ʻE Lava Ke Ke Lea Tauʻatāina mo Loto-Toʻa?

ʻOKU laka ʻi he kakai ʻe ono miliona ʻi he fonua ʻe 235 ʻoku nau lea tauʻatāina mo loto-toʻa ʻi he founga ko ia ʻoku fakamatalaʻi ʻi he Tohi Tapú. (Filipai 1:​20; 1 Timote 3:​13; Hepelu 3:6; 1 Sione 3:​21) Ko e hā ʻa e meʻa ʻoku kau ki he lea tauʻatāina mo loto-toʻa peheé? Ko e hā ʻe lava ke tokoniʻi kitautolu ke lea ʻi he founga ko iá? Ko e hā ʻa e ngaahi tafaʻaki ʻo e fetuʻutakí ʻe lava ʻe he meʻá ni ʻo fakaʻatā kitautolu ke lea taʻetaʻofi aí?

Fakatatau ki he Vine’s Expository Dictionary of Old and New Testament Words, ko e kupuʻi lea faka-Kalisi ki he faʻahinga loto-toʻa ʻoku lāulea ki ai ʻi hení ʻokú ne fakamahinoʻi ʻa e “tauʻatāina ʻo e lea, lea taʻetaʻofi, . . . taʻeilifia ʻi he lea loto-toʻá; ʻa ia ʻoku fakahuʻunga ai ki he loto-maʻu, fiefia he loto-lahí, loto-toʻa, ʻo ʻikai faʻa ʻuhinga maʻu pē he toki fai ha lea.” Kae kehe, ʻoua ʻe fetoʻoaki ʻa e lea taʻemāluʻia peheé, mo e lea taʻefakakaukaú pe lea taʻetāú. “Ke kelesiʻia ai pe hoʻomou lea,” ko e fakamatala ia ʻa e Tohi Tapú. (Kolose 4:6) Ko e lea tauʻatāiná ʻoku kau ki ai ʻa e nofoʻaki fakapotopoto lolotonga ia ʻa e ʻikai fakaʻatā ʻa e ngaahi tuʻunga fakamamahi ʻoku tau ʻi aí pe ilifia tangatá ke ne taʻotaʻofi ʻetau leá.

ʻOku fanauʻi mai pē kitautolu kuo tau maʻu ʻa e lea tauʻatāiná? Fakakaukau atu ki he meʻa naʻe tohi ʻe he ʻapositolo ko Paulá ki he kau Kalisitiane ʻi ʻEfesoó. Naʻá ne pehē: “Ko au ia ne tuku ki ai ʻa e kelesi ni, ʻa au ko e siʻi ʻi he siʻi ange fau ʻi he kau lotu kotoa pe, ke aʻaku ʻa e malangaʻaki ki he Senitaile ʻa e koloa ʻa Kalaisi ʻoku taʻe faʻa hakulea.” Naʻe toe tānaki mai ʻe Paula ʻoku tuʻunga ʻia Sīsū Kalaisi “ʻetau taʻemaluʻia ni, mo ʻene apaapangofua ke tau hoko atu, heʻetau fai falala, ko e tupu ʻi heʻetau tui ki he ʻEne ʻAfio.” (Efeso 3:​8-12) ʻI he ʻikai ko ha faʻahinga monū eni ʻoku tau maʻu tukufakaholo, ko e lea tauʻatāiná ʻoku tupu ia mei hotau vahaʻangatae mo Sihova ko e ʻOtuá ʻo makatuʻunga ʻi he tui kia Sīsū Kalaisí. Tau sio angé ki he meʻa ʻe lava ke ne tokoniʻi kitautolu ke maʻu ʻa e tauʻatāina ko ení pea mo e founga ʻe lava ai ke tau fakahāhā ia ʻi heʻetau malangá, faiakó mo e lotú.

Ko e Hā Te Ne Tokoniʻi Kitautolu Ke Tau Malanga Loto-Toʻá?

Ko Sīsū Kalaisí ko e faʻifaʻitakiʻanga tuʻu-ki-muʻa ia ʻo ha taha naʻe lea tauʻatāina. Ko ʻene faivelengá naʻe ueʻi ai ia ke ne puke ha ngaahi faingamālie ke malanga ai. Pe ko haʻane mālōlō, kai ʻi ha ʻapi ʻo ha taha, pe lue ʻi he halá, naʻe ʻikai ʻaupito te ne tukuange ʻa e faingamālie ko ia ke talanoa ai ʻo fekauʻaki mo e Puleʻanga ʻo e ʻOtuá. Naʻa mo e manukí pe fakafepaki fakahangatonú naʻe ʻikai ke manavahē ai ʻa Sīsū ʻo fakalongolongo ai pē. ʻI hono kehé, naʻe loto-toʻa pē ia ʻi hono fakaeʻa ʻa e kau taki lotu loi ʻi  hono taimí. (Mātiu 23:​13-36) Naʻa mo e taimi naʻe puke ai ia ʻo fakamāuʻí naʻe kei lea taʻemanavahē pē ʻa Sīsū.​—Sione 18:​6, 19, 20, 37.

Ko e kau ʻapositolo ʻa Sīsuú naʻa nau toe lea taʻemāluʻia mo kinautolu. ʻI he Penitekosi ʻo e 33 T.S., naʻe lea tauʻatāina ai ʻa Pita ʻi he ʻao ʻo e fuʻu kakai laka hake he toko 3,000. Ko e meʻa fakaʻohovalé, ʻi ha kiʻi taimi siʻi ki muʻa ange, naʻe manavahē ʻa Pita ʻi he taimi naʻe ʻiloʻi ai ia ʻe ha kiʻi fefine kaunanga. (Maake 14:​66-​71; Ngāue 2:​14, 29, 41) ʻI hono faulele atu ki he ʻao ʻo e kau taki lotú, naʻe ʻikai ha teki ia ʻa Pita mo Sione. Naʻe ʻikai toe fakatatali ʻena faifakamoʻoni loto-toʻa fekauʻaki mo Sīsū Kalaisi ʻa ia kuo toetuʻú. Ko hono moʻoní, ko e lea taʻemāluʻia ko eni ʻa Pita mo Sioné naʻe taki atu ai ʻa e kau taki lotú ke nau ʻiloʻi naʻe faʻa ʻia Sīsū ʻa e ongo tangatá ni. (Ngāue 4:​5-13) Ko e hā naʻá ne fakamafeia kinaua ke lea loto-toʻa peheé?

Naʻe ʻosi talaʻofa ʻa Sīsū ki heʻene kau ʻapositoló: “Ka nau ka fakaʻilo kimoutolu, ʻoua te mou lotomoʻua pe fēfē haʻamou tali, pe ki ha meʻa te mou leaʻaki: he ʻe ʻatu kiate kimoutolu ʻi he taimi ko ia ha meʻa ke mou leaʻaki: he ʻoku ʻikai ko kimoutolu ʻe lea, ka ko e Laumalie ʻo hoʻomou Tamai ʻe lea ʻiate kimoutolu.” (Mātiu 10:​19, 20) Naʻe tokoniʻi ʻe he laumālie māʻoniʻoní ʻa Pita mo e niʻihi kehé ke nau ikuʻi ha faʻahinga tailiili pē pe manavahē naʻá ne mei taʻofi ʻenau lea tauʻatāiná. Ko e tākiekina ʻa e ivi mālohi ko iá te ne toe tokoniʻi foki mo kitautolu.

ʻIkai ko ia pē, naʻe ʻoange ʻe Sīsū ki hono kau muimuí ha fekau ke nau ngaohi ākonga. Naʻe feʻungamālie eni he koeʻuhí ko e Tokotaha ia kuo tuku ki ai ʻa e “pule kotoa pe ʻi langi pea ki mamani.” Pea ‘ʻokú ne ʻiate kinautolu.’ (Mātiu 28:​18-20) ʻI hono ʻiloʻi ʻa e tokoni pehē ʻa Sīsuú, naʻe maʻu ai ʻe he muʻaki kau ākongá ha loto-maʻu ʻi heʻenau fehangahangai mo e kau maʻu mafai ko ia naʻa nau fakapapau ke taʻofi ʻenau malangá. (Ngāue 4:​18-20; 5:​28, 29) Ko hono ʻiloʻi ʻa e tokoni peheé te ne toe fai ʻa e meʻa tatau maʻatautolu.

ʻI hono toe ʻiloʻi ʻa e ʻuhinga ʻe taha ke lea taʻemāluʻia aí, naʻe fakafelāveʻi ʻe Paula ʻa e ʻamanakí mo e “lea ilogofua lahi.” (2 Kolinito 3:​12, PM; Filipai 1:​20) Koeʻuhi naʻe fuʻu lelei fau ʻa e pōpoaki ʻo e ʻamanakí ke tauhi pē maʻanautolu, naʻe pau ai ki he kau Kalisitiané ke nau tala ia ki he niʻihi kehé. Ko e moʻoni, ko ʻetau ʻamanakí ko e toe ʻuhinga ia ʻe taha ke tau lea tauʻatāina ai.​—Hepelu 3:6.

Malanga Loto-Toʻa

ʻE lava fēfē ke tau malanga loto-toʻa neongo ʻetau ʻi he ngaahi ʻātakai ngali fakailifiá? Fakakaukau atu ki he faʻifaʻitakiʻanga ʻa e ʻapositolo ko Paulá. Lolotonga ʻene nofo pōpula ʻi Lomá, naʻe kole ʻe Paula ki hono kaungātuí ke nau lotu ‘ke tangaki hono ngutú koeʻuhi ke ne lea malohi ʻi he meʻa ko ia, ʻa ia ʻoku tāu mo ia ke faí.’ (Efeso 6:​19, 20) Naʻe tali ʻa e ngaahi lotu ko iá? ʻIo! Lolotonga ʻene nofo pōpulá, naʻe hokohoko atu ʻa Paula ke “malangaʻaki ʻa e Puleʻanga ʻo e ʻOtua, ʻo ne . . . matuʻaki fai mālohi, ʻo ʻikai taʻofia.”​—Ngāue 28:​30, 31.

ʻI hono ngāueʻaongaʻaki ʻa e ngaahi faingamālié ke faifakamoʻoni ai ʻi he ngāué, ʻapiakó pe lolotonga ha fefonongaʻaki, ʻe lava ke siviʻi ai ʻetau lea tauʻatāiná. Ko e mā pe manavasiʻi ki ha tali ʻe fai mai nai, pe siʻi ʻa e falala ki he meʻa te tau ala lavá te ne ʻai nai ai kitautolu ke tau fakalongolongo. ʻOku toe ʻomai ai heni ʻe he ʻapositolo ko Paulá ha faʻifaʻitakiʻanga lelei. Naʻá ne tohi: “Naʻa mau fai malohi ʻemau malangaʻaki ʻa e Kosipeli ʻa e ʻOtua kiate kimoutolu, neongo naʻe lahi ʻa e faingataʻa.” (1 Tesalonaika 2:2) Koeʻuhí pē naʻá ne falala kia Sihova naʻe malava ai ʻa Paula ke fai ʻa e meʻa naʻe taʻemalava ke ne fai ʻiate pē.

Naʻe tokoniʻi ʻe he lotú ha fefine ko Sherry ke ne maʻu ha loto-toʻa ʻi he taimi naʻe malanga hake ai ha faingamālie ke malanga fakatuʻupakē ai. ʻI he ʻaho ʻe taha lolotonga ʻene tali ki hono husepānití ke foki mai mei haʻane ʻapoinimeni, naʻá ne fakatokangaʻi atu ha fefine naʻe toe tatali mo ia. “ʻI heʻeku fiu feinga ke u lava ʻo leá,” ko e lau ia ʻa Sherry, “naʻá ku lotu ai kia Sihova ki ha loto-toʻa.” ʻI he fakaofiofi atu ʻa Sherry ki he fefiné, naʻe aʻu mai ha faifekau siasi Papitaiso. Naʻe ʻikai ʻamanekina ʻe Sherry ia ʻe fehangahangai mo ha faifekau. Neongo ia, naʻá ne toe fai ha lotu pea naʻe malava ai ke ne fai ha fakamoʻoni. Naʻá ne tuku ha tohi ʻi he fefiné mo fai ha fokotuʻutuʻu ki ha toe ʻaʻahi. ʻI heʻetau puke ko ia ʻa e ngaahi faingamālie ke faifakamoʻoni  aí, ʻoku tau tuipau ʻe hanga ʻe he falala kia Sihová ʻo tokoniʻi kitautolu ke tau lea taʻemāluʻia.

ʻI he Taimi Faiakó

Ko e lea tauʻatāiná ʻoku fekauʻaki vāofi ia mo e faiakó. Fekauʻaki mo “kinautolu ne nau lava lelei ʻa e ngaue ʻa e akonaki” ʻi he fakatahaʻangá, ʻoku pehē ʻe he Tohi Tapú: “ʻOku nau maʻu ai maʻanautolu ha tuʻunga lelei, mo e fuʻu lotomalohi heʻenau tui, ko e tui kia Kalaisi Sisu.” (1 Timote 3:13) ʻOku nau maʻu ʻa e lea tauʻatāina ko ení ʻi heʻenau ngāueʻaki ko ia ʻa e meʻa ʻoku nau akoʻi ki he niʻihi kehé. Ko ʻenau fai peheé ʻoku maluʻi ai mo fakaivia ʻa e fakatahaʻangá.

ʻI he taimi ʻoku tau lea tauʻatāina ai ʻi he founga ko ení, ʻoku ola lelei leva ai ʻetau akonakí mo ngalingali ange ʻe fai ha muimui ki ai. ʻI he ʻikai fakatuta ko haʻatau faʻifaʻitakiʻanga kovi, ʻe fakatupu fakaʻaiʻai ange ki he kau fanongó kapau ʻoku tatau hotau tuhú mo hotau ngutú ʻi he meʻa ʻoku tau akoʻi angé. Ko e tauʻatāina ko ení ʻokú ne ʻai ke malava ai ʻa e faʻahinga ʻoku taau fakalaumālié ke ‘faitoʻo honau tokouá’ ki muʻa ke toe kovi ange ʻa e palopalemá. (Kaletia 6:1) ʻI he tafaʻaki ʻe tahá, kapau ʻoku faʻifaʻitakiʻanga kovi ha taha, te ne toumoua nai ke lea hake koeʻuhi ʻokú ne ongoʻi taʻefeʻunga ke fai ha akonaki. Ko e toloi hono fai ʻo e akonaki ʻoku fiemaʻú ʻe lava ke taki atu ia ki he ikuʻanga fakamamahi.

Ko ʻetau lea loto-toʻá ʻoku ʻikai ʻuhinga ia ke tau hoko ʻo fakaanga, fakamatematē pe taʻefieauna. Naʻe ekinakiʻi ʻe Paula ʻa Filimone “tuʻunga ʻi he ʻofa.” (Filimone 8, 9) Pea ʻoku hā naʻe tali lelei ʻa e ngaahi lea ʻa e ʻapositoló. ʻIo, ʻoku totonu ke hoko ʻa e ʻofá ko e mālohi ia ʻokú ne ueʻi ha faʻahinga akonaki pē ʻoku fai nai ʻe ha tokotaha mātuʻa!

Ko e lea tauʻatāiná ʻoku mātuʻaki mahuʻinga moʻoni ia ʻi he taimi ʻoku fai ai ha akonaki. ʻOku toe mahuʻinga ia ʻi he ngaahi taimi kehé. Naʻe tohi ʻa Paula ki he fakatahaʻanga ʻi Kolinitoó: “Oku lahi eku faa lea atu kiate kimoutolu, oku ou vikiviki lahi koeuhi ko kimoutolu.” (2 Kolinito 7:​4, PM) Naʻe ʻikai toe fakatuotuai ʻa Paula ʻi hono fakaongoongoleleiʻi hono fanga tokouá mo hono fanga tuofāfiné ʻi he taimi ʻoku tuha aí. Naʻe ueʻi ia ʻe he ʻofá ke tokangataha pē ki he ngaahi tuʻunga lelei ʻo hono kaungātuí, neongo naʻá ne toe lāuʻilo foki ki heʻenau ngaahi halá. ʻOku pehē pē mo e langa hake ʻo e fakatahaʻanga Kalisitiane he ʻaho ní ʻi he taimi ʻoku fakaongoongoleleiʻi tauʻatāina ai mo fakalototoʻaʻi ʻe he kau mātuʻá honau fanga tokouá mo e fanga tuofāfiné.

Ke ola lelei ʻenau malangá, ʻoku fiemaʻu ki he Kalisitiane kotoa pē ke nau lea tauʻatāina. Ko Sherry ʻa ia naʻe lave ki ai ʻi muʻá, naʻá ne loto ke fakalototoʻaʻi ʻene fānaú ke nau faifakamoʻoni ʻi he ʻapiakó. “Neongo naʻe ʻohake au ʻi he moʻoní,” ko ʻene laú ia, “naʻe tātātaha pē ke u faifakamoʻoni au ʻi he ʻapiakó. Pea naʻe siʻi pē ke u faifakamoʻoni fakatuʻupakē au. Naʻá ku ʻeke hifo kia au, ‘Ko e hā ʻa e faʻifaʻitakiʻanga ʻoku ou  fokotuʻu ki heʻeku fānaú?’” Naʻe ueʻi heni ʻa Sherry ke ne fai ha feinga mālohi ange ke faifakamoʻoni fakatuʻupakē.

ʻIo, ʻoku vakai mai ʻa e niʻihi kehé pe ʻoku tau fai koā ki he meʻa ʻoku tau akoʻí. Ko ia ai, lea tauʻatāina ā ʻaki ʻa e feinga ke tatau ʻa e ngutú mo e tuhú.

ʻI he Lotú

Ko e lea tauʻatāiná ʻoku tautefito ʻene mahuʻingá ʻi he taimi ʻoku tau lotu ai kia Sihová. ʻE lava ke tau lilingi taʻetaʻofi atu hotau lotó kia Sihova, ʻi he tuipau te ne fanongo mai ki heʻetau lotú pea te ne tali mai. Te tau maʻu leva ai ha vahaʻangatae māfana mo vāofi mo ʻetau Tamai fakahēvaní. ʻOua ʻaupito naʻa tau toumoua ke lea kia Sihova, ʻi heʻetau fakakaukau ʻoku ʻikai ke tau fuʻu mahuʻinga. Fēfē kapau ʻoku tau ongoʻi halaia ʻi haʻatau faihala pe kuo taʻotaʻofi ʻe ha fai angahala ia ʻetau leaʻaki hotau lotó? ʻE kei lava ke tau lea tauʻatāina ki he Hau ʻo e ʻunivēsí?

ʻOku ʻomi ʻe he tuʻunga māʻolunga ʻo Sīsū ko e Taulaʻeiki Lahí ha toe makatuʻunga ki heʻetau tuipau ko ia ʻi he lotú. ʻI he Hepelu 4:​15, 16, ʻoku tau lau ai: “ʻOku tau maʻu ha taulaʻeiki-lahi ʻoku taʻemalavea ʻi hotau ngaahi vaivaiʻanga, kaekehe ʻoku tau maʻu ha toko taha kuo ʻosi ʻahiʻahi ʻi he meʻa kotoa pe, hange ko kitautolu, kae ʻikai haʻane angahala. Ko ia ke tau ʻunuʻunu atu malohi ai ki he taloni ʻo kelesi, ke tau maʻu meesi, mo tau taʻimalie ha kelesi ke tokoni mai.” ʻOku pehē ʻa e mahuʻinga ʻo e pekia ʻa Sīsuú mo hono ngafa ko e Taulaʻeiki Lahí.

Kapau ʻoku tau kumi fakamātoato ke talangofua kia Sihova, ʻoku tau maʻu ai ʻa e ʻuhinga lelei ʻaupito ke ʻamanekina te ne fanongo lelei mai. Naʻe tohi ʻe he ʻapositolo ko Sioné: “Siʻi ʻofaʻanga, kapau ʻoku ʻikai ke fakahalaia kitautolu ʻe hotau loto, ʻoku tau loto lahi ʻi he feangai mo e ʻOtua. Kaeʻumaʻā, ʻilonga ha meʻa ʻoku tau kole ki ai, ʻoku tau maʻu meiate ia, koeʻuhi ʻoku tau tauhi ʻene ngaahi tuʻutuʻuni, pea ʻoku tau fai ʻa e ngaahi meʻa ʻoku ne hohóʻia ai.”​—1 Sione 3:​21, 22.

Ko e lea taʻefakangatangata kia Sihova ʻi he lotú, ʻoku ʻuhinga ia ʻe lava ke tau tala kiate ia ha faʻahinga meʻa pē. Ko e hā pē ha faʻahinga manavasiʻi ʻoku tau maʻu, ko e hā pē ha faʻahinga loto-hohaʻa, loto-moʻua pe tailiili ʻoku tau tofanga ai, ʻe lava ke tau ʻave ia kia Sihova mo tau tuipau heʻikai ʻaupito te ne fakaongo tuli mai ki heʻetau ngaahi lotu loto-moʻoni haké. Neongo kapau kuo tau fai ha angahala mamafa, ʻoua ʻe tuku ke hanga ʻe he ongoʻi halaiá ʻo taʻotaʻofi ʻetau lea ʻo lotú kapau ʻoku tau fakatomala moʻoni.

Ko e meʻaʻofa maʻataʻatā ko ia ʻo e lea tauʻatāiná ko ha meʻa mahuʻinga moʻoni ia. ʻOku tau lava ʻo ngāueʻaki ia ke fakalāngilangiʻi ʻa e ʻOtuá ʻi heʻetau ngāue fakamalangá mo e faiakó pea ʻunuʻunu ofi ange ai kia Sihova ʻi he lotu. Ko ia ‘ʻoua ʻe liʻaki hoʻomou lotolahi; he ko e meʻa ia ʻoku lahi hono fakakoloa,’​—ko e fakakoloa ʻo e moʻui taʻengatá.​—Hepelu 10:35.

[Fakatātā ʻi he peesi 13]

Naʻe lea loto-toʻa ʻa e ʻapositolo ko Paulá

[Fakatātā ʻi he peesi 15]

Ko e faiako ola leleí ʻoku fiemaʻu ki ai ʻa e lea tauʻatāina

[Fakatātā ʻi he peesi 16]

Ko e lea tauʻatāina ʻi he lotú ʻoku mahuʻinga ʻaupito