatohitapú, ʻa ia kuó ne tokoniʻi ʻa e kau Kalisitiane loto-moʻoni tokolahi.

Ko hono vakaiʻi ʻa e ngaahi maʻuʻanga fakamatala ko iá mo lau fakataha ʻa e fakamatalá ʻe tokoniʻi ai kimoua ke maʻu ha vakai totonu ki hoʻomo palopalemá. Te mo ʻilo ai ʻa e ngaahi fakamatala mo e lave Fakatohitapu ʻoku ʻoatu ai kia kimoua ʻa e fakakaukau ʻa e ʻOtuá. Kumi ia ʻi he Tohi Tapú, pea lau fakataha. ʻIo, te mo fanongo ai ki he meʻa ʻoku folofolaʻaki ʻe he ʻOtuá fekauʻaki mo e palopalema ʻokú mo fehangahangai mo iá!

Tauhi ke ʻAtā ʻa e Fetuʻutakí

Kuó ke feinga ʻi ha taimi ke fakaava ha matapā kuo ʻikai ke ngāueʻaki ʻi ha vahaʻa taimi? ʻI heʻene ngaiʻí, ʻoku ava māmālie ʻa e ngaahi hīnisi ʻumeʻumeá. Kae fēfē kapau naʻe ngāueʻaki maʻu pē ʻa e matapaá pea fakalolo lelei ʻa hono ngaahi hīnisí? Naʻe mei faingofua ai ʻa hono fakaavá. ʻOku hoko ʻa e meʻa tatau ʻi he matapā ʻo e fetuʻutakí. Kapau te ke tōʻongaʻaki ʻa e fetuʻutakí pea fakalolo ʻa e ngaahi hīnisi ʻo e matapā ʻo e fetuʻutakí ʻaki ʻa e ʻofa faka-Kalisitiané, ʻe lavangofua ange ai ke ke fakahaaʻi ʻa hoʻo ngaahi fakakaukaú naʻa mo e taimi ʻokú mo taʻefelotoi lahi aí.

Kuo pau ke ke kamata ʻi ha feituʻu. Neongo ko e fetuʻutakí ʻe muʻaki fiemaʻu nai ai ʻa e feinga lahi, ngāue ki ai. ʻE lava leva ai ke faifai pē ʻo ke maʻu ha vahaʻangatae faingofua ange mo ho hoá, ʻo iku ai ki ha femahinoʻaki tuʻuloa.

[Fakamatala ʻi lalo]

[Fakatātā ʻi he peesi 7]

ʻI he hoko ha taʻefelotoí, te ke kumi ki he fakahinohino ʻa e ʻOtuá?