“ʻOku Totonu Pe ke Fai ki he Pule ʻa e ʻOtua ʻi he Pule ʻa e Tangata”

Fai ha Fakamoʻoni Fakaʻāuliliki ʻo ʻIkai “Lotosiʻi”

ʻOKU teu atu ha fuʻu kakai anga-fakamālohi ke haha ha sevāniti talangofua ʻa e ʻOtuá ke mate. ʻI he taimi tonu pē ko iá, ʻoku hamusi mai ʻe he kau sōtia Lomá ʻa e tangatá mei he kau ʻohofí ʻo nau puke ia. ʻOku kamataʻi ʻe he meʻá ni ha ngaahi meʻa hokohoko ʻoku feʻunga hono lōloá mo e taʻu ʻe nima. Ko hono ikuʻangá, ʻoku fanongo ai ʻa e kau ʻōfisa māʻolunga Loma tokolahi ʻo fekauʻaki mo Sīsū Kalaisi.

Ko e tokotaha maʻukoviá ko e ʻapositolo ko Paulá. ʻI he 34 T.S. nai, naʻe fakahā ai ʻe Sīsū ʻe fataki ʻe Paula (Saula) ʻa Hono huafá ʻi he ʻao ʻo e “ngaahi tuʻi.” (Ngāue 9:15) ʻI he taʻu 56 T.S., naʻe teʻeki ai ke hoko ʻa e meʻá ni. Kae kehe, ʻi he fakaofi ke ngata ʻa e fononga fakamisinale hono tolu ʻa e ʻapositoló, ʻoku ʻamanaki ai ke liliu ʻa e ngaahi meʻá.

ʻOhofia kae ʻIkai Holomui

ʻOku hoko atu ʻa e fononga ʻa Paulá ki Selusalema, pea ʻoku fakatokanga ange ai kiate ia ha kau Kalisitiane fakafou “i he Laumalie,” fekauʻaki mo ha fakatanga kakaha ʻoku fakatatali mai kiate ia ʻi he kolo ko iá. ʻOku tali loto-toʻa ʻaki ʻe Paula: “Oku ou teu ke oua e haʻijia be, kae mate foki i Jelusalema, koeuhi koe huafa oe Eiki ko Jisu.” (Ngāue 21:​4-14, PM) ʻI he ʻaʻahi atu pē ko ia ʻa Paula ki he temipale ʻi Selusalemá, ʻoku fakaʻaiʻai ʻe he kau Siu mei ʻĒsia, ʻa ia ʻoku nau maheni mo e lavameʻa fakaʻevangeliō ai ʻa e ʻapositoló, ha fuʻu kakai koeʻuhi ke fakapoongi ia. ʻOku vave atu ʻa e kau sōtia Lomá ʻo fakahaofi ia. (Ngāue 21:​27-32) Ko e fakahaofi ko iá ʻoku maʻu ai ʻe Paula ha faingamālie makehe ke talaki ai ʻa e moʻoni fekauʻaki mo Kalaisí ki he kakai fakafilí pea mo e faʻahinga māʻolunga taautaha.

Malanga ki he Kakai ʻOku Faingataʻa ʻa e Aʻu ki Aí

ʻOku fau hake ʻa Paula ʻi he sitepu ʻo e hūfangaʻanga ʻoku ʻiloa ko e Taua ʻAnitoniá. a Mei he sitepu ko iá, ʻoku ʻoatu ʻe he ʻapositoló ha fakamoʻoni mālohi ki he fuʻu kakai lotú. (Ngāue 21:33–22:21) Ka ʻi heʻene lave pē ki hono fekauʻi ia ke malanga ki he kau Senitailé, ʻoku toe pupuke hake ʻa e kau fakamālohí. ʻOku tuʻutuʻuni ʻa e ʻeikitau ko Lisiá ke fakaʻeke mo kauʻimaeaʻi ʻa Paula ke ʻilo pe ko e hā ʻoku talatalaakiʻi ai ia ʻe he kau Siú. Kae kehe, ʻoku taʻofi hono kauʻimaeaʻí ʻi hono fakahā ʻe Paula ko e tangataʻifonua Loma ia. ʻI he ʻaho hono hokó, ʻoku ʻave ʻe Lisia ʻa Paula ke hā ʻi he Sanetalimí ke ʻilo ai ʻa e ʻuhinga ʻoku talatalaakiʻi ai ia ʻe he kau Siú.—Ngāue 22:22–23:1.

Ko ʻene tuʻu ko ia ʻi he ʻao ʻo e fakamaauʻanga māʻolunga ko ení, ʻoku toe maʻu ai ʻe Paula ha faingamālie lelei ke faifakamoʻoni ki hono kaungā Siú. ʻOku talaki ʻe he ʻevangeliō taʻemanavahē ko ení ʻa ʻene tui ki he toetuʻú. (Ngāue 23:​1-8) Ko e tāufehiʻa anga-fakapō ʻa e kau Siú ʻoku ʻikai pē ke maholoholo pea ʻoku ʻave ʻa Paula ki he nofoʻanga ʻo e kau sōtiá. ʻI he pō hono hokó, ʻokú ne maʻu ai ʻa e fakapapau fakalotolahi ko ení mei he ʻEikí: “ʻOua te ke lotosiʻi: he hange ko hoʻo talatalatonu ʻi Selusalema ʻa e ngaahi meʻa ʻoku kau kiate au, pehē foki kuo pau te ke fakamatala ʻi Loma.”—Ngāue 23:​9-11.

ʻOku kalofi ha faʻufaʻu ke fakapoongi ʻa Paula ʻi hono ʻave fakafufū atu ia ki Sesalia, ko e kolomuʻa Loma ʻo Siuteá. (Ngāue 23:​12-24) ʻI Sesalia, ʻoku toe ʻi ai ha ngaahi faingamālie mahuʻinga kia Paula pea ʻokú ne faifakamoʻoni ai ki he “ngaahi tuʻi.” Kae kehe, ʻoku ʻuluaki fakahā ʻe he ʻapositoló kia Kōvana Filike ʻoku ʻikai ha fakamoʻoni ke poupouʻiʻaki ʻa hono ngaahi tukuakiʻí. Ki mui ai, ʻoku malanga ʻa Paula kiate ia mo hono uaifi ko Telusilá ʻo fekauʻaki mo Sīsū, ko e mapuleʻi-kitá, faitotonú pea mo e fakamaau ʻoku tuʻunuku maí. Kae kehe, ʻoku tuku pilīsone ʻa Paula ʻi he taʻu ʻe ua, ʻi he ʻamanaki ʻa Filike te ne maʻu ha totongi fufū ʻa ia naʻe ʻikai ʻaupito ke ʻoange kiate ia.—Ngāue 23:33–24:27.

ʻI hono fetongi ʻo Filike ʻe Fesitó, ʻoku toe feinga foʻou ai ʻa e kau Siú ke fakahalaiaʻi ʻa Paula pea tāmateʻi.  ʻOku toe fai ha fanongo fakalao ki he hopó ʻi Sesalia, pea ke kalofi hano ʻave ia ki Selusalemá, ʻoku pehē ʻe Paula: “Ko e fakamāuʻanga ʻo Sisa ʻoku te tuʻu ai kita . . . Te u unga au kia Sisa.” (Ngāue 25:​1-11, 20, 21) ʻI ha ngaahi ʻaho ki mui ai, hili hono fakahā ʻe he ʻapositoló ʻa hono tuʻungá ʻi he ʻao ʻo Tuʻi Hēlota ʻAkilipa II, ʻoku pehē ʻe he tuʻi ko iá: “Kuo ke meimei fakahehemaʻi au keu hoko koe Kalisitiane.” (Ngāue 26:​1-28, PM) ʻI he 58 T.S. nai, ʻoku ʻave ai ʻa Paula ki Loma. ʻI he tuʻunga ko ha pōpula ʻi aí, ʻoku hokohoko atu ai ʻa e ʻapositolo mohu fakakaukaú ni ʻi ha toe taʻu ʻe ua ke kumi ha ngaahi founga ke malanga ai fekauʻaki mo Kalaisi. (Ngāue 28:​16-31) ʻOku hā mai naʻe faifai ʻo tuʻu ʻa Paula ʻi he ʻao ʻo ʻEmipola Neló, ʻo fakahaaʻi ai ʻokú ne tonuhia pea naʻe faai pē ʻo malava ke toe hoko atu ʻene ngāue fakamisinalé ʻi he tuʻunga ko ha tangata tauʻatāina. ʻOku ʻikai ha fakamatala naʻe ʻi ai ha toe ʻapositolo kehe naʻá ne maʻu ha faingamālie ke aʻu ai ki he kakai ʻiloa ko iá mo e ongoongo leleí.

Hangē ko ia ʻoku hā mei hení, naʻe moʻui ʻa e ʻapositolo ko Paulá ʻo fehoanaki mo e tefitoʻi moʻoni mahuʻinga naʻe fakahaaʻi ʻe hono kaungā Kalisitiané ʻi he ʻao ʻo e fakamaauʻanga Siú: “ʻOku totonu pe ke fai ki he pule ʻa e ʻOtua ʻi he pule ʻa e tangata.” (Ngāue 5:29) Ko ha faʻifaʻitakiʻanga lelei moʻoni ia kuó ne tuku mai maʻa kitautolú! Neongo ʻa e ngaahi feinga kīvoi ʻa e tangatá ke taʻofi iá, naʻe talangofua kakato ʻa e ʻapositoló ki he fekau ke fai ha fakamoʻoni fakaʻāulilikí. Ko e ola ʻo e talangofua taʻeueʻia ko eni ki he ʻOtuá, naʻe lavaʻi ai ʻe Paula ʻa ʻene vāhenga ngāue “ko e ipu matuʻaki fili” ke fataki ʻa e huafa ʻo Sīsuú ki he “Senitaile, mo e ngaahi tuʻi, mo haʻa Isileli foki.”—Fakaʻītali ʻamautolu; Ngāue 9:15.

[Fakamatala ʻi lalo]

[Puha/Fakatātā ʻi he peesi 9]

NAʻE MAHUʻINGAʻIA PĒ NAI ʻA PAULA ʻI HONO TAUKAPOʻI IÁ?

ʻI he fakamatala ʻa e faʻutohi ko Ben Witherington III ki he fehuʻi ko ení, ʻokú ne tohi: “Mei he vakai ʻa Paulá . . . ʻoku ʻikai ko e fuʻu meʻa mahuʻingá ke ne taukapoʻi ia, ka ke ne fai ha fakamoʻoni fekauʻaki mo e kōsipelí, ki he kau maʻu mafaí, ʻa e Siu mo e Senitaile fakatouʻosi. . . . Ko hono moʻoní, ko e kōsipelí moʻoni ia ʻoku hopoʻí.”