Lotu ʻOku Lelei Kiate Koé

“ʻOKU lelei kiate au ke fakaofiofi ki he ʻOtuá,” ko e fakahaaʻi ia ʻe he tokotaha-tohi-saame ko ʻĒsafé. Naʻá ne fakakaukau ʻi he taimi ʻe taha ke faʻifaʻitaki ki he faʻahinga ʻoku nau taʻetokanga fekauʻaki mo e ʻOtuá koeʻuhi ka nau tuli ki ha moʻui fiemālié. Ka naʻe fakakaukau leva ʻa ʻĒsafe ki he ngaahi ʻaonga ʻo e fakaofiofi ki he ʻOtuá peá ne fakaʻosiʻaki ʻo pehē naʻe lelei ia kiate ia. (Sāme 73:​2, 3, 12, 28) ʻOku lelei kiate koe he ʻahó ni ʻa e lotu moʻoní? ʻE lava fēfē ke ke maʻu ʻaonga mei ai?

Ko e lotu ki he ʻOtua moʻoní ʻoku tokoniʻi ai koe ke ke mavahe mei ha founga moʻui mātuʻaki siokita. Koeʻuhi ko e founga naʻe ngaohi ai kitautolu ʻe he “ʻOtua ʻo e ʻofa,” ko e faʻahinga ʻoku nau tuli ki he ngaahi meʻa pē ʻanautolú heʻikai ʻaupito lava ke nau maʻu ʻa e fiefiá. (2 Kolinito 13:11) Naʻe akoʻi ʻe Sīsū ha moʻoni tefito fekauʻaki mo e natula fakaetangatá ʻi heʻene pehē: “ʻOku te monuʻia [pe fiefia] lahi ʻi he fai ha foaki atu, ʻi heʻete maʻu ha foaki mai.” (Ngāue 20:35) Ko e ʻuhinga ia ʻoku tau fiefia ai ʻi hono fai ʻo e ngaahi meʻa maʻa hotau ngaahi kaumeʻá mo e fāmilí. Ka ko e fiefia lahi tahá ʻoku hoko ia ʻi hono fai ʻo e ngaahi meʻa maʻá e ʻOtuá. ʻOkú ne tuha lahi ange mo ʻetau ʻofá ʻi ha toe taha kehe pē. Ko e kakai ʻe laui miliona mei he ngaahi tafaʻaki kotoa pē ʻo e moʻuí kuo nau ʻiloʻi ko e lotu ki he ʻOtuá ʻaki hono fai ʻa e meʻa ʻokú ne fiemaʻú ʻoku fakafiemālie moʻoni.—1 Sione 5:3.

Maʻu ha Taumuʻa ʻi he Moʻuí

Ko e lotu moʻoní ʻoku toe lelei ia kiate koe koeʻuhí ʻokú ne ʻoatu kiate koe ha taumuʻa ʻi he moʻuí. Kuó ke fakatokangaʻi ʻa hono faʻa fakafehokotaki ʻo e fiefiá ki he ongoʻi ʻokú ke lavaʻi ha meʻa ʻaongá? Ko e tokolahi taha ʻo e kakaí ʻoku ʻi ai ʻenau taumuʻa ʻi he moʻuí, ʻa ia ʻoku fekauʻaki ia mo honau fāmilí, ngaahi kaumeʻá, pisinisí pe ko e fakafiefiá. Koeʻuhi ko e ngaahi taʻetaʻepau ʻi he moʻuí, ko e ngaahi meʻá ni ʻoku faʻa ʻikai malava ke ne ʻai kinautolu ke nau fiefia. (Koheleti 9:​11) Kae kehe, ko e lotu moʻoní ʻokú ne tokoniʻi koe ke ke maʻu ha taumuʻa māʻolunga ange, ko e taumuʻa ʻoku hokohoko atu ʻene fakafiemālié ʻo aʻu ki he taimi ʻoku fakamoʻoniʻi ai ʻa e fakalotomamahi ʻa e ngaahi tafaʻaki kehe ʻo e moʻuí.

Ko e lotu moʻoní ʻoku kau ki ai ʻa hono ʻiloʻi ʻo Sihova mo tauhi faitōnunga kiate ia. Ko e faʻahinga ʻoku nau fai iá ʻoku nau ʻunuʻunu ofi ʻaupito ai ki he ʻOtuá. (Koheleti 12:13; Sione 4:​23; Semisi 4:8) Te ke ʻiloʻi nai ʻoku faingataʻa ke fakaʻuta atu ʻokú ke ʻiloʻi lelei ʻaupito ʻa e ʻOtuá ʻo ne hoko ai ko ho kaumeʻa. Ka ʻi he fakakaukauloto ki he lēkooti ʻo ʻene ngaahi feangainga mo e kakaí pea ʻi he fakakaukau atu ki he meʻa kuó ne fakatupú, te ke lava moʻoni ai ke ʻiloʻi ʻa e ngaahi tafaʻaki ʻo hono ʻulungāangá. (Loma 1:20) Tānaki atu ki ai, ʻi hono lau ʻo e Folofola ʻa e ʻOtuá, ʻe lava ke ke mahinoʻi ai ʻa e ʻuhinga ʻoku tau ʻi heni aí, ʻuhinga ʻoku fakaʻatā ai ʻe he ʻOtuá ʻa e faingataʻá, founga te ne fakangata ai ʻa e faingataʻá pea ko e meʻa fakatoʻoaloto taha nai ʻi he meʻa kotoa, ko e founga ʻe lava ke ke fakahoko ai ha tafaʻaki mohu ʻuhinga ʻi he taumuʻa ʻa e ʻOtuá. (Aisea 43:10; 1 Kolinito 3:9) Ko e mahino peheé ʻe lava ke ne ʻoatu kiate koe ha ʻuhinga foʻou ki he moʻuí!

Hoko ko ha Tokotaha Lelei Ange

Ko e lotu moʻoní ʻoku lelei ia kiate koe koeʻuhi ʻoku tokoniʻi ai koe ke ke hoko ko ha tokotaha lelei ange. ʻI hoʻo kau ki he lotu moʻoní, ʻokú ke fakatupulekina ai ha angaʻitangata ʻoku taki atu ki he ngaahi vā fakafiefia ange mo e niʻihi kehé. ʻOkú ke ako ai mei he ʻOtuá pea mei hono ʻAló ʻo fekauʻaki mo e ngāue faitotonu, lea anga-ʻofa mo e moʻui fua fatongiá. (Efeso 4:20–​5:5) ʻI hoʻo ʻiloʻi lelei ʻaupito ʻa e ʻOtuá ʻo ke hoko ai ʻo ʻofa ʻiate iá, ʻokú ke ongoʻi ʻoku ueʻi ai koe ke ke faʻifaʻitaki kiate ia. ʻOku pehē ʻe he Tohi Tapú: “Mou hoko muʻa ko e kau faʻifaʻitaki ki he ʻOtua, ʻo tāu mo e fanau kuo ʻofeina: pea fou ʻi he ʻofa.”—Efeso 4:32e, 33 (Ef 5:​1, 2, PM).

ʻIkai ʻe fakafiefia ke takatakaiʻi koe ʻe ha kakai ʻoku nau faʻifaʻitaki ki he ʻofa ʻa e ʻOtuá? Ko e meʻa fakafiefiá, ko e lotu ki he ʻOtua moʻoní ʻoku ʻikai ko ha ngāue ia ke ke fai toko taha. ʻOkú ne ʻai koe  ke ke fetuʻutaki mo e niʻihi kehe ʻoku nau ʻofa ki he meʻa ʻoku totonu mo leleí. Ko e moʻoni, te ke ongoʻi taʻefiemālie nai ʻi he foʻi fakakaukau fekauʻaki mo e lotu kuo fokotuʻutuʻu fakakautahá. Kae kehe, hangē ko ia naʻa tau sio ki ai ʻi he kupu ki muʻá, ko e palopalema ʻo e ngaahi lotu lahi ʻoku ʻikai pehē ko e fokotuʻutuʻu kinautolú ka ko e ʻikai ke fokotuʻutuʻu kinautolu ʻi he founga totonú pea ki he ngaahi ʻuhinga totonú. Ko e ngaahi lotu lahi kuo fokotuʻutuʻú ʻoku nau fakahoko ʻa e ngaahi taumuʻa taʻefakakalisitiane. Ko e kakai ʻa e ʻOtuá ʻoku fokotuʻutuʻu kinautolu ʻe Sihova tonu ki ha taumuʻa māʻolunga. ʻOku pehē ʻe he Tohi Tapú: “Ko e ʻOtua ʻoku ʻikai ko e fakatupu maveuveu, ka ko e fakatupu melino.” (1 Kolinito 14:33) ʻI he hangē ko e laui miliona ʻo e niʻihi kehé, te ke ʻiloʻi nai ko e feohi mo ha kulupu fokotuʻutuʻu maau ʻo e kau Kalisitiané ʻokú ne tākiekina lelei ʻa hoʻo fakakaukaú.

ʻAmanaki ki he Kahaʻú

Ko e Tohi Tapu Māʻoniʻoní ʻoku fakahaaʻi ai ko e ʻOtuá ʻokú ne fokotuʻutuʻu ʻa e kau lotu moʻoní koeʻuhi ke lava ʻo nau hao ai ʻi he ngataʻanga ʻo e fokotuʻutuʻu ʻo e ngaahi meʻa lolotongá pea maʻu ai ha māmani foʻou ʻa ia “ʻoku nofoʻanga ai ʻa maʻoniʻoni.” (2 Pita 3:13; Fakahā 7:​9-17) Ko e lotu ʻoku lelei kiate koé ʻoku ʻomai ai ʻa e ʻamanaki, ʻa ia ʻoku fiemaʻu pau kae maʻu ai ʻa e fiefiá. ʻOku fakatuʻunga ʻe he niʻihi ʻenau ʻamanaki ki he kahaʻú ʻi he tuʻu maʻumaʻuluta ʻa e ngaahi puleʻangá, ko e ngaahi ʻamanaki ki he pisinisí, pe ko e fakatuʻotuʻa atu ki ha moʻui lelei mo ha vāhenga mālōlō feʻunga. Ka ʻoku siʻi ha taha ʻo e ngaahi meʻá ni te ne ʻomai ha makatuʻunga fefeka ke fakatuʻamelie atu ai ki ha kahaʻu fiefia. ʻI he tafaʻaki ʻe tahá, naʻe tohi ʻe he ʻapositolo ko Paulá: “Kuo tuʻu ʻetau falala ki he ʻOtua Moʻui.”—1 Timote 4:10.

Kapau te ke fai ha kumi fakaʻāuliliki, ʻe lava ai ke ke maʻu ʻa e kau lotu moʻoní. ʻI he māmani māvahevahe ʻi he ʻaho ní, ʻoku fakaʻilongaʻi mahino ai ʻe he ʻofá mo e fāʻūtahá ʻa e Kau Fakamoʻoni ʻa Sihová. ʻOku nau haʻu mei he meimei puleʻanga mo e ʻātakai kotoa; neongo ia, ʻoku fakafāʻūtahaʻi kinautolu ʻe he feʻofaʻakí mo e ʻofa kia Sihová. (Sione 13:35) ʻOku nau fakaafeʻi koe ke ke kumi ke ʻilo ʻa e meʻa kuo nau aʻusiá. Naʻe tohi ʻa ʻĒsafe: “ʻOku lelei kiate au ke fakaofiofi ki he ʻOtua.”—Sāme 73:28.

[Fakatātā ʻi he peesi 7]

ʻE lava ke ke hoko ko e kaumeʻa ʻo e ʻOtuá