ʻI Ai ʻa Kalaisí—Ko e Hā ʻEne ʻUhinga Kiate Koé?

“Ko e hā ʻa e fakaʻilonga ʻo hoʻo ʻi aí mo e fakaʻosiʻosi ʻo e fokotuʻutuʻu ʻo e ngaahi meʻá?”—MT. 24:3, NW.

 1. Ko e hā ʻa e foʻi fehuʻi fakatupu tokanga naʻe ʻeke ʻe he kau ʻapositolo ʻa Sīsuú kiate iá?

 ʻI HE meimei taʻu ʻe ua afe kuo maliu atú, naʻe langaʻi hake ai ha foʻi fehuʻi ʻe he toko fā ʻo e kau ʻapositolo ʻa Sīsuú ʻi ha fetalanoaʻaki fakaekinautolu mo honau ʻEikí ʻi he Moʻunga ʻŌlivé. Naʻa nau ʻeke ange: “ʻE hoko fakakū ʻa e ngaahi meʻá ni, pea ko e hā ʻa e fakaʻilonga ʻo hoʻo ʻi aí mo e fakaʻosiʻosi ʻo e fokotuʻutuʻu ʻo e ngaahi meʻá?” (Mt. 24:3, NW) ʻI he foʻi fehuʻi ko iá, naʻe ngāueʻaki ai ʻe he kau ʻapositoló ʻa e ongo kupuʻi lea fakatupu tokanga ʻaupito ʻe ua, ko e “hoʻo ʻi aí” mo e “fakaʻosiʻosi ʻo e fokotuʻutuʻu ʻo e ngaahi meʻá.” ʻOku ʻuhinga ki he hā ʻa e ongo kupuʻi lea ko iá?

 2. Ko e hā ʻa e ʻuhinga tefito ʻo e foʻi lea “fakaʻosiʻosi”?

² Ke tomuʻa vakai ki he kupuʻi lea hono uá, fakakaukau angé ki he foʻi lea “fakaʻosiʻosi,” ko e liliu ia ʻo e foʻi lea faka-Kalisi ko e syn·teʹlei·a. ʻI he New World Translation, ʻoku hokohoko fakalea ai ʻa e foʻi leá ni ko e “fakaʻosiʻosi,” lolotonga ia ko ha foʻi lea faka-Kalisi felāveʻi mo ia ko e te’los, ʻoku liliu ia ko e “ngataʻanga.” Ko e kehekehe ʻi he ʻuhinga ʻo e ongo foʻi leá ni ʻoku lava ke fakatātaaʻi ia ʻaki hono fakamatalaʻi ʻo ha malanga ʻoku fai ʻi he Fale Fakatahaʻangá. Ko e fakaʻosiʻosi ʻo e malangá ʻa e konga fakaʻosí, ʻa ia ʻoku fakamoleki ai ʻe he tokotaha malangá ha kiʻi taimi siʻisiʻi ʻi hono fakamanatu ki he kau fanongó ʻa e meʻa kuo fai ki ai ʻa e lāuleá pea fakahaaʻi leva ʻa e kaunga kiate kinautolu ʻa e fakamatala ko iá. Ko e ngataʻanga ʻo e malangá ʻa e taimi ko ia ʻoku mavahe ai ʻa e tokotaha malangá mei he peletifōmú. ʻI ha founga meimei tatau, fakatatau ki he Tohi Tapú, ko e kupuʻi lea “fakaʻosiʻosi ʻo e fokotuʻutuʻu ʻo e ngaahi meʻá” ʻoku ʻuhinga iá ki he vahaʻa taimi ʻoku taki atu ki he ngataʻangá pea ʻoku kau ki ai mo e ngataʻangá.

 3. Ko e hā e niʻihi ʻo e ngaahi meʻa ʻoku hoko lolotonga ʻa e ʻi ai ʻa Sīsuú?

³ Fēfē ʻa e “ʻi ai” naʻe fehuʻi fekauʻaki mo ia ʻa e kau ʻapositoló? Ko e liliu eni ʻo e foʻi lea faka-Kalisi ko e pa·rou·siʹa. a Ko e pa·rou·siʹa, pe ʻi ai ʻa Kalaisí, naʻe kamata ia ʻi he fakanofo ʻa Sīsū ko e Tuʻi ʻi hēvani ʻi he 1914 pea hokohoko atu ʻo kau ai ʻa e “mamahi lahi,” ʻi he lolotonga ʻene haʻu ke fakaʻauha ʻa e fulikivanú. (Mt. 24:21) Ko e ngaahi meʻa lahi kehe, ʻo kau ai ʻa e “kuonga fakamui” ʻo e fokotuʻutuʻu fulikivanu ʻo e ngaahi  meʻá, ko e fakatahatahaʻi ʻo e faʻahinga kuo filí, mo ʻenau toetuʻu ki he moʻui fakahēvaní, ʻoku hoko ia lolotonga ʻa e ʻi ai ko eni ʻa Sīsuú. (2 Tim. 3:1; 1 Kol.1Ko 15:23; 1 Tes. 4:15-17; 2 Tes. 2:1) ʻOku lava ke pehē ko e vahaʻa taimi ʻoku faʻuʻaki ʻa e “fakaʻosiʻosi ʻo e fokotuʻutuʻu ʻo e ngaahi meʻá” (syn·teʹlei·a) ʻoku fehoanakimālie pe tatau ia mo e vahaʻa taimi ʻoku ui ko e ʻi ai ʻa Kalaisí (pa·rou·siʹa).

Vahaʻa Taimi Lōloa Ange

 4. ʻOku anga-fēfē ʻa e meimei tatau ʻa e ʻi ai ʻa Sīsuú mo e ngaahi meʻa naʻe hoko ʻi he ʻaho ʻo Noá?

⁴ Ko e moʻoniʻi meʻa ko ia ʻa e ʻuhinga ʻo e foʻi lea pa·rou·siʹa ki ha vahaʻa taimi lōloa angé ʻoku fehoanaki ia mo e meʻa naʻe leaʻaki ʻe Sīsū fekauʻaki mo ʻene ʻi aí. (Lau ʻa e Mātiu 24:37-39.) Fakatokangaʻi naʻe ʻikai fakatatau ʻe Sīsū ʻa ʻene ʻi aí ki he vahaʻa taimi nounou ʻa ia naʻe hoko ai ʻa e Lōmaki ʻi he ʻaho ʻo Noá. ʻI hono kehé, naʻá ne fakahoa ʻa ʻene ʻi aí ki he vahaʻa taimi lōloa ange ʻa ia naʻe taki atu ki he hoko ʻa e Lōmakí. Naʻe kau ki ai ʻa hono langa ʻe Noa ʻa e ʻaʻaké mo ʻene ngāue fakamalangá, ʻo aʻu ki he taimi naʻe iku ʻo hoko ai ʻa e Lōmakí. Ko e ngaahi meʻa ko iá naʻe hoko ia ʻi he ngaahi hongofuluʻi taʻu lahi. ʻI ha founga meimei tatau, ʻoku kau ki he ʻi ai ʻa Kalaisí ʻa e ngaahi meʻa ʻoku taki atu ʻo kau ai ʻa e mamahi lahí.—2 Tes. 1:6-9.

 5. ʻOku anga-fēfē hono fakahaaʻi ʻe he ngaahi lea ʻoku hiki ʻi he Fakahā vahe 6 ko e ʻi ai ʻa Sīsuú ko ha vahaʻa taimi lōloa ange?

⁵ Ko e ngaahi kikite Fakatohitapu kehé ʻoku ʻai ʻo hā mahino ai ʻoku ʻuhinga ʻa e ʻi ai ʻa Kalaisí ki ha vahaʻa taimi lahi ange ʻo ʻikai ko ʻene haʻu pē ke fakaʻauha ʻa e fulikivanú. Ko e tohi Fakahaá ʻoku fakatātaaʻi ai ʻa Sīsū ʻokú ne heka ʻi ha hoosi hinehina pea ʻoku ʻoange kiate ia ha kalauni. (Lau ʻa e Fakahā 6:1-8.) Hili hono fakakalauni ia ko e Tuʻi ʻi he 1914, ʻoku fakatātaaʻi ʻa Sīsū ʻokú ne ʻalu “atu ko e ikuna pea ke ne ikuna.” ʻOku fakahā leva ʻi he fakamatalá ʻoku muimui ʻiate ia ʻa e kau heka hoosi ʻi he fanga hoosi ʻi honau taki taha lanu. ʻOku fakatātaaʻi fakaekikite ʻe he meʻá ni ʻa e tau, honge, mo e mahaki fakaʻauha, ko e ngaahi meʻa kotoa ko iá kuo hoko ia ʻi he vahaʻa taimi lōloa ange ʻa ia ʻoku lave ki ai ko e “kuonga fakamui.” ʻOku tau sio ki he fakahoko ʻo e kikité ni ʻi hotau ʻahó ni.

 6. Ko e hā ʻoku tokoniʻi kitautolu ʻe he Fakahā vahe 12 ke tau mahinoʻi fekauʻaki mo e ʻi ai ʻa Kalaisí?

⁶ ʻOku ʻomai ʻe he Fakahā vahe 12 ʻa e ngaahi fakaikiiki lahi ange fekauʻaki mo hono fokotuʻu ʻa e Puleʻanga ʻo e ʻOtuá ʻi hēvaní. ʻOku tau lau ai fekauʻaki mo ha tau ʻi he nofoʻanga taʻehāmaí. Ko Maikeli—ʻa Sīsū Kalaisi ʻi hono tuʻunga fakahēvaní—mo ʻene kau ʻāngeló ʻoku nau faitau mo e Tēvoló mo ʻene kau tēmenioó. Ko hono olá, ko Sētane ko e Tēvoló mo ʻene ngaahi kongakaú ʻoku lī hifo ki he māmaní. ʻI he tuʻunga ko iá, ʻoku tala mai ʻe he fakamatalá, ʻoku ʻita lahi ʻa e Tēvoló “ko ʻene ʻilo, ʻoku toesiʻi pe hono taimi.” (Lau ʻa e Fakahā 12:7-12.) ʻOku hā mahino leva, ko e fokotuʻu ʻo e Puleʻanga ʻo Kalaisí ʻi hēvaní ʻoku hoko atu ai ha vahaʻa taimi ʻa ia ʻoku fakaʻilongaʻi ʻe he tupulaki ʻa e “ʻoiaue” ki he māmaní mo e faʻahinga ʻoku nofo aí.

 7. Ko e hā ʻoku lau fekauʻaki mo ia ʻa e saame hono uá, pea ko e faingamālie ki he hā ʻoku fakamatalaʻi aí?

⁷ Ko e saame hono uá ʻoku lau fakaekikite tatau ai ki hono fokotuʻu ʻo Sīsū ko e Tuʻi ʻi he Moʻunga fakahēvani ko Saioné. (Lau ʻa e Sāme 2:5-9; 110:1, 2.) Kae kehe, ʻoku toe fakahaaʻi ʻe he sāmé ni ʻoku ʻi ai ha vahaʻa taimi ʻoku ʻoange ai ki he kau pule ʻi he māmaní, fakataha mo e faʻahinga ʻoku nau pule ki aí ha faingamālie ke fakamoʻulaloa ai ki he pule ʻa Kalaisí. ʻOku ekinaki kia kinautolu ke nau “poto” pea ke loto-lelei ke “tali akonaki.” ʻIo, lolotonga ʻa e taimi ko iá ʻe “monuʻia ka ko e kakai kuo hufanga kiate ia [ʻOtuá]” ʻaki ʻa e tauhi kia Sihova mo ʻene Tuʻi kuo fakanofó. Ko ia ʻi he taimi ko iá, ʻoku fakaʻatā ai ʻa e faingamālie ke nau liliu lolotonga ʻa e ʻi ai ʻa Sīsū ʻi hono mafai fakatuʻí.—Sāme 2:10-12.

ʻIloʻi ʻa e Fakaʻilongá

8, 9. Ko hai te ne ʻiloʻi ʻa e fakaʻilonga ʻo e ʻi ai ʻa Kalaisí pea mahinoʻi ʻa hono ʻuhingá?

⁸ ʻI he fehuʻi ʻa e kau Fālesí fekauʻaki mo e taimi ʻe hoko mai ai ʻa e Puleʻangá, naʻe tali ʻe Sīsū heʻikai hoko mai ia ʻo “lava ke te mamata ki  ai” ʻo hangē ko ia ko ʻenau fakakaukaú. (Luke 17:20, 21, Ko e Taulua) Heʻikai mahinoʻi ia ʻe he kau taʻetuí. ʻE lava fēfē ke nau mahinoʻi? Naʻe aʻu ʻo ʻikai ke nau ʻiloʻi ʻa Sīsū ko honau Tuʻi ki he kahaʻú. Ko ia ko hai te ne fakatou ʻiloʻi ʻa e fakaʻilonga ʻo e ʻi ai ʻa Kalaisí pea mahinoʻi mo hono ʻuhingá?

⁹ Naʻe hoko atu ʻa Sīsū ʻo ne pehē ʻe sio ʻa ʻene kau ākongá ki he fakaʻilonga ʻo māʻalaʻala tatau pē mo ʻenau sio ki he “tapa mai ʻa e ʻuhila mei he [potu] ʻe taha ʻo e langi, ʻo ne huluʻia ʻo aʻu ki he potu ʻe taha ʻo e langi.” (Lau ʻa e Luke 17:24-29.) ʻOku mahuʻinga ke fakatokangaʻi ko e Mātiu 24:23-27 ʻoku fakafehokotaki hangatonu ai ʻa e poini tatau mo e fakaʻilonga ʻo e ʻi ai ʻa Kalaisí.

Toʻutangata ʻOku Sio ki he Fakaʻilongá

10, 11. (a) Ko e hā ʻa e fakamatala naʻe ʻuluaki fai ki muʻa felāveʻi mo e “toʻutangata” ʻa ia ʻoku hā ʻi he Mātiu 24:34? (e) Ko hai ʻoku taʻetoeveiveiua naʻe mahinoʻi ʻe he kau ākonga ʻa Sīsuú ʻoku kau ʻi he “toʻutangata” ko iá?

¹⁰ Kuo fakamatalaʻi ki muʻa ʻi he makasini ko ení ʻo pehē ʻi he ʻuluaki senitulí, ko e “toʻutangata ko eni” ʻoku lave ki ai ʻi he Mātiu 24:34 naʻe ʻuhingá “ko e toʻutangata ʻo e kau Siu taʻetui ʻi he taimi ko iá.” b Ko e fakamatala ko iá naʻe hā ʻuhinga lelei koeʻuhi ko e ngaahi lēkooti kehe naʻe ngāueʻaki ai ʻe Sīsū ʻa e foʻi lea “toʻutangata” naʻe ʻi ai hono ʻuhinga ʻikai lelei, pea ʻi he ngaahi tuʻunga lahi tahá, naʻe ngāueʻaki ʻe Sīsū ha hoanauna ʻikai lelei, hangē ko e “faikovi” ke fakamatalaʻi ʻaki ʻa e toʻutangatá. (Mt. 12:39; 17:17; Mk. 8:38) Ko ia ai, naʻe fakahaaʻi ki muʻa atu ʻi he pepa ko ení ko e fakahoko ʻi onopōní, naʻe ʻuhinga ʻa Sīsuú ki he “toʻutangata” faikovi ʻo e kau taʻetui ʻa ia te nau sio fakatouʻosi ki he ngaahi tafaʻaki ʻe fakaʻilongaʻi ai ʻa e “fakaʻosiʻosi ʻo e fokotuʻutuʻu ʻo e ngaahi meʻá” (syn·teʹlei·a) mo e ngataʻanga ʻo e fokotuʻutuʻú (teʹlos).

¹¹ Ko e moʻoni ʻi he taimi naʻe ngāueʻaki ʻikai lelei ai ʻe Sīsū ʻa e foʻi lea “toʻutangata,” naʻá ne lea ki he kakai faikovi pe fekauʻaki mo e kakai faikovi ʻi hono taimí. Ka naʻe moʻoni papau ia fekauʻaki mo ʻene fakamatala ʻoku hiki ʻi he Mātiu 24:34? Manatuʻi ko e toko fā ʻo e kau ākonga ʻa Sīsuú naʻa nau ʻunuʻunu “fakaekinautolu” kiate ia. (Mt. 24:3) Koeʻuhi naʻe ʻikai ke ngāueʻaki ʻe Sīsū ʻa e ngaahi hoanauna ʻikai lelei ʻi heʻene lea kia kinautolu fekauʻaki mo e “toʻutangata ko eni,” ʻoku ʻikai ha veiveiua naʻe mahinoʻi ʻe he kau ʻapositoló ko kinautolu mo honau kaungā ākongá naʻa nau hoko ko e konga ʻo e “toʻutangata” ʻa ia heʻikai mole “kaeʻoua ke hoko ʻa e ngāhi meʻa ko ia kotoa pe.”

12. Ko e hā ʻoku fakahaaʻi ʻe he potutohí ʻo felāveʻi mo e faʻahinga naʻe ʻuhinga ki ai ʻa Sīsuú ʻi heʻene ngāueʻaki ʻa e foʻi lea “toʻutangata”?

¹² ʻOku makatuʻunga ʻi he hā ʻetau aʻu ki he fakamulituku ko iá? ʻAki ʻa e fakakaukau fakalelei ki he potutohí. Hangē ko ia naʻe hiki ʻi he Mātiu 24:32, 33, naʻe pehē ʻe Sīsū: “Mou maʻu mei he fiki hono fakatātā; ʻOka muimui hono muka pea ne kamata lau, ʻoku mou ʻilo ʻoku ofi ʻa e faʻahitaʻu mafana: pehe foki kimoutolu ka  mou ka mamata ki he ngāhi meʻa ko ia pea mou ʻilo kuo panaki ia, ʻio, kuo aʻu ki he matapa.” (Fakafehoanaki mo e Maake 13:28-30; Luke 21:30-32.) Pea ʻi he Mātiu 24:34, ʻoku tau lau ai: “Ko au e, ʻoku ou tala atu, ʻE ʻikai ʻaupito mole ʻa e toʻutangata ko eni, kaeʻoua ke hoko ʻa e ngāhi meʻa ko ia kotoa pe.”

13, 14. Ko e hā ʻe lava ai ke tau pehē ko e “toʻutangata” naʻe ʻuhinga ki ai ʻa Sīsuú kuo pau pē ko ʻene kau ākongá?

¹³ Naʻe pehē ʻe Sīsū ko ʻene kau ākongá, ʻe vave ʻa hono paniʻaki ʻa e laumālie māʻoniʻoní, ʻoku totonu ke nau malava ke maʻu ha ngaahi fakamulituku pau ʻi heʻenau sio ʻoku hoko “ʻa e ngāhi meʻa ko ia kotoa pe.” Ko ia ʻoku pau pē ko e ʻuhinga ʻa Sīsuú ki heʻene kau ākongá ʻi heʻene tānaki mai, hangē ko ia ʻoku tau lau ʻi he veesi hokó: “ʻE ʻikai ʻaupito mole ʻa e toʻutangata ko eni, kaeʻoua ke hoko ʻa e ngāhi meʻa ko ia kotoa pe.”

¹⁴ ʻI he ʻikai tatau mo e kau taʻetuí, ko e kau ākonga ʻa Sīsuú heʻikai te nau sio pē ki he fakaʻilongá ka te nau toe mahinoʻi foki ʻa hono ʻuhingá. Te nau “maʻu” pe ako mei he ngaahi tafaʻaki ʻo e fakaʻilongá pea “ʻiloʻi” ʻa honau ʻuhinga moʻoní. Te nau mahinoʻi kakato leva “kuo panaki ia, ʻio, kuo aʻu ki he matapa.” Neongo ʻoku moʻoni ko e kau Siu taʻetuí mo e kau Kalisitiane pani faitōnungá fakatouʻosi naʻa nau sio ki hano fakahoko fakangatangata ʻo e ngaahi lea ʻa Sīsū ʻi he ʻuluaki senitulí, ko hono kau muimui pani pē he taimi ko iá naʻe lava ke nau ako mei he ngaahi meʻa ko eni naʻe hokó—naʻe lava ke nau mahinoʻi ʻa e ʻuhinga moʻoni ʻo e meʻa naʻa nau sio ki aí.

15. (a) Ko hai ʻoku faʻuʻaki ʻa e “toʻutangata” ʻi onopōní ʻa ia naʻe ʻuhinga ki ai ʻa Sīsuú? (e) Ko e hā ʻoku ʻikai malava ai ke tau fikaʻi ʻa e vahaʻa taimi pau ʻo e “toʻutangata ko eni”? (Sio ki he puha ʻi he peesi 25.)

¹⁵ Ko e faʻahinga ʻoku ʻikai haʻanau mahino fakalaumālie he ʻaho ní kuo nau ongoʻi kuo ʻikai ha “meʻa ʻoku lava ke te mamata ki ai” ʻi he fekauʻaki mo e fakaʻilonga ʻo e ʻi ai ʻa Sīsuú. ʻOku nau fakaʻuhinga ko e meʻa kotoa pē ʻoku hokohoko atu ia ʻo hangē pē ko ia naʻe ʻi ai he kuohilí. (2 Pita 3:4) ʻI he tafaʻaki ʻe tahá, ko e fanga tokoua pani faitōnunga ʻo Kalaisí, ʻa e kalasi Sione ʻi onopōní, kuo nau ʻiloʻi ʻa e fakaʻilongá ʻo hangē ko ha tapa ʻa ha ʻuhilá pea kuo nau mahinoʻi ʻa hono ʻuhinga moʻoní. ʻI he tuʻunga ko ha kalasí, ko e faʻahinga pani ko ení ʻoku faʻuʻaki ia ʻa e “toʻutangata” ʻi onopooni ʻo e ngaahi toʻumeʻa ʻa ia heʻikai te nau mole atu “kaeʻoua ke hoko ʻa e ngāhi meʻa ko ia kotoa pe.” c ʻOku fakahuʻunga ʻi he meʻá ni ko e niʻihi ʻa ia ko e fanga tokoua pani ʻo Kalaisí te nau kei moʻui pē ʻi he māmaní ʻi he taimi ʻe kamata ai ʻa e mamahi lahi naʻe tomuʻa talá.

 “Mou Leʻo”

16. Ko e hā kuo pau ke fai ʻe he kau ākonga kotoa ʻa Kalaisí?

¹⁶ Kae kehe, ʻoku fiemaʻu ʻa e meʻa lahi ange ʻi hono ʻiloʻi pē ʻa e fakaʻilongá. Naʻe hoko atu ʻa Sīsū ʻo ne pehē: “Ko e meʻa ʻoku ou tala kiate kimoutolu ʻoku ou tala ki he kakai kotoa pē, mou [hanganaki] leʻo.” (Mk. 13:37) ʻOku mahuʻinga ʻaupito eni kia kitautolu kotoa he ʻaho ní ʻo tatau ai pē pe ʻoku tau kau ʻi he kau paní pe ʻi he fuʻu kakai lahí. Kuo laka hake he taʻu ʻe 90 talu mei hono fokotuʻu ʻo Sīsū ʻi hēvani ko e Tuʻí ʻi he 1914. Neongo nai ʻene faingataʻá, kuo pau ke tau fakamoʻoniʻi ʻoku tau mateuteu pea hanganaki leʻo. Ko hono mahinoʻi ʻoku ʻi ai taʻehāmai ʻa Kalaisi ʻi he mafai ʻo e Puleʻangá ʻoku tokoniʻi ai kitautolu ke tau fai ʻa e meʻa ko iá. ʻOku toe fakatokanga mai ai kia kitautolu ʻa e moʻoniʻi meʻa ko ia kuo vavé ni ke ne hoko mai ʻo fakaʻauha ʻa hono ngaahi filí “ʻi ha taimi ʻoku ʻikai te [tau] ʻamanaki ai kiate ia.”—Luke 12:40.

17. ʻOku totonu ke ʻai ʻe he mahino ko ení ke tau ongoʻi fēfē, pea ko e hā ʻoku totonu ke tau fakapapauʻi ke faí?

¹⁷ Ko ʻetau mahinoʻi ʻa e ʻuhinga ʻo e ʻi ai ʻa Kalaisí ʻoku tokoni ia ke fakalahi ai ʻetau ongoʻi ʻo e fakavavevavé. ʻOku tau ʻiloʻi ʻoku ʻosi ʻi ai ʻa Sīsū pea kuó ne pule taʻehāmai ʻi hēvani ko e Tuʻí talu mei he 1914. Kuo vavé ni ke ne haʻu ʻo fakaʻauha ʻa e faikoví pea fakahoko mai ha ngaahi liliu lahi ki he foʻi kolope kotoa ko ení. Ko ia ʻoku totonu ai ke tau fakapapauʻi lahi ange ʻi ha toe taimi ke kau longomoʻui ʻi he ngāue naʻe tomuʻa tala ʻe Sīsū ʻi heʻene pehē: “ʻE ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga [teʹlos].”—Mt. 24:14.

[Fakamatala ʻi lalo]

ʻE Fēfē Haʻo Tali?

• ʻOku anga-fēfē ʻetau ʻiloʻi ko e ʻi ai ʻa Sīsuú ko ha vahaʻa taimi lōloa ange?

• Ko hai ʻokú ne ʻiloʻi ʻa e fakaʻilonga ʻo e ʻi ai ʻa Sīsuú pea mahinoʻi ʻa hono ʻuhingá?

• Ko hai ʻoku faʻuʻaki ʻa e toʻutangata ʻi onopooni ʻoku lave ki ai ʻi he Mātiu 24:34?

• Ko e hā ʻoku ʻikai malava ai ke tau fikaʻi ʻa e lōloa tonu ʻo e vahaʻa taimi ʻo e “toʻutangata ko eni”?

[Fehuʻi ki he Ako]

[Puha ʻi he peesi 25]

ʻE Lava Ke Tau Fikaʻi ʻa e Lōloa ʻo e Vahaʻa Taimi ʻo e “Toʻutangata ko Eni”?

Ko e foʻi lea “toʻutangata” ʻoku faʻa ʻuhinga ia ki he kakai ʻo e taʻumotuʻa kehekehe ʻa ia ʻoku nau moʻui lolotonga ha vahaʻa taimi pau pe meʻa pau ʻoku hoko. Ko e fakatātaá, ʻoku tala mai ʻe he Ekisoto 1:6 kiate kitautolu: “Naʻe pekia ʻa Siosifa mo hono ngaahi tokoua kotoa pe, mo e toʻutangata ko ia katoa.” Naʻe kehekehe ʻa Siosifa mo hono fanga tokouá ʻi honau taʻumotuʻá, ka naʻa nau maʻu ha hokosia tatau lolotonga ʻa e vahaʻa taimi tatau. Naʻe kau ʻi he “toʻutangata ko ia” ʻa e niʻihi ʻo e fanga tokoua ʻo Siosifa naʻe fanauʻi ki muʻa ʻiate iá. Ko e niʻihi ʻo kinautolu naʻa nau moʻui fuoloa ange ʻia Siosifa. (Sen. 50:24) Ko e niʻihi kehe ʻi he “toʻutangata ko ia,” hangē ko Penisimaní, ne fanauʻi kinautolu hili hono fanauʻi ʻo Siosifá pea ʻoku ngalingali naʻa nau kei moʻui atu pē hili ʻa e mate ʻa Siosifá.

Ko ia ʻi he taimi ʻoku ngāueʻaki ai ʻa e foʻi lea “toʻutangata” ʻo ʻuhinga ki he kakai ʻoku moʻui ʻi ha taimi paú, ko e lōloa tonu ʻo e taimi ko iá heʻikai lava ke tala ia ka ko hono ʻiloʻi pē ʻoku ʻi ai hono ngataʻanga pea ʻe ʻikai ke fuʻu lōloa. Ko ia ai, ʻi hono ngāueʻaki ʻa e kupuʻi lea ko e “toʻutangata ko eni,” hangē ko ia ʻoku hiki ʻi he Mātiu 24:34, naʻe ʻikai ke ʻoange ʻe Sīsū ia ki heʻene kau ākongá ha founga faifika ke malava ai ke nau fakapapauʻi ʻa e taimi ʻe ngata ai ʻa e “ngaahi ʻaho fakaʻosí.” ʻI hono kehé, naʻe hoko atu ʻa Sīsū ʻo fakamamafaʻi heʻikai te nau ʻiloʻi ʻa e “ʻaho ko ia mo hono houa.”—2 Tim. 3:1; Mt. 24:36.

[Fakatātā ʻi he peesi 22, 23]

Hili hono fakakalauni ko e Tuʻí ʻi he 1914, ʻoku fakatātaaʻi ʻa Sīsū ʻokú ne “ikuna”

[Fakatātā ʻi he peesi 24]

“ʻE ʻikai ʻaupito mole ʻa e toʻutangata ko eni, kaeʻoua ke hoko ʻa e ngāhi meʻa ko ia kotoa pe”