Ko ha Lēsoni ki he Hīkisiá mo e Fakatōkilaló

KO HA meʻa naʻe hoko ʻi he moʻui ʻa Tuʻi Tēvitá ʻoku fakamamafaʻi ai ʻa e faikehekehe ʻi he anga-fakatōkilalo moʻoní pea mo e hīkisiá. Naʻe hoko ia ʻi he hili hono ikunaʻi ʻe Tēvita ʻa Selusalema pea fokotuʻu ia ko hono kolomuʻá. Naʻe hanga ʻa Tēvita kia Sihova ko e Tuʻi moʻoni ia ʻo ʻIsilelí, ko ia naʻá ne fokotuʻutuʻu ai ke ʻomai ki he koló ʻa e ʻAʻaké, ʻa ia naʻá ne fakatātaaʻi ʻa e ʻi ai tonu ʻa e ʻOtuá. Naʻe mātuʻaki mahuʻinga ʻa e meʻá ni kia Tēvita ʻo ne fakahāhaaʻi ʻikai toe fakapulipuli ai ʻene fiefiá ʻi heʻene muimui ʻi he kau taulaʻeiki naʻa nau fua ʻa e ʻAʻaké. Naʻe mamata ʻa e kakai ʻo Selusalemá ki honau tuʻí ʻi heʻene “hopo” holó pea mo e ‘tukuingata ʻene meʻé.’—1 Kalonikali 15:​15, 16, 29; 2 Samiuela 6:​11-​16.

Kae kehe, ko e uaifi ʻo Tēvitá ʻa Maikale, naʻe ʻikai te ne kau ʻi he fononga fiefia ko iá. Naʻá ne fakasio hifo mei ha kātupa, pea ʻi he ʻikai te ne leleiʻia ʻi he founga ʻo hono tataki ʻe Tēvita ʻa e fakahīkihiki kia Sihová, naʻá ne “maaʻi ia ʻi hono loto.” (2 Samiuela 6:16) Ko e hā naʻe ongoʻi peheni ai ʻa Maikalé? ʻOku hā mahino, naʻá ne fakakaukau ʻo fuʻu māʻolunga ki hono tuʻunga ko e ʻofefine ʻo e ʻuluaki tuʻi ʻo ʻIsileli ko Saulá, pea ko e uaifi ia he taimi ko ení ʻo e tuʻi hono ua ʻo ʻIsilelí. Mahalo pē naʻá ne ongoʻi ko hono husepānití, ʻa e tuʻí, naʻe ʻikai totonu ke ne tuku hifo ia ki he tuʻunga ʻo e kakai lāuvalé pea kau ʻi heʻenau faʻahinga kātoangá. Ko e ngaahi ongoʻi ʻafungi ko iá naʻe fakaeʻa ia ʻi he anga ʻo ʻene fakafeʻiloaki kia Tēvita ʻi heʻene foki atu ki ʻapí. ʻI he lea manukí naʻá ne pehē ange: “Hono ʻikai langilangiʻia ʻa e Tuʻi Isileli ʻanenai, heʻene fakatelefua ia ʻanenai ʻi he ʻao ʻo e ngaahi kaunanga ʻo ʻene kau tamaioʻeiki, ʻo hange ko e fielelei ʻa ha siana takatuʻu, ʻo ne fakatelefua ia!”—2 Samiuela 6:20.

Naʻe anga-fēfē ʻa e tali ʻa Tēvita ki he fakaanga ko ení? Naʻe valokiʻi ʻe Tēvita ʻa Maikale ʻaki ʻene fakahaaʻi ange naʻe siʻaki ʻe Sihova ʻa ʻene tamaí, ʻa Saula, ka ne hōifua kiate ia. Naʻe toe tala ange ʻe Tēvita: “Te u ʻai ke toe taha atu hoku taʻetokaʻi, ʻio, te u aʻu ki ha meʻa te u fakalieliaʻi [pe tuku hifo] ai au: ka ko e ngaahi kaunanga ʻoku ke lea ki ai ko kinautolu te nau langilangiʻia ʻiate au.”—2 Samiuela 6:​21, 22.

ʻIo, naʻe fakapapauʻi ʻe Tēvita ke ne hanganaki tauhi anga-fakatōkilalo kia Sihova. Ko e tōʻongá ni ʻoku tokoniʻi ai kitautolu ke tau mahinoʻi ʻa e ʻuhinga naʻe ui ai ʻe Sihova ʻa Tēvita “koe tagata tatau mo hoku loto.” (Ngāue 13:​22, PM; 1 Samiuela 13:14) Ko hono moʻoní, naʻe muimui ʻa Tēvita ʻi he faʻifaʻitakiʻanga lelei taha ʻo e anga-fakatōkilaló, ʻa ia ko e ʻOtua ko Sihová tonu. ʻOku mālié, he ko e kupuʻi lea naʻe ngāueʻaki ʻe Tēvita ʻi heʻene pehē ange kia Maikale ‘te u tuku hifo aú’ ʻoku mei ha tefitoʻi veape faka-Hepelū ia, ʻa ia ʻoku toe ngāueʻaki ke ne fakamatalaʻi ʻa e vakai tonu ʻa e ʻOtuá ki he faʻahinga ʻo e tangatá. Neongo ko Sihova ʻa e Tokotaha lahi taha ʻi he ʻunivēsí, ʻoku fakamatalaʻi ia ʻe he Sāme 113:​6, 7 “ʻoku ne afeitaulalo [ko e hifo mei hoto tuʻungá pe ngeiá ʻi he feangainga mo ha tokotaha māʻulalo] ke vakai ʻa e ngaahi meʻa ʻa langi mo mamani. ʻOku ne fokotuʻu mei he efu ʻa e lauvale; ʻoku ne hiki siʻi masiva mei he tuʻungaveve.”

Koeʻuhi ko Sihová ʻoku anga-fakatōkilalo, ʻoku ʻikai ha ofo ʻi heʻene fehiʻa ʻi he “matahihiki” ʻa e kakai hīkisiá. (Palovepi 6:​16, 17) ʻI hono fakahāhā ʻa e tōʻonga fulikivanu mo e taʻefakaʻapaʻapa pehē ki he tokotaha kuo fili ʻe he ʻOtuá ke tuʻí, naʻe toʻo ai meia Maikale ʻa e monū ʻo hono fanauʻi ha foha kia Tēvita. Naʻá ne mate paʻa. Ko ha lēsoni mahuʻinga moʻoni ia kia kitautolu! Ko e faʻahinga kotoa ʻoku nau fiemaʻu ʻa e hōifua ʻa e ʻOtuá kuo pau ke nau muimui ʻi he ngaahi leá ni: “Mou noʻo kotoa pe ʻaki ʻa e fefakavaivaiʻaki: he ʻoku tali tekeʻi ʻe he ʻOtua ʻa e ʻafungi, ka ʻoku ne foaki kelesi ki he angavaivai.”—1 Pita 5:5.