Talanoa ki he Moʻuí

Naʻe Tokoniʻi Au ʻe Sihova Ke U Fekuki mo e Ngaahi Faingataʻa ʻi he Moʻuí

FAKAMATALA FAI ʻE DALE IRWIN

“KO E TOKO VALÚ KUO FEʻUNGA! LIUNGA UA ʻA E TOKO FAÁ LŌ-LAHI AI ʻA E NGAFÁ.” Ko e lau ia ʻa ha ʻuluʻi-kaveinga ʻo ha nusipepa fakalotofonua ʻi hono fakahaaʻi ʻa e toe tānaki mai ʻo e māhanga fā ki homau fāmilí ʻa ia naʻe ʻi ai ʻa e tamaiki fefine ʻe toko fā. ʻI hoku tuʻunga ko ha talavoú, naʻe ʻikai haʻaku taumuʻa ke mali, ʻo ʻikai ʻaupito ha taumuʻa ke maʻu fānau. Neongo ia, ko hoku tuʻungá eni—ko e tamai ʻa e toko valu!

NAʻE fāʻeleʻi au ʻi he 1934 ʻi he kolo ko Mareeba, ʻi ʻAositelēlia. Ko e siʻisiʻi taha au ʻi he fānau ʻe toko tolu. Naʻe hiki ki mui ʻa homau fāmilí ki Pilisipeini, ʻa ia naʻe faiako ai ʻa ʻeku faʻeé ʻi ha lautohi faka-Sāpate ʻi he siasi Metotisí.

ʻI he konga ki muʻa ʻo e 1938, naʻe līpooti ai ʻi he ngaahi nusipepa fakalotofonuá ʻo pehē ko Joseph F. Rutherford mei he ʻuluʻi ʻapitanga ʻo e Kau Fakamoʻoni ʻa Sihová ʻi he māmaní ʻe fakafisingaʻi nai ke ne hū mai ki ʻAositelēlia. “Ko e hā ʻoku nau fai ai eni kiate iá?” ko e fehuʻi ia ʻa e fineʻeikí ki he tokotaha Fakamoʻoni hono hoko naʻe ʻaʻahi mai ki homau ʻapí. Naʻe tali ange ʻe he Fakamoʻoní: “ʻIkai naʻe pehē ʻe Sīsū ʻe hanga ʻe he kakaí ʻo fakatangaʻi ʻa hono kau muimuí?” Naʻe tali leva ai ʻe he fineʻeikí ʻa e kiʻi tohi ko e Cure, ʻa ia naʻe fakahaaʻi ai ʻa e ngaahi faikehekehe lahi ʻi he vahaʻa ʻo e lotu moʻoní mo e lotu loí. a ʻI he maongo ki he fineʻeikí ʻa e kiʻi tohí, naʻá ne ʻave ai kimautolu fānaú ki ha fakataha ʻa e Kau Fakamoʻoni ʻa Sihová ʻi he Sāpate hono hokó. Naʻe ʻuluaki fakafepaki mālohi ki ai ʻa ʻeku tamaí, ka naʻá ne hiki ʻi he taimi ki he taimi ha ngaahi fehuʻi Fakatohitapu ʻo ʻoange ki he fineʻeikí ke ne ʻave ki ha taha ʻo e fanga tokouá. Naʻe hanga leva ʻe he tokouá ʻo hiki ange ʻa e ngaahi tali Fakatohitapú ki he fineʻeikí ke ne ʻave ki he tangataʻeikí.

ʻI he Sāpate ʻe taha naʻa mau ō ai mo ʻemau tamaí ki he fakatahá, ʻi heʻene fakataumuʻa ke fakahaaʻi ʻa ʻene taʻefiemālie ʻi he Kau Fakamoʻoní. Kae kehe,  hili ʻene talanoa mo e ʻovasia fefonongaʻakí ʻa ia naʻe ʻaʻahi mai ki he fakatahaʻangá ʻi he taimi ko iá, naʻe liliu ai e fakakaukau ʻa e tangataʻeikí pea aʻu ʻo ne fakaʻatā homau ʻapí ke ngāueʻaki ko ha senitā ia ki ha ako Tohi Tapu fakauike, ʻa ia naʻe kau ki ai ʻa e faʻahinga mahuʻingaʻia ʻi homau feituʻú.

ʻI Sepitema 1938, naʻe papitaiso ai ʻa ʻeku ongo mātuʻá. Ko kimautolu fānaú naʻa mau papitaiso ʻi Tīsema 1941 ʻi ha fakataha-lahi fakafonua naʻe fai ʻi he Paʻake Hargreave ʻi Senē, Niu Sau Uele. Naʻá ku taʻu fitu ai. Hili iá, naʻá ku kau maʻu pē ʻi he ngāue fakamalangá mo ʻeku ongo mātuʻá. ʻI he ngaahi ʻaho ko iá, naʻe ʻave holo ai ʻe he Kau Fakamoʻoní ʻa e ngaahi kalamafoni toʻotoʻo ʻi he matapā ki he matapā, ʻo tā ʻa e ngaahi malanga Fakatohitapu naʻe ʻosi hiki ki he faʻahinga ʻi he ngaahi ʻapí.

Ko e tokotaha Fakamoʻoni ʻa ia ʻoku ou manatuʻi lelei ko Bert Horton. Naʻe ʻi ai ʻene kā meʻa fakaleʻolahi—ko ha meʻalele naʻe fakanaunau ʻaki ha meʻa fakaleʻolahi mālohi mo ha fuʻu sipika ʻa ia naʻe fokotuʻu ʻi he funga kaá. Naʻe fakafiefia ʻa e ngāue mo Bert, tautefito ki ha kiʻi tamasiʻi ʻi hoku taʻú. Ko e fakatātaá, ʻi hono fakamafola ha malanga Fakatohitapu mei ha foʻi māʻolunga, naʻá ma faʻa sio hifo ai ki ha kā polisi ʻoku huʻu mai kia kimaua. Naʻe tāmateʻi fakavave ʻe Bert ʻa ʻene meʻa fakaleʻolahí, ʻo ma lele ki ha toe foʻi māʻolunga ʻe taha ʻi ha laui kilomita, ʻo tā ai ha toe malanga ʻe taha. Naʻá ku ako ʻa e meʻa lahi ʻo fekauʻaki mo e falala kia Sihová pea mo e loto-toʻá meia Bert pea mo e fanga tokoua mateaki mo loto-toʻa kehe hangē ko iá.​—Mātiu 10:16.

ʻI heʻeku taʻu 12, naʻá ku faifakamoʻoni toko taha maʻu pē ai ʻi he tuku ʻa e akó. ʻI he taimi ʻe taha, naʻá ku fetaulaki ai mo e fāmili Adshead. Naʻe aʻu ʻi ha taimi ʻo maʻu ai ʻa e moʻoní ʻe he ongo mātuʻá fakatouʻosi, ko ʻena fānau ʻe toko valú, pea mo e fanga makapuna tokolahi. ʻOku ou fakamālō kia Sihova ʻi heʻene fakaʻatā au, ko ha kiʻi tamasiʻi pē, ke u fakafeʻiloaki ʻa e moʻoni Fakatohitapú ki he fāmili lelei ko ení.​—Mātiu 21:16.

Muʻaki Ngaahi Monū ʻi he Ngāué

ʻI hoku taʻu 18, naʻá ku hoko ai ko ha faifekau tāimuʻa taimi-kakato pea naʻe vaheʻi ai au ki Maitland, Niu Sau Uele. ʻI he 1956, naʻe fakaafeʻi ai au ke u ngāue ʻi he ʻōfisi vaʻa ʻa ʻAositelēliá ʻi Senē. ʻI he kau ngāue ʻe toko 20 aí, ko e vahe tolu ʻe taha nai ʻo kinautolu naʻa nau kau ʻi he kau paní, fakataha mo e ʻamanaki ke pule fakataha mo Kalaisi ʻi hono Puleʻanga fakahēvaní. Ko ha monū moʻoni ia ke ngāue fakataha mo kinautolu!​—Luke 12:32; Fakahā 1:6; 5:​10.

Ko ʻeku fakapapau ke nofo taʻemali ai peé naʻe mole ia ʻi heʻeku fetaulaki mo Judy Helberg, ko ha tuofefine tāimuʻa hoihoifua ʻa ia naʻe fakaafeʻi fakataimi mai ki he ʻōfisi vaʻá ke ne tokoniʻi au ʻi ha ngāue lahi ko e teuteu ki ha fakataha-lahi. Naʻá ku feʻofaʻaki mo Judy, pea naʻá ma mali ʻi he taʻu ʻe ua ki mui ai. Hili iá, naʻá ma kamata ʻi he ngāue fakasēketí, ʻa ia naʻe kau ki ai ʻa e ʻaʻahi ki he fakatahaʻanga ʻe taha ʻa e Kau Fakamoʻoni ʻa Sihová ʻi he uike taki taha ke fakalototoʻaʻi ʻa e fanga tokouá.

ʻI he 1960, naʻe fāʻeleʻi ai ʻe Judy ʻa homa ʻuluaki ʻofefiné, ko Kim. ʻI he ʻahó ni, ko e ʻi ai ha fānaú ʻe ʻuhinga iá ko e pau ke mavahe mei he ngāue fakasēketí ʻo nofo maʻu ʻi ha feituʻu pē ʻe taha. Ka ʻi heʻema ʻohovalé, naʻe fakaafeʻi kimaua ke hokohoko atu pē ʻema ʻaʻahi ki he ngaahi fakatahaʻangá. Hili ʻa e lotu lahi ʻo fekauʻaki mo ia, naʻá ma tali ʻa e fakaafé, pea ʻi he ngaahi māhina ʻe fitu hoko mai aí, naʻe fononga ai ʻa Kim mo kimaua ʻi he kilomita ʻe 13,000 ʻi he pasi, vakapuna, mo e lēlue ʻi heʻema ngāue ʻi he ngaahi fakatahaʻanga naʻa nau tuʻu vā mamaʻo ʻi Kuinisilani ʻi he Vahefonua Fakatokelaú. Naʻe ʻikai haʻama kā ʻi he taimi ko iá.

Naʻá ma nofo maʻu pē ʻi he ngaahi ʻapi ʻo e fanga tokouá mo e fanga tuofāfiné. Koeʻuhi ko e ʻea māfaná, ko e ngaahi loki mohé ʻi he ngaahi ʻaho ko iá naʻe faʻa ʻi ai pē hono ngaahi puipui kae ʻikai ha ngaahi matapā, ʻa ia naʻe toe ʻai ai ke ma loto-mafasia ʻi he taimi naʻe tangi ai ʻa Kim he poʻulí.  Ko e fatongia ʻo hono tokangaʻi ʻo ha pēpē pea mo homa vāhenga-ngāué naʻe faifai pē ʻo fakamoʻoniʻi naʻe fuʻu faingataʻa. Ko ia naʻá ma nofo maʻu ai ʻi Pilisipeini, pea naʻá ku kamata ngāue ai ʻi he tā ʻo e ngaahi mataʻitohi fakaʻilongá, ko ha faʻahinga ʻaati fakakomēsiale. ʻI he taʻu ʻe ua mei hono fāʻeleʻi ʻo Kim, naʻe toe maʻu ʻema taʻahine ʻe taha ko Petina.

Fekuki mo e Meʻa Fakamamahi

ʻI he 1972, ʻi he taʻu 12 mo e taʻu 10 ʻa e ongo tamaiki fefiné, naʻe mate ai ʻa Judy ʻi he kanisā Hodgkin, ko ha faʻahinga ngungu ʻi he lamá. Ko e mole ko ení naʻe ʻikai meimei lava ke ʻūkuma ʻe homau fāmilí. Neongo ia, lolotonga e puke ʻa Judy pea mo e hili ʻene maté, naʻe fakafiemālieʻi kimautolu ʻe Sihova fakafou ʻi heʻene Folofolá, ko hono laumālie māʻoniʻoní pea mo e fetokouaʻakí. Naʻa mau toe maʻu ʻa e mālohi mei he makasini Taua Leʻo ʻa ia naʻa mau maʻu ʻi he hili pē ʻa e meʻa fakamamahi naʻe hokó. Naʻe ʻi ai ha kupu naʻe fekauʻaki mo e ngaahi ʻahiʻahi fakafoʻituituí, ʻo kau ai ʻa e mamahi ʻi he mate ʻa ha tahá, pea naʻe fakahaaʻi ai ʻa e founga ʻe lava ke tokoniʻi ai kimautolu ʻe he ngaahi ʻahiʻahí ke mau fakatupulekina ʻa e ngaahi ʻulungāanga fakaʻotua pehē, hangē ko e kātakí, tuí mo e anga-tonú. b​—Semisi 1:​2-4.

Hili e mate ʻa Judy, naʻá ku toe vāofi ange ai mo hoku ongo ʻofefiné. Ka kuo pau ke u fakahā, ko ha fāinga lahi moʻoni ia ʻi he feinga ke fakahoko fakatouʻosi ʻa e ngafa ʻo e tamaí mo e faʻeé. Kae kehe, naʻe ʻai ʻe he anga-lelei ʻa hoku ongo ʻofefiné ke faingofua ange ai ʻa e ngāué ni.

Toe Mali mo ha Fāmili Fakalahi

Naʻe faifai pē ʻou toe mali. Ko hoku uaifi foʻoú, ko Mary, naʻe lahi ʻa e meʻa naʻá ma faitatau ai. Ko ia foki ne mole ʻa hono hoa malí ʻi he kanisā Hodgkin. Naʻe toe ʻi ai foki mo ʻene ongo tamaiki fefine ʻe toko ua—ko Colleen mo Jennifer. Ko Colleen naʻá ne siʻi hifo ʻaki ʻa e taʻu ʻe tolu ʻia Petina. Ko ia ʻi he taimi ko ení naʻe kau ai ki homa fāmilí ʻa e tamaiki fefine ʻe toko fā, taʻu 14, 12, 9, mo e taʻu 7.

Naʻá ku fili mo Mary ʻi he kamatá ke ma taki taha akonakiʻi pē ʻa ʻema ongo tamaikí tonu kae ʻoua ke ongoʻi fiemālie ʻa e ongo tamaiki kehé ke na tali ʻa e fakahinohino mei he mātuʻa-uá. ʻI homa vahaʻangatae tonu ko e husepānití mo e uaifí, ko Mary mo aú naʻe ʻi ai ʻema ongo lao mahuʻinga ʻe ua. ʻUluakí, naʻe ʻikai ʻaupito fakahaaʻi ʻema ngaahi taʻefelotoí ke sio ki ai ʻa e fānaú, pea ko hono uá, ʻi he fehoanaki mo e tefitoʻi moʻoni Fakatohitapu ʻoku hiki ʻi he Efeso 4:​26, naʻá ma talanoa pē kae ʻoua kuó ma fakaleleiʻi ʻa e ngaahi meʻá​—ʻo tatau ai pē pe ʻe aʻu ʻo laui houa!

Naʻe fakaʻohovale ʻa e feʻunuʻaki lelei ʻa e tokotaha kotoa pē ki he moʻui ʻi he tuʻunga ko ha fāmili-uá, ka ko e manatu ki he ongo mole ʻi homa fāmilí naʻe ʻikai ke mole vave atu ia. Ko e fakatātaá, ko e pō Mōnité naʻe hoko ia ko e “pō tangi” ʻo Mary. Hili ʻemau ako fakafāmilí, ʻi he ʻalu ʻa e tamaiki fefiné ʻo mohé, naʻe faʻa huaʻi mai ai ʻa e ngaahi ongoʻi ʻa Mary naʻá ne kukutá.

Naʻe loto ʻa Mary ke ʻi ai haʻama fānau tonu. Ko e meʻa fakamamahí, he naʻá ne tamatō. ʻI he toe feitama ʻa Mary, naʻe tatali mai ai ha meʻa fakaʻohovale lahi kia kimaua. Naʻe fakahaaʻi ʻe he meʻa sivi pēpeé naʻá ne fua holo, ʻo ʻikai ko ha pēpē pē ʻe taha, ka ko e fā! Naʻá ku ʻi ha tuʻunga ai ʻo e moʻutāfuʻua mo e taʻetui. Ko au eni, ko hoku taʻu 47 pea kuo vavé ni ke u hoko ko e tamai ʻa e toko valu! Ko e māhanga faá naʻe fanauʻi mai kinautolu ʻi ha tafa ʻi Fepueli 14, 1982, ʻi he hili e uike ʻe 32 ʻo e taimi feitamá. Ko e fakahokohoko ʻo honau fanauʻí, ko Clint, kilokalami ʻe 1.6; Cindy, kilokalami ʻe 1.9;  Jeremy, kilokalami ʻe 1.4; mo Danette, kilokalami ʻe 1.7. Naʻe ʻikai te nau mata tatau.

Hili pē hono fanauʻi kinautolú, naʻe haʻu ai ʻa e toketā ʻa Mary ʻo tangutu mai ʻi hoku tafaʻakí.

“ʻOkú ke hohaʻa fekauʻaki mo hono tokangaʻi ʻo e fānaú?” ko ʻene ʻeké ia.

Naʻá ku pehē ange, “Ko ia, kuo teʻeki ai ʻaupito te u foua ʻa e vāʻihalá ni ki muʻa.”

Ko ʻene ngaahi lea hokó naʻe fakaʻohovaleʻi mo fakalototoʻaʻi moʻoni ai au.

“Heʻikai fakasivaʻi ʻa hoʻo ʻamanakí ʻe hoʻo fakatahaʻangá,” ko ʻene leá ia. “Ko e tuai pē hoko ha kiʻi meʻa siʻi kuo nau aʻu atu ʻo tokoni!”

Tupu mei he pōtoʻi ʻa e toketā fai fāʻele tuʻu-ki-muʻa ko ení mo ʻene timi fakafaitoʻó, naʻe ʻatā ai ki ʻapi mei he falemahakí ʻa e fanga kiʻi pēpē moʻui lelei ʻe toko fā ʻi he māhina pē ʻe ua.

Ko e Faingataʻa ʻo Hono Tauhi Hake ʻo e Māhanga Faá

Ke tauhi maʻu ʻa e tuʻunga māú, naʻá ku fokotuʻu ai mo Mary ha taimi-tēpile houa ʻe 24. Ko e tamaiki fefine lalahi ange ʻe toko faá naʻa nau ʻaonga ʻaupito ʻi he toʻo-tamá. Pea naʻe hoko moʻoni e lea ʻa e toketaá—ʻi ha hoko ha “kiʻi meʻa siʻi” pē naʻe ʻosi mateuteu ʻa e fakatahaʻangá ke tokoniʻi kimautolu. Ki muʻa ange, naʻe fokotuʻutuʻu ai ʻe ha kaumeʻa fuoloa ko John MacArthur ʻa e Kau Fakamoʻoni ʻa ia ko e kau pōtoʻi ngāue ke nau fakalahi homau falé. ʻI he fanauʻi mai ʻo e fanga kiʻi pēpeé, naʻe tokoni ha kulupu ʻo e fanga tuofāfiné ʻi he toʻo-tamá. Ko e anga-lelei kotoa ko ení ko ha fakahāhā ia ʻo e ngāueʻaki ʻa e ʻofa faka-Kalisitiané.​—1 Sione 3:​18.

Naʻe hoko ai ʻi ha tuʻunga ʻa e māhanga faá, ko e “fanga kiʻi pēpē ʻa e fakatahaʻangá.” Aʻu mai ki he ʻahó ni, ʻoku nau vakai ko e fāmili ʻa e fanga tokoua mo e fanga tuofāfine ʻofa tokolahi, ʻa ia naʻa nau tokoniʻi kimautolú. Pea kia Mary, naʻá ne hoko ko ha uaifi mo e faʻē lelei ʻaupito ʻa ia naʻá ne foaki taʻesiokita ki heʻene fānaú. Naʻá ne ngāueʻaki moʻoni ʻa e meʻa kuó ne ako mei he Folofola ʻa e ʻOtuá mo ʻene kautahá. ʻOku ʻikai ha toe faleʻi ʻe lelei ange ai!​—Sāme 1:​2, 3; Mātiu 24:45.

Ko e ngaahi fakataha faka-Kalisitiané mo e ngāue fakamalangá naʻe hoko ai pē ia ko e konga mahuʻinga ʻo ʻemau founga-tuʻumaʻu fakauiké, neongo ko ha fāinga ia ke tokangaʻi ʻa e pēpē ʻe toko faá. Ko ha tāpuaki he taimi ko iá ʻa e ngaahi ako Tohi Tapu naʻá ma fai mo e ongo hoa mali ʻe ua, ʻa ia naʻa nau anga-lelei ʻo omi ke fai ʻenau akó ʻi homa ʻapí. Neongo naʻe ʻai ʻe he meʻá ni ke faingofua ange ai kia kimaua ʻa e ngaahi meʻá, naʻe helaʻia ʻaupito ʻa Mary ʻi he taimi ʻe niʻihi ʻo ne kiʻi mohe ai he lolotonga ʻa e akó, mo fuofua pē ha pēpē ʻoku mohe. Naʻe faifai pē ʻo hoko fakatouʻosi ʻa e ongo hoa malí ko homa fanga tokoua fakalaumālie.

Akoʻi Fakalaumālie ʻi ha Taʻu Siʻi

Naʻa mo e ki muʻa ke lava ʻo ʻalu ʻa e fanga kiʻi pēpeé, naʻá ku hanga mo Mary pea mo e tamaiki fefine lalahí ʻo ʻave kinautolu ʻi he ngāue fakamalangá. Lolotonga ʻa e taimi tōtuʻú, naʻá ku ʻave tautau toko ua ai mo Mary kinautolu, pea naʻe ʻikai te nau fakahela. Ko hono moʻoní, naʻa nau faʻa hoko ko ha kamataʻanga ia ʻo e fetalanoaʻaki mo e faʻahinga anga-fakakaumeʻa ʻi he ngaahi ʻapí. ʻI he ʻaho ʻe taha naʻá ku fetaulaki ai mo ha tangata ʻa ia naʻá ne taukaveʻi ʻo pehē kapau naʻe fanauʻi koe ʻi ha fakaʻilonga fakaʻasitalolosia pau ʻi ha ʻaho papau, ʻe hoko ʻa ho angaʻitangatá ki ha sīpinga pau. Naʻe ʻikai te u fakakikihiʻi ia, ka naʻá ku kole kiate ia pe ʻe lava ke u toe foki ange ʻamui ʻi he pongipongi pē ko iá. Naʻá ne loto ki ai, ko ia naʻá ku foki atu ai mo e māhanga faá. ʻI heʻene sio ʻohovalé, naʻá ku fokotuʻutuʻu kinautolu mei he lahi ki he siʻi. Naʻá ma toki fai leva ha fetalanoaʻaki anga-fakakaumeʻa, ʻo ʻikai fekauʻaki pē mo e ngaahi faikehekehe ʻoku hā mahino ʻi honau fōtungá kae toe pehē foki ki he ngaahi faikehekehe lahi ʻi honau ʻulungāangá, ʻa ia naʻe fakahalaʻi ai ʻene fakakaukaú. “He meʻa ngali vale moʻoni ʻeku ʻoatu kia koe ʻa e fakakaukau ko ení,” ko ʻene leá ia. “Te u fai ha toe fekumi lahi ange, ʻikai ko ia?”

 ʻI heʻenau kei īkí, naʻe fehiʻa ʻa e toko faá ʻi hono fai fakalūkufua kia kinautolu ʻa e akonakí ʻi he taimi naʻa nau ongongataʻa aí, ko ia naʻá ma fakatonutonu tāutaha ai kinautolu. Ka neongo ia, naʻa nau ʻiloʻi naʻe ngāueʻaki ʻa e ngaahi tuʻutuʻuni tatau ki he tokotaha kotoa. ʻI heʻenau fehangahangai mo e ngaahi ʻīsiu fekauʻaki mo honau konisēnisí ʻi he ʻapiakó, naʻa nau tuʻumaʻu ai pē ʻi he ngaahi tefitoʻi moʻoni Fakatohitapú pea nau fepoupouaki, ko Cindy naʻe hoko ko ʻenau tokotaha-leá. Naʻe vave hono ʻiloʻi ʻe he kakaí ko ha tākiekina mālohi moʻoni ʻa e māhanga faá!

Naʻá ku maʻu mo Mary ʻa e ngaahi tuʻunga faingataʻa anga-maheni ʻi hono tokoniʻi ʻa e fānaú ke nau mateaki ai pē kia Sihova lolotonga ʻenau taʻu hongofulu tupú. ʻE lava pē ke ma pehē ko e ngāué ne mei faingataʻa ʻaupito ange ka ne taʻeʻoua ʻa e poupou ʻa ha fakatahaʻanga ʻofa pea mo e meʻakai fakalaumālie lahi fau naʻá ma maʻu mei he tafaʻaki hā mai ʻo e kautaha ʻa Sihová. Naʻá ma feinga ke fai ha ako Tohi Tapu fakafāmili tuʻumaʻu pea ke tauhi ke ʻatā ʻa e fetuʻutakí, neongo naʻe ʻikai maʻu pē ke faingofua eni. Neongo ia, naʻe ʻaonga ʻa e feingá koeʻuhi he kuo fili ʻa ʻema fānau kotoa ʻe toko valú ke nau tauhi kia Sihova.

Fekuki mo e Taʻumotuʻá

ʻI he faai mai ʻa e ngaahi taʻú, kuó u fiefia ai ʻi he ngaahi monū fakalaumālie lahi: ko e mātuʻa ʻi he fakatahaʻangá, ʻovasia kolo lahi mo e ʻovasia sēketi tokoni. Kuó u toe ngāue ko ha mēmipa ʻo e Kōmiti Fetuʻutaki Fakafalemahaki fakalotofonuá, ʻa ia ko honau fatongiá ke tokoniʻi ʻa e kau toketaá ke nau ngāue fāitaha mo e kau mahaki Fakamoʻoní ʻi he taimi ʻoku hoko ai ʻo tālangaʻi ʻa e huhu totó. ʻOku feʻunga mo e taʻu ʻe 34 ʻa ʻeku toe maʻu ʻa e monū ʻo hono lēsisita au ke u fakahoko ʻa e ngaahi mali. Kuó u fai ʻa e ngaahi kātoanga mali nai ʻe 350, ʻo kau ai e mali ʻa hoku ngaahi ʻofefine ʻe toko onó.

ʻOku ou fakamālō maʻu pē kia Sihova ʻi he poupou mateaki kuó u maʻú,ʻuluakí meia Judy pea ʻi he taimi ní meia Mary. (Palovepi 31:​10, 30) Lolotonga ʻena poupouʻi au ʻi heʻeku ngāue ko ha mātuʻa ʻi he fakatahaʻangá, naʻá na toe fokotuʻu ha faʻifaʻitakiʻanga lelei ʻi he ngāue fakafaifekaú pea tokoni ʻi hono fakahūhū ʻa e ngaahi ʻulungāanga fakalaumālié ki he fānaú.

ʻI he 1996, naʻe ʻiloʻi ai ʻa e mahaki ʻi hoku ʻutó ʻa ia ʻokú ne fakatupunga ke tete hoku nimá pea ʻikai ke palanisi ai ʻeku ʻalú. Ko ia naʻe ʻikai kei lava ai ke u ngāue ʻi hono tā ʻa e ngaahi mataʻitohi fakaʻilongá. Kae kehe, ʻoku ou kei maʻu pē ʻa e fiefia lahi ʻi he ngāue ʻa Sihová, neongo ʻoku ou ʻi ha tuʻunga māmālie. ʻI he tafaʻaki leleí, kuó u fakatupulekina ai ʻa e kaungāongoʻi ki he faʻahinga taʻumotuʻa kehé.

ʻI heʻeku sioloto atu ki heʻeku moʻuí, ʻoku ou fakamālō kia Sihova ʻi heʻene ʻi ai maʻu pē ke tokoniʻi au mo hoku fāmilí ke mau fehangahangai fiefia mo e ngaahi tuʻunga lahi ʻo e faingataʻá. (Aisea 41:10) Ko au mo Mary, fakataha mo ʻema fānau ʻe toko valú, ʻoku mau toe fakamālōʻia ʻa homau fāmili lelei ʻaupito mo tokoni ʻo e fanga tokoua mo e fanga tuofāfine fakalaumālié. Kuo fakamoʻoniʻi ʻe he tokotaha kotoa ʻene ʻofá ʻi he ngaahi founga lahi ange ʻi he meʻa ko ia ʻoku lava ke mau fakalaú.​—Sione 13:​34, 35.

[Fakamatala ʻi lalo]

[Fakatātā ʻi he peesi 12]

Mo e fineʻeikí, ko hoku taʻokete ko Garth mo hoku tuofefine ko Dawn, ʻi he teuteu ke fononga ki he fakataha-lahi ʻi he 1941 ʻi Senē

[Fakatātā ʻi he peesi 13]

Mo Judy mo e pēpē ko Kim ʻi he taimi naʻá ku ʻi he ngāue sēketi ai ʻi Kuinisilaní

[Fakatātā ʻi he peesi 15]

Hili hono fanauʻi ʻo e māhanga faá, naʻe ʻosi mateuteu ʻa ʻema tamaiki fefine lalahi ʻe toko faá mo e fakatahaʻangá ke tokoniʻi kimautolu