Talanoa ki he Moʻuí

Naʻe Liliu ʻEku Moʻuí ʻi Hono ʻIloʻi ʻa e ʻUhinga ʻOku Fakaʻatā Ai ʻe he ʻOtuá ʻa e Faingataʻá

FAKAMATALA FAI ʻE HARRY PELOYAN

Ko e hā ʻoku fakaʻatā ai ʻe he ʻOtuá ʻa e faingataʻá? Talu ʻeku kei siʻi mo ʻeku fifili ki he foʻi fehuʻi ko ení. Ko ʻeku ongo mātuʻá ko e ongo meʻa ngāue mālohi, faitotonu mo tokanga ki hona fāmilí. Ka ko ʻeku tangataʻeikí naʻe ʻikai ke lotu, pea naʻe ʻikai ke fuʻu fēfē ʻa ʻeku faʻeé. Ko ia ai, naʻe ʻikai lava ke na ʻomai kiate au ʻa e tali ki he fehuʻi ko iá.

NAʻE toe lahi ange ʻa ʻeku fifili ki he foʻi fehuʻi ko iá ʻi he lolotonga pea mo e hili ʻa e Tau II ʻa Māmaní, ʻi heʻeku kau ʻi he Tau Tahi ʻa ʻAmeliká ʻo laka hake ʻi he taʻu ʻe tolu. ʻI he ʻosi ʻa e taú, naʻe vaheʻi au ki ha vaka ʻa ia naʻe fakafolau ki Siaina ke ʻave ai ʻa e ngaahi tokoni. Naʻá ku ʻi ai ʻi he meimei taʻu ʻe taha ʻou siotonu ʻi he faingataʻaʻiá ʻi ha tuʻunga lahi ʻaupito.

Ko e kakai Siainá ko e kakai faʻa ngāue mo ʻatamaiʻia. Ka naʻe faingataʻaʻia ʻaupito ʻa e tokolahi koeʻuhi ko e masivá pea pehē ki he anga-fakamālohi naʻe fakatupunga ʻe he Tau II ʻa Māmaní. Ko e meʻa naʻe mātuʻaki maongo kiate aú ko e fanga kiʻi fānau fakaʻofoʻofa ʻa ia naʻa nau kolekole ʻi heʻemau hifo atu ki ʻutá, ʻa ia ko e tokolahi ai naʻe fasimanava mo vala mahaehae.

Ko e Hā Hono ʻUhingá?

Naʻe fāʻeleʻi au ʻi he 1925 peá u tupu hake ʻi Kalefōnia, ʻAmelika. Naʻe teʻeki ai ke u sio ʻi ha meʻa pehē. Ko ia, naʻá ku toutou ʻeke hifo kiate au, ‘Kapau ʻoku ʻi ai ha Tokotaha-Fakatupu aoniu, ko e hā te ne fakaʻatā ai ʻa e ngaahi tuʻunga ko ení ke ne fakafaingataʻaʻiaʻi ʻa e kakai tokolahi, tautefito ki he fānau ʻoku ʻikai haʻanau koví?’

 Naʻá ku toe fifili foki pe ko e hā ʻe fakaʻatā ai ʻe he ʻOtuá, kapau ʻokú ne ʻi ai moʻoni ʻa e fakaʻauha, tāmate tavale, mate mo e faingataʻaʻia ko ia kuo hoko ki he faʻahinga ʻo e tangatá ʻi he faai mai ʻa e ngaahi senitulí—tautefito ʻi he lolotonga ʻa e Tau II ʻa Māmaní, ʻa ia naʻe mole ai ʻa e moʻui ʻa e kakai laka hake ʻi he toko 50 milioná. ʻIkai ko ia pē, ʻi he tau kotoa ko iá, ko e hā ʻoku fetāmateʻaki ai ʻa e kakai mei he lotu tatau pē, ʻi hono fakaʻaiʻai ʻe heʻenau kau faifekaú, koeʻuhi ko e kehe ʻa honau fonuá?

Ko e Meʻa-Fakaʻata-Fetuʻú

ʻI he kamata ʻa e Tau II ʻa Māmaní ʻi he 1939 pea hoko ai ʻa hono tāmateʻi tavale ʻo e fāmili fakaetangatá, naʻá ku ongoʻi ai ʻoku ʻikai ke ʻi ai ha ʻOtua ia. Ka ʻi ha lēsoni saienisi ʻi he ako māʻolungá, naʻe fiemaʻu ai kiate kimautolu fānau akó ke mau faʻu ha meʻa ʻoku natula fakasaienisí. Koeʻuhi naʻá ku mahuʻingaʻia ʻi he ako ki he fetuʻú, naʻá ku faʻu ai ha meʻa-fakaʻata-fetuʻu lahi, fakataha mo hano sioʻata naʻe feʻunga mo e senitimita ʻe 20 hono taiamitá. Ko e ngāue ko iá naʻe feʻunga ia mo e kotoa ʻo hoku taimi ʻatā ʻi he foʻi semesitā kakato ʻe taha.

ʻI ha pō tafitonga, naʻá ku ʻave ai ki tuʻa ʻeku meʻa-fakaʻata-fetuʻú, ko e fuofua taimí ia, peá u fakaʻata ʻa e ngaahi fetuʻu pea mo e ngaahi foʻi palanite ʻi hotau laʻaá. Naʻá ku fakatumutumu ʻi he lahi ʻo e ngaahi nāunau fakalangi naʻe ʻi aí pea mo e maau ʻa e meʻa kotoa pē. Pea ʻi he taimi naʻá ku ʻilo ai ko e ngaahi “fetuʻu” ʻe niʻihi, ko hono moʻoní ko ha ngaahi kaniva ia hangē ko hotau kanivá, ʻo ʻi ai taki taha ʻa hono ngaahi fetuʻu ʻe laui piliona, naʻe toe ʻangeʻange ai ʻeku fakatumutumú.

Naʻá ku fakakaukau, ‘ʻOku pau ko e ngaahi meʻá ni kotoa heʻikai malava ke nau hoko pē ʻiate kinautolu. ʻOku ʻikai ha meʻa ʻoku maau ʻe hokonoa pē. ʻOku fokotuʻutuʻu maau ʻaupito ʻa e ʻunivēsí ʻo hangē naʻe ngaohi ia ʻe ha poto mataotaó. ʻE lava nai ke ʻi ai ha ʻOtua?’ Ko e meʻa naʻá ku sio ai ʻi he meʻa-fakaʻata-fetuʻú naʻá ne ʻai au ke u kiʻi holomui mei he foʻi fakakaukau fakaʻikaiʻi ʻOtua fakamatematē naʻá ku ʻuluaki maʻú.

Naʻá ku ʻeke hifo leva kiate au: ‘Kapau moʻoni ʻoku ʻi ai ha ʻOtua ʻoku ivilahi mo poto feʻunga ke ne fakatupu ʻa e ʻuniveesi fakaofó ni, ʻikai nai ʻe lava ke ne fakatonutonu ʻa e tuʻunga fakaʻofa ʻoku ʻi he māmaní? Ko e hā naʻá ne muʻaki fakaʻatā ai ʻa e kotoa ʻo e ngaahi mamahí ni?’ ʻI he taimi naʻá ku ʻeke ai ʻa e ngaahi fehuʻí ni ki he kakai lotú, naʻe ʻikai lava ke nau ʻomai ha ngaahi tali fakafiemālie.

ʻI he ʻosi mei he ako māʻolungá pea mo e ngaahi taʻu ʻi he ʻunivēsití, naʻá ku hū ai ʻo kau ʻi he Tau Tahi ʻa ʻAmeliká. Kae kehe, ko e kau faifekau fakakautaú naʻe ʻikai ʻaupito lava ke nau tali mai ʻeku ngaahi fehuʻí. Naʻe faʻa lahi hono leaʻaki ʻe he faʻahinga naʻe lotú ʻa e meʻa hangē ko ení, “ʻOku misiteli ʻa e ngaahi ngāue ʻa e ʻEikí.”

 Hokohoko Atu ʻEku Fekumí

Hili ʻeku mavahe mei Siainá, naʻá ku kei fifili pē ki he ngaahi fehuʻi fekauʻaki mo e ʻuhinga ʻoku fakaʻatā ai ʻe he ʻOtuá ʻa e faingataʻá. Naʻe ʻikai malava ke matoʻo ia mei hoku ʻatamaí, tautefito ʻi heʻeku sio ki he ngaahi faʻitoka ʻo e kau sōtiá ʻi he ngaahi motu kehekehe ʻi he Pasifikí ʻa ia naʻa mau tuʻu ai ʻi heʻemau foki ki homau fonuá. Ko e meimei kotoa ʻo e ngaahi faʻitoká ko e faʻitoka ia ʻo e kau talavou ʻa ia naʻa nau mate mutukia.

ʻI heʻeku aʻu ki he ʻIunaite Seteté pea fakaʻatā au mei he tau tahí, naʻe toe ʻeku taʻu ako ʻe taha ke fakaʻosi ʻi he ʻUnivēsiti Harvard ʻi Cambridge, Massachusetts. Naʻá ku fakakakato ia pea maʻu hoku mataʻitohí, ka naʻe ʻikai te u foki ki Kalefōnia. Naʻá ku pehē ke u kiʻi nofo atu ʻi he Matāfonua Hahaké ʻo feinga ke maʻu ha tali ki heʻeku ngaahi fehuʻí. Naʻá ku fakakaukau ke u ʻalu ki Niu ʻIoke, ʻa ia naʻe lahi ai ʻa e ngaahi lotú, koeʻuhi ke u ʻalu ki ha ngaahi polokalama fakalotu ʻe niʻihi ke u sio pe ko e hā ʻa e meʻa naʻe akoʻi aí.

ʻI Niu ʻIoke, naʻe fakaʻatā mai ʻe he tokoua ʻo ʻeku faʻeé ko Isabel Kapigian, ke u nofo ʻi hono ʻapí. Ko ia mo ʻene ongo tamaiki fefiné, ko Rose mo Ruth, ko e Kau Fakamoʻoni ʻa Sihova kinautolu. ʻI he ʻikai ke u fakakaukau te u mahuʻingaʻia ʻi heʻenau tuí, naʻe kamata ke u ʻalu ki he ngaahi polokalama ʻa e ngaahi lotu kehé ʻo talanoa ki he kakaí mo lau ʻenau ʻū tohí. Naʻá ku ʻeke ange kiate kinautolu pe ko e hā ʻoku fakaʻatā ai ʻe he ʻOtuá ʻa e faingataʻá, ka naʻe ʻikai te nau ʻilo ʻa e talí ʻo hangē pē ko aú. Naʻá ku fakaʻosiʻaki ai mahalo pē ʻoku ʻikai ke ʻi ai ha ʻOtua ia.

Maʻu ʻa e Talí

Naʻá ku kole leva ki he tokoua ʻo ʻeku faʻeé mo ʻene ongo tamaikí pe ʻe lava ke u lau ha niʻihi ʻo ʻenau ʻū tohí ke u ʻilo ʻa e anga ʻo e fakakaukau ʻa e Kau Fakamoʻoni ʻa Sihová. ʻI heʻeku lau ʻa e ʻū tohí, naʻe vave ai ʻeku ʻilo ko e Kau Fakamoʻoní naʻa nau kehe ʻaupito mei he ngaahi lotu kehé. Naʻe haʻu ʻa e talí mei he Tohi Tapú pea naʻe fakafiemālie ʻaupito. ʻI ha kiʻi taimi nounou pē, naʻe tali ʻeku ngaahi fehuʻi fekauʻaki mo e ʻuhinga ʻoku fakaʻatā ai ʻe he ʻOtuá ʻa e faingataʻá.

ʻIkai ko ia pē, ka naʻe lava ke u sio naʻe poupouʻi ʻe he Kau Fakamoʻoni ʻa Sihová ʻenau ngaahi tali Fakatohitapú ʻaki ʻenau tōʻonga moʻuí. Ko e fakatātaá, naʻá ku ʻeke ange kia Isabel  pe ko e hā ʻa e meʻa naʻe fai ʻe he kau talavou Fakamoʻoni ʻa Sihová ʻi Siamane lolotonga ʻa e Tau II ʻa Māmaní. Naʻa nau kau ʻi he kau taú, ʻo pehē “Heil Hitler!,” pea salute ki he fuka faka-Nasí? Ko ʻene talí ko e ʻikai, naʻe ʻikai te nau kau ai. Pea koeʻuhi ko ʻenau tuʻu-ʻataá, naʻe ʻave ai kinautolu ki he ngaahi kemi fakamamahi ʻa ia naʻe fakapoongi ai honau tokolahi. Naʻá ne fakamatala ʻo pehē ʻi he lolotonga ʻa e taú naʻe tatau pē ʻa e tuʻunga ʻo e Kau Fakamoʻoni ʻa Sihová ʻi he feituʻu kotoa pē, ʻo tuʻu-ʻatā. Naʻa mo e ngaahi fonua temokalatí, naʻe tuku pilīsone ai ʻa e kau talavou Fakamoʻoni ʻa Sihová koeʻuhi ko ʻenau tuʻu-ʻataá.

Naʻe kole mai leva ʻe Isabel ke u lau ʻa e Sione 13:​35, ʻa ia ʻoku pehē ai: “Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” Kuo pau ke maʻu ʻe he kau Kalisitiane moʻoní ʻa e fakaʻilonga ko ia ʻo e ʻofá ʻi ha tuʻunga fakavahaʻapuleʻanga. ʻE ʻikai ʻaupito ke ʻilo kinautolu ʻi ha ongo faʻahi fehangahangai ʻi he taú, ʻo fetāmateʻaki koeʻuhi ko e kehe hona fonuá! Naʻá ne ʻeke mai: “ʻE lava ke ke sioloto atu kia Sīsū mo ʻene kau ākongá ʻoku nau tuʻu fehangahangai ʻi he ngaahi tau ʻa Lomá ʻo fetāmateʻaki?”

Naʻe toe fakahanga foki au ki he 1 Sione 3:​10-12. ʻOku pehē ai: “Ko e meʻa ko ia ʻoku mahino ai ʻa e fanau ʻa e ʻOtua pea mo e fanau ʻa e Tevolo: ko ia ʻoku ʻikai ke fai maʻoniʻoni ʻoku ʻikai mei he ʻOtua ia, kaeʻumaʻā ʻa ia ʻoku ʻikai ke ʻofa ki hono tokoua. . . . Ke tau feʻofaʻaki. He ko e pehe koā ke tau hange ko Keini ʻa ia ko e tupu-mei-he-Fili, ʻo ne tamateʻi hono tokoua.”

ʻOku māʻalaʻala ʻa e akonaki ʻa e Tohi Tapú. ʻOku feʻofaʻaki ʻa e kau Kalisitiane moʻoní, ʻo tatau ai pē pe ko fē ʻa e fonua ʻoku nau nofo aí. Ko ia ai, ʻe ʻikai ʻaupito ke ʻilo kinautolu ʻoku nau fakapoongi honau ngaahi tokoua fakalaumālié pe ko ha taha kehe. Ko e ʻuhinga ia naʻe malava ai ke pehē ʻe Sīsū ʻo fekauʻaki mo hono kau muimuí: “ʻOku ʻikai te nau ʻo māmāni, hange ko au, ʻoku ʻikai te u ʻo māmāni.”—Sione 17:16.

ʻUhinga ʻOku Fakaʻatā Aí

Naʻe vave ʻeku ʻiloʻi ʻoku fakahā mai ʻe he Tohi Tapú ʻa e ʻuhinga ʻoku fakaʻatā ai ʻe he ʻOtuá ʻa e faingataʻá. ʻOku fakamatala ai, ʻi he taimi naʻe fakatupu ai ʻe he ʻOtuá ʻa ʻetau ʻuluaki ongo mātuʻá, naʻá ne ngaohi kinaua ʻi he tuʻunga haohaoa peá ne tuku kinaua ki ha ngoue palataisi. (Senesi 1:26; 2:15) Naʻá ne toe ʻoange foki kiate kinaua ha meʻaʻofa fakamānako ʻaupito, ko e tauʻatāina ke filí. Ka naʻe pau ke na ngāue fakapotopotoʻaki ʻa e mafai ko iá. Kapau naʻá na talangofua ki he ʻOtuá mo ʻene ngaahi laó, naʻe malava ke hokohoko atu ai ʻena moʻui haohaoa ʻi ha palataisí. Te na fakalahi atu ʻa e palataisi ko iá kae ʻoua ke ne kātoi ʻa e foʻi māmaní fakakātoa. ʻE toe haohaoa foki mo ʻena fānaú, ʻa ia ʻe faai atu pē ʻo hoko ʻa e foʻi māmani ko ení ko ha palataisi fisifisimuʻa ʻoku nofoʻi ʻe he kakai fiefia mo haohaoa.—Senesi 1:28.

Kae kehe, kapau naʻe fili ʻa ʻĀtama mo ʻIvi ke na tauʻatāina ʻo mavahe mei he ʻOtuá, ʻe ʻikai leva te ne kei fakatolonga hona tuʻunga haohaoá. (Senesi 2:​16, 17) Ko e meʻa fakamamahi ki he faʻahinga ʻo e tangatá, naʻe ngāuekoviʻaki ʻe heʻetau ʻuluaki ongo mātuʻá ʻena tauʻatāina ke filí ʻo na fili ke na tauʻatāina mei he ʻOtuá. Naʻe fakaʻaiʻai kinaua ʻe ha meʻamoʻui laumālie angatuʻu ʻa ia naʻe hoko ʻo ʻiloa ko Sētane ko e Tēvoló. Naʻá ne fakaʻamua ʻa e tauʻatāina mei he ʻOtuá pea mo e lotu ʻa ia ko hono totonú ke fai ki he ʻOtuá tokotaha pē.—Senesi 3:​1-19; Fakahā 4:11.

Naʻe hoko ai ʻa Sētane ko e “ʻotua ʻo e tuʻu ko eni.” (2 Kolinito 4:4) ʻOku fakahā ʻe he Tohi Tapú: “Ko hono kotoa ʻo mamani ʻoku ʻi he nima ʻo e Fili.” (1 Sione 5:19) Naʻe ui ʻe Sīsū ʻa Sētane ko e “ʻeiki ʻo māmani.” (Sione 14:30) Ko e talangataʻa ʻa Sētane mo ʻetau ʻuluaki ongo mātuʻá naʻá ne ʻomai ai ʻa e taʻehaohaoa, fakamālohi,  mate, mamahi mo e faingataʻaʻia ki he faʻahinga kotoa ʻo e tangatá.—Loma 5:12.

“ʻOku ʻIkai ʻi he Tangata”

Ke fakatātaaʻi ʻa e meʻa ʻe hoko ki he fāmili ʻo e tangatá ʻi hono tukunoaʻi ʻo e ngaahi lao ʻa e Tokotaha-Fakatupú, kuo fakaʻatā ai ʻe he ʻOtuá ʻa hono ngaahi nunuʻá ʻi he laui afeʻi taʻu. Ko e vahaʻa taimi ko ení kuó ne ʻomai ai ʻa e faingamālie feʻunga ki he faʻahinga kotoa ʻo e tangatá ke nau fakamoʻoniʻi ʻa e moʻoni ʻo e meʻa ʻoku leaʻaki ʻe he Tohi Tapú: “ʻOku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu. Akonakiʻi au, ʻe Sihova.”—Selemaia 10:​23, 24.

Ko ia ʻi he hili ʻa e ngaahi senituli kotoa ko ení, ʻoku malava ai ke tau sio ʻoku taʻelavameʻa ʻa e pule ko ia ʻoku tauʻatāina mei he ʻOtuá. Ko ia ai, ʻoku fakataumuʻa ʻe he ʻOtuá ke fakangata ʻa e maumau ko eni ʻoku hokosia ʻe he faʻahinga ʻo e tangatá ʻi he tauʻatāina meiate ia mo ʻene ngaahi laó.

Ko ha Kahaʻu Fakaofo

ʻOku fakahā ʻe he kikite ʻa e Tohi Tapú, ʻoku vavé ni ke fakangata ʻe he ʻOtuá ʻa e fokotuʻutuʻu fulikivanu mo anga-fakamamahi ko ení: “ʻOku toe siʻi pea mole ʻa ia ʻoku faikovi . . . Ka ʻe maʻu ʻa e fonua ʻe he faʻa kataki; pea te nau fefiefiaʻi ʻi he melino lahi.”—Sāme 37:​10, 11.

ʻOku fanongonongo ʻe ha kikite ʻi he Taniela 2:44: “ʻI he taimi ʻo e ngaahi tuʻi ko ia [ngaahi founga pule kotoa pē ʻoku ʻi ai ní], ko e ʻOtua ʻo Langi te ne fokotuʻu ha puleʻanga ʻe ʻikai fulihi ʻo taʻengata; pea ko hono pule ʻe ʻikai tuku ki ha kakai kehe: ka te ne laiki mo fakaʻauha ʻa e ngaahi puleʻanga ko ia, kae tuʻu pe ia ʻo taʻengata.” ʻE ʻikai ʻaupito ke toe fakaʻatā ke pule ʻa e tangatá. Ko e kotoa ʻo e foʻi māmaní ʻe puleʻi ia ʻe he Puleʻanga ʻo e ʻOtuá. ʻI he malumalu ʻo ʻene pulé, ʻe ngaohi ʻa e foʻi māmaní fakakātoa ko ha palataisi pea ʻe hoko ʻo haohaoa ʻa e faʻahinga ʻo e tangatá ke nau moʻui fiefia ʻo taʻengata. ʻOku talaʻofa ʻe he Tohi Tapú: “[Ko e ʻOtuá] te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia.” (Fakahā 21:4) Ko ha kahaʻu fakaofo ē ʻoku tuku tauhi mai ʻe he ʻOtuá maʻa kitautolú!

Kehe ʻEku Moʻuí

Ko hono maʻu ʻa e tali fakafiemālie ki heʻeku ngaahi fehuʻí naʻá ne liliu ai ʻeku moʻuí. Mei he taimi ko iá naʻá ku loto ai ke tauhi ki he ʻOtuá mo tokoniʻi ʻa e niʻihi kehé ke nau maʻu ʻa e ngaahi tali ko ení. Naʻá ku mahinoʻi ʻa e mafatukituki ʻo e meʻa ʻoku fakahā ʻi he 1 Sione 2:17: “ʻOku fakaʻaʻau ke mole ʻa mamani [ʻa e fokotuʻutuʻu lolotonga ko eni ʻoku puleʻi ʻe Sētané] mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” Naʻá ku fiemaʻu moʻoni ʻa e moʻui taʻengata ʻi he māmani foʻou ʻa e ʻOtuá. Naʻá ku fili ke u nofo ʻi Niu ʻIoke pea kamata feohi ai mo ha fakatahaʻanga ʻo e Kau Fakamoʻoni ʻa Sihová, ʻou hokosia ai ʻa e ngaahi meʻa lelei lahi ʻi hono tokoniʻi ʻa e niʻihi kehé ke nau ʻiloʻi ʻa e meʻa naʻá ku ʻiló.

ʻI he 1949, naʻá ku fetaulaki ai mo Rose Marie Lewis. Ko ia mo ʻene faʻeé ko Sadie mo hono fanga tokoua ʻe toko ono, ko e Kau Fakamoʻoni ʻa Sihova kotoa kinautolu. Naʻe ngāue taimi-kakato ʻa Rose ki he ʻOtuá ʻi he ngāue fakamalangá. Ko ha tokotaha ia naʻá ne maʻu ʻa e ngaahi ʻulungāanga lelei lahi, pea naʻá ku saiʻia leva ai. Naʻá ma mali ʻi Sune 1950 peá ma nofo ʻi Niu ʻIoke. Naʻá ma fiefia ʻi he meʻa naʻá ma faí pea ʻi he ʻamanaki ʻo e moʻui taʻengata ʻi he māmani foʻou ʻa e ʻOtuá.

ʻI he 1957, naʻe fakaafeʻi ai au mo Rose Marie ke ma ngāue taimi-kakato ʻi he ʻuluʻi ʻapitanga ʻo e Kau Fakamoʻoni ʻa Sihova ʻi Brooklyn, Niu ʻIoké. ʻI Sune 2004, ko e taʻu ʻaki ia ʻe 54 ʻo ʻema maʻu ha nofo mali fiefia, ʻa ia ko e taʻu ai ʻe 47 naʻá ma ʻi he ʻuluʻi ʻapitanga ʻi Brooklyn. Ko e ngaahi taʻu faitāpuekina ia ʻo e tauhi kia Sihová  pea mo e ngāue fakataha mo e laui afe ʻo homa kaungātuí.

Ko Hoku Tā Fakamamahi Tahá

Ko e meʻa fakamamahí, ʻi he konga ki muʻa ʻo Tīsema ʻo e 2004, naʻe ʻilo ai ʻoku ʻi ai ha foʻi ngungu kuo fakakanisā ʻi he taha ʻo e ongo maʻamaʻa ʻo Rose Marie. Naʻe loto-taha ʻa e kau mataotao fakafaitoʻó ʻoku fuʻu vave ʻene tupú pea kuo pau ke toʻo. Naʻe fakahoko ʻa e tafá ʻi he konga ki mui ʻo Tīsemá, pea ʻi he ʻosi nai ha uike mei ai, naʻe haʻu ai ʻa e toketā faitafá ki he loki ʻo Rose, lolotonga ia naʻá ku ʻi ai, ʻo ne pehē mai: “Rose Marie, ʻatā koe ki ʻapi! Kuó ke sai!”

Kae kehe, ʻi ha ngaahi ʻaho siʻi pē mei heʻema foki ki ʻapí, naʻe kamata ke langa lahi ʻaupito ʻa e kete ʻo Rose Marie pea mo e ngaahi feituʻu kehe pē. Naʻe hokohoko atu pē ʻa e langá, ko ia naʻá ne toe foki ki he falemahakí ke toe fai hano ngaahi sivi lahi ange. Naʻe ʻilo ai naʻe fatu ʻa e totó ʻi ha faʻahinga ʻuhinga, ʻi ha niʻihi ʻo hono ngaahi ʻōkani pelepelengesí, ʻa ia naʻe taʻofi ai mei he ngaahi ʻōkani ko ení ʻa e ʻosikena ʻoku fiemaʻú. Naʻe fai ʻe he kau toketaá ʻa e meʻa kotoa pē naʻa nau malavá ke fakafepakiʻi ʻa e tuʻungá ni ka naʻe ʻikai ke ola. ʻI ha ngaahi uike siʻi pē mei ai, ʻi Sanuali 30, 2005, naʻá ku tofanga ai ʻi he tā fakamamahi taha ʻo ʻeku moʻuí. Naʻe mālōlō ʻa siʻoku ʻofaʻanga ko Rose Marie.

ʻI he taimi ko ení, naʻá ku meimei taʻu 80 ai pea kuó u mātā ʻa e faingataʻaʻia ʻa e kakaí ʻi he kotoa ʻo ʻeku moʻuí, ka naʻe kehe eni ia. Ko au mo Rose Marie, hangē ko e lau ʻa e Tohi Tapú naʻá ma “kakano pe taha.” (Senesi 2:24) Naʻá ku mātā ʻa e faingataʻaʻia ʻa e niʻihi kehé pea naʻá ku faingataʻaʻia foki ʻi he mate ʻa e ngaahi kaungāmeʻá mo e kāingá. Ka ko e mamahi naʻá ku tofanga ai ʻi he mate ʻa hoku uaifí naʻe fakamamahi ʻaupito ange ia mo tolonga fuoloa. ʻOku ou mahinoʻi kakato he taimí ni ʻa e fuʻu mamahi kuo ʻomai ʻi ha taimi fuoloa, ʻe he mate ʻa e ngaahi ʻofaʻangá ki he fāmili ʻo e tangatá.

Kae kehe, ko ʻeku mahinoʻi ʻa e tupuʻanga ʻo e faingataʻá pea mo e founga ʻe ngata aí kuo hoko ia ʻo tokoni kiate au. ʻOku pehē ʻe he Sāme 34:18: “Ko e loto lavea ʻoku ofi ki ai ʻa e ʻEiki, pea ʻoku ne fakamoʻui ʻakinautolu ʻoku laumalie mafesi.” Ko ha kī ki hono kātekina ʻa e mamahi ko ení ko hono ʻiloʻi ʻoku akoʻi ʻe he Tohi Tapú ʻe ʻi ai ha toetuʻu, ʻa ia ko e faʻahinga ʻi he ngaahi faʻitoká te nau toe foki mai pea maʻu ʻa e faingamālie ke moʻui taʻengata ʻi he māmani foʻou ʻa e ʻOtuá. ʻOku pehē ʻi he Ngāue 24:15: “ʻE faifai pea hoko ha toetuʻu ʻa e angatonu mo e angahala fakatouʻosi.” Naʻe ʻofa lahi ʻa Rose Marie ki he ʻOtuá. ʻOku ou tui ʻoku pehē pē mo e ʻofa kiate ia ʻa e ʻOtuá pea te ne manatua ia ʻo fakafoki mai ʻi heʻene taimi totonu, ʻa ia ʻoku ou ʻamanaki ʻoku vavé ni ʻaupito mai.—Luke 20:38; Sione 11:25.

Lolotonga ʻoku lahi ʻa e mamahi ʻi he mole ʻa ha taha ʻofeiná, ʻe toe lahi ange ʻa e fiefia ia ʻe hoko ʻi hono talitali mai ha taha ʻofeina ʻi he toetuʻú. (Maake 5:​42) ʻOku talaʻofa ʻe he Folofola ʻa e ʻOtuá: “E moui a hoo kakai mate . . . E buaki e he kelekele ae mate.” (Aisea 26:​19, PM) Ko e tokolahi ʻi he kau “angatonu” ʻoku lave ki ai ʻi he Ngāue 24:15 ʻoku ngalingali ʻe tomuʻa fokotuʻu hake kinautolu. Ko ha taimi fakaofo moʻoni ia! Pea ʻi he faʻahinga ʻe toe fakafoki maí ʻe kau ai ʻa Rose Marie. Ko ha talitali lelei moʻoni te ne maʻu mei hono ngaahi ʻofaʻangá! Hono fakafiemālie moʻoni ko e taimi ko iá ke moʻui ʻi ha māmani ʻa ia ʻoku ʻikai ke ʻi ai ha faingataʻaʻiá!

[Fakatātā ʻi he peesi 9]

Naʻá ku mātā ʻa e faingataʻaʻiá ʻi heʻeku ʻi Siainá

[Fakatātā ʻi he peesi 10]

Kuó u ngāue talu mei he 1957, ʻi he ʻuluʻi ʻapitanga ʻo e Kau Fakamoʻoni ʻa Sihová ʻi Brooklyn

[Fakatātā ʻi he peesi 12]

Naʻá ku mali mo Rose Marie ʻi he 1950

[Fakatātā ʻi he peesi 13]

ʻI he fakamanatu ʻo e taʻu ʻe 50 ʻo ʻema malí, ʻi he 2000